Nisin Thuhiltu – 23 August 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Kua ahi hiatlo te'n USRA, Commander-in-Chief kaplum

CCpur, Aug. 22 *(Nisin Thuhiltu)* : Melhiatlo pawl khat in tuni, August 22, 2018 zingkal dak 8:00 vel in Hill Town ah ZEO office kiang, Tipaimukh Road ah United Socialist Revolutionary Army (USRA), Commander-in-Chief (C-in-C), Mr. Lalminthang Vaiphei, (56) s/o (L) Lunsat Vaiphei of T, Munjang chu meithal in a kaplum ui. A kigendan in Lalminthang leh a body guard hi ah kihia, Lianngaithang Vaiphei @ Jack in bawl ding pawimaw a nei ziak ua, TRATDA Office, Hill Town vapha, hotel ah thingpi a dawn zaw ua, pawtdawk kit ding ah kisa, Gypsy ah kaldawk ah gari start ding ah a kisak laitak ua kua ahi hiatlo khat in pistol ah a kiangnaicha a pat Lalminthang Vaiphei chu a kap hin a kigen hi. Ziana a chu a luchang kapkhak ah um, kintak ah District Hospital puaklut ah um maleh damzo lo ah thi hin a kigen hi. Lalminthang ahileh United Socialist Revolutionary Army (USRA) ah Commander-in-Chief (C-in-C) leh Ex-Vice President, KNO banah Chief of T. Munzang le a hi. Zia ah kikaplupna thu chu Police ten a hiat uh tawh kitawn ah Lunkhomang Khongsai, MPS, Additional SP (Law & Order), T. Lunzamung, MPS, Additional SP (Operation) mapui police team khat in delzui ngal ah thil umdan khualna nei uh hin a kigen hi. Lalminthang Vaiphei thina tawh kisai a chun, a chanu Lynda Chiinnunlim Vaiphei in police ah report bawl in, police in FIR No. 90908)201BCCP-PS u/s 302 IPC & 25(1-C)A. Act in case a ziklut hi.
Zia ah kithana chun, mitamtak te a tizat sak a, Churachandpur District Hospital ah a luang umna mun a del ua, a luang postmortem bawl hunsung tiang in mipi’n Hospital pawlam ah ngak in, YVA nungak-tangval in mipi dawn ding thing awm in, Lalminthang Vaiphei ngainatu mi tamtak te a taikhawm ui. Chun, Zomi Students’ Federation (ZSF) General Headquarter leh Kuki Students’ Organization (KSO) Churachandpur in melsia tak ah ziagual kithana chu nasatak ah demna bawl in, Churachandpur Town sung in sun dak 12:00 apat khawthim tiang in Shutdown a puang ua, khawpi sung ah dawr zosia kikhak in, Emergency ah shutdown puan ahi ziak in School leh Office kai banah chiana nei te khualna gari taitua ding ahileh thakawl in a um hi. Lalminthang Vaiphei luang ahileh postmortem bawlzaw a hitawh kitawn in, nitaklam dak 5:30 tuam ah a luang puakdaw in a um a, B. Phaicham ah a chenna inn tut ah um in, B. Phaicham Village Authority leh Kochuam, Khawsung mipi’n suunna leh a gaalna hun matpi in, zia nung a chun, ama khua satna T. Munzang ah puak in a um hi. USRA, Commander-in-Chief kithana chu , Zomi Council, Kuki Inpi Manipur (KIM), Kuki National Organization (KNO), Zomi Students’ Federation (ZSF) General Headquarter, Kuki Students’ Organization (KSO), Churachandpur, Zillai Churachandpur District, Zomi Reunification Organization (ZRO), United Socialist Revolutionary Army (USRA), Hmar People’s Convention (Democratic) banah pawl chuamchuam in demna bawl in, lusuuna tuak insungmite thawkpi thu a puang a, Zillai Churachandpur District in kithana tawh kisai ah tualthattu te’n a thana ziak uh a taklat ding uh phutna bawl in, government in dakkal 24 sung ah tualthattu te amatdaw ding phutna a bawl hi. A langkhatlam ah USRA, Commander-in-Chief chu kua te’n, bang ziak ah a kaplup uh a hi em ti, zia thu zik a hi tiang ah hiat a hipuai.

Dakkal 24 sung ah tualthatte matdaw ahiloleh Zillai in ZSF leh KSO support bawlna kiphinna pan ding

CCpur, Aug. 22 *(Nisin Thuhiltu)* : Melhiatlo pawl khat in tuni, August 22, 2018 zingkal dak 8:00 vel in Hill Town ah ZEO office kiang, Tipaimukh Road ah United Socialist Revolutionary Army (USRA), Commander-in-Chief (C-in-C) Mr. Lalminthang Vaiphei, (56) s/o (L) Lunsat Vaiphei of T. Munzang a kaplupnau tawh kisai in tuni, 22 August 2018 nitaklam dak 5:00 in student organization chuamchuam in Press Conference ko in, thil um ding dan taklatna a nei ui. Press Conference ah Kaithianjoy Vaiphei, President, Zillai Churachandpur District in thuthak lakhawm mite kiang ah a genna a chun, melhiatlo pawl khat in melsiatak ah tuni, August 22, 2018 zingkal dak 8:00 vel ah Hill Town ah um, ZEO office kiang, Tipaimukh Road ah Mr. Lalminthang Vaiphei, (56) s/o (L) Lunsat Vaiphei of T, Munzang a kaplup uh chu mihing hinna value helote gamtatna hi ah gen in, nasatak in demna a bawl a, Zillai Churachandpur District in ziagual ah nam lawiupa khat kithana chu ngaithiamlo a hidan taklang kawm in, Nam lawiupa khat zana bei ah a kithana chung ah a thattu te a kipuan ding, government in dakkal 24 sung (22nd August nitak 5:00 apat 23rd August nitak dak 5:00) ah tualthatte amatdawlo ahileh Zillai, Churachandpur District in ZSF leh KSO tawh kithua ah a kiphinna chuamchuam bawl ding hin a gen hi. Thutiam hunsung ah government in tualthattu te amatdawlo a, Zillai in kiphinna apat khak ahileh District mipi te’n hiatthiampi ah support bawl ding in mipi te chialna a bawl hi.

Lalkhohao Haokip, President, KSO Churachandpur in a genna a chun, nam lawiupa Lalmintang Vaiphei kithana nasatak ah demna bawl a hidan gen in, dakkal 24 sung ah tualthatte matdaw ahilo ah Zillai in kiphinna a chiapi ahileh KSO, Churachandpur in theitawp ah support bawl ding a hidan a puang hi.
Vanlallian Khaute, President, ZSF General Headquarter in a genna a chun, Zillai in ultimatum, dakkal 24 sung apiak hunsung a tualthatte a kipuan dawlo ua, police in bangma sepdaw aneilo ahileh ZFS in nasatak ah Zillai in kiphinna a bawl ding chu support bawl ding uh ti’n a gen hi.

TKSU, GHQ in ni 3 sung kiphinna chawlsan ding

CCpur, Aug. 22 *(Nisin Thuhiltu)* : Thadou Kuki Students Union (TKSU), GHQ in tuni ah thusua a bawlna a chun, Churachandpur District Kuki Areas huapsung zosia ah Churachandpur Deputy Commissioner, Shyam Lal Poonia, IAS, boycott hi ah a puan banah Churachandpur Deputy Commissioner hina a pat chawndaw/transfer ding ah phutna a nei zing na tawh kisai ah government in a demand uh a sukpitin piaklo ziak ah 22nd August 2018 zan a pat ni 3 sung General Strike chiapi ding ah a puan chu Kuki Inpi Manipur (KIM) thupiak dungzui ah chiapitalo phawt ding, ni 3 sung ah Deputy Commissioner, Shyam Lal Poonia, IAS dawilo ah kiphinna himhim chawlsan phawt ding uh hin a taklang hi. Himaleh Churachandpur Deputy Commissioner hina a pat Shyam Lal Poonia, IAS, chawndaw/transfer ding ah phutna a nei uh chu dinpi zing a hidan a taklang a, ni 3 sung tiang ah government in panlakna a neilo ahileh maban ah kiphinna sunzawm kit ding uh ti’n a taklang hi.

Hiatthei khat chu, India Government in Kuki-te maban ding ngaitualo ti ah Kuki Inpi Manipur (KIM) in August 8, 2018 zingkal dak 6:00 apat August 9, 2018 zingkal dak 6:00 kikal ah dakkal 24 sung, Kuki-te chenna zosia ah total shutdown puan hun tawh kituak ah Churachandpur District Administration in Cleanliness Drive a chiapina chung ah, KIM in Churachandpur Deputy Commissioner, Shyam Lal Poonia chung ah a lung awilo thu taklang kawm ah government thuneitu te’n kintak ah Churachandpur District Deputy Commissioner, Shyam Lal Poonia a lakdaw/transfer ding phutna a nei himaleh limsak ah a umlo ziak ah Thadou Kuki Students Union (TKSU), GHQ in KIM support bawlthu puang kawm ah Deputy Commissioner, Shyam Lal Poonia, IAS, chu Churachandpur District Kuki Areas huapsung zosia boycott hi ah a puan banah 10th August 2018 apat a office (Deputy Commissioner office) lampi a khakpiak hita a hia, state government in 15th August 2018 masang ngei ah Deputy Commissioner Shyam Lal Poonia, IAS a lakdaw/transfer ding ah huntiam a la piak hita le a hi.

25th August ah ‘Hill Leader’s Day’ & ‘Meeyamgi Numit’
Imphal, Aug. 22 *(Nisin Thuhiltu)* : Chief minister’s secretariat, government of Manipur in ‘Hill Leader’s Day’ leh ‘Meeyamgi Numit’ ding tawh kisai ah thusua a bawlna a chun, tutha August 10 leh August 15 ah ‘Hill Leader’s Day’ leh ‘Meeyamgi Numit’ um ding himaleh lemchanlona ding ah August 25 leh Joint ‘Hill Leader’s Day’ leh ‘Meeyamgi Numit’ um ding hi’n a taklang hi.

Paite MIL Coaching class hawng
Imphal, Aug. 22 *(Nisin Thuhiltu)* : Siamsinpawlpi (SSPP) Joint Headquarter, Imphal in tuni, August 22, 2018 sunma dak 11:00 in Jubilee Hall, EBCC Lamphel ah MIL (Paite) Coaching Class hawnna a nei hi. Zia hun a chun, YPA Imphal Block, PTC Imphal Block, Paite Officers’ Forum leh Paite Literature Society lawiupa te uapna tawh Khenthang Buansing, Assistant Pastor, EBCC Lamphel in pauchapna tawh Paite Coaching Class a hawng hi.

Manipur University kihawng kitta ding

Imphal, Aug. 22 *(Nisin Thuhiltu)* : Manipur University Students’ Union in Vice Chancellor Adya Prasad Pandey paithakna ding phutna nei ah ni 77 sung, total shutdown strike a chiapi a chawlsan tawh kitawn in, 23 August 2018 apat Manipur University kihawng kitta ding a hidan Manipur University student body President M. Dayaman in tuni'n thuthak lakhawm mite kiang in a gen hi. Kiphinna ziak ah student te’n haksatna chuamchuam a tuakteu hiatpi kawm ah kiphinna chawlsak ah um leh ngaina gual ah anipur University kihawng kitta ding ah lemsakna um hi'n student body President M. Dayaman in a gen a, himaleh vice-chancellor sandawna ding phutna nei ah kiphinna a nei uh chawlsan hinai diaklo in a taklang hi.

POCSO judge in vauna tuak
Imphal, Aug. 22 *(Nisin Thuhiltu)* : Noutuneshwari Devi, Special Judge, Special Protection of Children from Sexual Offenses (POCSO), Senapati in vauna amu uh tawh kitawn in Women Action for Development (WAD) in Government of Manipur chu “Y” Class Security leh security measure peding in phutna a bawl hi. Women Action for Development (WAD) in a taklatna a chun, August 21 2018 zingkal dak 7:30 ah A Noutuneshwari, Special Judge, POCSO, Senapati umna, Dens Park Court, Senapati District ah muanmaw thil a um banah Special Judge, POCSO in vauna mu hi’n a gen hi. Hiatthei khat chu, kum 21 ah upa, R David of Maram Kavanam Village in a chiata December 25, 2015 nitak lam ah Maram Kavanam Village ah naupang kum 4 bep hipan a pawngsual nung ah athana chung ah July 31, 2018 ni ah POCSO, Court ah Judge Noutuneshwari Devi in thitiang gawtna piak ding ah thutanna a la siam khum a hi.

Routine Immunization
CCpur, Aug. 22 *(Nisin Thuhiltu)* : District Family Welfare Officer (DFWO) Churachandpur in district sung ah Routine Immunization tawh kisai ah Session Site a siamdawna mun chuamchuam in Routine Immunization chiapi in a um hi. Zia chu tawh kisai in, August 23, 2018 sunma dak 10:00 apat in Hill town Community Hall, Thangzam Road ah ah chiapi hiding a hi. Zia hun a chu Hill Town ASHA 3 leh ASHA 5 in a huamkhak Tangzam Road, Tipaimukh Road leh kim leh a kiang ah nupi nauvawp banah naupang-te kikapsak thei ding a hi.

Pre-Recruitment training pan
CCpur, Aug. 22 *(Nisin Thuhiltu)* : Churachandpur ah Army Recruitment Rally umna ding tawh kisai ah Pre-Recruitment Training a ding ah Sixth Sikh Light Infantry (Khuga Battalion) te kiang ah min khumlut te’n tuni, August 22, 2018 zingkal dak 6:00 in PT Sports Complex, Khominthang, New Lamka ah training a pan ui. Ziana a chun, Indian Army kilakna pang nuam khangthak pawsal 65 a pang ua, lam chuamchuam ah ziltil in a um ui.

Churachandpur ah Army Recruitment Rally ahileh 15- 23 October, 2018 sung ah Peace Ground Tuibong, Churachandpur ah um ding, Soldier GD, Trademan, Technical, Nursing Asst., Clerk, Store Keeper ti te lak hiding a hi. General Duty a ding ah kum 17 leh tha 5 apat kum 21 kikal mi hingai ding, Trademan, Technical, Nursing Asst., Clerk, Store Keeper ahileh kum 23 tiang hithei ding a hi. Soldier GD a ding ah din sang dan (height) 160 cm hingai ding, Soldier Clerk/Store Keeper - 160 cm., Soldier Technical - 157 cm., Soldier Trademan - 160 cm leh Nursing Asst. a ding ah 157 cm hingai ding a hi. Chun thiamna lam ah a niampen ah Class 8 leh class XII tiang zo te a hiu ngai ding a hi.

Kum 4 sung cycle chawkna ding ah a sum kikhawl zosia donate bawltu’n a damsung cycle a thawn ah mu ding

Villupuram, Aug. 22 (Nisin Thuhiltu) : Villupuram, Tamil Nadu ah kum 8 ah upa numei naupang Anupriya kiti'n kum 4 sung cycle chawkna ding ah sum a kikhawl daw zosia Kerala tuilet ziak ah haksatna tuak te kithuapina ding in donate a bawl a, mitamtak lungthim khawi in, Hero Cycle company'n Anupriya chu a damsung ah kum sin leh a thawn ah cyle khat piak hiding in a puang hi. Anupriya in kum 4 sung cycle chawkna ding ah a sum khawldaw chu a kigawm ah Rs 8,240 /- a hi. Hero Cycle company’n thutiam a bawl tawh kitawn in 20 August 2018 ni a khan Anupriya chu a thawn in cycle a pia ngal a, mitamtak in zia ah naupang class III sim pan, Anupriya ngaituana leh kipiakzawna chu pakcha mama a hidan uh social media in a taklang zing bawk ui. Anupriya in a genna a chun, TV a etna, Kerela tuiletna mun ah naupang tuilak ah gentheitak ah um te a mu leh lungsiat mama a hi ziak ah a sum thik kikhawlna bawm zosia te khensia, a pa kiang ah Kerala tuilet ziak ah haksatna tuak te kithuapina piak ding ah phutna a nei nung ah, apa lemsakpina tawh kum 4 sung a sum kikhawldaw Rs 8,240 /- chu donate a bawl hin a gen hi.