Story by: Ngaihnou.
Written By- Thanuam Dahpa

Ka lamet hetlouh in ka mobile fon ahong ging a, ka et leh a numbat kia ana hi a, pasal aw in 'ka houpih pen Ngaihnou hia' ahon chi a, kenleng ka hih dan gen in bang gen utnei hiam chih leh ka nambat alakna kadong hi. Akhua ua katanau te uapan ka nambat la ahihdan hon gen hi. Ken bel kua a hiam chih katheikei a hon theihdan khawng ka dot leh akhua ua khawmpi kavahoh lai ua honmu kha anahi a kenbel amah kathei kei hi.

 

Theingei louh himah leh katanaute kiang ua ka nambat lathei ahihziak in hoihtak in kahoupih a hon call zelding a hihdan agen in leng 'hitham e' chi in kakihou na uh katawp uhi. Kua hiam chih kathei kei a theih ut luatna leng kanei kei hi. Huchi a vangkim in hon call zel a kenleng hoihtaktak mah in kahoupih zel hi. Huchin kimulou napi in phone apan in kaki houna uapan in kinel na mahmah khat kaneita uhi. A vangkim in hon call zeuh2 a ka inn ua hong lengla ut ahih dan hon gen a,ken leng muh utna neika hihman in honghoh din kagen hi.

 

Huchi in hong hoh a, huaini apan in hun a neih nakleh hong hoh zel a kakithuah nel mahmah uhi. Kongkithuah chiang un amanleng hon ngaihnatna khangsem2 a hiding a itna thu ahong gen a hon ngaihnat dan leh hon lungulh dan apan a hon ngaitak2 hiding a gintakna kaneih ziak in kenleng ka na yes hi.

 

Hun hongpailiam zel a itna tak toh ka Uthang in hon it a katheih man in kakipak mahmah a kenleng ka itna tengteng a it in kipahna ngen in kadim hi. Vengkhat a khosakhawm kahiman un kimuh na dinghun kahau ua koles kaitawp niteng phial in ka Uthang hong lengla zel a hun nuamchuh zangkha kahi petmah hi. Huchin a kum a sim kingai leh ki it tuak tak ban ah kakal ua daltu om hetlou in nuamtak in hun kahon zangkhawm ua, ka Uthang toh kana kimuh khaklouh ding uh kalau theipetmah hi. Ka kingaihtuah a,ka Uthang in hon namuh na akhua ua khawmpi a kahoh khak hampha kakisa a,ka nambat anapia katanau te uh bang kangaih natna a leh tampi in a khang hi.

 

Huan, laisin naziak a kakhua ua hong omkhak bang keitoh ka kimuh tuah gige theihna ding a Pasian in honpan pih hi in kakoih a nitak lumding kathumna ah kipahthu Pasian kiang ah kagen khial ngeikei hi.

Ka Uthang lou a hinkhua zangding a ka kingaihtuah hun in ka laidip a naa a hithei in kakoih theikei him2 hi.

 

Nikhat lel kamuh louh inleng haksa kasa a keimah bang in aman leng a hon muh louh hun a lungleng theilua a hihdan hon kol louh hun inleng a hon text khial ngeikei hi. Ka Uthang hon itdan ka ngaihtuah a itna tak2 ahih dan kamukhia thakthak a ka kipahna kam a genkhiak theih a hikei.. Ka koles uh kibang keimah leh keitoh hunzat khawm a utziak in hunsawt lou zangkhawm theiding kahih nak uleh ka uThang a honghoh khial ngeikei a keileng kakipak theimahmah hi. Huchibang a itna diktak a hon it tangval etlawm leh laisiam toh kingai hih kalawmte khawng in hon endan uh chitak2 in hon genzel ua,huai hun in hampha kahih dan kaphawk suah thakthak a khovel a nungak hampha penbang in kaki koih zel hi.

 

Sunhun kakithuah khaklouh hun unleng fon a kihoulouh hun kanei ngeikei ua gending katheih louh hun uh a om ngeikei hi. Tunitan in ka Uthang nambat inkaming kal rington ka ngaina lailai hi. A la kazakzak sa ahi na a ka Uthang min a kakoih ahihziak in ka ngainatna a beithei ngeikei.

Kingai mahmah a hunkahon zat uh a sawtlam kathei hetkei ua himahleh theihlouh kal in kaki ngaihna uh kumkhat bang a hong chingta hi. Sapte hihdan leh mite chindan a katheih man un kaki ngaihni uh champha ni in ka Uthang ka in uah hongleng la hi.

Keikia ka omlaitak ahih man in tutna khat atukhawm in kong houlim ua..

"Ngaih,tuni bang ni a chih nathei hia,ka itna non san ni eive..kum1 paita a hiaini a nop kasak bang a kanop sakni om lou eive.." hon chi a kenle theimah leng theibang a omlou in "Uthang,kenla kathei nawnkei a,huaihun lai a zaw keibang leltak hon ngaitaktak dia hon gingta loulua hing a...ka chihpat leh ka Uthang in.. "Ngaih, itna kimawlna a zang ding kahisam a, hon itpetmah keingal ve,huai hun in ka itna hon sanglou hilechin hingzoulou taktak ding keive.." honchi in kana dawnthuk akipah dan kakhut lenkawm in hon gen a.. Aw..ka itpen leh kangaih luat ja Uthang kam a pan a huaibang kazak zaak nopdan tunitan inle katheilai hi.

 

Ka Uthang mah in "Ngaih, kahon it bang in nangle non it thuk chih kathei a himahleh gin om nathu athakthak in konchiam ut hi. Bangteng hongtung in,haksatna hongtung mahleh nang a ka hi gige a,nang a kahi gige lai a,nang a mah ka hi gige lai ding hi.." ahonchi a kakipak lona a chiam nuih kawm sim in "UThang, tu in huaichimah le chin keisang a hoih zaw nungak tampi om hi a denchia nahon ngaihsan khak dinglau keive" ka chih leh "Ngaih, mite mit ah nahoihpen keizong in kei ading in khovel a hoihpen ka kipahna pen leh ka kinepna pen nahi gige ding.. Nanglou kalungkuai a om ngeikei ding a sihna hial in honkhen ahih keileh chikmah chiang in kon taisan ngeikei ding, NANG A DING IN KASIH TANPHA IN KAGIN OM DING" hon chi a amit a itna mit tui ahongluang a kakhut a siak sak kawm in "Uthang..ka hon muanlouhziak a kahon chih ahikei a kahon itluat ziak a kontan khak louhding lau khapahpah kahi, nalung sim nasak ding hon genkha kahih leh hon ngaidam in aw" chi in ka Uthang ang ah kabelh phei a ka itpen kei ngaihziak a mit tuipawt kamuh leh kaneh nou tha hongsuak in kabiang ah itna mit tui ahong luang a ka Uthang in hon nulsak in "Ngaih, nang lou midang ngaithei nawn ding kahikei, itna kaneih tengteng nang kahon peta a, midang a ding itna neinawn lou kahi. Kon muanlouhziak hilou in nangleng sihtanpha a gin omdin honchiam ve maw" ahon chi a, huchin kanih un sihtanpha a gin om thuchiam ka chiam uhi.

 

Hun apaisau mahmah a kanute meh bazar kai ahongtung ua kanun "Ngaih, ann vahuan inla na Uthang le ann nesa in paileh voksa kahon lei a" hon chi a, ka Uthang utbawl keimah leh pailou ding a kachih teitei ziak in kisuanglah pipi in a om hi.

Numei kia ka omkhak tak uh ahihman toh ka Uthang toh kakithuah ut kawmziak in sa at theilou bang in kaki gen a 'Uthang, nangsa hon at ve"ka chihleh kanu'n "a himahve, Thang,Ngaihnou vakithuah pih aw,kei kongtawl dam ding, na hostel uale mehlim lotuan ding hilou hiven" hon na chih behlap a ka Uthang leng thumu kisa in ahong kisapah a kanih ua kichiam nuih kawm leh ki duat kawmtak a ka om uh nuam kasa mah2 hi.

 

Huaini ka Uthang toh sihtanpha a gin omdia thuchiam kabawl ziak un kalung muanna a kibehlap sawnsawn hi. Sunnung koles kaitawp tengphial a honghoh ut ahihdan ka Uthang in ahon gen gige a hong hoh gige ding lah kisuanglah ahihdan agenzel a kenbel kisuanglah lou a hong hohzel ding in kagenzel hi. Ahong hohlouh ni inleng kaki text khial ngeikei ua ahon itna thu ahon genlouh ni a om ngeikei hi. Kanu le pa deihdan a tangval hong ngai a omleh kholak a kihel pihlou a inn a kithuahpih ding a chih ahihman in ka Uthang toh kholak ah hun kazangtam ngeikhol kei uhi.

 

Mibang in haukeimah le ung mahni nek khop leh poimoh leithei ding a Pasian in hamphatna hon gotziak in kakipak mahmah hi. Ka Uthang khodang apan Hostel a hong om ahihman in apoimoh leh taksap a omkha zel a huchih hun in kapanpih zoh hun a om a amah poimoh dinglei in bazar kakai khawmzel uh chih louh a tuam in kapawt khevang mahmah uhi.

Akhenchiang in ka Uthang a kisuanglah a hihsak louhding leh leisak ngailou in agen zel a himahleh ka itpen milak a giautau tak a omding in kaphal kei a amah thu lalou in kaleisak zoh dandan kaleisak zel hi. Huchin hun ahongpai zel a tun le zua inlah hon hallou, khanvual ten lah honhal lou a ka Uthang toh ki it tak a kakhosak uhnuam kasa mahmah hi.

 

Theihlouh kal in hunte hongpailiam zel a ka Uthang in a sinna ahongzou a khopilian zaw a hongpai san ngai ding hun ahongtung a haksa kasatuak mahmah uhi. Kenbel kamaban uh hoihzawk nading ahihman in gin om diathuchiam zuipeuh leng haksa lele thuak teitei ka ngap hi.

Ka Uthang in bel nangtoh munkhat a omlou in ka omzou keiding a honchi a pailouh sawmzaw ding ahihdan fon in a hon gen a, kam a hoihtak a houpih a gen ka ut ziak in munlem khat a kimuh ding kahon sawm uhi.

 

Ka kichiam bang un kakimu ua, singlim nuai a tutna ding a kidoh khat ah kava tu uhi. Ka Uthang in fon a agen bang in pailou ding a chitinten hi.

"Ngaih, tua nikhat kongmuh louh lel le thuakzou lou dekdek hing a huaimun ah keikia kabang chi omdia" chi in a mit tui a hongluang zungzung hi. "Uthang,keitoh kikhen dending hilou chin a tunung a inopsak nading,adiak a kei nopsakna ding deihna a navapai ding a hi, damlek kum nawn chiang in ken kasinlai hongzouleng keile hongpai di kahi" chin kaheh nem a,

"Ngaih,kikhen den ding ihikei na a,nikhat lel leng nangtohlou a khosak ding hitheilou kahi. Kapai ding nadeih teitei leh nang hongzui in" a hon chi a..

 

"Uthang,enve tun kitengle nanglah sepna neinailou chin a i innsung khosak ding alampi om nailou eivoi, inu ipa lah mibang a vangpha lou ua haksatak a laihon sinsak ua tua agah alohna ding uh kumtam in sam nawnlou a akinepna uh eigel angmasial naziak a abeiding hilou ahi" ka chithuk hi.

Ka Uthang khitui kanul sengkei phial a ka angnem a belhsa a amit tui kanul sak kawm in kasiam theihtawp in vakuan a kuhkal tak a hongpang ding in kasawl nilouh hi.Banghiam gentum a hong paudek chiang in amit ah khitui nulsenglouh a hongluang zel a,ka khut neltak in keihon itziak a pawt ka Uthang mit tui lum hithit kanul zel a khasiat huaimahleh kei itna mittui nul nuam kasa mahmah hi..

Itna thuleh gin om nathuchiam te kipsak thak kawmkawm in ka Uthang kuan ding in ka hehnem den a a vangkim a kingawng kawi a kikah khum in a vangkim a nuikhawm in ka om uhi.A tawp in ka Uthang in "Ngaih,imakhua ding kakhualna ziak leh nangthu zui in kavakuan ding a ka omlouh kal in midang hon nangaih san mahmah ken aw" honchi khong2 hi. "Uthang, bangchibang a hoih in hondeih lele nanglou ngal midang ka itna ding om nawn lou ahi. Itna kaneih tengteng nang a hivekta ahi, lungmuangtak leh tawldamtak in nava paidia,khopi a mipil misiam tampilak ana om inleng keihon mangngilh hetken" ka chithuk hi.

 

"Ngaih,mipil misiam tam mahleh nanglou kuamah kalungsim luahtheiding a om ngeikei ding.. Nang a kahita a,kahi gige lai a kahi gige lai ding hi. Bng chibang inbuai lechinle tanchin non hilh mangngilh louh ding ahi. Migam ah na aw kagalzak leh na text message kamuh te ka ann sang aleng poimoh zat ahi aw" ahon chi a kalung nopdan kagensiam kei,kipak a kikou khiat ka ut mai hi.Ka Uthang kuanding a kanepzoh man in kakipak mahmah a alangkhat ah bel ka ngaihding dan kathei lua a ka kahtha a guuksuah hi.

 

Vanken ding poimoh leidingte leikhin ding kasak leh innlam apat sum mulou a a neihsun tengtoh kuan mai ngaiding ahih dan katheih in hikasa kei a,ka kuahte aleisak ding kachih leh "keitung ah nasengtam lawta,nangzat tawm dingzang ngamlou zen a kei a ding non ngaihsak gige le kisuanlah huailua ahi. Kaneih un a chitlouh ziak un kakisuang lah zoukei a..., katung a nasensa teng honsiik lechin ken hondin zou nawnlou ding" chi in chiamnuih chitak in ka Uthang in honchi a, "Uthang ei, nagenbang in kaloh khiat kiale hilou in kanu kapaten kapoi moh a zatding honpiakte uh leng nangpoi moh leina ding in ken kazang ngamkeimah, himahleh kei a nang a hi a,nang makhuading kakhualman hilou a kei le kei makhua ding kikhual bang in kaki ngaihtuah a poi kasakei,huaiziak in hon kikhual khialsak ken aw" ka chi a ka Uthang in honkikhual khialsak louding a hihdan gen in avanken dingpoimoh leiding in Paona bajar lam kazuan uhi.

Ka Uthang poimoh ding kalei ua kasumpuak teng inle daihkei mahleh tasamtak leh kilawm loutak a ka itpen milak a a omding kaphal louhziak in ka card tuamtuam tengle kakhuah siangvek hi. Ka Uthang bel a kisuanlah ziak in anuak phialphial a but ka itpen nopsakna ding petu hidia hamphatna katan kakipak zaw hi.Kikhelah tak a hun hawmthohtak leh kimunawn lou dibang tak a hunkon zat uleh hun pammaih dan kathei thakthak hi.

 

Ka Uthang in a zing in hon paisan a lampi a apaisung khawl lou phial in kaki text uhi.

A om nading mun damtak atung in sun le zanchih omlou in ka Uthang in hon ngaihdan leh keilou a haksa asakdan agen chim theikei hi. Ka hehnep theihdandan in kaheh nemzel a lungmuang tak a om a maban ding khualtheih tawp a khualding in kagen zel hi.

Kathugente ka Uthang in diksa a hingeiding a kipahthu hon gen in "nang hon neilou hileng bangmah suaklou ding hing a" honchi gige hi.

 

Khakhat sung kei itna thukia ka uthang kam apan leh message in kamu den hi. Ani hong kibehlap zel a ka Uthang leng alunglen hong nuamdeuh ahi ding a,nikhat a khat veileng hon houpih louh hun ahong omta a kalungsim in kathu gen gahsuah a hahkat tak a pang hita ding in kakoih a kakipak mahmah hi.Aman hon houpih louhchiang in ken ka phone zel a, nidang a amahlunglen luatding kalauh ziak a ka ngaihdan hah gen ngam ngeilou himah leng tuntuh kangaih dan kagen ngamzek zekta a huaihun in aman honleh hehnep zel hi.

 

A ni ani in ka Uthang a sinlai ah ahahpan hiaihiai a,akhen chiang in assigment haulua a hon text manlou ding ahihdan a hon hilh masazel a kahehtha asuahsim tom om mahleh kasawl bang a hahpan ahihziak in lungleng vungvung in ka om zel hi.. A honghah pan semsem a nitak sawt pipi nung natan inle alaisim buaipih in ka kihou mankei ua,kalung simkhat ah adik loukhat om hiding in ka um a kagen chiang in ka Uthang in "nang maban ding kakhual ziak ahi huchia nahon chihding leh kahong kik ding,ahiloulou ana ngaihtuah ken,nang ading kia a hing kahi" honchizel a kalung amuangtuam mahmah hi.

 

A ni ahong kibeh lap a ken ka text inle hon thuk louh hun atam zawta a, ka call inle alak louh hun leh akhen chiang in a ringlai hon cut sak hun a om theizel hi.

Aziak kadot chiang in kilawm taktak ahon genzel a mah hahpan na kipahpih mahleng hon avoid akatheih ziak in kalung amuanthei kei hi. Himahleh a vangkim a hon call a hon itdan hon gen a katung a akipahdan kamsiam tak a hon genchiang in kalung noplouhna teng abeizel hi..

Ka Uthang honpai san nung khanih a hong chingdekta a, ka tanau te uh huaimun a ki enkol ding vaton pih ding in ka nuten hon sawl ua,ka Uthang om namun a hohding kakilawp na alian mahmah hi. Keikilawp nasang mah in ka Uthang in theileh akipah dingdan ka ngaihtuah a hilh kal kangak lah mahmah hi. Ka pindan a lut in ka uthang ka kol a atung in a ring suak a 3vei zoh in a hon kat sak a,ka call thak nawn leh SUI OF a hon kichih san hi.Kalung a nuamkei mahmah a himahleh a napoimoh hiam class a laklai uh hidia gingta in ka kihehnem hi. Hichituk a hon ngai in khanih sung a hon itna beithei hialdin kagingta theikei hi.

 

Nitak in ka Uthang in hon call a sun aka call lai a mipoimoh khat toh akihoulai tak uh ahihziak a lalou mah ahihdan hon gen a kagin takmah ahih man in abul tung in hehsim mahleng kalung ahongdam pah hi. Kilawptak in ama om na a hohding kahih kahilh a,kagintak dan a kipak petmah dia ka koih leh kipahna thu kamkhat lekaza kei a katunni ding uh ahongdong a kagen leh huaini chitchiat hikeileh hoihding hi a honchi a,aziak kadot leh huaini amanlouh nitoh kituak khageih a hongpi manlou ding a hihdan poisatak in hon gen a keibel ka ut dek kei..! Bang chiteng inbuai lechinle huaini nakisu awng himhim ding kachi teitei hi. Honsel zoulou in hon napiding in kakihou lemkhong uhi.

Huchi in kakigen ni un kavatung ua train station a hon nangak ding sa in ka dakdak hi.Dak mahleng ka Uthang mel muhding a omkei a hongpilou hiding inlah kagingta theikei hi. Sawt khop kangak nung uale kakimuh louhtak un PCO kava naih a ka call ta hi...

 

Ring nilouh mahleh kuaman a nalakei a,3vei ka dail tak a akilak louhtak in hongpi ding a hongkuan gari atuang hiding inka koih a sawtlou kakhawl a ka dail thak hi. Tutung in ka Uthang in ala a, thilpoi mohlua khatziak a zekai hin a kigen a sawtlou nangak ding in a hon hlh hi. Dak kal khat ka ngak nung natan ua amel kamuh tuanlouh tak in kalung anuam theikei, lampi a eksiden tuak hiding bang in kakoih a kangaihtuahna apaisau theimahmah hi. Khatvei kava call thak a kalam et hetlouh in ka itluat, amel muhkal kangak lah mahmah ka Uthang in "KA NUNGAKNU'N HON PHAL LOU" ahon chi a....nuihding hia kahkhiat ek ek ding chih katheikei... Kamanglam ding kasa a katak hiding in kagingta theikei... A tawp in "Uthang, huchikhawng a kichiam nuih ngaikei, hong kintat in, damlou adia legim huaigawp ahi" kachi a,.. Hongpai ding in kagen hi. Aman lenghon chiam nuih ahi chi hileh kilawmtak in a nui a hongtungpah ding in ahon gen nawn a kinemtak in kana ngaknawn uhi.

 

A hong sawtnawn sim a kakiang vaite khawng in ahon awl moh theimahmah ua,a khente'n hon haibawl taktak in honhoupih ua,akhenten paina dingtheilou dia hon ngaihtuah in kahong khading chia hon chile a om ua huaihun chiang in ken ka u hong piding hongpah lellel ahihdan kagen zel hi.

Dak kal khat bang ahong painawn a,khua lengmial ding a hita hi.Ka omthei kei a PCO kava naihmawn a ka Itpen leh kangaihpen,sihtanpha a ding a ka kichiampih ka Uthang kava call nawn hi.. Tutung in ahihleh sawt gingman lou in anakila a kagintak khel in numei aw in hon kidawng a kua nahiam kachih leh "fon neipa nungaknu kahi.. uthang kiang a bang gen ut e?" hon chi a gintak haksa kasa petmah,atak ding in kagingta theikei a honchiam nuih hiding in kangaihtuah lai hi.

 

Ka Uthang ka itluat, amanle hon it a akahna khitui kanul na kakhut lenghul nailou a midang in anungaknu kahi a chihtheih mawk lamdang kasa,ka gingta theikei... Amhai in kapuk phial a katha neih tengteng apang in leh ka aw a kakahtha suahlam kilangsak hetlouh in "Uthang kahoupih ut" kachih leh "bang gen ut e" honchi a amah muang a damlou etkol ding hontonpih a tua train station a dak kal thum khawng ngakta kahih dan uh kagenleh,"E... Uthang zawl luinu Ngaihnou neivele maw, ka Uthang ahong hohman keiding" a honchi a,hucimawk hitheilou ding ahi, katun nadingtan bek uh hongkoih ngai ahihdan kagen leh a hehtha suak ahiding a "nang minu,bevennu, na neihzoh ziak maimai a Uthang itna tangzou lel nahi.Itna sum a leitheih ahikei. Navan leisak teng kin akin in honglakik in, tuban hiai nambat a non call nawn ngeingei leh hoihhet louding ahi" hon chi soksok a... Aw..thuak hak hinamai zen e..

 

Ka chihong ling a kabiang ah khasiatna mittui a luang zungzung a gending bangmah katheikei.. Kangaihtuahna ah "ngaih,nang adin sihtanpha in kagin om ding,midang kon ngaihsan sang in kasizaw ding" chi a ka angnep a ka uthang a kidik huthut lai tv a et bang in ahonglang a, ka itluat ziak a milak a kizepna nalhlou tak a omding kadeihlou ziak a keineih saval mi a bazen a kaleipih te tua kazolna suakmai katheisiam theikei hi.

Kathahatna tengteng suahthak in kah aw in khatvei kia hileke uthang honhoupih sak in chin kangen a "tom chik kihou ualeh" chi in nidang pek apan a kazak gige aw in "hello" hong kichi a,kah khiat ek ek ka ut a himahleh huailam thugen leng kapaina dingthu uh kihou manlou ding kahih man un "Uthang,nang hongpilou ding maw?" ka chih leh, khauhtak in "hongpi man ding hileng denpek in kahong pikhinta keidia" ahon chi gugu a... Nidang a nangtoh munkhat a omlou in bangchin kahing zoudia, nangtoh muntuam a omsang in nitha kiloh a haksatak thuak a hin ka ngapzaw" hon chih te toh akikhaipet mah hi..

 

Itna tak kanasak a kakipah petmahna leh kalawm kavual in hampha honsak mahmah uh itna in khanih adaihlouh tel kathuak siamtheikei. Minit 10 dingkhawng kakap a,kah aphathei ahihlouh man in kihalh sak in kazotna dinglam uh kazuan uhi. Ka etna lamteng in kamittui pawtziak in ahon mu ut thei mahmah ua,kazum zoukei,kaplouding chi in khapet zen in kapang a himahleh kahunlui te uh leh ka gin om nathuchiamte uh kalungsim a honglang louthei lou ahihman in kakap lou theikei...

