UPDATES:

I SIEM JILNA UA I LAWCHIN SEMSEM THEINA DING UN

I SIEM JILNA UA I LAWCHIN SEMSEM THEINA DING UN SANGNAUPANGTE LEH NU-LE-PATEN PANLATHA VA-UI.
Revd. Hangpi Manlun

Rev hangpi manlun

1. Thupatna. Awle, khawvel nite hing kihei lamdang jel in adieh in Sangnaupangte ading in i Laisimnate uh result suoh hun ang hita sausau a, lungdam huai isa mama uhi. Tulaiin result khat poupou a suohchieng in nidang lai 1970s or 1980s lai bang lou tahin Class X apat MA tan in jong result ang suoh chieng in tulai khawvel khantou toh kituoh in topper ahisih leh rank holder hiloute pen minadan asuohta mawh hi. Tamte khu Pasian thupha ichilou theisih uhi. Tuajieh in Laisim sang naupangte leh nu-le-paten itheiding ua poimaw khenkhatte kikum va ui. Tualeh a khente bang lai zilna lam a tate tung a analawsam kha iumtah leh jong itu itate beh tung ah jong pan ilathei na lai uh chi manghil sih va-ui.

2. Laisimten tupkichien nei ngeingei ding ahi. Laisim sang naupang khat in amaban ding atheichet ngai masa hi. Milawchingte hinkhuo i et leh min a carrier ding uh khu Class X ahimasang un aut uh leh tup-le-ngimte anei khinta uhi. Tuami toh kituohin lai asim pai vinveng uhi. Tup kichin neikhu lawchinna bulpi ahi. Thupil in "abulpat dih khu akimkhat jawsa" achibang in mi tupna neite hing lawching teitei uhi. Tuajieh in mi lawching hiding in Sangnaupang laisimten in amasa pen in tup-le- hi-ut khat aneimasah uh angai hi. Tuabang tup-le-ngim neiloute pen alawching ngaisih ding uhi Tup kichienlou neipia a laisim khu gunkuohg/tembo ahehtu umlou a tai toh kibang china ahilel hi.

3. Abul apat a theitop a panlah ding ahi. I gensa bang un tulaitah khu Class X apat atunglam teng result suoh hun laitah ahi a, tuaban ah admission jong ibawl chietta ua akhente bangin classte apanta uhi. Tualeh kumtop chieng a result hoitah inei ding leh abul apat theitop suo pan lah hun ahi. A laisimte leh nu-le-paten lah tate akaiua pat a laisim ding uh ngaisahpi lou napiin kumtop result ang suoh chieng ua, ang fail ua a result bang uh ahoilou leh tate vuo gop/zep leh kitai chite iching ua, result suoh hun pen kivuoh leh kitai hun hinonlouin, a laisim laittahte uh khu kihil leh kitai hun in jang lei result hoi imu teitei ding uhi. A bul apat sim peilou leh kihantohloupi a result hoi ilam etmai jen leh ibawlkhiel ding uhi.

4. Eima hina kithei chien masah ding ahi. Tulai in lai isiem uh toh kituoh in mizousie in Science, Commerce leh subject hamsa deudeute bang ila ut ua, ahoi mama hi. Ahin, nangma khu lai siemthei na hikhol sih leh minlata chi science ahamsa subject chite moh la ding jong hi moh lou hi. Khenkhatte in lah kou khuo/ ka innsung uah tami subject la umlou chipou in subject a moh telkia ua, tuakhu lawsapna bulpi khat ahi hi. Amasa in eima siemna leh hina kitheichien masah a i subject ding tel siem mama apoimaw hi. I gensa bang in mikhen khatte in lata chijieh a, amin hoisah jieh a Subject mohla khu miphahlouna kipatna bulpi ahi hi.
Asiemloupi khat in Science subject valah a fail emaw third division pou a jaw sang in Arts hoitah kilah a first division in jou lei imaban ahoi jaw ding hi. Tuajieh in subject lahding telsiem mama akul in apoimaw masa hi. Ahin duthusam ah Class XII tan vang Science lah a aban pen eima tempaina khat jui khu ahoi hi. Ajieh ahileh Competitive Exam na ding tamtan khu a basic ahijieh in. Math leh Science siemlouta luota jong kham (Central service) khat ang gel chieng un ang lawching jou leng sih uhi.

5. Nu-le-paten jong tate leh siem sinna lam a lamkai leh mawpuohna neaten guide siem poimaw mama hi. Tulai a Laisiem tamtah lawsapna khu nu-le-pate apat leh lawm-le-guolte apat a kohmuna/guidance atahsapna jieh uhi ahi. I tate Sekul or college akaipou leh kilung kim mawh in tuakhu ilawsapna uh chi khat ahi. Thamlou in ajilna uh leh umdante vaki buaipi phanonlou in akhente college kaikai isah lai un a utut ua um ana hi phiangsan ua, itheichieng un lah akikhelta hi. Thamlou in itate tempeina khu theisiempi apui huai apoimaw hi. Mihing in ilunglutlou khat jil khu lawsap kipatna ahi hi. Etsahna ding in mi khenkhatte in Science alunglut ua, seat amulou jieh pou in Arts ahiai commerce subject latamoh leh aduthusam bang in ajil sih ding china ahipai hi. Tuajiehin idei leh siemna subject ma lahpai ajilpai chalchal ding ahi. Tuading a nu-le-paten tate siemna theipi a kohmu ding ahi hi.

6. Kichomdan jong pilvan angaita hi. Eima neisa bangma umloupi a mitten jong atate uh kaisahta/tomta chi a Shillong e, mundang Delhi lah adangdang a pong sawlpai ding ahisih hi. Adieh in Class-XII tankhu Manipur ahoi mama hi chi khu manghilou ding ahi. Amavang graduate leh a tunglam pen ahithei liai leh State pulang asimsah ahoi mama hi. Tualeh Laisiem ngellou pongchom khah khu innkal kitoitheina ahi a, imi chompen theichet apanlah ding ahi. Deisah kinei a i inn ilou juoh jen a ikichon vang un ahilou dingte khu ichomna sumte nasan lejou lou a damsung ua i chom den ding pawl bang ang um law uhi. Thamlouin, khamthei bawlpi khat chawmkhata moh lei ang nemang ding hi.Tualeh laisimten jong manghillou ding ahileh nu-le-paten aneivalua ang chom uh hilou chi thei a, laisim ding ihileh lai mama sim chalchal ding ahi. College kaina hi a sildang foot ball peh e, Music e sildang pou a na lunglut leh alawsamsa na hi chi na kiphoh ding hi. Mikhen khatte'n atate uh umdan ang ahil ua, katapa College kai ve a kava kuon leh a sangshiate un natapa foot ball peh siem mama ang chi ua kada mama a chi hi. Khatpa ahileh atapa khu Music alunglut a minthanna leh nehmuna lah ching joulou in apei suollaw uhi. Ajieh ahileh alunglut louna ding uh alunglut gel jieh in amanthailaw giep uhi. Tualeh neilou sasa leh leiba ba jena mun dang kisawl jong ahoipen sih a, ahin imichompen ahoi a akukal leh lah akhawh sih ding hi.
Mikhangtou leh ta laisiem neiten naupang chom khu Bank a sum koi toh kibang achi kia ua tuabang chingam ding khop itate ahi uh leh theitop a chawm angai ding hi. Taginalou chawmkhatte ahileh nidanglai in "Nu-le-paten bawi aw hingkhang mengmeng aw nutha dawn aw pathadawn aw, chin la asa ua, tulai in ahileh bawi aw hing khang mengmeng aw nutha/ patha leh neisateng topkang aw" chila sah thei jing ahi hi.

