Eite Siamsinna Leh Sinsaktute Dinmun

User Rating: 0 / 5

Star InactiveStar InactiveStar InactiveStar InactiveStar Inactive
 

EITE SIAMSINNA LEH SINSAKTUTE DINMUN
(Our Education and Status of Teacher )
- M PAUMINSANG GUITE

pauminsang

"If a country is to be corruption free and become a nation of beautiful minds, I strongly feel there are three key societal members who can make a difference. They are the father, the mother and the teacher." – A P J Abdul Kalam

SIAMSINNA/EDUCATION i chih mihingte i theihna, i siamna, i manphatna, i gamtat leh tawndan tuamtuam te khangsawn sawn a kipiaksawnna, kepbitna leh ahoihzaw sem zonna ding a sinna ahi, chi leng genkha dingin ka ging. A theizaw khat in a theilou zaw kiangah thil/thu manpha tuamtuam ahon sinsak ua, khosak zangkhai zawkna dia i sinkhiakte i damsung a zuih/zat touh ding leh en leng khangsawnte i piaksawn zelna pen siamsinna/education kichi omzia leh a poimohna tak ahi.

Munkhat peuh ah, Siamsinna/Education hoih a omlouh chiangin Theihna punglou, Siamna neihbeh omlou, Mihing manphatna kiam, Diktatna Kiam, Kivaipuakdan chidamlou, Khohei gamtat mumallou, Tawndan mansuah, Nekzonna khangtoulou, Damtheihna keniam, leh adeihhuailou thil tampi ten hon bawm semsem in, midang ten lam chiteng ah hon taikhelh un, hon nelhsiah un, i utlouh leh teellouh in, hon vaihawm khum maimah thei uhi. Huaibang in, Siamsinna/Education hoihtak toh khangliante bel mahni kitoudelh zou in, maingal tak in khovel ah khosa thei uhi.

SIAMSINNA BUL:
I pian apan, khoheidan, pau leh aw phawidan, nek leh dawn bawldan, beh leh phung tawndan, hoih leh hoihlouh khenkakna leh khotang kikholhdan chi tuamtuam tengteng i INSUNG apan i nu, pa leh khotang apan i sinkhiat hi tang pi hi. Hiai dan kisinsakna pen inkuan khat apan inkuan dang ah akibang sese kholkei maithei hi. Himahleh, mihing khat adia siamsinna/education kipatna leh i kibulphuhna poimoh mahmah ahihna ah limsak pah tuak ahi. Laisiangthou ah leng, naupang a neulai apan chiil a poimohdan ana kigelh hi.

Hiai atunga insung ah kisinsak dan banglou in, i hong khanlet dung zui in i kum toh kituak ding khovel siamnate pawl tuamtuam a khen in paizia om tak in siamsinna paitou detdet hi. Hiai pen Formal Education le kichi a, Indian Education System tamlou i sut zek ding.

INDIAN EDUCATION SYSTEM:
Preschool (kum 3-5): Hiai pen School tatak lut ma a, naupangte chiil masakna ahi. Kindergarten, Nursery, Preparatory, Playschool etc khong kichi tangpi hi. DAN in ngiat kei mahleh khopi ah hiai Preschool ah ana kichiil masa loute adin admission muh theihlouh ding tuk in poimohta hi.

Primary Education (Kum 6-14): India sorkar in Right of Children to Free and Compulsory Education Act (RTE) 2009 chih ana khung un, kuapeuh naupang kum 6 apan 14 kikal school a kai ngeingei ding, school kailou a naupang vakthap hiam, lou na sem hiam, kiloh hiam, mi nasem hiam leh suak hiam a om ding ana phallou hi. Huaiziak in, government school tengteng ah school fee omsak lou in, laibu athawn a pia in, sun ann nekding nasan leng hawm in om hi. Hiai mah bangin SSA – Sarva Shiksha Abhiyan (Education for All) chih min i zakzakte leng naupang siamsinna a tanvek ding uh ngimna a hong piang ahi.
Hiai Primary Education tan zou a naupang khangkhiate bel nek tak zonna ah amau leh amau kitoudelh thei ding, khua leh tui hihna poimohna leh mohpuakna thei ding, gam kivaipuakna a mahni deihtelna leh ngaihdan tang neithei ding, taksa, insung leh khotang sianthou poimohna thei ding leh khovel thuthang tuamtuam bildoh ban ding ua chiil leh sinsak hi uhi. Hiai primary education pen siamsinna lam adia 'tawphah/foundation' dan ahihziak in, kibulphuhna dia poimohpen ahi.

