Nisin Thuhiltu – 28 August 2018

2019 Lok Sabha election ah BJP leh NEIDP pangkhawm ding

Imphal, Aug. 28 *(Nisin Thuhiltu)* : BJP legislature leader leh Manipur chief minister N. Biren Singh in tuni’n 2019 Lok Sabha election ah BJP leh ‘North East India Development Party (NEIDP) in panlakna neikhawm ding un a puandawna a nei hi. Darbar Hall, chief minister’s Bungalow ah Health Minister L. Jayantakumar of National People’s Party leh NEIDP president-in-charge Elangbam Brojendro mapui NEIDP leh BJP member te uapna Chief Minister in thuthak lakhawm mite kiang ah a genna a chun, 2019 Lok Sabha election ding ah kisaklawkna a um zing tawh kitawn ah Manipur BJP in lunggel thei party chuamchuam tawh panlakna neikhawm ding ah kisingsakna nei a hidan gen in, NEIDP in panlakkhawm ding lemsakna a nei tawh kitawn ah panla khawm ding ah umta uh hin a puang hi.

NEIDP chu political party thak himaleh state sung ah khangthak te dawpsanna ding leh manipur khantona ding ngaikhawkna neitak ah panla party a hih tin le a gen a, territorial integrity venbit mai Manipur a ding ah huntawklo, a sung ah cheng mipi te ding ah le masawnna leh khantona pawimaw tin a gen hi. Brojendro said we came to the agreement to help one another in solving the burning issues and problems that hinders development in the state. NEIDP president-in-charge Elangbam Brojendro in a genna a chun, state sung ah buaina um te sukvenna ding ah a ningtin ah society um zosia’n panlakna a nei ding pawimaw ngai in a gen a, mipi te tawh pankhawmna a pat state khangto ding leh buaina veng ding ti NEIDP chiapi a hih ti’n a gen hi.

Pre-Recruitment training entha
CCpur, Aug. 27 *(Nisin Thuhiltu)* : Churachandpur ah Army Recruitment Rally umna ding tawh kisai ah Sixth Sikh Light Infantry (Khuga Battalion) organised bawlna’ PT Sports Complex, Khominthang, New Lamka ah ah Pre-Recruitment Training chiatha zing in tuni, August 27, 2018 zingkal dak 6:00 in Khuga Battalion team khat in etthakna nei in Pre-Recruitment Training kichiapi dan chu lungtun um a sakdan uh a gen ui.Zia training a chun, Indian Army recruitment ah pang nuam khangthak pawsal 65 a pang ua, lam chuamchuam ah ziltil in a um ui. Churachandpur ah Army Recruitment Rally ahileh 15- 23 October, 2018 sung ah Peace Ground Tuibong, Churachandpur ah um ding, Soldier GD, Trademan, Technical, Nursing Asst., Clerk, Store Keeper ti te lak hiding a hi. General Duty a ding ah kum 17 leh tha 5 apat kum 21 kikal mi hingai ding, Trademan, Technical, Nursing Asst., Clerk, Store Keeper ahileh kum 23 tiang hithei ding a hi. Soldier GD a ding ah din sang dan (height) 160 cm hingai ding, Soldier Clerk/Store Keeper - 160 cm., Soldier Technical - 157 cm., Soldier Trademan - 160 cm leh Nursing Asst. a ding ah 157 cm hingai ding a hi. Chun thiamna lam ah a niampen ah Class 8 leh class XII tiang zo te a hiu ngai ding a hi.

Trade Expo leh Talent Hunt 2018 khak hita

CCpur, Aug. 27 *(Nisin Thuhiltu)* : Tuibong Peace Ground Indoor Stadium ah Kuki Students’ Organization (KSO) Churachandpur leh Kevi Society, Kohima organised bawlna’ International Trade Expo leh Youngster Talent Hunt 2018 um chu, August 26, 2018 nitak ah khak in a um hi. ZiaTrade Expo a chun, International, National leh local khutsuak van chi chuamchuam banah nekthei chi chuamchuam, stall 80 val ah zawk in a um a, entry ticket ahileh lottery system ah kibawl in, lucky winner leh consolation prize mi 4 kiang ah piak in a um hi. Youngster Talent Hunt le um in, Khupgoulen Haokip, Minlun Hangmi leh Leo Masit @ Dimp Crew te’n First Prize la’n, Robert Lalsansuok Zote@Ozaka in second prize a dawng ua, Geoffrey Ngurte leh Grace Ngurte te 3rd in a pang ui. Title chuamchuam ah The Formation Crew in Best Discipline of Talent Hunt hina a la, We Dance Crew in Best Professional Group Dance of Talent Hunt 2018 hina la in, Lhinghoikim Haokip in Best Singer of Talent Hunt hina a lai. Goldina Kimneihoi in Best Child Performer of Talent Hunt hina la’n, David Lalthuoisuok Infimate in Best Young Performer hina a la, Harry Suantak in Most Promising Performer of Talent Hunt hina alak ban ah Henry Letminthang Haokip in Best Rock-star of Talent Hunt hina a lai. Lucky draw ah Chinsuanlian Tombing of Mualkoi chu lucky winner ah pang in, Prize in Refrigerator a sâng a, midang 6 te Consolation Prize piak in a um ui.

SYO Rengkai Unit in election nei
CCpur, Aug. 27 *(Nisin Thuhiltu)* : Simte Youth Organisation(SYO) General Headquarter mapuina nuai ah August 26, 2018 nitaklam dak 2:00 in Simte Inn, Simveng in SYO Rengkai Unit in election a nei a, zia hun a chun, Simte Youth Organisation(SYO) Rengkai Unit ah 2018-2021 vaipaw ding in President-L. Thangkhozam - Bible Hill, Vice – President-L. Khaichinlam - Bible Hill & Shillong Hill, B.Lianminthang - Zion Veng leh B.Lamkholian - Bethlehem Veng, Secretary-H.Ginsuanpau, Bible Hill, Assistant Secretary-Thanglallem, Bethlehem Veng , Finance cum Treasurer-Niang Ruthi, Bible Hill, Assistant-Thuami, Zion Veng, Information Secretary-B.Lalmalsawm, Bible Hill & Shillong Hills, Thomas Thangkhanmuan, Bethlehem Veng , leh Jimmy Thangmuanlian, Zion Veng, Val Upa Bible Hill & Shillong Hill ding in S. Khupkhochinzam, leh Paukhosoi, Val Upa Zion Veng a ding in S. Vaikhothang l eh Th. Kaikhochin, Val Upa Bethlehem Veng a ding in L. Siahthang leh Hauzalian-te a telting ui. Teltin thak ah um te chu, L.Dongchinthang President SYO GHQ in ki kitiamsakna nei in, Pastor H. Doumang in Pathian kiang in a pauchap piak hi.

Hmuia Veng huapsung, Tedim Road ah lamlian siamthak

CCpur, Aug. 27 *(Nisin Thuhiltu)* : Churachandpur khawpi sung ah gua a zuk sin leh nullah tui kiveiden zing ziangna, Hmuia Veng huapsung, Tedim Road ah lamlian chu tuni, August 27, 2018 in Special Contractor Tinkholal @ T. Lala Vaiphei in vanmat chuamchuam mang in, leisai satak in a sung hi. Lamlian ahileh gua a zuk hun sin ah nullah apat tui luang let te lamlian lai ah kivei zing sek a hia, keng ah chia leh gari taitua te ding ah lemchanlona tut zing sek a hi.

National Highway Infrastructure Development Corporation Limited (NHIDCL) nuai ah Churachandpur Police Station (Zero Point) apat Singngat tiang blacktopping ding in Special Contractor T. Lala in January 2018 apat nasep panta maleh chuk gua zuk ziak ah dawi gual ah nasepna chiapi theilo, Tedim Road ah lampi siatna chu ngaikhawkna liantak neikawm ah lampi vuksang hi’n Special Contractor pu’n a gen hi.