7. Nu-le-pate bawlkhiel pawlkhat. I gensa bang un itate uh khu neilou sasa in BA/ BSC bang gamdang ah izilsah ua, eipawl in i taten BA/BSC ang jaw chieng ua, kham mupai ding leh alawching dan in ikingai ua, tuakhu itate lawsapna bulpi khat ahikia hi. Keima ngaidan in natapa/tanu khu gamdang a BA/BSC na jawsah a aban coaching ahiai kham gel ding a na chomjou lou ding thouthou leh Innlam ah BA jilsah inlen ajaw chieng in coaching la ding in Delhi e khat sawl lechin alaw ching bai jaw ding hi. Eiten BA tan ichomjou chieng a lawching pai ding dan in ikingai ua, thamlouin gim-le-toljong ikisapai ua, abul panpan ihi lam itheisih uhi uhi. Tami theikhiel jieh in itate uh gamdang a BA jou central service gel theilou a inn lam a Private teacher (sang shia) semdia ang pei uh a ngaita moh hi. Tualeh ita khu BA tan ichom jou leh kham ageldoh theina ding a kumni/kumthum i etkawljou sih uh leh a lawching jou sih ding uh chi nu-le-pa leh a chawmtuten itheisiempi ding uh ahi..

8. Sum-le-pai khu adeidandan ua piehna/ duotkhielna. Tulai in nidang toh te in ikhangtouta ua, mun dang gam dang ah itate uh laisim in ikoi jou ta uhi. Ahin nu-le-pate bawlkhiel mama khat kia ahileh neilou sasa in sum-le-pai khu akhut uah ilutsah pai uhi. Etsahna ding in inn aum lai un sum-le-pai kichimongmong akhut uah ipengam sih ua, mun dang a ang um chieng un aloutheilou ahidung jui in akhut uah sum asing sing in ilutsah ua, tuakhu naupangte ading in sietna kipatna bulpi khat ahi hi. Ahithei liai leh guardian bang neisah asum-le-paite jong ama uh tungtona hah bang ahoi mama ding hi. Tualeh mundang khu ei gamtoh akibang sih a, siljousie utut a mutheina na ahi, Etsahna ding in innlam a damdoi leh zu imuloute uh khu khopi sung ah deidandan aleithei leh muthei ahijieh in akhutua sum alut tamseng chieng un ajang akhiel lou thei sih uhi.
Thamlouin, deisah kisa in Mobile hoipiipi, Laptop leh Bike chite bang ileisah ua, amauten lah a Mobile leh a Laptopte bang uh laisim lou jen a sun ajan laa ngaina leh milim hoiloupipi etna in akijah thei ua, tuakhu amanthaina uh khat ahi hi. Tualeh i bike leisahte uah, amaute in College kaina a janglou in nungah helna leh Party peina bang in akijah jasop ua, tuakhu guoljawlna itante uh imanthaipina uh chi khat ahi hi. Tuajieh in Mobile hoipipi leh gari chite bang jong aloutheilou ahisih leh pong leisah lou khu tate khantouna ding ahi jaw hi.Tuajieh in tate deisah ikineina lam uah imanthat law jel jel uhi. Nidanglai in Delhi a laisim khat apa in bike chite leisah sih henla, lai hoitah in laisim leh IAS jouva kichi khat ka ja kha a da um mama hi.

9. Theitop apan lah tah zet angai hi. Tulai pen ipi leh pute hun laibang ua, samat , galmat , lou haw sing puoh kidemlai hitalou in lungtang leh laikung (penmuh) a nehsuilai hita hi. Ipu ipaten sa tuaja kamat, ganta tuajat ka khoi, chileh bu-le-bal akhamte khu mithupi leh mitungtuang ahi uhi. Tuate khu eite ading in umzie umta lou china ahita hi. Thamlou in tulai pen AK 47 tangsang namsau, teipite sang in jong 'penmuh/laikung in' in na asemthei jawta hi. Tuajieh in laisimtheite in simtahtah sim ding ahi. Kimolna dan leh time past na dan laina sim leh mina pha ngaingai sih ding hi. Mikhenkhatte kisiana ahielh aw kalai sim lai in nahoi sim leng hichilou ding hing a chia akisia thute uh jah ding atam mama hi. Tuabang mite ading hun muolliamsa hatkia theilou leh tui kibawsa luoh kiatheilou din mun ahita uhi.Tuajieh in nang jong tuabang a na kisielouna ding in theitop in panla pai jin jen in.
Tuaban ah degree khat a na bawlhoi a division sangtah na muhoi jiehin kithada sin, mitam tah khun over confidence jieh leh pan alah tahtah lou ziehun a kietlaw va diang uhi. Etsahna ding mi khen khat khu Class X, first division a jou Class XII third or a fail bang aumthei mawh ua, a khente lah Class XII a sang tah jou BA/ BSC a kesuh lah beilou, tuate ahilouna ding theitop suo a pan lah ding ahithei leh i devision/percentage jong kibang thei chiet leh a dei huoi mama hi.
.
10. Na tapa/tanu khu nangsang a apilzawh/alawchin zou sih leh alawsam ihi ding uhi..Tulai adaum mama khat ahileh pa tamtahten atate uh ama uh sang a Laisiemjaw a siemjouta lou in ta tamtahten apate uh siemna pilna phajouta lou a i um moh uh khu ada um mama hi. Thupil khatin, "Tua a na lawchinna/dinmun khu na nu/napa zieh ahi a, nang lawchinna hing kilhan ding hun khu na tate tung ah ahi ding hi" achi hi. Tamkhu laisimna mai hilouin hagau lam ah jong a ahiding ahi. Tulaipen laisimna lam leh hagau lam ah jong khang kisam ding hilei chi ajau huai mama hi. Na pa sang a laisiemna ana san johlou a, natate nang sang angiem joh leh vang adaum lam china ahita hi. Nu-le-pan a chomjou ding tate lah alawsam pen kihitamoh in adaum mama china ahi. Tuajieh, in lawchinna ding in nule-pate leh asimten theitop suatahzet ahunta hi.

11. Pankhawm hunta hi. I innsung alaisiem khat aum leh abe aphung e ahisih a Nam ajong pankhawm a chawm ahunta ahi. Namkhangtoute apangkhawm in kisom dawl siemua tuachiin ang lawching uhi. Mi khen khatten a Nam sung ua UPSC a lawchinna ngate tuaja in panpina pieh ding chi bang in dan anei ua etton tah in laismte ading in thanop um mama ding hi. A bawltheilouten jong tambang dan bawl hun kasa mama hi.

12. Laisim laitah a felluot/taimatluotlou ding ahi. Laisim na hisung a na fel luot leh dacheing in a fellou pen na hi ding hi. Ahitheitan a laisim sung a activity tamtaluo ajong pan lou ahoi hi. Laisim hun khu leadership siem hun ahilai jang sih hi. Laisiemphot leteh leade dingrsa na hileh tah hi. Ahitheitan ashini mani leh khotang ajong laisiem hun sung akikang koi ahoi hi. Thamlouin Pasian thu ajong kijah dingma ahilai in na laisim ding don lou jen a kijahlou ahoi hi. Etsahna din exam kuon a lajil, khawmpi va haw leh jankhuovah avathum, camp leh crusade chite kijah tamseng jong ahoi tuon sih hi. Biehinn kai hun kai a, Biblete sim jel aum ding ahi jaw hi .Ahin Pasian manghil jen a sim ding china hituom sam sih hi.

13. Carrier guidance lam uangbawl ahunta hi. I gam a lekhasiem tam tah lawsapna khu bangma dang jieh hilou in carier guidance ananeihoilou jieh ua lawsapna leh duthusam tun jawlouna ahipen hi. Mi khenkhat toh ka kihouna uah ang gen tampen uh khu ang guidetu ding umlou jieh a iduthusam bang a na kipeikhalou ahi chi a kisiena aw uh kaja tam mama hi. Tuajieh in gamkhang toute in atate uh ABC asimua pat in apeina ding line atheingal uhi. Tuajieh tam carrier guidance khu anam level bang a jong buoipi a panlah ahuntahzetta hi. A mark sang mu leh laisiemte ikipahpi luailuai lai un alawchinna ding ua jong guide tohpeh khu ipoimaw mama khat uh ahi. Laiseim jousie alawching ahisih ua, amau lampi ding juikhate ang lawching jaw ding uhi.

