SSPP HQs, AIzawl Silver Jubilee lopna' Singnou suanna

User Rating: 0 / 5

Star InactiveStar InactiveStar InactiveStar InactiveStar Inactive
 

SSPP HQs, AIzawl Silver Jubilee lopna' Singnou suanna:

Apaisa ni 16th June,2014 in Siamsinpawlpi HQs, Aizawl in Silver Jubilee lopnate laka khat din ah Mizoram a zirna insang pen Mizoram University (MZU) Campus ah singnou suanna nei uhi. Singnou 100 val mahmah suan in om a, hiai hun ah Siamsin member 90 vel te Bus 1 leh mimal motor lian leh nau hunkhoptak toh paikhawm in singnou suanna vuahzu daikai nuai ah nei uhi. Singnou suanna hun neih ma in MZU Conference Hall ah hun tomchik zatkhawm na neih masak in om a, huai zoh in singnou suanna neih ngal in om hi.

Hiai hun ah i nam sung a milian tuamtuam : Pu H.Rohluna (Cabinet Minister - School Education Minister), Pu Haukhuma Hauzel (Member Secretary, State Planning Board) Pu C.Zothankhuma (Registrar, MZU) ,Pu Khamkhokam Guite (CE, P&E), Pu. K.Sawmvela (CE, PWD), Pu G.Thanglianmang (Registrar, Guwahati High Court), Pu LV Zahnuna te leh i nam sung a mi poimoh tuamtuam leh siamsin member hunkhop tak in uap uhi.

Programme :
Pu Ngulzathuam (Silver Jubilee Celebration Committee) in kaihruaina on nei a, Pastor G.Sanglian (EBCC Pastor, Dinthar-Aizawl) in hunzat di te Pathian kiangah latna on nei hi. Huaizoh in Pu Ginlalmuan (President, SSPP HQs, Aizawl) in thugenna hun tom on nei a, Pu Haukhum Hauzel in leng singphuh a hoih dan on uang gen mahmah hi. Pu H.Rohlun (Education Minister)in singnou suan ei a di mah a hoih ahih dan leh singnou suan chauh hilou in ah a hing ngei di a suan tup zel di ahihdan on gen hi.

MZU Park ah Herhse (Mizoram State Tree) kung 10 kisuan a, huai zoh in ah Department tuamtuam te lampi sik a singnou 100 vel suan na kinei hi. Hiai singnou suan sung in vuahzu sim mahleh Siamsin member ten hahkat in singsuan na vuahzu daikai nuai ah nei thouthou uhi. Hiai ni a vuah a zuk hi vualzawlna ahih ngei kilamen a, huchilou hileh khua lumluat lauhhuai mahmah a, vuahzuk ziak in singnou suante bang leng hing suah ut bik dia lamet ahi hi.

Singnou suanzoh in ah MZU park a refreshment him tak mai nek in om a, huaizoh in group photo lakna leh Pathian kianga kipahthu genna hun Upa L.Laizik in on neihzoh in MZU nusia mahni inlam kipaktak in kikik siausiau hi.

Kipahthu genna :
1. Sum sen leh pai tengteng on leitawisak - Pu Ngulzathuam (Chairman, Silver Jubilee Celebration Committee)
2. Pick up on zangsak - Pu G.Thangsangmuan (Vice President, SSPP)
3. Sound on khelsak - Pu Lalruatkima, MLA
4. Microphone on zangsak - Dinthar Child Development Centre
5. Rs 2000/- panpihna on pia - Pu LV Zahnuna & Pi LV Laldinpuii
6. I heutute leh i mi chial tuamtuam te'n i chialna ngai poimoh a hong tel ziak un.
7. Vanzat tuamtuam on zangsak teng tung ah
8. Mahni mimal motor kiphaltaka on zangsakte tung ah.
9. A poimoh pen te lakah khat - Siamsin member tha thoh leh vuahzu daikai nuai a hong kuan tengteng tung ah
10. A tawpna leh a lohchinna dia poimoh pen i biak Pathian tung ah kipah thu leh thupi na leh pahtawina khuksak in om hen.

Silver Jubilee lopna masapen din ah date 7th June,2014 in Civil Hospital Aizawl ah unit 43 piakna ana neita ua, tukum tawplam chiang in leng a thupi theipen din a lopna hun Aizawl khawpi neih ding uhi.

Hichibanga programme lohching on zangsak i biak Pathian tungah leh member hong paikhawm tengteng tungah pawlpi min in kipahthu i gen uhi. I kipiakna uh leh i tlawmngaihna te uh Pathian in aleh tampi'n on vualzawl hen chih ithumna uh ahi.

Siamsinpawlpi damsawt hen !!!!

ssppaizawl1

ssppaizawl3

ssppaizawl4

ssppaizawl5

ssppaizawl6

ssppaizawl7