Nisin Thuhiltu – 05 July 2018

Go to Village camp bawlna ding ah Rs. 21 lakhs reserved ah kikawi: CM

Imphal, July 03 *(Nisin Thuhiltu)* : Manipur Chief Minister N. Biren Singh in tuni’n Heingang Mayai Leikai, Imphal East district ah Go to Village camp a uap a, ama’n a thugenna a chun, State Planning Department in Go to Village mission chiapina a pawimaw dungzui ah matthei ding ah Rs. 21 lakhs reserved ah kawi a hidan taklang in, a chiatha zing fiscal year, State Budget ah a chuam ah Go to Village mission a ding ah fund kawichuam umtheilo in a gen hi.
Go to Village mission chiapina ah a umna ziak tawh kisai a genna a chun, nautang te a pawimaw dungzui ah nisin pawimaw te Government schemes chuamchuam - CMHT leh Ujjala Yojana etc te apat kithuapi ding, (ii) basic infrastructure requirements -water supply, drains leh canals etc ti te siamhawi ding thiltup a hidan a gen hi. State sung ah Rural leh urban areas zosia mission in covered ding, State Government in Go to Village camp bawlna apat complaints/cases 350,000 muta leh complaints/cases 300,000 te sukven hita hi’n a gen hi.

Thoubal Moijing ah Go to Village camp chiapi ah a um hun ah mi a tam mama ziak ah official te leh mipi te kal ah kihiatthiamlona a tunna tawh kisai a genna a chun, households/persons Go to Village mission phatchuampi thei ding te examining zaw leh a pawimaw dungzui ua, kithuapina piak hiding a hidan gen in, kuama lungkham tak leh lungthim nuamlo tak ah umlo ding in chialna a bawl a, kinaw tak ah camp chiapi ziak ah hiatmil khak a um tak in le a phatchuampi thei ding mite mission nuai ah panpi leh kithuapi zing tho hiding in a gen hi. Government in 2019 kumbul lim ah Go to Village mission round 1 zawthian ding ah guanggalna nei in a gen hi.

Chief Minister in Awaching Kshetri Bengoon Mamang Khul ah eviction drive chiapi ah a umna tawh kisai a genna a chun, State Government tha khat masang ah eviction notice issued a bawl hita himaleh Reserved Forest Area ah cheng te a kichawndawlo ziak ua, eviction drive kibawl in a gen a, CM Secretariat ah All Manipur Muslim Organisations Co-ordinating Committee (AMMOCOC) palai te a kimupi hun ah eviction drive chiapi pawimaw a hidan leh Court case um a hidan te AMMOCOC palai te hiatsak leh genpi a hidan a taklang hi.

Court in State Forest Department leh Green Tribunal chu Reserved Forest Area ah cheng te chung ah action la ding ah mawpuakna a piak tawh kitawn ah State Government in advance ah hiatsakna bawl masa, zia zaw a chu eviction drive chiapi hi’n a gen hi. Eviction drive chiapi ah a umna chung ah community khenchuam nei ah nasep thilbawk kinei ah kuama’n ngaidan neilo ding leh kua hitaleh Reserved Forest Areas ah cheng te chung ah eviction drive chiapi hitho ding a hidan a gen hi. State Government in tunung ding khualna ziak ah ziagual nasep chu chiapi ahina chung ah mizosia’n government panlakna support chiat ding in chialna a bawl hi.

Heingang Mayai Leikai, Imphal East district ah Go to Village camp um hun sung a chun, Government Departments 24 te’n stall hawng in, birth certificates, death certificates, income certificates, domicile certificates, Aadhaar, weaver cards, CMHT cards, tailoring machines, embroidery machines leh gas connections ti te a phatchuampi thei ding ah teldaw chuam ah um te kiang ah piakdaw in a um a, , Imphal East Adhyaksha P. Bimola Devi leh Imphal East DC Smt. Th. Chitra Devi te’n le a uap ui. Chief Minister in Yurembam Mayai Leikai, Imphal West district ah Go to Village camp le uap malam in welfare schemes chuamchuam um te taklatna a nei a, Go to Village mission nuai ah khua 350 tuam cover hita hi’n a gen hi.

Vaiphei Chief Association, Haupi Range vaipaw ding te pauchappiakna nei

Lingsiphai, July 3 *(Nisin Thuhiltu)* : Vaiphei Chief Association, Haupi Range, vaipaw ding ah teltin thak ah umte ding in tuni, 3rd July 2018, zingkallam dak 9:00 in Chief of Lingsiphai chenna inn ah “Pauchap piakna leh Malzawl dawtpiakna” a um hi. Zia ah hun matna chu Vaiphei Chief Association, Haupi Range Chairman ding ah teltin thak ah um, Dr. Kh. Thianminlian Vaiphei, Chief of Mualkot in a mapui a, vaidawn thugenna leh Vaiphei Chief Association, Haupi Range dinmun leh a umdan genlatna nei in, Rev. Dr. Kh. Khaizakham; Rev. Laltingen; Rev. H.L .Venna; Rev. Siama Phaltual leh Rev. Genlal te’n khua-hausa te mawpuakna leh tilkhona thu gen in, pauchappiakna a nei ui.

Vaiphei Chief Association, Haupi Range vaipaw ding ah teltin thak ah umte ahiuleh; Chairman - Dr. Kh. Thianminlian Vaiphei, Chief of Mualkot; Vice Chairman - Haulemlal, Chief of Tuikham; Secretary - Henliankhup, Chief of Bisanmual; Joint Secretary - Paukulsang, Chief of Tangmual leh Finance/ Treasurer- Khamliankap, Chief of Saipum te ahiu a, Executive Member ding ah Khuplianmang - Chief of Lingsiphai; Khatkhotong - Baite Chief of S. Munnuam; Khamneipau - Chief of Buallian; Lallunkam - Chief of Mata; Ginthianmang - Chief of Tualnuam leh Khuallianmang, Chief of Sumtukphai te guat a hiu. Hiatthei khat chu, Vaiphei Chief Association, Haupi Range nuai in Vaiphei khua (village) 10 a um hi.

Lanva lei - Lingsiphai kikal lamlian blacktopping bawlzaw hita

Lamka, July 03 *(Nisin Thuhiltu)* : National Highway Infrastructure Development Corporation Limited (NHIDCL), M/S Satya Builders in Churachandpur-Singngat kikal lampi Sub-Contractor nuai ah a siam uh chiato zel in, Lanva lei apat Lingsiphai kikal Blacktopping bawlzaw in a um tai. Zia ah lamlian kisiam thak ahileh Special contractor, T. Lala Vaiphei in a siam a hia, Paver Machine mang ah kisiam a hina chung ah mundang lampi kisiam thakna te sang ah blacktopping kibawlzawna mun te kituak leh gari tai nuam mama ah gen a hi. Tu ah lamlian blacktopping kibawlzawna sa te chung ah seal or seal coat chiasak hinalai ding ti a hi.

Churachandpur-Singngat kikal lampi/lamlian siamthakna ahileh Singngat khawsung zero point (Behiang-Tedim Road Junction) apat Lamka tiang siam tung hiding, lamlian sâu dan kilometer 34.5, tha 24 sung ah siamzaw ding ah guangalna um hi’n a kigen hi. Lanva- Lingsiphai kikal lamlian Blacktopping bawlzaw ah a um tak tawh kitawn in Khuga Dam area zawtna nuam chuam mama ta hi’n mitamtak in a gen ua, hundang ah chuuk gua zuk hun ah buanthuak, khallai leh leivui khu zing ah um sek chu blacktopping bawl ah a um tak tawh kitawn ah thawveng tak ah kikawmtuana umthei leh CCpur khawpi sung a pat Khuga Dam area le bailam tak ah tunthei hita hi’n a muthei hi.

National Green Tribunal in Manipur leh K'taka Rs 50,000 liausak

Imphal, Jul 3 *(Nisin Thuhiltu)* : Highways ah thingkung phukthak ah um leh projects chuamchuam chiapina ding ah Highways ah thingkung kiphuktha te leh thingno kiphu kit tawh kisai ah details report piaklutlo ziak in National Green Tribunal (NGT) in Karnataka leh Manipur chu Rs 50,000 gel liau ding in hiatsakna a bawl hi. Acting NGT Chairperson Justice Jawad Rahim mapui NGT bench in a taklatdan in, Karnataka leh Manipur in state sung mun chuamchuam ah lampi pam ah thingkung kiphuktha leh thingkung kiphuna tawh kisai ah information bangma piaklut neilo in a gen a, zia chu tawh kitawn ah Rs 50,000 gel liausak ah um hi’n a gen hi. Hapta khat sung ah zia sum chu a piak uh ngai ding, zia hun sung a chu a piaklo ua leh a sangzaw sem ah liausak hiding in a taklang hi. Rs 50,000 lak ah 50 per cent chu New Delhi ah Legal Aid Fund of NGT Bar Association min ah transferred a bawl ding, a dang sia chu Central Pollution Control Board account ah transferred a bawl ding uh ti le a hi.

