Nisin Thuhiltu - 05 April 2019

Zana sangtak tawh J&K ah thina tuak Inspector Alex Lalminlun Tungnung vuiliam hita

CCpur, April 4 (Nisin Thuhiltu) : Tuaitengphai thanmual ah tuni’n Line of Control (LOC) ah thina ala tuak, Inspector Alex Lalminlun Tungnung luang chu za’na liantak tawh thupi tak ah vuiliam ahi tai. Inspector Alex Lalminlun Tungnung ahileh India leh Pakistan kigamgitna, Line of Control (LOC), Jammu and Kashmir ah April 1, 2019 zingkallam dak 11:15 vel a Pakistan lam apat bomb kikap hal in a se’khak ahia, Army Command Hospital, Udhampur puaktung himaleh damzotalo in, za’ni khan a luang a inn uh puaktung ahi. Tuzingkal dak 10 in Thomas Khupkholam Inn, Tuaitengphai ah St Teresa’s Parish, Local Tuaitengphai intekna ah a vuina program mat ahi. Zia hun achun, Border Security Forces (BSF) te’n le Alex Lalminlun Tungnung, Inspector, BSF za’na sangpen pia in , thanmual ah gun salute a bawl ui. Chuleh, district administration lam apat Shyam Lal Poonia, IAS, DC CCpur; Mannuamching, IAS, DC, Pherzawl; K. Kabib, IPS, Senior SP CCpur ban ah BSF lam apat Indra Kumar Mehta, IPS, IGP, STC BSF CCpur; RK Mishra, Commandant, STC BSF, CCpur; Hidam Shubol Singh, Commandant, II3 Battalion, BSF; MKT Simte, Second IC, STC BSF, CCpur; VCK Vaiphei, Deputy Commandant, 113 Battalion, BSF; T Douminlian, Assistant Commandant, STC BSF, CCpur; Robin Toijam, Assistant Commandant, 168 Battalion, BSF; Ajay Kumar, Assistant Commandant, 113 Battalion, BSF; RK Kanojia, Assistant commandant, 93 Battalion, BSF; Pankaj Rawat, Assistant Commandant, 111 Battalion BSF; Lunzamung Tungnung, MPS Additional SP, Operator Pherzawl, Gouzadou Tungtung, Ex-MLA; Sandeep Sawabh, Deputy Commandant; Aaseesh Singh, Deputy Commandant, STC BSF, CCpur; Paramjit, Assistant commandant, STC BSF, CCpur ban ah district administration leh security force lam apat official leh rank official chuamchuam inle a uap ui. Zia hun achun, Indra Kumar Mehta, IPS, IGP, STC BSF, CCpur in a genna ah, India gam a ding ah Late T. Alex Lalminlun in a hinna tiang tuak ah a kipiakna BSF khangthu ah mangtalo ding ahi’dan a gen a, a nutsiat a zi leh inkuante ban ah a kipatdawna, Zou namte’ Pathian in thamuan hen ti’n a dawisakthu a gen hi. Chuleh Late T Alex Lalminlun thina tawh kisai ah lekha pawimaw tawh kisai ah buaina zosia panpi ding ah kimansa uh hi’n a gen hi. (L) T. Alex Lalminlun, Inspector, 168 Battallion, BSF ahileh T. Thomas Khupkholam leh Teresa Niangneihching-te cha pathumna ahia, April 24, 1983 in Tuaitengphai khua in a piang a, thiamzilna lam ah nursery apat class 6 chan St Teresa's School, Tuaitengphai in a kai a, Class 7 Don Bosco High School in a zil a, Class 8-10 chan St Mary‘s High School, Tuibong in a kai hi. Sielmat Christian Higher Secondary ah Class-12 a zo a, MA English Honours, Manipur University, Canchipur in a zo hi. Kum 2008-2010 kikal in Radha Krishnan Foundation School, Tuibong ah private teacher in a sem a, 2010 in SSC CPO nuai ah Sub-Inspector zikdawk in, 2011 in ala join hi. 2018 a promotion mu in Inspector in a kaisang hi. April 10, 2013 in Ruthy Kholalngai tawh a kicheng ua, tuhin chapa khat a nei ui. 2018 kum apat Poonch district, Jammu and Kashmir ah posting ahi.

Baite in U'pa Sailo kiang ah Sating piakna leh Khiangkawi puan silsakna nei

CCpur, April 4 (Nisin Thuhiltu) : Baite Innpi Committee, Manipur in tuni dak 11:00 in SL Thangvela chenna Inn, Salem Veng ah Boklua (Sailo Pa) kiang ah Khawkuan (Baite) te’n u’pa Sating piakna a nei ui. Zia hun a chun, Upa Jamkhosei Baite in a mapui a, Rev. Mangkhosei Baite in hun hawnna pauchapna nei in, T. Robert Baite, Secretary, Baite Innpi Committee in kimelhiattuana hun a mang hi. Holkhopao, Innpi Pa in thugenna a nei ban ah u’pa, SL Thangvela kiang in Sating piakna leh puandum silsakna a nei hi. SL Thanvela in thugenna leh naupa, Baite a ding in malzawlna a dawtpiak a, Rev. Doukhojam Baite in hun khakna pauchapna a nei hi. Innpi Pa, Holkhopao in a genna ah, kum tamtak u’pa hialo ah pu-le-pate ala um uh hi’n a gen a, hawldaw nachang hia ah ziagual hi ala bawlsek hile’u, tuchung hih a khatveina hilo ding ahia, ziak a chun kipak maleh kisuanla’na liantak nei hi’n a gen hi. SL Thangvela in a genna ah, ziagual thil hi a damsung a ding ah a khatvei tuakna ahia, u’pa Sailo in naute kum ziachan hi hawldawna chang ala hiatlo chu kisuanlana liantak nei hi’n a gen a, naute zawk in u’te hawldawna chang hia ah ziagual kalsuanna hi kipak-um leh ettawntak a sak thu a gen hi.

NT 5april2019b

Centre chuamchuam ah Routine immunization chiapi ding
CCpur, April 4 (Nisin Thuhiltu) : District Family Welfare Officer, CCpur panlakna ah thacheng leh nauvawp leh nausen-te kiang ah damdawi piak ah umsek (Routine immunization) chu lemchang zawding gelna in, veng chuamchuam ah centre guat ah um in, routine immunization bawl hisek tading hi’n a kigen hi. Zia dungzui a chun, centre mun 3 phu’daw ahia, ziate chu - ADCC Office, Tuibong; Zenhang Lamka Hausapu Inn chuleh, SSPP Complex, Bungmual ahi. ADDC Office, Tuibong ah thawleni leh ningani ah dak 10am-4pm routine immunization umsek ding ahia, zia hun a chu, Chingngaihkim, ANM; Niangngaihvung, ANM; Niangneikim, ANM leh Niangboi Khuptong-te duty ding ahiu. Zia centre hin Tuibong area, Kotsohoih, Bijang, Kamdou Veng, Sielmat leh Hmar Veng huap ding ahi. Zenhang Lamka Hausapu Inn ah ningani cheng ah dak 10 am-4pm kikal ah umsek ding ahia, duty dingte chu - Manngaihhau, ANM; Zahnun, ANM leh Thiangching, ANM-te ahiu a, zia centre hin Light House apat East Tedim Road dung ah Lailam Veng chan huap ding ahi. SSPP Complex, Bungmual ah thawleni cheng leh dak 10am-4pm kikal ah umding ahia, zia hun a chu, Manngaihhau, ANM; Zahnun, ANM leh Thiangching, ANM-te duty ding ahiu. Zia centre hin Bungmual, Dorcas Veng, Gouchinkhup Veng leh Bethel Veng huap ding ahi.

Mizo Upa Pawl in Raising Day lawm
CCpur, April 4 (Nisin Thuhiltu) : Mizo Upa Pawl (MUP), Manipur Headquarter in tunitak dak 1:00 in YMA Hall, Thingkangphai in a 13-veina Raising Day lawpna a nei ui. Zia hun a chun, V. Hangkhanlian, Minister Agriculture and Veterinary and Animal Husbandry, Government of Manipur in Chief Guest hi’na tawh a uap a, hun matna Upa Thangchhingpuia, Assistant Secretary in mapui in, ziakluttu in Upa C. khumtira, Finance Secretary a pang hi. Chuleh, Upa H. Vankunga, Adviser in hun hawnna pauchapna nei in, CSM retired, C. Chhunmanga, Secretary, Thingkangphai Unit in vaidawnna thu a gen a, Upa Lalthangpuia, President in member mualliamta-te sûnna hun a mang hi. Chun, R. Lalmawia, General Secretary in report chawmkim piakna a nei a, Chief Guest leh C. Sangkamlova, Executive Member apat thugenna um in, hun tawp ah Tualzalian, Executive Member in kipakthu genna a nei a, Upa TD Chhuma, Member, Nghahthal Unit in hunkhakna pauchapna a nei hi.

One Day Free Eye Testing for Drivers leh Medical Camp um ding
CCpur, April 4 (Nisin Thuhiltu) : National Highways & Infrastructure Development Corporation Limited (NHIDCL) in District Health Society (DHS), Churachandpur kithuapina in zing, April 5, 2019 ah One Day Free Eye Testing for Drivers leh Medical Camp nei ding ahiu. Zingkal dak 9:30-10:00am ah Bus Parking, New Bazar ah O. Sarvanjit Singh, Manager (P), NHIDCL, BO-Imphal in Eye Testing leh Medical Camp hawndawna nei ding ahia, zia mun a chun dak 10:00am-12:00pm kikal ah doctor te’n a thawn ah mit leh damlona chuamchuam en ding ahiu. Chun, dak 12:30-2:00 kikal in Tuibuang Oil Pump gei ah neikit hi’ntin, nitak dak 2:30-4:00pm ah Thingkangphai Auto Parking ah umkit ding ahi. Duty ding in Dr. Vumchinpau Tonsing, CMO/District Mission Director, Churachandpur, District Health Society apat Dr. Ginthianmung, MO (Ophthalmologist); Dr. Sania Monica, MO, CMO Pool; Chhungzaniang, GNM, DMMU; Rami, Optometrist; Nenem, Optometrist leh Rokung, Grade IV-te ahiu. Zia hun achun, doctor in a zik damdawi zosia a thawn ah hawp hiding ahi.

Evangelistic week pan
CCpur, April 4 (Nisin Thuhiltu) : VK Montessori School, Zenhang Lamka in April 4-5, 2019 sung ah Christian Life ti thupi a mang in evangelistic week a nei ding uh tuni’n a pan ta’u. Zia hun sung ahin amau school ah kai class 4 apat class 10-te a pang ua, Evangelist Upa Lianding Guite in Pathian thu genna nei ding ahi.

T. Kotlian ah mission school mun ding nawt
CCpur, April 4 (Nisin Thuhiltu) : T. Kotlian ah mission school mun ding tuni’n JCB mang in a khuatsak ua, school building sakna le pan paita ding uh hi’n a kigen hi. T. Kotlian khua ahileh Tuipi gal ah um ahia, Ngoiphai khua apat kizuan suk ahi. T. Kotlian apat naupangte chu Lamzang Khua in school a kai sek ua, tuipi gal ahi ziak in lampi haksa mama hi’n a kigen hi. Naupangte ngaikhawkna ziak ah Thangkhal Baptist Church (TBC) te’n mission school a phu’daw uh ahia, teacher ding in Lianthansang of T. Khajang a gawi ui.

Thadou Cultural Festival 2019 mang ding
CCpur, April 4 (Nisin Thuhiltu) : Thadou Innpi GHQ malatna in a hungtung ding April 7, 2019 ah Taloulong Khua, Damdei Christian Collge kiang a um, Kangpokpi district ah “My Culture My Identity” ti thupi mang in Thadou Cultural Festival 2019 mang ding ahiu. Zia hun a chun, Thadou Nam kua’n le nam ngainatna zal ah uap chiat ding leh, Thadou nampuan ah kithuam chiat di’n Mangcha Chongloi, Secretary, Information and Publicity, Thadou Innpi, GHQ in news mangcha in chialna a bawl hi.

Real Time Monitoring, Assessment tawh kisai genkhawm
CCpur, April 4 (Nisin Thuhiltu) : District AIDS Control Officer (DACO), Churachandpur ah tunitak dak 2: in Imphal apat team khat a hung ua, Real Time Monitoring (RTM) Assessment ding tawh kisai genkhawmna a nei ui. Imphal apat hungte ahiu leh - Probalda, Associate Director, GHi360; Gautam, Consultant, RTM Assessment; Kpezung@Nitho, Technical Specialist, FHi360; RK Nishi, Data Management Specialist, FHi360; Deepankant, Techincal Business Analysis, DURE leh Gilbert, State Data Support Coordinator, FHi360-te ahiu. District apat in Counselor ICTC, District Hospital, Churachandpur; Counselor ART Centre, District Hospital, Churachandpur; Nurse, OST District Hospital, Churachandpur; Nurse, PPTCT, District Hospital, Churachandpur leh Outreach Worker (ORW), OST SHALOM-tele a pang ui. Client assessment bawlna ding tawh kisai a ningkum May 2018 ah Nurse leh Counselor-te kiang a smart phone piak ahiu a, software mang ah update bawl ding ti tawh kisai ah phachuam taktak ahem ti counselor leh nurse-te tawh genkhawmna ding hun a ngaitua khawm ua, zia dungzui chun, April 15, 2019 apat ngaituakhawmna hun nei ding in a thupuk ui.

Kayakalp Functioning leh Swachhta Pakwada, 2019 kiti um ding
CCpur, April 4 (Nisin Thuhiltu) : Directorate of Health & Family Welfare, Government of Manipur lemtina gual in Dr. Vumchinpau Tonsing, CMO/District Mission Director, Churachandpur in Kayakalp Functioning leh Swachhta Pakwada, 2019 neina ding tawh kisai in hiatsakna a bawl hi. Zia dungzui a chun, a hungtung ding April 6, 2019 zingkallam dak 10:30 in OPD Waiting Area, First Floor, District Hospital ah Kayakalp Functioning leh Swachhta Pakwada, 2019 kiti um ding ahia, Deputy Commissioner, Churachandpur in a hawndawna leh thugenna nei ding ahi. Zia hun a chun, Medical Superintendent, District Hospital, Churachandpur nuai a sȇm - Doctor, Nurse leh CREED Worker, district sung a Health Institution chuamchuam apat Medical Officer palai leh Nurse palai ban ah CMO leh DFWO nuai a DPMU leh BPMU zosia pangkim chiat ding ah hiatsak ahiu a, CHC leh PHC zosia ah staff-te kiang ah hiatsakna peding in Medical Superintendent, District Hospital, Churachandpur kiang ah mawkpuakna piak ahi.

Hla Kutpui 2019 mang
CCpur, April 4 (Nisin Thuhiltu) : Group Young Mizo Association (Group-YMA), Manipur in tuni dak 10:30 in YMA Hall, YMA Complex, Hmuia Veng in Hla Kutpui 2019 a mang ui. Zia hun chu CV Duhawma, President, GYMA, Manipur in a mapui a, Group YMA, Manipur ah executive member - K. Laldawngliana, Lalsangliana leh Lalzawmliana te’n thugenna a nei ua, HVL Hruaia, Secretaty, Group YMA Manipur in lapawl kidemna leh lenkhawm kidemna a mapui hi. Chun, Ramdinthara, executive member, Group YMA Manipur in hunkhakna in pauchapa a nei hi. Hunmatna ah lasathiam, YMA Chiengkawn Branch apat Tracy Ngaihching leh Sangthiem chuleh, YMA Kawnpui Branch apat Moris Haulien leh Lalbiakmawia ban ah YMA Moreh Branch apat B. Malsawmtluangi te’n lasakna a nei ui. Nitak dak 7:00 in nitak lam hun sutzawp ahia, michuamchuam apat thugenna leh lasakna a um kit a, CV Duhawma, President, Group YMA Manipur in kipakman hawmdawna hun a mang hi. Zia hun ah lasate chu - YMA Kawnpui Branch apat Kawlni Zikpuii, YMA Imphal Branch apat Kelly Chhakchhuak, YMA Chiengkawn Branch apat Nunthari, YMA Lamka Branch apat Merlyn Kimlalmawii leh Jacob Lalengtluanga, YMA Nghathal Branch apat Lalramdinthari ban ah YMA Gangte Veng Branch apat Sangkhum-te ahiu.

(L) Tualkhanlian Khuptong’ luang kawidaw hita ding
CCpur, April 4 (Nisin Thuhiltu) : February 14, 2019 nitak ah Mata Khua ah tizat-um tak leh mualpho-um tak ah tha ah um, (L) Tualkhanlian Khuptong vuina ding tawh kisai in tuni’n JAC against Late K. Tualkhanlian (JAC AKT) in press conference a nei ua, mipite kiang ah hiatsakna leh chialna a bawl ui.
Convenor M. Luahkhanchin in a genna ah, Late Tualkhanlian Khuptong thina tawh kisai ah YPA GHQ in mawpuakna la in, February 15, 2019 zingkal dak 7:15 vel ah aluang phawtdaw in a um a, zia dungzui a chun dakkal 24 sung a tualthana tawh kisai ah kigawlkha zosia district administration in mandawk ding ah Shyam Lal Poonia, IAS, DC CCpur kiang ah memorandum piak in um maleh, bangma thu a umlo ziak in March 25, 2019 in JAC AKT phu’daw in a um a, JAC AKT in philantropic organization chuamchuam tawh pangkhawm in kal a suanto a, M. Biren Singh, Chief Minister of Manipur leh Central Government kiang tiang ah memorundum kipia maleh tuni tiang ah dawnhuna bangma umlo in, police leh security force lam inle kuama matdaw a neilo ziak un khawk a sak thu a gen a, philantropic organization leh JAC ATK pangkhawm te’n a hungtung ding April 6, 2019 ni leh Late Tualkhanlian Khuptong’ luang kawidaw ding vai a sawm ua, mipi palai ding ah teltin, hotute panlaklo dan lamdang a sak thu a gen hi. Late Tualkhanlian Khuptong luang chu morgue ah a umna tha 2 vel chiata ahi’na ah, district morgue ban ah panlatu leh uaptute chung in JAC AKT sik in kipakthu a gen hi. A luang vuina ding tawh kisai ah hall arrangement leh usher ding mawpuakna Mata YPA leh YVA ban ah khawsung vaihawmtute kiang ah mawpuakna piak ahiu a, thiluang puakna ding YPA, New Lamka Block-te hi’n tin, philantropic organization apat gari ambulance nei zosia’n mithiluang zui ding in chialna a bawl a, chun, organization cheng in mani flag chiat gari a lian leh neu ah takchiat ding leh flag neilo te’n le puan vawm tak chiat di’n chialna a bawl hi. District morgue apat thiluang puakdaw phatleh, Tipaimukh Road haw ah Police Station traffic point ah Tedim Road mansuk a, Mata khua ah a inn uh puaktung hiding ahia, a inn ua pat Mata Public Ground ah a sûnna program mat hiding ahi. Chun, mithi vuini April 6, 2019 ah dawr kaite’n zingkal dak 10am-1pm tiang dawr khak chiat a, a vuina hun uap chiat di’n JAC AKT min in chialna a bawl hi.

Khamthei Rs 32000 man hiding tawh mi 1 matdaw ah um

CCpur, April 4 (Nisin Thuhiltu) : Churachanpur Sector nuai ah Lakhimpur Battalion in tuni, 4th April 2019 in Singngat Sub- divison ah Hangdung muanmaw mi khat man ah a thilpuak a chech ua leh khamthei Rs 32000 (approx) man hizo ding a mandawk ui. Mat ah um chu Mr Chin Khan Lam (36) hi ah hiat a hia, Churachanpur police station ah a pawimaw dungzui ah legal action lak ding in a khamthei matdaw'u tawh Lakhimpur Battalion in a pedawk hi. Adjutant, 2 AR in a taklatna a chun, khangthak te khamthei thil ah a kibuallona ding ua Singngat Sub- divison, Hangdung area ah khamthei dodalna masawn zing a hidan a taklang hi.

5.2-magnitude ah hat linling in Manipur nawk
Imphal, April 4 (Nisin Thuhiltu) : India Meteorological Department in tuni, 4th April 2019 nitaklam dak 1:15 ah 5.2-magnitude ah hat linling (earthquake) in Manipur nawk a hidan taklang in, epicentre ahileh Senapati district hi'n a taklang hi. A langkhatlam ah zia linling ziak a chun, thina tuak leh thilsia hiat ding a um puai.

Constable SM Manjur luang kawidaw hita
Thoubal, April 4 (Nisin Thuhiltu) : Judicial custody ah um Th. Nando zamdawna chung mat ah um leh Police custody ah thina tuak, Manipur Police Constable, SM Manjur Ahmed luang tuni'n kawidaw in a um hi. A chenna khua, Yairipok Ningthoumanai, Thoubal district ah Police constable Md. Manjur Ahmed, 35, son of M.V. Basir Ahmed luangkawidawna tuni'n zingkal ah nei in a um a, Manipur Chief Minister in a thina tawh kisai CBI in khualna neizui ding ah JAC lawiupa te thutiam a bawl nung ah a luang kawidaw ah um hi'n a kigen hi.

UTLA (SK Thadou) in State Govt. chung ah a lung-awilo thu taklang
Jiribam, April 4 (Nisin Thuhiltu) : United Tribal Liberation Front (UTLA) SK Thadou group in state government in a thutiam te supitinlo ti'n a lung-awilo thu a taklang hi. S. K. Thadou, chairman, UTLA (S. K. Thadou) in press statement ah a taklatna a chun, Government of Manipur in amau organization limsak nuamlo ah mu a hidan taklang kawm in, Government of India palai te uapna tawh Memorandum of Understanding suai kai hun ah thutiam umte sukpitin hilo in a gen a, cadre zosia te one time rehabilitation ah Rs. 25 lakhs chiat piak ding, model village siam ding, cadre te govt. Job piak ding ah thutiam state government in a bawl himaleh tuni tiang ah taksua bangma umlo in a gen hi. Cadre 21 te bank A/c numbers piaklut ah um himaleh tunitiang ah “one-time rehabilitation package” bangma piak hinailo un le a taklang a, Lok Sabha election masang ngei ah Government of Manipur leh Government of India in a thutiam “one-time rehabilitation package” a sukthian ding in le phutna a bawl hi.

PM Modi in Imphal aphak ding CorCom in boycotts; dakkal 17 sung total shut down
Imphal, April 4 (Nisin Thuhiltu) : Leibaak Ngaakpa Luwang (Media Co- Ordinator CorCom) in thusua a bawlna a chun, April 7, 2019 ah Prime Minister Narendra Modi in Imphal a phak ding boycott bawl a hidan uh taklang in, April 7 ah zingkallam dak 1:00 apat nitaklam dak 6 tiang ah dakkal 17 sung total shut down bawl ding uh ti'n a taklang hi. October 15, 1949 ah Manipur (Kangleipak) lenggam thagum hatna mang ah lakpiak ah um, kum 70 sunglam India’s rules nuai ah mipi ten haksatak ah hinkhua mang in le a gen a, culture, traditions, identity te le dengdel tak ah India government in kawi in a gen hi. AFSPA kawikhum ah aumdan, Patsoi- Langjing , Heirangoithong, RMC, Tonsen Lamkhai ..,etc. ah kitualthana case sukvenlo ah um zing, Citizen Amendment Bill- 2016 passed ding ah Central government in panlakna nei ti te taklang in, CorCom in "one nation one religion" India hisak ding ah panlakna pawmlo ti'n le a taklang hi.
Total Shutdown hunsung ah media, water supply, Electricity, fire service, hospital service leh emergency services dang te thakawl hiding in le Leibaak Ngaakpa Luwang (Media Co- Ordinator CorCom) thusua in a taklang hi.

Rahul Gandhi in Wayanad, Kerala ah nomination filed

Kalpetta (Ker), Apr 4 (Nisin Thuhiltu) : Congress president Rahul Gandhi in tuni'n Lok Sabha election umna ding ah Kerala ah Wayanad Parliamentary constituency ah contest bawl ding in nomination a filed hi. Congress president Rahul Gandhi in tuchung 17th Lok Sabha election ah seat 2 ah contest bawl ding, tu ah a seat luana Amethi ah le contest zawm ding a hi. Congress president Rahul Gandhi in Wayanad ah nomination a filed tawh kitawn ah Wayanad ah Left Front - CPI's P P Suneer leh BJP-backed NDA candidate Thushar Vellappally te kal ah mipi vote kichuna nasatak um ding in a kilang hi. Rahul Gandhi nomination filed hun in senior Congress leaders K C Venugopal leh Mukul Wasnik, Priyanka Gandhi ten le zui in, Congress party-led UDF supporter tamtak te uapna tawh district collector A R Ajayakumar kiang ah Wayanad district headquarters, Kalpetta in nomination papers a pelut ui.

Sun-ann nekzaw ah student 43 in damlona tuak

Erode, Apr 4 (Nisin Thuhiltu) :Tamil Nadu, Sanarpalayam government elementary school ah tuni'n student 43 ten sun ann nekzaw ah damlona tuak in hospital ah etkawl in a um ui. A kigendan ah zia thiltung chu food poisoning hiding ah muanmaw in a gen a, himaleh student te dinmun lauthawn umlo in a kigen hi. Zia student damlona tuak te chu class I -class III student a hiu a, sun ann ah anchang, aktui a nekzaw ua class room sung a lut nung ua damlona tuak ahiu a, classrooms sung ah a luak (vomit) ziak ua, hospital tut ah um hiu a hi. Aktui lui mama ta leh anchang quality hawilo nek ziak ah damlona piang hiding ah doctor ten gen un, Police thusuak in a taklang hi. A langkhatlam ah Police ten case ziklut in khualna a nei ui.

Arunachal sum tamtak matdawna case etzui hizing: EC
New Delhi, Apr 4 (Nisin Thuhiltu) : Arunanchal Pradesh ah Rs 1.80 crore cash matdaw ah a umna tawh kisai khualna chiatha zing hi'n Election Commission (EC) in tuni'n a taklang hi. Deputy Election Commissioner Chandra Bhushan Kumar in a genna a chun, thil umdan khualna nei zing himaleh tu leh tu kichiantak mudaw bangma um nailo in a gen a, Chief Electoral Officer (CEO) in EC kiang ah sum matdaw ah a umna chung ah detailed report a la pelut in le a gen hi. Rs 1.80 crore cash ahileh Arunachal's East Siang district ah Nilaini a khan inn khat ah mudaw a hia, government gari sung ah Rs 1 crore mudaw ah um, Rs 80 lakh ahileh Christopher Perme, son of Mebo BJP candidate Dangi Perme private gari sung ah mudaw ah um ti a hi.

Mizoram ah NGO ten Lok Sabha election boycott ding chawlsan:EC
New Delhi/Aizawl, April 4(Nisin Thuhiltu) : Mizoram ah NGO Coordination Committee in Lok Sabha election boycott ding leh April 8 apat total bandh chiapi pan ding ah thupuan a neina chung ua, April 11 ah Lok Sabha election chiapi leh chiapilo ding ah Election Commission (EC) in lungzing tak ah panlakna a nei nung in, Election Commission (EC) in NGO Coordination Committee in Lok Sabha polls boycott ding ah a puan haisanta a hidan taklang in guanggalna dungzui ah April 11 ah Mizoram parliamentary seat 1 umsun - north-eastern state seat ah vote khiak hiding in a taklang hi.Deputy Election Commissioner Sudeep Jain in thuthak lakhawm mite kiang ah a genna a chun, guanggalna gual ah vote khiak hiding leh state Assembly polls ah Bru refugees te vote khiaksak ah a um gual ua Mizoram-Tripura border Kanhmun village ah Bru refugees te vote khiaksak hiding un a gen hi.

Meghalaya ah senior NPP leader in Congress zawm

Shillong, April 4 (Nisin Thuhiltu) : Meghalaya ah ruling National People's Party (NPP) senior leader leh former minister E C B Bamon in NPP nusia in Congress a zawm hi. Congress a zawp tawh kitawn in state Meghalaya Congress president C Lyngdoh in Congress Bhavan ah tuni'n Congress in a laklutna a nei hi.
National People's Party (NPP) senior leader leh former minister E C B Bamon ahileh former Lok Sabha Speaker P A Sangma lawi hawi mama leh a kithuapi zing mi khat hin a kigen a, P A Sangma in NPP a phudaw hun ah le a la zuito pek hin a kigen hi.

Calcutta High Court ah Chief Justice thak in kitiamna nei

Kolkata, Apr 4 (Nisin Thuhiltu) : Calcutta High Court ah Chief Justice thak ding ah guat ah um Justice T B N Radhakrishnan in tuni'n kitiamna a nei hi. High court ah West Bengal Governor K N Tripathi kitiamsakna nei in, Chief Justice thak kitiamna hun chu high court judge leh Bar senior members ten le a uap ui. Justice T B N Radhakrishnan ahileh Telangana leh Andhra Pradesh ding ah High Court, Hyderabad High Court ah July 7, 2018 apat Chief Justice mawpuakna a la tuk a hia, High Court of Kerala ah October 14, 2004 ah permanent Judge ding ah kitiamna a la nei a hi. Kerala High Court ah kum 1988 ah a lut masang in11th December, 1983 ah enrolled bawl in, Thiruvananthapuram ah practised a la bawl pan a, civil, constitutional leh administrative law tawh kisai ah panlakna a la nei hita a hi.

Mizoram ah polling station 1 bep 'critical' ah kipuang
Aizawl, Apr 4 (Nisin Thuhiltu) : Election Commission in Mizoram ah polling station 1 bep 'critical' ah puang a hidan, state election department official thusua in a taklang hi. Zia ah 'critical' ah kipuang polling station chu southern Mizoram's Lawngtlai district ah um Gegaguluksura polling stations a hi. Hiatthei khat chu Mizoram in polling stations 1,175 a nei a, polling stations 15 ahileh Mizoram-Tripura border Kanhmun village ah Tripura relief camps ah Bru voters te ding ah siam a hi. Mizoram in Mizoram Lok Sabha constituency 1 umsun leh Aizawl West-I assembly seat by-poll ah April 11, 2019 ah vote khia ding a hi.