UPDATES:

Zomite leh Tuibuk

Liangin-Tombing


Zangleng buktui ka duh ni’n vual ngai ing e,
Laisung gilkial a nat ni’n tun ngai ing e,
Jangleng buktui sen-gual in thawlju thuam e,
Laisung gilkial ka tun in sungtui loh e.

 Nidanglai pek, Khupching leh Ngambawmte tangthu i theihtan a kipan in Zomite lakah tuibuk ana kithang mahmah a, kipolh leh kikholhkhawm, ki ngaihnat etsakna in “Hi, ka tuibuk muam ni” chiin a kideihsakna uh latsakna in nei uhi. Huaiziakin, tubuk kichi in Zomite khosakna ah sunglai tang mahmah hi. Kikholhkhawmna ah tuibuk hawm mah na pibawl in ana kibankhak daudau sek uhi. Huchi bang ahihna  laphuah khat ah ana chiang mahmah hi. Tuibuk ki hawmna a a tangkhalou bang a om zenzen leh khasia thei mahmah uhi. Tua bang a khasiat la, tuibuk hawmkan khak man a ana kiphuak anuai a bang ahi.

“Zangleng buktui hong kihawm ka vuallai ah,
Alai ah mualsing bang hon hawi”

chiin zum leh khasiat thuah in, hawmkan khak a om pen inn lam ah pai vengveng mai hi.

“Zangleng buktui kihawm e,
Kikha dialdial alai ah mualsing bang hawi e,
Mualsing bang hon hawi lou aw,
Jangleng buktui aw, phuanchil a siat simlei a mang ding hi e.”

I Pi-pute’n tuibuk ana ngaisang petmah ua, samat ni, sagoh nite in tuibuk mah in ana kidelh zel uhi. Nungak leh tangval kal ah leng lungsim ki muahtuahna ding in tuibuk mah ana zang pipen uhi.

“Buktui hawm a siam aw e,
Tongdam nem aw;
Na tun in simthu hon hilhsiam ahiam aw,
Lailung a puak simthu nem na hiam aw.”

Pipute singnuai gamual a sabeng, galbeng ding a a kuan chiang un, ahih keh loukuan chiang bang in a manggilh khak ding uh a lauh pen uh ahi. A lungsung ua a ngilhmoh uh tuibuk ahihman in laphuaktu’n, “Tuibuk puak ding manggilh lou, manggilh hang lakik ham tang” chi’n ana phuak hial hi.

Singnuai gammual ah, “Sa-le-gal, gul-le-tang, dawi-le-kau” apan a thawmhau chiang un, a tuibuk uh muam in a kim a kiang uh phih uhi. Tua pen, “Sa hi’n gul-le-tang, dawi-le-kau hileh mi hiam kihil bang a ngai in naih ngamlou uh” chi’n ki lungmuan uhi. Sih-le-man ni khua in le kap leh maute kihehnepna di’n tuibuk mah ana zang zel uhi.

“Na tun hilou buktui ka hehnem nou hi e;
Na lakmai a luankhi luanglai, dai bang thenna hi.”


Tuibuk-TheiTuibuk puakna din “Umta” kichi umgah neu chik, aliangkawi bang, a liangtang bang a om hi. Huai tuibuk puakna dingin mau a kibawl “Theitawn” a zang uhi.
Tuibuk phattuamnate:

     1. Ui keihna maa I nuh leh a natsuak kei.
     2. Gul tukna maa I nuh leh agu a that.
     3. TB veite’n a valh ua leh aphatuam.

Tuibuk za-ek haat mahmah hi. Etsakna di’n, Uphok/Ukeng tobul a zum I nuhsak leh minute 5 ma in si zou hi. Sapte hong hoh tunglai un zong, I Pi-le-Pute’n ana deihsak lua in tuibuk mah ana pia uhi. Amau amuam ding zah theilou in kam dim zeen a muam in, avalhsuk uhi. Mai zen! Si ding kisa in, “Hon thahsawm na hi uh!” chi’n heh petmah in a heh uh chih a kigen ka za kha ngei hi. Zomite deihsakna thuaklou khatna omkha ahi tuak hi. A deihsak luat lam uh thei le uh zaw lungkim mahmah ding hi ua.
Sawtpek apat Zomiten tuibuk ana thangsak mah le uh, nekzonna tham din kua ma’n ana zang kei uhi. Numeite’n amau Innkuan a ding chiat tep ua, sun nitum tum in avak/a kuankhiakna peuh uah a tep khu lunglung sek uhi.
Tulai’n mi khenkhatte’n tuibuk muam khong Pathian Thu awilouhna daan in a ngai ua, himahleh, Pathian in a huatzawk thil ahih veve uhi. Polam siangthouna sangin sunglam siangthouna a poimawh zaw hi. Mihing subaaltu a lutlam hilou in apotlam ahi zaw hi.
 