Khovel gitlouhna chiamkha kahita.. Ka etpeuh kahehsantha a suak, mi kipak a nuika muh chiang in kaheh tha asuak a,kei le kei kining in leitung a kahin man om in kathei nawnkei a sihtheihna dingkia ka ngaihtuahtuah hi.Hon itluat ziak a mittui nulseng vual louh hial aluang a, kakiang a hunzat theihna ahihnak leh haksatna tawpkhawng thuak ngap itna khanih lepai nailou a beimai chih kangaihtuah a itna bawltu kamohsak khadekdek hi.

 

Kahun paisate ka ngaihtuah a kahih khelh om inle kathei kei,itna tak a ka it a ding a kahih theihtan a kapan hihkhial kakisakei..himahleh kahahpan na bangmah lou asuah kiale hilou a kei eng houna leh kiphatna suakmai chih kangaih tuah a,kahkhiat ka ut.. Huaihun in kalung sim natna kagenkhiat theihna ding mikangai petmah,huchia genna ding kuamah lah a om ngal kei a.... Kalungtang natziak a puaktam ding hileh khawptheih kikthei ding in a om nawnkei ding... Naa chih louh gending a omkei.. Aw itna nagu hat hinamai zen e..Ka om namun ding uh katung ua khopi hichi tuk alian a keikia om bang a lungleng tak leh thawmhau tak in hun kazang hi.

 

A haksatdan genzoh vual ding ahikei, kataksa tangtang napi in a sitoh kibang ka hilel... Ka om na inn sawngtung apan tawmkhiat mai ka ut a himahleh huchihial din hansan nakanei keizel hi.

Nitak a hong hi a,kakim kakiang te thawm ahongdai a kei adin thawmhau naki pan ahimai hi. Thawmhau ziak in ka sunglam thebang in ahawm a huihvuak hileng kakilawm hi.Innlam kangaih tuah a kanu kapa kangaihna a puang a, amaukiang bek a om hileng kathuak nuamtuan ding in kakoih hi. Inn a om hibek leng nidang a ka Uthang toh singdang englou a nun nuam kakholh khawm namun te uleh, itna simthu suut a sihtanpha a dia gin omna thuchiam kabawl namun khawng uah omleng kalunglen nuamtuam petmah ding in kangaihtuah a inn ka ngai petmah hi. Ka phone a ka Uthang paidek a avan dikalei sakte saphuklai (polythene) atun tampi akhut langnih a khai kawm a kipak a nuilai dawr sung a kanalak ka en chim theikei... Ka en a kamit tui in ka phone a buak kawtzel a,akhut a akhai misum bahial a milak a kilawmtak a a omka deihziak a kalei sakte tua kazolna suakte kamu a kisik a kahlouh hihtheih bangmah lah kanei ngal kei a.... "Uthang aw,hiaite kahon zolna lelsuak disaleng zaw maw.." kachi khe hithit zel hi.

 

Akhen chiang in honsiamtu'n hiaibang tuakdia bangdia hon siam a de aw chih ka ngaihtuah a... Nidang a ka Uthang ziak a kipak a honsiamtu kaphatna tengtu in honsiam ziak a kaham siatna a hongsuak vek hi.Akhenchiang in ka itpen ka Uthang hon suhtu huatna in kadim a vapai a vathah ahih kei lele ka Uthang tung akasen teng vasik a zahlak tak a koih ka ut a,himahleh a amah toh kisaitheih na kaneihlouh dan katheizel hi.Bang chin ka Uthang gin om hileh kuan a zolzou dia..? A ut louhpipi in kuan a ki itsak theidia..? Itna dik mahni ut ut a heikawi theih ahih louhdan katheih luat man in kuamah mohsak dingkanei kei. Itna diktak leh diktak lou bawltu leh itna tak theisiam loudia hon bawltu tung ah kakipak theikei a hipen hi. Kanusung a ka omlai a bangdia tuisik a naluang mangmailou ka de aw...chivungvung in kakap loutheikei hi.

 

Khovak kal kangak lah petmah a nidang a zantom kasak luat a dakkal khatbek zanhun behlap theileng chi a zingkal kathoh khiat hunte toh akikhai mahmah a kakahna zankhua abeithei mahmah keihi.Kathal lup a katung a fan leh siling ten hondelh lumsuk maileh chih ka ut a amaulah keilungsim ngaihtuahna hontheih pihlou in kalunglen na honzap mangsak sawm hileh kilawmtak akipei in ahahpan mahmah saisai a,keilungsim hontheihpih hilechin hiaibang a gentheihna kathuak sang a hondenglun ut ding hichin a..kachilung sim hi.Ka siklup a kapang baang in hehpihna om hetlou a hon nuihsan mu utlou bang in ka khuplup kik a,khuplup mahleng kalung zuan kadelh lumtheituan kei... Nidang a lungmuangtak a katawldam na lupna tung kei ading in gawtmun ahi maita hi..

