Khopi a bitna dinga poimawhte

User Rating: 0 / 5

Star InactiveStar InactiveStar InactiveStar InactiveStar Inactive
 

KHOPI A BITNA DINGA POIMAWHTE 

“ NANG-LE-NANG KISIN IN” chih laibu zopna (Supplement)

Dr. Pum Za Thang Tombing

President, GETS, Bangalore.

Thupatna:

Tulaia thukizakna leh TV aa ki gen mun mahmahte pen Numei pongsuala that/meklup (gang raped & killed) chihte ahi mawk hi!  India khopi khenkhat bang ah gamdang mi leh amau gamsik-le-tang dia a honsawl(Diplomats)te na ngawn ana pongsual / sualluih ngeitak man un gamdangmite’n India gam a khualzin ding pen bit-huailou (unsafe) chi in genta uh hi. India gam ah minute 30 gin tengin numei khat aki pongsuak (one rape every 30 minutes) hi ( TOI July 28,’14).  Prime Minister Narendra Modi in 2014 Independence Day message ah, “Nu le pate’n na tapa te un, numei amawk suallouhna ding uleh,  akikep siam nading un thuhilh un”, achi hial hi.  Tua ahih man in New Delhi khopi zong “ki pong sual luih na khopi” (Raped City) chih min piak in a om hial ta hi. Bangalore khopi ahihleh, mah-le-mah kithat atam lua a Police te’n “niteng in mi nih kithat zeel” chiin report ua, huaiziakin Bangalore pen  “mah-le-mah kithahna khopi” (Suicide Capital) chih in om  hi.

A deuh khol in eilam (North East) mi khopi a mite’ pongsual ana tuakkhate pen aki sui sui chiang in amau (sual a om eilam) te’pilvan louhnaziak leng omkha ding hi, ki chi hi.  A khen khatte bel avangtah kha mawng mawng ahi uh chih bel kihaihlou hi. Khopi sunga bitna ding leh kiven na dia theihhuai anuai ate ahi uh:

  1. 1.Vaite vamaitai pahlouh ding: Kalaibu“Nang-le-Nang Kisin In” chih pen ei Zomite’n Zogam a sim leh zat ding ngimna a gelh ahih man in, “Mite tawh nakihou chiangin nuihmai in ” chi in hasotna ka bawl hi. Ahihhangin, tu’n bel Vaigam leh India khopi a omte’ pen Vaite tawh kihou chiang a ‘maitailouh ding’ ka chita hi. A ziak, Vaite’n a theihngei te uleh a tanaute leh angaihzawngte kiang kia uah “maitai” uh hi. Eimi numeite’n Vaia ‘maitai’ khum chiang un, amaute’n  “ngaizawng” sapah lian uha, maingal in “eibawl” pah uh a, tuate mah in a lawmte uh zawn in, “a hon in pongsual” (gang raped) thei lai uh hi! A suite gen dan in,” mi pongsual te’n atheih ngeite uh leh ameltheihte uh sual nuam deuh uh” cih ahi.
  1. 2.Vai pasalte kineel saklouh ding:  Eimi atamzaw Vaite inluah, a inn neite tawh inn kizom leh huangsung khata teng khawm tampi ki om hi. A chiil in, kihou lou in, ki en sim gual gual le hang zong, a hong sawt deuh chiangin ki maingal leh ki ei bawlna om thei hi. Inluahman bang a hong lak chiang ua, eilamte mahinn sunga tusak khawlsak bang ki om thei hi. Vaite’ tawndan (Culture) inluahman/electricity current bills /TV fees/ Gas etc. peuhmah inpua, hulliap (varandah) a ki zou vek ahi. Huaiziakin, inluahman na inluahnate (landlord/lady) in ahong lak chiang in inkong ah kingaksak inla, na piak khit phet chiangin inkhak inla, insung ah lutsan pah lian in (Hiai pen numei kia inluah a omte dia thuhilhna ahi).  Huai hilou a, eigam bang dan a, na insunga tusak/khawlsak a Singpi/avot khawng na piak peuhmah leh hong zual pah ding uh hi. Amau (Vaite’n) midangte maitai ngeilou uha, singpi leh dawn theih khawng mi mawk mawk te pia lou uha, inluahte bang bel simmawh nuam zawlai uh hi.
  1. 3.Khomial/zan in nangkia in pawt kei in: Ahih theih liai leh numei hiin pasal hile hang nitak khua a mial nak leh pua pawtlouh a hoih in abit huai hi. Adeuh khol in, numei bang bel zan/khomial nunga khat-le-nih tawh leng pot khiaklouh hial ding ahi. Ei mi (North East) te Vaite’n khopi khawnga a hon khoih nopna uh aziak bangzah hiamte lak a khat bel a hon et chiang ua “hon iplah” ahi pen uh hi. Bangalore leh khopi dang dang bang ah kaam (post) niam pen akipan a sang Directors, Secretaries (IPS/IAS) penlenta ihih ziakun, ei amau bela pem (imigrants) te pen amau ngaih dan a “amau sep noplouh teng seem ding” a hon koihte un, amau bang leh amau sanga hithei zaw dana i vanzatte Cars leh fashions deuh taka i om chiang ua tuate “thuak theilou” ahi pen uh hi. Hiai khawng ziaka Mrs. Rachel Sangliana (Sangliana tanu) in December 07, ’14 a Mall khata athuakna leng hiai ziak hiding in aki sui hi. Numei ngial houh nitak a khua amial nak leh inpua kan louh a hoih hi (khe a vak ding te genna ahi).

 

  1. 4.Sau dawklua, kollua, kigaklua leh khengval a kizep louh ding (Numeite): Vai numeite kizepna sari pen a gil uleh a nunglam uh dawksau mah leh akhe lam un asiak uh a khuh man in “hoih hi, ahi ding mah hi” (modest) chih Vaite’n ngaih dan nei uh hi. Bangalore leh South India numeite kizepdan (traditional dresses) tangpite bel a nik uh a palh apalh ding in leiphiat ziah ziah ahi. Huaiziakin Vai pasalte’n amau numeite’ siak chiang khawng lel uh ana mu mu ahih man un, numeite’ khuk leh atunglam amuh peuhmah chiang ua om theilou(Ui huuk bang maidan ) uh ahi. Tuabang ahih man in ei lamte; fashion show hi-leh kilawm taka, kholak leh Mall/ Bazaar khawnga nik sing, saupi dawk, nawi bul dawk leh kigak lua tenton khawng te Vai tangval te’n amuh chiang un chilphuul ua “amau zol” dan leh “kizuak” dan a angaih ziak ua pong sual sawm nuam dan uh ahi! A huchilou him him a leng eilam nungakte pen a tangpi-a, amau lamte’ sanga ngou zaw leh piankena maitai meel zawte ihih man un, ahon muh chiang ua hon enzui vung vung mai dan uh ahi. Hiai bang teng ahih man in numei /nungakte kollua, sau dawk lua leh kigak lua ten tona ki zeem kawma kholak vak vak louh ding a hi (Hiaite pen ei inn sung leh I room sunga kizepnate ahi uh). A kilawm leh tangpi pom theih a kizep pen chiklai- peuh in koimun teng ah a hoih pen ahi gige hi.

Thukhitna:

Nidang in gamdang (foreign) khawng ah ki nam huatna leh simmawhna (racial discreminations) aki tuak seka, tuchiangin bel ei gam India leh khopi te ah achi anam a ki huatna (racism) hong omta mawk hi! Huaiziakin ei North East mite pen i lawm Vaite tup leh hazat (target)a om pianta ihih man in i pilvan mah mah uh kuul in a lang ta hi. Sih-le-man/accident ding zaw gen theih ahi kei na a, ahihhangin pilvang zaw deuh thei le hang bel, buaina tawh kipelh zaw deuh ding ihih man in hiai atunga point tamlou chikte kon tak lang zual hi. A vek sip sip in a poimawhteng gen mankei mah leng hiai atunga te pen zattawm thei ding leh “kiallap” dingte ahi uh hi. Thupilkhat in, “kihilh kolhna pen galvan a kithopna (forewarned is forearmed) kholhna” achih pen dik in ngahtuah tham hi.