Nisin Thuhiltu – 26 September 2018

Kihona nei ah buaina sukven thei: CM

Imphal, Sept. 25 *(Nisin Thuhiltu)* : Chief Minister N. Biren Singh in tuni'n Utlou Bishnupur district ah Pandit Deen Dayal Upadhyay Institute of Agricultural Sciences, Main Building Complex hawnna a nei hi. Chief Guest hina tawh a thugenna a chun, buaina chuamchuam um te kihona apat sukven thei a hidan gen in, Manipur University buaina chung ah a kisaikhakpi te leh student te table ah buaina genkhawmna ding lunggel nei ding in chialna a bawl hi. Bandhs leh general strikes kiti'n state sung ah mipi te hinkhua matdan chawkbuai in a gen a, zia bep chu hilo ah khawvel mun dang, gam dang ah mite hiat ah Manipur minsiatna hisek in a gen hi. State sung ah mi khenkhat ahiloleh pawl khenkhat phatchuamna ding mai ah kuama state sung ah bandh culture support bawllo ding in le mipi te chialna a bawl a, bandhs leh general strikes phatlona hiatdaw hun hita ti'n a gen hi. Bandhs, general strikes leh thil chuamchuam ah student te diklo tak ah a kimat sekna le mipi'n tangko pawimaw in le a gen hi.

State mipi ten tuhun ah good governance mu a hidan uh gen in, government kiti mipi te a' hi'n a gen a, government in state sung ah police-public relationship a siamhawi tak banah state government in a phalam ah kisanna a um theina ding ah panlakna a nei te mipi'n support a bawl ding a nawp thu a gen hi. Tu ah state government in state sung ah a phalam ah kisanna neita a hidan gen in, NABARD, in a chiata tha 18 sung ah economic lam ah masawnna um ah mu a hidan gen in, economic activities 10 percent apat 200 percent ah kibelap zo ti'n a gen hi.

Chief Minister in a genzawm zelna a chun, ‘Go to Village’ (GTV) mission chiapi ah a umna chung ah government services chuamchuam um te mipi te innkawt tiang ah tunsak ah um in a gen a, census villages 2660 um lak ah ‘Go to Village’ (GTV) mission in villages 1600 covered ta ti'n a gen hi. Kikawmtuana lam ah a lemchangzaw ding gelna Helicopter services kipanta hin le a gen a, Imphal leh New Delhi kikal ah direct flight service le umsak hita ti'n a gen hi.

Former Union Minister, Government of India Th. Chaoba Singh, Chairman Manipur Pollution Control Board L. Radhakishore, Chairman Tourism Corporation of Manipur Dr. Sapam Ranjan, Chairman PDA T. Robindro Singh, Director, PDDUIAS Dr. R.K. Imotomba Singh te'n le zia hun matna chu a uap ui.
*Nisin Thuhiltu*

Mission Team khat in NERCORMP nuai ah nasepna entha

CCpur, Sept. 25 *(Nisin Thuhiltu)* : North Eastern Region Community Resource Management Proiect for Upland Areas (NERCORMP), Phase III, North Eastern Council, Flagship Project, Ministry of Development of North Eastern Region, Govt. of India nuai ah NERCORMP, Churachandpur in Project a chiapina mun leh a chiapidan tawh kisai Mission Team khat in tuni, 25th September 2018 in etthakna a nei ui. Official team member te ahiuleh - Dr. V.T. Darlong, Team Leader cum Livelihood Specialist; Mr. Amba Jamir, NRM Specialist; Ms. Salome Yasudas, Gender & Institution Specialist; Mr. Ashim Kumar Das, Enterprise Development & Marketing Specialist leh Mr. KajalChakraborty, Financial Management Specialist te ahiu a, Manipur ah official Mr. Adrian Marbaniang, Director (M&E) leh Mr. HB Rocky Anal, Director (FIFS) te'n le a zui ui. Official team in D Khuala Vaiphei, Project Director, NERCORMP, Churachandpur kaihuaina nuai in, Tuilumjang, Henglep Block leh Khoirengtak Khuman, Samulamlan Block ah Project chiapi ah um te etthakna nei in, project beneficiary te, NaRM-Gs leh SHGs banah SHG Federation & NaRM-G Cluster Association leaders te holimna a neipiu a, NaRM-Gs leh SHGs te'n stall chuamchuam hawng in NERCORMP Project nuai ah thil chuamchuam a siamdaw uh leh a khutsuak uh a kawi teu le etthakna a nei ui. Mission Team in Project beneficiary te, NaRM-Gs leh SHGs leader te panlakna pakchatthu a gen ua, panlakna a neizawm zel ding un tilkhona a nei bawk ui. Mission Team in 26th September 2018 ah le Sangaikot Block nuai ah T Lamlai leh H Makhao Village ah Project a chiapina mun leh a chiapidan tawh kisai etthakna neizawm ding uh hi'n a kigen a, zialo a chu Churachandpur Deputy Commissioner (DC) office ah Project DLO banah PNGO te meeting neipi ding uh hi'n le a kigen hi. *Nisin Thuhiltu*

NT 26Sep2018a

MU buaina thu ah dakkal 48 sung general strike puang
Imphal, Sept. 24 *(Nisin Thuhiltu)* : Manipur University campus ah security personnel te'n students leh faculty member te 20th September 2018 zan ah amat banua Sajiva Jail ah kawi ah a umna chung un, joint students - AMSU, MSF, KSA, SUK, DESAM, AIMS in dakkal 48 sung general strike bawl ding in a puang hi. AMSU President, Manjit Sarangthem in DM college campus ah a head office ua thuthak lakhawm mite kiang ah press conference ah a genna a chun, students group in September 26 zan apat September 28, 2018 zan tiang ah dakkal 48 sung general strike bawl ding a hidan uh gen in, Manipur University ah kiphinna May 30 ah kipan, ni 85 zaw ah a kisaipi Ministry te hiatpina tawh Manipur University community leh state government in August 16, 2018 ah Memorandum of Agreement (MoA) suai a kai tawh kitawn ah ngaina gual ah Manipur University umkitta ti'n a gen a, himaleh 20th leh 21st September 2018 zan ah students leh faculty member te chung ah surgical strike kibawl chu thil dawi umlo tak, buaina sosan sak leh student te ngaituana banah lungthim subuai ti'n a gen hi. Zia gual nasep thilbawl chu joint students body in nasatak ah demna a bawl a hidan taklang kawm in, MOA kal in le a gen hi. Chuleh, teacher 6 suspend kibawlna leh student 7 mat ah a um banua student 2 police custody kikawi chu nasatak ah demna bawl in, MU ah buaina thiltung chu khawvel ah buaina huaisiapen suak in a gen hi. Alangkhatlam ah dakkal 48 sung general strike a puan un, essential services huamsak hilo ding in a gen a, schools leh colleges banah mipi te support bawl chiat ding in a chial hi. Zia ah press conference chu MSF, KSA, SUK, DESAM, AIMS palai te'n le a uap ui. *Nisin Thuhiltu*

ADC Chandel Chairman paithak ah um; mi 3 in haina siam
Imphal, Sept. 25 *(Nisin Thuhiltu)* : Autonomous District Council (ADC), Chandel ah Chairman Lhukhosei Zou alias Shesei Zou (51) chu Autonomous District Council, Chandel in September 24 ah meeting a nei hun ah lemsakna a nei dungzui ah a panmun apat paithak in a um hi. Athem Muivah, Secretary (TA and Hills), government of Manipur in governor min in ADC/ Chandel Chairman paithak ah a umna tawh kisai a chun order a sua bawk hi. Lhukhosei Zou ahileh mi 7 tawh June 19, 2018 zan ah khamthei Rs. 27 crore man ding tawh Narcotic and Affairs of Border (NAB) police leh Imphal West district police in ala mat uh a hia, a chung ah case U/S 22 (b), 21(c), 25, 29, 60 (3) of NDPS F and FIR No. 43 (60 2018 NAB-PS) ah tepte ah um, council funds diklo tak ah mang leh criminal activity chiapi ti ah thiamlo chan ah um a hi. A langkhatlam ah president, BJP Manipur Pradesh, K. Bhabananda Singh in party constitution nuai ah discipline tawh kituaklo ah a um ziak ah September 21, 2018 ah Th. Joy Lamkang, Vice Chairman, ADC/ Chandel ah suspend a bawl tawh kitawn in, Th. Joy Lamkang in BJP party primary membership hina a pat in haina a siam a, advisor to chairman ADC-Chandel, Ch. Meshil Maring leh member, ADC- Chandel, M. Morungson Maring te'n le BJP party primary membership hina a pat in haina a siam ui. *Nisin Thuhiltu*

Routine Immunization tawh kisai Review Meeting leh Re-orientation Training nei
CCpur, Sept. 25 *(Nisin Thuhiltu)* : District Family Welfare Officer (DFWO), Churachandpur in tuni, September 25, 2018 zingkallam dak 11:00 in DFWO Conference Hall ah Town Area ah Routine Immunization tawh kisai Review Meeting leh Re-orientation Training on Tracking Bag kiti a nei hi. S. Chinkhanjam, District Media & Extension Officer in meeting amapui a, Town Area ah Routine Immunization chiapi ANM te'n meeting a uap ui. Dr. Jamthianlal, DFWO in zia meeting a chun, Routine Immunization tawh kisai etkitna leh ziltilna a nei a, V. Pauminlun, District Vaccine Store Manager (DVSM) in Re-orientation of Tracking Bag tawh kisai ah ziltilna nei in, Vanlalven Langel, Vaccine Cold Chain Manager (VCCM) in le ziltilna hun a nei hi. *Nisin Thuhiltu*

A Talk on Cyber Awareness kiti nei

CCpur, Sept. 25 *(Nisin Thuhiltu)* : CCpur district sung ah private school-te kikhai khawmna lianpen CCpur District Private School Association CDPSA in Harper Collins kiithuapina leh VK Tawna High intekna nuai in tuni zingkallam dak 9 apat sun dak 12:00 kikal in VK Tawna High Auditorium, Vengnuam New Lamka ah "A Talk on Cyber Awareness" kiti a nei hi. Zia hun chu District sung ah school chuamchuam apat Principal, headmaster/headmistress banah CCpur Police Department apat rank officer-te a pang ua, Awareness hun ah Rakshit Tandon in Cyber tawh kisai ah ziltilna a nei hi. Rakshit Tandon ahileh Cyber Security Expert banah Internet And Mobile Association of India ah Consultant hi'n a kigen hi. *Nisin Thuhiltu*

Training on IPPI Microplan 2018 nei
CCpur, Sept. 25 *(Nisin Thuhiltu)* : District Family Welfare Officer DFWO, CCpur in tuni, September 25, 2018 nitaklam dak 1 in DFWO Conference Hall, District Hospital ah Training on IPPI Microplan 2018 kiti a nei hi. Zia hun a chun, District sung ah CHC leh PHC a Medical Officer MO Incharge, District Program Management Unit banah block program management Unit-te a pang ua, S Chinkhanzam, District Media and Extension officer, DFWO, CCpur in hun matna mapui in, Zenngaihlun, District Program Manager DPM in vaidawnna leh training bawl ah a umna ziak gen in, Dr J Songokham Samte, Chief Medical Officer CMO CCpur in Training on IPPI Microplan 2018 hawndawna leh thugenna a nei hi. Training hun sung in Dr Liankhozam Guite, Chief Medical Officer CMO Pherzawl in thugenna a nei banah Panthoi Ninggombam, Computer Operator in Microplan tawh kisai in ziltilna a nei a, Seiboi Mate, District Data Manager DDM in reporting system tawh kisai ah ziltilna nei in, Dr V Jamthianlal, District Family Welfare Officer DFWO, CCpur in discussion hun mapui in, training a zo ui. *Nisin Thuhiltu*

Joint Secretary mawpuakna tuk ding
CCpur, Sept. 25 *(Nisin Thuhiltu)* : India government in 1995 Batch India Forest Service IFS Officer 6 Joint Secretary tuk ding ah order a suana a chun, IFS Officer Manipur thingtangmi khat a pang hi. IFS Officer thingtangmi Joint Secretary mawpuakna tuk ding ah kaisang ahileh N Sonzalian a hi. Mi dan5 te ahiuleh Jammu and Kashmir apat Brij Nohan Sharma, Uttar Pradesh apat Sushant Sharma, Deepark kumar leh Ashish Tiwari te hiu ah hiat a hi. *Nisin Thuhiltu*

(L) L. Seikhothang Kom Memorial Tournament khakna nei

CCpur, Sept. 25 *(Nisin Thuhiltu)* : Lower Kom Keirap Baptist Youth Society saina' (L) L. Seikhothang Kom Memorial 9 Men Open Knock-Out Football Tournament khakna leh final match tuni, September 25, 2018 nitaklam dak 1:30 in Lower Kom Keirap Playground in a um hi. Zia hun chu Yumnum Khemchand Singh, Speaker, Manipur Legislative Assembly in Chief Guest hina tawh uap in, T. Robindro Singh, Chairman, PDS, MLA 28 Thanga Assembly Constituency in Functional President hina tawh a uap a, Seilenmang Khongsai, MDC, Langngamba, Social Worker, Michael Dangmei, President, ST Morcha, Manipur State, L. Minabanta Singh, Social Worker leh Kh. Jiban Singh, Social Worker te’n Guest of Honor hina tawh a uap ui. Hun mat sung in, Raengdailuang Women Society apat namlaam suklatna um in, L. Akhup Kom, Advisor to MC Mary Kom apat thugenna a um a, Ashung Kom, Chairman, Village Authority, Guest te pat thugenna um in, Chief Guest in final match kick-off bawl in, final match ah KPFC (Kha-Potsangbam FC) leh JJFC (Chothe FC) te a kihel ui.(L) L. Seikhothang Kom Memorial 9 Men Open Knock-Out Football Tournament ah Team 36 a pang ua, winner team in JJFC (Chothe FC) a pang a, Rs. 50,000, Trophy leh Medal a sang hi. Chief Guest Yumnum Khemchand Singh a thugenna a chun, kumkit April tha vel ah hawndaw thei ding ah, Khelo India scheme nuai ah Crore 3.5 vel mang ah Lower Kom Keirap Playground keklian dingdan ngaitua hiding, zialo a chu local MDC leh MLA fund ah le playground siamhawi thei hi'n a gen hi. *Nisin Thuhiltu*

Headquarter Veng VA mapuina' kiphinna nei

CCpur, Sept. 25 *(Nisin Thuhiltu)* : Headquarter Veng Village Authority mapuina' tuni, September 25, 2018 zingkal dak 7:00 in vengsung mipi’n vengsung a khawthak, K. Monnaphai dawilo suklatna'n lampi zui in, Machet Order sua ah um cancel ding in DC chenna inn in kiphinna a nei ui. Lampi zuite ahiuleh Headquarter Veng Community Hall ah kingakkhawm in, IB Road zui in DC Bungalow tiang placard chuamchuam chawi in lampi zuina a nei ua, khawsungmi, pau chuamchuam mang te'n a lung awilo thu thuthak lakhawm mite kiang in a gen ui. Nialkhogin, Tongkhodou, Vahhling leh Hauthianmuan te’n SDO Tuibong in Tuinom nuai ah khawphel (Machet) khat hiding leh Saikot Sub-Division huapsung ah um ding ah Machet Order a sua, DC Churachandpur in cancel a bawllo a, bang hem ti ah thil dawi umlo a um leh khawsung lawiupa te leh Village Authority in mawpuakna neilo ding, district administration in maw a puak ding ti'n a gen ui. Headquarter Veng Village Authority in vengsung ah khua thak K. Monnaphai siamdaw ding dawilo ah kum 2012 apat panla, Objection tam veitak DC kiang ah pelut un a kigen a, DC, Jacintha Lazarus hun lai ah spot enquiry bawl ah Thangjang, Chief of Tuinom in bawlkhial a hidan genkawm ah ngaidam dawn ti'n Village Authority Chairman in a gen hi. Headquarter Veng Village Authority in Machet Order cancel theina ding ah Enquiry report leh land record apat K. Monnaphai chu 104-Lanva Tampak, surveyed map ah um in le a gen a, a huam khak sung ah cheng innkuan 65 val in a khua thak ah a um ding uh dawilo suklatna suai kai ah DC kiang ah le pelut, K. Monnaphai huapsung ah Headquarter Veng Thanmual leh Playground, YVA Thanmual leh KKL thanmual ti te huap in le a taklang ui. K. Monnaphai Machet Order ahileh SDO Tuibong in September 2, 2016 ah a suadaw, zia khua min a chu tamtak in kum 2012 apat Job Card benefit mu ta uh ti'n le a kigen hi. Vengsung mipi kipunkhawm te'n DC zingkal pawl a inn alut ding phallo in numei pawl in a nang ua, hun bangchan a hem sung a nan nung un, DC in Village Authority lawiupa te kihona neipi in, a chenna inn in a kiho ua, zia nung a chun Vengsung thanmual leh Playground ti te etthakna a neipi hi. *Nisin Thuhiltu*

Huidrom Vikramjit in Congress zawm
Imphal, Sept. 25, 2018 *(Nisin Thuhiltu)* : Industrialist leh social worker Huidrom Vikramjit in Congress a zawp tawh kitawn in Gaikhangam, former Deputy Chief Minister, Manipur in tuni'n Vikramjit chenna inn Wangkhei ah a laklutna a nei hi. Gaikhangam in a thugenna a chuun, a gen leh a sep thua Huidrom Vikramjit in political party luipen Congress a zawp chu tepte thei thil a hidan gen in, State leh centre ah BJP government in a thu mai ah nasep chiapi in a gen a, BJP ideology dawi umlo a hidan gen in, Manipur University ah security personnel te'n student te attack a bawl uh chu Tiananmen Square, Beijing ah student te attack kibawlna sang ah danger zaw ti'n a gen hi. BJP in scheme a puandaw te bawzuina umlo, action plans bangma umlo in le a gen a, naupang te muamthum kipia tawh kibai mai ah nasem ti'n a gen hi. Zia ah hun matna chu RK Anand Spokesperson, Congress, Ph Guneshwar Sharma, President, Yaiskul Block Congress leh various frontal organisations chuamchuam ah leaders te'n le a um ui.
*Nisin Thuhiltu*

PLA in 40th Rising Day mang

Imphal, Sept. 25 *(Nisin Thuhiltu)* : Roben Khuman, Secretary Publicity, Revolutionary People’s Front in tuni ah thusua a bawlna a chun, People’s Liberation Army (PLA) in General Headquarters, Tactical Command, Strategic Command, 252 Mobile Battalion centre ah 40th Rising Day mang a hidan uh a taklang hi. Zia hun matna chu Unit, Department, Station chuamchuam ah Central Bureau, SR-1, SR-2, SR-3, SR-4 te'n le uap a hidan uh taklang in, ULFA (I), Assistance Publicity Secretary Arunodoy Asom in Chief Guest hina tawh hun matna uap ti a hi.
*Nisin Thuhiltu*

Galvan tawh NSCN(K) cadre 3 kiman

Imphal, Sept. 25 *(Nisin Thuhiltu)* : Kadamtala Battalion, Assam Rifles in New Kaiphundai area, Tamenglong district ah galvan hawi taktak tawh NSCN (K) cadre 3 a mandawk ua, mat ah um te chu sum demand piaklo ziak ah truck driver kidnapping bawlna kigawl hiu ah taklat in a um hi. NH-37, Makru Bridge kiangnai ah truck driver sawisak leh suk launa ding ah meithal a kapging a hidan uh a hiat uh tawh kitawn ahAssam Rifles in Manipur Police tawh kithua ah operations a bawl hun ua, NSCN (K) cadre 3 te chu matdaw ah um hin Assam Rifles thusuak in a gen hi. Cadre 3 te apat a chu US Made M series Assault Rifles 2, meichang 425 leh hand grenades 3 mudawk un le a taklang hi.
*Nisin Thuhiltu*

Moreh ah Indo-Myanmar Labour Union office kiang ah bomb kimudawk
Imphal, Sept. 25 *(Nisin Thuhiltu)* : Indo-Myanmar Labour Union (under Bharatiya Majdoor Sangh) Office kiangnai, Moreh ah tuni zingkal in combined team, security force te'n Bomb (Romote Control and Mobile RDX) a mudawk ui. Zia ah bomb kikawi chu 11 Assam Rifle team in a mudaw masak uh ti'n a kigen a, Metal detectors leh Ui-thiam te'n confirmed a bawl uh tawh kitawn ah Moreh Police leh Commando team in bomb kikamna tuam del ah search operation nei ngal maleu matdaw neilo un a kigen hi. Superintendent of Tengnoupal District Police Dr. S. Ibomcha, Additional Superintendent of Police K. Robinsun, Deputy Superintendent of Police (Ops) Thomas Thokchom leh Officer In-charge of Moreh Police Letkhohao Vaiphei banah Officer In-charge of Moreh Commando Saktishen te'n zia ah bomb kikamna tuam chu chu etzuina nei zing un thudawnna'n a taklang hi. A langkhatlam ah bomb mudaw ah um chu Manipur Police Department nuai ah Bomb Disposal team leh Army te'n ladawk in, Houlemphai Village kiangnai in a supuak ui. Bomb chu 3.5kg ah gik in Police thusuak in a gen hi. *Nisin Thuhiltu*