Nisin Thuhiltu – 20 September 2018

State Cabinet in Manipur Mob Violence Control and Prohibition Bill luidaw ding in lemsakna a nei hi.

Imphal, Sept. 19 *(Nisin Thuhiltu)* : Jiribam District Headquarters ah tuni'n State Cabinet meeting a um a, zia hun a chun State Cabinet in State Legislative Assembly ah Manipur Mob Violence Control and Prohibition Bill luidaw ding in lemsakna a nei hi. Works Minister leh Government Spokesperson Th. Biswajit in meeting zaw ah thuthak lakhawm mite kiang ah Manipur Mob Violence Control and Prohibition Bill tawh kisai a genna a chun, state sung ah khualchianna bangma um masalo ah mipi (mob) te'n bawl khial nei ah ngaw ah um te a petpet ah gawtna (punishment) a piak ziang sek uh chu thil khawk mama a hidan gen in, tuhun ah ziagual kisawisakna chu state sung ah uang thak mama in a gen hi. Zia ziak a chu State Legislative Assembly ah Bill luidaw ding ah lemsakna um hi'n a gen a, zia chu hileh diklo tak ah kithana, ki pawng ngawna umlo ding, injustice thil te etzui thei hiding in a gen hi. Chun, State Cabinet in PPP model ah Jiri tea estate function sakthak ding ah lemsakna nei in a gen a, zia chu open tender ah tea estate suhingthak ding hawlna um ding ti'n a gen hi. Jiri tea estate ahileh 1100 acres ah lian, tea plantation ah 400 acres kimang, rubber plantation ah 600 acres kimang leh coffee plantation ah 100 acres kimang a hi. Works Minister leh Government Spokesperson Th. Biswajit in a genzawm zelna a chun, Cabinet in Manipur State Lottery dinmun etthak ding, state pawlam ah lotteries chiapi ding, Manipur sung ah lottery ticket zawk thei lo ding, State in lottery apat kumsin leh Rs. 50 crore - Rs. 60 crore muzing thei ding in a gen hi. Cabinet in Ukhrul-Toloi-Tadubi National Highway siamna ding ah land compensation Rs. 40 per square feet hiding ah lemsakna nei a hidan gen in, land compensation piakzaw a hi hunhun ah lampi siam ding National Highway Infrastructure Development Corporation Ltd. (NHIDCL) in nasep pan ding hin le a gen a, Shija Hospitals & Research Institute ah Manipur police, Manipur Rifles leh IRB personnel 17 te ki-etkawlna' reimbursement amount Rs. 20,53,740 piak ding le Cabinet in approved bawl in a gen hi. Hiatthei khat chu, Jiribam District Headquarter ah tuni ah State Cabinet meeting chu Jiribam a ding ah amasapen a hinalai a, State cabinet in State Capital pawlam ah Cabinet meeting 5 vei a neina a hi.

Chief Minister in Imphal-Jiri Helicopter Service hawng

Imphal, Sept. 19 *(Nisin Thuhiltu)* : Manipur khangthu tepte thei ding in tuni, 19th September 2018 in Chief Minister N. Biren Singh in Harinagar Helipad, Jiribam District ah Imphal leh Jiribam kawmtua ah service ding, helicopter service hawnna a nei hi. Zialo a chun, Ima Keithel hawnna le a nei a, doctors leh teachers te transit accommodation sakna ding in foundation suangphuna le a nei hi. Imphal-Jiribam-Imphal kawmtua ding helicopter service kihawng thak ahileh Pathianni leh public holidays tilo nisin ah service ding, Helicopter Service timing ahileh zingkal dak 9:00 apat nitak lam dak 4:30 PM kikal hiding, ni khat sung ah 6 vei lengtua ding, per flight ah chuanman Rs. 3000/- hiding a hi. Imphal International Airport leh Dibong Bazaar, Jiribam ah Tickets muthei ding a hi.

Chief Minister N. Biren Singh in a thugenna a chun, Jiribam chu state ding ah khawpi pawimaw tak hita ding a hidan gen in, State Government in expert te thuhiat ah Jiribam khantona ding ah guanggalna kituptak nei ding hin a gen hi. Jiribam ah police te'n identification verification drives nasatak ah a chiapina chung ua mipi te patauna ding umlo a hidan gen in, Manipur sung luttheilo ding ah kuama ban hilo, valid documents nei kua hitaleh Manipur sung lutthei ding uh ti'n le a gen a, illegal immigrant te etzuina ding ah identification verification drives chiapi ah um hin a gen hi.
Manipur ah Government thak in minority ahiloleh majority, ahausa, azawng khenchuam neilo, state sung ah mizosia' kikhenchuamna bei ah chenkhawm/khawsakkhawm ding dawi ti'n a gen hi. Jiribam chu District thak himaleh District dang in a mugual uh phatchuampi thei ding thil te State Government in pia zing ding hin a gen hi. Imphal-Jiri road siamhawithakna tawh kisai a chun, lampi siamhawithakna nasep chiapi a hi zingna chung ah Makru leh Barak lei (bridges) te le siamthak ah um in a gen hi.
Prime Minister Narendra Modi in state sung ah lamlian siamhawithakna ding ah Rs. 25,000 crore approved bawl a hidan gen in, Jiri-Tipaimukh road siamthakna ding ah work order National Highway Infrastructure Development Ltd. (NHIDL) piak hita ti'n a gen hi. Jiribam District Transport Office (DTO) ahileh tha 2 sung ah function sak hiding a hidan gen in, Jiri Tea Estate chu PPP model ah function sak kit ding ah lemsakna um a hidan gen in, Assam Government tawh kithuhiat ah Barak River Waterways project kituptak chiapi hiding in le a gen hi. Chuleh, October ah Transit Accommodation sak pat hita ding, State Government in Jiribam ah tha 2 sung ah ‘Welcome to Manipur’ gate siamdawk ding ti'n a gen hi.
Zia ah hun matna chu, Deputy Chief Minister Y. Joykumar, Ministers Th. Biswajit, L. Jayantakumar, K. Shyam, Letpao Haokip, N. Kayisii, L. Dikho, V. Hangkhanlian, Smt. Nemcha Kipgen and Th. Radheshyam, Manipur Legislative Deputy Speaker K. Robindro, Rajya Sabha MP K. Bhabananda MLAs Th. Satryabrata, H. Dingo, Ashab Uddin, Chief Secretary Dr. Suresh Babu, DGP L.M. Khaute leh high ranking officials chuamchuam ten le a uap ui.

manipur helicopter

Swachhta Hi Seva Campaign bawlna Bazaar sung sukthiang

CCpur, Sept. 19 *(Nisin Thuhiltu)* : India government in Mahatma Gandhi pianni' October 2 ah Cleanliness Day mat ding ah guanggalna a nei tawh kitawn ah September 15 apat October 2, 2018 sung Swachhta Hi Seva Campaign nei ding a ti dungzui in tuni, September 19, 2018 zingkal 7 apat in Churachandpur khawpi sung ah bazaar mun sukthianna a um hi. District Water and Sanitation Committee, CCpur mapuina nuai ah bazaar sukthian in a um a, government department chuamchuam te sethum ah kikhen in New Bazar, Zenhang Bazar leh Tuibong Bazar a suthiang ui. SDO CCpur mapuina nuai ah government department chuamchuam - DFO, SDO/CCpur, Fishery, DSWO, YA, CAF, PD, ZEO Health leh PHED staff ten New Bazar leh Bus parking kim leh kiang sukthianna a nei ua, CEO/ADC CCpur mapuina nuai ah PWD, ADCC, DSO, ICDS, MSPDCL, IFCD, VA, PMGSY, Cooperative, Sericulture leh social welfare department apat staff ten Zenhang Bazar leh a kim leh kiang suthiang in, SDO Tuibong mapuina nuai ah Police, DEO Horciture, treasury VA, DIO, SDO Tuibong, NYK leh DRDA apat staff ten Tuibong bazaar leh a kim-leh-kiang sukthianna a nei ui. Swachhta Hi Seva Campaign ahileh September 15, 2018 ni ah India Prime Minister Narendra Modi in New Delhi ah a hawnna a nei hita a hia, CCpur district ah Water and Sanitation committee, CCpur mapuina nuai ah YPA GHQ Hall, Hiangtam Lamka ah Shyam Lal Poonia, IAS DC Ccpur in a la hawng hi.

KKL GHQ in election nei ding
CCpur, Sept. 19 *(Nisin Thuhiltu)* : Election Commissioner, Kuki Inpi Manipur mapuina nuai ah September 20, 2018 zingkallam dak 11:00 leh KKL Complex, IB Road ah 2018-2021 sung KKL General Headquarter a vaipaw ding telna (election) um ding a hi. Zia hun a chu, President, Vice President, General Secretary, Finance Secretary leh Information Secretary ding telna um ding a hi.

Hope Baptist Academy, Annual Games & Sports 2018 kipan

CCpur, Sept. 19 *(Nisin Thuhiltu)* : Hope Baptist Academy, Bible Hill, Rengkai in ni-thum sung Annual Games & Sports 2018 a nei ding uh tuni, September 19, 2018 zingkallam dak 9:30 in a hawnna a um a, Major K. Simte, 25th Assam Rifle in Chief Guest hina tawh uap in, Baloon thadawk kawm in Annual Games & Sports 2018 a hawng hi. Zia hun a chun, Chief Guest in School Flag kaipalna nei in, Blue House, Green House, Yellow House leh Red House numei leh pawsal contingent te’n March Past a bawl ua, Chief Guest Major Simte in Salute lakna a nei hi. Chief Guest apat thugenna um in, Paulianlal Tungnung, Vice Principal apat thugenna a um a, School Head Boy leh Head Girl in meisel detna a nei ui. Chief Guest Major Simte in a thugenna a chun, a chiata kum 18 masang ah Annual Games & Sports ala limpi mama hun geldawk a hidan gen in, hawn ah um Annual Games & Sports in khat-leh-khat kihepina, kingainatna a tut ding a nawp thu a gen hi. Ki taisiakna' gualzawna kiti mizosia'n chang theilo maleh kihelna a pat thil phachuam tamtak a um theina ding ah discipline neitak ah student te'n panlakna a nei ding uh a nawpthu gen in, student te'n kukal tak leh gunchu tak ah thiamzilna lam a ngaikhawk ding uh pawimaw mama in a gen hi. Hope Baptist Academy aahileh tukum ah student 870 val leh staff 32 nei a hi.

Slogan leh Anthem phuak kidemna result puang
CCpur, Sept. 19 *(Nisin Thuhiltu)* : District sung a Central Scheme Beti-Bachao, Beti-Padhao (Save Girl Child, Educate Girl Child) kiti matna ding ah teldaw ah a um tawh kitawn in District Administration in mi a tamtheipen a pan theina ding ua Slogan leh Anthem phuak kidemna a la bawl chu Result puan in a um hi. Slogan kidemna ah Elizabeth Nemlamching, Hermon Veng, Tuibong in 1st hina a la, Jenny Lianremmawi, Rayburn College, Class XI, Nengneithem, HM English School, Class X, Thang Maxim, SSA Class VII leh Kimneizou, SSA Class VIII te’n Consolation Prize a chang ui. Anthem kidemna ah Christina Roneikim, Khawmawi in 1st la'n, Khaiboi Ngaihte, Lunmual, Messie Lalmiruot, Muolvaiphei, T. Samuel Soilunmang, Hermon Veng, Tuibong leh L. Mames Kimngaithem Mate, DM Veng te’n Consolation Prize a chang ui. Kidemna Best Slogan leh Best Anthem la te Rs. 3,000 piak hiding a hiu a, Slogan leh Anthem kidemna pang 2nd,3rd, 4th leh 5th te Consolation Prize Rs. 500 chiat piak hiding a hiu.

Gancha thazak lo ding ah ZRO in hiatsak
CCpur, Sept. 19 *(Nisin Thuhiltu)* : Zomi Re-unification Organization (ZRO), Headquarter in thusua a bawlna a chun, gancha thazak lo ding ah thupuan a nei zingsa dungzui ah khawsung/veng sung thianthona ding leh thaichi te thianthona ding ah khawsung/vengsung ah Vawkcha vak te'n a thadawlo ding un hiatsakna a bawl hi. Masang ah le Vawkcha thazaklo ding ah thusua a bawl himaleh tuni tiang ah khawsung/vengsung ah vawkcha ki vak te kitha zak mu ding a um naklaina chung ah khawk a sakthu taklang kawm in, ZRO command area huapsung ah Vawkcha vak te'n a gancha teu a thazaklo ding uh ti'n a gen a, zia hiatsakna chu zuilo ah gancha thazak teitei nalai a umleh ZRO in action la ding , kuama thase theilo ding uh ti'n le K Lian Zomi, Director, GAD in thusua a bawlna a chun a taklang hi.

Anglo-Kuki War Centenary Commemoration ding tawh kisai taklang

CCpur, Sept. 19 *(Nisin Thuhiltu)* : Anglo-Kuki War Centenary Commemoration Committee (AKWCCC) in tuni, September 19, 2018 nitaklam dak 2:30 in KIC, Tuibuang ah thuthak lakhawm mite kimupi in Anglo-Kuki War Centenary Commemoration matna ding tawh kisai taklatna a nei hi. Khaimang Chongloi, Chairman, AKWCCC in thutthak lakhawm mite kiang ah a genna a chun, pu-le-pa te’n British-te a la do nung uh kum 100 tinna, Kuki Inpi Manipur leh a nuai ah pawl chuamchuam in Anglo-Kuki War Centenary Commemoration nei ding ah lemsakna a nei tawh kitawn ah Anglo-Kuki War Centenary Commemoration Committee siamdaw ah um, zia committee mapuina nuai a chu kum 2017 apat 2019 sung Commemoration hun ah mat ding ti a hi dungzui ah kum 2017 ah Lonpi khua Centenary Commemoration kimang in a gen a, tukum 2018 ah October 17, 2018 leh Churachandpur ah mat hiding in a gen hi. Zia ding tawh kisai a chu Central Committee in District ah vaisai ding ah Sub-Committee siamdawk, Sub-Committee Convener ding ah Letzamang leh Co-Convener ding ah Seiboi se ah um in a gen a, Kuki Inpi Churachandpur (KIC) in amau kithuapi ding member expansion bawl ding ah mawpuakna a piak uh a hidan le a gen hi. Anglo-Kuki War Centenary Commemoration 2018 matna ding tawh kisai ah thil bangkim sukfel hita tin le a gen hi.

M/s Sangbiaklal Indane Gramin Vitrak hawng

CCpur, Sept. 19 *(Nisin Thuhiltu)* : Churachandpur District ah Liquefied Petroleum Gas ahiloleh Liquid Petroleum Gas (LPG /LP gas) lam ah masawnna nasatak tung in, tuni September 19, 2018 nitaklam dak 3:00 in Lamjang khua ah M/s Sangbiaklal Indane Gramin Vitrak kiti Gas Agency thak hawn in a um hi. Zia hun chu Proprietor, India Oil Cimpany Cooperation Limited IOCL apat T. Haokip, Senior manager banah ngainatu tamtak te'n a uap ua, Pastor Letzathang Guite, Local Pastor, EBCC Central Lamka in M/S Sangbiaklal Indane Indane Gramin Vitrak hawndawna leh Pathian kiang ah a latna a nei hi. Gas Agency neitu Sangbiaklal in a genna a chun, September 2017 ah lucky draw apat Agency Permit neithei ding ti a hi dungzui ah kidawtna lekha a piaklutna chung ah November 22, 2017 ni ah Applicant te'n Imphal ah lucky draw a nei hun ua ama'n gas agency permit mu a hidan gen in, zia apat chu Gas agency hawng thei ah um ti'n a gen hi. Hiatthei khat chu, tu dinmun ah Churachandpur District in LPG /LP gas agency - Kim-Joe Agency; Sialngenthang & Sons; Vangsei Indane Gramin Vitrak; Songtal Indane Gramin Vitrak; Bungmual Indane Gas Agency; M/S Nivang Gas Agency; M /s Sangbiaklal Indane Gramin Vitrak ti te a hi.

Union Cabinet in Anganwadi Worker/ Helper te honorarium sukpun ding lemsa

New Delhi, Sept. 19 *(Nisin Thuhiltu)* : Cabinet Committee on Economic Affairs in tuni'n Prime Minister Narendra Modi chaired luana nuai in, Anganwadi Services (Umbrella ICDS Scheme) nuai ah Anganwadi Centres (AWCs) te kituptak ah a function ding dawina ziak in Anganwadi Workers/Anganwadi Helpers (AWWs/AWHs) te honorarium sukpunna ding in total Rs. 10,649.41 crore (GoI Share) approved a bawl hi. Zia chu 01.10.2018 -31.03.2020 sung a ding a hi. Zia chu India gamsung ah Anganwadi Workers/Anganwadi Helpers (AWWs/AWHs) mi 27 lakhs te'n phatchuampi ding a hiu. Zia dungzui a chu Anganwadi Worker te'n thasin ah Rs.3,000/-a mu sek uh, Rs.4,500/- hita ding; Anganwadi Worker (Mini-AWC) te'n Rs.2,250/- a mu sek uh Rs.3,500/- hita ding leh Anganwadi Helper te'n thasin ah Rs.1,500/- a mu sek uh Rs.2,250/- hita ding, Anganwadi Helpers te ding ah monthly performance linked incentive Rs.250/- le approved a hi. Cabinet Committee on Economic Affairs in ASHA Benefit Package le approve a bawl a, October, 2018 apat kipan ding leh November, 2018 ah payment pat hiding ti a hi. Zia dungzui a chu ASHAs leh ASHA facilitator te social security schemes - Pradhan MantriJeevan Jyoti Bima Yojana leh Pradhan Mantri Suraksha BimaYojana muthei ding ah eligibility criteria um te gual a hiding uh, National Health Mission nuai ah ASHAs te routine leh recurring incentives thasin ah Rs. 1000/- hisek chu Rs. 2000/-per month hita ding a hi. Kum 2 sung 2018-19 & 2019-20 sung a ding ah Package expenditure (Central funding) Rs.1224.97 crore approve a hi.

Pakistan sepai ten Melsia tak mai ah BSF jawan 1 that

Jammu, Sept. 19 *(Nisin Thuhiltu)* : Ramgarh Sector, Jammu border ah posting Head Constable Nareder Kumar, 193 Bn BSF in tuni'n melsia tak ah Pakistan te khut in thina a tuak hi. Zia thiltung hi, tuni, 19th September 2018 zingkallam dak 10:00 tuam ah BSF te Fencing leh Border(Zero Line) kikal ah hampa sang pi pi um te vat thiang ding a kuan lai ua hiatlawklo ah thakhatpi Pakistan Ranger ten meithal ah a kap uh, zia phat a chu BSF te le awl ah a kithialdaw hun ua Head Constable Narender chu a meithal chawi tawh gal mi te khut ah tangden kha a hi. Zia ah gam pani sepai te kal ah gamgi thiltung tawh kisai a chu CO level flag meeting ko ah kihona nei zaw ua, Fencing leh Border(Zero Line) kikal ah hampa sang pi pi um te lak ah hawlmaw ah um Head Constable Nareder Kumar chu a va hawl thak kit ua leh Head Constable Nareder Kumar chu thisa zero line kiang ah mu daw uh a hi. HC Nareder Kumar ahileh a changlam pang a meithal kikapna, a veilam keng a meithal kikapna nung, a mit tegel ki kheu daw piak banah a gawl kimkhat ki at sa mudaw a hia, sawisak ah a umna nung le a taksa chung ah a beliam te a pat muthei in a um hi. Head Constable Nareder Kumar ahileh Panipat, Haryana ah cheng a hi. Hiatthei khat chu, India leh Pakistan kal ah gal kidona puangdaw hilo maleh zia gual ki sawisakna leh kikap tuanna hi border in a um zing sek hi.