UPDATES:

S5 Box

ZOGAM.COM Login

Ma Bang Panta Ni e..

Ommuan mun ah ngaingai ing e
Zolei simthu na sangsang ing
Sian in mang bang hon paizou hiam
Nunnop simthu ka sang moh e

Zolei khim in zing zouta e
Nunnop sunni’n lenkawl peel moh
Nichin khimkhua zing semsem e
Al bang i mangta ding hiam chi’ng

Seinou zata tuanglam khialzou e
Seisang zata al bang mangzou e
Lam bang pii ding tun-le-zua aw
Koikuam sawl bang i hei hiam aw

Lanu zatam zu bang peengzou
Tangpaal zata simsal taangzou
Nuachiang khangsawn seiniam zata
Kuata’n lam bang apii ding hiam

Chiin lianu aw chiin lungdeih aw
Selung khuam bang gelthak dih ve
Paalchih kawi’ di’n na ki-awi na’m
Kianglou toh peeng ding na awi na’m

Ka chiin aw, tangvual lungdeih aw
Selung mawl a i hei kaal in
Gamlei paal kuan namchi’n paal kuan
Nahsawl bang heu khinzou hang e

Tutkhawl in khuam bang geel ni e
Tou lungdeih in sal hon suah nua’n
Zinleng’ henkol i khai nuam lai hiam
Zinleng’ simsal i nuam hiam aw

Singta’n i saan, sen a i saan
Sianmang sawl bang i paih ngam hiam
Sawl bang i paih ngamlouh leh aw
A simthu tuu bang chiing ni e

Tu in ma bang panta ni e
Koi a pat in om hiam na chihleh
Siangsung chiat ah ma bang pan ni e
Seinoute’n dawngia bang zom hen aw
---------------------------------------------
Omna mun apan innlam thu ka na zaza a, Pathian in hon taisanta hia thu kipahhuai zaak ding a om mahmahkei. Zogam a mialgawpta a, kipahna ni a hong suak ngeikei. Niteng in amial deuhdeuh a, mangthangta ding ihi ua hia?? Khangnoute a lamkhial zouta ua, alian zawdeuhte a mangthang khinta uh. A pitu ding nu-le-pate koi a om i hi ua?

Nungakte aw, ka sanggamte aw, kingaihsun thak mah dih ve ua, miteng sawkthang ding in na kiphal tel ua hia? Pasal nei nailou pi a zattai dimdem khit a om ding na ki-awi ua hia?

Tangvalte aw, ka sanggamte aw, haina a i bual sung un i gam leh nam paallun dinga kisa lai aheu khinta hi. Kingaihsun thak ni hang, Toupa’n setan’ sal apan ahon hotkhiat nung a setan kol bulh a om lailai ding i ut ua hiam?

Kuapeuh in i zil, i neulai a (Sunday skul a) i theih Pathian leh athu i paikhe ngam taktak ua hia? I paihkhiat ngamkei uleh athu zui ni. Tu in panthak lata ni. Koi a pat ding hiam i chihleh i innsung chiat uah pan ni. Khangsawnte’n hon zomtou zel uhen.

COMMENT (1) PHA TA..  
  •  
  •  

#1#1 Sonson Ngaihte » 2013-10-04 07:08

:-)

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING