Nisin Thuhiltu – 24 August 2018

State Level ah famta PM lui Atal Bihari Vajpayee Vajpayee ding ah Prayer Meeting nei

Imphal, Aug. 23 *(Nisin Thuhiltu)* : Manipur Governor Najma Heptulla leh Chief Minister N. Biren Singh mapuina nuai ah tuni’n City Convention Centre, Palace Compound, Imphal East ah famta Prime Minister Atal Bihari Vajpayee a ding in public prayer meeting a um hi. Famta Prime Minister Atal Bihari Vajpayee kihalna vut (ashes), New Delhi a pat 12:30 pm ah Imphal Airport tung in, special-designed Maruti Gypsy mang ah Vajpayee kihalna vut (ashes) chu BJP Manipur Pradesh office, Nityaipat Chuthek tut in a um a, Chief Minister N. Biren Singh mapuina pakcha piakna um in, zia nung a chun, Chief Minister in Vajpayee kihalna vut (ashes) chawi in, City Convention Centre ah State level public prayer meeting neipi in a um hi. Governor Najma Heptulla in a thugenna a chun, Famta Prime Minister Atal Bihari Vajpayee chu mi pawimaw tak, lampi dik ah democracy mapuitu a hidan taklang in, Rajya Sabha ah Deputy Chairman a hi hun ah Famta Prime Minister Atal Bihari Vajpayee tawh panlakna neikhawm sek a hidan uh a gen hi.

Vajpayee chu India mi diktak leh India a ding ah kipumpiak mi khat hin le a gen a, a sepdaw leh a panlakna um te hiatmil hitalo ding ti’n a gen hi. Chief Minister N. Biren Singh in a thugenna a chun, Vajpayee chu opposition ahiloleh ruling party te khenchuam neilo, kuama chi leh nam, mel leh puam, nam lian nam neu khenchuam neilo mi a hidan gen in, Prime Minister Narendra Modi panna ama luang hawlna nei hun ah BJP Headquarters apat a luang kihalna mun Smriti Sthal kikal ah keng ah 6 km lamzawtna um a hidan te a gen hi. Zia ah hun matna chu Manipur Legislative Assembly Speaker Y. Khemchand, Cabinet Ministers, MLAs, senior politicians, high ranking civil leh police officer ten a uap ui.

C-in-C, USRA kithana chung ah Zillai in huntiam suksaube
CCpur, Aug. 23 *(Nisin Thuhiltu)* : Zillai Churachandpur District, Secretary, Information & Publicity in thusua a bawlna a chun, (L) Lalminthang Vaiphei, C-in-C, USRA kithana tawh kisai ah Zillai Churachandpur District in dakkal 24 sung ah tualthattu te matdaw ahiloleh KSO, Churachandpur leh ZSF GHQ support bawlna tawh kiphinna khautak chiapi ding ah huntiam a piak himaleh Police Department in tualthattu te hawldawna ding ah panlakna nasatak a nei zing banah Police Department in hun piakbe ding ah dawtna a siam dungzui a, kiphinna neilo phawt ding a hidan a taklang hi. Himaleh a vaima theipen ah tualthattu te matdaw ding phutna nei in, Police Department in a hun dawtbe sung ah tualthattu te amatdawlo ahileh kiphinna nei hiding ti’n le a taklang hi.

Health Minister in CCpur ah Health and Wellness Centre 2 hawng ding

CCpur, Aug. 23 *(Nisin Thuhiltu)* : Churachandpur District ah 25th August 2018 leh mun 2 - Leisang leh Mission compound ah Health And Wellness Centre hawnna ding tawh kisai in tuni August 23, 2018 nitaklam dak 2:00 in Dr J Songoukham Samte, CMO CCpur mapuina’ Officer Chamber, CMO Campus ah meeting nei in, genkhawmna a nei ui. Meeting a chun, Medical Officer MO Incharge PHC Saikot, MO Incharge PHC Sagang, MO Incharge PHC Henglep leh MO Incharge CHC Singgnat, District Family welfare officer DFWO, District Nodal Officer DNO, DPMU staff, BPM Henglep leh Samulamlan banah Dr Kimngaihching Simte te a pang ua, a chiakhawm, medical staff ten kisaklawk dingdan tawh kisai a genkhawm ui. Health and wellness centre hawnna ahileh August 25, 2018 zingkallam dak 11:00 ah Leisang leh nitak lam dak 1:00 ah Mission Compound ah um ding a hi. Zia hun chu, L Jayantakumar Singh, Minister Health And Family Welfare, Government of Manipur in Chief Guest hina tawh uap ding, V Hangkhanlian Minister, Agriculture, Veterinary and Animal Husbandry, Government of Manipur in Functional President hina tawh uap ding leh Vumlunmang Vualnam, IAS, Principal secretary Health And Family Welfare Government of Manipur in le uap ding a hi.

Health and Wellness Centre ahileh Health Protection Mission, Ayushman Bharat scheme chiapina kimang ding a hi. Health Protection Mission, Ayushman Bharat scheme in damlona chung ah inchen haksa, India gamsung ah mi 10.74 crore val te cover ding, family 1 in health assurance cover Rs. 5 lakhs tiang a mutheina ding a hi. Ayushman Bharat scheme phatchuampi thei ding te Socio Economic Caste Census (SECC) data of 2011 dungzui ah teldaw hiding, migenthei panpi ngai te diktak in scheme a phatchuampi theina ding ua rural areas leh urban areas ah category chaumchuam ah scheme phatchuampi thei ding mi select bawl ding ti a hi. Beneficiaries ding te chu a mobile number uh leh unique ID a pat identify bawl ding, NHPM beneficiaries mi 10.74 crore te mobile number system khat ah kawikhawm ding, zia chu identification number hiding, identification document khenkhat a suklatbe uh pawimaw ding, Rashtriya Swasthya Bima Yojana nuai ah migrant labourers te beneficiary hivek ding, Rs 30,000 tiang ah health assurance cover piak ding ti a hi.

Ayushman Bharat ahileh major element pani - National Health Protection Scheme leh Wellness centres tawh chiapi hiding, wellness centres ah damlo te primary care bawl hiding, zia ding a chu government in telchuam ah um, a umsa Public Health Centres te Wellness Centres ah upgrade bawl a hi. Churachandpur District ah Community Health Centre (CHC), Singngat leh Primary Health Sub Centre (PHSC) 5 -Henglep PHC nuai a Charoikhullen PHSC, Saikot PHC nuai a Mission Compound PHSC leh Leisang PHSC, Sangang PHC nuai a Koirengtak PHSC banah Singngat PHC nuai a Suangdoh PHSC te Centre khat hiding ah teldaw lak ah pang a hi.

ADC/CCpur Chairman thak telna ding ah kisaklona um maleh a hun ding kichawn kit

CCpur, Aug. 23 *(Nisin Thuhiltu)* : Autonomous District Council (ADC), Churachandpur ah Chairman thak telna 24th August 2018 ah um ding ah Manipur Governor office in thusua a bawl dungzui in, tuni, August 23, 2018 in ADC staff te’n District Council Town Office, Hiangtam Lamka ah Chairman telna ding tawh kisai in arrangement a bawl ua, T. Kammuanlal Simte, MCS, Chief Executive Officer, ADC Churachandpur in staff-te mawpuakna hawp piak in, Lalengmoi, Accounts Officer in refreshment lam ah mawpua ding, Rothienghlim, EO (Town) in Town Office Compound leh Election neina mun ding sukthianna lam mawpua ding, H. Paokhothang, DI Headquarter in Election hun ah mat ding, PA System a ngaitua ding banah Mohammad Nasiruddin, UDC in Sitting Arrangement tawh kisai maw a puak ding, Chairman thak telna nei hun ah a pawimaw dungzui ah Police-te kithuapi ding staff 10 a guat hi. ADC, Churachandpur ah Chairman thak telna ding a chun, Langkhanpau Guite, Lalditsang Hmar leh T. Paukhanlian te’n Nomination a File ua, Grace Zamnu in Presiding Officer hina tawh election mapui ding a hi. A langkhatlam ah ADC, Churachandpur ah Chairman thak telna ding tawh kisai ah kisingsakna um zing himaleh zani 22 August 2018 ah United Socialist Revolutionary Army (USRA), Commander-in-Chief (C-in-C) kaplup ah a umna chung ah dan leh thupiak (law & order) dinmun in zillo ti ah gen a hi dungzui in, State Cabinet meeting in ADC, Churachandpur ah Chairman thak telna ding hun chu a chawn thak kit in, 4th September 2018 zawk ah um ding ah lemsakna nei a hidan Athem Muivah, Secretary (TA & HIlls) Govt. of Manipur in thusua a bawlna a chun a taklang hi.

ADC pathum enzui ding Cabinet Sub-Committee siamdawk
CCpur, Aug. 23 *(Nisin Thuhiltu)* : Manipur state Cabinet meeting in tuni'n Autonomous District Council - Senapati, Churachandpur leh Tamenglong enzui ding in Cabinet Sub-Committee a siamdawk hi. Zia Cabinet Sub-Committee Chairman ding a chun, Th Bishwajit: Public works, rural development and panchayati raj, information and public relations, administrative reforms, commerce and industries guat in a um a, member ding ah - V. Hangkhalian, Minister Agriculture, veterinary and animal husbandry; L Jayanta Kumar, Minister, Health, family welfare, law and legislative, art and culture; Letpao Haokip, Minister youth affairs, sports, irrigation and flood control; N Kayishii, Minister tribal and hill areas department and fisheries leh Loshi Dikho, Minister, PHED, printing and stationary te guat a hi. Chun, Cabinet Sub-Committee kisiam dawk thak ah member te'n nitaklam dak 5:00 ah R & PR Minister Conference Room ah first meeting a nei ding uh ti a hi.Himaleh meeting ah banggual thupukna siam ahiu zia thu zik ahi tiang ah hiat a hipuai.

USRA, Commander-in-Chief luang vuiliam hita

CCpur, Aug. 23 *(Nisin Thuhiltu)* : Melhiatlo pawl khat in, August 22, 2018 zingkal dak 8:00 tuam ah Hill Town ah um, Churachandpur ZEO office kiang, Tipaimukh Road ah a kaplup uh, United Socialist Revolutionary Army (USRA), Commander-in-Chief (C-in-C), Mr. Lalminthang Vaiphei, (56) s/o (L) Lunsat Vaiphei of T, Munjang luang tuni’n ama khua Hausa hina, T. Munzang thanmual ah vuiliam in a um hi. A vuiliamna hun chu angainatu, Civil Society, Social Worker tamtak te’n le a uap ua, Rev. Liante, Bialtu Pastor, RCG in a vuiliam hi. A langkhatlam ah USRA, Commander-in-Chief (C-in-C) kithana tawh kisai in, Churachandpur Police stat ion ah FIR No. 90908)201BCCP-PS u/s 302 IPC & 25(1-C) A. Act ah case ziklut in athattu te khualna a nei zing a, kua te’n, bang ziak ah a kaplup uh ti hiat ahilo banin akaplum tu ah a kipuang hiat ding a um nai puai.

Routine Immunization chiapi

CCpur, Aug. 23 *(Nisin Thuhiltu)* : Routine Immunization neina mun ding ah teldaw ah um, Session Site, Hill town Community Hall ah tuni August 23, 2018 in Routine immunization chiapi in a um hi. Zingkallam dak 10 ah Routine Immunization k ipan in, Thangzam Road ah ASHA, Aganwadi Worker leh Village Authority kithuapina tawh Medical Staff te’n Routine Immunization a chiapi ua, Hill Town ASHA 3 leh ASHA 5 in a huamkhak Tangzam Road, Tipaimukh Road leh a kim leh kiang apat naupang-8 te damdawi dawnsak/kap in a um ui. Routine Immunization hun ah naupang kum 10 leh 16 kikal banah numei nauvawp te, Tetanus kap in a um ua, naupang kum 5-te DPT kap in Vaitamin A dawnsak a hiu. Naupang kum 2 leh kum 4 kikalte Vitamin A dawnsak a hiu a, nausen tha 9-te Vitamin A dawnsak ahih banua Measles-Rubella (MR) leh Japanese Encephalitis (JE) a pawimaw dungzui ah kap a hiu. Nausen, tha 1 leh akim apat kum thum leh akim kikalte OPV dawnsak a hiu a, Pentavalent leh IPV le kap ahiu. Nausen piang pan leh tha khat kikal te BCG kap ahi banua OPV Zero dose dawnsak a hiu.

Zillai Shillong Block in Annual Conference 2018 mang ding
CCpur, Aug. 20 *(Nisin Thuhiltu)* : Zillai Shillong Block (Vaiphei Students’ Association) in 25th August, 2018 (Saturday), 10:30 A.M leh Don Bosco Technical Hall, Laitumkhrah ah Annual Conference cum Fresher’s Social Meet 2018 nei ding a hi. Zia hun chuD. Khuala Vaiphei, District Project Director, NERCORMP, Churachandpur; K. L Vaiphei, Branch Manager i/c, Apex Bank Ltd., Halflong Branch; Kaplianlal Thangluai, Asst. Manager, Indo Global Social Service Society (IGSSS) leh Lianzalal Vaiphei, CEO, NESEED Foundation, CCpur te’n Chief Guest, Guest of Honour, Functional President leh Special Guest hina tawh uap ding a hiu.

Zia hun a chu, Special Items chi chuamchuam - Naupangte a pat Traditional Display leh Shillong Vaiphei Nupite, JRTS Zillai te leh Eimi Marians & Kuki Bajorians te a pat Display chuamchuam um ding, Artistes: C. Hoiniang, Vungthiankim, Eunice Vaiphei, Sarah Hatlalkim, Lamjoylian, Esther Neihsial te’n laa sakna nei ding a hiu. Chun, Mancy Baite leh Thangnelson te’n hun matna mapui ding, Music Department, ZSB mapuina’ Zillai Anthem sakna um ding, Meritorious Award: Class X, XII, Graduation & Post-Graduation; Achievement Award piakdawna um ding,; Freshers’ Introduction ; Freshers te pauchap piakna, Mr. & Miss Fresher telna um ding a hi.

KSA thusua chung ah KZP GHQ in lung-awilo thu taklang
CCpur, Aug. 23 *(Nisin Thuhiltu)* : Khangthah Zuun Pawl (KZP) (The Simte Students’ Association) General Headquarters in tuni ah thusua a bawlna a chun, Kangleipak Students’ Association (KSA) in caption “Langoi Chansilakliba Kanglei-Chasinggi Kangkhul Kanjanaba Khongjang Changsinba houragani-KSA”,(Ref. No. 245/P/KSA/PR/245/18) dated 16th August, 2018 ah thusua a bawl hun ah Manipur Tribe khenkhat a kichianlo te Manipur Scheduled Tribes list ah pansaklo ding ti ah phutna a nei hun ua ‘SIMTE’ le a pan sak uh chu nasatak ah demna bawl in, ziagual thusua chun, Simte Community te sentiment nasatak ah sukha a hidan a taklang hi. Simtes kiti Manipur ah pu leh pa te khang a pat a la umsa hita a hidan le taklang in, October 1879 ah Khamzahen Simte in country made rifles 30 tawh mi 100 te Manipur King lengpa hiatsak dungzui ah British te do ding ah a la sawlta a hidan taklang in, Khamzahen Simte chapa, Simte tribe sung ah Ngaihte phung innpi pa’n 11th February, 1906 ah Tualbual (Thanlon) village, South West Manipur khua a la satta leh J. Shakespear, Major Superintendent, Manipur State in zikthaw ah boundary paper a la pia hin a gen hi. Chun, KSA in indigenous mi hilo leh hina kichianlo gual ah thusua a bawl chu KZP (Gen. Hq.) in ngaithiamlo a hina chung ah a thusua a sukdik thak ding leh SIMTE Community te sentiments a sukkhakna chung ua ngaidam a dawt uh pawimaw in a gen hi.

Khawmpi nei ding
CCpur, Aug. 23 *(Nisin Thuhiltu)* : Evangelical Baptist Convention EBC Lamka North Division nuai ah Baptist Youth Fellowship BYF in September 6 apat September 9, 2018 sung in EBCC Hiangtam Lamka ah “Nang Vualzawlna Hi In” ti thupi nei ah a 9 veina BYF Lamka North Division khawmpi nei ding a hi. Zia hun a chu Speaker a Rev Kuman Suresh Singh pang ding a hi.