Nisin Thuhiltu – 19 August 2018

Bamboo Shoot Value Addition Training bawl

CCpur, Aug. 18 *(Nisin Thuhiltu)* : Ropiang Foundation in a chiata august 16-17 in amau office, Mission Road, Hiangtam Lamka ah ni 2 sung BAMBOO SHOOT VALUE ADDITION TRAINING a bawl hi. Zia training-na chun khawpi sung ah nekkawm hawl bangzat hem teldawk ah ziltîl ahiu a, Ropiang foundation in value-added gawtuai products bawldaw kawm a skill training ding tup le ngim a nei dungzui ua, zia lam tawh kisai ah thiamna nei Resource person, Dr. S. Roma Devi leh Manngaihkim in training a piak uh ahi. Zia hunsung a chun gawtuai chichuamchuam ah bawlding dan a ziltîl ui. Dr. Thangchinkhup Guite, Chairman, Ropiang Foundation Trust in a genna ah, gua kiti thingte lak ah khang hatpen leh detdo pen (tensile strength) ahiziak in, bamboo cultivation ah nekhawlna kiningting umthei ding hi’n a gen hi. Ama’n a gendan in zia training hi a bulpatna dan hi’n a gen a, maban ah bamboo-based activities chuamchuam Ropiang Foundation in saito ding hi’n le a gen hi. Zia dungzui chun, gua leh tîng (cane) mangcha ah van bawlna lam tawh kisai ah thiamna neite’n Ropiang Foundation contact di’n chialna a bawl hi.

TKSU in Govt office khak ding; Bandh in zui ding ah vauna bawl

CCpur, Aug. 18 *(Nisin Thuhiltu)* : Thadou Kuki Students Union (TKSU), GHQ in Churachandpur District Kuki Areas huapsung zosia ah Churachandpur Deputy Commissioner, Shyam Lal Poonia, IAS, boycott hi ah a puan banah avaima theipen ah Churachandpur Deputy Commissioner hina apat Shyam Lal Poonia, IAS a lakdaw/transfer ding phutna a bawl zingna chung ah tuni, 18 August 2018 ah thusua a bawlna a chun, a thil demand uh government in tuni tiang ah a limsaklona chung ah 20th August 2018 a pat Churachandpur District ah Govt Office zosia khak ding a hidan uh puang kawm in, Govt nuai ah semtu te’ amau sia leh pha hiatna office a kai ding, thil dawi umlo a chung ua a tun leh amaw a kipuak ding uh hin a taklang ui. Zia tiang a chu Govt. in a demand uh a sukpitinlo ahileh 22nd August zankim a pat 24th zankim tiang ah Churachandpur District ah bandh bawl ding un vauna a bawl hi. Bandh hun a chu medical emergency leh Media person te bep thakawl hiding tin a taklang hi. Hiatthei khat chu, India Government in Kuki-te maban ding ngaitualo ti ah Kuki Inpi Manipur (KIM) in August 8, 2018 zingkal dak 6:00 apat August 9, 2018 zingkal dak 6:00 kikal ah dakkal 24 sung, Kuki-te chenna zosia ah total shutdown puan hun tawh kituak ah Churachandpur District Administration in Cleanliness Drive a chiapina chung ah, KIM in Churachandpur Deputy Commissioner, Shyam Lal Poonia chung ah a lung awilo thu taklang kawm ah thuneitu te’n akintak ah Churachandpur District Deputy Commissioner, Shyam Lal Poonia a lakdaw/transfer ding phutna a nei himaleh limsak ah a umlo ziak ah Thadou Kuki Students Union (TKSU), GHQ in KIM support bawlna thu puang kawm ah Deputy Commissioner, Shyam Lal Poonia, IAS, chu Churachandpur District Kuki Areas huapsung zosia boycott hi ah a puan banah 10th August 2018 apat a office (Deputy Commissioner office) khakpiak hiding ti ah le a puan a hia, state government in 15th August 2018 masang ah Deputy Commissioner Shyam Lal Poonia, IAS a lakdaw/transfer lo ahileh TKSU in Kuki Civil bodies te tawh kithuhiat ah kiphinna a khauzaw sem ah bawlding khawksalo hi ah a la taklat hita a hi.

Ni 3 sung um ding NPCDCS training kipan
CCpur, Aug. 18 *(Nisin Thuhiltu)* : CMO Conference Hall, CMO Campus ah ni 3 sung Medical Officer-te a ding ah Population Based Screening of Common NCD under National Program for Prevention and Control of Cancer, Diabetes, Cardiovascular Disease and Stroke (NPCDCS) neiding kiti tuni, August 18, 2018 zingkallam in training pat in a um hi. Training ahileh Manipur a district pathum ah Health & Wellness Centre patdaw ding panlak ahi dungzui ah Medical Officer-te ziltîlna piak in a um ua, training ah Churachandpur, Chandel, Imphal West leh Thoubal District apat Medical Officer 30 a pang ua, August 21, 2018 ah training zoding ahiu. Training hun in Specialist Doctor, Senior Medical Officer leh Medical Officer 16 in ziltîlna pe ding ahiu. Zia training hi Medical Superintendent Conference Hall, District Hospital ah August 7-10, 2018 sung a nei ding kiti himaleh, August 8, 2018 apat District leh State ah bandh ban ah government suty ziak ah sutzawp theilo ah ala um hi’n a kigen hi.

Gari accident ah nupan khat liam

CCpur, Aug. 18 *(Nisin Thuhiltu)* : Tangmual khua, Tedim Road lai ah tuni, August 18, 2018 nitaklam in Two-Wheeler, Lamka lam apat kipan Bajaj Avenger (Registration No. MN02B 3926) leh Mata lam apat kipan, Eco Van (Registration Number WB06J 4570) kiphukha’n ziana a chun, Avenger a chuang te’n liamna tuak in nitaklam dak 3:15 vel a District Hospital puaktung in a um ua, Observation Room ah kawi in a um ui. Avenger ah chuang te chu, Mangminthang (27) s/o (L) Khupsum leh a zi, Grace of Tangmual te a hiu a, doctor ah ki-checkup sak innlam zuan ah a kile kit hun ua zia gual tuaksiatna chu tuak a hiu. A zi Grace ahileh nauvawp, hapta kit vel ah nau neithei ding ah ginchat hin a kigen hi. Eco Van ahileh Robert (27) s/o T. Kakkholen of Hill Town in ahek hi’n a kigen a, thiltung hun ah hattai thim himaleh a kiphut khak kuan ua, gari brake manman hi’n a lawipa Minthang in gen a, himaleh a hattai ziak ua gari kiphukha a hidan uh a gen hi.

Henglep lampi siamna ding ah Rs. Crore 60 sanction

CCpur, Aug. 18 *(Nisin Thuhiltu)* : Socio-Economic Development Organization (SEDO) in tuni, August 18, 2018 in Sumkong Kaimun, Tuibuang ah Pathian’ kiang a kipakthu genna Maicham a siam hi. Kum 2014 apat Henglep lampi ngaikhawk ziak ah kiphutdawk SEDO in mipi sum chawmkhawm ah Tuibong apat Henglep kikal lampi a siamna a pat first alignment tiang zo, PMGSY Scheme nuai ah Government in zia lampi chu a siamna dung ah Rs. Crore 60 sanction a bawlna chung ah Pathian’ kiang ah kipakna maicham siam uh ti a hi. Hun matna chu, Paokholal Haokip, MDC Henglep, Ashong Kom, PA to MP, Mary Kom, Henglep Area Chief Association, KWU, KSO Hengle, EPF Henglep leh lawiupa chuamchuam ten a uap ui. H. Lhunpu, Secretary, SEDO apat banah lawiupa chuamchuam in hun mat sung in thugenna a nei ua, Sholal Haokip, Chairman, SEDO in quality hawitak ah lampi siamdawna ding ah company chuamchuam hopi ah um ti’n a gen hi.

ADC/CCpur thu ah hiatsak
CCpur, Aug. 18 *(Nisin Thuhiltu)* : Th. Chittaranjan Singh, OSD/ Secretary to the Governor of Manipur in Governor min ah Manipur Chief Secretary a hiatsakna a chun, Manipur Chief Manipur (Hills Areas) Distruict Council Rules 1972 nuai ah Rule 3(1) tawh kituak ah avaima theipen ah ADC/CCpur ah Chairman thak telna a vaima theipen ah a um theina ding ah panlakna nei ding in a hiatsak hi.

Pooja Elangbam, IAS tawh hun mangkhawm

CCpur, Aug. 18 *(Nisin Thuhiltu)* : Lalpuithluaii Foundation School, Bungmual in tuni, August 18, 2018 zingkallam dak 11:00 in Pooja Elangbam, IAS tawh kipawlkhawmna hun a mang hi. Zia hun a chun, district sung apat school 7; Don Bosco Higher Secondary School, St. Mary’s High School, Grace Academy, Rayburn School, St. Paul’s Institute, Ebenezer Academy leh Childrens’ Training Higher Secondary School apat student bangzat hem a pang ui. Pooja in tîlkhona nei in, student hunsung a nu-le-pa ban ah ziltîltute apat tunung ah maban ding kizildawk ahi ti’n a gen a, chuleh lekha bep hilo ah kihelna lam leh midangte tawh kipawl dan le zilding pawimaw ahida’n a gen hi. Zia kipawlkhawmna hi, naupang te’n maban sautak mulawk kawm ah thiamzil ding dawina leh Civil Service lam a lunglutna a nei ding uh dawisakna ah Lalpuithluaii Foundation School in zia hun hi a sai hi’n a kigen hi.

Routine Immunization nei
CCpur, Aug. 18 *(Nisin Thuhiltu)* : District Family Welfare Officer (DFWO) Churachandpur in district sung a Routine Immunization tawh kisai a Session Site a bawldawnate ah tuni, August 18, 2018 in mun chuamchuam ah Routine Immunization nei in a um hi. Routine Immunization ahileh thasîn ah ningani leh kiginni cheng ah Session Site khenkhat munte ah nupi gâilai leh naupang kum 16 apat a nuailamte a ding ah kibawlsek ahi. Tuni’n Tuibong ah naupang 33, Go Cin Khup Veng ah 14, Bijang ah 25, Tuinom ah 2, Headquarter Veng ah2, a kigawm ah naupang 76 kiang ah natna chichuamchuam apat kivenna damdawi dawnsak leh kap in a um ui. Routine Immunization hun ah naupang kum 10-16 kikal ban ah numei nauvawpte tetanus kap ahiu a, kum 5-te DPT kap leh vitamin A dawnsak in a um ui. Chuleh naupang kum 2-4 kikalte Vitamin A dawnsak ahiu a, nausen tha te vitamin A leh Measles-Rubella (MR) ban ah Japatese Encephalitis (JE) a pawimaw dungzui ah kap ahiu a, kum khat -leh-kimte DPT kap leh Vitamin A dawnsak ahi ban ua JE/MR a pawimaw dungzui ah kap ahiu. Chun, nausen tha khat-le-kim apat kum -le-kim kikalte OPV dawnsak leh Pentavalent leh IPV kap ahiu.

Trial-cum-Selection Test um ding
CCpur, Aug. 18 *(Nisin Thuhiltu)* : District Youth Affairs & Sports Officer (DYASO), Churachandpur leh Pherzawl vaisaina in District Level Inter-School Games Trial-cum-Selection Test um ding ahi. Zia ding achun, under 14 leh under 17 numei leh pawsal a ding Badminton, under 14 numei Hockey, under 17 pawsal Hockey, under 14 leh under 17 Wrestling leh under 19 Wrestling a ding in August 29, 2018 chan ah form piaklut thei ding ahia, August 30 leh 31, 2018 in Churachandpur Indoor Hall, Hiangtam Lamka ah etthâkna um ding ahi.

Under 17 numei leh pawsal a ding in Cycling, under 14 numei leh pawsal football, under 14 leh 17 ah numei leh pawsal Judo, under 14 leh under 17 ah numei leh pawsal Table Tennis leh under 14 numei leh pawsal Kho-kho a ding in September 5, 2018 chan ah form piaklut thei ahi. September 6-8, 2018 kikal in Peace Ground, Tuibong ah zingkal dak 6:30 in etthâkna um ding ahi. Lunglutna neite’n August 20, 2018 apat DYASO Office, Tuibong ah office kai hunsung a Eligibility Certificate lakthei ding hi’n M. Mohendro Singh, DYASO, Churachandpur leh Pherzawl in hiatsakna a bawl hi.

Minister Shyam in paddy land data bank tawh kisai website hawng

Imphal, Aug. 18 *(Nisin Thuhiltu)* : Revenue Minister Karam Shyam in tuni’n ama office ah Manipur Conservation of Paddy Land & Wetland Act, 2014 chiapina ding in website a hawng hi. Zia website a chun, Data Bank leh paddy land details banah satellite pictures ah survey kibawlna te suklat in a um hi. Hawn thak ah um website chu Manipur Remote Sensing Applications Centre (MARSAC), Department of Science & Technology (DST) for Revenue Department, Government of Manipur in ISRO kithuapina tawh a siam a hi. Website hawnna hun chu, Revenue Secretary T Ranjit, Deputy Secretary Y Rajen leh MARSAC officials te’n a uap ui. Minister Karam Shyam in thuthak lakhawm mite kiang ah a genna a chun, paddyland databank in gam chungchang ah buaina chuamchuam um te suveng ding a hidan gen in, government panlakna chu mipi te’n support chiat ding leh kithuapina pechiat ding in chialna a bawl hi. Chuleh, Manipur Conservation of Paddy Land & Wetland Act, 2014 kituptak ah chiapi hiding, agriculture/wetland areas thil dang ah hei lumlet kiti dank al hiding, Section 20 of Manipur Land Revenue & Land Reforms Act 1960, tawh kituak ah State Government @ Rs.25/-per sq. m ah liausak hiding, “non-residential purpose ah agricultural land siam danglam ahileh Rs. 100/-per sq. M liausak hiding in a gen hi. Manipur Conservation of Paddy land and Wet land Act 2014 chu lo-bawlna gam venbitna ding chiapi ah um, 10 Sept 2014 ah kimangpan hita hi’n a gen hi.

JCILPS students’ wing in NIT, Manipur khak

Imphal, Aug. 18 *(Nisin Thuhiltu)*: Nation Institute of Technology, Manipur ah sem ding faculties 22 lakna ding ah Kolkata ah interview ko ah um dawilo ziak in tuni’n
Joint Committee on Inner Line Permit System (JCILPS) students’ wing in Nation Institute of Technology, Manipur office a khak ua, chabi’n a kam piak bawk ui. JCILPS students’ wing in zia interview chu Manipur ah nei ding in phutna anei bawk ui. Interview ahileh August 18 leh19 ah Hotel Gateway, Calcutta ah um ding ah guanggal a hi. JCILPS) students’ wing in Nation Institute of Technology, Manipur a khak tawh kitawn in director, NIT Manipur kiang in memorandum piaklutna le a nei a, Manjit Sarangthem, convenor, youth wing in a genna a chun, Imphal ah interview umsak ding ah director, NIT, Manipur kiang ah dawtna siam a hidan uh gen in, Manipur pawlam ah interview nei ding ah guanggal ah um chu Manipur mipi te thuneina kilakpiak gual ah ngai uh hin a gen hi. Chuleh, state pawlam ah interview bawl ding ah guanggalna um cu nekguk leh gulgukna a um ding dawina ziak hin a gen hi. A demand uh sukpitin piak ahiloleh kiphinna khauzaw sem nei ding uh hin le a gen hi.

Manipur ah political party 11 in core committee siamdawk
Imphal, Aug. 18 *(Nisin Thuhiltu)* : Manipur ah political parties 11 te’n core committee siamdawk in, state leh Centre ah BJP-led governments in panlakna hawilo um te dodal khawm ding in lemsakna a nei ui. Zia ah party 11 te chu Congress, CPM, CPI, North East India Development Party (NEIDP), Nationalist Congress Party (NCP), Janata Dal Secular, All India Trinamool Congress, All India Forward Bloc (AIFB), Revolutionary Socialist Party (RSP), Bahujan Samaj Party (BSP) leh Aam Aadmi Party (AAP) te ahiu a, Congress MLA lui R.K. Anand in convener hina tawh zia ah 22-member committee chu mapui ding, CPI assistant secretary Kh. Surchand leh NEIDP vice-president O. Malesh te co-convener hiding un, Manipur CPI president L. Sotinkumar in a gen hi. CPI MLA lui M. Nara in a genna a chun, BJP government in anti-people leh communal stand a nei te tin leh ha thua ah dodal ding a hidan gen in, central leaders te lemsakpina tawh core committee kisiamdawk hi’n a gen hi. Core committee in BJP-led governments in buaina chuamchuam a tunsak te nasatak ah dodal ding, Centre ah NDA government northeastern states te tawh kizawp matna kituptak neilo ahina chung ah policy hawilo taktak a chiapi te dodal ding ah core committee siamdaw ah um ti’n a gen hi. Chuleh, BJP government in Manipur meikuang sak in a gen a, thudawt masakna umlo ah Centre leh NSCN (Isak-Muivah) in ceasefire agreement suai kai kawm ah August 3, 2015 ah framework agreement suai kai un a gen hi. Indian Union ah Manipur merger kibawl chu Manipur kipumkhatna suksiatna ding hilo tin le a gen hi.

Rs. 12 crores man ding khamthei mandawk
Imphal, Aug. 18 *(Nisin Thuhiltu)* : L Youjang Village, Moreh ah Assam Rifles in Brown Sugar1.3 Kgs leh WY tablets chang 1,30,000 amandawk a, zia chu a sum ah Rs. 12 crores man hizo ding in a kigen hi. Directorate of Revenue Intelligence (DRI), Imphal in thuguk a mu dungzui ah Moreh Battalion team in L Youjang Village ah raid a bawl hun ua ziagual khamthei chu a mudaw uh a hi. Khamthei neitu ahileh, Mr Thangminlen Haokip s/o Ngulkhojam Haokip, of L Youjang village a hi. Zia ah matdaw ah um khamthei te chu DRI Imphal khut ah piakdaw in a um hi. Hiatthei khat chu, March 2018 a pat 26 Sector Assam Rifles in Tengnoupal District in Rs. 65 crores man ding khamthei a mandawk hi.

Hill Area Autonomous District Council in thupukna chuamchuam siam
Imphal, Aug. 18 *(Nisin Thuhiltu)* : District Council Bhavan , Chingmeirong, Imphal ah tuni’n one day political conference of the members of the hill Area Autonomous District Council kiti a um hi. Zia hun a chun, state sung ah Hill Areas Autonomous District Council Acts 1971 kituptak ah implement bawl ding council in phutna a nei a, political conference in a chuam ah State Budget nuai ah Budget Demand Head a nei ding, zia chu District Council Act 1971 leh Rules 1972 for Manipur Hill Area Autonomous District Councils nuai ah Section 45 & Rules 32 tawh kituak ah chiapi ding ti’n lemsakna a nei ui. Manipur District Council 6 ah Members te Salary leh Allowances sukpun ding, Section 27 (B) of District Councils Act, 1971 (amended Act of 2008) tawh kituak ah Ex- members leh Council employees pension te law punsak ding, a vaima theipen ah District Councils 6 nuai ah post awng ah um te luatu ding lakna recruitment bawl ding, Hill districts ah gam leh gua thu ah Manipur govt. In alotheilo ah District Councils a thuhiat ding un political conference in thupukna a siam hi. Chun, za ah demand umte chu September 2018 tiang ah sukpitin ahiding, zia chu ahiloleh kiphinna pat hiding ti’n lemsakna a nei ui.

MHRD in MU buaina chung ah Fact Finding Committee siamthak
Imphal, Aug. 18 *(Nisin Thuhiltu)* : Ministry of Human Resource and Development (MHRD), Govt. of India in Manipur University Community te demand Vice Chancellor paithakna ding tawh kisai in fact finding committee a siamthak a, zia chu 2 member enquiry committee in khualna a nei ding ti a hi. MHRD order in a taklatna a chun, Fact Finding Committee a la kisiamdawk chu phiat ah um leh 2 member enquiry committee in thil umdan khualna anei ding ah lemsakna um in a taklang a, 2 member enquiry committee chu Former Acting Chief Justice of Meghalaya High Court , T Nandakumar in Chairperson hina tawh amapui ding leh Former Vice Chancellor of Tezpur University in member hina tawh Manipur University Vice Chancellor Prof. AP Pandey chung ah ngawna um te khualna a nei ding uh ti a hi. Alangkhatlam ah MUSU, MUSA leh MUTA panna . Manipur University community in enquiry zawthian masang ah Prof. AP Pandey leave piak ah um chu umzawm zing ding in lemsakna anei ua, ni 79 kiphinna anei uh chu MHRD leh MU community kinawptuana dungzui ah chawlsak ah um in a taklang ui.

Prime Minister Narendra Modi in Kerala tuiletna aerial survey bawl

Kochi, Aug. 18 *(Nisin Thuhiltu)* : Prime Minister Narendra Modi in tuni’n Kerala ah tuiletna mun te aerial survey a nei a, PM's National Relief Funds (PMNRF) apat thina tuak te innsung mite kiang ah Rs. 2 lakh leh liamna tuak te Rs. 50,000 chiat ex-gratia piak ding in a tiam hi. Kerala Chief Minister Pinarayi Vijayan, Union Minister KJ Alphons leh official dang dang te tawh review meeting a nei hun ua Prime Minister in state kithuapina ding in Rs 500 crore piak hiding in a gen a, zia hi a chiata August 12 ni ah Rs. 100 crore ah kithuapi ding hi ah ala puan belapna ding ahi.

Meeting hun ah PM Modi in tuilet ziak ah thina leh siatna tung te chu da um a sak thu puang in relief material kiningting piak ding a tiam a, Tuilet in a suk khak innkuan te leh beneficiary te’n Social Security Schemes (SSS) nuai ah a hun tak ah compensation a mu theina ding ua assessment a ding special camp nei ding in Prime Minister Modi in Insurance Company te thu a pia, Fasal Bima Yojna nuai ah agriculturist te’n a vaima thei pen ah clearance a mu theina ding ua le hiatsakna a bawl hi. Chun, tuilet in a suksiat main national highways te siampha ding in National Highways Authority of India (NHAI) kiang ah a hiatsak a, power lines te siamphatna ding ah State government kithuapi ding in le NTPC leh Power Grid Corporation of India (PGCIL) te hiatsak in aum u’i.

Meeting hun a chun, khawcha ah cheng, tuilet in a chenna inn uh a suksiat piak innkuan te chu Pradhan Mantri Awas Yojana-Gramin (PMAY-G) nuai ah inn thak sak piak ding ti’n a thupuk ua, the Mission for Integrated Development of Horticulture nuai ah lobawlte kiang ah kithuapina piak hiding ti’n le a thupuk u’i. Prime Minister Modi thupiak dungzui ah a chiata July 21 a khan Kiren Rijiju, MoS (Home), K.J. Alphons, MoS (I/C) leh high-level Central Team khat in tuiletna district - Alappuzha leh Kottayam te dinmun leh relief measure te chung chang enthâkna a nei u’i. State government in Centre kiang ah a piaklut Memorandum dungzui ah Inter-Ministerial Centre Team (IMCT) in August 7-12 sung a khan Kerala ah tuilet in siatna bang gual tut ahi etthâkna a la nei uh ahi.

Kerala Chief Minister Officer (CMO) in zani’n, tuilet ziak ah mi 324 in thina tuakta hi’n a gen hi. Twitter ah CMO in thusua a bawlna a chun, thina tuak mi 324 hita in a dang mi 2,23,139 tuam te relief camps 1500 ah aum ua, tuchung chu Kerala in kum 100 sung ah tuilet a tuak huaisia pen hita ti’n a taklang hi.
Ni banghem zat chiata apat Kerala ah gua zuk a nasat mama ziak in state sung mun chuam chuam ah tuilet leh nimchim aum hi. Prime Minister Narendra Modi in tuni’n Kerala Chief Minister Pinayari Vijayan kihopi in tuilet dinmun entha ding ah state pha ding ahi dan a hiatsak hi. Tuilet dinmun in siatlam a manaw zing tawh kitawn ah Centre in rescue & relief operations nasatak in a chiapi a, operation a ding ah Army, Navy, Air Force, Coast Guard leh National Disaster Response Force (NDRF) te chu mipi panpi ding ah sawl in aum u’i. Indian Railway in le kithuapina ding ti in, tuiletna mun te a chun dawn ding tuithiang pua, a za ah sim wagon cars te a sawl hi.