Zogam.com in Panel Discussion nei – Live TV telecast leh webcast bawl in om

User Rating: 0 / 5

Star InactiveStar InactiveStar InactiveStar InactiveStar Inactive
 

Zogam.com saina in Panel Discussion nei – TV Live telecast leh webcast bawl in om

ZNN | Lamka 24 October 2015. ZOGAM.COM saina in DISCUSSION ON SOCIAL REFORMATION vis-a-vis POLITICAL ASPIRATION chih thupi pansan in, Hornbill Cable Network Studio ah Dt 24th October 2015 nitak dak 6:00 in Panel Discussion nei ua, dak 8:30 vel in program zou thei uh hi. Hiai event ahihleh singtangmite maban ding, khotang leh politics a khantouh semna dinga ngaihdan tuamtuamte kikup khopna hun leh, kong tuamtuam a siamna neite zang a amaute'n i gam dinmun a muhdan uleh a ngaihdante uh kaihkhopna hun a zat ahi. Hiai hun Honrbill Cable Network in live in khah khia a, tua banah internet tungtawn in Live Stream kibawl a, khovel pumpi a mi tuamtuam ten live in enthei uh hi.

Hiai event a Panelist-te ahihleh, Pu LT Ngaihte, IFS, New York & Columnist Zogam.com, Pu Rev Pum Za Thang Tombing, Founder President GETS, Bangalore, Pu Mangcha Thangjom, Convenor JPO, Pu H Mangchinkhup, Chief Convenor JAC, Pu CT Lian Guite, MDC & Social Activist and ZOPA, Pu Dr Chinkholal Thangsing, CEO Touch of Hope Foundation te pang uhi. Huai banah, Special Invitees in Pu Lawmpi, Lecturer, Head of Dept Pol Sc, Rayburn College, Pu Chinlunthang, President UZO, Pu Dr Th Siamkhum, Assoc Professor CCpur College, Pu Khamneithang Vaiphei, Gen Secy VPC, Pi Ngaineikim, President KWHR teng pang in mipi hunkhop in hiai hunzatna uap uhi.

Pu David Son, Columnist Zogam.com & Bank Manager, State Bank of Patiala in discussion hun host a, panel a kipan Pu LT Ngaihte hun pe masa pen hi. Pu LT Ngaihte in Zogam.com in hichi bang platform a hon bawl kipah huai a sak dan gen a, social reformation a om theihna ding in khat leh khat kikal a discussion a om tam hoih a sak dan gena, kihouna a om tawm chiang in kitheihsiam louhna piangsak sek ahih dan gen hi. Singtangmite pangkhawm dia i hong kisak chiang in ngaihdan tuamtuam i nei a, hiai ngaihdan tuamtuam i sunkhawm chiang in ngaihdan pomtaak hong piangkhia ahi chi hi.

Rev Pum Za Thang Tombing in makai tatak ding in bel nasep khiakte report pia gige hen la mi khempeuh in zaleh hoih a sak dan gen a, tua banah project i neihte khatkhat in hih tou in, hichi dan program bawl zel leng hoih mahmah ding chi hi. Tua banah tup kichian neih hoih a sak dan gen a, a hun leh mun zila thangkik bang a i gial khekkhek hoih a sak louh dan gen a, UT mah demand ni chi hi.

Pu Mangcha Thangjom in JPO te dinmun leh salpha te galna a sum hong lut leh pawt te pulakna nei hi. Aman a gen dan in JPO khut a salpha galna ah Rs 73,45,988 hong lut ta a, hiai a kipan expenditure Rs 14,21,098 ki zang khekhin ta chi hi. Salpha site sungkuan te Rs 50000 chiat khatvei kipe khe ta chih zong gen a, buaina ziaka mi aliam te etkolna leh morgue etkaina in ki zang tanpi hi chi in gen a, salpha galna puandum 2115 vel hong lut ahih dan zong gen hi.

Pu H. Mangchinkhup, Chief Covenor JAC in Bill 3 te toh kisai hong ki patdan te gen a, JAC hong kipat khiakdan te leh JAC kalsuanna te genna nei hi. Bangmah preplan om thei lou a activities te nung delh ahih na ua JAC in haksa a sakdan gen hi. I political aspiration uh tutung buaina a hong kipan khepan ahih louh dan gen a, 1960s lai pek a political aspirations neikhin i hih dan uh zong gen hi. Social reformation a om taktak na ding in attitude poimoh a sak dan gen a, i attitude te uh i bawldik masak uh poimoh a sa chi a, structural change om ziak in reformation taktak om lou ding a, nang leh kei a iki khek huthut in om ding chi hi. Central govt toh akihou na chiangchiang uh a muang mahmah a hong kiik a hih dan uh zong gen a, huchi kawm kal ah Bill 3 paipih di deih a central govt ana phuphu (talpakte) tampi om ahih dan zong mipi theih ding in gen hi. Mipi te information deih in a dangtak uh chih leng a ki thei a, himahleh mi ten i sulnung uh zui a hon lumleh sawm a panla ahi uh chih i theih ziakin thilteng mipi thei ding in hong ki lui khe khol lou ahih dan mipi ten theisiam ding in ngen hi.

Pu CT Lian Guite in a genna a ei society democracy pai a pai hi na pi in communist dan a pai in, ipai louhna di dan a pai kha in ka mu chi a, lamka ecomomy toh kisai et in i muh sang in zat khiatna a tam zok chiang in corruption leh black market lam hahbawlna leh mahni angmasialna tampi i sung ua hon tut ahih dan gen hi. Lamka mi te'n Fear psychosis dan i neih uh om a, thilthak khat a hong om peuh leh lau dan khat a om in challenging dan a la lou, tua banah mi gen peuh gingta dan a i om sek pen un kikhekna leh khantouhna hon daal hi in gen hi. I sahkhua oi dan uh bang le etthaktuak ahih dan le gen a, meiphu dan a oi thoh in, nekgukdi a om chiang a naihsuk pah dan a i om sek pen uh le khektuak ahih dan gen hi. Social reformation om na ding in kua hiam khat in hon khek di ahi kei a, nang leh kei iki khek a i bawl hoih ding ahih dan gen hi.

Dr. Chinkholal Thangsing in "ei loi i ihihna zong he nai lou, he zong he chian ngam lou. He la he ngal a, gen doh ngam lou" te i hi uh chi hi. I issue-te uh symptomatic treatment kia hih lou in, a taktak a core issue leh problem pen i etkai kei leh ki dam khe lou ding ahi chi hi. Eiloi bangziak a ki reform thei lou i chih leh i sak i khangte mihing a iki muhlouh ziak ahi chi hi. "Hi khu paite te ave, huai pa hmar te aka, huai te aka, hute thadou te ave" i chihchih ziak ua reform omthei lou ahih dan gen hi. Social reformation om na ding in unau khat i hih uh ki chiantak a theih a poimoh dan gen hi. Zogam.com leh Hornbill ten tunitak dan a discussion a hon sai uh a tawpna hi lou a, a bul hi ding in a deihthu gen a, I tup leh ngim te ki chian taktak a gen khawm mun poimoh a sak dan gen hi. Kho neu a pan i gen pat ua, khopi tan a i gen touhtouh ding uh, tua chiang a thil a hoih hong piang khe ding ahi chi hi. Beating around the bush dan a akiang a kiimvelte gengen non louh a hun ta chi hi.

Zogam.com in hiai program Hornbill Cable Network, Elvee Enterprise toh sai khop hi a, amau te tung ah kipahthu i gen ahi. Media tuamtuam hon cover sak te banah hiai event lohching tak sai ahih theihna ding sum-le-pai, tha-le-zung hon sensaktute tung ah nakpi tak in Zogam.com in kipahthu a gen banah, hiai hunzatna a venbitna hong pia Lamka Police-te leh YPA Hiangtam Lamka-te tung ah leng kipahthu i gen ahi.

Zogam.com News Network

Youtube: https://youtu.be/YDWpBXl68Ik

6igw2cF WKd61kQH

 

AcucBQ