Nisin Thuhiltu - 02 April 2019

Accessibility Observer - J.C. Ramthanga, IAS in polling stations ah panlakna entha

CCpur, April 1 (Nisin Thuhiltu) : General Election to Lok Sabha, 2019 ding ah kisingsakna nasatak a chiathak zing tawh kitawn in District Election Officer (DEO) Churachandpur in tuni'n DC’s Office ah Accessibility Observer - J.C. Ramthanga, IAS Principal Secretary, Government of Manipur uapna tawh District Level Accessibility Monitoring Committee leh Assembly Level Accessibility Monitoring Committee member te special meeting a neipi hi. Zia hun a chun, Churachandpur leh Pherzawl district ah polling stations accessibility chungchang ah panlakna um te review bawlna a nei ui. Chief Electoral Officer, Manipur appoint a bawl Accessibility Observer - J.C. Ramthanga, IAS Principal Secretary, Government of Manipur in le polling stations accessibility chungchang ah district administration in Assured Minimum Facilities tawh kisai ah a panlakna te etzuina nei in, 58-Churachandpur leh 59-Saikot (ST) Assembly Constituencies huapsung ah polling stations chuamchuam te etthakna a nei hi. Chun, Persons with Disability te ding ah59-Saikot (ST) Assembly Constituencies huapsung ah polling stations khat chu Persons with Disability ten a etzui ding ua teldaw in a um a, zia ding a chun,DC’s Office ah polling station enzui ding tute training piak in a um ui. Chuleh District sung ah Persons with Disability te vote khiakna ding ah - Wheelchairs, Standardized Ramps, Drinking Water, Waiting Sheds, Accessible Toilets, Dummy Braille Ballot Paper, Dedicated Parking, Vehicle (Pick and Drop for PwD), Special Volunteers, Proper Signage leh Help Desk te arrange bawl piak in a um ui.

CCpur mi, BSF ah sem khat in J&K ah thina tuak

CCpur, April 1 (Nisin Thuhiltu) : Inspector Alex Tungnung Lalminlun (No. 113100574), 168 Battalion, Border Security Force (BSF), chu Poonch sector, Line of Control (LoC),Jammu and Kashmir ah Pakistan in Small/ Medium weapons) mang ah shelling a bawlna liamna tuak in Army Command Hospital, Udhampur tut himaleh damzo lo in a mualliam hi. Inspector Alex Tungnung Lalminlun ahileh Tuaitengphai, Churachandpur ah Mr. T. Khupkholam chapa a hi.

Dist. Congress Committee in party zawm thak te kipakpina nei

CCpur, April 1 (Nisin Thuhiltu) : Ccpur District Congress Committee (DCC) in tunitak dak 1 in DCC Office, Dr. Chinkholal Thangsing In, Rengkai Road ah Ccpur District apat India National Congress (INC) ah lut thak Ex-Minister leh ADCC, CCpur member-te kipakpina a nei hi. Zia hun chu, Richard Lalsawrlien, General Secretary, DCC in a mapui a, Henkhopao Haokip, President, Block Congress Committee, Singngat in vaidawnna thu a gen hi. Chun, Lalnget Hmar, President in member lutthakte kipakpina thu a gen ban in, Mangcha Thangzom, Member, Pradesh Congress Committee (PCC) leh Dr. Chinkholal Thangsing, MPCC ten le thugenna a nei ui. INC ah laklut a um, K. Vungzalian, Ex-minister; Langkhanpau Guite, MDC; M. Gouzamang Guite, MDC; T. Khaikhomang, MDC; G. Suanchinpau, MDC; Pumtulthang, MDC; CT Lian Guite, MDC; Hausuanthang, MDC leh Zamneiching MDC ten le thugenna a nei ua, T. Chongbiak, President, DCC, CCpur in kipakthu genna nei in, member thakte dial awsakna le a nei ui. Chuleh, Lalnghet Hmar in laklut ah umte min simdawna nei in vaidawn thu a gen a, politics ah a phazaw ding khualna ziak ah munkhat ah umdet hitheilo ahidan gen in, laklut thakte ziak ah Pathian kiang ah kipakthu a gen hi. Mangcha Thangjom in a genna ah, DCC member junior taktat-te panlakna ah district a congress kivaipua ahizing lai ah, member muan-um taktak laklut ah umte ziak a thamuang mama hin a gen a, nidang gual ah kitaisan tihaw umlo ah pangkhawm thiam pawimaw mama ding hin a gen a, chuleh, member zosia chung ah district congress in kinepna liantak nei hin a gen hi.

Congress candidate ding ah campaign ding
CCpur, April 1 (Nisin Thuhiltu) : District Congress Committee (DCC) Ccpur in zing zingkallam dak 11 ah YPA GHQ Hall, Hiangtam Lamka ah Second Outer Manipur ST Parliamentary Constituency a INC candidate, K. James a ding ah campaign umding ahia, zia hun a chun Dr. Chinkholal Thangsing, PCC member in mapui in, Rev Lalneilien Khawbung, PS in hun hawnna leh, Lalnghet Hmar, President, CCpur, DCC in vaidawnna thu gen ding ahi. Chun, O. Ibobi Singh, CLP Leader, Manipur; Gaikhanngam, President, MPCC leh TN Haokip, Former President, MPCC te’n le thugenna ban ah T. Manga Vaiphei, Ex-Minister in kipakthu genna nei ding ahia, zia hun chu uap chiat din District Congress Committee, Ccpur in news mangchan chialna a bawl hi.

NT 02April2019b

Pension-te thakdawna nei
CCpur, April 1 (Nisin Thuhiltu) : PHE Division, CCpur nuai a Staff Welfare Committee (SWC) ten tuni dak 12:00 ah, a office uh Headquarter Veng in pension-te thakdawna hun a mang ui. Zia hun chu, S. Vanlalruata, Chairman, SWC in a mapui a, Hatneihling Shoute, EE, Adviser leh pension-ten thugenna a nei ua, Nghaka in pension-te pauchappiakna a nei hi. Hatneihling Shoute in a genna ah, mi tamtak in pension masang in thina a tuak ua, damtak ah pension theite hampha uh ahidan a gen hi. Thakdaw ah umte ahiuleh, S. Vungkhanthang, LDC leh SL Singa, Technical Jugali ahiu.

STC Diamond Jubilee video hawng ding
CCpur, April 1 (Nisin Thuhiltu) : Simte Tribe Council (STC) GHQ in Simte In, Simveng ah a chiata March 8-9, 2019 ah STC kiphudaw nung kum 60 tin lawpna (Diamond Jubilee) hun sung ah video coverage a bawl uh, hun sawtlo ah hawndaw thei hita din a gen ui. Zia hawndawna hun chu uap chiat din a saituten news mangcha in chialna a bawl ui.

Ni 2 sung ah Pearsonmun khua nusia ding ah hiatsak
CCpur, April 1 (Nisin Thuhiltu) : T. Thanchhung, Chief of Pearsonmun in Director/Proprietor, Gilead Balm Care Centre kiang ah ni 2 sung ah khawsung nusia ding in hiatsakna a bawl hi. Gilead Balm Care Centre ah septic tank apat ektui thadawk taloding ah Village Authority(VA), Pearsonmun leh Young Paite Association (YPA), Pearsonmun Unit tawh kinawptuana a bawl uh, a bawsiat zing ziak ah a namsia thuak mipiten thuakzo talo hin a kigen a, chuleh Pearsonmun khua ah a pemlut ding ah Hausapu kiang ah Hausa thu kallo ding ah kitiamna a bawlsa, a bawsiat ziak ah VA, YPA ban ah khawsung mipin emergency thupukna alak gual ua, March 31, 2019 apat ni 2 sung ah Pearsonmun taisan ding ah hiatsak hin a kitaklang a, zia nung achu a pawtlo ah a chung ah thil dawi-umlo a tun leh, aman maw a kipuak ding hin le a kigen hi. Zia lekha achun, Chief/Chairman, Secretary, Village Authority ban ah Young Paite Association, Pearsonmun Unit ah President leh Secretary ten suai a kai ui.

Lanva Lui guamsung ah tui luanna suthiang
CCpur, April 1 (Nisin Thuhiltu) : Village Authority, Hebron Veng, New Lamka mapuina ah tunin Lanva Lui guamsung ah tui luanna a bawlhawi ui. Gua zuk hun phatleh luiguam sung ah nin tamtak ziak ah Lanva Lui tui a let sek a, a kiang ah chengte a ding ah haksatna tung sek, zia venna ding a chu Hebron Veng, Village Authority in Job Card mangcha ah nasepna a nei uh hin a kigen hi. JCB leh mi 200 val nasepna in a pang ua, zing ale sem zawm ding ahiu. Lanva Lui hi khâl lai leh tui luang ding kham umlo phial maleh, chûk lai ah tui tam ziak in a kiangnai ah chengte a din lauthawn um leh, mihing hinna tiang lathei sek hin a kigen hi.

Big Brothers Addicare Overcomes Centre in 1st anniversary mang

CCpur, April 1 (Nisin Thuhiltu) : Bijang ah khamthei bawlte khualna ah kiphutdawk, Big Brothers Addicare Overcomes Addiction Treatment and Recovery Centre kiti a kumkhat tin lawpna (first anniversary ) tuzingkal dak 11:00 in a mang ui. Zia hun achun, S. Ginmuan Ngaihte, MCS, AC To DC in Chief Guest hina tawh a uap a, Colonel Mithun Shetty, Commanding Officer, 25 Assam Riffle leh a zi, Sonali Shetty ten Guest of Honour hina tawh a uap ua chuleh nu-le-pa tamtak inle a uap ui. Rev. Dr. Ruth Nengpi Singson in hun hawnna nei in, Helun Guite in vaidawnna thu a gen a, Khuallian-te apat leh Daniel Singson, Director in Big Brothers Addicare Overcomes Addiction Treatment and Recovery Centre tawh kisai thugenna a nei hi. Chuleh, Rev Kamzamung in tîlkhona thu gen in Pathian kiang ah pauchappiakna a nei hi. Zia centre hi 2018 kum ah phudaw ahia, tulaitak in staff 3 leh leader 4 in a enkawl ua, client 26 a um ui. Guest of Honor, Colonel Mithun in a gendan in, Churachandpur hi mun nuamtak himaleh a sung ah siatna le umzeltho hin a gen a, Assam Rifle in venbitna tawh kisai a mawpuakna la pen maleh North-East a etkawlna ua khamthei dodalna tawh kisai ah pan ha lak mama in, kum masa sung bep ale gam acre 160 sung a poppy kichingte suksiat piak ahiban ah, tukum ale acre 145 sung ah suksiat hin a gen hi. Chuleh a zi, Sonali Shetty in a gena ah, mizosian zawngsak a kinei a, khenkhat in facebook/internet, khenkhat kithuneisak zawngsak tihaw leh a dangdang a um a, ziate chu mani kihiatdaw ah, haisan ding lunggil ah lampi ngaitua leh panpitu ding hawlten a zawngsak nau haisan thei uh hin a gen hi. Director, Daniel Singson, in a genna ah Overcomer enkawltute ziak hilo in, Pathian mapuina ziak in kumkhat melmu thei hin a gen a, maban ah Pathian zal ah Mission Compound a gam acre 10 sang a lianzaw ah kibulphu hidin a gen a, zia mun achu building leh kihelna mun kining tak ah bawl ding hin a gen hi. Chuleh, Rehabilitation Centre ah ala umngai ahina ah, ganhing gual ah enkawl ah sumdawnna ding ah khamthei bawlte matchak ah um, umpuaknatna liantak tawh Overcomer a hung patdaw hin a gen hi.

Tuitha Lui ah kidaw, Suspension Bridge siamhawi thak

CCpur, April 1 (Nisin Thuhiltu) : Lamka Police Station, Zero Point apat kilometer thum-leh-kim a gamla, Saikot khawsung Zion Veng ah Tuitha Lui ah kidaw, Suspension Bridge bawlna ding ah khawsung mipiten social work a pan ui. Zia lei chu, 1945 kum ah Japan gal lai ah kibawl ahia, a tuangpek zosia a siat ban ah a thîkte ap zota hin a kigen hi. Bialtu MDC, Lalhrillien, EM, ADC Churachandpur in thingpek (2 inch) bangzat hem a tuak ban ah Paokholal, Social Worker inle Rs. 50,000 a tuak a, zing leh nasem ah kuan zosia a ding ah bialtu MDC in annkuang lui ding hin a kigen hi. Suspension Bridge ahileh New Lamka leh Saikot kikawmtuana pawimaw tak a hi dungzui in, government a thuneituten ngaiven ah, RCC Bridge tiang ah bawldaw hileh tichu tamtak dawidan ahi.

JDU candidate T. Hangkhanpau in holimkhawmpina nei

CCpur, April 1 (Nisin Thuhiltu) : Lok Sabaha election ah Outer Manipur (ST) Parliamentary Constituency ah Janata Dal United (JDU) candidate, Hangkhanpau Taithul, Ex-President, UZO & Ex - Minister leh President JDU Manipur in tuni nitaklam dak 1 in Press Club, Headquarter Veng, CCpur ah 60-Singngat Assembly Constituency sung a Singgat Area, Muallum Area, Suangdoh Area, Behiang Area leh Tuaitengphai Area khua hausate kimupi in, holimna a neipi hi. Hangkhanpau in a genna ah, tuchung a 17-veina Lok Sabha election ah JDU National in Manipur ale party MP candidate kawiding ti a thupuk dungzui in, Outer Manipur a candidate ding ah JDU National in March 5, 2019 a ama a guat dungzui ua nasep pan ngal ahidan leh, phaizang ah assembly constituency 7 ah party worker-te tawh hun tamzaw a mat ban ah tuni tiang ah 380 vei camera meeting nei ahidan a gen hi. Manipur ah Inner leh Outer a ding ah mi chuamchuam apat a sui dan ua, tuchung MP election ah JDU in khatna la ding leh, Congress in panina ban ah BJP in thumna ahi atia, JDU in tup leh ngimte hawi mama chuleh a diak ah Manipur ah BJP in Citizenship Amendment Bill (CAB) a puakdaw guat tawh kisai ah kiphinna nei, Meitei Pangal ten JDU dawi uh hin a gen hi. Chun, India constitution nuai ah Schedule tribe, Schedule caste-te kum 10 dan ah etchian a, a inchen-khawsak uh a hawideu tak leh reservation sukbei ding ti thu BJP lunglut mama ahiban ah BJP gual ah JDU in sakhua vai ah khenchuam neilo ahi tin a gen hi. India gam kivaihawmna democracy nuai ah party hawi ziak ah gamsung leh mipi siamhawi thei ahi dungzui ah, JDU party kivaipuakdan kuan le zuipi din dawtna a bawl a, JDU in lawtinna a chan a, Manipur ah Inner leh Outer ah JDU teltin ahileh, Member of Parliament 70 ah pangpha ding hin a gen hi. Chun, Manipur ah state mipin a dawilo mama, India army in mi kaplum theina power a nei uh Armed Forces (Special Powers) Acts (AFSPA) hi JDU in ladawk ding hin le a gen hi. JDU ten in a hung tung ding April 5, 2019 ah YPA GHQ Hall, Hiangtam Lamka ah public meeting nei ding ahiu a, zia hun a chu Mohamen Affa Amed Khan, General Secretary, Incharge, North East in Chief Guest hina tawh uap ding ahia, Mayeshwari Hazari, Minister of Urban Development, Government of Manipur; Sanjay Kumar, President, JDU National ten le uap ding ahiu. Zingkal dak 9 leh dak 10 a flag hoisting um ding ahia, kuale pang chiat ah, JDU tup leh ngimte vangaitha chiat din news mangcha in chialna a bawl hi.

NT 02April2019c

Governor in JNMDA, 65th Foundation Day hawng
Imphal, April 1 (Nisin Thuhiltu) : Jawaharlal Nehru Manipur Dance Academy (JNMDA), 65th Foundation Day hawnna Governor leh Chairperson of JNMDA Dr. Najma Heptulla in tuni'n Auditorium, Imphal in a nei hi. 65th Foundation Day lawpna chu ni 3 sung um ding a hi. Governor Dr Najma Heptulla in a thugenna a chun, JNMDA chu North Eastern region ah Dance Institute masapen a hidan gen in, a bullim ah Manipur Dance College ti ah kihawng himaleh Pandit Jawaharlal Nehru hun ah Prime Minister’s Fund mang ah panlakna nasatak a umna chung ah ama hiatzingna ding ah ama min putsak ah Jawaharlal Nehru Manipur Dance Academy (JNMDA) ti a kisang kit hi'n a gen hi. JNMDA apat artistes tamtak piangdawk a hidan gen in gamsung a ding ah kineisak umtak institute a hidan a gen hi. Zia ah hun matna chu Prof. H. Tombi in le uap a, hunmat sung in Governor leh Chairperson of JNMDA Dr. Najma Heptulla in Academy students (2018-19 ) Oinam Madanamohan Singh, Leichombam Sapana Devi, Maisnam Pari Meetei, Naorem Chanu Leisembi leh Laikhuram Monika Devi te kiang in Gold medals & certificates piakdawna a nei a, Haobam Ibochouba leh A. Chiteshwar Sharma ten a zik uh lekhabu thak hawnna le a nei hi.

TCA Day mang ding
CCpur, April 1 (Nisin Thuhiltu) : Thangkhal sung ah kochuam ten kochuam kiphudaw ni amau biak-inn chiat ah mang ding a hiu. Thangkhal kochuam ahileh kum 1981 April 4 ah M. Tanglian khua ah Upa Gindal Guite chenna inn ah Thangkhal Christian Association (TCA) ti ah a la kiphutdawk himaleh hun chawmkhatzaw ah Thangkhal Bible Church ti ah kisang in, tu ah Thangkhal Baptist Church ti a hi.

Prime Minister Narendra Modi in April 7 ah Imphal pha ding

Imphal, April 1 (Nisin Thuhiltu) : Prime Minister Narendra Modi in April 7 leh Lok Sabha election ding tawh kisai ah Imphal ah election campaign bawlna nei ding a hi. Bharatiya Janata Party (BJP) ahileh Manipur Parliamentary seats 2 - Outer leh Inner ah contest ding ah kisingsakna nei a hia, outer Manipur Parliamentary Constituency ah candidate ding ahileh Benjamin Mate, Inner Parliamentary constituency ah BJP candidate Dr. RK Ranjan a hi. Total ah voters 1959429 ten Manipur Parliamentary seats 2 ah MP teldawna ding ah April 11 ah vote khiakna nei ding a hiu a, seat a ding ah a kigawm ah total candidate 19 um in, Inner Parliamentary constituency ah candidate 11 leh Outer Constituency ah candidate 8 a um hi. Authorities have already beefed up security in and around the state capital.Prime Minister Narendra Modi in April 7 ah Imphal a phakna ding tawh kisai a chu security sukkhau ah umta ti'n le a kigen hi.

Alangkhatlam ah Manipur Pradesh Congress Committee (MPCC) President Gaikhangam in Congress Party Chief Rahul Gandhi in Manipur phak kitna ding ah guanggalna neilo a hida gen in, Congress in seat 2 ah gualzawna chang ding a hina chung ah public meeting pawimawlo in a gen hi. Congress Party Chief Rahul Gandhi in tha masa a khan Imphal ah public rally a la nei a hi.

March 2019 ah GST Revenue collection Rs 1 Lakh Crore val

Delhi, April 1 (Nisin Thuhiltu) : March 2019 ah Total Gross GST revenue Rs. 1,06,577 crore mudaw in a um a, zia lak a chu CGST Rs. 20,353 crore, SGST Rs.27,520 crore, IGST Rs.50,418 crore (including Rs. 23,521crore collected on imports) leh Cess Rs. 8,286 crore (including Rs. 891crore collected on imports) a tung hi. February - 31st March 2019 ah GSTR 3B Returns filed total 75.95lakh a tung hi. Government IGST apat Rs.17,261crore to CGST leh Rs. 13,689crore to SGST chu regular settlement in a kawi hi. March 2019 ah Total Gross GST revenue Rs. 1,06,577 crore mudaw ah um chu GST chiapi apat GST revenue collection a sanna pen hinalai ah record a hia, March, 2018 ah GST revenue mudaw ah umzat ahileh Rs. 92,167crore a hi. Zia chu tawh kitawn ah March 2018 sang ah March 2019 ah GST revenue growth sang mama in a kilang a, 15.6% in a kikhia zo hi. Chun, FY 2018-19 ah GST revenue monthly average Rs. 98,114 crore a tung a, FY 2017-18 sang in 9.2% a sangzawi.