Zia ah lamlian suksanna ding ah kimang leisai te chu Tipper 7 mang ah Khuga Lui apat puak ah um, Grader Machine mang ah leisai kisunna ding mun a chu alkatara kisungsa te kaidaw ah um, Grader Machine ma mang ah leisai kisung thak te kaituak ah um, Road Roller mang ah nawtcham ah um a hi. Lamlian kisunsanna chu Feet Nih val in sa zo hi. Lamka apat Singngat tiang lamlian siamna ahileh kum 2 sung bang lut zo ding ti a hia, Lanva Lei apat kilometer 5 blacktopping zaw ah um, aban kilometer 15 vel inchi 4 a lian, suang leh leisan kisungta, Water Bound Macadam (WBM) zaw hita ti a hi.

Zero Point, Police Station apat Singngat tiang, kilometer 34.5 a sau lamlian siamthakna ahileh NHIDCL nuai ah T. Lala Vaiphei, Special Contractor in tender a pat nasepna a lak hin a kigen a, lamlian simzawna sate sah in, Paver machine mang ah siam a hi ziak in a hawi mama hi. Mipi a ding ah phachuam ding lamlian hawitak ah siam a hitheina ding ah Contractor in van mat le chawkbe hial in a kigen hi. Tuni ah Hmuia Veng a leisai sun ah um te chu a det/chak tak leh suanghum sunkhum hiding hi’n a kigen a, thawveng tak ah nasepna chiapi theina ding ah Lailam Veng leh Simveng ah Tedim Road kikhak in, Road Diversion a kibawl hi.

Upa Henkhawlam in Meithâite Maichâm siampi

Kangvai, Aug. 27 *(Nisin Thuhiltu)* : Kum 91 mi Upa Henkhawlam of Kangvai in Kangvai khawsung Insuan chawtsuak ah Meithâite kiang ah Chapa taimang, Makhai mang leh Belam mang thu genpi ding lunggul maleh taksa hatlo ziak ah insuan chuan suak theilo in, zani 26th August 2018 nitaklam dak 1:300 ah a chenna inn ah Kangvai khawsung ah MEITHÂI" mi 38 te ko khawm in Maichâm a siampiak hi. Ziana'h a chun, Pathian in a lunggil ah a la holimpina, Chapa taimang, Makhai mang leh Belam mang thute gênlatna nei in meithai te Pathian malzawlna a dawt piak hi. Chuleh, Meithâite mit thi thek na'n Dial a silsak chiat hi. Khawsung ah Meithâi te'n kipak etsak na'n Belpi khat le a piau hi.

Ladies Prayer Fellowship in kipakthu puang
CCpur, Aug. 27 *(Nisin Thuhiltu)* : Ladies Prayer Fellowship in district sung ah gitlona veinatna ziak leh a numei chanpite uh Pathian lam ah a kilekittheina ding ua, August 22-25, 2018 sung ah Gilead Tlang, Kawnpui ah “Where Will You Spend Your Eternity?” ti thupi mang ah, a 7-veina, Ladies Prayer Fellowship Grace Camp a matna chung ua, panlakpi tute leh camp ah pang zosia te chung in Miss Liankhoman, Secretary Ladies Prayer Fellowship in kipakthu a puang hi. Chun, a biktak ah kochuam Head Office tin te a pat camp bawlna ding ah panpina ah sum a dawt na chung ua kochuam leh mimal panpina petu te banah Jammang, BCM Gouchinkhup veng in Generator athawn a khelsakna chung in kipakthu a puang hi. Chuleh, kochuam 8 apat camper numei 65 pang te lak ah camper 42 te hukdam ah um a hidan uh kihiadawk thak thei un Miss Liankhoman, Secretary Ladies Prayer Fellowship in kipakna thusua a bawlna a chun a taklang hi.

DC/CCpur in vawkchal tuk 5 that ah ngaidam dawtna siam

CCpur, Aug. 27 *(Nisin Thuhiltu)* : Thadou-Kuki Students’ Union (TKSU), General Headquarter in Depty Commissioner, Shyam Lal Poonia, IAS boycott hi ah a puan banah transfer ding ah kiphinna a nei tawh kitawn ah, August 25, 2018 ni ah Shyam Lal Poonia, IAS DC/CCpur in vawkchal tuk 5 that ah, Kuki Customary Law dungzui ah Kuki Innpi Manipur KIM kiang ah ngaidam dawtna a siam tawh kitawn in Thadou-Kuki Students’ Union (TKSU) General Headquarter in boycott hi ah a puan ladawk kitta hi’n a taklang hi. Douzathang Lhungdim, General Secretary, TKSU GHQ in tuni August 27, 2018 nitaklam dak 4:30 ah thuthak lakhawm mite kiang ah a genna a chun, India Government in Kuki-te maban ding ngaitualo ti ah Kuki Inpi Manipur (KIM) in August 8, 2018 zingkal dak 6:00 apat August 9, 2018 zingkal dak 6:00 kikal ah dakkal 24 sung, Kuki-te chenna zosia ah total shutdown puan hun tawh kituak ah Churachandpur District Administration in Cleanliness Drive a chiapina chung ah, KIM in DC/CCpur in Kuki mipi te simmaw leh a bandh bawl uh za (respect) piaklo ti ah a lung awilo thu taklang kawm ah thuneitu te’n akintak ah Churachandpur District Deputy Commissioner, Shyam Lal Poonia a lakdaw/transfer ding phutna a nei himaleh limsak ah a umlo ziak ah Thadou Kuki Students Union (TKSU), GHQ in KIM support bawlna thu puang kawm ah Deputy Commissioner, Shyam Lal Poonia, IAS, chu Churachandpur District Kuki Areas huapsung zosia boycott hi ah a puan a hidan taklang in, Shyam Lal Poonia, IAS DC/CCpur in ngaidam dawtna a siam tawh kitawn ah TKSU GHQ in a chung ah boycott a lakdaw banah kiphinna chawlsan ta ding uh tin a gen a, kiphinna nei hun sung ah kithuapina pe zosia te chung in kipakpi a gen hi.

Fake encounter case ah CBI in police personnel 2 chung ah charge sheets file

Imphal, Aug. 28 *(Nisin Thuhiltu)* : Central Bureau of Investigation (CBI), Imphal in June 28, 2011 ah Naoremthong Khullen Leikai ah fake encounter case tawh kisai in tuni, 27th August 2018 in police personnel pani - Inspector, Sagopam Ibotombi (36) s/o late S. Dono Singh of Ningthembam Mayai Leikai, Jiribam leh rifleman, Ajay Prakash (34) s/o Hemnath Thakur of 1st MR Bapupara te chung in Charge sheets a file hi. Supreme Court order dated July 14 dungzui ah mi 2 te chung ah charge sheets file ah um a hia, CBI in Lamphel Police station ah Laishram Lincoln alias Nicolson s/o L. Modhu Singh of Kakwa, Naorem Leikai kithana chung ah FIR
Khualna a nei nung ah charge sheet file ah um a hi. Police FIR dungzui ah Sub-inspector, Sagopam Ibotombi mapui police commando team khat in, June 28, 2011 ni ah kikaptuana UG cadre hiding ah muanmaw khat minute 8 sung kikaptuana a kaplup uh ti a hia, kaplup ah um UG hiding ah muanmaw cadre taksa chung ah 9mm pistol 1 leh lives rounds 9 banah Chinese hand grenades 2 mudaw ah um ti a hi. Investigation hun ah police personnel te’n PLA cadres khat zia ah kikaptuana mun a chu um hi ah a hiat uh himaleh sun ah matdaw ding lemsalo ah SI. Ibotombi in zan ah kaplup ding ah lemsakna nei ti a hi. SI. Ibotombi leh Constable Ajay Prakash in a khel a val ah sepai thahatna mang ah UG cadre dan ah a kaplup Nicolson chu a thi nung tiang ah tamvei tak a kap uh, mun 20 ah meichang lutna um hi ah gen a hi. Chuleh, a taksa chung ah galvan mudaw ah um kiti le evidences umlo ah mudaw a hi. Central Forensic Science Laboratory report leh police commandos te’n thil tun hun ah a kaplup dan uh leh meichang lutdan kituaklo ti le a hi. Post-mortem report ah le meichang kikap te chu ama –ang lam a pat kikap ngawn hi ah gen a hi kit bawk hi.

Rights activists palai te’n Governor kimupi

Imphal, Aug. 28 *(Nisin Thuhiltu)* : Extra Judicial Execution Victims Families Association,Manipur (EEVFAM), Human Rights Alert (HRA), JPE, Apunba Manipur Kanba Ima Lup (AMKIL), Tammee Chingmi, Nupi Samaj, UMO, Nongpok Leirgak Apunba Lup leh Nanchup Imptal Arunba Mera Paibi Lup palai 12 te’n tuni’n Manipur governor Najma Hegtulla kimupi in, 23 July 2009 fake encounter case panna Manipur ah fake encounter case khualna CBI in khualna a nei delay ah a um zing dawilo a hidan uh a tut ui.

Palai te lak ah khat Chungkham Taratombi in Manipur governor Najma Hegtulla kiang khawi hial in diklo tak ah achapa Sanjit kithana chung ah justice a um ding dawi a hidan a gen a, governor in palai chiakhawm te thutiam bawl in, avaima theilam ah case khualna zawthian theina ding ah panlakna nei ding in a gen hi. A langkhatlam in, Sanjit Nu’n Manipur High Court ah impleadment application file in Court chu Ak Jhalajit Vs. CBI respondent hithei ding ah phal piak ding in a dawn a, zia case chu tuni ah hearing nei ding ti himaleh high court lawyer khat thi ziak ah Court hearing neilo ti a hi. Renubala Takhellambam, President EEVFAM in press release ah a taklat kitna a chun, AK Jhalajit’s case hearing hun ding ah August 11, 2018 fixed ah um ti’n a gen hi.

53rd Hunger Marchers’ Day nit; lam zawtna nei

Imphal, Aug. 28 *(Nisin Thuhiltu)* : All Manipur Students’ Union (AMSU) in tuni’n 53rd Hunger Marchers’ Day a mang hi. Hunger Marchers’ Day ahileh kum 1965 ah Manipur ah mihing thilbawl ziak ah kial tung (artificial famine) a tun hun ah hunger march neina sepai te khut ah thina tuak te hiatzingna ding ah kimang sek a hi. Tuni ah 53rd Hunger Marchers’ Day matna a chun, AMSU in state government chu lo-bawl mite ding ah subsidised rate ah ertilizer kining ting tak supply bawl ding in phutna a nei a, government in panlakna a neilo leh kiphinna nei ding uh ti’n a gen hi. Chuleh, diklo tak ah khat leh ni sum muna ding ah fertilizer kizuak chu pawm theilo a hidan uh taklang kawm in, market rate ah fertilizers Rs 1,000 per shag hin a taklang ui. AMSU President Manjit Sarangthem in a genna a chun Hunger Marchers’ Day chu mihing thilbawl ziak ah kial a tunkitlona ding ah nit ah um a hidan gen in, student leh mipi te’n kumsin ah a nit sek uh ti’n a gen hi. 1965 ah Manipur Hunger March nei hun ah police te huham tak ah a gamtat ziak ua student te panna mitamtak in liamna a tuak banua, student pathum - Laishram Chaobal, Oinam Nabakumar, Nongmeikappam Pramodini leh All India Radio Imphal ah driver Waikhom Nilamani te’n thina tuak uh ti’n le AMSU President in a gen a, Loktak Hydro-electric project ziak ah lo-gam 25 hectares val te suksiat ah um in a gen hi. A langkhatlam ah 53rd Hunger Marchers’ Day a nit uh tawh kitawn in student martyrs te zana piakna Pishum Chingamacha memorial in a nei ua, Pishum Chingamacha memorial apat Singjamei, Keishampat, Nagamapal leh Khoyathong chuan in lamzawtna (rally) a nei ui.

2013, 2016 Batches, Police Constables recruitment candidates ten Committee siamdawk
Imphal, Aug. 27 *(Nisin Thuhiltu)* : Manipur Police Constables (Male) recruitment 2013 & 2016 batches candidates te’n recruitment results puan ahilona ah maban ah panlakkhawmna ding in Joint Committee khat a siam dawk ui. Manipur Police Constables (Male) recruitment 2013 & 2016 results ahileh Manipur High Court ah kitangden nalai a hi.

Manipur Press Club, Imphal ah Committee Co-convener, A. Binoi in thuthak lakhawm mite kiang ah a genna a chun, nu leh pa, teksia upate leh a kisai khakpi candidate te thuhiat nung ah Committee siamdaw ah um a hidan gen in, pankhawm ah thuneina mat ding ah lemsakna um in a gen a, Manipur High Court ah Chief justice priority basis ah case um te enzui ding leh avaima theilam ah recruitment chung ah buaina um te sukvenna ding ah panlakna nei ding in chialna a bawl hi. Chuleh, state government chu court kithuapi ah avaima theilam ah sukvenna ding ah panlakna nei ding ah chialna bawl in, batches 2 te kigawm khawmta a hina chung ua Court leh government a thil demand uh a sukven piak pai ding uh kinem in a gen hi.

Police custody ah ni 9 sung KRA Chairman um ding ah court in lemsa

Imphal, Aug. 27 *(Nisin Thuhiltu)* : 2nd Manipur Rifles Battalion ah meithal kawina (armoury) apat kum 2016 -2017 sung ah Pistols 56 leh Magazines 58 gukdaw ah a umna tawh kisai National Investigation Agency (NIA) in 24 August 2018 ni ah amat uh Kuki Revolutionary Army (KRA), chairman Mr. David Hangsing chu tuni’n NIA Special Court ah dinsak in a um a, ni 9 sung police custody um ding ah court in lemsakna a nei hi. Hiatthei khat chu, 2nd Manipur Rifles Battalion ah meithal kawina (armoury) apat Pistols 56 leh Magazines 58 gukdaw ah a umna tawh kisai ah mat ah um sitting Congress MLA (Saikul Assembly Constituency) Yamthang Haokip in pistol khenkhat KRA (Kuki Revolutionary Army) te a piak hi ah gen tawh kitawn ah National Investigation Agency (NIA) in David Hangshing r/o Dewlahland, Imphal East amat a hi.

Post -matric scholarship ding ah Rs 18,17,49,550 release
Imphal, Aug. 27 *(Nisin Thuhiltu)* : Dayananda Ayekpam, Under Sectretary Finance Department, Govt of Manipur thusua kimu'n a taklatna a chun, CSS nuai ah Manipur ST student 21,849 te Post -matric Scholarhisp (2nd installment for 2017-18) ding ah encashment ah Central Share 18,17,49,550/- (eighteen crore seventeen lakhs forty nine thousan five hundred fifty) release bawl ah um in a taklang hi.

Asst. Fertilizer Officer suspend ah um
Imphal, Aug. 27 *(Nisin Thuhiltu)* : Laltanpuii Vanchhong, Joint Secretary to Govt. of Manipur in Governor min ah thusua a bawlna a chun, K. Kulabidhu Singh, Assistant Fertilizer Officer, Directorate of Agriculture, Manipur in ahiding gual tak ah nasepna a chiapilona chung ah a chung ah displinary action lak ah um a hidan taklang in, Rule 10 (1)(a) of the CCS (CCA) Rules, 1965 dungzui ah a sepna a pat suspend ah um in a taklang hi.

ZUF temporary camp suksiat piak

Noney , Aug. 27 *(Nisin Thuhiltu)* : 8th Assam Rifles team khat in, 26th August 2018 in, Noney District, Noney Police Station huapsung, Garilong leh Tengkongjang village kikal, gamlak ah Zeliangrong United Front (ZUF) te temporary camp bulu in a ZUF te temporary camp amudaw sun teu a suksiat piak ui. Zia ah ZUF temporary camp umna mun chu old Cachar road ti ah kihia Tupul route ah tunthei hin a kigen hi.