Nisin Thuhiltu - 28 March 2019

District Hospital, CCpur ah RKS Governing Body in Meeting nei;
Tha thum sung ah OPD ticket 25,948 piakdaw ah um, damlo 2,769 admit

CCpur, March 27(Nisn Thuhiltu) : Rogi Kalyan Samiti (RKS), District Hospital, Churachandpur in tuni, March 27, 2019 zingkallam dak 11:00 in Conference Hall, District Hospital ah a 7 vei tinna ding in Governing Body Meeting a nei hi. Zia hun a chun, Shyam Lal Poonia, IAS, Chairman, RKS leh Deputy Commissioner, Churachandpur in meeting mapui in, District Hospital, Churachandpur in kum khat sung ah a sepdaw te leh panlakna chuamchuam a neite leh maban panlak dan ding genkhawm a nei ui. Meeting hun ah Dr. VC Pau Tonsing, Secretary, RKS leh Chief Medical Officer, Churachandpur, Dr. Lalzuitluangi, Medical Superintendent, Dr. T. Nengkhanmang, Assistant Secretary, RKS leh Deputy Medical Superintendent, Dr. Thangchinkhup Guite, Consultant, District Hospital, Churachandpur leh hospital staff banah NGO representative ah Pauzagin Tonsing, Vanlallian Tonsing leh District police apat palaite a pang ui.

District Hospital, Churachandpur ah December 2018 apat February 2019 tha thum sung ah OPD ticket 25,948 piakdaw ah um, damlo 2,769 admit, admit ah um te lak ah naunei ding mi 611 umte lak ah mi 584 in naunei, amau lak a chu mi 508 in normal ah naunei, 76 in operation ah nei ti a hi. Nausen piang 11 in thina tuak, damlona ziak ah mi 36 in thina tuak, amau lak a chu nausen 4 pang ah taklat in a um hi. December 2018 apat February 2019 tha thum sung ma ah nausen pawsal 314 leh numei 261 a kigawm ah 575 piang in, Operation Theatre ah a kigawm ah 2,701 ki-aat te lak in 321 major operation leh 2,390 minor ahiu a, Radiology Investigation 1,724 bawl ah um te lak ah Ultrasound ah mi 1,600 leh x-ray ah mi 154 a pha'i. Pathology Investiation zat ahileh 1,093, Biochemistry leh Microbiology Report 15,218 piakdaw ah um, zia tha thum sung a chu hospital ward chuamchuam 954.2 percent lua ah um ti le a hi.

Police Station ah license meithal 818 piaklut hita

CCpur, March 27 (Nisn Thuhiltu) : Lok Sabha election umna ding tawh kisai ah District Magistrate thupiak dungzui ah Senior Superintendent of Police, Churachandpur in Churachandpur District huapsung ah license meithal neiten Police station kinaipi penpen ah piaklut ding ah hiatsakna thusua a bawl tawh kitawn in, tuni tiang ah Churachandpur Police Station ah meithal 818 piaklut in a um hi. Churachandpur District ah licence meithal chi chuamchuam 3,066 piakdaw ah um lak ah active arms licence 1,942 um in, mi 1,124 ten meithal a chawk leh chawklo uh hiatchian hilo in a kigen hi. Churachandpur District ah Active Arms Licence 1,942 um lak ah, Henglep Sub-Division ah 144, Parbung Sub-Division ah 19, Sangaikot Sub-Division ah 5, Singngat Sub-Division ah 135, Thanlon Sub-Division ah 82 leh Churachandpur Sub-Division ah 21 hi'n a kigen hi.

NT 28march2019b

NPP Chief leh M'laya CM Conrad K Sangma in election campaign bawl ding
CCpur, March 27 (Nisn Thuhiltu) : A hung tung ding, Lok Shaba election ah No. 2 Outer Manipur (ST) Parliamentary Constituency ah National Peoples Party (NPP) candidate Thangminlian Kipgen a ding ah March 29, 2019 sun dak 12:00 leh YPA GHQ Hall, Hiangtam Lamka ah National Peoples Party (NPP) Chief leh Meghalaya Chief Minister Conrad K Sangma in campaign bawl ding a hi. Zia hun chu District sung ah mipi a tam theipen in uap ding in, NPP CCpur District in chialna a bawl hi.

Mizoram leh Tripura ve'na nei MZP, Manipur lawiupa te vaitutna nei

CCpur, March 27 (Nisn Thuhiltu) : Zo-Hnahthlak-te lak ah kigawpkhawmna hawitak a um theina ding ah Mizoram leh Tripura ah kalsuan Mizo People Convention MPC Headquarter Manipur apat lawiupa pali te Churachandpur khawpi a tunkit tak uh tawh kitawn in tuni March 26, 2019 zingkal in MPC HQ Manipur office, Hmuia Veng ah MPC cabinet leh member te kimupi in report piakna a nei ui.

Zia hun a chun, Vanlalrinliana, President, MPC HQ Manipur in report piakna a nei a, ama mapuina tawh L.Z Fanai, Secretary Home, Lalzuithanga, Secretary Information & Publicity leh Paul Lalchhanhima, Secretary External ten March 18 apat March 24, 2019 sung ah Mizoram leh Tripura ah Zo-hnahthlak-te ve' a neidan uh a gen hi. A khualzin hun ua, Mizoram government in Tourist Spot ah tunsak ah Zampui Tangdung ve'na ding Mizoram government in gari Bolero leh Driver pia a hidan uh gen in, ziagualma a chu Tripura government in le kithuapina kituptak ah pia'n a gen hi. A khualzin sung ua, Mizoram Chief Minister, Cabinet banah minister chuamchuam chuamchuam te tawh holimna neikhawm ah, Mizoram Congress Chief Minister lui Lalthanhawla banah Lalduhawma President ZNP-te kimupi un a gen a, NGO lam ah Central Young Mizo Assocaition CYMA, Mizo Zillai Pawl MZP, ZORO lawiupa te le kimupi un a gen hi. Mizoram government tawh kithua ah Manipiur ah hun lemchang khat ah Zo- hnahthak-te kipumkhat zawksemna ding ah Nam Kutpui nei ding ah guanggalna a nei uh le Mizoram government in thanawppi mama in a gen a, zia ding a chu Mizo People Convention MPC Executive in Manipur ah um Zo- hnahthak sung ah lawiupa chuamchuam te tawh panlakna neikhawm ding un a gen hi.

TATA 407 truck khat accident ah chenn-in phukha, mi 1 liam

CCpur, March 27 (Nisn Thuhiltu) : Lamka apat Singngat zuan ah tai TATA 407 truck khat in tuni, March 27, 2019 zingkallam dak 9:45 vel in Thingkangphai khawsung ah accident tuak in, chenna inn khat phukha'n, mi 1 in liamna a tuak hi. Accident tuak TATA 407 truck (MN04 6636) ahileh Steering Fail ziak ah lamlian pam ah Lalngaizuala chenna inn baw ah a sak ah dawr kiang ah um Lalpari of Thingkangphai phu liam in a kigen a, kintak ah hospital puaktung ah um ti a hi. TATA 407 truck ahileh Singngat ah Reliance (JIO) a ding Fibre Line vuina ding ah vanmat pua, Contractor Boudhajit Singh of Singjamei in amat hi'n a kigen hi. Tuaksiatna tawh kisai in, gari hektu Boboi Meitei in gari nusia in, gari a kitawnpi leh a seppi ten thil umdan, contractor kiang tut ah inn neitu te leh liamna tuak te tawh kihona neithei un a kigen hi.

NT 28march2019c

K. Vungzalian, Ex-Minister in BJP nusia
CCpur, March 27 (Nisn Thuhiltu) : K. Vungzalian, Ex-Minister in President, BJP Manipur Pradesh kiang ah party apat haina lekha pia'n, BJP nusiata a hidan a taklang hi. K. Vungzalian, Ex-President, BJP Churachandpur Mandel in a lekha piak ah a taklatna a chun, party apat a haitak banah Primary Membership leh Active Member ahina March 25, 2019 nusiata ti'n a taklang a, damtheina lam niamkiak ziak, innkuan buaina; Party lawiupa ten State sung ah Rules and Regulation, Autonomous District Council, Churachandpur ah teltin ah um BJP MDC-te simmaw leh khenchuam nei, BJP lawiupa State Government a siam dan, party sung ah nekgukna umte dawilo ah party nusia hi'n le a taklang hi.

Pathian thu leh laa ah kiziltilna nei

CCpur, March 27 (Nisn Thuhiltu) : Siamsinpawlpi Residential School Nghathal in March 27 apat March 29 sung ah Pathian thu leh laa ah kiziltilna "Pinnacle 2019" kiti a nei ding uh tuni March 27, 2019 in a pan ui. Pastor K Vumzathang Local Pastor EBCC Kanan in "Pinnacle 2019" hawnna nei in, "faith without works is dead" ti thupi nei in, Evangelist Damkhothang in Pathian thugenna a nei a, Siamsinpawlpi residential school ah praise and worship team in biakna leh chawihawina laa ah mapui in, studen-te apat special number a um hi. Zialo achu, Confined session ah Chosen for a purpose ti thupi nei ah March 27 leh March 28, 2019 sung ah classroom ah hun mang ding ahiu.

Maternal Death Surveillance and Response training nei

CCpur, March 27 (Nisn Thuhiltu) : District Family Welfare Officer DFWO CCpur in tuni March 27, 2019 zingkallam dak 10:30 apat in Synod Hall, IB Road ah "District Training on Maternal Death Surveillance and Response MDSR" kiti a bawl hi. Zia hun achun, district sung ah ASHA Workers leh Aganwadi Workers te training in a pang ua, Dr Jamthianlal, DFWO/DIO CCpur in thugenna nei in, Huaisianvung @Vung mary, District Community Mobilizer DCM, CCpur, Nengneivah leh Maipakpi Devi DPO Ccpur ten Maternal Death Surveillance and Response MDSR tawh kisai in ziltilna a nei ui. Zia tawh kisai ma in, March 25, 2019 a khan le DFWO Conference Hall, District Hospital ah Maternal Death Surveillance and Response MDSR training a la um a, PHC ah Medical Officer in-charge te leh Block Program Manager BPM te Dr Jamthianlal, DFWO/DIO CCpur in ziltilna a la nei hi.

YVA Compound Veng in 29th Raising Day mang ding
CCpur, March 27 (Nisn Thuhiltu) : Young Vaiphei Association (YVA) Compound Veng Unit in March 30, 2019 zingkallam dak 11:00 leh Rostad Memorial High School Compound Veng ah 29th Raising Day mang ding a hi. Zia hun chu Upa Gentinhau Vaiphei, Deputy Manager/Cash Officer, SBI CCpur Branch in zin-gun hina tawh uap ding, Upa S. Tinlal, Headmaster Misao Lhahvom Junior High School, Upa Lalkithang Organizing Secretary YVA GHQ leh H. Sangpi Vice President YVA GHQ ten zin za-um, intekpa leh zin-tuntu hina tawh uap ding ahiu.

Lamkkhokhai, Social and Cultural Secretary leh Ngailalnei, Committee Member ten hun matna mapui ding leh Rev N Khanpau, Advisor in hun hawnna nei ah Th Minlun Committee Member in vaidawnna thu gen ding, hun matsung ah SK Thanga Secretary in report piakna nei ding leh Upa Kaikhokam, Founder President leh Zamkhankap, Chairman, VPC Compound Veng Unit ten thugenna nei ding, Zillai Compound Veng Unit leh YVA GHQ banah Luaithang President, YVA Compound Veng Unit ten le thugenna nei ding ahiu. Chun, L Kapboi, Assistant Secretary mapuina ah Award hawpdawna um ding, Dr Ng Seanboi Vaiphei, Surgeon District Hospital in Health and Blood Donation Cammpaign bawlna nei ding, khuallian-te apat thugenn um ding leh hun tawp ah Nenglalthamuan, Vice President in kipakthu genna nei ah Elder Khamgoulian in pauchapna tawh hun khakna nei ding a hi.

Anngawl Pauchapkhawmna nei

CCpur, March 27 (Nisn Thuhiltu) : Ninevi Revival Crusade Ministries in thasin ah Angngawl pauchapkhawmna a nei uh chiapi zawm zel in tuni, March 27, 2019 zingkal dak 7:00 apat EBCC Khominthang ah a 100-veina Anngawl Pauchapkhawmna a nei ui. Zia hun a chun, K. Ginzakai in hun patna nei in, zingkal dak 7:30 apat dak 9:30 kikal in Nu Chingngaihlun mapuina pauchapkhawmna a nei ua, dak 9:30 apat dak 11:00 kikal ah Pastor Dongzathawng in Revival Message genna a nei hi. Zingkallam dak 11:00 apat sun dak 12:00 sung in Rev. Thangzalun puihuaina tawh pauchapkhawmna nei in, Pathian' thutak genna le a nei hi. Tuni ah anngawl pauchapkhawmna achun, vengsung mi leh vengdang apat tam tak a chiakhawm ui.
Ninevi Revival Crusade Ministries in April 3, 2019 leh April tha a ding ah EBCC New Lane, Bungmual ah pauchapkhawmna nei ding un a kigen hi.

Population based screening tawh kisai ah training zo

CCpur, March 27 (Nisn Thuhiltu) : District Health Society, National Health Mission CCpur in March 25, 2019 apat March 27, 2019 sung ah CMO Conference Hall, CMO Complex ah Primary Health Sub-Centre chuamchuam ah ANM leh GNM ten Population based screening tawh kisai ah training a nei uh tuni'n a zo thiang ui.Training hun sung in Dr Chiinhoihniang, MO Incharge NCD Clinic CCpur, Dr Th Nirpendra DNO, NPPC, T. Lhingneikim Haokip, NCD Epidemologist, NCD Cell, Dr Chiinhoihniang leh Dr H Thanglawmlal ten topic chuamchuam mang in ziltilna a nei ui. Population based screening ahileh Non-Communicable disease nuai ahNational Programme for Prevention and Control of Cancer, Diabetes, Cardiovascular Diseases & stroke nuai ah chiapi ding, project dungzui ah natna kikaisawn thei- Cancer, zunthum leh a dangdang natna nei te hawldaw ding ti a hi. India gamsung pumpi ah Ayushman Bharat for a New India -2022 nuai ah Health & Wellness Centre 1.5 lakh hawndaw ding ti a hi dungzui ah Health & Wellness Centre ah Population Based screening chiapi hiding a hi.

Tribal rights tawh kisai ah Seminar -cum- Consultative Meeting nei

CCpur, March 27 (Nisn Thuhiltu) : All Tribal Rights Protection Forum Manipur (ATRPFM) in tuni March 27, 2019 zingkallam dak 10:30 apat in YPA GHQ Hall, Hiangtam Lamka ah Protection of Manipur Tribal Land and Forest Creation of District, Village and Alteration of Boundaries there-of are Allocated to Revenue Department Government of Manipur leh Citizenship Amendment Bill CAB 2016 tawh kisai in One Day District Level Seminar-cum-Consultative Meeting a bawl hi. Zia hun a chun, district sung ah khua/veng chuamchuam apat village authority, khaw hausa banah nam chuamchuam apat lawiupa te a pang ui. Hun mat sung in resource person R Daniel Senior Advocate Advisor to ATRPFM leh Bd Behring Ex MP &MLA ten Protection of Manipur Tribal Land and Forest Creation of District, Village and Alteration of Boundaries There-of are Allocated to Revenue Department Government of Manipur leh Citizenship Amendment Bill CAB 2016 tawh kisai genna a nei ua, John K Ngaihte, Chairman, Zomi Council ZC leh Chinlunthang, President United Zou Organization UZO GHQ ten le thugenna nei in, Joseph Rongmei president, ATRPFM in consultative meeting chung ah thupukna siam in, Lok Sabha election code of conduct lakdaw ahitak leh tin leh haa thua ah zia gual dan kisiam te chu nasatak ah dodal ding, Article 371 India Constitution, Hill Area District Council Act, 1951-1952 Village Authorities Act 1956 rules, MLR & R Act 1960, Thrid Amendment Act 2008 ti te expert te tawh kithua ah tribe 36 pau ah ledaw ding leh Village Authority Act 1956 etthak ding in thupukna a siam ui. Manipur gamsung ah kum 2008 apat Village Recognition pending ah um ngai pawimaw ah All Tribal Rights Protection Forum Manipur ATRPFM in zia One Day District Level Seminar -cum- Consultative Meeting chu organised a bawl hin a kigen hi.

NT 28march2019d

Tuchung LS Election 2nd Independence of India delna ahi: Gaikhangam
Go to village program kiti birth leh death certificates hawpdawna mai: Ibobi

Imphal March 27 (Nisn Thuhiltu) : Sangaiprou Mamang Leikai, Imphal ah tuni'n Indian National Congress Outer Manipur Parliamentary Constituency candidate K. James a ding in Congress in flag hoisting ceremony a nei hi. Zia hun a chun, Manipur Pradesh Congress Committee President Gaikhangam in BJP mapui government mipi te thuneina leh zalenna susia ti'n a gen a, 17th Lok Sabha Election chu election naran mai hilo ah 2nd Independence of India a umtheina ding ah galdona khat hi'n agen hi. British hun ah India mipi ten nek leh dawn, culture leh sakhua lam ah zalenna ei piak himaleh BJP in zia zosia chu tuhun ah subei in a gen a, BJP mapui government chu nasatak in demna a bawl hi. Leader of Congress Legislature Party O. Ibobi in a thugenna a chun, BJP government in mipi te ding ah welfare schemes ngaikhawklo, publicity leh propaganda bep buaipi in a gen a, RTI activist report dungzui ah BJP in propaganda leh publicity ah Rs 5000 Crores val seng in a gen hi.
Manipur ah BJP government in Go to hills, go to village leh Go to schools achiapina bang gasua a um em ti'n dawtna a siam a, Tribal markets tamlocha um te masawn ding ah panlakna umlo, government in Go to school chiapi maleh infrastructure development muthei ding umlo in a gen hi. Go to village program chu birth leh death certificates hawpdawna ding mai ahi ti'n le a gen hi.

Police in nasatak ah Th. Nando Singh @ Nanao hawl
Imphal, Mar. 26 (Nisn Thuhiltu) : Manipur Police in judicial custody apat damlona ziak ah Ortho Ward, JNIMS, Porompat ah etkawl ah um, hospital ah etkawl ah a umna apat zamdawk Th. Nando Singh @ Nanao (34 yrs) s/o Th. Subol Singh of Khangabok Part-III, Chief of KCP (Mangal/ Nando Group) umna hia leh hilthei te kiang ah Cash Reward Rs 1,00,000/- (Rupees one lakh only) piak hiding ah a puandaw tawh kitawn in, matdaw kit theina ding in mun chuamchuam in search operation nasatak a bawl hi. Zia chu tawh kitawn in state police in National High Ways - Imphal-Dimapur leh Imphal Jiribam road ah police stations te panna police stations zosia chu alert tak ah um ding in hiatsakna a bawl a, Imphal East SP supervise bawlna nuai ah tuzingkal in Keibi area ah search operation bawlna le a nei bawk ui. A langkhatlam ah Th. Nando Singh @ Nanao zamdawna chung in SI khat leh police constables 3 te suspend ah um in a kigen hi.