Zogam.com in Pumbuk ah Salphate Zahna pia

User Rating: 0 / 5

Star InactiveStar InactiveStar InactiveStar InactiveStar Inactive
 

Zogam.com in Pumbuk ah Salphate Zahna pia. Report.

December 30 nitaklam dak 6 vel akipan in Hiangtam Lamka ah Salphate Zahna Pumbuk mun ah Zogam.com makaih in Salphate zahna hun zat in om hi. Zogam.com Personality of the Year Award (ZOPA) winner pu CT Lian in inteekna la in program pii hi. Salphate zah leh suun diin Mipi 700val ding paikhawm ua, mipi a tamluat ziakin hiai mun a Tipaimukh Road bang khaktan in om hial hi. Hornbill Cable Network in TV Live Telecast hih a, tua banah khovel pumpi et theih din Live Streaming leng ki bawl hi. Mipi hong paikhawm teng Zogam.com in coffee dawn sak hi.

Salphate zahna in zaila awihsiam tuamtuam S Chingnu, Damhoihching, Muanlal Tunglut, Pauginmuan, Elson Samte, Minthang Guite, Lawmnakim Hrangte, Lianmuan te akipan gamngaihla ngaihkhiak hi a, Pu Tualchin Neihsial leh Lian Suantak akipan hasotna thu ngaihkhiak hi bok hi.

Hun patna in mipi paikhawm ten Salphate zahna in Candle detna nei ua, huai kawm in Muanlal Tunglut in "Phamsa Mi Hangte" chih laa sa hi. Salphate suunna in mipi dai sipsip in ding ua, huai hun sungin kahtamlohna music ki play a, huchi in numei 9 puanvom silhin salpha 9te lim mai chiat ah candle de uh hi.

Zogam.com in "Zaila Kumpinu" chia minvuah Pi S. Chingnu in "Zuang ding in Zogam zuangse" chih laa hon sa a, huai zoh in "Ka kahna luankhi chik chiang hul ding" chih laa veteran singer Pi Damhoihching toh hon sa khawm uh hi.

Salpha inkuante akipan thugenna hun piak in om ua, amau ten a haksaknate uh mipi theih din gen ua, "Stage tung kia a gam le nam it tawpsan ta ni. Mipite peih sung teng ka tate luang uh sum le pai hiam, sepna hiam in kuamah kaki lempih kei ding uh" chi uh hi. Ni 121 ahih nung a FIR ki file lou ahih dan a theih uh poi a sak dan uh zong gen uh hi.

Pi Damhoihching in "Lamka Vangkhua" chih lah toh "Zunlouh zogam mei in bawm" hon sak zoh in Hiangtam Lamka Hausapu Thangkhosuanmung in mipi hong paikhawmte vaidawn hi.

"Vangsel Zolei" chih laa Bangalore a pan hong pai Minthang Guite in siamtak in hon sa a, tua zoh in Elson Samte toh "Khuakim A" chih laa hon sa uhi. Zomi Idol India winner Lawmnakim Hrangte in "Kill 3 Bills" chih laa toh "Nang leh Kei" chih laa siamtak in hon sa hi. Lianmuan leh a lawmpa in gamngaihna laa hon awih zoh un, "Zomi Ka Hi" chih Elson Samte leh Muanlal Tunglut in hon sa uh hi.

Zogam.com Writers Award Winner Pu Tualchin Neihsial in thu agenna ah Bill 3 lakkhiakma salphate vuilouh ding ahi chi in gen a, Robinhood meitei ten Bill 3 a om ziakin vuikhia ua,en le bill 3te a beima i salphate i vui khe kei ding chi hi. Tua banah a Salpha 9 te tung a Justice a om ma a luang uh vuih khiaklouh ding zong chi hi. Bible a Joseph luang kum 600 val Aigupta gam a pan pua ua, Canaan gam a vui uh ahi chi a, Bible a Joshua leh Calebte Israel a dia pan a lak bangbang ua, ei le pang leng vualzou di ihi chi hi. MTFD ten Delhi phualpi a coffin rally a neih uh leh nitak teng kiphinna a neih uh hih dik ahi uh chi a, 100 percent a i tawsawn ding uh ahi chi hi.

Lian Suantak in thugenna hun a neihna ah "Our Land, Our Rights, Our Identity" chih pansan in gen hi. I gam uh i pupa satsa gam ahih dan gen a, Churachand satsa ahih louh dan gen hi. 121 days i fight ta a i lohchinna point 1 genthei na om ua leh hon gen un chi in mipite dotna bawl hi. Lohchinna point khat le omlou in salphate i vui khe kei ding chi hi. Salpha sungkuante niteng a dakkal 1 bek tutpih dingin mipi ngen hi. Pankhawm poimoh dan gen a, Light house sak leh lighthouse khanglam te i pankhawm ding uh chi a. Pumbuk mun a group tuamtuam te'n program a sai zel uh competition ahi kei a, i movement uh sustain tu leh compliment tu ahih dan gen a, a saitheithei in saitouh zel hoih a sak dan gen hi.

Hau Tunglut in slogan sapna makaih a, "We want Justice" "Manipur Govt - Down down!" "Ibobi Singh downdown!" "FIR - kin takin!" chihte mipin ten sam uh hi.

S. Pauginmuan in siamtakin "Ka Kahna luan khi chik chiang hul ding na hiam" hon sa a, huai zoh in Pu CT Lian in hiai Zogam.com Salpha Zahna program toh kisai a support ana pe te - sum leh pai lam hi ta leh, tha leh zung lam hi ta leh, video leh lemlak lam hi ta leh, a gal a pan support hon pe te, lasa siam te leh thugen te leh mipi hong hoh tengteng kiang a kipahthu genna nei hi. Pu Tualchin Neihsial in thumna toh program khakna nei hi.

Reports by Zogam.com News Network.

 

 

 

 

MORE PICTURES: https://www.facebook.com/media/set/?set=oa.977342749018499&type=1