Nisin Thuhiltu – 10 October 2018

Union Textiles Minister Smriti Irani in Imphal ah Silk Expo and Workshop hawng

Imphal, Oct. 9 *(Nisin Thuhiltu)* : Department of Sericulture, Government of Manipur leh Central Silk Board, Ministry of Textiles, Government of India organized bawlna’ Manipur Sericulture Project Management Complex, Sangaipat, Imphal East District ah Union Textiles Minister Smriti Irani in tuni’n ni 3 sung um ding Silk Expo and Workshop on Silk Samagra kiti Chief Minister N. Biren Singh lehTextiles, Commerce and Industries Minister Th. Biswajit te uapna tawh a hawng hi.

Chief Minister in a thugenna a chun, Rs. 22 crore seng ah Eri Spinning Mill umsak hiding a hidan puang in, zia mill apat chu mi 2500 tuam in sepna neithei ding uh ti’n a gen a, Union Textiles Minister Smriti Irani in Silk Expo chu thanawppi mama hin a gen hi. Union Minister of Textiles, Smt. Smriti Irani in a thugenna a chun, Government of India in Manipur ah textile industry masawnna ding leh state sung ah puankhawng mite leh lo-bawl mite masawn theina ding ah panlak hiding in a gen a, Central Government in Manipur ah silk industry keklianna ding ah Rs. 22 crore seng ah Eri Spinning Mill umsak ding ah tunaicha approve bawl in a gen hi. Manipur ah puangkhawng mite income Mudra Yojana apat kibelap thei ding a hidan gen in, State Government chu puankhawng mite’n Mudra Yojana a phatchuampi theina ding ua panlakna kituptak nei ding in hiatsakna a bawl a, researches leh studies te mudaw dan ah puankhawng mite income Mudra Yojana apat 50 per cent kibelap zo in a gen hi.

Union Minister in a genzawm zelna a chun, Silk Samagra kiti Prime Minister Narendra Modi in silk sector sukhatna ding ah a chiapi a hidan gen in, zia chu lo-bawl mi leh puankhawng mi te masawnna ding hi’n a gen hi. Government of India in India gamsung ah nik leh puan siamdawna ding leh make-ups sector a ding ah Rs. 6000 crore package puang a hidan le a gen a, Prime Minister Narendra Modi mapuina nuai ah Government of India in North East Region Textile Promotion Scheme (NERTPS) le chiapi ah um, North East region, ah textile parks leh textile units chuamchuam chiapi hizing ti’n a gen hi. NERTPS chiapina chung ah NDA Government in Rs. 839 crore sengta hi’n a gen a, North East region ah textile lam ah khantona nasatak a um ding kinem in le a gen hi.

Zia hun matna a chun, Smriti Irani in DBT ah Integrated Sericulture Development Project (ISDP-Hills) beneficiary 322 te kiang in Rs. 1,73,97,200 hawpdawna le a nei a, zia sum chu Individual Adult Rearing House (IARH) sakna ding a hi. Chun, Silk Samagra Workshop booklet hawnna le a nei hi. Hun matna ahileh, Textiles Commerce and Industries Minister Th. Biswajit in le uap in thugenna a nei hi.

69th Territorial Army Day mang

Imphal, Oct. 9 *(Nisin Thuhiltu)* : Banquet Hall, 1st Manipur Rifles Battalion, Imphal ah tuni’n 69th Territorial Army Day mat in a um hi. Zia hun chu Chief Minister N. Biren Singh in khuallian hina tawh a uap a, ama’n a thugenna a chun, Territorial Army, Army leh Assam Rifles te’n gamsung a ding panlakna nasatak neizing a hidan uh gen in, Manipur ah Territorial Army Unit a um tawh kitawn ah mipi te ding ah bitna nasatak um in a gen a, Territorial Army, security forces te panlakna ziak ah local mite thamuang tak ah khawsa thei ti’n a gen hi.Territorial Army in chamna leh muanna a um theina ding ah panlakna a nei zing uh pakcha mama in le a gen hi. Zia hun matna chu Minister for CAF&PD Karam Shyam leh Minister for Education Th. Radheshyam, Minister for TA & Hills N. Kayasii, Chairman MANIDCO Dr. Y. Radheshyam, MLAs S. Bira Singh, L. Susindro, Chief Secretary, DGP, GOC, 57 Mountain Division, Major General VK Mishra, IGAR(South) Major General KP Singh, top civil leh police officers, 165 Infantry Battalion(Territorial Army) officer leh insungmi tamtak te’n le a uap ui.

Muivah in hospital nusia ta
Kohima, Oct. 9 *(Nisin Thuhiltu)* : Damlona ziak ah New Delhi ah private hospital khat ah etkawl ah um NSCN (I-M) kilonser, Th. Muivah chu hospital apat discharged hita hi’n a kigen a, Nagaland Post in confirmed a bawl hi. Muivah ahileh October 1 ah damlona ziak ah hospital tut ah um, Intensive Care Unit (ICU) ah etkawl ah a la um a hi.

Police Inspector 90, MPS Grade II ah kaisang
CCpur, Oct. 9 *(Nisin Thuhiltu)* : Under Secretary (DP) Government of Manipur in Governor min ah promotion order a suana a chun, Manipur Police department nuai ah sem Inspector (Male/Legal/Female/MT)/ Sunedar-major/Subedar 90 te Manipur Police Service Rule 1965 tawh kituak ah Manipur Police Service Grade II ah promotion piak a hidan uh a taklang hi. Inspector (Male/Legal/Female/MT)/Sunedar-major/Subedar 90 promotion muthak lak a chun, Scheduled Tribes (ST) 24 a pang ua, amau chu - 1.Suomtinthang Gante, 2.Thongthang Malun, 3.Thangpi Zenchingthang, 4. Sangyo Muivah, 5. Sekho Dingthoi Letlem, 6. Ph. Abonmei, 7. T.S. Chamna Anal, 8. Keishing Vareishing Tangkhul, 9. S Thangjom, 10. Khupkhansuan Paite, 11. Thangkhojang Kuki, 12. P. K Muana Vaiphei, 13. L Sheimang Khongsai, 14. Kh. James Simthar, 15. Gaithoilung Longmei, 16. Lenshoong haokip, 17. Songlianthang Vaiphei, 18. AS Masongam Shimray, 19. K Ashon Kom, 20. Pamneingam Longpinao, 21. G Agin Kabui, 22. Th. Sanli Mao, 23. Golamthang Hatzaw leh 24. David Kilong te a hiu.

YVA Haopi Block umsak ding ah lemsakna nei

CCpur, Oct.9 *(Nisin Thuhiltu)* : Young Vaiphei Association (YVA)-GHQ mapuina nuai ah tuzingkal dak 7:00 in S. Munnuam hausa inn ah YVA block thak siamdawna ding tawh kisai genkhawmna um in, YVA unit chuamchuam ah cabinet member-te tawh hunchawmkhat sung genkhawmna a nei nung un, YVA Block thak siamdaw ding in lemsakna a nei ui. Zia chu tawh kitawn in Block min ding ah YVA Haopi Block sak ding in lemsakna a nei bawk ui. Vungminthang, President, YVA-GHQ in meeting hun mapui in, Thanglalsiam, General Secretary, YVA-GHQ meeting tawh kisai genlatna a nei a, block centre ding ah Tangmual hiding ti a hi. Chuleh, Oct 23, 2018 leh Tangmual khua ah block thak official ah nei ding ah lemsakna nei un a kigen hi. Zia meeting a chun, YVA Mata Unit, YVA Buallian Unit, YVA Tangmual-Leikot Unit, YVA Tuikham Unit, YVA Sumtukphai Unit leh YVA S.Munnuam Unit panna unit chuamchuam ah palai te pang un le a kigen hi.

Annual Sports Week 2018 hawng
CCpur, Oct. 9 *(Nisin Thuhiltu)* : Vimala Raina Government High School in Annual Sports Week 2018 amat ding uh tuni, October 9, 2018 zingkallam dak 10:00 in Shyam Lal Poonia, IAS, Deputy Commissioner, Churachandpur in Chief Guest hina tawh uap in a hawng hi. Thanglianlal, Headmaster, Vimala Raina Government High School in hun matna amapui a, student-te house chuamchuam a kikhen in march past a nei ua, Chief Guest Shyam Lal in student-te apat salute lakna nei in, Student lak a head boy leh head girl in school huangsung ah meisel taipi in, Chief Guest in meisel detna nei in thugenna a nei hi. Vimala Rina Government High School ahileh tu ah teaching staff 30 leh non-teaching staff 5 etkawlna nuai ah student 735 umna a hi.
A langkhatlam ah Singngat Government High School in le tuni, October 9, 2018 zingkallam dak 10:00 in amau school playground ah Annual School Sports 2018 hawndawna hun a nei hi. Zia hun chu, Irungbam Julius Singh, SDC Singngat in Chief Guest hina tawh a uap a, Sports hawndawna ding ah Students Captain Mungsanglian leh Assistant Captain Nemhoithem te’n Torch taipi in, Chief Guest in sports hawnna leh sports meisel halna a nei hi. Zia nung a chu, Chief Guest in thugenna nei in nasatak ah zilna lam ah panla chiat ding in tilkhona a nei hi.

District Malaria Deptt. in meeting nei
CCpur, Oct. 9 *(Nisin Thuhiltu)* : District Malaria Officer (DMO), Churachandpur leh Pherzawl District mapuina' tuni, October 9, 2018 zingkallam dak 11:00 in CMO Conference Hall ah meeting a um hi. Meeting hun ah District Malaria Office nuai ah Male Health Supervisor (MHS), Multi-Purpose Worker (MPW), Male Health Worker (MHW) leh Field Worker (FW) ti te a pang ua, Worker te’n Field Visit a bawlna uh tawh kisai Report piakna nei in, Dr. Phirthanglien Buhril, DMO, Churachandpur leh Pherzawl, S. Thangthianmuan, Consultant, NVBDCP leh Zenngaihlun, District Program Manager, NHM Churachanpur te’n ziltilna hun a nei ui. Meeting hun ah thisan test bawlna ding ah slide collection sukhatna ding, PHC/CHC leh PHSC a stock etkhawmna, ASHA Incentive Payment tawh kisai, Report piak tawh kisai banah HealthWorker-te nasep etkhawmna leh maban panlak dan ding genkhawmna a nei ui.

Accident ah thina thu kiholem

CCpur, Oct. 9 *(Nisin Thuhiltu)* : DTO opposite, Tedim Road ah zani, 8th October, 2018 nitaklam dak 4:30 vel ah gari accident ziak ah thina tuak Saithangvung Hramgchal (31) s/o Hrangchal Sharon of Saikot Home luang District Morgue apat vui ding ah tuni'n puakdaw in a um hi. Tuaksiatna tawh kisai ah Shaktiman neitu te tawh thina tuak insung mite'n 8th October, 2018 zan ah kihona nei in, luangman lakh 4, bike thak a chawk piak ding uh, bike ah a ki puakpi leh liamna tuak Lallawmum (44) s/o Chawithang of New Saikot ki-etkawlna sen leh so um te a piak ding uh, luangman lakh 4 ahileh October 9, 2018 zingkallam dak 11 ah a piak ding uh ti ah kiho lemna a la nei dungzui ua, Saktiman neitu ten tuni, October 9, 2018 zingkallam dak 11 ah lakh 4 chawi ah, kikhona mun ding a hun tak ah a tun ziak un, thina tuak insungmi te'n vangsiatna tuak gel ti'n lakh 1 a nung piak kit ua, bike thak chawk ding ah kihona masa a gen uh le chawk taklo ding, liamna tuak Lalrammawi etkawlna sen leh so um te le Saktiman nei ten a bawzui taklo ding un kiholemna a nei ui. Kiholemna a nei uh tawh kitawn ah police case le a withdraw ngal ua, accident tawh kisai genfel a hitak tawh kitawn ah Hmar Youth Association HYA Tuithaphai Joint headquarter mapuina' District Hospital Morgue apat Saithangvung Luang vui ding ah puakdaw ah um a hi.

NT 10oct2018b

Sikpuiruoi matna leh Sinlung Hills Council lawpna nei ding
CCpur, Oct. 9 *(Nisin Thuhiltu)* : Organizing Committee, The First Pherzawl District Level Sikpuiruoi-cum-Sinlung Hills Council (SHC) ding tawh kisai in tuni, October 9, 2018 sun dak 12:00 in Ramsangthang Infimate, Co-Convener leh Chief of Pherzawl chenna inn, Rengkai ah genkhawmna a um hi. Genkhawm ahi dungzui in The First Pherzawl District Level Sikpuiruoi-cum-Sinlung Hills Council lawpna December 4 leh December 5, 2018 ah Pherzaw District Headquarter, Pherzawl khua ah sun-le-zan ah mat ding ah lemsakna nei in, mawpuakna chuamchuam tuk ding tawh kisai le guat felna a nei ui. Sikpuiruoi-cum-Sinlung Hills Council (SHC) lawpna nei hun ah Sikpui Laam, Sikpuiruoi Annkuang luina leh pi-le-pu chawndan suklatna' um ding, Manipur leh Mizoram apat lathiam chuamchuam te'n le uap ding uh hin a kigen hi.

TCP/ CCpur in Helmet check

CCpur, Oct. 9 *(Nisin Thuhiltu)* : District sung ah Traffic etkawlna lam ah mawpuatu Traffic Control Police (TCP), Churachandpur in tuni, October 9, 2018 in Police Station mai ah helmet drive bawlna a nei a, helmet khuklo ah garineu (two-wheeler) tawl tamtak man in a liausak hi. Helmet drive hun in diesel auto khat panna, traffic rule zui diklo gari neu tawl mi 36 man in, a sum in Rs 2, 000 a mudawk zo ui. Helmet drive chu tunung ah le Traffic Control Police (TCP), Churachandpur in chiapi zawm zel ding ti'n a kigen hi.

BADP Scheme chiapidan chung ahh lung-awilo thu taklang
CCpur, Oct. 9 *(Nisin Thuhiltu)* : Zomi Chief Association (ZCA) General Headquarter in Border Area Development Program (BADP) tawh kisai ah Government in Order chuamchuam te chungchang in tuni, October 9, 2018 nitaklam dak 1:00 in thuthak lakhawm mite kiang in thil umdan leh a lung awilo nau a taklang hi. Khamkhohau Guite, Secretary, ZCA in thil umdan a genna a chun, Manipur Government in December 20, 2012 ni ah Order a sua dungzui ah BADP nasepna, Ukhrul, Churachandpur leh Chandel district ah Village Panchayat/Authority implement a bawl ding ti a hidan gen in, Order sua ah um chu July 18, 2017 ah kisiam thak, BADP scheme nuai ah nasep ding zosia Rs. Lakh 5 tiang Village Authority in a septhei ding, zia masang a chu Rs. Lakh 20 tiang Village Authority in implement thei ti'n a gen hi. Deputy Commissioner, Churachandpur in November 29, 2017 ni ah Order dang sua kitna' BADP Scheme nuai ah nasepna approved leh sanctioned zosia hausa in a gam “Gift Deed” ding ah a piak, SDO/BDO tawh a sep ding ua Order ah taklat ah um, zia tawh kisai a chu, Border Area Development Program chiapi ah a umna' Ukhrul, Churachandpur leh Chandel a hausate lung-awilo ah All Manipur Border Area Development Association (AMBADA) kiti phutdawk uh tin a gen hi. AMBADA in February 28, 2018 ah Government kiang ah Legal Notice pia', Director, Ministry of Home Affairs, Departmet of Border Management, Government of India in Chief Secretary, Government of Manipur kiang ah dawnhuna peding aah hiatsak maleh tuni tiang ah bangma dawnhuna umlo in a gen hi. Zialo a chu, Zomi Chief Association leh Kuki Chief Association, Churachadpur in Tender sua ah um te October 1, 2018 ni ah Deputy Commissioner, Churachandpur kimupi ah zukkit ding ah dawtna siam a demand uh sukpitin piak ahiloleh a thuneina gam uh humbit chiat ding ah thupukna siam un a gen hi. Chuleh, December 20, 2012 ni ah Order sua ah um BADP nasepna, Ukhrul, Churachandpur leh Chandel district ah Village Panchayat/Authority in a sukpitin ding uh kiti chiapi kit ahimasia BADP Scheme tawh kisai ah nasepn dodal ding uh ti'n a gen hi.

Meithal leh meichang mudawk

CCpur, Oct. 9 *(Nisin Thuhiltu)* : 26 Assam Rifles leh Thoubal CDO te'n tuni'n Thoubal District, Nongpok Sekmai Police station huapsung in meichang chang 1200 tuam tawh M16 Rifle leh HK Rifle kisel a mudawk ui. Himaleh zia thu ziak tiang ah kua te galvan a hi genlat in a um pua, zia tawh kisai a chu mi mat a nei leh neilo uh hiat a hi puai.