14. Na zawn na ngau jieh in na lung neusah koisin. Tulai a laisim sangnaupangte leh nu-le-pate lung kietna pen ahileh itate lah sangtahin kichom jousihvan chia thadana lungtang ahi hi. Tamkhu topsan ahunta hi. Lai na siempou a a dieh in professional line, (Engineering, Medical leh adangdangte) bang na lunglut a natup a India gamsung a College hoite a admission na mu jou nahleh nang angchom ding in India gam a Bank zousie leh scholarship tuomtuom muthei ding atam mama hi. Tulai laisiemten nu-le-pate subuailou kei a (student loan) a lai asim ban uah a nu-le-pate uh jong lepanpithei nalai uhi. Thamlouin P.hd tan ajitheite ading bang in Scholarship asing asim jong mukom ajilthei tou ziauzuau ahita hi. Tam hamphatnate khu koima ding hituomlou in nang ading jong ahichi manghillou a theitop a panlah ding ahi.

Tuaban ah innsung hamsat jieh a gam dang a na kaizou lou a adiehin Lamka sung a colleges-te a na kai leh jong nalung neusah sin, hoi tah leh kukal tah a napan pou leh na lawching veve ding hi. Tua igam a officer tamtahte jong Churachandpur sung a BA/BSC jou a officer hing hidohte ahi uhi.Heimun ah kai jong lei laisim pen a simte ah akinga pen hi.

15. Laina siem leh siljousie nang ahita hi. Tam leitung damsung ading nana in Laisiem a kam/kham mu khu hoipen khat ahita hi. Laisiemlou a hinghaute jong sawt daithei tuonsih ua, innten louten dan jong akitup thei tuon sih uhi. Ahin mikhat lai ang siem leh asiemna khu koima lahpiehthei hilou ahijieh in gou manphatah asuoh hi. Thamlouin mi lai ang siem a khamhoitah khat ang nei leh utlou sasa ahau dingsa, thamlou in car, building, thuneina/ power leh mite jatatna chite ama hisa ahi hi. Tamte thei in mi ta laisiem neite apate un, tuin jawng lei jong dachieng in itate ang lawchin chieng un tam building leh carte khu ei a ang hiding a chi phiu phiau ngam uhi. Tambang na nu-le-paten achingam ding uai le ?

16. College hoi deu adiehin state dang a maban na sim nuom leh na percentage asan ngai hi. A tangpi in ei Manipur Board khu mark pieh lam ah a chil mama uhi. A siem mamaten jong result suoh chieng in mark atam muzou sih uhi. Tuaziehin tukum ni kum thum peita lai banglou deu in Manipur apat Shillong college adiehin Anthony leh Edmund lah bang ah BA/BSC sim nuom mi tamtahte khu mark tawm mu zieh ua admission mujou ahimai uhi Tuaziehin Class XII simte ading in tunua chieng a tua i Colleges igente bang a ikainuom ding leh atawmpen a 70-80% above imujou sih leh admission kimawhmu jou non lou ding hi .Ahin college nadan khat poupou a ikainuom leh lah poikhawl sihva e.

17. Atopna pen ding in Pasian thei leh officer negu lou igam tahsap pen ahi. Awle sangnaupangte leh nu-le-pate pankhawm ding dan igenta ua, a laisiem momgmomg leh kham/kam thupi tahtah neite khun Pasian athei sih ua ahileh bangmapi ahi ngiangua sih ding uhi. Officer zousienten anegu uh china hisam louin Pasian jaulou a zu-le-sa a kibuolou, leh a neguthei officer i gam in ipoimaw pen sih ua,, Pasian jau leh midihtat ipoimaw uhi. Tambang a midih, Pasian jau leh negulou officer inei tam tah chieng un tusang in jong i khangtou un Pasian guoljawna tam sem i mu ding uhi. Genkhiel genval aum khah leh kingai dam va-ui.!!!

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING