UPDATES:

S5 Box

ZOGAM.COM Login

Churachandpur buaina in hoihlam nawt lou.

Churachandpur buaina in hoihlam nawt lou.

ZNN | Lamka 8th March 2017: A paisa March 4, 2017 ni a Manipur Assembly Election 2017 Phase I buaina thupi lua omlou a zoh theih chi a kipaktaka mipi te a om lai un, a zing March 5, 2017 zan dak 9 lakvel in meltheihlouh pawl khat in Lamzang khua ah tangval nih va pi khia in, melse takin soisa uh hi.

Election ni a Lamzang khua a vote capture sawm a kuante zat gari lem social media tuamtuam a thehzak a om pen, a thehzaaktu tung a thangpai in, Lamzang khua ah tangval nih Thangmuansang (26) s/o Chingpam leh Thangsuanmung (16) s/o Niangkhochin te hiai toh kisai in meltheihlouh mi bangzah hiam ten va pii khia uh hi. Amau gel Lingsiphai kho kiang a gamlak a hehpihna bei in soisak in om ua, Lamka akipan heutu tuamtuam leh mipi bangzah hiam in hiai thu azak phet ua delh ahih dan a theih un, soisakna kholsan in tangval tegel taisan uh hi.

Hiai tangval tegel pii khiak leh soisak toh kisai in mohpaihna thusuah organization tuamtuam – Zogam.com, SSPP, YPA, ZRO, TuailaiPro, Ebcc leh MLA candidate tuamtuamte akipan bawl in om hi.

Soisak a om te statement akipan in Thangsuanlal leh Thangkhanlun te minloh in om ua, March 6, 2017 ni in mipi bangzah hiam ten muanmoh a omte tenna inn ah paikhawm in zong uh hi. Nitaklam in Ccpur Police ten Thangsuanlal leh Thangkhanlun man ua, Moirang Police Station ah koih uh hi. March 6, 2017 nitaklam dak 5 lakvel in, District Magistrate R Sudhan in leng Churachandpur town sung a muanna omna ding in 144 Cr. PC puang ngal hi.

Hichi bang thiltung a om nung in zan March 7, 2017 in Lamzang khomi mah Baby Vungbiaklun w/o Thangbiakmang meltheihlouh pawl khat in va soisa nawn ua, hospital puak in om hi. Hiai toh kisai in Lamzang mipi te thangpai in a khua hausate inn bang hihsiatsak kha uhi.

Nitaklam dak 4 lakvel in Vungbiaklun pen si dan in thu hong ki thang a, migilou te NPP worker dan a muanmoh ahih ziak un, mipi bangzah hiam ten New Lamka ah Phungzathang inn mai ah paikhawm uh hi. Phungzathang innsung a om te toh polam a mipi te kina ua, mipi thangpai ten gate susia in Phungzathang inn leng hih siat in om hi.

Police toh Sepaih ki thuah in hiai buaina hon delh ua, mipi thangpaite hawldalhna dingin blank fire, tear gas tampi kap in om a, mi 2 liam in, mi 24 vel mat in om uh hi.

Hiai buaina toh kisai in makai tuamtuam leh YPA heutute District Administratorte toh kithuzak den ua, migiloute matkhiaka, a kituahpih gawtna pe ding in panla uh hi.

Hichi bang sensitive tak buaina a om lai in, kuapeuhmah thu theichetlouhte mawk thehzaak lou dingin Zogam.com vaisaiten mipi ka hon ngen uh hi. Nang leh kei pilvan louh ziak a I gam buaina ombeh thei ahih manin pilvang chiat dingin iki ngen ahi.

YOU NEED TO LOGIN TO COMMENT | COMMENT NA PIAK NOP LEH NA LOGIN NGAI DING