Secondary Education (Kum 15 to 18) (Class 10+2): Primary Education ah a kibulhphuh zou, tempaina lam deuh kitheichian simta chi in class 10 tan ah subject deihtelna nei ban zek in kisinsakna om tou hi. Tu naizek a India sorkar in kikhekna nasatak ana pat, naupangte lakah kitaitehna nasatak mai ziak in adeih huai hetlou thil tampi tung chi in, tu in Class X exam te bang le BOARD sese lou in mahni School mah a Class X Exam na Pass Certificate le zattheih ding phal sak hi. Himahleh, Class XI school dang ah sutzom sawmte adin bel Board exam na Certificate mah telzaw lai uhi.

Hiai khit Class XI leh XII ah laizilte adin lampi kikatna masa tuah tou ding hong hi hi. A pipen a gen in Science, Commerce leh Arts chihte a kapi thumte ahi. A hoihpen leh ahoihlou zaw deuh chih tuam ding haksa a, mahni lunglutna mah laktouh pen line/stream hoih pen ahi, chih laisiam tampi te hasotna ahi. Hiai tan zoukhiate adin sorkar leh private company nuai a nekzonna ding sepna hunkhop kihong ta hi.

Higher Education (18+): Hiai in a uap, Class XII zou khia a, lam chi tuamtuam a siamsinna sangzaw sinna Under Graduate (10+2+3), Post Graduate, MPhil leh PhD te hitou denden dan ahi. Hiai tan zou khiate bel midangte chiil thei ding, makaih thei ding, enkol thei ding, kawkmuh thei ding, thupukna la thei ding, theihna sui/zong thei ding, ngaihtuahna chiimtak nei dia chiil leh dinmun chi tuamtuam lenthei dia sek leh sinsak hi uhi.

Gam leh nam khat in alou theilou a a poimoh misiam atangpi in - Teachers, Scientists, Medicals, Engineers/Architects, Bankers, Lawyers, Social Workers, Entrepreneurs, Officers (military leh civil), Pastors etc te hiai Higher Education tan a kisinsakna zoute ngen hi uhi.
Higher Education banah Post-Doctorate kichi leng om lai hi. Hiai pen PhD zoute research bawlbeh sawn na ahi.

Distance/Open Learning: Primary Education zou khatpeuh maban sunzom ut, ahihziaka mun leh hun ah lemtan louhna nei a, niteng a school/college va kai gige theiloute adin, inmun apan lai sin theihna ding lampi om a, Distance/Open Learning kichi hi. Hiai tungtawn in Class X apan subject khenkhat ah PhD tan leng zoh theih hi. Hiai dana lai sin theihna mun tuamtuam tampi omte lak ah govt in a theihpih National Institute of Open Schooing (NIOS) leh Indira Gandhi National Open University (IGNOU) ten India pumpi ah Centre nei suak phial uhi.

Vocational Learning: Primary Education leh Secondary Education zou a, laisim toutou tuanlou a mahni khutsiamna leh lunglutna toh kituaka nekzonna dia sep dingdan kisinsaknate Vocational learning kichi deuh hi. Course tuamtuam tampi omte laka ei theihsiam dan ah - stenography/typing, beautician, tailoring, lab tech, electric fitting, carpentry, driving school, DTP, computer and mobile repairing, automobile repairing, welding, cooking/baking class, poultry/piggery, gua-leh-naang phan dan etc teng hiai in uap kha hi. NIOS inleng hiai Vocational course tuamtuam nei hi. Tunai a Delhi University a Four Year University Programme (FYUP) kibawl thakin hiaite laka bangzah hiam uap kha hi.

GOVT leh PRIVATE School: I theihchiat sa bang un, tua i gam dinmun ah Govt pen Private schoolte sanga kingak tak tadih lou hi. Huaiziak mah in, private school ten siamsinna lam ah mun lian hong luah mahmah ta un, school fee, laibu leh uniform etc man dia tampi senna hong hi sawnsawn hi. Hiai pen private schoolte moh hivek mawklou in Govt school omte a ginatlouh ziak le hizaw hi. Primary Education level a Govt. schoolte bek kingakna tham in hoih zek leh bel i mipi zawnna nasatak in dawn zangkhai ding hi.

Tulai in, Lamka khua ah Jawahar Navodaya Vidyalaya, Tuinom leh Rengkai Govt. High School te bang ah admission kituh ngai hial in om thei a, hiai school a tate kaisak kha te bel school fee leh laibu man tuamtuam ah buailou in inkuan nekzonna thadawn mahmah ahihdan haih vual hilou hi. Hiaite bang a, i huam sung chiat ua Govt school omte i bawlhoih tup taktak ualeh bel a lampi nak om law ding ahi, chih muhtheih in om hi. Huai ding in, i vek un mohpuakna lianpi i neichiat uh hinle ka mu hi.

Sing omlouhna ah gua zat mai ngai bang in, tu tadih in i singtang khua te ah i saptuam EBC leh PCI mission schoolte, i education kibulphuhna khuampi in panglel uhi. Kua phawk leh pahtawi bat a om kha ngei mangloua ginom taka khangsawn dingte sinsak a om, i singtang schoolte a sinsaktu/teacherte hiai laigelh tungtawn in ka zahna thu ka khak hi. Tuni a nana chi tuh uh, maban a i khua, nam leh gam khuam poimohte hong hiding uh ahi.

Scholarship: Laisiamte ading in Govt, NGO leh private apan panpihna tuamtuam ngah theih ding tampi om hi. Sorkar apan Scheduled Tribe hihziak in leng Scholarship muh theih ding om. Huailou in, national level test pansan a Scholarship tuamtuamte gelhching a mahni kitoudelh theihna ding leng hun khop om a, laisim nuam, tupguh leh kuhkalte ading in lungke mailou a mahni kitoudelh a lai sangpi sin touhtouh theihna ding dan lampi om veve hi.

SINSAKTUTE (TEACHER) DINMUN:
Tuni a i minam sung ua, misuak tampi omte, kum 20/30 paisa a i gam ah 'sikulpu' 'headmaster' chi a ina theihte ina thupi ngaih lai ua agahsuah ahi, chih dan in na ngaihtuah ngei hia? Ahihhang in, awlawl in 'theihna' sanga 'sum' deihtakna hong lianlua in, 'theihna' pesawn sinsaktute (teacher) poimohna leh thupi sakna nasatak in kiam hin le ka mu hi. Hiai in, laisiamte lak ah sinsaktu (teacher) hih utna leh tupna nei tatak tawmsak hiaihiai hi. Siamsinna leh sinlaite veina nei manglou sinsaktu (teacher) i tamluat ziak mah un, sepna mun a om ngaplou leh sempeihlou sinsaktu kidim maimah ta hi. Hiai dan sinsaktu hoihlou ten, sinlaite a laisim na uah lunglut sak zoulou in thadah sak beh thei zomah ua, saupi poi tun thei hi. Tulel in, i phawk khiatlouh kal un Lamka tan ah leng sinsaktu hoih leh kipezou ana kitasam law man in, siamsinna lam ah khang khat bang bei khin mah le hang, i schoolte uah Sinsaktu din, alou theilou a, talpak te bang guaih ngai dingin, kiom den lai maimah hi. Lam tuamtuam a khangsawnte sinsaktu ding mi kisek khe zou nailou chihna leng ahi. A lehlam ah, neih leh lam ah kikhangtou lawta mah le hangle, kum 20/30 paisa a i Pute khang sangin misuak tatak kisekkhe tawm zaw maimah ahi de aw, chih sim in om thei hi.

Student/education vai toh kisaia i kimuhkhawmna/programme te uah, sinsaktu (teacher)te bang dinmun i tang sak ua? Koi lak ah i tu sak maimah ua? A thathoh na ding un, pahtawina i piaklam uh bangzah i theikha ua? Aihlouhleh, aphawk mangle omlou ina hizomah uhia? Sui kik zeklai mah dih. Ka taklat uttak bel, student/education vai a thil i saite apan inle, 'sum-leh-pai' a phungvuh theiloua 'theihna' hong pesawntu Sinsaktu (teacher) te poimohna leh thupina i phawk bat louh dan uh leh munlai a tan zoh louh dan uh muh theih in kilang chiang huntawk mahmah a, education/siamsinna kichi poimohngaih kichi mahle hang le, amasa ding masasak theilou, a inteek ding inteek sak theilou a hamhaih i hihna uah, siamsinna lama kiakniam lam i nawt ding uh bel, deihkei lele i tuah ding mah un ka koih hi. Hiai kia hilou in, tua i paidan un khangthak laisiamte lakah maban ah i nam khuam ding sinlaite sektu dia sinsaktu (teacher) ding hih utna dausak in, ittak leh deihsak taka i khangsawn sinlaite theihna pesawntu ding mi kipezou tak kitasam hiaihiai sak thei lai hi. Huaiziak in, sinsaktu (teacher) dia lunglutna neite kiang ah sinsaktu hoihte nasep thupi dan leh apoimoh dan uh theisiam sak a, huai ding a chiil a, thathou sak a, hanthawn in, khangthak laisiam te kiang ah chouna bawl dia i kisak thak uh hun lawta hi.

