Good Friday leh Easter Sunday

User Rating: 0 / 5

Star InactiveStar InactiveStar InactiveStar InactiveStar Inactive
 

Good Friday leh Easter Sunday
Agelhtu: Suanlian
suanlian
Tulai gingtu tampi-te lak-ah Good Friday leh Easter Sunday kichi bang ni? Or Bang chihna ahi’a? chi’n ki dong lehang, Jesu Sih Ni leh Athoh nawn Ni ahi, chia hon dawnglou ding avang mahmah ding in agintak huai hi. Hiai bel I neu apat ina zat leh ina kizilsakna uh ahihziak in. Himahleh, Good Friday leh Easter Sunday te’n bang gennop nei hiam chih leh Bang genkha hiam chihte ngaihtuah det det lou in, mi’ chi’n dandan, mi zuih dan dan chi’n I zui tei uhi. Tua ziak in hiai Ni te’n bang genkha a chih tom chik in sulang lehang chih I ut ahi.

Friday kichi milim pathian “Frigga” kichi min tam a kiphuak ahi a, Frigga Pathian Ni chihna ahi. Hiai ni  leh Babulon te galhat minthang mah mah, a Kumpipa uh Nimrod sihni toh kituak kha geih hi. Huchi’n hiai Ni tuh Babulon te ading in Ni poimoh mahmah khat hong suak a, akum teng in Nimrod sih theih gige na ding in amite’n ana zang zel ua, ki thoihna nate ana lan zel uhi. Tu’n hiai ni tuh Good Friday chih a theih in hong om ta hi. Hun hong paizel in hiai Babulonte’ Sakhua (Ni biakna leh milim biakna) leh chi’n dan tuamtuam te Rome te’n hon la sawn in, amau pupa ngeina dan in hon ching tou tou uhi. Rome kumpi hong hat tak in , Nicea Council ah Good Friday Ni tuh Christian teng tengin Jesu sihni a  zat chiat ding chi’n thupuan hon bawl uhi. Huai apat sawtlou nung in gingtu Christian teng teng in Good Friday  ni tuh, tutan in Jesu sihni  dan in zangtou denta uhi.

Huchimah bangin Sunday leng Nisa Pathian “Dei Solis” apat kila ahi a, Nisa Pathian Ni or Nisa Biakna Ni chihna ahi. Babulonte Kumpipa Nimrod asih nung in a zi Semirami, pahtawina leh Leegnu ahihna  min Ishtar (tulai in Easter) in apasal hih bang bang a Nisa a ahong ki thoih nawn na Ni Masapen Ni ahi. Hiai ni tuh Ishtar (Easter) Ni Pathian ni or Easter Nisa Biak ni, chih hong hi ahi. Huchi bangin hiai ki thoihna hon sunzom tou zel ua. Rome kumpi thuneihna nuai mah ah, hiai Ni tuh Jesu thohnawn na NI a zat ding chi’n ahon puang ua. Huchi’n tutan in Christian tengteng in, hiai ni tuh Jesu thohnawn na Ni in zang denta uhi.

Huchi bang kal ah, Tulai a gintute’n hiai ni te Bible gen dan toh akituak na hia Kituaklou? Chihte gellou in kizui duam duam hi. Bible ah Jesu sih Ni akimu a, Good Friday toh aki tuak na hiam  I en ding. Marka 14, 15, Mathai 26,27, Luka 22,23 te ah sim in. Marka 14:12  I et leh “ Tanghou Silngou sohlouh Ankuanglui ni masapen a Paikan goh ngeina hi……” huchi’n Paikan ankuang hon lui ua. Marka 14:20 ah, Juda Isakariot in leh bawla  akhot khiak ding thu hon gen a. Huchi’n huai zan mah mah in, Marka 14:43-52 Juda in Jesu akhong keta hi. Huchi’n Siampulian te mai ah, Suangkul ah leh a zingchiang in Pilat mai ah dinsak in hong om a, Marka 15:25,33 dak 6 khong ah singtung ah khai in hong oma, akha akhah ta a, asita hi. Huchi’n, Josef kichi Arimathai khomi khat in Pilat kiang ah Jesu luang ava ngen a, ala a nitum ma Sabbath ni thupi kipat ma in avuiliam ta hi. Marka 15:42-47, Mathai 27:57. Hiai a sih NI tuh, Marka 15:42 ah “Ki Sakkholh na ni, Sabbath ma ni ahi, akichi hi. Hiai a Sabbath kichi pen weekly Sabbath (7th day) genna hilou in, Paikan NI thupi genna ahi. Luka 23:54-55.
Tua bible a imuh dan bang in, Jesu tuh Paikan Silngousohlouh ding a ki sakkholh na ni (Sabbath Thupi/High day) in a si a, nitaklam in vui in aom hi. Ahihleh Paikan kisakkholhna ni tuh bang hun/bang ni hi ding hiam ichih leh. Exodus 12:1-6, Deuteronomy 16:1-4 , “kum khat a, a Kha masapen (Aviv kha, hiai Bible Calendar ahi)  ni 10 apat ni 14 dong Belam na hen ding ua, khomui in Belam na gou ding uh……….Paikan Belam sa a nitak in na ne ding uh”. Exodus 12:14-18, akha khat na, a ni 14 nitak apan ni 21 ni nitak dong silngou sohlouh tanghou na ne ding uh ahi”, chih imu ahi. Tua bangin Paikan Belam gohna ni tuh 14 Aviv nitak khomui  ahi chih, achiang hi. Ahihleh, Jesu bang hun in asi a? Johan 19:28, “Jesu’n akha akhah ta hi……….Tua ni ki sakkholh ni ahi a, a zing chiang Sabbath ni thupi diak hi ding hita hi”. Paikan Silngou sohlouh zat na ding a kisakkholna genna ahi. Huai tuh Exodus 12:1-6 a imuh bang in Aviv 14 ni nitaklam Paikan Belam gohna ni mah ahi. Eite ading in I Paikan belam goh ding taang in, Jesu mah mah tuh I paikan belam  ding in, goh in  hong om zaw ta hi. Huchi’n nitaklam in vuiliam in a om ta hi.

Hiai Aviv kha kichi hih bible kha simdan (Tungkha simna) ahi a, kumkhat sung a ding a, akha masapen ahi, Genesis 1:14. Tulai Gregorian Calendar ah atangpi in March-April kha kawmtuah lak ahi deuh. Tu’n Aviv tarik 14 tuh Jesu sih hunlai in bangni toh aki tuak kha a chih, Jawlnei Daniel gen I en ding. Daniel 9:27, “Tua ukpa khat in Sagih a sim hun khat sung lel mitampi toh kaal ah thukhun a lenkip ding. Tua hun kim lai ah kithoihna leh thillat a tawpsak ding………………..” chih imu ahi. Sagih a sim hun khat kichi tuh NipiKal khat (one Week) genna ahi a, hun Kimlai kichi in , Kal Khat sung a Ni laizang pen geenna ahi, huai ni laizang ni pen tuh Nilai Ni (Wednesday) chih na ahi. Tua hun kimlai ah kithoihna leh thillat atawpsak ding, kichi in, Jesu’n Gan Sisan a kithoihna leh Thillat tuam tuamte ama sihna/sisan in hon khek khe ding, a chihna ahi. Huchi bang in Jesu tuh Singtung a khailup in hong om a, eite ading in khat vei setdet ding in hong kilan kheta hi. Huai, kithoih nate atawp sak ni tuh jawlnei Daniel gen bang in, Jesu ahong sih ni 14 Aviv, Ni laini (Wednesday) ahi.

Tua ziak in bible ah chiangtak in Jesu sih ni (day) leh a tarik (date) aki mu a, himahleh Good Friday ni bel ahi kei hi. Tukum 2014 in, Aviv 14 ni tuh, April 14 (Monday) toh akituak kha (kum teng a ki tuak kha ahi kei, 14 Aviv tuh Gregorian calendar ah akituah ni aki bang gige kei).

Ahihleh Jesu Nilaini (Wednesday: Jesu sih kum in 14 Aviv, tuh Nilai ni toh kituak kha geih ahi) a hong si ahihleh, Han sung ah bangtan aom dia? bang hun in athoukik nawn dia? Jesu kam suak te ien ding. Mathai 16:21, Marka 9:31, Luka 9:2 te ah “………..ka thuak ding a, hon that ding ua, ani thum ni in pathian in hon kaithou ding, achi hi”. Tua agen bang in Jesu tuh ni 3 sung leigil ah aom dia, huchi’n a thoukik nawn ding. Hiai a ni 3 ni tuh bang tan hi geih ding hiam ichih nawn leh. Mathai 12:39-40, Luka 11:29-30 ah “ Jona Ni 3 leh Zan 3 ngapi gilsung a, aom bang in mihing tapa Ni 3 leh Zan 3 leigil ah ka om ding” achi hi. Tua bang in Jesu tuh ni 3 leh zan 3 hankhuk sung/leigil sung ah aom tek tek ding chih na ahi.

Tu’n hiai ni 3 leh zan 3 tuh koi apat koitan hia’m I en ding. 14 Aviv, Nilai ni (Wednesday) a Jesu si a nitaklam a vuiliam ahih mah bang in, lei sung a vui ahih apat simpat ding  ahi. Bible simdan in bel zan masa a sun nanung ahi, zan khat leh sun khat tuh Ni khat a sim ahi. Himahleh I theih siam na ding un tulai ni simdan in I  sim ding. Wednesday zan leh Thursday sun (zan 1+sun 1= Ni 1), Thursday zan leh Friday sun (zan 2+Sun 2=Ni 2), Friday zan leh Saturday sun (zan 3+sun 3= Ni 3). Hiai teng in, Sun 3 leh Zan 3 aching a, Wednesday a aki vui hun lakvel mah in, ani 3 ni (Saturday) nitaklam in a thoukik nawn chihna ahi. Hiai in Jawlnei te leh Jesu mah mah in gen a buching sak hi. Huchi’n Sabbath zoh Nipikala Ni masapen phalvak/zing baihtak in Mari leh Mari dang khat Jesu han veh ding in akuan ua, van sawltak khat in, tua numeite kiang ah “……Laukei un, kilhden a om Jesu zong nahi uh, chih kathei. Amah hiai a omlou ahi. Agen sa banga thoukikta hi” chi’n ana hilh hi. Mathai 28:1-7, Luka 24:1-8, Johan 20. Huchi’n Jesu tuh ava mu nawnta kei uh, agensa banga ani thum ni Saturday (Sabbath ni) nitaklam a, ana thoh khittak ziak in. Hiai a Nipikal masapen ni a kichih ziak a, hiai ni a thounawn chih na ahi kei a, Mari te Sabbath bei zoh a, Nipikal a ani masapen ni a, han veh a, ahoh hun uh genna ahi zaw hi.

Tua bang ahihman in tulai gingtu tampite’n a zuih uh, Jesu sihni Goodfriday leh a Thohnawn ni Easter Sunday te in si a, thoukik sak nawn mah lehang Jawlnei te leh Jesu mah mah in a gen te akalh kha ding. Bang ziak in? Good Friday apat Easter Sunday tan in, ni 3 leh zan 3 aching zou kei. En lehang, Friday nitaklam a vui bang hileh, Friday zan leh Saturday sun (zan 1+sun 1=Ni 1), Saturday zan (zan 2) leh Sunday zinga thoukik ahih leh (Sunday sun sim theih ani nawnkei ding, zingkal a thousak ihih tak jiak in) ni 1 leh zan 1 (or zan 2 leh sun 1) aching zou lel. Ahihleh bible gen banga sun 3 leh zan 3 ching zoulou ahihman in Good Friday leh Easter Sunday te tuh adik kei a, Bible gentoh aki tuak kei chihna asuak hi.

Tua ahihman in Jesu sihni kichi Bible a chiangtak a kimu ahi a, ahun leng sut ngai selou a, ana om khinsa or sehsa ahi, Kilakna13:8. Huai tuh Paikan a ding a Belam goh ngeina ni 14 Aviv nitaklam ahi a, huchi’n a ni 3 ni in kaihthoh in hong om nawn hi. Eite ading a Paikan Belam goh ngai nawnlou in amah mah tuh  I Paikan Belam in hong kipia a, khatvei setdet ding in hong kilaan hi, 1Korinthte 5:7.