Sisan kho-ul kichi omthei mah ahi diam?

SISAN KHO-UL KICHI OMTHEI MAH AHI DIAM?

-Valte Ginkhenpau

ginkhenpauvalte new

Matsak a A om zan in uain suukna mun chih a om Getsemani1 ah i Toupa Jesu tuh lunggim mahmah in om hi. Hiai kum pen AD 30 vel ahi a, phalbi khovot suukpi beita mahleh kholum bel kipan taktak nailou hi2. Johan 18:18 ah, huai nitak in, “...sikhate leh heutute huai ah a ding diamduam ua, a vot ziak in meihol in mei a toh ua, a lum a awi uhi; Peter leng a kiang uah a pang a, ding kawm in mei lum a awi sam hi,” chih kigelh hi.

Matthai 26:38 ah Toupa Jesu’n a nungzuite kiang ah, “Huan, a kiang uah, Ka kha a lungkham mahmah a, sihna khop hial ahi; hiai ah om unla, hon venpih un,” chi hi. Huchikhop a lunggimna a hon neih chiang in, “[Jesu] gim mahmah a, phatuamngai nawn sem in A thum a; A kho-ul tuh sii bang in, mal liantaktak in lei ah a takkheta” hi (Luka 22:44). Toupa Jesu’ kho-ul pawtkhia tuh, khosa-ul neel maimai hilou in, muhtheih pah hial ding khop a lian sisan bang kho-ul ahi hi. Ahihleh, hiaibang kho-ul sisan kichi a omthei taktak mah a diam? Ahihke’h Tanchin Hoih gelhtu Luka in gen uang deuh a hizaw diam?

Tanchin Hoih gelhtu Luka ahihleh damdawi lam toh kisai a siamna nei doctor ahi (Kolosate 4:14). Koitak a kipan doctor hihna ngahkhia hiam chih chiantak a genna om kei mahleh Antioch khomi ahihban ah a nekzonna tuh damloute etkol ahi chi in laigelhtute’n gen uhi.3 Dr. Morris gendan in, Luka in Pasian nna a sep ut man a a nekzonna tawldamhuai zaw pen tawpsan a sawltak Paul’ damtheihna enkoltu ding a kipekhia hi ding ahi chi hi.4 Dr. Luka bel thu mawk gengen hiam ahihkeileh chetna omloupi a thugelh mi hilou ahihdan Luka 1:1–4 ah chiantak in muh theih hi. William Ramsay ngei in leng Dr. Luka tuh khangthusuimite lak a apenpen khat ahi chi a gen kawm in a thutak gente kingaknataak mahmah a sakdan ana gen hi.5 Auckland University a Professor of Classic E.M. Blaiklock in leng Dr. Luka’ thugelhte pen dik taktak ahihdan thilkumlui tousuahtute’ tupi in chian ahi ana chi hial hi.6 Amaute lou leng midang tampite’n Dr. Luke thugelhte kingaknataak leh muanhuai mahmah ahihdan ana gen uhi. Huchi ahihna ah, Luka in Kha Siangthou’ huhna ban ah a nekzonna leh a siamna pansan a thu a gelhte pen dik in kingaknataak ding ahi chih muanngamhuai hi.

Mi khenkhatte’n, Luka in kho-ul bang sisan ana gen pen tungtang, ginglel mahle uh misiam leh doctor tamtakte suina apan in hiaibang kho-ul omthei taktak mah ahi chih muanngamhuai hi. Misiamte suidan in hiaibang kho-ulte pen “hematidrosis” kichi a, Greek thumal nih "(h)aima" (sisan) leh "(h)idros" (kho-ul) gawmkhawm a hong piangkhia ahi hi7. Mikang pau a mawlchik a gen in “bloody sweat” ahihkeileh “sweating blood” kichi hi. Hematidrosis tuh Hematohidrosis ahihkeileh Hemidrosis leng kichi a, sahkhovai leh sahkhovai loute ah leng kizang tuaktuak hi.8 Jacalyn Duffin, MD, PhD in hiaibang in gen hi: “Kum 2012 leh amalam in, Bolognia leh a lawmte’n, “Textbook on Dermatology” kichi a bawl uah, ‘Hematidrosis’ kichi, kho-ulte omna toh kisai a buaitheihna pen, a omlou ahi bel chi hetlou napi in, ‘chetna taktak om tadih lou ahi’ a chi uh,” chi in gen hi.9 Mi’n taksa leh lungsim lam a gimthuakna thupitak a neih chiang un a taksa ua kho-ul omna munte ah hiai kho-ul sisante hong om in, muhtheih hial ding in hong kilang tektuk kichi hi. Hiaibang hun chiang in hichibang a gimthuakte pen a buaise gawp lam hita ua, thagum leng nei zou nawn ngellou uh ahi kichi hi.

Dean Alford in 1848 kum December kha in huihpi-vuahpi kithuah in a nawksiat gawp longsia khat ah Norway longpu khat tuakkha hi. Huai mi tuh gim mahmah in om a, a mai khawng ah kho-ul sisan om tektuk hi.10 Aristotle in, “Siguite’n ma a sawn zel chiang un hong neu deuhdeuh ua… Huchi in huai tuite’n pawtna ding mun nei nawn lou ua, himahleh chiamnuih a kho-ul chi a kigen pen pawtna ding khop bel omsak veve hi… Dinmun haksatak ziak a sisan bangbang kho-ul pawtkhia mi ana om tham ahi ua, a taksa uh zoi in chau mahmah mai ua, a sisan uh tuisuak…” chi in ana gen hi.11 Amah mah in hiaibang in ana gen nawn hi: “Sisan pen a tuisuak luatleh, ganhingte damlou uh; aziak bel a sisan pen tuigel, ahihkeileh a pan dildel tui hong suak in taksa a avang tiktek omna munte apan in kho-ul bang in hong pawtkhe thei zel hi.”12 Galpi Nihna hunlai a melmate’n London khopi zan bangzahhiam akizom a hon kaaplai un leng tuailai numei khat in thawmging husate lau lua a, a tallak vel ah kho-ul sisan pawt hial hi.13

Laigelhtu khenkhatte’n Luka 22:44 a “kho-ul tuh sii bang in a kichih ziak in kho-ul sisan taktak pawt hilou in, hiai pen Toupa Jesu’ gimthuakna genlatna ding a tehkhinna kampau lelmai ahi chi uhi. Hiaibang ngaihdan neite lak a khenkhatte ahihleh Walter Liefeld leh Norval Geldenhuys ahi. Liefeld in, “A kho-ul pen tam pawt lua a liamna maa apan sisan takkhia bang hial ahi,” chih thoh mai a, Geldenhuys in leng, “Luka in, ‘hosei’chih a zat in, tehkhinna kampau lelmai ahihdan langsak a, kho-ul pen sisan mal taktak hiam ahihkeileh kho-ul leh sisan kihelkhawm gen ahi kei,” chi in ngaihdan nei liuleu thethup uhi.14 Hiai toh kisai suut zek leng i chi ahi. Luka 22:44 a “bang in” kichihna mun a Greek thumal kizang pen “hosei” kichi ahi ngut a, “bang in, bang a, bang, hilehkilawm” chihna mah hi15. Hiai thumal mah tuh Matthai 3:16; Marka 1:10 leh Johan 1:32 chihte ah Kha Siangthou pen vakhu “bang a” ahihkeileh “bang in” chih genna in kizang hi. A thu kibang mah a genna ah Luka in huai vakhu tuh ataktak a vakhu “bang in,” sa puu in a kilang chih genna in zang hi (Luka 3:22). Huchi ahihna ah, “bang in” a chih pen “ahitak mah genna” leng hithei veve ahi chihna suak hi. Dave Miller, Ph.D. in ahihleh hiai Luka 22:44 a “hosei” kichi pen “omdan” genna a zat ahi a, “tehkakna” dan a zat ahi kei chitang hi.16

Nasem gim lua leh gilkial lua khawng a i om chiang in i mai khawng ah khosa-ul neel hong kai hi. Hiaibang hun chiang in gim in kibah mahmah a, i chii bang liing deldel zezen in, thuak haksa mahmah hi. Himahleh hiai tan ah leng kho-ul neel hong pawt hipan a, kho-ul sisan bel hi naihial loulai hi. Huchi ahihna ah, i Toupa’n Getsemani huan a A gimthuak bangbang en leng thuak hi zenzen leng bangchi phet in i om di’a chih ngaihtuah tham ching hi.

Heutupa Hoih in leng haksa sa lua ahi khamoh kei ding e, “...ahihtheihleh hiai nou in hon pel mahmah hen...” chi in Pa kiang ah, a tawmpen a gen in, thumvei bang ngetna nei hial hi (Matthai 26:36–44). Hebrute kiang a laikhak gelhtu ngial in houh Toupa Jesu Khrist tuh “nakpitak a kikou leh khitui kekawm” a thum ahi chi hi (Hebrute 5:7b). A nungzuite kiang ah, “Thou un, i pai ding uh; en un hon zuausanpa a hong nai...” chi hi (Marka 14:42).Amah thuneihna hileh a hun pen zekaisak zek hiam ahihkeileh kipelsak ut hileh kilawm hi. Himahleh Amah thu hilou ahihna ah, “...kei thu hilou in Nangmah thuthu hizaw hen...” chi hi (Marka 14:35–36).

Hiaibang teng lungngaihna leh patauh luatnate ziak ahi khamoh kei ding e, Akho-ul sisan bang a hong pawt hial. Huchi in Pasian in leng Toupa kiang ah thahatna guan ding in “van a kipan in angel khat a hihhat ding in A kiang ah a hong kilaak” sak hi (Luka 22:43). Mihingte thahatna chauh a zaw zoh vual ahih tuak hetkei! Lungkham leh mangbang a om ahihna ah A lung bang am meimuai ding a, hibengbung ding in ginhuai hi.

Thukhitna ding in, Toupa Jesu Khrist in mikhialte hong tatna a A hong thuaknate toh kisai kim zaw, “Ka Hinna Nang Di’n Ka Pia” laibu ah kigelh hi.17

Chiamtehnate:

1The Expositor’s Bible Commentary (Michigan, 1984), pp. 543 & 763.

2The New King James Open Bible leh midang khenkhat in kros a Toupa Jesu kilhden a om kum AD 29 chi mahle uh, Wayne Jackson gen bang in, April kha AD 30/33 vel hizaw ding in gintakhuai hi. Jackson, Wayne, The Greatest Thoughts, Lesson 3. https://youtu.be/n3Qew2wZwlE

3Hackett, Horatio Balch, 1858, Gould and Lincoln, A Commentary on the Original Text of the Acts of the Apostles. Sheldon, Blakeman & Co., p. 12.

4Morris, Henry M., Doctor Luke. https://www.icr.org/article/480/

5Ramsay, William, The Bearing of Recent Discovery on the Trustworthiness of the New Testament, 222, 1915.

6Blaiklock, E.M., The Archaeology of the New Testament, p. 96, Zondervan Publishing Houst, Grand Rapids, Michigan, 1970.

7Hematidrosis. https://en.m.wikipedia.org/wiki/Hematidrosis

8Jerajani, H. R., Jaju, Bhagyashri, Phiske, M. M., and Lade, Nitin, HEMATOHIDROSIS – A RARE CLINICAL PHENOMENON. https://www.ncbi.nlm.nih.gov/pmc/articles/PMC2810702/

9Duffin, Jacalyn, M.D., Ph.D., Sweating Blood: History and Review. https://www.ncbi.nlm.nih.gov/pmc/articles/PMC5654990/#b5-189e1315

10Leatherman, Douglas, “The Crucifixion of Jesus,” p. 3.

11Aristotle, Parts of Animals (iii.5). http://penelope.uchicago.edu/aristotle/parts3.html

12Aristotle, History of Animals 3:19. http://penelope.uchicago.edu/aristotle/histanimals3.html

13Cloer, Eddie, ed. Truth For Today: The Life of Christ, 12, p. 13.

14Hiai thu pen Wayne Jackson in "The Agony of Gethsemane" chih a gelh apan laksawn ahi. https://www.christiancourier.com/articles/421-agony-of-gethsemane-the

15Hosei. https://www.biblestudytools.com/lexicons/greek/nas/hosei.html

16Miller, Dave, Ph.D., "Hematidrosis: Did Jesus Sweat Blood?" http://apologeticspress.org/APContent.aspx?category=13&article=2323

16Ginkhenpau, Valte, “Lungzinna Getsemani,” Ka Hinna Na’ng Di’n Ka Pia, ©2016: LB Printers, New Lambulane, Imphal, p. 25.

©ValteGinkhenpau, 2019