MUHLOUH THIL AH KINEPNA KOIH
- Lian Hangluah

Kinepna i chih chiang in i nasep(na) tungtawn a thil hoih hung piang ding galdot (mukhol/en malaw) chileng ka genkhial khol sih diing hi. Loubawl mi in a loubawl na mun diing gam vat in, hoih deuh in buh a tuh ah, hun bang tan zou nung in lou a hou kiit hi. Louhoh zoh chiangin kipahtah in phalbi chianga buh lah hun diing galdot in aum hi. High School kaite’n zong kum bul in admission abawl a, sawtlou nung in February vel ah ahung kaipan uhi. June/July lah ah half-yearly exam in, November vel a exam ka bawl diing a, exam na a lohchinna ngah in kumkiit chiang in pawl ka suan diing chih kumbul in lungsim mithaa in agaldot uhi. Atunga i gen loubawlmi hileh, school kai mi hileh kumbula a ding laiun kumtawp chianga thil gahhoih (good fruit) mu diing a, kum tungtawn ah tha-le-zung, lungsim toh sum i senna te peen ‘Kinepna’ i chi ahi. Ahi in, hibang kinepna i neihlai in, mailam ah thil bang hung tung diing mu khollou in i kalsuan zing uhi. Hoihdeuh a i ngaihtuah le hi kinepna chu ginna toh pai khawm zing ahi chileng gen khial khollou diing kahi.Hubaan ah, kinepna toh ginna thuteng tuam tuah ahihvang in a tuam a i genchiang in zong ahung kisukha sim gige hi. Ajiahchu ginna zong muhlouh thil khat i tunga hung tung diing ahi chia kipahtah ah ina galdot ahi.

India in zalenna i muhzoh nung uh phualpi ah sorkar vaihawmna luahmun (tumun) peen chu Indian National Congress (INC) te ahi uhi. Kum 60 val veel phualpi ah sorkar vai ahawm uhi. Political party dang amau hengkhe zou diing in kisingsa zing uhi, ahihvang un term khat pouh vaihawmna touphah a tou zou changchang uhi. Ahi’n, Kum 2014 in Hindu kulmutte political Party Bharat Janata Party (BJP) in Congress tungah gualzou diing in hoihdeuh in ahung kisingsa uhi. Rajdeep Sardesai in alehkhabu ‘2019 How Modi Won India’ a gelhna ah Congress vaihawmna peen nehguh-tahguhna, mahni tanaute chauh sepna muhna (Nepotism) leh Gandhi Innkuante chauh lalna ngen ahi a, mipi in a chimtah gawp achi hi. Hihun laitah in Modi in mipite poimoh thei in campaign slogan a neih uh “Acche din” , eihaam in mawltah in let lei, ‘ni hoih/hun hoih hung tung diing ahi’ chiin a taangkou hi. Mite’n nehguh-tahguh bangchi hun chiangin a bei diai chia a bildoh lai un, nihoih ahihlouhle hunhoih hung tung diing ahi chia KINEPNA lianpi nei in Modi vote uhi. Modi in a chiamna mipite in gingta un BJP ana vote uhi, hung lohching un phualpi sorkar ah BJP in vaihawmna touphah ah hung tou panta uhi. 2014 chauh hilou in 2019 Lok Sabha election ah majority hihna la in phualpi sorkar ah vaihawmna touphah ah hung tou kiit ta uhi. Ahi’n dah huai tah in Modi in mipi kinepna bang in nna semlou in state khenkhat a mipi, politicians, doctorte BJP tunga lungkimlou umta uhi. Adiah in covid second wave in India nasataha a hung nuai lai in, BJP te state 5 a election ngai poimoh in mipi koukhawm in campaign bawl uhi. Huchauh zong hilou in Hindute sahkhua ah poimoh ‘Kumbh Mela’ a mi maktaduai (million lam) kihel uhi. Hi Kumbh Mela peen covid natna nasapi a thehdalhtu (super spreader) ahi chiin political party le health workers tampi in gen uhi. Hi ka gelh nasan peen Modi ka ngaihsang jiah ka gelh ahi siha, a political party hoihdaan zong gentum kahi sih. Mipi in hunhoihlou a maituah hun a, kinepna thu hung kigen peen pom baihlam mahmah chih ka gen ut ahi jaw hi.

Mulouh a kinepna a poimoh daan mi khat, amin Viktor E. Frankl tanchin apat en kiit ni. Viktor E. Frankle hi 26, March 1905 in Vienna, Austria ah apiang hi. Kum 1938 in Germany in Austria sim in Nazi te vaihawmna nuai ah um uhi. Amah hi kum 37 ahih in Nazi te in man in concentration camp ah thah diing in pui uhi. Hi camp alut tan in Frankle hi psychiatrist le neurologist ahi a, mahni hinna kilahtum (suicide patient) te a enkol hi. Heet diing a hoih chu a innkote a zi zong tel in hih concentration camp ah thah in um hi. Frankl chu akigawm in concentration camp mun li (4) ah suan in um hi. Hu camp te ahihle: Theresienstadt, Auschwitz, Kaufering III le Turkheim ahi. Frankle in a lehkhabu “Man searching for meaning” ah aumlai uh thu chiangtah in gelh hi. A lehkhabu a gelh daan in camp a umlai in guahtang (naked) in dingsah va, khovot nuai bang ah nna a sem sah uhi. Bread pheng nih (2) vel bang ni li ( 4) daih diing ann in sen uhi. Zan khovot , vuh sahpi kenuai a blanket nih (2) mi kuah (9) bang aki taang uhi. A genbehna a, hi camp a um diing chu mul (awmmul, nehmul, zahmoh mul) kiatsiang jing diing ahih daan gen hi. Mul akiat chiangun naupang suah va, nna sem sah jeel uhi. Nasem zoulou, thachaute chu gas chamber ah hallup diinga Nazi sepaihte’n pui ahihdan uh gen hi. Hinkhua hahsa sengseng in bangchile ka hinkhua ka sunuam thei diing viai chih ngaihtuah in chiamnuih bawl in aki hehnem jeel uhi. Hitobang dinmun hahsa a umlai in mihing in i hinkhua a hinsan (meaning) itheih chian chianga damna (healing) um hi chih “Logotherapy” hung mukhia hi. Camp a ni giat aum nung in atunga i gen lehkhabu “Man searching for meaning” a hung gelh hi. Hector Garcia le Francesc Miralles in a lehkhabu gelh uh “Ikigai” ah genna va Frankl in concentration camp a lehkha a gelh lai in jail officialte in a manuscript lahsah in, hal (burnt) sah va, ahihvang in kipanthah kiit a, lungkelou in alehkhagelh sunzom ahihdaan gen uhi. Frankl camp a dinmun ka et leh High School kailai a thil khat kamuh geldoh ing. Kum 2002in Imphal a Iroisemba Zoo a ganhing tuamtuam kikoihte lah a kalungsim hung khoih khat aum hi. Huchu gulpi kikoihna sung a ahnou “chiak, chiak” chia haam in gulpi lam en hi. Ahnou in gulpi a gilkial chianga hung ne diing chih athei hi, ahihvanga bolthei dang neilou , ham khiat chauh a bawlthei sun ahi. Frankl ngei zong houtute lungtuahlou lamtah a sepkhah ahiai ahihlouhle nna asep zohlouh chianga gas chamber a zot diing chu a gal et gige diing hi. Himahleh Frankl chu huchilou in hinkhua a hinsan poimoh ahihdaan gelh a, hin kinem a lehkhabu sutkal ngahlah a um ahihdaan a lehkhabu a kasim ni in limdang kasa hi. Mihing khat a piang ihih samle hinsan nei a hinkhua zat chu damna ahi chih kinepna lianpi toh concentration camp a hun azat hi thupi kasa hi. Kinepna lianpi toh hing a umlai in, April 1945 in America sepaihte’n Nazite camp suhsia in camp a umte hunkhia va, huchiin Frankl chu a saltanna apat hahkhiat (liberate) in umta hi. Frankl lehkhabu in agelh kiitna ah, camp sung a misi tamzawte, adiah a damlouhna jiah site bang, ahihlouhle camp sunga kibawl gentheihna thuah zouloua mahni kithatte peen bang dang hilou in kinepna a mansuah/mangsah jiah uh ahi achi hi. Frankl camp sung a hinkhua zatdaan ka et le hin zong kinep huai sih le kilawm hi .Nidang a lawite in thugual a thangsah ukhat , “hopeless in le daihlou” chih ka phawkhia hi. Huchiin akum kiit 1946 in Frankl in Vienna Polyclinic of Neurology ahung enkol a, 1948 in University of Vienna nuaia philosophy subject a Ph.D ngah hi. Huchauh zong hilou in, concentration ah alehkhabu zong 1991 ah U.S Top 10 most influential books ah tuangpha hi. Mihing maktaduai hu te’n, ‘ka hinkhua,hinsan umlou ahi’ chia kinepna neiloute kinepna petu ahung hita .

Gulpi mai ah ahnou ‘chiak,chiak’ chia haam a kinepna neilou dinmun in na umkha ngei ei? Covid-19 ah i nu/pa last stage a um a, Pathian thu hung kigen teng lah i bil a lutnawnlou, mi i kawma hung haam teng tungah i ning kitel mai ta. I nu/pa damlou gim peen dam na diing chauh i lungsim ah umta mai. Hitobang dinmun ah um nahih leh unau, hoih deuh in ngaihtuah thah in, i nu/pa, Khristian hi ngei chu khovel a covid-19 gimthuahna apat loupina gamlam zuan diinga kisingsa ahi. Gimthuahna nunung peen hakhe diing a kisingsa ahi a, a gimthuah peen sihnung a maituah diing toh i tehkaah le tehtham ahisih hi.(Romete 8:18). A tawldam diinga kisingsa ahi a, hamung tahin tawldam in Pa kawmah chia kipahtah a i vaihah diing ahi jaw hi. Hubaan ah damlou serious in last stage a umhial chu hilou, ahihvang a damlou jiah a kingaisia a, mi phalou a kikoih deen mi nahi ei? Zi/pasal toh kikhen a um in hinkho luite in hung kaan den in mailam nawt theilou in na um ei? Houtupa Rev. Kh. Khaizakham gendan hile, na hinkho luite jiah in kaihkuun in na um maw? I pasalte zungol vei, I nunglam ah pai san diing chilei I tate iit tuntun mai, lungbuai taha um nahi ei? Hitobang dinmun ah um ihih lai in mahni hinna kilah tup na tan i tung mawle? Ngaidih vua lawmte, Khaugui natna neite peen hinkhua a kinepna nei nawnloute, mi dawiloh te ahi zaw uhi. Mihing a pian kahih sam leh hinjiah le hinsan nei diinga Pathian in ahung siam ahi chih theih poimoh mahmah ahi. Frankl dinmun tobang na hinkhua na tuah khata a maw lawm? Nitenga dipkua le lauthawnga bang chih chiangin ka sih hun a tung diai chia umte bawn, hi gawtna leh gentheihna mualsuah diing kahi chi a kinepna lianpi toh a hing uhi. Nang bang na lungkham pih ei? Aw, i kinepnate ei deih hun a tung lou diing hive aw! I kinepna khu ngah zong ngahzoh ngai ahi. (Romte 8:25). Hinsan le hinjia nei kawma hinkhua zang in kinepna toh kalsuan lei pathian in nikhat i lungtup hung mualsuah sah diing ahi. Ajiahchu aman ka hung nuse sih diinga, khovel tawp dongin na kawmva ka um zing diing achi ngal a (Matthai 28:20). Atawpna ah, Frankl sih le hin kikal ah umlai in, hing diing kahi chi a muhtheilouh a kinepna aneih’ thahatna petu lei le vaan siamtu Pathian ahi chih mangngilh gual ahisih.