Nisin Thuhiltu - 07 April 2019

AMCO in pauchapna tawh 17th Lok Sabha Election ah thiangtho tak ah vote khiak a hitheina ding ah mipi te chialna bawl

CCpur, April 6 (Nisin Thuhiltu) : All Manipur Christian Organization (AMCO) in tuni April 6, 2019 zingkallam dak 11:00 in Lamka Press Club, Headquarter Veng ah press leh media-te a kimupi ua, 17th Lok Sabha Election 2019 ding tawh kisai in Christian-te a ding ah hiatding pawimawte puanlatna a nei ui. Zia hun achun, AMCO apat Rev. S. Prim Vaiphei, President; Rev. Dr. Hawlngam; Rev. H. Chungthang Thiek; Panti Gonmei, Rev. Kumar Meitei, Rev. Manga, RK Ajin leh Bomcha-te ahiu. Rev. S. Prim Vaiphei in a genna in, AMCO ahileh Imphal based ah um, kochuam khenchuamlo, Christian I hi’na hemil in mani lawkna ding bep leh Lalpa dawilo lam in I khawsa sek ua, AMCO in election ding tawh kisai ah a dinpi ahileh, India government inle a dinpi, Secular and Democracy ahi ti’n a gen hi. Election hun ah phung-le-chang, chi-le-nam khenlo ah, candidate in titna nei hem neilo, a umchan kilawm hem kilawmlo, kipumpiak ah gam a ding ah nasem mi ahi em tihaw ngaitua kawm ah, I vote khiat in Nampi a ding ah siatna tut ding hem malzawna tutding ti ngaitua kawm in Pathian dawidan ah vote khe chiatdi’n chialna a bawl hi. Chun, AMCO in bangtik lai ale Citizen Amendment Bill (CAB) pawm ngailo ding hi’n le a gen hi. Rev. Dr. Hawlngam in a genna ah, BJP in maban ah government a puak leh, 2021 chan ah Christian leh Islam umtalo ah India gamsung pumpi Hindu sakhua suaksak ding hi’n a gen a, zia dungzui chun, India ah Secular hi’na kembit a, secularism dawite kiang ah vote piak hawiding ahi’dan a gen hi. Rev. H. Chungthang Thiek in a genna ah, Pastor-te nasep ahileh belam-te bep buaipi ding hilo in, hinkhua ah zalenna leh khawsakna ding tiang ah mawpuakna nei hi’n a gen hi. Tulaitak ah India gam ah thil pani, secular leh non-secular a um a, India ah secular kichiapi ahi dungzui ah sakhua zalenna gam ahia, non-secular hileh India gam ah Hindu sakhua suaksak vek ding ti ahiziak in, Christian-te a ding ah dawi umlo leh dodal ding hi’n a gen hi. Chuleh, pilvang tak ah theitawp sua ah pauchap khawm ah Pathian buan ding in Christian-te kiang ah chialna a bawl hi.

Ex-Vice President, NPP in party a nutsiana ziak taklang

CCpur, April 6 (Nisin Thuhiltu) : Henlianthang, ex-Vice President, National People's Party (NPP), Manipur State in tuni, April 6, 2019 nitaklam dak 1:00 in a chenna inn, Red Cross Road ah thuthak lamkhawm mite kimupi in, NPP ah apanmun apat a ki-awngsut thu tawh kisai taklatna a nei hi. Ama'n a genna achun, politics a kibual pan ahi banah kibual tozel ding ah kisingsakna a nei tawh kitawn ah India gamsung ah political party chuamchuam a etvelna' nei a hidan gen in, zia dungzui a chu national party khat zawp ding a lunggul ziak ah NPP ah lung-nawplona bangma neilo ah maban ding etna ah NPP State Vice President panmun nusia hi'n a gen hi. Ama'n haina lekha a piak tawh kitawn ah Churachandpur District ah Executive Member zosia'n le Primary leh Active Membership ahinau nusia uh ti'n a gen a, NPP chung ah lung nawplona bangma neilo, maban ah lawtinna anei zawm pek ding uh a dawisakthu a taklang hi. . Bang party la zawm diam? ti ah dawtna a dawnhun a chun, party a zawp ding kichiantak genthei nailo himaleh Congress zawm kha thei ding in a gen hi. Hiatthei khat chu, Manipur ah National Peoples' Party (NPP) State Vice President, Henlianthang Thanglet in 4th April 2019 in haina lekha President, NPP Manipur kiang in a pelut a, NPP Primary Membership leh Active Membership hina withdraw bawlta a hidan a la taklang hi. NPP CCpur District ah President S. Thangboi, General Secy. E. Thiankholal, Vice President Khen Lian, Jt. Secy Simeon Boipu, Secy (Info & Publicity) Gin Do Lian, Secy. (Orgn.) Paulamsang, Finance Secy/Treasurer Ginkhankhup, Asst. Secy (Info & Pub.) Haukhenkham, Exe Member Tunthianmang, Exe Member Chinglohniang, Exe Member B. Ginsianmuan & Exe Member Lalmuan te'n le haina a la siam bawk ui.

NT 7april2019b

(L) Tualkhanlian luang vui hita

CCpur, April 6 (Nisin Thuhiltu) : Achiata February 14, 2019 nitak ah Mata Khua ah tizat-um tak leh mualpho-um tak ah tha ah um, (L) Tualkhanlian Khuptong tuni’n JAC against Late K. Tualkhanlian (JAC AKT) mapuina tawh vuiliam in a um hi. Late tualkhanlian luang vuiliamna ah pang ding district sung ah civil organization chuamchuam te zingkallam dak 10 ah CCpur district morgue, district hospital ah kingak khawm in JAC AKT in Morgue apat thiluang ladawk in, YPA New Lamka block gari ah pua'n,mipi'n gari chi chuamchuam ah zui in, District hospital apat Tipaimukh road chuan ah Mata playground tuut in a um a, zia mun a chu a suunna programme um in, a suunna hun matzaw ah Mata thanmual ah a luang vuiliam a hi. Suunna hun a chun, KKL GHQ, SYO GHQ, TCYA GHQ, YVA GHQ, ZYO GHQ leh YPA GHQ ah President, te apat in thugenna hun a um a, K KAbib IPS, Senior SP CCpur leh Shyam Lal poonia, IAS DC CCpur-te panlakna ah athattu matdaw zawlo ah a umna chung in, lung awilo suklatna a lim siamkawm uh halna le a um hi. A langkhatlam ah (L) Tualkhanlian Khuptong suunna nei hun sung in khawpi sung ah dukan/dawr te khak in a um hi.

NT 7april2019c

WhatsApp Group in panpina pia

CCpur, April 6 (Nisin Thuhiltu) : Chongkhozo Lunggual WhatsApp Group in Chongkhozo khua a cheng, teksia nupa’n khat kiang in tuni’n panpina thilpiak a vapia’u hi. Kamlunlal, Chief of Chongkhozou chenna inn, Bethel Veng, New Lamka ah thilpiak peding ah kuandingte a kingak khawm ua, Upa Lunpau in pauchapna in a thadawk hi. Chun, WhatsApp group admin 5-te bolero in a kuandawk ua, Chongkhozo khua ah Khamsong mapuina’n kochuam mipite tawh hun a vamang ui. Panpina dawngte ahiu leh Khupzatin (83) leh a zi, Manting (65) a hiu a, amau in chanu khat a nei ua, tuhin pawsal a nei tai. A hatlai ua lou nasep ah kivak in, Pathian malsawmna’n bu-le-bâl kumkhat nekkhawp ala neisek ban un, Pu Khuptinlam hi khutthiam thilbawl a thiam a, Sȇng le Nam haw phan in insung dawngkhak mamawte ala sutua sek ui. Himaleh, tuhin taksa upat lam a manaw dungzui ua kitodel zotalo uh hi’n a kigen hi. Kum 2 vel chiata apat khawsung mipi leh kochuamte’n ala panpi sek uh ahi’dan Chongkhozou Lunggual WhatsApp Group Admin Team in a hiatphat un, group member-te apat panpina a dawlkhawm ua, piakdawna a vanei uh hi’n a kigen hi. Thilpiak a kigawm in Rs. 15,700 ban ah Blanket 1, puanchen 3, dial 1, sathau buk 2, chi kg 2, surf packet 1, sabon 3, toothpaste 1, vitamin buk 1, chini kg 1, dal kg 1, wash mate 1, dish wash bottle 1 leh anchang half bag a tuakkhawm uh piakdawna a vanei ua, Upa Khawlkap in kipakthu genna pauchapna nei in a kikhen ui.

Ann ngawl ah pauchapkhawmna nei
CCpur, April 6 (Nisin Thuhiltu) : Society for Fast Justice saina in tuzingkal dak 7:00 in Peace Ground, Tuibong ah a 17-veina Lok Sabha election ding tawh kisai in ann ngawl ah pauchapkhawmna a nei ui. Zia hun achun, Rev. Dr. Ginkhanmung Zou in a mapui a, Evan. Thenmang in hun hawnna pauchapna nei in, Rev. D. Ruth Niangpi Singson in vaidawnna thu a gen a, Evan Tonkhansuan in thawlawm latna a nei hi. Rev. (Retd.) Nengzatun in hun nina a puihuai a, maban election thiangtho leh zalen tak ah mitin in mani dawidan chiat a kiteltheina ding un pauchapkhawmna a nei ui. Pauchapkhawmna hun thumna ah, teltin ah um penpen in khawsung ah kituakna umtheina ding ah pan a hung laktheina ding in a pauchap ua, chuleh, district sung a thuneitute, security ban ah khawtang mapuitute a ding inle a pauchap ui. Nu Lamlhing in hun tawp ah kipakthu genna a nei a, Rev. (Retd.) Lhunkhojam, ECA, Molnom in hun khakna pauchapna a nei hi. Zia ann ngawl pauchapna hin, Ccpur sung ah pauchap pawl chuamchuam apat member tele ava pang ui.

JNV Tuinom ah class-6 zilding lakna ding ah exam bawl
CCpur, April 6 (Nisin Thuhiltu) : Jawahar Navodaya Vidyalaya (JNV), Tuinom ah class-6 zilding lakna ding in tuni’n CCpur sung a exam centre bangzat hem in entrance exam a bawl ui. Exam centre-te ahileh - Rengkai Higher Secondary School, Vimala Raina High School, Gandhi Memorial High School, Vumhao High School, Kangvai High School, Singngat High School, Thanlon High School, Pherzawl High School leh INA High School ahia, dak 11am-1pm tiang in exam a nei ui. Rengkai Higher Secondary School ah candidate 500 in exam a bawl ua, Vimala Raina High School ah 500, Gandhi Memorial High School ah 372, Vumhao High School ah 100, Kangvai High School ah 67, Singngat High School ah 95, Thanlon High School ah 152, Pherzawl High School ah 179 leh INA High School ah 357 ahia, a kigawm in Ccpur district ah candidate mi 2,322 ahiu.

Zou Gal Centenary lawpna video hawng ding
CCpur, April 6 (Nisin Thuhiltu) : Zou Gal Centenary Commemoration Committee (ZGCCC), 2017-2019 malatna in a hungtung ding April 9, 2019 nitaklam dak 2 in Zogal Hall, Zou Veng ah Zou Gal Centenary lawpna video, Zou Gal Centenary Commemoration 2017 Documentary video hawnna nei ding ahiu. Zia hun achun, V. Hangkhanlian, Minister, Agriculture, Veterinary and Animal Husbandary, Government of Manipur in Chief Guest hina leh Chinlunthang, President, United Zou Organization (UZO), GHQ in Chief Host hina tawh uap ding ahiu a, laa sathiam, James Arjun leh Hatboi Taithul te’n laa sading ahiu. Zia documentary video hi a hawndawna neizaw phatleh copy khat Rs. 200 ah chawkthei hiding ahi.

Free and Fair Election Rally nei
CCpur, April 6 (Nisin Thuhiltu) : 17th Lok Sabha election ding tawh kisai in district sung ah mawpuakna sangpen neitu, Shyam Lal Poonia, IAS, DC, District Election Officer (DEO), CCpur panlakna' election tawh kisai ah kisîngsakna chiazawm zel in, tuni’n khawpi sung ah CCpur for Free and Fair Election Rally a nei ui. Bike rally ah pang dingte Royal Enfield Showroom, Chiengkawnpang, Tipaimukh Road in a kingakkhawm ua, zia hun achun, Shyam Lal Poonia, IAS, DC, DEO in rally tup le ngîm chungchang thugenna a nei zaw in, ama mapuina’n Kangvai a zuan ui. Kangvai apat Khuga Dam tiang in rally a nei ua, rally a pang gari zosia’n ONE PERSON ONE VOTE ti kizikna flag a tak chiat ui. Shyam Lal Poonia in genna ah, a hungtung ding April 11, 2019 ah Lok Sabha Election 2019 um ding ahia, zia hun achun, CCpur district leh Pherzawl district in Member of Parliament ah mipi palai ding telna neiding ahi dungzui ah, Election Commission of India (ECI) in No Voter to be Left Behind ti chiapi ahi’na ah mizosia’n vote a khiak chiat ding uh tupna ah kibawl hi’n a gen a, mite’n amau dawitelna ah thiangtho leh zalen tak ah vote a khiaktheina ding ua panla chiat ding in chialna a bawl hi.

CCpur ah NPF President chenna inn pawl khat in bulu
CCpur, April 6 (Nisin Thuhiltu) : Tuni, 6th April 2019 zan dak 9:00 tuam ah kua ahi hiatlo car 2 ah chia, pawsal 10 vel in Red Cross Lane, Churachandpur ah S. Genlunthang, President, Naga People's Front (NPF), Churachandpur District chenna inn vabulu ah a document pawimaw hunkhawp thezak piak ah a um banah printers HP LaserJet Pro M1136 Multifunction Printer khat leh Canon Multi-Function Printers K10392 banha Plastic Stool a suksiat banua a chanu leh anau in liamna tuak un a kigen hi. Zialo a chu NPF support leh supportlo thu ah tha ding tiang ah vauna bawl un le a kigen hi. A langkhatlam ah zia thiltung tawh kisai chu police kiang tut ah um leh police ten thil umdan delzuina nei un a kigen hi.

Kayakalp Award 2018-2019 hawpdawna tawh Swachhata Pakhwada 2019 hawng
CCpur, April 6 (Nisin Thuhiltu) : District Health Society (DHS), Churachandpur saina in tuni Kayakalp Award 2018-2019 hawpdawna leh Swachhata Pakhwada 2019 hawndawna, OPD Waiting Area, First floor, District Hospital, Churachandpur in a nei ui. Shyam Lal Poonia, IAS, Deputy Commissioner/Chairman, District Health Society, National Health Mission, Churachandpur in zia hun chu a uap a, Swachhata Pakhwada 2019 hawndawna leh thugenna a nei hi. Zia hun achun, Medical Superintendent, District Hospital, Churachandpur nuai a sȇm, Doctor, Nurse leh CREED Worker-te a pang ua, chuleh district sung a Health Institution chuamchuam apat Medical Officer palai leh Nurse palai ban ah CMO leh DFWO nuai a DPMU leh BPMU zosia ban ah CHC leh PHC cheng ah staff-te a pang ui. District Hospital, Churachandpur in Kayakalp Award hi thumvei a lakna hita hi’n a kigen a, tukum ahin District Hospital, Thoubal tawh point kibang a mu ziak un kipakman Rs. 50 lakh a kimkhat gel in a kihawm ui. Primary Health Centre ah Manipur pumpi a ding in PHC, Behiang in nivei a lakna a hitai. District Health Society, Churachadnpur a Chairman, Shyam Lal in a genna ah, Primary Health Centre khenkhat Health and Wellness Centre ah langkai ahi dungzui ua vanmatchak kiningting zaw ding kinepna nei hi’n a gen a, chuleh, semtute’n vanmatchak bep ah kinga lo ah, mani kipumpiak tak ah mipite a ding ah tamtheipen semdawk ah, zia ding chun, ASHA Worker te'n leh bawlthei tamtak nei uh hi’n a gen hi.

Asian Baptist Bible College in Graduation Service nei
CCpur, April 6 (Nisin Thuhiltu) : Asian Baptist Bible College and Seminary (ABBC&S), Bibile Hill, Rengkai in zing April 7, 2019 nitaklam dak 1:30 in Garlow Memorial Chapel, NTBCA Campus ah a 12-veina Graduation Service nei ding ahiu a, zia hun achun, Dr. Henkhothang Tungnung in Graduation Message gending ahi. Tuching ahin Bachelor of Theology (B.Th) leh Bachelor of Religious Education (BRE) zilzo mi 11 graduate ding ahiu a, graduation certificate leh award chuamchuam hawmdawna nei ding ahiu. NTBCA apat NTBCA Governing Council, Executive Secretary, Director of Missions, Youth Promoter ban ah Pastor leh Worker te’n le zia hun chu uap ding ahiu.