Nisin Thuhiltu – 12 October 2018

Manipur in National Award for Poshan Abhiyan 3 sang; Minister Nemcha Kipgen in kipakpi
Churachandpur District a pat mi 2 in Best ANM Award leh Best AASHA award sang

Imphal, Oct. 11 *(Nisin Thuhiltu)* : New Delhi ah tuni'n National Award for Poshan Abhiyan piakdawna a um hi. Ziana a chun, Department of Social Welfare, Manipur in category 2 - Field Functionary Awards - AAA(A++) Award leh Leadership Award (District Level) in award a sang a, Deputy Commissioner of Chandel district in Leadership Award a sang hi. Social Welfare Minister Nemcha Kipgen in Department of Social Welfare, Manipur in National Award for Poshan Abhiyan, Field Functionary Awards - AAA(A++) Award leh Leadership Award (District Level) a san theina chung ah department officials, staffs leh AWW, semtu te chung ah kipak mama a hidan gen in, Deputy Commissioner of Chandel district in Leadership Award a mu chu kipakpi mama hin a gen hi. Tu ah award chu, Social Welfare, Department, Manipur in Chief Minister, N. Biren Singh mapuina nuai ah 2nd National Award a muna hita ti'n le a gen hi. Department of Social Welfare, Manipur nuai ah category 2 - Field Functionary Awards - AAA(A++) Award leh Leadership Award (District Level) ah sang chu a kigawm ah mi 6 a hiu a, amau chu - W. Warthangam, Anganwadi Worker (AWW), Bongkhamsel, ASHA, Regika, ANM, Krishna Kumar, Dept. Comm, Chandel, Dimkhanman Hangsing, ANM leh ST Naoting Vaiphei, ASHA te a hiu. Awards ceremony ahileh Dr. Rajiv Kumar, Vice- Chairman, NITI Aayog, Dr. Vinod K. Paul, Member NITI Aayog, Rakesh Srivastava, Secretary, Ministry of WCD leh Ministry chuamchuam ah high ranking officials te'n le a uap ui. Director, Social Welfare, Manipur, Jaspreet Kaur leh Joint Director, Social Welfare, Manipur, Oinam Sonia te'n Department of Social Welfare, Manipur palai hina tawh a uap ui. National Award for Poshan Abhiyan sang te lak a chun, Churachandpur District a pat Dimkhanman w/o Tualchin Neihsial, New Lamka in Best ANM Award a sâng a, Naotin Vaiphei w/o Ngamjang Baite of D.Harmon Village, Sagang in Best AASHA award a sang hi.

Christian Book Fair kipan
CCpur, Oct. 11 *(Nisin Thuhiltu)* : World of Christ (WOC), Dimapur in tuni, October 11 apat October 15 tiang ah ni 5 sung Synod Hall, IB Road ah Christian Book Fair a nei ding uh a kipan hi. Christian Bookfair nei hun sung ah Pathian thu tawh kiai Study Material chuamchuam, CD, Gift Item, Key Chain, naupangte’ lunglut theina ding lekhabu chi chuamchuam banah Second Hand Lekhabu le tamtak chawkthei ding in kawi in a um hi. World of Christ in kum 1999 ah le Churachandpur ah zia gual ah Book Fair le a la bawl ngai, kum 2017 October ah le Synod Hall, IB Road ah Book Fair a la bawl uh ti a hi. Book fair sung ah lekhabu leh van chi chuamchuam chaw-nuam ten Synod Hall, IB Road ah zingkallam dak 8:30 apat nitaklam dak 5 kikal ah chaw thei ding a hiu.

SSPP GHQ in Flag Day mang ding
CCpur, Oct. 11 *(Nisin Thuhiltu)* : Siamsinpawlpi (SSPP) General Headquarter in October 13, 2018 zingkallam dak 11:00 leh SSPP Complex, Siloam Veng, Bungmual ah SSPP Flag Day mang ding a hi. Zia hun chu Thangso Baite, MP Outer Manipur in Chief Guest hina tawh uap ding leh SSPP Flag kaipalna nei ah hun matna kipan ding a hi. M. Zamchinthang, Member, Standing Committee in hun matna mapui ding, Lian C. Tombing, Member, Standing Committee in pauchapna tawh hun matna hawng ding, Thanglalmuan Hauzel, President,SSPP GHQ in a chiakhawm te vaidawnna nei ding, Ricky Vanlallawm Guite, Chairman, Standing Committee apat Flag Day tawh kisai ah thugenna nei ding, N. Khamsuanthang, Chairman, School Managing Committee, Dr. R. Sanga, Chairman, SSPP Foundation Trust leh Chief Guest Thangso Baite apat thugenna um ding, Nengzalian Tonsing, Vice President (Internal), SSPP GHQ in huntawp ah kipakthu genna nei ding leh Upa M. Ginzalian, Chairman, Election Commission, SSPP GHQ in pauchapna tawh hun khakna nei ding a hi.

Foundation Day-cum-Awards Distribution
CCpur, Oct. 11 *(Nisin Thuhiltu)* : Nitin Thusoh Foundation Day-cum-Awards Distribution (NT-FODAS) kiti matna ding tawh kisai ah tulai in, Lamka Film Academy, Mualveng ah a kisaipi thuneitu te'n Award chuamchuam a ding in Screening a bawl zing ui. Screening ahileh Lamka Film Academy ah George AK Neisial, Convener hina nuai ah Mungboi Tunglut, Uptown Media, Benson Tonsing, Piingpei/10 Studio leh Dr. Lian Samte te’n a nei ua, tuni ah zo man ding uh hi’n kigen hi. Screening ahileh September 2017 apat September 2018 sung ah kisua dawk - Feature Film 6; Gel Jingin, Numei Hinkho, Minu Hinkho, Henu Nei Ngaidam In, Na Kinepna Pathen Aum E, Ahinla Ka Mildeh Poi tileh Khupting leh Ngambom Bangin tite ban ah Music Video Album 5; Kasen Angkoi, Beautiful Lanu, Ngolna Thei Lungset, Saheinu leh Sangga Ninep Na tite bawl in, Screening ah Award chuamchuam, Best Feature Film, Best Director, Best Editor, Best Cinematographer, Best Actor, Best Actress, Best Costume Designer, Best Comedian, Promising Child Artist, Best Supporting Role leh Best Negative Role tite a enkhawm ui. Nitin Thusoh Foundation Day-cum-Awards Distribution ahileh October 18, 2018 ah Kuki Football Academy Playground, D. Phaihel, Kangpokpi District ah um ding hin a kigen hi.

P. Kamdou Veng in Silver Jubilee lawm ding
CCpur, Oct. 11 *(Nisin Thuhiltu)* : P. Kamdou Veng kisat nung a kum 25 tinna Silver Jubilee lawpna', October 24, 2018 leh P. Kamdou Veng Silver Jubilee Celebration Committee mapuina nuai ah nei hiding a hi. Zia hun chu, Ginsuanhau Zou, Chairman MENIREDA MLA 60-Singngat Assembly constituency in Chief Guest hina tawh uap ding, TN Haokip, MLA 59-Saikot Assembly Constituency, President, MPCC in Chief Host hina tawh uap ding, vungzagin valte, MLA 56-Thanlon Assembly Constituency Chairman MTDC in Functional President banah Thangso Baite, MP Outer Manipur in Guest Of Honour hina tawh uap ding a hi.

STC/BSF saina' Mini-Marathon um ding
CCpur, Oct. 11 *(Nisin Thuhiltu)* : Subsidiary Training Centre (STC), Border Security Force (BSF), Mualkoi in October 16, 2018 ni leh Police Commemoration Day matna' Mini-Marathon sai ding a hi. Zia ding a chu kum 16 chunglam mi kua hitaleh School, Club, NGO, Social Voluntary Organization leh khaw chuamchuam apat a pang nuam taphawt numeleh pawsal pan thei hiding, a pang nuam te'n STC/BSF Mualkoi leh SP Office, Tuibuang ah tuni, October 11, 2018 apat October 15, 2018 tiang ah a thawn ah Registration bawlthei ding a hiu. Prize ahileh 1st, 2nd leh 3rd tiang um ding, Cash Prize, Certificate, Medal leh Trophy piak hidinga hiu a, 4th apat mi 25 te Consolation Prize piak hiding a hiu. Registration bawl ding te’n passport size photo 2 leh ID Proof matlai (Aadhar Card, Voter Card, School ID Card) zerox copy tawh chawi ngai ding, Mini-Marathon ah pang ding te October 16, 2018 zingkal dak 6:00 ahMata Khua ah ki-report ding, zingkal dak 7:00 ah Mata apat STC/BSF Mualkoi tiang ah Mini-Marathon kitai demna um ding a hi.

Zouzene FC, Kangleicha SL leh SSPP FC gualzo
CCpur, Oct. 11 *(Nisin Thuhiltu)* : Dr. BR Ambedkar Stadium, New Delhi ah a chiatha zing ONGC Northeast Tamchon Football Tournament 2018 ah tuni, October 11, 2018 in match pathum a um a, Match masa zingkallam dak 10:30 ah Zougene FC leh Senapati Red Star FC te kihel in, Zouzene FC in 1-0 in gualzawna a chang hi. Second match ah nitaklam dak 12:30 in match a kipan a, Muvanlai Athletics FC leh Kangleicha SL te kihel in, KSL FC in 1-0 in gualzawna a chang hi. Third match ah nitaklam dak 2:30 in SSPP FC leh Sikkim FC a kihel ua, SSPP FC in 5-0 in gualzawna a chang hi. SSPP FC in October 14, 2018 nitaklam dak 12:30 leh Kangleicha SL maitua ding, Muvanlai Athletics FC leh Sikkim FC te relegate hita a hiu. 12th ONGC Northeast Tamchon Football Tournament ahileh October 6, 2018 ni ah kipan, tournament ah club/team 16-kihel in, Group 4 ah khen a hiu.

District Super Division League khakna leh final match um ding
CCpur, Oct. 11 *(Nisin Thuhiltu)* : Churachandpur District Sports Association (CDSA) saina' (L) T. Lianboi Simte Memorial District Super Division League 2018 chiatha zing chu, October 13, 2018 nitaklam dak 1:30 leh Closing Ceremony leh Final match um ding a hi. Zia hun chu, H. Mangchinkhup, Social Worker in Chief Guest hina tawh uap ding, S. Ginmuan Ngaihte, MCS, AC to DC in Guest of Honor hina tawh uap ding leh T. Pumkhokam, EE (Retd.) in Donor hina tawh uap ding a hi. SN John, Secretary, CDSA in Closing Ceremony mapui ding, Kamthang Haokip, Vice President, CDSA in a chiakhawm te vaidawnna nei ding, Donor, Guest of Honor leh Chief Guest apat thugenna um ding, James Thangluai, Vice President, CDSA in kipakthu genna nei ah, Pastor SL Minlun Neisial, EOC in pauchapna tawh hun matna khak ding a hi. Closing Ceremony zaw leh Guest te’n final match kihel ding te inspection bawlna nei ding, match kick-off bawlna Chief Guest in nei ding a hi. Final Match ah Bungmual Youth Club (BYC) leh Ganggam Soccer Club (GSC) te kihel ding a hiu.

CCpur Police in WY tablet 600 leh a zuaktu man
CCpur, Oct. 11 *(Nisin Thuhiltu)* : CCpur District Police Station apat 2 Kms South West a gamla Pearsonmun khua ah melhiatlo pawl khat in WY tablet zuak ti ah report a um tawh kitawn in CCpur District Police team khat in OC/CCpur Police Station etzuina nuai in, NDO Hauginlian Tonsing leh Shominthang Kipgen te mapuina Pearsonmun khua'n search operation a bawl ui. Ziana a chun, Pearsonmun khawlai ah motor bike, Bajaj Discovery (MN02A-3702) ah taitua velvel pawsal khat, Douminthang (37) s/o (L) Thongkhanpau of Lentonghoih Street, Vengnuam New Lamka man ah thudawtna a nei banua body search a bawl ua leh Blue Plastic 3 ah kichun WY tablet 600 mudawk uh ti a hi. Zia chu tawh kitawn in Douminthang chu man in, Court ah dinsak in a um a, Court in October 17, 2018 tiang Police Custody um ding in lemsakna a nei a, FIR No. 111 (10) 2018 CCP-PS U/S 22(b) ND & PS Act. ah Police in case a ziklut hi.

Sangaikot ah Free Medical Camp um ding
CCpur, Oct. 11 *(Nisin Thuhiltu)* : Dr. Kimngaihching Simte, District TB Officer in Sangaikot khua ah October 13, 22018 (Saturday) leh 'Free Medical Camp' um ding a hidan gen in, zia chu Sangaikot Sub-Division mipi'n phatchuampi guachiat ding in chialna abawl a, zia hun a chu Naupang doctor, Padiatrician apat teksia tiang te damtheina tawh kisai en ding, doctor 10 val te'n free medical camp ah health check-up bawl ding uh hin a gen hi.

BBBP thu ah Orientation Workshop um ding
CCpur, Oct. 11 *(Nisin Thuhiltu)* : CCpur District mipi'n Beti Bachao Beti Padhao (BBBP) umdan a hiatthiam ding uh dawina ziak ah District Administration, CCpur in October 12, 2018 (11:00 AM) leh Conference Hall, DC Office, Tuibuong ah 'One Day Oriental Workshop bawl ding a hi. Shyam Lal Poonia, DC/CCpur in Orientation Workshop a chu a kisaipi leh DLO (District Level Officer) te pangkim chiat ding in hiatsakna a bawl hi. Beti Bachao Beti Padhao (BBBP) ahileh numei naupang te venbit ding leh a dinmun uh dawpkangna ding scheme, Government of India in a chiapi a hi.

CMHT leh PM-JAY beneficiary te ding ah re-enrollment pawimaw
CCpur, Oct. 11 *(Nisin Thuhiltu)* : CMHT (Chief Minister-gi Hakshelgi Tengbang) leh Ayushman Bharat nuai ah Health benifit/schemes: PM-JAY (Pradhan Mantri-Jan Arogya Yojana) beneficiary te'n a kawp ah phatchuampi theilo ding ti a hi dungzui ah original SECC (Socio Economic Cast Census) list a pang te'n Maternity Ward, District Hopsital Opposit ah CMHT & PM-JAY Counter ah fresh/re-enrollment bawl ding ti'n Dr. VC. Pau, MS/DH in hiatsakna a bawl hi. Original SECC (Socio Economic Cast Census) list of 2011 a pang zosia PM-JAY facilities muthei ding a hiu a, himaleh formalities suk bukimna ding ah CMHT & PM-JAY Counter, opposit Maternity Ward ah BIS (Benificiaries Identification System) tawh a thak ah re-enrollment bawl pawimaw ti'n a gen hi. CMHT & PM-JAY kibatlona ahileh CMHT benificiary khat in damlona chung ah panpina Rs 2 Lakhs tiang health benefit muthei ding, PM-JAY nuai ah benificiary khat in Rs 5 Lakhs tiang per family, per year ah health benefit muthei ding uh ti a hi.

LPS Gas mat dingdan tawh kisai ah ziltilna nei

CCpur, Oct. 11 *(Nisin Thuhiltu)* : CCpur district sung ah Gas Agency lak ah khat, Bungmual khua ah um Bungmual Indane Gramin Vitrak in tuni, October 11, 2018 zingkallam dak 11 in amau Gas Depot ah Safety Clinic and Energy Conservation Campaign a bawl hi. Zia hun a chun, Bungmual Indane Gramin Vitrak ah customer banah Ujjwala Diwas nuai ah BPL innkuan gas free connection mu ding te a pang ua, Thangjona Ngaihte in hun matna mapui in, Safety Clinic & Energy Conservation Campaign bawlna ziak genlatna a nei a, Bungmual Indane Gramin Vitrak neitu S. Paukhanmang Ngaihte in LPG mat dingdan tawh kisai practical ah ziltilna hun nei in, Ujjwala Diwas nuai ah BPL innkuan 34 te kiang ah Free gas connection card leh gas set hawpdawna a um hi. Chun, Upa Dr N Tualkhankham in Pathian kiang ah kipakthu genna leh hunkhakna nei in hun a mang zo ui.

Bungmual Indane Gramin Vitrak neitu S Paukhanmang Ngaihte in gas kiti van mat pawimaw mama khat a hina chung ah lau um tak thil le hi'n a gen a, amangtu te pilvan ding pawimaw a hi ziak ah amat dingdan tawh kisai ah kiziltilna um sek a hidan gen in, gas stove ahileh cylinder sang ah, a san zawk ding, gas matzaw tak leh a stove ah off ding, regulator le off teitei ding, ann huan na mun ah hui pawtna ding ventilation kituptak a um ding, fridge tawh kinai ah gas stove kawi lo ding, gas banah sum save theina ding a gas a khel a val ah matlo ding, a hithei liai leh innkuan a ann nek hun kibatsakna gas save chuamchuam mama a hidan gen in, gas van mat tawh kisai ah kua hitaleh Indian Oil Corporation IOC in a siam te bep mat ding, gas gui horse pipe le kum 2 dan ah san zel ding a hi ti'n a gen hi. Chuleh, India Government in numeite bitna ding, meikhu lenglung lak ah ann huanna apat dam theina lam hawilo thei, meikhu kiti hui subuak tu le a hina chung ah govt in numei a bik tak ah ann-huan, nek leh chak ding siam tu te khualna Pradhan Mantri Ujjwala Yojana (PMUY) scheme pandawk ah gas connection a thawn ah a neitheina ding ua scheme chiapi ah um hin a gen hi.

NT 12oct2018b

Dr Ambedkar Chamber of Commerce Manipur Chapter Office Bearer ding guat

Imphal, Oct. 11 *(Nisin Thuhiltu)* : Ind Er Iqbal Singh Awal, Director General, DACC. New Delhi in Dr Ambedkar Chamber of Commerce Manipur Chapter Office Bearer ding a suadawna a chun, Patron ding ah - Th. Bishwarjit Singh, Hon'ble Minister (Comm. & Ind) leh N. Kayisii, Minister (Tribal Affairs & Hills) te guat in a um ua, Chairman ding ah Vungzagin Valte (MLA & Chairman, MTDC) guat a hi. Chun, Co-Chairmen -T.T. Haokip (MLA & Chairman, HAC); N. Biren Singh (Ex-Minister); Muktamani Devi (Entrepreneur); Vice Chairmen -Dr R. Sanga, Ibechoubi Devi, M. Sushilkumar (Retd. Ips), Achou Shamjetshabam, P. Loken Singh; Secretary General - Col. N.G. Sitlhou (Retd) ; Secretary Finance - Haoreilung Golmei; Secretary (Admin) - N. Subhas Singh; Secretary (P.R.) - N. Khamsuanthang; Joint Secy (Media) - M. Merina; Joint Secy. Imphal West - Angom Shanti Devi; Joint Secy. Imphal East - Tongkholet Kuki; Joint Secy. CCpur - G. Thiankholian; Joint Secy. Ukhrul - Nireikan Khapudeng; Joint Secy Kamsong - Ningrel Zimik; Joint Secy. Senapati - M.S. Jerome; Joint Secy Chandel - Khaling Toshang; Joint Secy Kangpokpi - Lamtinthang Haokip; Joint Secy Pherzawl - Ramsangthang; Joint Secy Noney - Chamrel Kamei; Joint Secy Tamenglong - Haorellung; Joint Secy Jiribam - Kamei Sanathol; Joint Secy Kakching - S.Kamala leh Joint Secy Tengnoupal - Sonai Saka te guat a hiu.
A langkhatlam in, tuni'n Dr.Ambedkar Chamber of Commerce delegation team khat in, Sardar Inder Iqbal Singh Atwal, National Working President mapuina' leh Vangzagin Valte MLA & Chairman Manipur Tribal Development Corporation –MTDC, Colonel. N.Sitlhou,(Rtd), Me.Vasunraz te uapna tawh Manipur Chief Minister kimupi in, Manipur State Conclave ding chungchang genkhawmna a nei ua, 20-10-2018 ah um ding Manipur State Conclave hawnna Manipur Governor H.E Dr. Najma Heptulla in a nei ding in lemsakna a nei ui.

Manipur High Court in MU administrator ding guat

Imphal, Oct. 11 *(Nisin Thuhiltu)* : Manipur University buaina sukven theina ding ah High Court of Manipur in panlakna nei in, Manipur University administrator ding in Jarnail Singh, IAS (retired) appoint a bawl a, Manipur University Act, 2005 tawh kituak in thuneina bangkim le administrator khut in a pedawk hi. Jarnail Singh, IAS (retired) ahileh thiamna lam ah Bachelor of Engineering (Honours), Punjab University; Master of Engineering (Distinction), Punjab University; Master of Public Administration, Harvard University USA ah zo, tu leh tu Chief Executive Officer, Project Appraisal Consultants LLP Oct 16th 2012 (till date) ah sem a hi. Masang in, Secretary to Government of India July 2008 to Jan. 2009; Secretary (Border management) July 2008 to Jan. 2009; Secretary (Ministry of Development of North East Region) Feb. 2009 to Sep. 2009; Chief Secretary, Government of Manipur Aug. 2004 to Jun 2008; Joint Secretary to Prime Minister of India Aug. 1996 to July 2004; Principal Secretary/ Commissioner, Government of Manipur June 1986 to Aug 1996; Deputy Secretary, Ministry of Power, Government of India Jan. 1982 to May 1986; Deputy Commissioner, Ukhrul, Government of Manipur Aug. 1979 to Dec. 1981 in le a la sem hi.

JAC in Sunibala Devi kithana thu d re-post mortem ding ah phutna nei
Imphal, Oct. 11 *(Nisin Thuhiltu)* : Joint Action Committee (JAC) against brutal killing of Sorensangbam (O) Sunibala Devi aka Lily Devi in suicide hi ah gen ah a umna chung in, government chu re-post mortem bawl ding in demand a bawl hi. JAC thusuak in a genna a chun, investigation dungzui ah Sorensangbam (O) Sunibala Devi taksa chung ah sawisakna nung, khuttin ah kikhuatna nung ti te um chu Sorensangbam VinodKumar @ Bolo (48) khutnung hi ah kilang maleh khualna bawltu te'n a chung ah le case ziklut lo un a gen hi.State government in kituptak ah tualthana case khualna a nei ah justice a um theina ding ah panlakna aneilo leh kiphinna nasatak ah chiapi ding un le JAC thusuak in a taklang hi. Sunibala Devi aka Lily Devi, wife of (Late) S Shyamlal Singh of Keisamthong Elangbam Leikai Leirak Achouba ahia, a pawsawl ahileh cancer natna ziak ah thi a hi.

Prof. AP Pandey in Imphal nusia

Imphal, Oct. 11 *(Nisin Thuhiltu)* : Manipur University buaina sukven theina ding ah High Court of Manipur in panlakna nei in, Manipur University administrator ding in Jarnail Singh, IAS (retired) appoint a bawl tak tawh kitawn in, suspend ah um Manipur University, Vice Chancellor Prof. AP Pandey in Imphal a nusia hi. A langkhat lam ah Vice Chancellor AP Pandey chung ah ngawna chuamchuam um te khualna nei ding ah guat ah um, two member enquiry committee in AP Pandey chung ah ngawna um te chung in tuni tiang in mudaw bangma a nei pua, Manipur University Community banah AP Pandey in le two member enquiry committee kithuapina pediaklo un a kigen hi.