Nisin Thuhiltu – 25 September 2018

User Rating: 0 / 5

Star InactiveStar InactiveStar InactiveStar InactiveStar Inactive
 

State Govt. in Manipur University buaina suveng nuam: CM
A kisaikhakpi zosia te buaina sukven theina ding ah panlakna nei chiat ding ah chial

Imphal, Sept. 24 *(Nisin Thuhiltu)* : Chief Minister N. Biren Singh in tuni'n Chief Minister’s Secretariat ah joint Hill Leaders’ Day & Meeyamgi Numit ah zingkallam dak 8:30 apat nitaklam dak 2:30 kikal in ama kimupi nuam mi 1500 tuam kimupi in complaints 550 ngaithakna a nei hi. Ama kimupi nuam mipi te a kimupi zaw ah a thuthak lakhawm mite kiang ah a thugenna a chun, State government in Manipur University buaina sukven ding dawi a hidan taklang kawm in, ngaina gual ah student te'n thiamzilna a chiapi kit pai ding uh pawimaw in a gen hi. Manipur University buaina chung ah Centre leh Manipur University community te kal ah State government in mediator gual ah panlak theina chan ah panla ding ti'n a gen hi. State mipi, Civil Society Organisation chuamchuam banah a kisaikhakpi te chu buaina sukven theina ding ah panlakna neichiat ding ah chialna bawl in, Vice Chancellor Prof. A.P Pandey chung ah ngawna um te etzuina a um tawh kitawn ah President of India in Prof. Pandey suspend bawl in a gen a, thuthak a um kit masang sia, University huangsung ah Prof. Pandey luttheilo ding ah order um in a gen hi. President leh Centre in state mipi te puaknatna hiatpi kawm ah panla neita a hidan gen in, Manipur University ah tumasang a pat thil dawi umlo taktak tungzing, University huangsung ah Professor kithat ahiloleh buaina hiatding a la um zing sek ti'n a gen hi. Dan leh thupiak (law and order) dinmun in siatlam amanaw zing ziak ah State Government in thipbek ah mawk ettheilo, tu ah government in University campus ah buaina a tun ding dawilo in a gen hi. Pro-VC leh Registrar appointment dawilo ziak ah University examinations boycott ah a umna tawh kisai Chief Minister in a genna a chun, a kisaikhakpi te a lung-awilo ua leh Court ah thil umdan tut thei ding uh ti'n a gen hi.
Meeyamgi Numit and Hill Leaders’ Day tawh kisai a genna a chun, mimal, entrepreneurs leh SHGs tamtak te'n haksatna a tutna chung ua, tamtak ten financial assistance dawn un a gen a, ziana chung a chu MSCB, MRB te panna bank offical te soft loans piakna ding ah panlaksak ah um in a gen a, state sung ah economy dinmun hawi chuam mama ding ah ginchatna nei in a gen hi.
Medical assistance dawn te ahiuleh a hun hun ah CMHT card issued piak ah um a hidan gen in, tuni' mi 19 te kiang ah CMHT cards piak ah um, mi 19 te lak ah AAY persons 12, differently-abled persons 2 leh mi 5 te meithai hin a gen hi. Health scheme thak Pradhan Mantri Jan Arogya Yojana- Ayushman Bharat kiti migenthei te ding ah special health scheme hawn ah a umna tawh kisai a genna a chun, PMJAY kiti Central Government in damlona chung ah migenthei te a thawn ah hospital ah etkawl ding ti ah guanggalna a neina chung ah family khat in a sum (cash) hilo ah ki etlkawlna Rs 5 lakhs per year ah muthei ding, Manipur ah family 2.77 lakh te'n phatchuampi thei ding, zia chu state total population 60% tina suak in a gen hi. Chuleh, state sung ah mi lakh 1 te'n CMHT phatchuampi in a gen hi.

Imphal ah IED puak; local mi hilo mi 7 ten liamna tuak

Imphal, Sept. 24 *(Nisin Thuhiltu)* : Imphal city police station area huapsung ah um, Majorkhul gate kiangmnai ah tuni, 24th September 2018 zingkal in Improvised Explosive Device (IED) khat a puak zak a, ziana a chun, nisin ah kilawpha (labourers) 7 te'n liamna a tuak ui. Zia ah liamna tuak te chu a kiangnai ah hospital tut in a um ngal ua, etkawl a hiu. Zia ah liamna tuak a tamzaw te chu Bihar leh Uttar Pradesh apat ahiu a, a khut leh a keng uh, a khutban uh etc liam in a kigen hi. Hospital ah doctor te gendan in, liamna tuak te chu a dinmun uh lauthawn umlo in a gen hi. A langkhatlam ah kua te'n bang ziak ah IED a kam uh a hi em ti hiat a hi pua, IED supuaktu hi ah kipuang le a um puai. Thiltung tawh kisai a chun, police in case a ziklut a, khualna a nei zui ngal hi.

CM in Pradhan Mantri Jan Arogya Yojana- Ayushman Bharat scheme hawng
Imphal, Sept. 24 *(Nisin Thuhiltu)* : Manipur Chief MinisterN Biren Singh in zani a khan, Imphal ah Pradhan Mantri Jan Arogya Yojana- Ayushman Bharat kiti migenthei te ding ah special health scheme hawnna a nei hi. PMJAY ahileCentral Government in damlona chung ah migenthei te a thawn ah hospital ah etkawl ding ti ah guanggalna a neina chung ah chiapi hiding, family khat in a sum (cash) hilo ah ki etlkawlna Rs 5 lakhs per year ah muthei ding a hiu. Chief Minister Biren in a thugenna a chun, Prime Minister in zia gual panlakna thak a nei chu India khangthu health sector ah kisanna nasatak tuntu hiding ti'n a gen hi. Chuleh, Manipur state sung ah family 2.77 lakh te'n PMJAY scheme phatchuampi thei ding uh ti'n a gen hi. Zia ah special health scheme hawnna hun chu Minister for Health and Family Welfare L. Jayantakumar Singh; Manipur Legislative Assembly Speaker Y. Khemchand Singh, Deputy Speaker K Robindro Singh, Member of Parliament Ksh Bhabananda, MLAs H Dingo Singh, Awangbow Newmai, Chief Secretary Dr J Suresh Babu, Director Health Services Dr K Rajo, Director of RIMS & JNIMS te'n le a uap ui.

PHC Saikot staff ten PHC campus sukthianna nei
CCpur, Sept. 24 *(Nisin Thuhiltu)* : Churachandpur District sung ah Swachhta Hi Seva Campaign chiato zel in, tuni, September 24, 2018 zingkallam in PHC Saikot a sem staff te’n PHC Saikot campus sukthianna a nei ui. Social Work ahileh Chief Medical Officer (CMO) Churachandpur in district sung ah Primary Health Centre (PHC) tin te thupiak a nei dungzui ah a bawl uh hin a kigen a, Medical Officer in-charge, Dr. Vanlalkungi mapuina nuai ah staff te’n PHC building sung leh paw a suthiang ui. PHC Saikot ahileh tu dinmun ah Dr. Kungi etkawlna nuai ah Medical Officer pathum panna staff 30 vel um in a kigen hi. Swachhta Hi Seva ahileh September 15, 2018 ah India Prime Minister Narendra Modi in New Delhi ah a hawndawna ala nei hita a hia, India gamsung pumpi ah thianthona leh damtheina ngaikhawk ding dawina ziak ah chiapi a hi.

CCpur ah PMJAY scheme hawng
CCpur, Sept. 24 *(Nisin Thuhiltu)* : District Health Society (DHS), Churachandpur mapuina nuai ah, September 24, 2018 sun dak 12:00 apat DTC Hall, Tuibuang ah Churachandpur district a ding in Pradhan Mantri Jan Aarogya Yojana (PMJAY) scheme hawndawna a um hi. Zia hun chu, V. Hangkhanlian, Minister, Agriculture, Veterinary & Animal Husbandry in Chief Guest hina tawh a uap a, Vung Mary, DCM in hun matna mapui in, Shyam Lal Poonia, IAS, Deputy Commissioner, Churachandpur uapna tawh Chief Guest V. Hangkhanlian in scheme hawndawna a nei a, scheme beneficiary ding ah teldaw ah um mi 10 kiang ah “Golden Records E-Card” piakdawna le a nei ngawl hi. Chief Guest V. Hangkhanlian in a thugenna a chun, Pradhan Mantri Jan Arogya Yojana- Ayushman Bharat kiti migenthei te ding ah special health scheme a hidan gen in, Central Government in damlona chung ah migenthei te a thawn ah hospital ah etkawl ding ti ah guanggalna a nei dungzui ah family khat in a sum (cash) hilo ah ki etlkawlna kum 1 sung ah Rs 5 lakhs tiang govt panpina muthei ding, Manipur ah family 2.77 lakh te'n phatchuampi ding, Pradhan Mantri Jan Aarogya Yojana phatchuampi thei ding te, Socio-Economic Caste Census data ah min umte’n apply thei ding uh ti'n a gen hi.

Kalaisai Sports Meet 2018 nei
CCpur, Sept. 24 *(Nisin Thuhiltu)* : Kum 1992 ah phudaw ah um Zou Sangnaupang Pawlpi (ZSP) Delhi leh NCR Branch in kumdang ah a nei sek gual un, tukum in le Vasant Vihar mun in, Kalaisai Sports Meet 2018 a nei hi. “Khapet Zen in Pang Vai” ti thupi nei September 21 leh 22, 2018 ah Kalaisai Sports Meet 2018 nei uh ti a hi. Kalaisai Sports Meet 2018 ahileh Khakhai Zou, President, ZSP New Delhi & NCR in flag kaipalna tawh a hawng a, Paulian Zou, President, ZYO, New Delhi & NCR in sports kickoff a bawl hi. Sprots hun in- Munirka area ah um te Lamdiil, Outer Munirka, Galngam, Gurugaon area ah um te Nantal leh North & Noida area ah um te Kapkhovung ti ah kikhen in, football, volleyball, basketball, handball, 2-legged race, relay race, Tug-O-War banah individual item chuamchuam in kitaisiakna leh gualnawp bawlna a nei ui.

School chuamchuam in Annual Sports Meet nei
CCpur, Sept. 24 *(Nisin Thuhiltu)* : Tukum 2018 Academic session bei ding kuan a hitak tawh kitawn ah district sung ah mission, private leh government school chuamchuam in Annual sports meet nei a nei sausau ui. Zia chu tawh kitawn in, tuni September 24, 2018 in school bangzat a hem te'n annual sports meet 2018 hawndawna nei in, sports a pan ui. Tuni a Annual sport meet nei chool-te ahiuleh - New Lamka Upper Primary School, VK Tawna High, St. Peter’s School leh Ebenezer a hiu. St Peter’s School ah L Nenglianlal Ngaihte, Principal, St Peter’s School in school mun ah September 24 apat September 28, 2018 sung um ding a 14-veina Annual Games and Sports cum Literary Meet a hawng a, Ebenezer Academy ah Play well, play health and conquer ti thupi nei ah school huangsung ah September 24 apat September 27, 2018 sung ah Annual Sports Week 2018 a nei ding uh H Liankhanlal, Principal Ebenezer Academy in Annual Sport Week 2018 in a hawng hi. New Lamka Upper Primary School in September 24 apat September 26, 2018 sung amau school mun ah annual sport meet a nei ding uh, bialtu MDC CT Lian Guite in Chief guest hina tawh uap in a hawng hi.

Bazaar sung sukthianna nei
CCpur, Sept. 24 *(Nisin Thuhiltu)* : Gangpimual ah um Subsidiary Training Center STC Border Security Force BSF CCpur in damtheina leh thianthona tawh kisai ah Swachhta Hi Seva Campaign Cleanliness drive bawl ah District Hospital sukthianna a nei nung un, September 23, 2018 zingkal in Nute bazaar ban ah a kiim leh kiang sukthianna a nei ui. Zia hun chu, Solomon Minz IPS, IC, STC BSF CCpur in amapui a, Rank officer leh personnel kigawm sepai 250 in Tedim Road Salem Veng apat lamlian zuina nei in, damtheina leh thianthona pawimaw dan a tangko ua, Nute Bazar a tun un, group chuamchuam ah kikhen in Nute Bazar, Nulla banah bazar kiim leh kiang suthiang in, niin a chawnkhawm teu chu STC BSF ni'n puakna gari mang in a thak dawk ui.

Khuga Dam canal ah tui a luan hawilo ziak ah lo-bawlmi te'n haksatna tuak

CCpur, Sept. 24 *(Nisin Thuhiltu)* : Tuilo bawl mi tamtak te ding ah tuilakna munpi Khuga Dam left canal ah tui kitingtak luansak ahilo ziak in lo-bawlmi tamtak in haksatna a tuak ui. Lo-bawlmi a diak ah tui-lo bawl te ding ah tuhun tui pawimaw hun laitak a hina chung ah a diak ah Khuga Dam tui a kinga tuilo bawl te ding ah lemchanlona nasatak tung in a kigen hi. Ziana chung a chun, Khuga Dam enkawltu department in tui thadawk leh thadawklo ding chungchang ah semtu ding neilo a hi em ti dawtna bawl tamtak a um ua, tui kituptak ah piakdaw ahiloleh tui-lo ah bu hingla ding leh a bu-piang tamlo ding in le a kigen hi. Khuga dam kim leh kiang ah khenkhat te'n tui mu maleu canal ah tui kining ting tak a luandaw lo ziak ah Mata leh Lingsiphai area ah tui-lo tamtak in dawi gual ah tui mulo uh ti a hi. Ziana chung a chu a kisaipi thuneitu te'n panlakna a nei ding uh a nawpthu'u lo-bawlmi te'n a gen ui.

NT 25Sep2018a

CYA Road kisiamdan lungtun umzo lo ah kigen
CCpur, Sept. 24 *(Nisin Thuhiltu)* : Churchandpur khawpi sung ah National Highway pani - Tedim Road leh Tipaimukh road tawh kikawm tuana lamliam mun chuamchuam ah siamthak in a um zing a, Tedim road leh Tipaimukh road kawmtuana ding ah lampi pawimaw mama ah kigen, CYA Road ah liamlian siamthakna nasep a chiatha zing hi. Ziana chung a chun, lampi kisiamthak dan chung ah mitamtak in a lung-awilo thu'u a gen ua, lamliam kisiamna kawl suang nel sun masak ah um, zia chung a chu suanghum 30 mm leh leisan kisung, zia chu zawthian a hitak leh black topping bawl ding ti a hina chung ah ziagual lamliam kisiamdan chu tamtak in sawt panglo ding ti'n a gen ua, mun chuamchuam ah lampi black topping kibawl gual ah, bawl hi thei leh ti a nawpthu'u a gen ui. Chuleh, suanghum leh Water Bound Macadam WBM hawitak ah bawl masak ding, zia nung a chu black topping bawl hileh ti ah dawidan gen pawl tamtak le a um ui.

CM N. Biren leh A.P. Pandey lim siamkawm hal
Imphal, Sept. 24 *(Nisin Thuhiltu)* : Manipur University campus ah 20th September 2018 zan ah security personnel te'n students leh faculty members tamtak amatna chung un, tuni'n Indian Youth Congress (IYC) leh Manipur Pradesh Youth Congress Committee (MPYCC) Imphal Centre members leh volunteers te'n Congress Bhavan gate, BT Road ah Manipur Chief Minister N. Biren Singh leh Professor A.P. Pandey lim kisiamkawm hawlna a nei ui. National Secretary IYC Imphal Centre Sarifa Rahman in a genna a chun, BJP government vaihawmna dawi umlo a hidan gen in, Manipur Chief Minister chu a mawpuakna zo lo in a gen a, CM in law & order hawilo paulak ah mobile internet shut down a bawl chu nasatak in demna a bawl hi. Manipur Chief Minister in mipi te nasatak ah a chawbuai banah student te'n internet ah daily information a munau chawbuai piak in a gen a, hiatsakna bangma umlo ah zan thim nung ah students leh teachers te attack kibawl ah kiman chu banggual democratic system a hi em ti'n dawtna a siam hi. Secretary MPCC & MPYCC M. Sovachandra in a genna a chun, IYC leh MPYCC MU in zan sawtnung ah sepai thahatna students leh faculty members kiman chu nasatak ah demna bawl a hidan gen in, thip bek ah state government panlakna chu buaina sukvenna ding hizawlo in a gen hi. Bang tikleh MU apat security forces te lakdawna ding ah panlakna a um diam ti dawtna siam in, Professor A.P. Pandey’s “Lilliput” Professor K. Yugindro paithak ding pawimaw a hidan a gen hi. Chuleh, mat ah um students leh faculty member te dakkal 48 sung ah thasuak ahilo ua leh kiphinna khautak ah chiapi ding un vauna a bawl hi.

‘Nute Kailhang’ hawnna ding ah kisingsakna nei
Kangpokpi, Sept. 24 *(Nisin Thuhiltu)* : Kangpokpi DHQ ah ‘Ima Keithel’ ahiloleh ‘Nute Kailhang’ kiti building sawng 2 ah kisa chu September 26, 2018 ah Chief Minister in hawng ding ti ah kisingsakna chiatha zing in a kigen hi. Nute Kailhang’ ahileh Kangpokpi Town , downtown I.T. Road commercial area ah kisa a hi. Chief Minister, Nongthongbam Biren Singh in Senapati DHQs ah April 16 ni ah cabinet meeting hun ah thuthak lakhawm mite kiang ah a genna' Ukhrul, Senapati leh Kangpokpi ah Ima Market te June thasung ah hawn ding ah a gen himaleh tuni tiang ah hawn hinailo a hia, September 26, 2018 ah Chief Minister in hawng ding ti le confirm hinai chetlo maleh Chief Minister in September 26 ah a hawn ding ah panlakna chiatha zing ti a hi.

MU students leh faculty member te tualthat ahiu em: Macha Leima
Imphal. Sept. 24 *(Nisin Thuhiltu)* : Manipur Chanura Leishem Marup (Macha Leima) in tuni ah thusua a bawlna a chun, Manipur University campus ah 20th September 2018 zan ah sepai thahatna students leh faculty members tamtak mat ah a um chu nasatak ah demna bawl in, Chief Minister N. Biren Singh in tualthat te sun leh zan hun hitaleh matdaw hiding ah a la gen a hidan taklang in, Manipur University ah students leh faculty member te tualthat ahiu em ti'n dawtna a siam a, hostel ah um student tualthana ding ah exam bawl ahiu em ti'n le dawtna a siam hi. Chun, avaima theilam ah mat ah um te thasuak ding phutna nei hi.

Bakery products manufacture date advanced ah ki print
Imphal, Sept. 24 *(Nisin Thuhiltu)* : ACOAM-LUP volunteers te'n Bakery items chuamchuam etzuina a nei zing tawh kitawn in DAS Bakery Bread, opposite guest house, Bapupara, in products manufacture date advanced ah 25 September ti ah ki print a mudawk ui. ACOAM-LUP Secy, Shanta Mangang in a genna a chun, 24 September ah DAS Bakery Bread products mudaw ah um te products manufacture date 25 September ti ah ki print in a gen a, bakery items te ahileh 23 September ah packing kibawl hita ti'n a gen hi. Zia gual thil a um zing thei ziak chu a kisaipi legal authority in panlakna kituptak a neilo ziak uh ti'n ngawna a siam a, diklo tak ah nasep thil bawlna matdaw ah a um tawh kitawn bakery items te banned ah um in a gen hi. Chuleh, ACOAM-LUP in Food Safety Officer, Imphal west kiang ah Fassai licence cancel piak ding ah dawtna lekha pelut kawm ah DAS Bakery nasep thilbawlna diklo um te khualna nei ding leh action la ding ah phutna nei un a gen hi.