UPDATES:

S5 Box

ZOGAM.COM Login

THILNGIAT (DEMAND) NGAHNA DI'N BANG KISAM HI HIAM?

THILNGIAT (DEMAND) NGAHNA DI'N BANG KISAM HI HIAM?

~ R. Sanga

rsang new

Thupatna:

Tulel Manipur State huapsung Pawl tuamtuam thilnget leh thilngiat thu toh kisai thugelh sau lou asim ut khempeuh sim diing in phoukhiak uthuai i sa hi. Singtangmi (Tribals) zaat tuamtuam 34 khawng om bang a chepteh in om hi. Manipur SingtangGam huapsung ah Naga, Zomi, Thadou-Kuki, Mizo chihte kitengkhawm a; Phaijang ah Meeitei, Meitei-Pangal leh Kawl-le-Vaite teeng uhi.

Gam-le-Nam Vai a Thilngiat (Political Demand):

August 31, 2015 ni in Bills 3 Manipur Inpi ah daltu om lou in paisuak henhen maimah hi. Mi tampite lak ah Gam vai leh Ki-ukna toh kisai in halhthakna chikhat hong piang a, gam-le-nam vai a thilngiat leh deihte tangkoupihna diing a hun lemtang hong suak ahihman in lungdamhuai i sa hi. Huchi kawmkal ah mipi tampi petmah lungbuai leh hamhaih in tunitan om nilouh hile'ng kilawm leuleu hi. Tuailai mi 9 (kua) in leitung hinna ana taan khinta uhi. Political Demand nih/thum in zuingal a, mite hamhaih leh lungbuai petmah a om in koilam zuan a pai diing...? Nungkiik lah hithei lou, mainawt zia diing pen akichian theihbut louh a om abang zenhouh hi. Tua Thilngiat (Demand) tengpi bangchi a kingah thei diing hi hiam chih pen ngaihsut saang a ei-le-ei buaina kiguan lel hile'ng kilawm abang leltak hi. Alehlam ah mi tamtakte in GamLeitang leh i Minam itna lam ah halhthakna i nei ua, kipahhuai petmah asuak hi.

Kum tampi paita a Thilnget tunitan piak a om lou, Sixth Schedule Provisions zalzou ut a kiphinna leh ngetna hong kithakphuan in tulai in asuk-atung ah tawlnga lou a naktak a panla pawl leh atuam a kivaihawmna (separate administration) deih ziak a tangkou pawl zong om hi. Huchi ahihlai in Zo suante sung a thautawi pawl tuamtuamte in (UPF & KNO) hun paisate a Thilnget atuam chiat aneihte uh nusia in, 'Separate State' Phualpi Sorkar ah Ngetna (Demand) anei uhi. Mitamtak in kipahhuai sa mahmah in lungkimpih petmah uhi. Hiai singnuai mite thilnget pen gintakhuai sa lou leh kingah ngei lou diing ahi chih ngaihdan nei a tangkoupih zong mi kimkhatte om leuleu uhi. Bangteng hileh, 'Political Solution' bel kithukimna ahihke'h kihamphatpih tuaktuakna (bargaining) ah kinga lian peuhmah phot hi.

Mite'n bangchibang a gam-leitang leh kivaihawmna toh kisai a thilnget aneihte uh ana ngahthei zel uh hi hiam (political solution) chih pen ngaihsuthuai petmah hi. Ei pawl thilngetdan toh bukkak diing hunkhop om ngei di'n uphuai hi. Etsakna khat lel gen ni: Bodo mipite leh a singnuai mite un lungtuak simthu leelkhawm in State piching ngen mahle uh State neitudan a kikoih, Assamese-te'n naktak a adaal uh ziak in State ngah lou in, Sixth Schedule Provisions nuai ah 'Mini-State' chihtheih phial khat, "Bodoland Territorial Council" (BTC) piak in om uhi. Himahleh State a nget pen uh tawptuan lou in tunitan paitou lailai hi. Thil khempeuh in 'Hunbi' nei chiat uh ahihman in, ei pawl a diing a zong tu hun pen lungtuak simthu khaubang sutkhawm a lungpi geel hun tuang hong tung hi lou hiam? A hunbi hoih laitak hi diing in uphuai hi.

Bangchi a Mainawt Diing?

