UPDATES:

Sinlai Khutdoh

vzsiamZingchin mazap tuanglam ah

Khutdoh lelliang in dawn bang hon tuak e

'Pu aw sesum khen aw sunggilkial

Vonsen sungkial a pham ding hi' chi

Vonsen pai bang a kuah veel ing e

Senlua sa'ng e lainat ing e

Lai ka nat hal in sesum khen iai ing

Misingta'n kenlam bang peel e

Ke'n zong kenlam bang peel ning ka chihleh

Kei zong lelliang khutdoh a mim bang ka thum

Sinlai ah sial bang hong suak e

Zangpehsik sesum gi bang khen ing e

Lel ka lianpih khut ka dohpih hi e

 

Melmak vaimang tuunnu aw

Zatamlai ah vangsel kisalou aw

Laukhazu bang na sekei ve aw

Nang sungneek bansam a na thumleh

Kei itna bansam a thum hi'ng e

Nang sesum banzal na dohleh

Tangliang in itna banzal doh ing e

Nang singta'n dai bang hon pelhleh

Kei lungtup lanu'n kenlam bang peel e

Vansel lelliang tuanlamnen khutdohna tan

Tuun vaang zua vaang hiam aw chi'ng e

Kei vangsel lelliang khutdoh ka tan aw

Lohlah ngaihpal dawn bang tuah vaang hi e

 

Sungneek bansap anazaw maw

An bang itna bansap anazaw maw

Sungneek bansap laisung gilkial in

Kai bang zakmel in theilou hi e

Vangkholai ah mim bang thumsak e

An bang itna bansap in e

Zehzum khuallou lanu siang thumsak e

Selungmawl tan ding khuallou e

Laisung gilkial in zaitha neemsak e

Sinlaikial in sakduang sawl bang vulsak e

Sungneek bansap phamna hi e

Itna bansap khapham louhna hal in

Sunchin-zanchin zanggu bang zen hi e

 

Sian' huai in sungneek bansam ke'ng e

Solkha man chih in sesum tuangtung e

Hizong lungtup lanulou in simlei ah

Sesum bang ahiam aw, sungneek bang ahiam aw!

-----------------------------------------------

Zingkalteng in ka nasepnalampi ah khutdohkhat in ahontuakzel a, Pu aw neek ding ka neikei, ka ta gilkial a si ding ahi,' chi in sum ahon ngenzel hi. Ata pomlai ka en a, angeeklai mahmah a, ahehpihhuai mahmah hi.Hehpihhuai mahleh sumpiak ding ka thasial a, mite'n limsaklou a peel zungzung uh hive'n chi a peel dia ka kisakleh kei le khutdoh ka hi chih ka kitheikhia a, ka khutdohpih, ka gentheihpih ahihmanin sumsiik ka pia hi.

Theihngeilouh vainupi nu aw, mi tampilak ah vangse tuamlua, genthei tuamlua kisa hetke'n. Nang neek di neilou a na thumleh kei itna tangzoulou a thum ka hi. Nang neek ding khut na dohleh ke'n itna khut ka doh hi. Nang mite'n hon limsaklou a ahonpelh uleh kei ka deihpen nungaknu'n ahon peel. Migenthei khutdoh na hongsuah na nu leh na pa ziak hia? Ke'n ka tanzohlouh ding nungak ka muhkhakziak a khutzoh suak ka hi.

Neek ding neihlouh nazaw hia, itna tanlouh nazaw hia? Neek ding neihlouh in zum ding leng khualzoulou in kholai ah khutdoh in athumsak a, itna tanlouh in zumna khuallou in nungaknu kiang ah itna ngen in athumsak.Mi'n mihai achih ding leng akhualzoukei. Gilkial' in thaazoisak a, lungtangkial in taksa anguisak hi. Neek ding neihlouh atawpna sihna ahi a, itna tanzohlouh in sihna atutlouh hang in sunkhua-zankhua in anasak hi.

Pathian' vualzawlna in neek ding ka tasamkei a, khateng in sum ahong omzel hi. Himahleh I deihpen nungak tellou in khovel a sum-le-pai leh neek-le-taak bang ahia!!!

.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING