Nang Bang Na Hih Dia?

User Rating: 0 / 5

Star InactiveStar InactiveStar InactiveStar InactiveStar Inactive
 

NANG BANG NA HIH DIA ?
(WHAT WOULD YOU DO ?)
By L.T. Ngaihte

LT Ngaihte New

ABC channel a Pathianni zan teng a suak 'WHAT WOULD YOU DO' kici a enkha ngei I om mai thei a, mittui pawtsak thei khop a lunglut huai ngen ahi. I mimal ngaihtuahna atuam dungzui a muhna tuam thei ahi cih phok kawm in, kei muhdan neukhat kon kum nuam hi.

A serial pen, niteng thil tuahkhak,mimal a I lakdan leh I muhdan taklatna ahi. Eitung hilou, midang – I seppih, I omkhawmpih te tung a thiltung imuh khak te ah,bang cibang pan ila a' cih taklatna hoih mahmah ahi. Etsaknan, hotel a singpi dawn a na tutkhawm pih te lak a khat kiang mitdel khat in a purse a sum omzah hong dong a, a purse la khia in, na tutpihpa a pia a,na tutpihpan a dongpa mitdel ahi cih thei in,huai purse apan sum bangzah hiam a la a, a kuah a, a omlai teng 'hiai zah na nei' cin a phazah ahilh hi. A mitdel pan gingta tak in a la a,kipahthu a gen a, apai san hi. Hiai thiltung a gaal apan a mu tu NANG na hi. Bang na hih dia ?

TV show ah, hiai a mitdel pa leh a va dotna pa pangkhawm a hi ua, kitheisiam sa ahi uh. A gaal a kuamah muhlouh a ana en pawl a om. A zonkhiak nop u tuh, bangmah theilou,a gei a singpi dawn a tampi omten hucibang thil diklou alak ua tung cih amuh ciang ua,a thil hih uh ahi.

Khenkhat in a en ua, lamdang a sa mahmah ua, amau teng a ki entuah ua,bangmah dang a hih kei uh. Va ki cinlah louh hoih pen a ngai abang uh. Hiai khong ngaihsak tak kei ci hi awmtak in,amau thilhih ciat ahih zom uhi. Hucibang tuh atam zaw tham ahi uh. Ahihziakin, nupi leh papi tamlou ten awlmohtak in a gal et ua, amithah uah sum la gu pa mohsakna leh mitdelpa hehpihna anei uh cih amuh theih. Hucilak ah Pitek khat a hong ding a,huai sum lapa kiang, 'nang sum kita sam lua na hih leh ka neihsa dollar 10 kon pe di,huai a mitdelpa sum nalak pe kik in,hehpihtak in' ava ci hi.
Scene dang ah, mall lianpi sung a bazar kai khat in, a saite lak apan insurance /compensation a ngetnop man in, a tuang ah atui tawilaia bungkhia a,huai siktaal ci in a kipuk hi. Mi tamtak in a va delh ua,ahihziak in a gei a nupi khat in, 'ka phong kei di,amah a ut mawng a ahih cih ka mu' aci hi.Dawr nei te kiang,thudik a gen a,a thudik muh tuh a gum hi.

Adang khat ah,nungak melhoihtak khat in hotel a atutpih pa kiang, 'ka nu toh kimu dek kahi a, na boyfriend mel mu nuam ka hi ci a,ken lah nei silou ka hihman in,ka nu omsung tomkha ka boyfriend dan in nong pang thei zual diam, hehpihtak in' a ci hi. Va nel bwl a lametna pia ahihman in, huai pan 'ok' ana ci. Anumei in,doctor siam, cardiologist ka hi na cih di'cita.Anu hong tung,a kihou nasa bang ua,anun a boyfriend kipahpih lawdan a om,bang sem na hiam cih peuh dong. Cardiologist na hih leh, ken le cardiac toh kisai problem neukha kha nei ci a,technical pipi hon dong ta. A boyfriend pa cu buai himai, bangmah theilou ahih cia ! A scene dang a huainu mah midang khat kiang hucia part la zual dia ava gen leh,huaipa ut mong mong lou. Ka hithei kei,zuau ka gen thei kei,hici khaw zuau gen hoih kasak lam le ahi kei' ana ci.

Scene dang khat a lah, China nupi leh atapa school a result la khin, Mc Donald a hong tu uh. Anu'n a tapa grade niam mu sa a tai zialzial. Alai bu khong paihkhum, stupid boy khong ci,bang acia A grade lel mu na hia' tun le laisim in, nek le nene ken' peuh ci. Agei a tu ten gal et uh,lah bangmah va hih lou uh. Anu zuntha dia a pawt kal a,nupi khat in atapa va hou pih, 'nau,lungkham ken,ahih hoihlou hilou na hi, nekdi na deihleh kon leisak di' aguk a naci. Anu hong tun nwn ma a atutna a kik san. Hiai te nuta mun dang a hihna ua,nupi khat in va naih in cin,anu va mohsa,hicibang a tate houpih lou dia va sawl. Mundang khat a,zuntha dia a potna lam a nupi khat in 'don't come back' ana cih san.

Asaipa, John Quinones, Mexican origin American in a gen na ah, atup uh, America mi maimai ten thudik a ngaina in a gum ngam na uhiam cih tehna ahi ci hi. Thil diklou om cih atam zaw in mu,atamzaw in hucia om sak,amau a khoih khak kei nak leh va daal sawmlou uh. Tamlou cik ten thildiklou a muh uh awlmoh a dingkhia un, banghiam hih sawm uh. Huailak a kei na etkhakna lak a,numei atam zaw hi.