Hill House Tax pe diing, Land Revenue pen nawnlou diing

User Rating: 0 / 5

Star InactiveStar InactiveStar InactiveStar InactiveStar Inactive
 

Hill House Tax pe diing, Land Revenue pen nawnlou diing
~ Pauzagin Tonsing

pauzagin
Pa Tun hong pawt a, ka kihoulim uhleh ngaihtuakna thuuk tak ana neih hon share apan mit bang a vaak kuau zaw zen hi. Lamka zang a inn mun gam kineih firfer hang a, Pucca Pata i chih zen mah toh gam i kineih pen i thang-awkna uh himai mah hi. I theihna uh tawm zek a diam ah hiai i Jamabandi ua kigelh le mu tellou i di ua aw chih theih hi. I Jamabandi uh MLR Act nuai a Rule 67 nuai a Form 8 dungzui a hon piak uh ahihlam phawk kha lou mawk i bang uhi. Jamabandi taklam kil a kigelh en mah di uh!

Tu in hiai MLR & LR Act kizatna teng kha Valley ahi chih kha a gendan uh ahita. Article lui ka zon leh ka mu zual kei a, kum 20 vel paisa a Nipamacha in ...with certain local adjustment and amendment a chihchih hiai MLR & LR Act kizatnate 6th Schedule piak hileh a huam thei kei diing a chihna ahihdan ka na gelh a, a gingta utlou a tam mahmah uhi. Ahihziak in tu in ging in gingta keile 6th Schedule hi in UT hi in Kukiland hi in Autonomous State hilehle MLR & LR Act kizatna teng tuh Valley chi a Manipuri Goverrnment pang di uh ahi chih i theihchian chiat uh poimoh mahmah hi.

Huchi ahihna a bang chih diing hiam chih ngaihtuah a ngai hi. Bangloh diing chih ma in Dan overlapping leng i et uh a ngai hi. Hiai MLR & LR Act in Lamka zang a Kangvai apan in Khuga Valley in a uapkha hi. Himahleh hiai a kizat hang in hiai a khuate ah Village Authority i nei siseuh hi. Hiai kha i bitna diing ua lampi om sun ahi diing hi. Gam neihna toh kisai in Land Revenue nuai a om mahleh Manipur Village Authority Act nuai ah hiai huap sung a khuate leng a om uhi. Kho Hausa omlouhnate ah leng kiteel thoh in Village Authority i nei uhi.

Village Authority tungtawn in Hill House Tax i pe sauhsuah uhi. Pia i chih hang un Jamabandi nei teng inle Land Revenue i pe leuleu uh, hiai chu dual tax ahi. Dan kichi thil khat tung a om hang a a kikokalh louh diing himahleh hiai overlapping ziak a panlakdan di hichi in hihle bang a chi dia I chi. I huat mahmah uh ...with certain local adjustment and amendment poimoh kha ei i hizaw uh, hiai adjustment and amendment i neih kei mawkleh thang-awk petmah, kipeksuah zou lou diing i hi. Outer Line Permit (OLP) chih i gelhna ah leng landownership ah ADC khut a lut sak mai ni chih i na gelh khinta.

ADC in a huamkhak sung teng ah khua a om a, Manipur Village Authority Act dungzui in MLR & LR Act kizatna leh kizatlouhna khuate ah leng Village Authority i nei uhi. I ngeina khua a gam neihna toh kisai in thuneihna sang pen tawi Hausa ahi, ngeina bang in innmun-loumual diing a i zat sung ei aa ahi a, i zat nawnlouh chiang in Hausa khut ah a lut kiik hi. Tuchiang in adjustment i bawl ua permanent farming hih utte aa diing in 'lease' pian khawng in i kipia uhi. Sum tang a kileikhiakna leh thilthawn piak bang a kipiaknate ah Gift Deed leh Sale Deed chih khawng i bawl uhi. Hichi bangmah MLR & LR Act kizatna khuate a leng i hih uh a ngaita.

MLR & LR Act kizatna ah Jamabandi neite in lei man (land tax) kha SDC tungtawn in i pia ua, himahleh i teenna Khua a Village Authority ah leng Hill House Tax i pia uhi. Dual Tax piak nawnlouh diing, tax khat chauh piak diing chih kha i thupuuk uh a ngaita hi.

Huaiziak in 'Land Revenue piak nawnlouh diing, Hill House Tax kia peta diing'.

MLR & LR Act nuai a i gamlai uh surrender in, Village Authority in huai i gam lai toh kikim, ahihkeileh huai khekkhe diing 'Gam Lai' khat a bawl diing. Loumun, innmun, institution leh Jamabandi tungtawn a gam neihna tengteng Village Authority in record hoih tak a kem diing in, Hill House Tax chauh piak tak diing. Kuama'n Land Revenue piak nawnlouh diing.

Village Authority in tua mimal gam neih siuhseuhte pen ahihna bang a chiantak a kepbit sak diing in, gam pen Lease in hia, Gift in hia ahihkeileh Sale Deed nuai a lai a bawl diing. Ahihang a gam letdan leh neudan a Tax piakna diing Hill House Tax Act nuai a omlou ahihna ah tax i piak diing om sun tuh Hill House Tax himai.

Village Authority in a huamkhak sung a singtang mite kia hilou in Vai leh Meitei-te'n leng a Jamandi uh VA-te kiang a a surrender ua, Hill House Tax a piak diing uh. Hiai singtangmite kia hilou a VA sung a teeng teng a huam diing. Light House kiang a Mandir na tawm leng a Society un Hill House Tax a piak diing uh.

Hiai pen tunung a hih di hilou in tuni mahmah a i kiphin lailai ua Village Authority in ana hih diing uh. Mimal chih in i Jamabandi uh Village Authority a surrender diing in (duplicate le a bawl theih thou ve le maw???), Village Authority in hon na kep hoih sak uh hia ahihkeileh ana haalmang uh hiam chih bel amau vaihawmdan hi diing hi.

Dan toh kituaklou i sa mahmah diing uh, kituaklou ahihleh koi dan toh kituaklou hi in i thei a? MLR Act toh kituaklou maw ahihkeileh Manipur Village Authority Act toh? Hiai dan nih kikokalh a omle dan toh kituaklou khin ahi. Huaiziak in dan kikokalh bialbual kal ah eite suahtakna diing lampi om pen, mipi' tha hanta toh i phuut nir vulvul keileh i maban manthatna khokhuk a ke petmah diing i hi.

Huchi bang a i hih zoh chiang in bangteng in MLR & LR Act kizatna Valley hihsak sawm in hon nawk mahle uh eite'n i tax piakna om sun tuh Hill House Tax hong hi diing a, suahtakna lampi a om thei diam i chi hi.

©September 25, 2015 | Pauzagin Tonsing