YPA-GHQ makaih in 1st Tangmai Festival 2018 zang ding

User Rating: 3 / 5

Star ActiveStar ActiveStar ActiveStar InactiveStar Inactive
 

LAMKA, July 20: Young Paite Assn (YPA) General Headquarters makaihna a “Tangmai Festival” 2018 zat ding toh kisai in tuni, July 20, 2018 sunnung dak 2 in YPA-GHQ Office, Hiangtam Lamka ah press briefing om hi.

Hiai hun ah Khailianthang, President, YPA GHQ in Paite Nam in Festival, Sawngpi kichi zat ding neilou a om toh kisai March 2, 2018 a YPA-GHQ makaih a General Body Meeting hun a Agenda a puaklut a om leh thupukna lak ahih dungzui a Festival zatsawm a om hi’n gen hi. Hiai festival ding toh kisai in Sub-Committee leng bawlkhiak hita a, festival min dia “Tangmai Festival” chih dia thupukna lak ahih toh kiton in August 4, 2018 chiang a YPA-GHQ Hall, Hiangtam Lamka a festival zat hiding ahihdan gen in Sub-Committee memberte pulak hi.

Organizing Sub-Committee Chairman, Vungzapau, Treasurer, YPA-GHQ in a genna ah, namdangte’n min tuamtuam zang a Festival a kineih bang ua Paite nam in Tangmai zang a Festival zatsawm hi’n gen a, huai dia budget Rs.1,50,000 koihkhiak a om ahi chi hi. Hongtung ding August 4, 2018 chiang in YPA-GHQ Hall ah a khatveina ding a Tangmai Festival zat hiding ahihdan gen hi.

Hiai hun zatna session nih in kikhen ding a, sun leh nitak a hun zat hiding leh sun hun pen Festival toh kisai leh PuPa tawndan, Culture promote-na na hun a zat hiding a, nitak hun pen Musical Night a zang in kituaktak a kipolhkhawmna hun a zat hiding ahihdan gen hi.

Pu-le-pa te’n Khawdou Sawngpi, Pawltak Sawngpi/Kut leh a dangdang a zatte uh mangthang thei dinmun a om pholhsuah thak ding deihna leh Awllen hun tuamtuam a zatte uh Christianity toh leng kikalhlou hi a theih ahih dungzui a tawndan toh mah Pathian biak ding chih deihna a hiai Festival zat ding sawm a om ahihdan gen hi.

Hiai hun PTC, YPA, PCS, SSPP, PLS, PNP leh PZP vaisaina a lungsim munkhatpu a, nuamtak a zangkhawm ding in chialna bawl hi.

A Khatveina Tangmai Festival 2018 zatna ding toh kisai in Organizing Sub-Committee in zoudawn a kho tuamtuam a pan tangmai 5,000 a pan 6,000 vel kaihkhawm sawm ua, huai hun ah khaw tuamtuamte’ Tangmai phoulak hiding leh a nenuam peuhmah in nektheih dia koih hiding hi’n kigen hi.

Festival zatna ding toh kisai ngaihdan neite’ a dia gelhthoh a piaktheihna ding bawm koih hiding a, huai ah ngaihdan, a hun, hichi zawdeuhleh chih nei peuhmah in a ngaihdan uh bawm kikoih ah khethei ding uh hi’n leng gen hi.

~ Lamka Post