Nisin Thuhiltu – 13 August 2018

Bravery Award tawh Ngamlien Touthang chawisan ah um

New Delhi, Aug. 13 *(Nisin Thuhiltu)* : A chiata 14th June 2018 ni ah Bay of Bengal tuipi chung ah Cargo Ship khat mei in a kat hun ah India mi (Cargo Ship crew) 22 thi ding dinmun ah a um lai ua Indian Coast Guard, Haldia Port ah Commandant, Ngamlien Touthang mapuina’ hangsan tak ah Indian Coast Guard te’n Cargo Ship crew 22 te a hukdawna chung un, ABP News Channel in rescue mission mapuitu Ngamlien Touthang chu tuni, 13th August 2018 in ABP Bravery Award tawh a chawisang hi. Zia hun a chun, Bollywood actor Akshay Kumar in zana sangtak pia kawm in, Ngamlien Touthang khut ah Bravery Award piakdawna a nei hi. Ngamlien Touthang ahileh, Bijang, CCpur a pat a hi.

North East Region Peace Consultation nei ding
Guwahati, Aug. 13 *(Nisin Thuhiltu)* : Indo Global Social Service Society (IGSSS) leh Joint Peace Mission Team (JPMT) Guwahati kithua khawm in 31st August 2018 leh “Can We Live as ONE” ti thupi nei ah Regional Peace Consultation workshop nei ding a hiu. Zia hun a chu, I gam sung buaizing na te bang ziak ahem, buaina um phat le bang gual ah pan mun ala ki lasek ahem, bang gual a maban panmun lawm khawm thei na ah um thei diam ti te genkhawmna a nei ding a hiu. Adiak ah Manipur, Nagaland leh Assam state te a buai diak sek ti a hi dungzui ah zia state pathum te a pat buaina a umphat leh chamna (Peace) um theina ding ah panla te apat apat lak dan teu ngai thak hi ding ahi. Manipur apat Rev S Prim Vaiphei, President All Manipur Christian Organization, Dr Rev Solomon Rongpi, General Secretary CBCNEI, Archbishop Thomas Menamparampil, JPMT Chairman leh Nagaland Peace Forum ah lawiupa te’n zia hun chu uap ding a hiu. Chun, Biak In leh khawtang pawlpi te’n chamna a um zing thei na ding ah mawpuakna a neidan uh le zia workshop a chu genkhawm hiding in a kigen a, workshop hunsung ah Kaplianlal Thangluai, Assistant Manager IGSSS in Assam ah Peace project ah anasep dan uh leh Peace Road map ti topic mang ah session la ding a hi.

Parbung Airfield ding etthakna nei

CCpur, Aug. 13 *(Nisin Thuhiltu)* : Government of India in, UDAN (Ude Desh ka Aam Naagrik) nuai ah regional airport siamhawi ding leh regional connectivity siamhawi ding ah panlakna a nei zing tawh kitawn in, Manipur state ah le UDAN (Ude Desh ka Aam naagrik) Scheme nuai ah Helicopter service umsak hiding a hi. Manipur state sung a biktak ah Thanlon, Parbung, Moreh, Tamenglong leh Jiribam ah Helicopter service umsak ding ti ahi dungzui in 12th August 2018 in Pawan Hans Ltd engineer leh official team khat in Parbung Airfield ding etthakna a nei ui. UDAN scheme nuai ah helicopter service chu New Delhi, India pansa helicopter service company, Pawan Hans Limited in a chiapi ding, sen leh so chung ah Centre leh state in 75:25 ah a puakdaw ding uh ti a hi.

SWAT course zo

CCpur, Aug. 13 *(Nisin Thuhiltu)* : Delhi Police nuai ah sem, Ms Phalneithem Vaiphei @Themmy d/o Famta Lt. Tongmang Vaiphei, Bungsang Village, Dimapur District chu North East state chuamchuam apat numei police SWAT (Special Weapon and Tactic) team khat ah sem ding mi 36 teldaw ah umte lak in a pang a, Police Training College, Jharoda Kalan & NSG Centre, Manesar, Haryana ah tha 3 sung hard-core SWAT Training panna tha 12 sung SWAT Course /commando training a nei nung un, 9th August, 2018 in training a zo hi. Hiatthei khat chu, India ah numei SWAT (Special Weapon and Tactic) team ah sem leh commando training zo avâng mama nalai hi.

Thanlon ah mobile network mipi kinepna gual hilo
CCpur, Aug. 13 *(Nisin Thuhiltu)* : Thanlon khua a mipi khualna ziak ah Airtel Company in mobile phone network piakdawna ding ah Airtel Tower a tundaw uh kinepna gual hilo in a kigen hi. Airtel Company in tukum May 2018 ah Airtel Tower a tundaw uh matthei ding ah siamdaw himaleh tulak network umlo hun tamzaw hi’n a kigen a, zia ziak a chu customer tamtak lung-awilo ua hiat a hi. Zia ah tower chu Thanlon banah khua tamtak te network pedawk tu himaleh kituptak ah a function lo ziak ah customer te ding ah lemchanlona um zing sek ti a hi. Ziana chung a chu a kisaipi thuneitu te’n a vaima theilam ah panlakna a nei ding uh a nawpthu’u customer tamtak in a gen ui.

Innpi pathum in maban panlak dingdan genkhawm
CCpur, Aug. 13 *(Nisin Thuhiltu)* : Mizo People Convention MPC Manipur Office, Hmuia Veng ah District sung ah Innpi pathum, Zomi Counil ZC, Hmar Innpui leh Mizo People Convention MPC Manipur ah lawiupa te’n zani, 12th August 2018 nitaklam dak 2:00 in meeting a nei ui. Zia hun a chun, Manipur ah Non-Naga Thingtangmite dinmun tawh kisai in thu chuamchuam genkhawmna a nei ua, Indo-Naga Framework Agreement puandaw hileh Manipur ah cheng non-naga Thingtangmite bang dinmun ah um ding, tu ah UPF leh KNO in Territorial Council demand a bawlna chung ah tuni tiang ah a min ding phuak theilo ah a umna, innpi te’n panlakna nei theilo ding a hi diam ti te panna issue chuamchuam genkhawmna a nei nung un, Thadou innpi leh kuki inpi Manipur tawh genkhawmna nei ding in lemsakna a nei ua, John Khatthang Ngaite, Chairman Zomi Council in Convenor hina tawh meeting amapui ding in le lemsakna a nei ui. Tu dinmun ah Indo-Naga Framework Final Settlement sawttalo ding, zia ding a chu NSCN IM in kisak lawkna nasatak nei zing ti a hia, Indo-Naga Framework tawh kisai ah a chiata August 10, 2018 ni ah NSCN IM in Hotel Saramati, Dimapur ah Nagaland GB Federation NGBF tawh consultation meeting nei ah, NGBF in NSCN IM chu a tawp tiang ah zui ding ah lemsakna nei ti a hi. Indo-Naga Framework tawh kisai parliament monsoon session hun ah final agreement puandaw ding ah mitamtak in a ginchat uh himaleh puangdawk manlo ah parliament monsoon session zaw ah um, Parliament Winter Session hun ah puandaw hiding ah ginchat a hi. Zia ziak a chu Manipur ah cheng, Non Naga Thingtangmite dinmun ding ngaikhawk ziak ah District sung a innpi pathum ten meeting a nei uh hi’n a kigen hi.

CCpur Doctors Association in activity chuamchuam nei ding lemsa
CCpur, Aug. 13 *(Nisin Thuhiltu)* : Churachandpur Doctors Association (CDA) in August 12, 2018 in Executive & Advisory Board Meeting a nei hi. Zia hun a chun District ah damtheina lam ah chualchum diak khua khenkhat te hawldaw ding leh zia mun a chu medical camp nei ding, khamthei dodalna ding ah live programme leh activities chuamchuam nei ding in lemsakna a nei ui. CDA Executive member te ahiuleh - Dr Seanbawi Vaiphei, Dr N Thangginmang, Dr Liangoumuan Samte, Dr Hegin tungdim, Dr Zamlianmang Gangte, Dr Chingbiakhoih, Dr Chingnunsiam leh Advisory Board member - Dr Vumchinpau tonsing, Dr Kim Simte leh Dr N Tualkhankham te a hiu.

TKSU in DC/CCpur Office gate khak
CCpur, Aug. 13 *(Nisin Thuhiltu)* : Thadou Kuki Students Union (TKSU), GHQ in Churachandpur District Kuki Areas huapsung zosia ah Churachandpur Deputy Commissioner, Shyam Lal Poonia, IAS, boycott hi ah a puan tawh kitawn in, tuni, 13 August 2018 in Deputy Commissioner office gate ah Deputy Commissioner dawilona thu kizikna chuamchuam poster a tak ua, Deputy Commissioner office gate a khak piak bawk ui. Hiatthei khat chu, India Government in Kuki-te maban ding ngaitualo ti ah Kuki Inpi Manipur (KIM) in August 8, 2018 zingkal dak 6:00 apat August 9, 2018 zingkal dak 6:00 kikal ah dakkal 24 sung, Kuki-te chenna zosia ah total shutdown puan hun tawh kituak ah Churachandpur District Administration in Cleanliness Drive a chiapina chung ah, KIM in Churachandpur Deputy Commissioner, Shyam Lal Poonia chung ah a lung awilo thu taklang kawm ah thuneitu te’n akintak ah Churachandpur District Deputy Commissioner, Shyam Lal Poonia a lakdaw/transfer ding phutna a nei himaleh limsak ah a umlo ziak ah Thadou Kuki Students Union (TKSU), GHQ in KIM support bawlna thu puang kawm ah Deputy Commissioner, Shyam Lal Poonia, IAS, chu Churachandpur District Kuki Areas huapsung zosia boycott hi ah a puan banah 10th August 2018 apat a office (Deputy Commissioner office) khakpiak hiding ti ah le a puan a hia, state government in 15th August 2018 masang ah Deputy Commissioner Shyam Lal Poonia, IAS a lakdaw/transfer lo ahileh TKSU in Kuki Civil bodies te tawh kithuhiat ah kiphinna a khauzaw sem ah bawlding khawksalo hi ah a la taklat a hi.

Manipur Pineapple Queen Contest
CCpur, Aug. 13 *(Nisin Thuhiltu)* : Manipur Pineapple Festival Committee, Manipur organize bawlna, September 6, 2018 leh Khousabung ah a 11th State Level Manipur Pineapple Festival 2018 matna um ding a hi. Zia hun a chu Manipur Pineapple Queen Contest nei hiding, lunglutna nei, pawsal nei nailo, kum 18 chunglam te’n Rs. 500 pia in Entry Form lathei ding a hiu a, August 18, 2018 ni ah Kuki Inn, Imphal a Screening nei hiding a hi. Entry form ahileh DOVE’s Keishampat, Churachandpur Bus Parking, Imphal, Somamani Mobiles, Moirang, Donna Pharmacy, New Lambulane, Hope’s Computer, Tuibong leh Bright Pharmacy, Motbung ah le muthei hiding a hi.

Independence Day 2018 a ding ah Full Dress Rehearsal bawl

CCpur, Aug. 13 *(Nisin Thuhiltu)* : District Level ah August 15, 2018 leh Peace Ground, Tuibong ah 72nd Independence Day 2018 mat hiding ahi. Zingkallam dak 9:00 apat District Administration, Churachandpur mapuina nuai ah 72nd Independence Day 2018 mat hiding, Shyam Lal Poonia, IAS, DC Churachandpur in Chief Guest hina tawh hun matna uap ding, zingkallam dak 9:30 ah Chief Guest in Parade Contingent-te etthakna nei ah, National Flag kaipal ding, March Past contingent-te apat Salute la ding a hi. Guest-te apat thugenna um ding, kipakpina thilpiak chuamchuam piakdawna um ding leh government department chuamchuam in stall a bawlteu Chief Guest mapuina official team in etthakna nei ding, Nam lam suklatna hun um ding a hi. Independence Day matna kawm ah District Administration XI team leh Civil Society XI team te’n Football Exhibition match le nei ding a hiu. Zia ding tawh kisai a chun, tuni, August 13, 2018 zingkal dak 8:00 in Peace Ground, Tuibong ah Full Dress Rehearsal bawlna a um hi. Zia ah Rehearsal chu Senior SP, Kabib, IPS in le a uap a, Independence Day hun ah march past chu Senior leh Junior a kikhen ah kidemna ah chiapi hiding, 1st prize Rs. 5,000, 2nd Rs. 3,000 leh 3rd Rs. 2,000 hiding leh Contingent zosia kihelna van piak hiding a hi. Chun, H. Johny Sharma, MPS, SDPO Churachandpur Parade Commander ah pang ding, Havildar Thangroukhum Joute leh Havildar Lalbir-te Pilot ah pang ding, Havildar L. Surjit Sharma mapui First IRB, Churachandpur te Band Party ah pang ding a hiu. Parade Contingent ah ZEO Churachandpur in school 24, CEO, ADC Churachandpur in School 5 leh Sanitation Team Khat, SP Churachadnpur in Civil Police (Male), Women Police leh VDF contingent khat chiat, JNV, Churachandpur apat Contingent 4, district sung ah School leh College a NCC Cadet-te apat Contingent 6 in march past bawl ding a hiu.

Lampi pam dung ah tanglak khenkhat in zan hun mang sek uh
CCpur, Aug. 13 *(Nisin Thuhiltu)* : Tulai in Tedim Road dung lamsak leh lamthak ah nitak khawthim, zan sawt nung tiang ah pawsal tanglak mun chuamchuam in bangbawl ahiu hiatlo in aki chu sek ua, a lawmlawm ah kichun khawvak tiang phial ah lampi pam ah kichu mu ding a um zing sek hi. Khenkhat-ten zia hun chu hun lemchang ah mang in, khamtheih hina, zu dawnna leh thil hawilo bawlna mang thei ding ua muanmaw in a um a, zia ziak a chun, District Police in nitak sin khawthim kuan leh Tedim Road mun chuamchuam a entha zing sek ui. Police in Tedim Road mun chuamchuam etzuina a nei hun tak tua leh tanglak banah kum tinglo naupang khamthei bawl te nawzak sek un a kigen hi. Zia gual ah khangthak khenkhat in hun amatna chung ua hi, nu leh pa te’n panlakna thak, chate nitak, zan ah khum tup ahiloleh etzui pawimaw in a kilang hi.

Shooting Championship ah Gold Medal la

CCpur, Aug. 13 *(Nisin Thuhiltu)* : Mizoram khawpi Aizawl ah Air Pistol, 6th North East Zone Shooting Championship 2018 ah Mr Lamminlun @ Garie L Khaute s/o Genkholian of Mata, CCpur in Gold Medal a dawng hi. Garie L Khaute ahileh Indian Army, Assam Regiment ah sem, Assam Regiment Training Centre, Shillong ah meithal kap lam ah ziltiltu (instructor) ah le hun sawttak a la pang a hi.

Zeliangrong Areas ah 24 hrs general Strike puang
Imphal, Aug. 13 *(Nisin Thuhiltu)* : Zeliangrong Baudi leh Zeliangrong Youth Front of Assam, Manipur & Nagaland banah All Zeliangrong Students’ Union (AZSU) in Joint Press release a suana a chun, Zeliangrong Youth Front leh Zeliangrong students leader puimang ah a umna chung ah a puimang NSCN-IM cadre te governments of India leh Manipur in amatdawlona chung ah Manipur Zeliangrong areas zosia huap ah Aug. 15 zan apat Aug. 16. Zan tiang ah dakkal 24 sung general Strike chiapi ding a hidan uh a puang hi. Zia hun sung a chu Zeliangrong areas huap sung ah National Highway 37, district highway leh national project chuamchuam um te zosia khak hiding, Schools, govt. offices, business activities, religions, medical/health, water supply leh electricity te zia general strike hun sung a chu thakawl hiding ti’n a taklang hi.

Keishing Y Shimray kithana tawh kisai genkhawm

Imphal, Aug. 13 *(Nisin Thuhiltu)* : Manipur State Assembly Hall kiangnai ah achiata 11th Aug. 2018 ni ah a thisa Keishing Y Shimray (37) s/o Y.S. Mashangyei of Teinem Village, Ukhrul district mudaw ah a umna tawh kisai in tuni’n Tangkhul Peoples Organisation, Imphal, Tangkhul Katamnaolong, Imphal lehTangkhul Sinaolong, Imphal palai te’n Manipur Chief Minister kimupi in, kihona a nei ua, zia hun a chu tualthana kigawl te matdaw ah a um taklna chung ah RIMS Morgue ah thiluang lakdaw ding leh a vuina nei ding in lemsakna a nei ui. Chun, Chief Minister in panpina thei tiang ah thina tuak Keishing Y Shimray (37) insung mite kithuapina piak ding in lemsakna a nei hi. Keishing Y Shimray ahileh Thangmeiband Sinam Leikai ah Munindro (inn neitu) kiti inn lua ah um a hia,11 Aug. nitak dak 7:30 ah me-chaw ding ah inn ah pat pawtdawk chu Manipur State Assembly Hall tawh kinai, Lilashing Khongnangkhong High School, southern side ah footpath ah a thisa a luang kimudawk a hi.

State in 1891 Anglo-Manipur War ah thina tuak te hiatzingna ding ah Patriots' Day mang

Imphal, Aug. 13 *(Nisin Thuhiltu)* : Manipur in tuni’n 1891 Anglo-Manipur War ah thina a la tuak te hiatzingna leh zana piakna’n Patriots' Day a mang a, Bir Tikendrajit leh Thangal General te khailup ah a umna mun uh tu ah Bir Tikendrajit Park a kitina mun ah main function mat in a um hi. Zia hun matna chu Manipur Governor Dr. Najma Heptulla leh Chief Minister N. Biren Singh te’n khuallian hina tawh a uap ua, Cabinet Ministers, Parliamentary Secretaries, MLAs, Chief Secretary, DGP, top civil leh police officials banah student tamtak te’n le hun matna a uap ui. Hicham Yaichampat, Moirangkhom Bir Tikendrajit luang kihalna mun leh Thangal General Temple Complex, Palace Compound ah thina a la tuak te zana piakna leh pakvui piakna tawh hun matna a kipan a, Manipur Rifles contingent te’n guard of honour leh general salute piakna leh minute 2 suunna hun mat in a um hi.

Governor Dr. Najma Heptulla in a thugenna a chun, gitlo bawl chawlsan chiat ah kipumkhatna tawh Manipur khantona ding ah panlak chiat ding pawimaw a hidan a gen a,khantona lam ah India ah state khangto pen ah Manipur a pan theina ding ah panlak ding pawimaw in a gen hi. Bandh culture - bandhs, economic, blockades etc te chawlsan ding dawi a hidan gen in, state khantona ding ah buaina umsaklo ding pawimaw in a gen hi. Kibatlona leh kituaklona um te sukbei ah panlak ding pawimaw a hidan le gen a gen hi. Patriots' Day chu District Headquarter chuam chuam ah le District Administration mapuina mat in a um hi. Chief Minister N. Biren Singh in a thugenna a chun, government in state mipi te kiphumkhatna ding ah panlakna nei zing ding a hidan gen in, state unity leh territorial integrity suksiatna ding thil kiti himhim nasatak ah dodal hiding in a gen hi. Manipur University buaina tawh kisai a genna a chun, HRD Ministry official te’n Imphal pha ding uh leh ni 3-4 zaw ah buaina sukven hita ding ti’n a gen hi. Tu ah state government in Hill-valley kikhenzakna sukiam chuam mama ta hin le a gen a, State Cabinet in JNIMS road chu Pukhrambam Kajao Road ti ding leh Lamphel to Shija Hospital Road chu Chirai Naga Road ti ding ah lemsakna nei in a puang hi.

Chun, government in Hill Leaders’ Day, Meeyamgi Numit, Go to tHills mission, Go to Village, CMHT, CMST, Manipur Start-up Scheme etc a chiapi dan te genlatna nei in, Go to Village camps ah khua 2515 villages lak ah khua 1070 cover hita, mi 1,89,282 in Go to Village camps phatchuampi in a gen hi.
Anti Corruption Cell in total 535 corruption related cases mu leh official khat a sepna a pat haisak ah um, official 11 appointment orderscancelled kibawl, officials 33 suspend ah um, official 10 te warnings piak ah um, retirement benefits mi official 3 te benefits mu hentang piak ah um tin a gen hi.