LUNGGEL THELNAH TUNGPAN KICHI LAIBU HONKHIAK IN OM

LUNGGEL THELNAH TUNGPAN KICHI LAIBU HONKHIAK IN OM

Lamka Dec. 27, 2018:
Tuni sunma dak 11 in Bungmual YPA Hall ah Pu Sumthanlian Suantak, UPSC, New Delhi a ASO semlel in a bawl Laibu "Lunggel Thelnah Tungpan" kichi honkhiatna program om hi. Hun kemtu in Pu C. Lian Langel pang hi. Hun honna thumna leh  Vaidawnna thugen Pa Khamson Suantak in nei hi.

Laibu Honkhiakna Lia Janice Tombing, M.Sc. (International Business) Robert Gordon University, Scotland, UK: Headmistress, Dainty Daffodils in nei hi. Laibu Latna Pastor G. Thangsanglian in nei hi. Program sung in Nu Neihkim leh Nu Zakim ten zaila awi in program nuamsak tuan mahmah uhi.

Laibu bawltu Sumthanlian Suantak in laibu a bawlna toh kisai nouneltak in suutna nei a, Paite Literature khansakna ding banah aneu-alian sim theih dia topic tuamtuam pansan a gelh ahihdan gen a copy 1000 bawl chi hi. Sintungbu a laimalte leh PLS zat laimalte banah English a Q, W, X leh Y zangkhawm vek a laimal 29 pansan a hiai laibu gelh ahihdan gen hi. Amah deihsaktu leh ngainatu apan leng thugenna sauloulou om hi.  Laibu bawltu' zi Khokhawl Naulak makaih in ana kaikhakna skulte, ana panpih khate leh pawl tuamtuam kiang ah laibu copy pechiat hi. Pu Sumthanlian Suantak ahihleh Aibulawn khosuak ahi a, huai khawkim a khuate copy nih chiat pia hi.

Hiaiteng zoh in "PAITE LAIBU BAWLKHIAKNA" kichi thulu pansan in Dr. Thathang Hangshing, Ginvum Ngaihte, Thangkhanlal Ngaihte, M. Vumhau, John K. Ngaihte leh Sumthanlian Suantak ten houlimna nei uhi.

Kipahthu genna hunkhakna thumna Upa D. Khamsuanlian in nei in huchiin program sunnung dak 2:22 a zoh in om hi.

 lungelthelnah

lungelthelnah2

lungelthelnah3