Governor in ICP Moreh leh Indo-Myanmar border entha

Imphal, May 17 *(Nisin Thuhiltu)* : Manipur Governor, Professor Jagdish Mukhi in tuni’n a zi First Lady Prem Mukhi tawh Moreh ah Integrated Check Post (ICP) leh Indo-Myanmar Border dinmun etthakna a nei hi. Professor Mukhi chu zingkal lam dak 11:00 ah Moreh tung in Indo-Myanmar Friendship Bridge leh Indo-Myanmar Gate No. 2 etthakna a nei a, Convention Hall, Moreh Trade Centre ah Border Trade Chamber of Commerce leh Moreh ah Organisations chuamchuam te tawh meeting nei in, trade (Import-Export) chungchang, India leh Myanmar kal, local mite’n infrastructure leh Moreh Hospital ah staff kidailo ziak ah haksatna a tuak teu pang in issue chuamchuam genkhawmna a nei ui.

Thuthak lakhawm mite dawtna Governor in a dawnhuna a chun, Government in Indo-Myanmar Friendship Road chu public in amat theina ding ua panlak hiding a hidan gen in, Molcham leh New Shamtal villages te’n kikawmtuana hawilo ziak ah haksatna a tuak uh chu etthak hiding in a gen hi. Hiatthei khat chu Government of India in Indo-Myanmar Friendship Road siamhawina ding leh Myanmar tawh gam 2 kal hawina ding ah sum tamtak seng ah lampi black topping bawlna ding ah panlakna a nei zing a hi. Governor, Professor Jagdish Mukhi in Moreh ah hun a mat sung a chun, Deputy Commissioner, Tengnoupal, Kh. Raghumani Singh leh SP, Tengnoupal, S. Ibomcha Singh te’n a kithuapi ui.

28th Hmar Martyrs' Day nit ah um; Mizoram Home Minister in hun matna uap

Lamka, May 17 *(Nisin Thuhiltu)* : Hmar Martyrs' Trophy Organizing Board (HMARTOB) saina’ zani, 16th May 2018, sunma dak 11:00 in Saikot Playground ah 28th Hmar Martyrs' Day matna leh 15th State Level Hmar Martyrs' Trophy final match a um hi. Zia hun chu R. Lalzirliana, Minister (Home, Prison & Sainik Welfare Resettlement, Rural Development, Excise & Narcotics) Govt. of Mizoram; Ginsuanhau Zou, MLA & Chairman, MANIREDA,; Vungzagin Valte, MLA & Chairman, MTDC leh Dr. Chaltonlien Amo, MLA Timpaimukh te’n Chief Guest, Guest of Honour, Functional President leh Chief Host hina tawh a uap ua, Priscilla Dargngawn leh Lawmnakim Hrangate te’n hun matna mapui in, Lalvullien Hmar, Chairman HMARTOB in keynote address a bawl a, Hmar Returnee Association-te mapuina’ condolence service nei in, gun salute lakna leh Hmar Nam a ding ah thina a la tuak te zana piakna leh pakcha piakna a um hi.

Laa thiam chuamchuam in laa sakna a nei banun KKL, YMA leh HYA te a pat in cultural dance suklat in a um a, NCC Rayburn College a pat salutation leh parade a um hi. Lalvullien in Hmar Maryrs Day mat ah a umna tawh kisai a genna a chun, December 7, 1989 ah Hmarkhawlien, Cachar District Assam ah kimang pan a hidan gen in, November 20, 1996 ah Manipur ah mat ding ah chawn ah um hi’n a taklang a, 1997 ah Saikot ah Hmar Martyrs Day mat masakpen ah a la um, kum 1998 a pat tournament tawh thua ah Hmar Maryrs Day kimang sek hi’n a gen hi.
Chief Host Dr Chaltonlien Amo in a thugenna a chun, Hmar Martyrs day ahih tawh kitawn ah, nang leh kei, kei leh nang kiti sek chu kawithak hun a hitakdan gen in, unau khat vek hina chung ah kipumkhat tak ah um ding pawimaw in a gen hi. Mizoram Home Minister R Lalzirliana panlakna ziak ah Mizoram solkal leh HPC (D) in kinawptuana siam ah HPC (D) sukpitin ah a umna chung ah kipakthu gen in, Bill passed ahiloleh Act suaksak ding a pawimaw hun ah State assembly ah panlakpi zawm zel nalai ding in, Mizoram Home Minister a chial hi.

Guest of Honour Ginsuanhau Zou, MANIREDA Chairman in a thugenna a chun, Churachandpur chu nisin ah Pentikost tunna gual a hidan gen in, a sung ah nam chuamchuam um te pau kihiattua vek, eima pau chiat ah ki pau chiat hileh le kihiatua vek ihina chung ua, Martyrs Day ahih tawh kitawn ah, Zosuan te lak ah chamna leh muanna, unau ki-hepina a tun ding a nawp thu a gen hi.

Functional President Vungzagin Valte, MTDC Chairman in a thugenna a chun, Zosuan te'n innpi ni nei in a gen a, Mizoram ah innpi khat, Myanmar, Chin state ah innpi khat um a hidan gen in, zia ah innpi pani te lak a chu Duhlian pau mang Mizo kiti te'n zosuante lak ah Pa pen hina (Role of Father) hung la panpan in, Pa pen a hinau a suklat uh tawh kitawn ah naute tawh kinawptuana siamthei ah um uh hin a gen hi. Tu chung ah Mizoram leh HPC (D) in kinawptuana suai a kai uh chu naute kiang ah hiding dawl bawlkha a hina chung un kipakpi thu a gen a, naute innchuan ti chu Ute bawl ding him hi’n a gen hi.

Chief Guest, Mizoram Home Minister in a thugenna a chun, May 31, 2018 ah Sinlung Hill Development Council chu bei ding, extend hilo ding himaleh kinawptuana tunaicha siam a hi dungzui ah, tha 6 sung ah interim arrangement bawl hiding , tukum sung ngei ah state assembly ah Sinlung bial chu kinawptuana umsa dungzui ah cabinet approval ding ah kawidaw hiding, zia masang a chu June tha leh state assembly ah Sinlung Hills Council Bill passed hiding in a gen hi. Sinlung Hiils Council munpi ding ah secretariat tawh kibang Sakawrdai ah siam hiding, zia ding a chu dangka Crore 3 le mat ziang thei ding ah umta hi’n a gen a, a kidailo ahileh le piakbe zel hiding in a gen hi. HPC (D) cadres a kipedawk te piak ding ah tiam ah um sum ahileh hun tiang piakdaw hita, a dang a vatsia chu avaima theilam ah sukfel hiding in a gen a, zialo a chu Skill development training le piak hiding un a gen hi. Chun, Aizawl ah inn neilo te chu state solkal in ngaitua piak ding hi’n a gen hi. Football Final match in FAST leh Rengkhawpui te a kihel ua, ziana a chun FAST in 1-0 ah Rengkhawpui zo in champion hina a chang ua, cash prize Lakh 1 leh trophy a sang ui.

Aina Battalion, 33 Assam Rifles in Myanmar mi 3 man

Lamka, May 17 *(Nisin Thuhiltu)* : Aina Battalion ti ah hiat ah um 33 Assam Rifles in a chiata May 13, 2018 in Mizoram leh Manipur gamgi zûl ah Myanmar mi 3 man a hidan uh Churachandpur Police apat hiat in a um hi. Parbung Company Commander in ngaina gual ah Lungthulien khua ah May 13, 2018 ni ah patrolling a chia nau ah Myanmar mi 3-te a mat uh ahia, mat ah um te chu India gamsung luttheina ding phalna kichiantak a neilo, Free Movement Regime zuilo uh hi'n Army thusuak in a gen hi. Mat ah um mi pathum te a pat in van tamtak Myanmar apat puaklut a um mudaw in le a um a, I-card bangma pawlo, a kipuandan ua Myanmar gamsung ah Tedim khawpi, Saizang city kiang ah “Vangteh Village” a um a hiu. Myanmar gamsung a Zokhawthar Village apat a gûk a Mizoram state sung April 15, 2018 ni ah lut un le a ki puang ua, mi 3 te chu - Pam Ngaih Suan (40) s/o Dam Cin Mang; Lang Deih Khai (34) s/o Nang Suan Dai leh Zam Go Mang (42) s/o Dong Khat Cing ahiu a, a leng ua Vangteh Village apat ahiu. Police in zia thu tawh kisai a chun, FIR no. 1(5) 2018 Parbung-PS u/s 14 A (b) of Foreigners Act.1946 ah tepte in, CJM mai a dinsak ahi nung un, Court in ni 6 sung, May 21, 2018 chan Police custody ah umding in lemsakna a nei hi.

Smokeless village ah Suangdoh siamdaw gua

Lamka, May 17 *(Nisin Thuhiltu)* : Guite Road ah um, Suangdawh khua ah Suangdoh Village Authority (V/A) leh Songtal Indane Gramin Vitrak in Suangdoh khua chu meikhu umlona khua (Smokeless village) suaksak gua’n panlakna a nei zing hi. Pradhan Mantri Ujjwala Yojana (PMUY) nuai ah BPL Inkuante kiang ah Liquified Petrolium Gas (LPG) connection piak hiding a hiu. Zia chu tawh kisai in, zani’n Suangdoh hausa Inpi ah Chingngaihvung, Proprietor, Songtal Indane GV in BPL Inkuante 10 kiang ah gas connection thak piakdawna a nei a, Gas stove leh cylinder 1 taw le a pekhawm ngal hi. Suangdoh khua ah PMUY connection 50 val hun lemchang masapen a hawpdaw hinalai ding in a kigen a, khaw hausa tawh kithua ah Suangdoh khua “Smokeless Village” suaksak ding ti a hi. Zia thiltup chu a lawtin ahileh, In tin ah ann huanna ding ah thing manglo ah, gas mangta ding ahiu a, nute dawnzangkhai mama ding leh gamsung ah thing-le-lote a bit chuamchuam mama ding in a kigen hi. Songtal Indane GV in PMUY nuai ah BPL Inkuante kiang ah gas connection bailam tak ah a piakdawna chung in Suangdoh VA, ZMA, PTC leh SSPP Suangdoh unit te’n media mangcha’n kipakthu a gen ui.

CCpur Doctors Assn. in 15th Foundation Day mang ding
Lamka, May 17 *(Nisin Thuhiltu)* : CCpur Tribal Doctors Association/CCpur District Doctors Association in zing May 18, 2018 zingkal lam dak 11:00 in Rengkai Road a Life Cafe ah 15th Foundation Day Celebration-cum- General Body meeting nei ding ahiu a, member-te pangkim chiat di’n CTDA/CDDA in chialna a bawl hi. Zia hun a chun, Dr. M. Lachinkhai, (Chief Host. CTDA/CDDA) in tîlkhona thu gen in, Dr. VC Pau Tonsing, Med. Supdt. Dist. Hospital/CCpur & Advisor in CDTA tawh kisai thugenna nei ding ahi. Chuleh, Ginsianlal Naulak, Advocate & Legal Advisor in CME on Medicolegal Issues ti thupi mang in thugenna nei intin, Dr. Seanbawi Vaiphei, Vice-President in vote of thanks gen in hun mangzo ding ahiu. Dr. Hegin Tungdim, President leh Dr. Zamlienmang Gangte, General Secretary mapuina’n General Body Meeting nei ding ahiu a, agenda chuamchuam genkhawm ding ahiu. Dr. Kim Simte, CMO/Advisor, CTDA/CDDA leh Dr. Tualkhankham, Advisor, CTDA/CDDA mapuina’n Treasurer leh Information Secretary ding telna le nei ding ahiu a, Dr. Thangkhum Gangte in teltin ah umte leh area representative-te pauchappiakna nei ding ahi.

Khamthei tawh mi 1 mat ah um

Lamka, May 17 *(Nisin Thuhiltu)* : CCpur Police apat a kihiat dan in, Tuibong area ah khamthei WY chang zuak a kipei um ti ah thuguk a mu dungzui un, CCpur Police apat Drug Cell in Tuibong Area ah khamthei zuaktu hiding ah muanmaw khat a man ua, WY chang tamtak le a mandawk ui. Police thusuak in a taklat zelna ah CCpur Police drug cell apat Sub Inspector pani mapuina’n Tuibong a um Jangminlen Guite chenna In etchianna a bawl hun ua, plastic bawm khat ah plastic dum ah kichûn WY packet 5 a mudawk ua, a sung ah WY chang a kigawm ah 858 um hi’n a tanglang hi. A Inneitu, Jangminlen Guite (29) s/o Seingam Guite of Tuibong chu a man ua, a damdawi cheng tawh CCpur police station in a pekdawk ui. Police in zia khamthei matna tawh kisai a chun, FIR no. 44 (5)2018 CCP-PS u/s 22(c) ND & PS Act ah tepte in, suichianna a nei zawm ui.

Meithal-meichang tawh pawsal 1 mat ah um
Lamka, May 17 *(Nisin Thuhiltu)* : A chiata May 15, 2018 in galvan chaw leh zuaksawn ah kipei umsek ahi’dan thuguk a mu dungzui un, 25 Assam Rifles leh CCpur Police kithua in mun ni in operation a bawlna un pawsal khat mat in a um a, ama apat galvan leh meithalchang hunkhawp a mudawk ui. 25 Assam Rifles leh Ccpur Police kithua te'n May 15 nitaklam dak 4:30 in Bible Hill leh Tuaitengphai ah cordon search operation a bawl hun ua, Bible hill a um galvan chawtu hiding a muanmaw, Benjamin Munluah (27) s/o M dominic Amchinpau of Tuaitengphai, CCpur mat in a um a, ama kipuan dan in, Moreh ah meithal leh meithalchang chawsawn ahidan leh meithalte Rishap (42) of Barma Camp, Dimapur kiang ah a piakdaw ding hi’n a kipuang a, a meithal chawkdawte le Tuaitengphai ah a chenna In ah a sêl hi’n a gen hi. A kipuanna gual in Tuaitengphai khua ah a Insung ah M-16 Rifle 1, M-16 Magazine 1, M-16 Sling 1, M-16 chang 130 ban ah Aadhaar Card, Pan card, Driving License leh sum Rs. 25,793 a mudawk ua, chuleh Wallet 1 leh ATM card tamtak ICICI Debit card 1, HDFC ATM Card 1, Axis Bank Titanium Card 1, SBI ATM Card 2, IDBI ATM card leh mi chuamchuamte tawh a kithuhiattuana ding ah a mat hiding ah ginchak, Visiting card tamtak a mudawk ui. Police in zia thu tawh kisai in FIR no. 43(5)2018 CCP-PS u/s 25(1-C) Arms Act a bulkhum a, CJM mai a dinsak ahi nung in, Court in Police custody ah ni 6 sung, May 21, 2018 chan umding in a lemsak hi.

Dist. Malaria Deptt. in malaria vei mudaw thak neilo
Lamka, May 17 *(Nisin Thuhiltu)* : District Malaria Department/ Churachandpur te’n January- April, 2018 sung in khawsik ziaka damlo mi 2991-te’ thisan a test-na lak ua, malaria positive 2 a mudawk ui. January 2018 tha sung in damlo mi 494 thisan a test ua, zia lak a chun malaria positive (PV) 1 a mudawk ua, February 2018 sung in damlo mi 722 thisan a test na ua, malaria positive (PV) 1 a mudawk kit ui. March 2018 tha sung in damlo mi 880 thisan test kibawlna ah malaria positive umlo hi’n a gen ui. April 2018 tha sung inle damlo mi 895 thisan test kibawlna ah positive umlo hi’n a gen ua, May tha sung ah mi 133 kibawlta lak ah positive bangma mudaw umlo hi’n le a gen ui.

AMVDFWA in ceasework strike pan ding ah puang

Lamka, May 17 *(Nisin Thuhiltu)* : S. Laltingen Vaiphei, General Secretary (Admin), All Manipur VDF Welfare Association (AMVDFWA) in thusua a bawlna ah, a thil dawtte uh tawh kisai in CM kimupina ding appointment letter tamvei tak peta maleu, Chief Minister in khatvei le a kimupi utlo ziak in, May 18-27, 2018 sung Manipur state pumpi a VDF um cheng in nasemlo ah nuakna (ceasework strike) panding uh hi’n a gen hi. Ceasework strike kibawlna ah state solkal in a ngaisak diaklo leh, a khau zawsem ah kiphinna pan ding uh hi’n le All Manipur VDF Welfare Association in thupûkna a bawl ui. Zia dungzui a chun CCpur district sung a um VDF Personnel cheng in zathuap a, kuama’n duty bawllo ding in a hiatsak a, CSO chuamchuamte leh Nu-leh-pate'n le VDF te haksatna hiatpi ah zathuap ding in chialna a bawl hi. Chuleh, District sung a Police officer te'n le amau nuai ah umkha, VDF personnel cheng in cease work strike a bawl sung ua duty puaksaklo ding in ngekna a bawl ui.

CDSA in Annual General Assembly-2018 nei

Lamka, May 17 *(Nisin Thuhiltu)* : CCpur District Sports Association (CDSA) in Hiangtam Lamka a CDSA Office ah tuni'n Annual General Assembly-2018 a nei a, CDSA nuai ah affilaited club chuamchuam ah lawiupa te’n zia hun chu a uap ui. Kamjathang Haokip, Vice President, CDSA leh K. Lian te'n hun matna amapui ua, Thiauthianmung, President, CDSA vaidawnna nei in, Thangzasang, Asst. Secretary in annual report piakna a nei a, Seiminlun Kipgen in League report 2017-18 piakna a nei hi. League report 2017-18 report dungzui in, CDSA nuai ah affiliated club 79 um, zia te chu tier 4 kikhen, District sun gah league sangpen Super division, aban ah First Division League, Second Division leh Third Division League um in, Seasion 2017-18 sung ah Super Divison League ah Club 8 um te lak ah United Khawzim Brothers (UKB) in champion hina a chan tawh ktawn ah Manipur State Winner Cup 2017 ah kihelna pang, zia a chu champion a lak kit ziak ua, Manipur Premier Club lak ah lutto, 2018-19 Season ah Manipur State League ah kihel ding ti a hi.

First Division League ah Club 20 um te lak ah Bungmual Youth Club (BYC) in champion hina la, Second Division League ah Club 20 umlak ah Avoi FC in champion hina la leh Third Divisoin League ah Club 30 um te lak ah Songdo Youth Club in champion hina la ti a hi. Annual assembly a chun, moderator in CDSA President a pang a, reording in Muandoulian a pang hi. Zia hun a chun, agenda chuamchuam genkhawmna nei in, Player transfer fee parent club & DSA in a kim gel ah a kihawp ding, club affiliation free tawh kisai ah nidang a fresher-te Rs. 3000 hisek chu Rs. 2000 hita ding, renewal-te a Rs. 2000 hisek chu Rs. 1,000 hita ding in thupukna a siam ui. Afflilaiation period ahileh April to May 31 hiding in thupukna a siam ua, Parent Club panna open tournament khat penpen ah parent club in a player-te squad list ah a kawi leh club dang ah kihel theilo ding in le thupukna a siam ui.

VENUS mapuina’ 58-CCpur A/C ah elected MLA kipakpina nei ding
Lamka, May 17 *(Nisin Thuhiltu)* : Vengnuam United Sporting (VENUS) saina’ May 19, 2018 sunma dak 11:30 leh St. Peter’s School, New Lamka ah 58-CCpur A/C a MLA candidate-te tawh kithuakhawmna leh 58-CCpur A/C Elected MLA kipakpina programme um ding ti himaleh May 19, 2018 ah State government leh UNC in kihona a nei ding ah Minister V Hangkhanlian state govt palai ding ah guat ah um ziak in, May 18, 2018 zawk ah nei ding ua a hun kichawn nai hi ah taklat in a um hi. Zia kithuakhawmna hun chu, Lalmuanlian Phaipi, President VENUS; 58-CCpur A/C ah MLA candidate – Upa Dr DK Mang; CT Lian Guite; Thangbiaklian Hangzo; K.Paukhansuan; Haukhanthang Zou; Phungzathang Tonsing leh V. Hangkhanlian in thugenna neiding a hiu a, Upa G.Kamkhanzam, Adviser VENUS in kipahthu gen ding a hi. Program ahilehVENUS in Feb.28, 2017 ah YPA Hall, Vengnuam South ah Live Discussion-cum-Debate with MLA Candidates 58-CCpur A/C a nei hun ah candidate-te lak ah teltin ah um penpen in kithuakhawmna program sponsored a bawl ding a ti dungzui ua Minister V.Hangkhanlian in a sponsor ding a hi.

RGG Football Memoriam 2018 kipan ding
Lamka, May 17 *(Nisin Thuhiltu)* : CCpur District Sports Association (CDSA) leh Ropiang Foundation Trust (RFT) saina’ May 19, 2018 a pat Lamka Football Ground ah Raja Goukhothang Guite Football Memoriam 2018 (RGG Football Memoriam 2018) kipan ding a hi. Match masa ah Korte Brothers leh Sialchal (NVYC) te kihel ding, May 21, 2018 apat ni khat ah match 2 um ding, match masa dak 12 ah Lenlai Club leh Symropia FC kihel ding, 2nd match ah nitaklam dak 2 ah New Lamka Youth Club leh Tuiring youth Organisation kihel ding a hiu. May 22 ah Ahsijolneng FC leh FC Zomi Colony, 2nd match ah Lamka Sports Club leh FC Zotal ; May 23 match masa ah Muvanlai Athletics leh Avoi FC, 2nd match ah Konsam FC leh Bungmual Youth Club ; May 24 ah United Chikim Federation leh ABC kihel ding, 2nd match ah Sialchal Fc leh Happy feet Football Academy te kihel ding a hiu.

Khominthang lampi siam hizing

Lamka, May 17 *(Nisin Thuhiltu)* : New Lamka khawpi sung ah kikawmtuana lampi pawimaw mama te lak ah khat Tedim Road leh Khominthang lampi kilometer 1(khat)-leh-kim asau kisiam thak chu masawn zel in Tedim Road a pat College road VK Tawna high tiang black topping bawlzaw in a um a, VK Tawna high a pat tuni’n lampi siamna sunzawm in black topping a bawl zawm ui. Lampi ahileh V Hangkhanlian, Minister, Agriculture, Veterinary and animal husbandry panlakna nuai ah Manipur State fund mang ah Other District Road ODR nuai ah kisiam, H. Thangzamuan Special Contractor in a siam hi.

Tinted glass/film drive bawl hizing

Lamka, May 17 *(Nisin Thuhiltu)* : Traffic Control Police (TCP), Civil Police (Male), Women Police leh VDF personnel te’n Lamka khawpisung in gari ah tinted film kitua te drive bawlna tulai in a chiapi zing ua, tuni, May 17, 2018 ah le Tedim Road, Sielmat Lei ah drive bawl in, Augustine J. Khongsai, MPS, SDPO Thanlon leh SI Lianthansang, OC Traffic te mapuina’n, tinted film kibel, gari 23 ah khawthak piak in, challan mang in sum le a liausak ui. Supreme Court order dungzui ah tinted glass/film himhim khap himaleh tulai ah company apat gari suakthak, SUV leh gari mantam dehte ah visibility percent tamlo tinted glass kituasa um te buaina sa a hidan uh gen in a um hi.

RAISE project tawh kisai DC/CCpur mapuina meeting genkhawm

Lamka, May 17 *(Nisin Thuhiltu)* : Regional Action on Inclusive Education in North East (RAISE) kiti district sung ah chiapina ding tawh kisai in tuni, May 17, 2018 sunnung dak 2:00 in BRGF Resource Centre, DC Office ah Meeting a um hi. Shyam Lal Poonia, IAS, DC Churachandpur in Meeting hun amapui a, Pauzagin Tonsing, Executive Director, CCI in RAISE project tawh kisai genlatna leh hilchianna bawl in, TMI a pat Key Teacher, Ngaisangching, Special Educator leh Parnei Vaiphei, Special Educator te’n Project chiapi ding dan tawh kisai taklatna a nei ui.

District sung ah RAISE North-East project ahileh Inclusive Education nuai ah regular school ah gualphalo te kaitheina ding ah panlak ding ti a hia, project lawtin theina ding ah District sung ah SSA School 5; Vimala Rina Government High School, Gandhi Memorial High School, SSA Residential School, Tuibuang Junior High School leh Rengkai Higher Secondary School te teldaw a hi. Teldaw ah um school te’n zia ding a chu semtu pani a guat ding uh, amau chu Key Teacher te’n hapta khat sung ah khatvei ziltilna a nei sek ding uh leh a nasepnau a etzuipi ding uh ti a hi. Meeting ahileh Centre for Community Initiative (CCI) a pat leh SSA-RTE apat RAISE North East project nuai ah school teldaw ah um te a pat ziltiltu te a pang ui.

Khongsai Students CCpur lawiupa ding telna nei

Lamka, May 17 *(Nisin Thuhiltu)* : Khongsai Students Organization (KhSO) CCpur Branch in zani a khan Joljam khua ah kum 2018-2020 sung ah KhSO CCpur Branch lawiupa ding telna a nei ui. Zia hun a chun, President ding ah Jamkhomang of M Songgel, Vice President ding ah Khamlenthang of M. Tampak, General Secretary ding ah Seiminlal of Monglenphai, Joint Secretary ding ah Letkholal of Koite, Finance Secretary ding ah Hemtinthang of Kholunphai, Treasurer ding ah Vuvung of Pangjol leh Information Secretary ding ah James of M Songgel leh Calvin of Thingkhanphai te a telting ui. Khongsai innpi ccpur leh khongsai student organization GHQ in teltin thak ah um te tilkhona nei in, Pastor Letkholal in Pathian kiang in malzawl dawt piakna a nei hi.

Ministerial team in Kangpokpi ah luipang dinmun entha

Kangpokpi, May 17 *(Nisin Thuhiltu)* : Cabinet Ministerial team khat in tuni’n Kangpokpi District huapsung ah lui pang dinmun leh diklo tak ah luipang ah gam kilakna tawh kisai etzuina a nei ui. Minister te chu- Revenue Minister, KaramShyam, Water Resources Minister, LetpaoHaokip, TA & Hills Minister, N. Kayisii and Social Welfare and Cooperation Minister, Nemcha Kipgen te ahiu a, Water Resources Minister, Letpao in thuthak lakhawm mite kiang ah thil umdan a genna a chun, state government thak in maban saupi etna luipam ah inn sak ahiloleh luipang ah gam kek dodal a hidan taklang kawm in, Manipur Flood Plain Zoning Act 1978 tawh kituak ah Deputy Commissioner te chu luipam ah innsa umtheilo ding ah notice sua ding ah hiatsakna bawl in a gen hi. Governt in mipi te bitna ding leh tui let ziak ah haksatna um zing sek te a umlona ding ah panlakna a nei chu mipi te’n support bawl chiat ding ah chialna bawl in, luipam sukthianna nasep mun tamtak ah chiapi hita hi’n a gen hi.

Revenue Minister,KaramShyam in a genna a chun, Chief Minister N. Biren Singh leadership nuai ah government in tunaicha lui (river) sukthianna nasep chiapi a hidan gen in, luipam ah innsak leh nasep thilbawlna detdo tak umsak ding phal hilo in a gen a, Chief Minister thupiak dungzui ah Ministerial team in mun chuamchuam ah lui (river) dinmun entha hi’n a gen hi. Ministerial team te chu DCs, SPs, SDO leh top official te’n le a zui ui.

Karnataka ah BJP 'largest-party theory' tawh kituak ah Opposition te’n le govt siam ding ah phutna leh panlakna nei

New Delhi, May 17 *(Nisin Thuhiltu)* : Karnataka Legislative Assembly elections results dungzuiah Bharatiya Janata Party (BJP) in single largest party hina chang maleh government form theina ding ah seat pawimaw ah bithiak um zat a luazo lo ah a um nung ah “single largest party” hi paulap kawm ah “mipi te dawitelna chang kahiu” ti ah Karnataka governor thuzaw ah, government siam tei ding a guatna chung in, Congress in le amau single largest party hina state te ah government siam ding ti’n panlakna a nei hi. Karnataka Legislative Assembly elections results ahileh - BJP seat 104 ; Congress 78, Janata Dal (Secular)/JD(S) 37 leh JD (S) pankhawmpi (ally) BSP seat 1; Independent leh party dang (others) seat 2 a hi. BJP chu single largest party himaleh government form theina ding ah seat 112/113 tiang a lua pawimaw a hia, lua zo lo a hi ziak ah party khat ngawn ah government form theilo suak a hi.

BJP in governor ding ah appoint a bawl Karnataka Governor in government siam ding ah BJP dawiskna a piak tawh kitawn in, Opposition Congress leh RJD in le single largest party a hina state — Goa, Bihar, Meghalaya leh Manipur ah governor te’n single-largest party a hina chung ua government siam ding ah dawisakna a piak ding a hi ti’n phutna a bawl ua, Goa ah Congress leader te’n Goa governor Mridula Sinha kimupi ah government siamna ding ah panlakna nei ding ah a puan uh tawh kitawn in, RJD leader Tejashwi Yadav in le Bihar governor Satya Pal Malik chu assembly phiat ding leh ama party chu government siam ding ah invite bawl ding in phutna a nei a, Manipur ah Congress leader Okram Ibobi Singh leh Meghalaya CM lui Mukul Sangma te’n le amau governors chiat kimupi ding uh hi’n a puang ui. Seat 40 umna Goa's 2017 assembly election ah Congress chu saet 21 lua a hia, himaleh BJP in party tawh kithua ah Govt a form a hi. Bihar ah RJD chu seat 243 umna, seat 80 lua ah single-largest party himaleh BJP in JD(U) tawh kithua ah government a siam a hi. Ziagualma a chun, seat 60 umna, Manipur assembly elections ah Congress chu seat 28 seats lua a hia himaleh BJP in NPP, NPF leh LJP tawh kithua ah government a siam a hi. Ziagualma a chun, Meghalaya ah le, Congress chu seat 60 umna seat 21 lua ah single argest party himaleh BJP in NPP tawh kithua ah government a diam a hi.
Manipur Chief Minister lui leh CLP leader Okram Ibobi Singh in a genna a chun, tu Simhaini ah Manipur Governor kimupi ah Assembly phiat ding leh single largest party a hi dungzui ua, government form ding ah panla ding hi’n a gen hi.

Naga issue chung ah CSO te’n kiphinna nei; CM in kimupi

Imphal, May 17 *(Nisin Thuhiltu)* : United Committee Manipur (UCM), All Manipur United Club Organisation (AMUCO) leh CCSK palai te’n tuni’n National Daily newspaper Indian Express in April 26 issue ah Naga Accord final hivangta leh agreement in state boundary sanglo ding, Arunachal leh Manipur ah autonomous Naga territorial councils um sak hiding; Naga te ding ah common cultural body, Armed Forces Special Powers Act lakdaw hiding ti te a taklatna chung in, Centre’s interlocutor, R N Ravi, leh Govt in thil umdan a hilchian ding phutna nei in, Keishampat leimajam Leikai chutmun kiphinna a nei ua, AMUCO president Ph Dervan, UCM President Sunil Karam leh President of CCSK Jitendra Ningomba te panna police team te tawh hun chawmkhat sung kinawk tuana a um nung in, Chief Minister N. Biren Singh in ama office ah kiphinna nei te kimupi in thil umdan a genpi hi.