TUIBUK KHAWL HONG KIPAT DAN:
Tuibuk-Khawl-01Ka huangsung uah tuinak atuk-akhal a kang ngeilou om hi. Hiai tui bangchik a om a bang chik chia kang ding chih theih ahi kei hi. Hiai tui nisat pi kum (1979) in leng kanglou in, innkim-innkiang gentaklouh, khua leh veng in leng nek leh dawn in kinei a, kiphattuampih mahmah hi.
 
Hiai tui tunitan in a ngeingei in omden lai hi. Pathian vualzawlna hong luanglut in, tui omzia ka hon enkhia hi. Tui a toulam in a luang thei kei himhim hi. A luangna asuk/aken/aniam zoh phot leh aluang hat deuhdeuh a, asuk-atou a thei mahmah hi. Mihingte siamna ziakin, adiik/tawp/chip (a lutlam) leh mut/pump (pawtlam) in lak leh hiipkhiak theih hi.
 
Atop in, tui zang a tuibuk tep theihna dan ka hon ngaihtuah khia a ka hon bawl ngal hi. Tui zawlna a kizang pipe ka vutvang a, tuilawng neu zaw ka thunlut leh a tui in huih tawp lutthei in buk kam a tepnate tawngdawl leh Pipe neu pen a vang ah ka peh leh a buk hong chiak ging haza a, ka et leh ana tep ahi hi. 1972 kum in ahi hiai thil om ngeilou Zomite adia phatuam, tawndan kepbitna khat leng hi, tuibuk tepna khawl kon bawlkhiak. A tung in buk neuchik a tep himahleh, kon bawl lian deuhdeuh a, Bazaar a sum dawnna tham hong ching hi. Hiai kawmkawm in Electric zang a buk tepna khawl 1975 kum in ka hon bawlkhia hi. Pa Nengkhopau toh a min ding in Zomi min tam in, “Zomi Tuibuk Factory” ka chi uhi. Electric leh tui a tepdan koi mah ah ki bawlkhe nailou ahihman in, a en ding ahong pai tamthei mahmah uhi. Industry lam in ana zakha ua,  VK Tawna DIC Manager makaih in thum vei mahmah hong en uhi. A thum vei hong phakna uah DIC a register bawl ni ahon chi uhi. Kolkata a laboratory ah va test a ngai dia Rs.700.00 a bei ding hon chi ua himahleh sum haksat ziakin ka din khawl (tawpkik) mai uhi. Tua dinkhawl lou a na ki paisuak zou hileh “Tuibuk” chih tuibuk thawl pang ah hoihtak in kibelh ziahziah ta di’n ka gingta hi.

Tuibuk-Khawl-02
Tuibuk a nekzonna tham chinglou hileh “Discovery and Invention Award” leh “Excellence Award” piak a om ding in ka ki gingta kei hi. I heutute’n vision na nei ua tuibuk a pu-pa tawndan ki bangteng sik-le-tang a hon pia uh hin ka ngaihtuah hi. Tuibuk khawl pansan a summuhna/phattuamna tomkimte:

     1. Nek leh tak muhna
     2. Tu leh tate skul kaisak zohna
     3. Buk dum a kivak zawhna
     4. Sumdawng nuamte adia phatuam

Tuibuk tepna khawl Electric a pen ahihleh tawp/hip/hup theih leh phih/mit/pump thei ahihna apan muh leh bawlkhiak ahi a, himahleh a vanman tampipi apan bawlkhiak ahihziakin mi nautang a di’n zatzoh louh suak hi. Kei mahmah in leng hiai khawlte zang in kum nga kana kivakna uhi. Singtang lou bawlten tuchiang in lou a buh a chiin sang un dum lei nakbawl zaw simta uhi. Huai chu Tuibuk khawl phattuamna ziak ahi.


Tuibuk om apan atepna khawl ka muhma, a kal ah kum bangzahta a ke dia? A kimuhsuahna tuinak leng kum bangzahta ahi ta dia? Kua mah in Pathian bawllouh omsa lou amu khe ngei kei hi. Huaiziakin, hiai tuibuk khawl pen thil omsa ahihziak a kimu khia thei phet ahi. Hiai khawl a ki bawlkhiak nung kum 40 bang phata hi. Thil ki mukhiate khovel in a ki theihmohbawl lai un SSPP- General Headquater leh YPA General Headquater in pahtawina hon piak ziak un, Pathian phat in om hen.


Kei a bawlkhiatu leng 2012 in kum 71 ka hita. Hiai bukkhawl kibawlkhiakna mun Bungmual Newlane ahi. Hiai bukkhawl a lai a zilkhiak ahi kei a, Pathian in talent hon piak a pan bawlkhiak ahi. Huaiziak in, hiai khawl zang a buk tepte, a la zawn leh zuaksawnten original mah in zuak ni. A dum zuak ten leng a tehna dik zang a diktatna in I khutsuak tawisang ni. Hiai khawl leh dum zuaktu leh tepte atangpi in singtang mi deuh ngen I hi ua, I zuak, I leina sumte uh eilak mah a lut leh pawt ahihziakin tuibuk in singtang mite lak ah nam tuamtuam, pau tuamtuamte hon ki-ngaina saktuah a, muamkhawm, tepkhawm thei ihihziak un Unau khat kimel haih ni khua inleng kap leh mau a I om khak ni khua inleng tuibuk in kikhem ni. Hiai tribalte culture, Tuibuk in hon khaikhawm ahihlam kitheih mohbawl kei ni.


Tuibuk khawl a part minte:
     1. Tui     
     2. Tuilawng     
     3. Meikhu     
     4. Lei     
     5. Huih     
     6. Sik     
     7. Gua     
     8. Dum     
     9. Buktaw     
    10. Ahu     
    11. Mei
 
TuibukHiai a tung a chi 11 kigelhte amau panna di mun chiat a I suktuah leh gomkhomna in tui kivonsak in huih tawpthei a, mei aamsak in a dum in meikhu sak a tui hat tak a tha pethei in tuibuk hon tepthei hi. Hiai teng hon gawmkhawm saktu Pathian ahi a, thilsiamsate a kipan vek ahihziakin Pathian in talent hon piak, sum leh pai deihna ziakin ka ki theihmawh bawl kei ding.
 
Singkung apan etsakna tomkim:
Singkung lian petmah khat aom a, a zungte leikawm thuk pipi ah lut in zam uhi. Singzung in a kungpi lenkip hi. A kung a let luat ziakin kaa zeizawi a bawkpha in pakpha a, agah pha thei in khum zaw mah hi.
 
Agah Ju-le-va chi tuamtuam ten kivakna in nei ua pakpha in a ki lawm mahmah a, azu tam in khuai chi tuamtuam in a zu tawp in ki vakna in nei uhi. Gam sa chi tuamtuam ten zan chiah a bokkom ah giak din naih zel uhi. A sing lian petmah ahihziak in a kahiangte a khenten vaphual lem in a sui ua a khenten siallem in a sui uh. Huaiziakin, azung akung apan in thil chi tuamtuam a hiangte bang in hong kakhia a gelh seng vuallouh in thil hing bang in nou nei a avom asan akang leh a dangdang piang thei hi.
 
Tuibuk in zung nei kungpi om Pupa tawndan kembit. Tuibuk Zomite omna tantan ah a zam (aom) a ka zezoi. Tubuk a kivak nam tuamtuam pau tuamtuam om a tuibuk muam le om. Singkung liim, vaphaul liim, sial liimin hiai tuibuk khawl muhkhiakna apan lam tuamtuam chi tuamtuam in min ka mo di fai chi uh chih genna ahi.
 
Buk-khawl phattuam dan gelh seng ahihlouh ziakin singkung apan etsakna tomkim a kila ahi. Huai komkom in hiai khawl, khovel a om ngei nailou ahihziakin chiamteh thamte lak a tel ban din ka ngaihtuah  kei hinkhua skul kai lou ki lawhtom a kivak tunitan kou innkuan ah Solkal a kaam nei om lou khut nnasep a kivak ngen BPL neite lak a tel ban innkuan ka hi uhi. Hiai innkuan khomial pen a pan Pathian in khovel a thil om ngei nailou mukhetu a hon bawl Pathian phat in om hen.

 

Liangin-Tombing

 

- Langgin Tombing, 71yrs
Bungmual, Newlane
Churachandpur, Manipur
Mobile: 08575604851

 

COMMENT (4) PHA TA..  
  •  
  •  

#4#4 athax » 2012-10-24 18:21

Pu Gin, hih khut siam mahmah, khawlvan leng nehsoh mahmah in kathei. Modern Machinineries leh Technology bang banpha din' gam changkang hileh Khawlvan thupi tampi bawl suah theihna siamna nei hi in ka mu.

  •  
  •  

#3#3 samuelsektak » 2012-10-17 23:50

Kou innkuan ngei leeng kum bang jah sung hiam TUIBUK in nek ka na jong ngei uh hi.PU LANG inventor jah taakna salam kon buk.

  •  
  •  

#2#2 kamlian » 2012-10-16 13:29

Thupi mahmah ei. Tuibuk ka muam kei na a hibang hong bawlkhiat pen pahtakhuai leh ettontak kasa mahmah. Ahi ding bang in SSPP leh YPA ten phatawina a piak uh ka phat hi. Tuate ka gen komkom in ama min a hibang registered hikei mah leh mipi ten i lungsim uah pu Langgin Tombing bawl ahi cih i register ciat uh ka deih. Ama copyright i ci hiam patent ahimai.

Ken zong tuibuk toh kisai la ka hong gelh ding. Nidang in tangval ten nungakte teepsa tuibuk va refill jel uh hiven. Numei te zong na hai tuan deklo. Khen ut cih bang ahih ciang in tuibuk tungtawn in signal pe geih uhi. A la ana ngai un, ka hong sa ding>

Jangleng na buktui aw naalnam,
Khenna ding luankhin hon jeel khol ei mawh eeee...
:-* :-*

ci vangvang sam ahi :sad: :sad: :sad:

  •  
  •  

#1#1 khekhen » 2012-10-15 10:31

hoih mahmah ei

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING