ZNN| Tuni 22nd Aug.2016 sun dak 12:00 in Pu M. Gouzamang Guite, EM ( Town, Education & Industries), ADCC leh Pu Divendra Singh Soun, Senior Executive, Environment and Biotech Division, Excel Industries Ltd. ten Lamka khopi sung a i nin te uh etkai di dan (Solid Waste Treatment Plan) toh kisai in, Tikendrajit House/ Manipur Bhavan, Tikendrajit Marg, Chanakyapuri, New Delhi ah houlimna nei uhi. Hiai hun ah Centralised leh De-Centralised Municipal Solid Waste Treatment toh kisai hou lim uhi.

Hun bangtan hiam houlim a hih nung in Lamka toh kisai in Centralised Process of Municipal/ Town solid waste teatment poimoh a hih dan mukhia uhi.

Tua toh kiton in Environment & Biotech Division, Excel Industries Limited in Lamka khomite a ding in 20 tons capacity per day Solid Waste Treatment Plan a di project gelh ding in lemsa uhi.

Hiai project ah a muatthei nin te a ding in Decomposting Plan om ding a, hiai in i ninte leihoihna/har suaksak ding hi. Anihna ah Pyrolosis plan- hiai in plastic te lawi thautui chikhat bawl khiakna a zat ding dan plan hi ding hi. A thumna ding in Incinarator om ding a, hiai plan in diaper te,bio- medical waste te, etc.hon process ding hi.

ADCC sik-le-tang a kuan M.Gouzamang Guite in a genna ah, India khopi tuamtuam leh khovel gam pumpi in i buaipih pen i nin te uh hi a, hiai ziak in gim namsia leh natna chi tuamtuam hii i gam ah leng thei hi. Ngakik kiang a ADC nin buakna bang leng thou tam gawp in a kim leh kiang te complaint ziak in a mun ki suankhe hialta hi.

Hoihtak a i ninte kep siangthou dan tua ipat kei leh den hun chiang in i gam leh i mipi te'n in thuak loh ding ihihna uah, ninbuakna leh Sianthouna/Sanitation vai himhim a ADC panlaknate mipin naktak a kithuah pih ding in press ah ngetna bawl hi.

I gam a ding project tuantuam buaipih mah le hang mipite toh hoihtak a i pankhop kei leh lohchinna omlou ding ahihna ah, kua peuhmah in i ninte mawk paihthang lou a buak na di mun kilawm a baw chiat ding in ngetna bawl hi. I septheihna lam chiat ah i khopi sianthouna ding in pang ni himah leh lohchinna Pathian a ahih lam mangngilh kei ni.