 

Dahluat ziak a khitui luanna zan leh hehluat ziak a hagawi na zan kahinkhua paisa tengteng kigawm lele sawtzaw dingbang hial a sau ahongbei theikhong khong hi. Kamit tuiluan lam theitam keimah leng ka lukham ana kawtsuak a itna mittuiziak a lukham kawtsuak kichi tangthubu lel a kamuh tun keimahmah itna mit tui in akawt suak ta hi.Khatveile ihmu a mitsing lou in kathou khia a inn nuailam a kumsuk in ka phone khuak (SIM) ding kava ngaihtuah a, ka Uthang lah zawnngam nawnlou kahih man in haksasa pipi in a lawmpa Khualpu ka call a hun aneih leh Damdawi inn a hong hohpih din kazawn hi. Nna poimohlua nei himahleh damlouhna toh kisai ahihman in kong kimansak teitei ding ahon chi a..kei a ding in khasiatna khop kamu hi. Hon it nawnkei lele silh le ten a kazep na ziak bek a hon ngaihtuahna lohzou loding a kagintak in kasih kahin poisalou a,alawm in a seding poimoh nusezen a hon awlmoh chih kangaihtuah chiang in khasiatna in honbuak zel hi.

 

A hun ka kichiam bang un Khualpu a hongtung a ka omdan honthei a hingei ding a lamdang sa hileh kilawm in a hon en thakthak zezen a himahleh bangmah a hon gen het kei hi.....A mah kamuh in ka Uthang mel mubang phial in ka kimu a ka nuamtuam mahmah hi...Kougel kia a om hile ung ngawngkoi a kahkhiat ek ek ka ut mahmah hi.. Himahleh huchih theihna mun a hihlouh ziak in ka hohna dinglam uh ka zuan uhi.Kahih dingteng uh kahih khinpah vanglak ua ka omna ua painawn in Nitaklam hun awl kahna ding hun a tam mahmah hi...Khualpu in khopi sung a vak ding in a hon zawn a keile kapeihna in zoukei mahleh mahni a om a kahkah sang a vakhalh ka ut thoutoh,Khualpu kiang a thil omdan kantheihte kan a gen ut teng genkhiat ka ut man in ka va zui hi...

Khualpu in hon en thakthak a keibel gen ut haumah leng gen dia kakisak chiang in ka nehnou a genlou in ka daikik zel hi..Atawp in Khualpu in ka omdan nidang banglou a hihdan leh a ziak im lou a gending in hon ngen a ken le im neihetlou in ka gensuk ziahziah hi...Khualpu in lamdangsakna toh hoihtak in a hon nangaihkhiat sak a a genzoh in a mit a khitui a hongluang khe hial hi...Lamdangsa leh gingta theilou in ka phone ka Uthang ka kolna nambat bang hon et kiksak thak zezen hi...Huchin hehnep theih dandan a a hon hehnep khit in khuamial ding ahihtoh katun na lam uah ka kik nawn uhi....

 

Zanhun kazatdan nengchik le tuamtuanlou in ka Uthang ngaihtuahna leh sihtheihna ding kia ngaihtuah in zankhua in ka kap nawn hi....Khualpu bang a ka ut teng kagen theihna ding mi kangai mahmah a kuamah lah a om tuankei ua ka kahna aw za ding ka tung a Innhik, (Lizard) ganhing taang a omte lou ngal bangmah a omkei....A khen chiang in huai a Innhik te'n a mat uh ganhing neichikchik te bang a kei hon man a hon nethei ding omleh ka chimahmah hi....

 

Ka Uthang toh nuamtak a hunzang ding kineptak a kuan himahleng ka kinep louhdan tak a gawtmun sang a le haksazaw dingbang a hun kazat zoh kalkhat nung in ka kiksan ta a Inn tunkal ka ngaklah mahmah hi...Inn kahon naih deuhdeuh ua,ka lung a leng deuhdeuh zel hi....Khosung ka honglut ua,ka Uthang toh ka vak khawmna mun khawng uh kahon mu a...ka thuak nop tuam mahmah ding a ka lunggulh mahmah himahleh a noptuam na ding a om tuankei.... Amasang in kalungsim ana zaw....Tu a huchibang a om khawmkha nawnlou ding kahih dankhawng uh ka hon ngaihtuah chiang in kathuak a hak dedeuh hi...

 

A gal a ka omlai a ka nu kiang ah omleng kathuak nuam ding kasak leh a kiang ka hon naih deuhdeuh chiang in Kanu hilh theiding a hansan na kahon neikei deuhdeuh zel a lunglenna leh lungzuan na in hon nuselou ding a bang hi...Ka omlouhna lamlam nuam ding in ka ngaihtuah a,nidang a ka Uthang toh ka tut khawm ua gin om thu kachiam na munkhawng un hon hehneem ding kasak leh hehnep naaksaang in a hon sulungleng deuhdeuh zaw mah hi...Ka innsung uh kaning chih dingkhop in kaheina peuh hunlui uh sulnung omvek ahihman in a haksa mahmah hi.

 

Haksatna tawpkhawk katuah nung in Khualpu in phone in na Uthang hihkhial kisalua ahi,huchituk a hon it tu kana khemkhak zaw chi in khitui a nulnul a hon chi a..Kipah ding hia hehding chih katel theikei... Khual, Itna kimawlna ding hilou a hi chih hon na gensak in chiteng in ka dawng lel hi...Khualpu'n anagen a hi ngeiding a nikhat ka Uthang in hon phone a laklouh ding kachih hinapi in lalouthei loukhop diahon sawl om hileh kilawm in kakithei a kala hi...

 

"Ngaih, natung ah kahih khiallua,na ngaihdam tak le kahikei chih kathei,himahleh mikhialpen leng ngaihdam ngetna hun khatvei bekpiak a om hiven hon ngaidam mahmah in aw" hon chi a...

Awle chih suk ka ut mahmah a himahleh kasung lam a banghiam in "Uthang,kahon it petmah,nanglou mikuamah nangbang a ka it theihding leng a omkei ding....Itna kichi ut hunhun a mipia a ut hunhun a lakkiik theihthil ahikei hi....I hunluite ka ngaihtuah a kipahna ngen ka ngaihtuah khelai..It tak leh hawmthoh tak a nonkawi a kei non itziak a na mittui pawt te kanulna kakhut leng hoihtak in ka silsiang ngam naikei...Itna taktoh kon na it a tomchik sung itna lelding in ka hon it a kasih in le kakha nangngai in a maulai ding...Leitung ah it khatkia kana nei a tunitan in khat kia kaneilai a huaituh kua hilou in nangmah ka itluat ka UTHANG na hi....Ka hon itna lakik thei hileng ka ut petmah...Laakkiik sawm in kahahpan mahmah mai a asun azan chih omlou in tunitan Itna nang konpiak laakkhiat sawm in kabuai den hi...Hon ngaihlouh kasawm zohkhop leh kon itna pung hiaihiai in kathei ahi.. Uthang ei,kon itna chikmah chiang in a bei ngeikei ding...

 

Nang ihunluite na ngaihtuah kha ngei hia Uthang... It petmah a ka ang a nakahlai nite,Nangtoh i omkhawmlouh a nuam kasak sang in nangtoh omkhawm in gentheihna teng kathuak utzaw chi a na kahlai nite na theilai hia...ken nengchikle mangngilh nailou keive....Uthang ei mitampi in honngai ua huaite non ngaihsan ding kalau kon chihlai a khasia a mittui tampi toh nang a kia ka hi a ka hilai ding a ka hitawntung laiding nonchih lainite nangmang ngilhmah le chin ken chikmah chiang in ka mang ngilh ngeikei ding...Uthang aw..hiai leitung siksuak zen in zongmah lechin kei hon itna bang itna na mukei ding....

 

Ka ut hun a kon itna kalak khiat theihlouh kei a ding a kagen theihna ahi...Uthang ei, kon itna a thupidan tu in natheikei maithei,navang hongsia a itna ziak a haksatna na honthuak hun a om zenzen leh huaihun chiang in kon itna ziak a kagen theihna nahon theiding a huaihun chiang in nahon ngaihna a lehtampi in a kibehlap ding hi....Itna zaw a theihsiam hak lua...Leitung a mipil pen Solomon natawm in theisiam lou a chi mah theihsiam dingvual ahikei chih kathei mahmah hi...Bangchikchiang in ka Uthang hong kikdia chih ngaihtuahna lel in leng kahun tam kasubei mahmahta...I it taktak te bangchibang in hon omsan mah le uh i itna kiamtuan lou a hi a chih uh zaw ana dik lua....Kon itna nengchik leeng a kiam kei..A sun azan nang kia na hi kalungsim a om a ka ngaihtuahna a paikhe ngeilou nang na hi.... Kon it luatziak in kahinna ding a poimoh Ann sang in nalim en a keikia a om ka utzaw....Uthang huchibang khop itna eive kon na piak.....!

 

Ka lam etleh ka gintaak, ka kinepbang in na hihkhelna kiphawk in nahong kiknawn a ka kipak petmah hi...Itna tak leh taklou nahon theihtuk a ka kipahna a om kei....Kon ngaihdamna na hon ngen a Kon itna tengteng a kon na it mahbang in ngaihdam na kaneih tengteng in kon ngaidam lua...A thakthak in Itna tak leh Itna taklouh na hon theih ka kipak lua ka hon chilai ding Uthang.....Tunzaw na hihkhelh nahon theihman in kalung noplouhna teng a beita.....Chikmah chiang in itna kimawlna ding leh nuamtalna ding in hon neihet ken aw Uthang.....Itna gu nalua eive.....

A tawppen in nahong kik nawnziak a kipahthu hon gen in hiai kahon behlam laiding..... Itpetmah in kon it a kahinna sang in le kon itzaw a himahleh itna kia in mihing kihing theilou ahihziak in tuban itna natelna ah hong pilvang mahmah in aw...Kei kahoih kachihna hilou in kei itna bang itna bel namuzou kei ding a kei hon itna Itna diktak kimkhat a hon itbek toh nunnuam sawlbang honghei unla vondeih zatam hong tawi un aw...Keizong sian in hong siam dia kimpih guallai ah KUMSAWT KHAUBANG VALSAM KEI NING..... Uthang ka itna tengteng toh MANGPHA........

~~Beita~~

.