Midangte in bangchidan a Political Solution aom theihna diing a kalsuan a naa-seem uh hi hiam chih hoihtak a sui detdet diing kisam masa hi. Tu-le-tu a i buaina uh toh kisai Delhi lam a ana mapang a makaite, sun-le-zan khawksa lou a ih buaitung a kipan tha-le-zung, sum-le-pai seeng a, azu-aham thuak a ana tai nilouh heutute kiang ah Phualpi Sorkar akisaipihte (officials) in hiai bang in thukup ana bawl thei pawl hunkhop om uh ahi chih kigen veu sek hi: "Nouzaw mi kimuhpih diing teng phial na kimuhpih khinta uh...; ahihhang in, 'political will' aom keileh bangmah hong piang lou diing ahi," ana chihsan zel uh hihtuak hi. Tua ahihman in phatuamngai leh hahtangpi a i panlaknate uh bangtan lel a phatuam ahi de aw chih kivelthaktuak lua hi lou hiam chih hon ngaihtuahsak pha mahmah hi. Apanla pawl in lah agim-a-gimpih maimah, Manipur Tribal mite lak a lah kiminna taktak om lou phing, 'District Boundary' nasan kaan zou lou bang ana hi zenzenleh i gim-i-tawlnate tengteng bangmah lou suak diing ahihman in vangtahhuai lua hi lel diing hi. Kivelthak chiat le'ng hoih in phatuam diing in uphuai hi.

Etsakna khat gen zual le'ng: India in Independence angahma pek a Telengana mite'n State piching ana ngen khin thamta uhi. Kum 1952 in Seem Andra Makaitute toh 'gentlemen agreement' ana neih pen uh; Khantouhna (Development) lam saikhawm diing, kum 10 khit chiang a ahoihzaw di'a ngaihsutna aomleh kikhen siang vilvel diing chihdan ahi hi. Himahleh, kum 10 ahong beinung a bangmah thu omta lou: Congress Party in lah piak malak ah Politicised nilouh zawmah...! Kum 2014 a gam vai ki-ukna Congress hi a; a 'Party' vaihawmna in niamkiak lam nawt hiaihiai ahihman in leh Congress Party in hamphatpih leh hatzawkna di'a phatuam ngei di'a agintak uh ziak in "political will" hoihtak hon nei phut ua, huchi in Telengana State hong piangkhe guih mawk hi. Tu hun in ei pawl in hihtheih bang i nei a? Lungpi geel hun ahi.

Kum khat val bang paita, 9 Martyrs luang lah vui louh a om lai; Lamka a pawl tuamtuam a thanuamtak leh phatuamngai a hahpan mahmah mite lah i theihnatan ah, tunitan Phualpi Sorkar in kihouna nei diing a sam chih leng i theih om lou; Pawl khenkhat Delhi ah avahoh uh chih louh ngal...!! Kihou diing a hon sam, Government/Sorkar omsun lah Manipur Chief Minister hi a, lungsim tawng a ngaihsutna kichian nei a i buainate uh hihvengna diing lungpi geel a houlimna neih ut ngel lou bang maimah phing hi. Ngaihtuah vengveng le'ng lungdonhuai mahmah asuak hi. Huchi kawmkal ah, ei gintaklouh lam daih ah, Phualpi Sorkar hong kisangkhauh guih henla, 9 martyrs luang vui hon sawm taktak hitaleh bangloh diing? CRPC-144 hon puankhum zawmah lai diing ua, Press & Media chihte Lamka ah lutsak lou in hon um chibilh diing ua, naktak a nan sawm mah le'ng zong kinang zou lou diing hi. Asetawp kipia in hiai bang ngaihsutna chihte lungsim ah hong lut mawkmawk hi. Salphate luanghawm vuipah ni chihna bel hituan lou in... Salphate zahna saangpen i piak toh kiton in, tu'a 'political demand' om lel pen hoihtak a ngaihtuah thak diing a hoih leh phatuam hi diing in uphuai hi. Ei, hingdam a om laite thulim lou, khat-le-khat kimuhdah leh eisung kituah louh ziaka i Salphate sihna bangmah lou ahong suahkhak diing pilvanhuai mahmah hi. Phualpi Sorkar, Delhi ah atamtheipen thutut i bawl uh kul-le-poimoh lua ahi. UPF & KNO in "Talk" nihvei bang neita, 'political solution' detdou ahong om theihna diing a kuapeuh in i hihtheihna lam chiteng a i pankhawm uh kisam petmah hi.

Salphate luanghawm kilawmtak leh zahna saangtak toh i vuiliam theihna diing un, tua i paidan uh kivelthaktuak om di'n gintakhuai i sa uhia? Ei pawl, 'political solution' diing delh chi in, Delhi lam saang a singtang lam khawng poimohngaih zaw hile'ng kilawm maimah! Gam vai leh Ki-ukna (Politics) paizia pen akholdiak a gen in Manipur Singtang mite dinmun kiteltak a i sui detdet chiang in, ei pawl, Zo suante vangtah lua hi hangh! Banghang hiam chihleh, kipumkhat ut chiat hinapi kipumkhat thei het lou chitchiat se; khat in thilkhat genleh adang khat in thiltuam gen, thukhat sat a luangkhawm thei lou, mahni tumtum a kalsuan, mahni butbut a bu...Bangtan tung di la? Bangtan mah kitung lou diing ahihman in 'Pangkhawm' in 'Kipumkhatna' mah pibawl mahmah le'ng i chi ahi.

Deih in deih kei le'ng, ahihke'h ut in ut kei zong le'ng, Election, 2017 maituah diing a kisa, Manipur Sorkar naktak in kipei vitvit lel hi. Jiribam & Sadar Hills Full Fledged State a puang diing chih khawng thuthang om vengvung kal ah, hiai kitelna hun pen hong tung petmah diing ahihman in ih maituahdan diing uh pilsiamtak a geel vengveng hun laitak ahi. Thudik omsa bel: "Free and Fair Election" chihdan ahi. Hita mahleh, Zo suante bitna diing leh Zomite a diing a phatuam leh hoihpen bang hi peuhmah diing hiam chih ngaihsuthuai ka sa hi. Bangchileh 'Gam vai leh Ki-ukna toh kisai 'Bargaining Power' pen i deih ngahna diing ahih naakleh, zongsiam in zangsiam peuh le'ng ei a di'a hoih hi mai lou diing hiam...!!

Thukhupna:

Buaina khat akipan buaina dang a tuaklut kha zel, a zohsiangna om ngei lou; 'Political Solution' i ngahtheihna diing un, khat-le-khat kihuatna, kimuhdahna, kithulak louhna, kithusim louhna chihte tengteng koihkhia in, Pawl tuamtuam i neihsate hi in, tua i bawltawmte uh hitaleh, houlimkhawm a mailam kalsuandan diing hoihtak a lungpi geel a ngaihtuah detdet a kikup kul in kisam petmah hi. Ngaihtuah thak mah dih: Mite in ei, Singtang mite siatna diing Bills 3 hon passed khum ua, bangziak a ei pawl, ei-le-ei kina ek-ek mawk laizang diing i hi ua? Bangziak a kisimmoh bawl henghang diing; Kichiamnuih bawl a khat-le-khat kikaihniam sawm mawk laizang diing i hi ua?

Ei, atheipen leh asiampen, ei ngaihdan kia hoihpen leh zuih teitei di'n i koih sawt lua ua; lametna toh mangthang man dek i hi uhi. Midang ei ngaihdan saang a ngaihdan hoihzaw anei om diing ahi uh chih lunggel a nei in, midangte zong mun awn in, poimohngaih in, kihoukhawm dialdial a kalsuan diing in kigensiat chihte tengteng tawpsan in thathak la ni chi in i kichial ngutngut hi.

UPF leh KNO in kalsuankhawm a, 'Separate State' Ngen (Demand) khawm theita, tua baan ah, 'Nomenclature' zong "Kuki/Zo People" chihdan a hong luangkhawm uh ahih ngalleh mipi (civil) lam akipan adawnna bang i pia ua? Kipumkhatna deih taktak chiat hi ngei diing in i kigingta hi. Huchi ahih ngalleh, ei lawi, mipi (civil) lamte kituak in, amau kipumkhatna abawl pen uh akipsaktu a pang chiat in, ahong siatkhaak diing vengbittu in pang chiat in, akikeek zaak diing phal het lou in pangkhawm chiat le'ng Sam 133:1ff. eite lak ah hong tung hi mai lou diing hiam? Pasian in hon vualzawl ngei diing a, i Gam-i-Nam hon damsak lawtel diing ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING