UPDATES:

ALARM BELL VII – Scheduled Tribe Status Demand

r sanga 91x103Scheduled Tribe Status Demand Committee of Manipur (STDCM) in Meitei-te Scheduled Tribe List a guanlut diing lametna sangtak nei in Hon’ble Prime Minister, Dr. Manmohan Singh toh July 10, 2013 ni’n New Delhi ah houlimna nei uhi. STDCM Chairman, Dr Y Mohendro in Uripok Laikhurembi Community Hall, Imphal ah thuthak saimite kiang ah July 16, 2013 ni’n hiai bang in gen hi (Ref. The Sangai Express). Manipur tualsuak minam, Meitei kichi pen General category a om hi lou in Scheduled Tribe ahizaw uh chi hi. Hiai Committee palaite’n Meitei-te Aryan zaat hi lou himhim chia chiangtak leh hangsantak a agen uh chiang in Prime Minister in lungluttak a ngaikhia in Meitei-te pen Scheduled Tribe a guanlut ahihna diing a chitna nei mah ahi uh chih thukup hon bawl ahi chi in thuthak saite mai ah Dr Y Mohendro in gen hi.

Forest Department thusuak in chiangtak a Manipur pen “Hill State” ahi chi in 2011 kum in Government of India in thusuah bawl ahi chi’n genbeh lai hi. Tua baan ah, Mohendro in Meitei-te Scheduled Tribe a chiamteh a aomtheihna diing ua ‘tehna’ akul leh poimoh tengteng asam om lou a, buching kimvel vek ahi chi’n gen lai zawmah hi. Huai tehna (criteria) achihte hiai bang ahi:-

(i) The ethnic group should be Aryan by race,

(ii) In case the group follows Hinduism, it should be partial,

(iii) Scheduled tribes should be worshippers of nature deities.

Tua baan ah, Mohendro in agen zelna ah: “TC Hudson in his book, The Meeteis published in 1908 wrote that Meeteis are descendents of tribal people settled around Manipur valley” chi in pulaak hi. General People bangdan a Meitei-te toh Scheduled Tribes-te kum 63 akhosak-khawm hunsung un kituahlouhna leh kihuatna akaal uah hong piang hi. Kum 1948 malam in huchibang kihuatna boruak aom ngei kei chi in Mohendro in gen hi. India Daan Bupi Art. 342 leh National Commission for Scheduled Tribes Guidelines dungzui a tehna (criteria) kigente toh Mohendro in tehna agente kibang hia/kibang lou chih bukkaak a Daan dungzui a Parliament in thutanna alaak theihna di’a Tribals-te’n pheiphung khat khai a machiang suankhawm diing thukin ahita hi.

Scheduled Tribe a om ut leh adeih minam (Tribe) khat peuhpeuh ‘ST category’ a guanlutna diing a zuih makmoh di’a National Commission for Scheduled Tribes Guidelines a tehna/chetna ‘Criteria’ kigente pansan a STDCM thilnget pen i daal  siamleh masawn thei het lou di’a koihtheihdan lam thum lel i gen diing:-

1. Mipi ai-oh diing a teelching a omte tengteng, Tribal(s) mite lak a – Manipur Outer MP, MLAs, ADCs abiiktak in Cabinet Minister(s) Manipur     singtangmi om sunsunte’n thukhatsaat a, Parliament & Manipur Assembly  ah mipite deihna bang a atangkoupih ngam chiat diing uh kisam hi.

2. Tulel a Recognised Tribes 33 teng pangkhawm a kipumkhatna khauhual kiptak in kigakkhawm phot le’ng vualzohna ngahthei diing hi hangh…!

3. Mipite’n zong Ui-ngol gamphut het lou a, guulbang a pil a, vakhubang a nunnemna toh singtang mite kipumkhatna diing a kalsuankhawm diing; “Non-violence” vanzat a nei gige kawm a, Daan toh kituak a ST Status a luttheihna di’a tehna (criteria) tuamtuamte pansan a daaltheihna hoihtak om ahihlam phawk a, lunglualtak a Tribals-te pangkhawm a Parliament Speaker kiang a Memorandum piaklut diing ahi. Akisaipih thuneitu/ Departments tuamtuam kiang a zong huai, Memorandum Copy piak vek diing ahi... Huchia Phualpi Sorkar (Parliament) in tehna Daan omsa toh kituak a adik atang a thutanna hon bawltheihna diing a nohzom zel diing ahi…! 

Huchibang zel in, mailam a khangsawn momnoute makhua khualna ziak a Manipur Tribals tengteng pangkhawm a India Daan Bupi, Art. 244A Provisions Hill Areas a “Extend” ahihmasiah Phualpi Sorkar phut nilouh diing kisam hi. Singtang mite mabaan khimziing a meipi vom – mial ngeingoi mahbang a siikden a om tawntung diing leh kaw-khuk tawbei a kia mahbang a tummang di’a kisa, “Tribals’ Patau Daak Sagihna” hong kikhen ahita hi. Nambat sagih pen abukim nambat chi in, mi kimkhatte’n Pasian nambatdan in tuat uhi. Singtang mite’n hiai “Tribals’ Patau Daak Sagihna” i ngeingaih kei lailai aleh suahtakna koilam ah aomta dia le? Thukhun Thak a kigen – Kum Zabi Khatna hunlai a thil lamdang hihtheihna hun beita ahihman in lamdangtak a mahni kivaihawmna, ei ‘tribals-te a diing a hong piangkhe guih mawk lou diing ahihna ah, “Kipumkhatna” tungtawn a kalsuan louh ngal alampi dang om ngel lou asuak hi. Huaiziak in hiai Scheduled Tribe Status Demand Committee of Manipur thilnget pen tangtak a kalh saang in Daan toh kituak a daal diing, huchia tulel a Tribals teng pangkhawm a; tribals-te (Scheduled Tribes) teng India Daan Bupi toh kituak a “Primitive Status” a ei pawl i kiakniam uh kiphamoh diing suak hi. Aziak bel Meitei-te dinmun toh ei, Tribals-te dinmun  kikhe lawngal deuh hiau hi. Meitei-te’n kiniamkhiak a, amau-le-amau kihih awngthawl a, General Category a om kimlai aniamzaw ST dinmun a kiakniam diing nasan khawksa sese lou a deihtel aneih uh mahbang a eite’n zong kiniamkhiak a aman i piak ngap uh kisam petmahta hi.  

Zomi Council Cabinet in July 22, 2013 ni’n ZC Office, Nehru Marg, Hiangtam Lamka ah ST Status Demand Committee of Manipur (STDCM) malakna toh kisai leh Law & Order dinmun kikupkhawmna nei diing a Meeting poimohtak asapna ah ‘special invitees’ a chial a ka om dungzui in ka vakihel thei hi. STDCM ngetna thu toh kisai ZC in ngenteltak a agenkhawmna ah Nambing khat buaina hi mai lou a, hiai thu in Manipur Tribal Communities pumpi hon sawkkha ahihman in UNC, KIM, NPO, Hmar Inpui, MPC leh Students’ Organizations tuamtuam akintheipen a Joint Meeting neihpih diing chi in Zomi Council in thupukna bawl hi. Tribe tuamtuam akipan Palai, Delhi ah kisawl diing zong ZC Meeting ah genkhawm in om hi. It lou leh chiil lou a pepa, i biak Pa Pasian kiang ah pilna ngen in Daan toh kituak in akisaipih mite kiang ah Memorandum piaklut in om peuhmahleh abaan hong paidik mai diing ahi. Singtang mite lak ah Kipumkhatna (Tribal Unity) hoihtak om photphotleh nikhat ni chiang a kivualzou ngeingei diing in uphuai hi…!    

COMMENT (1) PHA TA..  
  •  
  •  

#1#1 liana » 2013-07-27 15:54

Akikhel ma a panlaak meng2 hi leh deih huai maw. Khawtualte hi, khel-pil mah2 ua, kamsiam taka hon ho gige ding un; aleh lama hon na bul kalh2 (uprooted) di uh. Tu in zaw, i palai te uh (MP/MINISTERS/M LA's/MDCs & other Govt Officers who are lias with the matter and other Imp NGOs) lungsim lungtang taka hong pang ua, palai ahih na tak uh ahon sep fuh khak kei ua le zaw, "mittaw leh mittaw ki makaih" te ki bang d hongsuak mawk! Ei a mipi/public lam ten le, heutu/palai i neihte uh thu i ngaih khiak kilkel ua, ahoih te i ki kawkmuh ua, nungthuap i siam mah2 uh kuul mah2 ta maw...kisel sel, kipil sak a tungnun kituh tuh hun hi nawn mah2 lo ahih daan bang theih hun lua maw. Kei mimal ngaihdaan mai2 khat kon zeptel lai d. India phualpi level thu ahih chian imi isa phualpi solkal kia hilo, India mi pi tamzaw te theiphak mi E.g. Nu, Mc Mery Kom, Pu, Dr H.H.Mate, Pu HT Sangliana.. Etc..etc.. chih te khong le iva kup a, amau le aw (voice) hon suahpih uh phatuam petmah ding ahih dan thei in, amau tempai nalam leh aki saipih lam uh hikhol kei mah leh, India a dia "National pride" ichi diam, phak louh gimnam, India milian thil hihtheihna sang len kha teng2 theih phak ahih na uah, naak taka phatuam ding ahi chih ana lam en mah2 himawk veng aw, en kik veng2 le, India vaite paidaan kha hichidan deuh lam hoi hi in theih theih hi. Ngengkhai thadah kiziat ziat hun nawn kei ei,..ALARM BELL VII..bek in hon phawng zo ta ngal na lo d hya. Navak huai lua ei heutupa, hi-chi-bang gam-le-nam itna jiak a mipi te theih tuak thil te le hon thai khe ziah ziah ouu..

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING