Nisin Thuhiltu – 11 October 2018

Lei siamna ding ah foundation suangphu hawng

CCpur, Oct. 10 *(Nisin Thuhiltu)* : Singngat Assembly Constituency, Guite Road ahTuilak Lui kantan ah Tuilakjang leh G Bualjang khua kikawmtuana ding lei pawimaw mama khat siam patna ding in tuni, October 10, 2018 zingkallam dak 10:30 in bialtu MLA Ginsuanhau @ GS Haupu Chairman, MANIREDA in foundation suangphu hawnna a nei hi. S Suanchinpau, MDC Lungthul & Chief of G Bualjang, P Mani Singh, Superintending Engineer, PWD Manipur, Thanglianpau Guite, President ZRO & Chairman UPF banah khawsung mipi leh Singngat AC sung ah khua hausa chuamchuam te'n zia hun chu a uap ui. S Zamzalam, Assistant Engineer, Ccpur Division PWD Manipur in hun matna mapui in, CT Mang Guite, First Class Contractor in vaidawnna thu gen in, bialtu MLA Ginsuanhau@GS Haupu Chairman, MANIREDA in Tuilakjang leh G Bualjang khua kikawmtuana ding ah lei siampatna ding in foundation suangphu hawnna a nei a, Pastor Ginminthang, EBCC G Bualjang in Pathian kiang ah a latna a nei hi. Hun matsung in, S Suanchinpau, MDC Lungthul & Chief of G Bualjang, P Mani Singh, Superintending Engineer, PWD Manipur, Thanglianpau Guite, President ZRO & Chairman UPF leh bialtu MLA Ginsuanhau @ GS Haupu Chairman, MANIREDA te'n thugenna hun a nei ua, T Jangkhongam Haokip, Executive Engineer, Ccpur Division, PWD Manipur in kipakthu gen in, Pastor Ginminthang, EBCC G Bualjang in hunkhakna a siam hi.

MLA Ginsuanhau @ GS Haupu Chairman, MANIREDA in G Bualjang leh Tuilakjang kikawmtuana ding lei, Ministry of DoNER, Government of India, Social and Infrastructure Development Fund (SIDF) nuai ah siam a hitheina ding ah kum 2013 apat government ah del a hidan gen in, zia lei chu siamzaw a hitak leh dakkal 3 vel ah kikawmtuana a la um sek chu minute 30 vel ah kikawmtua thei hita ding ti'n a gen hi. National Highway Guite road Mualkot leh Sialbu kikal lampi siamna ding ah government lam ah lemsakna a um tak dungzui ah tunung sawtlo ah lampi siamna nasep kipan ding ti'n le a gen hi. Lei kidaw thak ding ahileh S Khamthang Special contractor min ah, PWD etzuina nuai ah CT Mang first class contractor in a siam ding, asau lam meter 45 leh a san lam, meter 5 hiding, metter 7.5 ah lian ding , tha 18 sung ah Rs 6.66 crore bei ah kisiam ding hi'n a kigen hi.

VLS phalna lak pawimaw
CCpur, Oct. 10 *(Nisin Thuhiltu)* : Vaiphei Literature Society (VLS) in hiatsakna thusua a bawlna a chun, VLS Managing Committee meeting thupukna dungzui ah Vaiphei sung ah kochuam leh mimal,Vaiphei pau mang ah lekhu suadawk thak ding te'n VLS hiatpina a lak masak ding uh pawimaw a hidan taklang in, pau matdan, zik dan a kitup theina ding leh a kituak theina ding ah zia gual dan thak chu kisiam in a taklang hi.

"Seminar on Envisioning" kiti nei

CCpur, Oct. 10 *(Nisin Thuhiltu)* : Churachandpur District Christians Goodwill Council (CDCGC) in tuni, October 10, 2018 zingkallam dak 10:30 apat in Gospel Centenary Hall, Hebron Veng, New Lamka ah Seminar on Envisioning ti thupi mang in United Christians Prayer for India (UCPI) apat palaite tawh hun a mangkhawm ui. Rev. Vanmawia, Secretary, CDCGC in hun matna mapui in, Rev. LB Angam, Treasurer, CDCGC in hun patna siam in, Rev. Dr. Lalhmuoklien, President, CDCGC in vaidawnna thu gen in, Rev. RK Ray Chawdhury, Volunteer, UCPI leh Rev. AK Goldsmith, Volunteer, UCPI te’n seminar hun amapui ua, Rev. Vanmawia in hun khakna a siam hi. Seminar ahileh Churachandpur khawpi sung ah Christian sakhua zui te Pathian gam nasepkhawm thei dan lampi ngaitua khawmna ding dawina ziak ah chiapi ah um hin a kigen hi. Churachandpur District Christians Goodwill Council a registered kochuam - Evangelical Assembly Church (EAC), Evangelical Organization Church (EOC), Chin Baptist Association (CBA), Evangelical Baptist Convention (EBC), Mizoram Presbyterian Church Synod (MPCS), Zou Presbyterian Church Synod (ZPCS), Khuga Sadar Presbytery (KSP), Manipur Evangelical Lutheran Church (MELC), Salvation Army, United Pentecostal Church International, North East India (UPC-NEI), Independent Church of India (ICI), United Pentecostal Church International (UPC), Reformed Presbyterian Church, North East India (RPC-NEI), Evangelical Synod Church (ESC), Seventh-Day Adventists (SDA) leh Wesleyan Methodist Church of East India (WMCEI) apat pailai 100 phial in zia hun chu a uap ui.

NT 11oct2018b

Foundation Day-cum-Games & Sports

CCpur, Oct. 10 *(Nisin Thuhiltu)* : Zoumunnuam Youth Club (ZYC) in Zoumunnuam khua kum 12-tinna Foundation Day-cum-Games & Sports kithua tuni, October 10, 2018 zingkallam dak 10:00 apat in a mang ui. Pauchinkhup, Chief of Zoumunnuam in Chief guest hina tawh hun matna a uap a, Sianmuanthang, Social Worker in Guest of Honor hina tawh uap in, Tilkhojang, Ex-Serviceman in Functional President hina tawh a uap hi. Khailianthang, Finance, ZYC in hun matna amapui a, Elder Khamsonpau, ZPCS in hun patna siam in, Pauneilal, Vice President, ZYC in mipi te vaidawnna nei in, khuallian te thilpiak piakna leh khuallian te apat in thugenna a um a, T. Gouminlal, President, ZYC in huntawp ah kipakthu genna nei in, Elder Kaihau, Yahkallah kochuam in pauchapna tawh hunmatna a khak hi. Nitak hun matna ahileh Marcus Suanlian in Chief Guest hina tawh a uap a, Chinkhanpau, Chief of Khuainuai in Guest of Honor hina tawh uap in, Lunzamang, Ex-Serviceman in Functional President hina tawh a uap hi.

One Day Legal Awareness bawl

CCpur, Oct. 10 *(Nisin Thuhiltu)* : District Legal Services Authority (DLSA), Churachandpur in Community Development Society (CDS) tawh kithua in' tuni, October 10, 2018 zingkallam dak 11:00 in Jubilee Hall, Dorcas Hall Campus ah One Day Legal Awareness a bawl hi. Salam Imocha, (Retd.) District & Session Judge, Thoubal leh Presiding Officer, Family Court in Chief Guest hina tawh hun matna a uap a, Chingsonkim, Para Legal Volunteer, New Lamka Legal Aid Clinic in hun matna mapui in, Ginsianlal Naulak, Advocate leh Secretary, Churachandpur District Bar Association in hun matna tawh kisai genlatna a nei a, Lunkhomang Khongsai, MPS, in-charge, SP leh Additional SP (Law & Order), Churachandpur in Law & Order and Case Investigation ti thupi nei in ziltilna hun a nei hi. Chief Guest Salam Imocha in Crime and Human Rights ti thupi nei in ziltilna hun a nei a, Songzamang Tawmbing, Advocate in hun matna khak in, kipakthu gennna tawh One Day Legal Awareness a zo ui. Zia Legal Awareness hun sung a chun, District Police, Lalpuithluaii Foundation School, Ebenezer Academy, New Lamka Upper Primary School, CCI Para Legal Volunteers, Henglep Police Station, SSPP Joint Headquarter, Lamka, VK Tawna High, Rebuilt & Restore, Rayburn NCC leh EBC apat palai hunkhawp a chiakhawm ui.

Hill District Badminton Championship 2018
CCpur, Oct. 10 *(Nisin Thuhiltu)* : Hill Districts Badminton Association, Manipur (HDBAM) in November 6 apat November 10, 2018 sung ah Community Hall, Hiangtam Lamka ah a 16-veina Hill District Badminton Championship 2018 kiti nei ding a hi. Badminton Championship zintun ding, Churachandpur District Badminton Association (CDBA) in tulai in Community Hall siamhawi thakna leh kisak lawkna a nei zing hi. Tournament ah Under 11 numei leh pawsal, single leh double, Under 15 numei leh pawsal, single leh double, Under 19 numei leh pawsal, single leh double, Men’s Open Single leh double, Women’s Open single leh double, Mixed Open double, 35 + veteran numei leh pawsal, single leh double, 40 + veteran numei leh pawsal, single leh double, 45 + veteran numei leh pawsal, single leh double, 50 + veteran numei leh pawsal, single leh double, 55 + veteran numei leh pawsal, single leh double, 60 + veteran numei leh pawsal, single leh double leh 65 + veteran numei leh pawsal, single leh double tite um ding, Match Commissioner ah PS Leltung Anal, former Secretary, HDBAM pang ding, Manipur Hill District apat Badminton kihelmi 600 vel chiakhawm ding ua ginchat a hi.

Pre- Recruitment Training te Admit Card piakdawna nei

CCpur, Oct. 10 *(Nisin Thuhiltu)* : Sixth Sikh Light Infantry (Khuga Battalion) in Indian Army kilakna ding tawh kisai ah Pre- Recruitment Training a piak teu, tuni, October 10, 2018 in Khuga Dam mun ah etthakna leh Admit Card piakdawna a nei hi. Zia hun a chun, Army Recruitment Rally um hun ah Physical Efficiency Test (PET) leh Medical Test nei ding dan gual in patepna a neisak ua zia nung a chun, Army Medical Officer te’n a taksau', a damtheina uh tawh kisai check bawlna a nei ua, Test bangkim a neizaw nung un, Recruitment taktak nei hun ah a pan theina ding ua Recruitment bawl ding te'n Admit Card issue a bawl uh, piakdawna leh thingpi dawnkhawmna a neipi ui. Tuni ah a patepna a neisak hun ua chun, candidate 436 a pang ui.
Army Recruitment Rally ahileh Peace ground, Tuibong, Churachandpur ah 15 - 23 October 2018 sung ah um ding, district wise ah Senapati & Kakching apat candidate te ding ah rally date 15 Oct 2018 hiding, Thoubal - 16 Oct 2018; Imphal East, Kangpokpi & Tamenglong - 17 Oct 2018; Imphal West, Ukhrul, Kamjong, Jribam, Tengnoupal, Pherzawl & Noney- 2018 Oct 2018 ; Bishnupur & Chandel- 19 Oct 2018 leh Churachandpur -20 Oct 2018 hiding a hi.

Zia hun a chu, candidates zosia'n online registration Admit Card, 8th class Marks Sheet & School Leaving Certificate duly countersigned by DEO/ZEO. Admit Card & 10thMark Sheet, 12th Mark Sheet, PRC, Domicile, Tribe/Caste Certificate issued from DC/ADC office. Character Certificate (issued within six months by Police Station/Gaon Boorah), Unmarried Certificate, NCC & Sports certificates (if applicable). Document zosia photocopy sets 02, 10 x colored passport size photograph le rally ah chawi uh ngai ding a hi.

Anngawl pauchapkhawmna nei
CCpur, Oct. 10 *(Nisin Thuhiltu)* : Ninevi Revival Crusade Ministries in tuni, October 10, 2018 in EBCC Mata ah zingkal dak 7 apat nitaklam dak 1:00 kikal in anngawl pauchapkhawmna a nei hi. Rev Thangzalun in zingkal dak 7 apat dak 8 kikal pauchapkhawmna amapui a, zingkallam dak 8 apat dak 9 kikal Miss Ngaihnem in mapui in, zingkallam dak 9 apat dak 10 kikal in Pastor G Thangsanglian local Pastor EBCC Bungmual in Pathian thugenna a nei hi. Zingkallam dak 10 apat dak 11 kikal in Dr Sialan mapuina nuai ah a chiakhawm te'n damlo-te a ding in pauchapna a nei ua, dak 11 apat dak 12 in Miss Nuamboi mapuina nuai ah pauchapkhawmna nei sunzawm in, sun dak 12 apat nitaklam dak 1:00 kikal in Pastor G Thangsanglian Local Pastor EBCC Bungmual in Pathian thugenna nei in, Local Chairman, EBCC Mata in pauchapna tawh hun khakna a siam hi.

Suangdoh TD block building kisa entha
CCpur, Oct. 10 *(Nisin Thuhiltu)* : Singngat Assembly constituency huapsung ah um Suangdoh khua ah TD block building kisa zing chu tuni, 10 October 2018 in bialtu MLA Ginsuanhau @ GS Haupu Chairman, MANIREDA leh a team ten etthakna a nei ui. Suangdoh TD Block building ahileh September 2018 a pat kisa pan a hia, tu dinmun ah a foundation zo in, a khuam ding siam in a um zing a, a bang ding chek le hunkhawp building kisakna mun ah muthei ding in a um hi. TD Block sakzaw a hitak leh block sung ah Suangdoh SDO/BDO office panna government office chuamchuam um ding, bank le um ding ti a hi.

AMSU in Union Home Minister kiang ah memorandum pia
Imphal, Oct. 10 *(Nisin Thuhiltu)* : All Manipur Students Union (AMSU) in Union Home Minister Rajnath Singh kiang ah memorandum piaklutna nei in, pro-VC K. Yugindro Singh a panmun a pat lakdaw ding leh Manipur University buaina a vaima theipen ah sukven ding in phutna a nei hi. Students leh teacher mat ah um te a vaima theipen ah a ziak leh zal bei ah thasuak ding, Manipur University a ding ah funding leh grants kituptak a um ding banah Vice Chancellor thak guat ding ti te phutna nei a hi. Zialo a chun, Myanmar leh India (Manipur) gamgi, Choro Khunou, Molcham Valley leh Hollenphai village etc ah border pillar te kituptak ah etzui ding a nawpthu taklang in, a chiatha zing, Naga political issue ah Government of India (GOI) leh NSCN (IM) kihona' North East a kiang ah Manipur panna a kisai khakpi zosia thuhiat masak a hiding ti phutna le a nei hi. Hiatthei khat chu, United Committee Manipur (UCM), All Manipur United Clubs Organisation(AMUCO), Coalition of Civil Societies, Kangleipak (CCSK) leh All ManipurStudents’ Union (AMSU) in civil society chuamchuam tawh kithua in Government of India chu August 3, 2015 ah Framework Agreement detail mipi muthei ding ah sulang ding in phutna a nei zing hi.

MUSA in police te gamtatna dem

Imphal, Oct. 10 *(Nisin Thuhiltu)* : Manipur University, departments chuamchuam ah student te'n tuni'n September 20, 2018 zan ah faculty members leh students mat ah um te thasuak ding phutna nei in University complex ah kiphinna a nei ua, zia chu police te'n phallo in police leh student te kal in kinawktuana a piang hi. Zia nung a chu, Police te'n University Boys Hostel ah um student 20 tuam man un a kigen hi. Manipur University Teachers Association (MUTA) leh Manipur University Staff Association (MUSA) in tuni'n Prof, I Tomba Singh, President, MUTA lamkaina nuai in, Joint emergency executive meeting a nei a, zia hun a chun, MU buaina tawh kisai genkhawmna nei in, MU campus ah kiphinna nei student te police te'n a mat uh chu nasatak in demna a bawl ui. Chun, mat ah um student 13 te a vaima theipen ah thusuak ding in le phutna a nei hi.

IED bomb supuak kha, UNLF cadre 2 thi
Imphal, Oct. 10 *(Nisin Thuhiltu)* : Indo-Myanmar border ah um, Molcham village, Tengnoupal district ah Seppatni a khah security forces te attack bawlna ding ah IED (Improvised Explosive Device) bomb a kam uh supuak kha, UNLF cadre 2 in thina tuak un a kigen a, police te'n zia gual thiltung chu confirm bawl ding ah panlakna a neizing lai un, United National Liberation Front (UNLF) thusuak in October 8, zingkallam dak 11:20 tuam ah 293 battalion, operational area ah a cadre uh pani in thina tuak un a taklang a, thina tuak cadre chu - 2nd Lt Wanglensana alias Shanjit (40) leh sgt Nameirakpam Leephaba alias Mahendra (28) of Manipur People’s Army (MPA), armed wing of UNLF a hidan uh le a taklang hi. Himaleh banggual ah thi a hiu a taklang puai.

Combined teams CDO-BPR in khamthei tawh mi 5 man

Bishnupur, Oct. 10 *(Nisin Thuhiltu)* : Combined teams CDO-BPR in Hav.Islamuddin mapuina leh Inspt. B. Lunthang Vaiphei OC-CDO -BPR command bawlna leh Hopson Sapam SP-Bishnupur District etzuina nuai in tuni'n Bishnupur Bazaar ah khamthei ah kivei mi pathum a mandawk hi. Mat ah um mi pathum te chu - Md. Ansar Ali (26) s/o (L) Md. Suleiman of Poubitek Maning Leikai; Md.Ramij Khan (26) s/o Md. Rahimuddin of Poubitek Maning Leikai leh Md.Waris Khan (20) s/o Md. Mujibur Rahaman of Poubitek Maning Leikai te a hiu. Zia ah mi pathum te apat a chun, 2400 WY tablets, packets 12 ah kichuun a mudawk ua, zia chu a sum ah Rs.3 lakhs manzo ding a hi. Chun, tuni ma ma'n, Combined teams CDO-BPR in Hav.Basanta Singh mapui, Inspt B.Lunthang Vaiphei OC-CDO -BPR command bawlna leh Ksh.Manihar Singh Addl SP-Ops supervise bawlna nuai in Kwakta ah primary health centre kiangnai'h Terakhongshangbi ah khamthei ah sumkawl vei mi 2 a mandawk ua, mat ah um te chu - Hemam Rojesh Singh (27) s/o Hemam Jugin Singh of Terakhongshangbi ward no. 2 leh Chesham Md. Boicha (29) s/o Md. Allauddin of Terakhongshangbi ward no.1 te a hiu. Amau apat a chun, WY tablets pieces 200 mudawk in, khamthei leh a mimat teu chu Moirang PS khut ah apawimaw dungzui ah legal action lak ding in a pedawk ui.

CDO-BPR in UNLF active cadre khat man

Bishnupur, Oct. 10 *(Nisin Thuhiltu)* : Combined teams CDO-BPR leh 6 Assam Rifles in Inspt B.Lunthang Vaiphei, OC-CDO-BPR command bawlna nuai in tuni'n Utlou Chanura Bazar ah UNLF active cadre khat a mandawk ui. Mat ah um chu Irengbam Premjit Singh @Gada @ Panalakpa (35) s/o (L) I Janeshwor Singh of Irengbam Makha Leikai a hi. Ama ahileh kum 2005 ah UNLF zawm, Myanmar ah training bawl hi'n a kigen a, MPA no.1943, 31st Batch hi ah taklat a hi. Chun, Nambol Police station ah a pawimaw dungzui ah legal action lak ding in a pedawk ui.

54 Bn BSF in Free Medical Camp bawl

CCpur, Oct. 10 *(Nisin Thuhiltu)* : Sector Head quarter BSF, Koirengei nuai ah 54 Bn BSF in tuni'n Bethesda Children Home, Churachandpur in Free Medical Camp a bawl hi. Zia hun a chun, Medical Officer leh supporting staff te'n nu-leh-pa neilo Bethesda Children Home ah um numei leh pawsal naupang 40 te damtheina et piak in a thawn in a kituakpi ding uh damdawi piakna a nei ui. Zia hun chu, M K T Simte, 21C of 54 Bn BSF in khuallian hina tawh a uap a, ama'n a thugenna a chun, Civic Action Program nuai ah Free Medical Camp bawl ah um a hidan gen in, BSF in Civic Action Program nuai ah waiting sheds sak, cycle stands, skill development leh khangthak leh school naupang te ding ah sports items piak ti te chiapi sek a hidan uh a gen hi. A langkhatlam ah BSF in ziagual panlakna a neina chung a chun, mipi te'n kipakthu a gen ui.

Minister Karam Shyam in Dr. Lamabam Literary Complex hawng

Imphal, Oct. 10 *(Nisin Thuhiltu)* : Minister, CAF & PD, Revenue, Karam Shyam in tuni'n Langthabal Kunja Mayai Leikai Community Hall ah Dr. Lamabam Kamal Singh Literary Complex a hawng hi. Dr. Lamabam Kamal Singh statue leh complex tuni ah kihawng chu ex Chief Minister O Ibobi hunlai ah kisiam pan hita, O Ibobi in Rs.10 lakhs a piak mang kisiam pan, a siamzawna ding ah Minister Karam Shyam in Rs 15 lakhs a tuakbe ti a hi. Minister Karam Shyam in a thugenna a chun, kum 35-36 sung Dr.Kamal in Manipuri literature a ding ah panlakna thupi tak nei a hidan gen in, Kamal min chiana diak, a thuzik thiam ziak hi'n a gen a, ama hiatzingna ding leh a panlakna te hiatzing theina ding ah Manipuri Poetry Day kimang sek ti'n a gen hi.Tuni ah kihawng ti gual Complex chu Chief Minister N Biren in freedom fighter Maharaj Nara Singh, Hirachandra & Maharaj Gambhir Singh te ding ah le siam ding ah lemsakna nei a hidan gen in, zia ding a chu Rs. 2 crores bithiat ah um in a gen a, Maharaj Nara Singh & Hirachandra statues feet 13 ah sang (height) ah kisiam ding ti'n a puang hi. Zia hun matna chu, Ningthoukhongjam Tombiraj, Chairman, Construction Committee, Dr. Lamabam Kamal Singh Literary Complex; Professor Rajen Toijamba, HOD, Manipuri Department, MU; Yaiskyl Khwairakpam, President, Patritic Writers’ Forum, Manipur and Yendrembam Ibopishak, President, Divine Life Club, Langthabal Kunja ten le a uap ui.

NPF sung ah kikhenna umlo hi ah Zeliang in gen

Kohima, Oct. 10 *(Nisin Thuhiltu)* : NDPP in opposition Naga Peoples Front (NPF) a pat legislator , the single largest in ruling PDA coalition zawm ding uh hi a gen chu thuzuau leh party sung ah kikhenna umlo hi’n Chief Minister lui T R Zeliang in a gen hi. political party in Nagaland, has dismissed NDPP claim that 14 NPF legislators are set to join the two allies of the ruling PDA coalition and said there was no division in the party. Nagaland ah ruling Peoples Democratic Alliance (PDA) hi Nationalist Democratic Progressive Party NDPP (17), BJP (12), JD(U) (1), National People's Party (NPP) (2) leh Independent khat a hia, NDPP MLA khat a mualliam ziak in house ah seat khat a awng in a um nalai phawt hi. NPF in 3rd Central Executive Council meeting a nei hun ah party leader Zeliang in a thugenna a chun, NPF legislator 26 lak ah 7 chiat in NDPP leh BJP zawm nuam ti ah NDPP gen chu thuzuau hi’n a gen a, NDPP mapui PDA government paithâk ding chung chang a chun, coalition government siam theina ding ah thupukna lakkhawm pawimaw a sak thu puang in, government kitup tak tundin thei ding ah ki muanngamna hawitak a um coalition government siam hilo ding in a gen hi.

BSF personnel khat in head constable khat kaplum
Karimganj (Assam), Oct. 10 *(Nisin Thuhiltu)* : Assam's Karimganj district Lakhipur Border Out Post (BOP) ah um, BSF constable khat in a service rifle tawh head constable khat kaplum in a dang khat a kap liam hi. lakhipur BOP ah posting, Constable Shiv Yogi Pandey in a company ua head constable 2 tawh kinial buai ziak in a chawi INSAS rifle chang 9 kapdawk in ziana chu HC Ashok Kumar a mun ah thi in, HC A R Pal nasatak in a liam hi. Pal a hileh tuhin Gauhati Medical College & Hospital ah etkawl a hi zing hi. Khutkhialtu Pandey a hileh a rifle chawi leh a magazine 2, banah wireless set khat tawh a zammang a, BSF leh security force dang te kithua in search operation a pan u’i.

Kawng bangkim ah NDA government lawsam: Luizinho Faleiro
Aizawl, Oct. 10 *(Nisin Thuhiltu)* : AICC general secretary leh northeast in charge Luizinho Faleiro in, Mizoram ah Congress in BJP te agenda – communal hatred, cultural divide leh religious persecution tite heikual ding a hina ah Indian politics a ding ah turning point khat hiding ti’n a gen hi. Aizawl Press Club ah Goa chief minister lui, Luizinho Faleiro in thuthak lakhawmte kiang ah a genna a chun, Centre ah vaihawm, National Democratic Alliance (NDA) kawng bangkim ah a lawsap ziak ah gamsung pumpi in nasatak ah thuak hi’n a gen a, gamsung economy leh rupee a niamkiak banah thautui man khang nasa mama in, unemployment leh farmer suicide nasatak ah kibelap a hi dan mipite’n hia chian mama uh hi’n le a gen hi. November 28 ah um ding assembly elections tawh kisai ah Mizoram pha, AICC general secretary in a genbena ah Prime Minister Narendra Modi policy te lawsam vek in, demonetization ziak ah black money nung mu umlo a hi dan a genlng hi. PM Modi kihuatna leh kidainna policy chu Congress in subei ding a hidan gen in, bang sakhua zui ding a hi BJP in a gen chu Congress in sutawp ding hi’n le a gen hi. BJP mapui, NEDA phudawktu lak ah MNF president Zoramthanga le pang a hidan genlang kawm in, MNF mangcha’ Meghalaya, Manipur leh Nagaland gual ah BJP ki control saklo ding in le Faleiro in Mizoram mipite a thumawp hi.

YMA in CADC lakdaw ding phût

Aizawl, Oct. 10 *(Nisin Thuhiltu)* : Mizoram sung mun chuam chuam ah tuni’n Chakma Autonomois District lakdaw ding phûtna’n mipi a sâng ah sim te’n rally a nei u’i. Young Mizo Association (YMA) mapuina nuai ah um zia rally hun ah lakdaw ding a phût uh CADC hi a hileh a chiata 1972 kum ah siam a la hi. Young Mizo Association (YMA) president Vanlalruata in, 1972 kum ah Centre in CADC a la siam hun ah Mizoram mipite dawng khalo in, tuhin zia Council chu Bangaldeshi infiltrator te a ding ah bitna mun suakta hi’n a gen hi. Bangladesh a pat mi a pemlut uh chu union government in le hechian mama himaleh Bangladesh a pat illegal immigrant, a diak ah Chakma Buddhist te a lut uh chu pha a sak uh hile kilawm ti’n le a gen hi.

Meghalaya in thautui man Rs 2.50 ah kiamsak di

Shillong, Oct. 10 *(Nisin Thuhiltu)* : Meghalaya cabinet in thautui man sukkiam ding ti ah proposal um chu tuni’n lemsakna a nei a, petrol leh diesel chu litre khat chung ah Rs. 2.50 chiat sukkiam ding a hina ah state in kumsin ah Rs. 15 crore tuam a sêng ngai ding a hi. Cabinet meeting zaw ah Deputy Chief Minister Prestone Tynsong in thuthak lakhawm te kiang ah a genna a chun, zing, October 11 a pat thautui man liter khat chung ah Rs. 2.50 chiat kiam ta ding hi ah thupukna siam a um a hidan a puang hi. Centre in a chiata October 4 a khan petrol leh diesel man Rs. 2.50 chiat ah kiamsak a hidan a la puang hi. A hinla, Tynsong in revenue generating departement – Excise, Registration & Taxation, Forest leh Mining department tite kiang ah tax a dawldaw uh sukpunna ding ngaitua ding ah hiatsakna nei ahidan a gen hi. National Games 2022 zintun ding chung chang a genna a chun, 50 acre gam ah multi-facility stadium khat sakna ding ah Union Ministry of Social Justice in Rs 300 crore sanction piak hi’n a gen a, zia na ding a chu sports department in panla zing in, November 5 tiang ah consultant, architect leh national games chief executive officer guatna sukfel vek gua hi’n a gen hi.

Rafale deal: SC in decision–making process pelut ding ah Centre thu pia

New Delhi, Oct. 10 *(Nisin Thuhiltu)* : Supreme Court in Centre kiang in October 29 tiang ah Rafale fighter jet deal chung chang ah a thupuk dan te uh tawh kisai kichian tak ah taklatna sealed cover ah pelut ding ah hiatsak kawm in, a man leh a van umdan te suklat ngailo ding hi’n a gen hi. Chief Justice Ranjan Gogoi leh Justice dang 2 – S.K. Kaul leh K.M. Joseph te panna Bench in Rafale deal chung tawh kisai petition ngaithakna a nei hun ua, petition ah nekgukna pang hi ah ngaw chu ngaitua hilo ding ti’n le a gen hi. UPA leh NDA hun ah Rafale fighter jet man etkâlna kichian tak ah court hiatsak ding ah petition hunkhawp a lut a, a hinla zia petition te chu Centre in nasatak ah nial in political mileage umsak ding tupna ziak mai ah ki file hi’n a gen a, zia chung chang chu national security tawh kisai kha a hina ah judicial tak ah review thei hilo ding ti’n Centre thasik ah kilâk, Attorney General K.K. Venugopal in a gen hi. Court in zia chung chang chu October 31 ah ngaithâk kit ding in huntiam a bawl hi.

Union Cabinet in MCVET ah Skill Development, Vocation Education body te gawmkhawp ding ah thupuk

New Delhi, Oct. 10 *(Nisin Thuhiltu)* : Union Cabinet in quality leh market relevance a hawi diak ding tupna’n skills development regulatory body, National Skill Development Agency (NSDA) leh National Council for Vocational Training (NCVT) te chu National Council for Vocational Education and Training (NCVET) ah gawpkhawm ding in tuni’n a thupuk hi. Phudaw thak a um NCVET in vocational education banah long-term leh short-term training sai entity chuam chuam te ensui ding a hia, NCVT leh NSDC te mawpuakna zosia a lak ding a hi. Council hi a hileh Chairperson in a mapui ding banah Executive leh Non-Executive Members um ding a hi.

Haley thatheng thei ding mi 5 teldaw aum: Trump
Washington, Oct. 10 *(Nisin Thuhiltu)* : US President Donald Trump in, US Ambassador to the United Nations ding ah Indian-American Nikki Haley tha theng thei ding mi 5 teldaw aum in zia lak a chun a deputy national security adviser lui Dina Powell le pang a hidan a gen hi. Kum 46 ah upa Haley in a hileh zani’n UN ah US palai hina a pat hai ding thu puandawna a nei a, zia a thupukna chu tamtak in lamdang sak thu a puang u’i. President Trump in thuthak lakawmte tawh a kihona khat ua Haley tha theng thei ding mi 5 te lak ah Powell miin bep a gen lang a, UN ah US palai thak ding hawlna ah Haley in kithuapi ding a hidan le a gen hi.

Chinese billionaire te lak ah Jack Ma hausapen
Beijing, Oct. 10 *(Nisin Thuhiltu)* : Hurun China Rich List 2018 dungzui in e-commerce gaint Alibaba founder Jack Ma in China ah mi hausapen hina a chang kit ta, ama leh a innsungmite nei leh go chu a kigawm ah USD 39 billion tuam a hizo a, Chinese property mogul sang ah hausa zaw a hikit tai. Kum 54 ah upa Ma in tha masa khan Alibaba executive chairman hina a pat hâi ding a hidan puandawna a nei a, kumkit September a pat Danile Zhang (46) in ama thasang ah Alibaba CEO panmun lua ta ding hi’n le a gen hi. 270 billion yuan (USD 39 billion) nei leh go tawh Jack ma te innsung kuan chu China ah hausapen in a pang ua, amau nuai ah Evergrande Chairman Xu Jiayin a pang hi. Xu hi a hausapen a la himaleh a nei leh go chu 40 billion yuan tuam ah kiamsuk in 250 billion yuan, (USD 36 billion) tuam a nei hi. 240 billion yuan (USD 34 billion) nei zo Chinese internet giant, Tencent Holdings founder, chairman leh CEO, Ma Huateng iin 3na a lua’i.