Zi tha ziak ah apawsal leh anu-leh-pa damsung jail tang ding
Mathura, July 3 *(Nisin Thuhiltu)* : Uttar Pradesh, Mathura District huapsung ah um Churmura village ah pawlsal khat in a zi a thana chung in a zi thawttu leh a nu leh pa chu damsung jail tang ding in court in thutanna a siam khum hi. Additional District Judge Sakshi Sharma in a genna a chun, tualthattu te’n mo van ken ding ah a pawsal te’n demand a bawl uh a sukpitin zawlo ziak ah kithana piang in a gen a, ziana chung a chu a pawsal leh a tekpi leh pu chu damsung jail tang ding ah thutan khum ah um leh Rs 10,000 liausak ah um hi’n le a gen hi.
Thiamlo chan ah um chu Dinesh, apa Ashok leh a nu Usha te ahiu a, kum 2015 ah mo van ken ah luxury car demand a bawl uh sukpitinlo ziak ah kithana piang in, Assistant District government Counsel Praveen Kumar Singh in a gen hi.

Acting Director General of Police (DGP) appoint bawl phal hilo: SC

New Delhi, July 3 *(Nisin Thuhiltu)* : Supreme Court in tuni’n India gamsung ah police reforms bawlna chikhat hiding in, states leh Union territory zosia te chu police officer kua hitaleh acting Director General of Police (DGP) ah appoint bawllo ding in hiatsakna a bawl hi. Chief Justice Dipak Misra mapui Supreme Court bench in states leh Union territory zosia te a hiatsakna a chun, Director General of Police (DGP) guatthak ding a pawimaw hun ah State governments in Director General of Police (DGP) mawpuakna tuk zinglai te retirement hun tha 3 masang ah Union Public Service Commission (UPSC) ah Director General of Police (DGP) ding ah titna nei senior police officers te min list a piaklut ding, UPSC in DGP mawpuakna tuk thei ding te etchianna anei ding leh senior police officerpathum select a bawl ding, zi ah senior police officer pathum UPSC in select a bawl te lak a chu State Government in titna nei ah a hiat penpen khat Director General of Police (DGP) ding ah free tak ah appoint a bawl thei ding ti a hi.
Chun, DGP mawpuakna tuk thei ding ah titna neite service kum bangkhai um nalai chu reasonable period a hi ding pawimaw in a taklang a, Directors General of Police (DGPs) ahiloleh Police Commissioners appointment chu hiatchian lawk masaklo ah kawi ding in le Supreme Court thusua in a taklang a, himaleh state te chu amau dawidan zil ah Supreme Court order modification pawimaw te’n Supreme Court ah phalna a dawt thei ding ua phal piak a hi.

Chief Justice of India (CJI) Dipak Misra mapui Supreme Court Bench in ziagual thupukna a siamna ziak uh chu September 22, 2006 ah IPS officer lui Prakash Singh in India gamsung ah Police kivaipuakna siamthak ding leh transparency chiapi ding phutna nei ah petition filed a bawl dungzui ah dan thak puakdaw ah um a hi. Zia chu hileh State police forces te kivaipuakna leh DGP appointment tawh kisai ah kidawisak chuamna umlo ding ti a hi. Zia tawh kisai ahin, State governments in State police forces te thil diklo ah a thuzaw lona ding leh pressure a nei theilona ding ah Supreme Court in directives 7 le passed a bawl hi.
Supreme Court in States te chu DGP appointment merit-based transparent process ah chiapi ding leh minimum tenure kum 2 sung bek a hi ding ti’n le a taklang a, Chief Justice Misra in 2006 judgment dungzui ah Acting DGP kiti concept umkhalo, Acting DGP kiti pawm thei hilo in a gen hi.

Minister Nemcha Kipgen in 6th Phase Go To Village camp uap

Kangpokpi, July 03 *(Nisin Thuhiltu)* : Social Welfare and Cooperation Minister leh local MLA, Nemcha Kipgen in tuni’n District Administration, Kangpokpi saina Gopibung Govt. U.J.B School, Gopibung Village ah 6th Phase ‘KhungangChatse - Go To Village’ camp a uap hi. Zia hun a chun, beneficiary te kiang in Governmental schemes chuamchuam in thilpiak piakdawna a nei hi. Zia camp a chun, government departments 15 te’n stall hawng in Aadhaar Seeding, birth certificate, pension schemes, free medical camp, voter enrolments tite chiapi in a um hi. Minister Nemcha Kipgen in Go to Village mission chu Prime Minister, NarendraModi - 'SabkaSaath, SabkaVikas’ entawn ah chiapi ah um a hidan gen in, officials te chu khenchuamna bei ah aphatchuampi thei ding mite ding ah nasem leh panla ding in chialna a bawl hi. Zia Go To Village’ camp a chun, Minister Nemcha leh SDO/BDO Champhai, Chunglenmang banah official te’n camp ah stall chuamchuam etthakna nei in villagers te a holimpi ui.

SCWA in office thak hawnna leh a latna nei

CCpur, July 03 *(Nisin Thuhiltu)* : Senior Citizens Welfare Association SCWA in tuni, July 3, 2018 sunma dak 10:00 in New Lamka Rayburn College kiang ah Upa L Khamzachin inn ah SCWA Office ding hawnna leh Pathian kiang ah kawlsakna a nei hi. Rev. Thangsing, General Secretary, SCWA in hun matna amapui a, Rev Dr Khen P Tombing, Chief Coorinator PCI R in SWCA Office hawng in, office sung in hun matna a nei ua, Upa L Khamzachin, President, SCWA in SCWA vaipaw-te taklatna nei in, Rev Dr Khen P Tombing, Chief Coorinator PCI R in senior citizens lawiupa te ding ah Pathian kiang ah SCWA Office latna leh SCWA member-te pauchap piakna a nei hi. Senior Citizens Welfare Association SCWA ahileh 2006 kum ah kiphutdawk a hia, office ah hun bang chan a hem sung, Evan P Thawnkhansuan Inn, Hmuia Veng a mat nung ua, President Upa L Khamzachin inn, Hebron veng ah a chawn uh a hi. Senior Citizens Welfare Association SCWA ahileh tu leh tu member 800 val nei a hi.

Naupang puimang gua hiding ah muanmaw mi 2 mat ah um
Kangpokpi, July 03 *(Nisin Thuhiltu)* : Sadar Hills District apat naupang puimang gua hiding ah muanmaw mi 2 mat ah um in a kigen hi. A kihiatdan in, Sadar Hills District sung Saikul Sub-Division ah Champhai khua ah zani nitak ah melhiatlo naupang puimang gua hiding ah muanmaw mi khat mipi’n man ah thudawtna a nei ua leh, Saikul Sub-Division sung ma ah um Ichaigojang khua ah a kithuahpi midang khat mandawk kit uh hi’n a kigen hi. Manipur Hill district apat ziagual mi chu matdaw ah a umna chung ah mi tamtak in lauhthawng um sa a hidan uh a gen ua, numei-naupang khawlai vakna pilvan pawimaw leh piting natiang a ding ah le lauthawn um in a kigen hi. Zia gual ah kipei te chu mi 3/ 4 kithua sek ua gen in le a um hi. Hiatthei khat chu tulak in, Mitkhelgal kiti, naupang puimang gua hiding ah muanmaw ziak in India gamsung mun chuamchuam ah le kihiatkhial khak ziak in thi tiang ah kisawisakna hiat 1/ 2 a um hi.

Malaria Positive 6 leh PF 3 mudawk
CCpur, July 03 *(Nisin Thuhiltu)* : Malaria Department, Churachandpur in tukum January 2018 apat June 2018, tha 6 sung ah Malaria vei hiding ah muanmaw thisan sample 4,826 test a bawlnau ah Malaria Positive 6 leh Plasmodium Falciparum (PF) 3 mudawk a hidan uh SMO, Regional Health & Family Welfare, Imphal leh Director, Health Services, Government of Manipur ah report a piakna a chun a taklang hi. Malaria Department, Ccpur in January 2018 ah thisan sample 494 test a bawlna positive 1 mudaw nei, PF mudaw neilo, February 2018 ah sample 722 test bawlna, positive 1 mudaw nei leh PF mudaw neilo, March 2018 ah sample 880 leh April 2018 ah sample 895 banah May 2018 ah sample 843 test a bawlna positive mudaw neilo, June 2018 ah thisan sample 992 test a bawlna, Malaria Positive 4 leh PF 3 mudaw nei ti a hi.

Training/sensitization on National Rabies Programme
CCpur, July 03 *(Nisin Thuhiltu)* : National Health Mission, NHM Manipur in tuni, July 3, 2018 sunnung dak 1:30 in “One Day Training/sensitization on National Rabies Control Programme” kiti a bawl hi. Zia hun a chun, Dr. VC Pau Tonsing, Medical Superintendent, District Hospital, Dr Kimngaihching Simte, Chief Medical Officer, CCpur ban ah District Hospital a sem Doctor leh staff nurse, National Health Mission NHM CCpur staff-te te a pang ua, state apat Dr Kh. Sashhekumar Mangang, Additional Director Public Health makaih National Rabies Control Programme NRCP team-te a pang ui. “One Day Training/sensitization on National Rabies Control Programme” kipat kuan in, District Hospital ah Dog Bite Cell bawl ah um, Dr Kh. Sashee Kumar Mangang, Additional Director Public Health in hawndawna anei a, Medical Superintendent MS Conference Hall, District Hospital ah “One Day Training/sensitization on National Rabies Control Programme” mang in, state apat Dr Kh. Sashee Kumar Mangang, Additional Director Public Health, Dr L Gojendra Singh, State Surveillance Officer, IDSP, Dr Bharati Meitram, State Epidemiologist, Integrated Disease Surveillance Program IDSP, Anthony Haorakcham, State Data Manager, IDSP, H Shyamkishor Singh, State Microbiologist, IDSP, Dr Prem Chongtham, Veterinary Consultant, IDSP, leh Anuradha Sagolsem, State Entomologist, IDPS ten Uicha pe a pat kiven ding dan leh Uicha damdawi kapna anti rabies mat dingdan tawh kisai in ziltilna nei ui. Dr Kh. Sashee Kumar Mangang, Additional Director Public Health in a thugenna a chun, CCpur mipi ten damlona, tuaksiatna leh ganhing pe tawh kisai ah Doctor kiang zuan masalo ah, mimal kidawng tua ah ginchat thu damdawi a nek ziak ua hinna chan um a hidan gen in, damlona tawh kisai ah Doctor-te kiang zuan masa thei len hawi mama ding in a gen hi. Chun, District sung ah Uicha vak te’n amau Uicha chiat kituptak ah enkawl ding leh Vaccine kap sek ding in chialna a bawl a, Uicha’n a pekhak a um leh a kin thei lam ah District Hospital, Dog Bite Cell ah anti rabies damdawi kikap sak thei zing ding in a gen hi.

CCpur Dist. sung mun 3 ah Go to Village Camp bawl

CCpur, July 03 *(Nisin Thuhiltu)* : District Administration, Ccpur saina’ tuni, July 3, 2018 zingkal dak 9:30 a pat mun 3 ah Go to Village Camp bawl in a um hi. ‘Go to Village camp’ umna te ahileh- Henglep block huapsung ah 4-Chongkhawzo nuai ah Tuilumjang, Lamka block ah 18-Zenhang Lamka leh Saikot block ah 19-Saikot nuai ah Mualbem a hi. 18-Zenhang Lamka ah Go To Village camp chu V Hangkhanlian, Minister Agriculture, Veterinary and animal husbandry in chief guest hina tawh a uap a, JC Ramthanga, Principal Secretary, Government of Manipur leh Shyam Lal Poonia, IAS, DC CCpur ten guest of honour leh functional president hina tawh a uap ui. Thangboi Gangte, SDO CCpur in hun matna mapui in, Dr Jire Pudiate in medical department a pat mipi phatchuampi thei ding thil chuamchuam um te genlatna nei in, khuallian hina tawh Go To Village camp uap tu te’n thugenna a nei ua NCD Screeing, CMHT enrollment, JSY/JSSK leh health awareness bawl in, birth leh death certificate issue a bawl ua, Vety Department in Uicha, Anti Rabies damdawi kapna nei in, beneficiary te kiang ah thil chuamchuam piakdawna le a um hi.

DC/CCpur in student te hun matkhawmpi

CCpur, July 03 *(Nisin Thuhiltu)* : Shyam Lal Ponia, IAS, DC Churachandpur in tuni, July 3, 2018 sunnung dak 1:00 in Gandhi Memorial Government High School ah Beti Bachao-Beti Padhao Mission tawh kisai in student-te kithuapihna anei hi. hun chu Rashtriya Madhyamik Shiksha Abhiyan (RMSA), Churachandpur apat District Nodal Officer, Elizabeth Huai Sianmawi, Additional District Program Manager, RMSA leh Glory Singsit, MCS, AC to DC ban ah School staff te’n le a uap ua, Class VI apat Class X kikal student-te Quiz neipi in, dawtna chuamchuam nei in, kidemna chi chuamchuam a neipiu hi. Kidemna ah pang mark musang penpe te chu detergent, Tide leh Rs. 100 piak a hiu a, a dangte Instrument Box leh Rs. 100 ban ah Sahbon leh Rs. 100 piak a hiu a, kidemna ah pang zosia chu handkerchief leh pen piak in a um ui.

DC/CCpur in ADCC thu ah MDC zosia meeting ding ah hiatsak
CCpur, July 03 *(Nisin Thuhiltu)* : Shyam Lal Poonia, DC/CCpur in July 2, 2018 nitaklam in “Notice No. DC(CCP)/ESTT./2015-21(PT-1)” a sua a, zia dungzui a chu, Autonomous District Council (ADC)/CCpur ah member MDC zosia July 25, 2018 zingkallam dak 11:00 leh Autonomous District Council/CCpur office ah meeting ding in hiatsakna a bawl hi. DC/CCpur in hiatsakna thusua a bawl dungzui in Manipur (Hill Areas) District Council Act, 1971 banah Supreme Court of India in April 26, 2018 ah ‘interim order SLP No. (s) 212839-12840/2018’ pansa ADC/CCpur ah member 14 in May 25, 2018 ah Khaipao Haokip, Chairman, ADC/CCpur paithak ding ah thusua a bawl dungzui ua, meeting ko ah um hi’n a taklang hi. DC/CCpur in ‘Notice’ ah a taklat dan in Supreme Court thusuak (order) Tribal Affair & Hills a pelut in ‘legal advise’ la ding ah hiatsak a hi dungzui ah Department in June 12, 2018 leh June 27, 2018 in dawnhuna pia, DC/CCpur in Council Act dungzui ah apoimaw dungzui ah panlakna nei ding ah hiatsak ah um hi’n a gen hi. Court order-te leh Council Act/rule-te chiltak ah khualchianna nei a hinung ah Council Meeting nei ding ah notice sua hi’n a taklang hi. Chuleh, ‘Manipur (Hill Areas) District Council Act, 1971, section 23(3) fourth amendment 2018’ ah thuneina kipia dungzui ah meeting ko a hidan taklang in, July 25, 2018 zingkallam dak 11:00 leh Autonomous District Council/CCpur ah Chairman, ADC/CCpur paithak ding ah thusua kibawl chu consider hiding, MDC member zosia kimtak ah pang chiat ding in chialna leh hiatsakna a bawl hi.

Uicha damdawi kapsak ding ah DC/CCpur in hiatsak
CCpur, July 03 *(Nisin Thuhiltu)* : Shyam Lal Poonia, DC/CCpur in Lamka khawpi sung leh akim-leh-kiang ah Uicha (dog) tam mama, damdawi kikaplo te mihing a ding ah lau um gu (rabies) nei ding ah muanmaw a hi tawh kitawn ah Veterinary Deptt. CCpur office ah working days sin leh Uicha damdawi kapsak chiat ding in hiatsakna a bawl hi. Chun, July 4, 2018 zingkallam dak 10:30 ah Rengkai Community Hall ah(Anti-rabies vaccination) special drive nei hiding, July 5, 2018 zingkallam dak 10:30 leh Royal Academy, D.Phialian ah special drive nei hiding in a taklang hi.