Niteng a i tate/Sinlaite (Student) laka dakkal 5/6 vel hun zang gige ding, 'theihna' pesawntu a Sinsaktu (teacher) te poimohna uh i phawk a, i schoolte uah sinsaktu hoih penpente lunggulh na chang i theihding kal uh ngaklahhuai mahmah hi.

SIAMSINNA a poimoh Mi Thumte: I gam uah, SIAMSINNA (education) kichi poimoh ngaih tatak a puah hoih ding i chih tatak leh hiai Mi Thumte - Sinlaite (Students), Nu leh Pa/enkoltu (Parents/Guardians) leh Sinsaktute (Teachers) nawlkhin theih ding hilou hi. Thildang tampite leng poimoh in kiningching mahleh, hiai a tunga Mi Thumte laka khat tellou in education kichi om zia omlou, a thawn lel hiding hi.

I kietthak tuak uh, Education min zanga vai i sai chiang in Studentte hamphatna ding taktak i tup pipen ahi kha hia? Nu-leh-pa/enkoltu ten i tate (sinlai omte) a lai sinna uh toh kisaite chih taktak in i enzui in i awlmoh pih na hia? Banah, Student ten niteng a dakkal 5/6 sung vingveng school ah a hun uh ana zat pih tampen a Sinsaktu (Teacherte) poimoh dan leh manphat dan i phawk kha tatak na hia? chihte i kidot tuak kasa hi. Sinlaite (student) adia a hoihpen ding ngimna in, gam khangtou ten Nu-leh-pa te bang school vai ah sam thithe ua inteksak mahmah ua, sinsaktu (teacher) te bang a tate uh damsung a zat ding 'theihna' guantu a ngai in zahtatna lianpi ngah uhi.
Hiai atung a mi Thum ten Siamsinna lama a poimohna uh aphawk chiat ua, a mohpuakna bang uh hong sepsuah theih chiang un, i khua/khotang/nam uapan mahni khe a ding thei, mahni kitoudelh zou leh lam chituamtuam ah mi thupi hong phul khe zungzung mai ding dan ahi. Huaiziakin, siamsinna/education puah ding i chihleh sinlaite (student), nu-leh-pa/enkoltu (parent/guardian) leh sinsaktu (teacher) te munlai piaka amasa a koih ding ahihdan i theihkhiat thak uh leh letkip det uh kul hi.

THUKHITNA:
Siamsinna/Education poimohna theiloute insung, khua leh gam/nam ah theihlouh kal in siamsinna lam ah kiakniamna tun a, a kiphawk khiat chiang un bel saupi poi in kikhel man sek a, a tunding nawnna ding inleng kum tampi panlakthak ngai in, a man tam mahmah hi. Siamsinna/Education hoih omna ah sum-leh-pai a tuat khiat theihlouh leh sum a lei theihlouh lam chiteng ah khantouhna tampi tun hi. Huai mai hilou in, khangsawn-tusawn te dinmun leh lampi ding le saupi ana sialsak khin hi uhi. Hiai a i laigelh thute koi ah kiselgu hilou in, tu khang ah mi chih in siamsinna/education a hoihdan thei, a poimoh dan thei, a lampi ding le thei leh a gah khum dingdan le a theikhin sa ngenle ihi uhi. Siamsinna/education puah thak/hoih ding i chih a i tup taktak leh a lampi om ngei ding hi. Hiai bang tupna neite pangkhawm chiat in, kihanthawn tuah in, kisa in, pan in, kalsuanle nikhat tei i taksuah ngei ding uh chih ka gingta hi. Tulai khovel kitaitehna sang leh kin gawp lak ah, siamsinna/education toh kisai poimohna phawk masasa leh ahoihsem na dia kalsuan tamtamte hampha leh khangtou masa hi un! Deihtelna le ei khut ah om gige!

[Admin Note: Hiai laigelh pen a laigelhtu phalna a 'Mualnuam Kikou - 2014 SOUVENIR' apan kilasawn ahi]

mualnuamkikoumagcover