Nisin Thuhiltu – 03 July 2018

User Rating: 0 / 5

Star InactiveStar InactiveStar InactiveStar InactiveStar Inactive
 

National Old age pension Rs 200/-per month tawm talua; sukpun ding dan ngaitua hiding: Union Minister Ramdas Athawale

Imphal, July 02 *(Nisin Thuhiltu)* : Union Minister of State for Social Justice and Empowerment, Government of India Ramdas Athawale in Old Secretariat, Imphal ah thuthak lakhawm mite kiang ah a genna a chun, nisin pawimaw thil chuamchuam man nasatak ah kalta a hina chung ah National Old age pension Rs 200/-per month chu tawm talua a hidan gen in, beneficiary te khualna, National Old age pension sum a kibelap theina ding tawh kisai Ministry ah tut ding leh genkhawm hiding in a gen hi. Ministry of Social Justice and Empowerment in scheme implement a bawl te tawh kisai ah a kisaipi official te tawh Imphal ah review meeting nei a hidan taklang in, Prime Minister in Manipur ah scheme implement ah um te dinmun kanzui ding ah thupiak a nei dungzui ah Manipur pha hi’n a gen hi.

Manipur ah total mi 55,247 te’n National Old Age Pension Scheme nuai ah Old age Pension sum Rs 200/- per month ah mu a hidan uh taklang in, Ministry in SC,ST,OBC, Old age leh differently-abled persons category nuai ah scholarships' piak hisek a hidan gen in, scholarship phatchuampi state sung ah OBC students 10,435; SC students (Pre-matric scholarship) 1,440 leh Post -matric 7,567 um in a gen hi. ST students, Pre-matric scholarship mu 20,000 um leh Post-matric scholarships mu 54,000 um in a gen hi.

Union Minister of State for Social Justice & Empowerment, Ramdas Athawale in a genzawm zelna a chun, region dang sang ah Manipur ah kilawmlo tak ah kisawisakna hiat ding tawmcha a umna chung ah kipak mama a hidan gen in, kum 2017 ah kilawmlo tak ah kisawisakna total case 3 um leh 2018-19 ah case 1 bep registered ah um in a gen hi. Ziana chung a chun, Governor, Chief Minister leh mipi te pakchat thu a gen hi.

State reservation tawh kisai a genna a chun, Manipur ah ST population48.86 um te lak ah 31% reservation piak ah um, SC population 3.68% um te 2% reservation piak ah um leh OBC te 17% reservation piak ah um hi’n a gen hi.

Ministry of Social Justice & Empowerment, Govt. of India in Manipur ah teksia te ding ah scheme a chiapina chung ah Old Aged Home 16, Multi Service Centres 17 leh Mobile Medicare 2 kawi ah um, zia te chu district chuamchuam ah Non-Governmental Organisation te’n a etkawl uh hi’n a gen a, disabilities scheme nuai ah mentally challenged te ding ah special school 19 leh Vocational Training Centre 21 hawn ah um in a gen hi. State Government in disabilities leh persons with disabilities scheme nuai ah beneficiary te thasin leh Rs 1,500/- per month pia a hidan gen in, Manipur ah beneficiary 2,555 um in a gen hi.

Persons with disabilities te Manipur State Co-operative Bank Ltd. mang ah Self employment loan 20-25% subsidy tiang piak ah um a, scholarship le piak ah um in a gen a, loan piak ah um te Rs 3,000 -Rs 8,000 per annum hi’n a gen hi. Financial year 2017-18 sung ah disabilities student 88 te scholarship piak ah um in a gen hi. Social Welfare Minister, Nemcha Kipgen leh department officials te’n le zia ah Press Conference chu a uap ui.

District zosia, diklotak ah Reserve Forest Areas lua te chung ah eviction drive bawl hiding: Forest Minister

Imphal, July 02 *(Nisin Thuhiltu)* : Forest Department in tuni’n Nongmaiching Reserve Forest area ah um Awaching (Kobithabi) ah diklotak ah Reserve Forest lua te chung in eviction drive bawlna a nei hi. Zia chu department in sunzawm zing ding ti a hi. New Secretariat ah Forest and Environment Minister Thounaojam Shyamkumar in office chamber ah thuthak lakhawm mite kiang ah a genna chun, Forest Department in district zosia huap ah eviction drive chiapi zing ding a hidan gen in, Forest Department in diklo tak ah Reserve Forest gam lua te thuhiat masa ding leh eviction in zui ding hi’n a gen hi. Zia ah eviction drive kibawl chun, kuama community khenchuam neilo ding, eviction drive thiltup chu reserve forest areas huapsung ah dan diklo ah gam patta neite Indian Forest Act tawh kituak ah dodalna hiding in a gen a, ziagual mite chu eviction drive bawlkhum a hilona ding ua akikhindaw ding uh pawimaw in a gen hi. Eviction drive in manpower leh force pawimaw a hidan gen in, tu maban ding khualna zia gual nasep chu chiapi hizaw hi’n a gen hi. Forest Department in District zosia eviction drive chiapi ding, diklo tak ah gam luatute zosia illegally encroached areas a pat nawdaw ah um ding hi’n a gen hi.

Central Forest Division, Forest Department in Heingang Reserve Forest, Sadar East Range ah kum 2015 a khah diklo tak ah forest gam lua mi 78 te a la nawdawk, kum 2016 ah Lamlongei, Langol Reserve Forest, Sadar East Range a pat encroachers 25 nawdaw ah um, kum 2017 ah Lamdeng, Langol Reserve Forest, Sadar West Range a pat encroachers 2 nawdaw ah um, kum 2018 ah Pantilong, Langol Reserve Forest, Sadar East Range a pat encroachers 2 nawdaw ah um leh tuchung eviction drive ah Heingang Reserve Forest, Sadar East Range a pat encroachers 8 nawdaw ah um in a gen hi.

Reserve Forest a pat nawdaw ah um family te haksat tuakna ding tawh kisai ah dawtna a dawnhuna a chun, Minister Thounaojam Shyamkumar in Chief Minister N. Biren Singh tawh rehabilitation ding tawh kisai genkhawmna nei ding a hidan gen in, Forest Department official te panlakna public in support bawl chiat ding in chialna a bawl hi.

DGP, Manipur in Dist. Level Badminton Championship hawng

CCpur, July 02 *(Nisin Thuhiltu)* : Churachandpur District Badminton Association (CDBA) saina Hiangtam Lamka ah um CDBA Indoor Stadium ah tuni nitaklam dak 4:30 in July 7, 2018 tiang um ding a XVIII veina District Level Badminton Championship-2018 a kipan hi. Zia hun chu, Chief Guest hina tawh LM Khaute, IPS, DGP/Manipur & President, HDBAM a pang a, Chief Host in K. Kabib, IPS, SP/CCpur pang in, Special Guest in B. Do Lian Mang, CO, 1RRB, CCpur a pang hi.

S. Kamsuanlun, President, CDBA in vaidawn thu gen in, khuallian-te akipat thugenna a um a, Chief Guest in badminton championship hawndawna nei in, exhibition match ah Chief Guest team leh CDBA team a kihel ua, zia nung a chun, championship match a sunzawm ui. Badminton Championship ah CDBA nuai ah affiliated Club chuamchuam Peace Ground Badminton Club, Sinlung Badminton Club leh Zomi Badminton Club banah CDBA akipat member-te a pang ua, Under-13 (Boys Single) ah mi 7, Double ah 2, Under -17 (Boys Single) ah 11, Boys Double ah 5, Women's Single ah 6, Women's Double ah 4; Mixed Double ah 8, Men's Open Single ah 23, Men's Open Double ah 16, 35+ Single ah 6, Double ah 10, 40+ Single ah 8, Double ah 11, 50+ Single ah 8, Double ah 6 a kigawm in participant 131 a um a, zia lak a chun, Double 62 leh Single 69 a um hi. Participant te chu Certificate piak hivek ding leh category zosia ah mi 2 tiang te kipakman piak hiding in a kigen hi. Chief Guest in a thugenna a chun, CBDA in badminton lunglut-te tilkhona ding ah zia gual tournament a sai uh chu kipakpi mama a hidan gen in, kum chiata ah le Hill District Badminton Association, Manipur saina nuai ah tournament a la um, tukum October tha leh hill district huap ah tournament sai hikit ding, zia hun a chu player atam theilam pangua chiat ding in chialna a bawl hi. CCpur district akipat badminton player khangthak te'n theihtawp sua ah nasatak ah panla chiat ding in tilkhona a bawl a, National leh International level tiang tuntheina ding ah panlakna a nei ding uh a nawp thu a gen hi.

Bore well ding vi na methane gas pawt

CCpur, July 02 *(Nisin Thuhiltu)* : Manipur leh Burma Boundary, Singngat Sub-Division huapsung ah um Behiang khua ah Police Station ding siamna chiatha zing a hina chung ah tui (water) lakna ding ah bore well ding ah leinuai a vi ua leh tui pawtlo in methane gas a pawt hi. Nasepna ahileh a chiata June 27, 2018 ni ah Singngat MLA Ginsuanhau@GS Haupu in etthakna nei ah, Police Station ding sakna ding ah ground leveling chiatha zing, Police Station ding siamzaw a hi tak leh tui kining tingtak piakdaw theina ding ah machine mang ah bore well ding vi ah um, bore well ding kivina tuilawng/pipe kithun a chu methane gas a pawtdaw tawh kitawn ah pipe lawng ah meikuang pawtdawk muthei ah um in a kigen hi.

CCpur Dist. ah mun 3 ah Go to Village Camp um ding
CCpur, July 02 *(Nisin Thuhiltu)* : District Administration, Ccpur saina July 3, 2018 zingkal dak 9:30 a pat mun 3 ah Go to Village Camp um ding a hi. ‘Go to Village camp’ umna ding ahileh - Henglep block huapsung ah 4-Chongkhawzo nuai ah Tuilumjang hiding, zia a chu Sejol, Hengkom, N. Saikot, New Pangsang, Lhanghoihmuol, D. Khawzim leh Mualdak khua mipi te huap ah bawl hiding a hi. Lamka block ah 18-Zenhang Lamka ah um ding, Zoumunnuam, New Zou Theisak Veng, Kerith Veng, Luoia Veng, Hmuia Veng, Bijang Loubuk, Zou Veng, Meitei Leikai leh Khumujamba Leikai huap ah bawl hiding, Saikot block ah 19-Saikot nuai ah Mualbem ah um ding, zia chu Dumsaumuol, Tuaitengphai leh Tuibul khua huap ah chiapi hiding a hi.

Chun, Mannuamching, IAS, DC/Pherzawl District in 56-Thanlon A/C huapsung ah Tallian khua ah July 3, 2018 zingkallam dak 9:00 apat nitaklam dak 5:00 kikal ah Go to Village camp bawl hiding, Officer-in-Charge ah Lamminlal Simte, SDO/BDO Thanlon pang ding a hi.

Tallian khua ah Go to Village camp a chu, Leijangphai cluster, Milongmun cluster, Suangpehmun cluster, Galkapkot cluster, Gamhui cluster, Khuongjang cluster, Tuipiphai cluster, Tuikumuallum cluster leh Phainuam cluster te huap ding a hi.Go to Village camp umna ding tawh kisai a chun, Medical Department in le mun 3 ah a staff te sawlding, Henglep AC sung ah Tuilumjang ah S Thangmuanlal , CMHT KIOSK leh Dr Robinson chia ding, CMHT Enrollment, NCD Screening, Health Check-up, Birth & death certificate issue banah JSY/JSSK tawh kisai Awareness bawlding a hiu. Zenhang Lamka ah Thuamkhanlian Ngaihte CMHT KIOSK, Dr Jire Pudaite leh Vungmary duty ding, CMHT enrollment, JSY/JSSK awareness leh NCD screening bawlding, Saikot AC suang ah Mualbem ah Muani CMHT KIOSK leh Dr Sujata duty ding, NCD screening, CMHT enrollment, JSY/JSSK leh health awareness bawl ah, Birth & Death Certificate issue bawl ding a hiu.

CCpur Damlo-inn a ding ah Dental Chair 2 tung
CCpur, July 02 *(Nisin Thuhiltu)* : National Oral Health Program (NOHP) nuai ah North Eastern Council (NEC) Funding bawlna nuai ah Dental Clinic, District Hospital, Churachandpur ah mat ding Dental Chair 2 tut in a um hi. Manipur a district chuamchuam ah District Nodal Officer (DNO) te’n dawtna a piaklut dungzui ua, NOHP apat Manipur a ding Dental Chair 10 hung te lak ah Churachandpur Damlo -inn a ding ah Dental Chair 2 piak ah um ti a hi. Zia ah van mat a chun, damlo (Patient) lupna ding leh Doctor chair banah x-ray tawh kithua in a kigen a, Chair chu thagum manglo ah dawi dandan ah heikual thei hi’n a kigen hi. Dental Chair chu NEC in Kolkata ah Chesa Company tawh kithua ah CCpur damlo inn tut ah um a hia, damlo inn tut a hitak tawh kitawn in, Chesa Company apat technician te’n fitting a pan ngal ui. Zia ah fitting kibawlna chu, Medical Directorate, Imphal apat Hemanta, Storekeeper in a enzui hi. Dr. N. Thangginmang, District Nodal Officer, Dental Department, Churachandpur in a genna a chun, Dental Chair khat ah Rs 7 lakhs val man in a gen a, NEC funding bawlna nuai ah district a ding ah Dental Chair 2 tung in a gen hi.

Damkam Bazar ah sazawkna mun thiantho lo
CCpur, July 02 *(Nisin Thuhiltu)* : Bisosana Loitongbam Designated Officer Food Safety Administration, CCpur mapuina nuai ah Food Safety team in tuni’n Damkam Bazar a sazawkna mun leh Tunnu Bakes & cakes etthakna a nei in, Damkam Bazar a sazawkna chu thiangtholo in amudawk ui. Food Safety team in Damkam bazar etthakna a nei hun ua, sazawkna mun ah kimang van mat te chu mihing a ding a damthei huailo hi ah a mudawna chung ua, tusang ah thiangthozaw sazawk ahitheina ding ah panla ding in sazuakte hiatsakna a bawl ui. Sazuak tute'n FSSAI License khat le nei nailo a hidan uh le mudawk un, Bisosana Loitongbam Designated Officer Food Safety Administration, CCpur in a gen a, tuni apat hapta khat sung ah Lamka khawpi sung ah sazuak te, Damkam Bazar ah zuakte hi'n New Bazar a zuakte hitaleh Food Safety office ah ki-report chiat ding in hiatsakna a bawl a, a ki-report lo a um leh a chung ah action lak hiding, sazuak te’n Food Safety apat license a neitheina ding uh leh sazuak te’n a thiangthozaw sem ah sa zawk a chiapi theina ding uh tawh kisai genpi ding hi’n a gen hi.

ADC/CCpur buaina tawh kisai ah rally nei

CCpur, July 02 *(Nisin Thuhiltu)* : Autonomous District Council ADC CCpur sung buaina tawh kisai ah Shyam Lal Poonia IAS DC CCpur in pan a lak ding phutna’n tuni July 2, 2018 in Mualnuam Block Headquarter ah Peaceful Rally nei in a um hi. Zia rally chu ADC, CCpur sung buaina tawh kisai ah, Court leh Government in a kin thei lam ah ADC CCpur te’n Floor Test a nei ding ua thupiak a nei dungzui ah, Shyam Lal Poonia, IAS, DC CCpur in a vaima theipen ah thudik ah vai a hawm ding dawina ziak ah kibawl in a kigen hi.
SPDPO lawiupa te’n CDDU ve’na nei
CCpur, July 02 *(Nisin Thuhiltu)* : State Platform for Disabled Peoples’ Organization (SPDPO) lawiupa 2 in Churachandpur District Disabled Union (CDDU) vena a nei ui. SPDPO apat CDDU vena nei te chu Dr. Sapam Jasowanta, Advisor leh Yunus Khan, President te a hiu a, CDDU President T. Sianmuanthang mapuina nuai ah Advisor P. Khamkhanthuam, Advocate chenna inn, Beulahlane ah holimpina nei in, Right of Persons with Disablilities Act 2016, Skill Development Training Program for People with Disablities (PwDs), Accessibility standards at public places, Welfare Schemes for PwDs, Inclusive & Accessible election system, SPDPO nuai ah District kikhaikhawmna leh thu chuamchuam genkhawmna nei in, Khuga Dam ah hun mangkhawm in a kikhen ui.

JAC-AATB mapuina thingno phuna nei ding
CCpur, July 02 *(Nisin Thuhiltu)* : Joint Action Committee Against Anti Tribal Bills JAC-AATB in July 4, 2018 sunma dak 10:30 leh Tribal Martyrs Park, Mata Dam ah Van Mahotsav matna neikawm ah Mass Tree Plantation Drive bawl ding a hiu. Zia ding a chu, Joint Action Committee Against Anti Tribal Bills JAC-AATB mapuina leh Divisional Forest Officer, Southern Division Office kithuapina nuai ah tree plantation drive nei hiding, a tamtheipen in zia a chu panla ding in JAC-AATB in chialna a bawl hi.

SCWA office thak hawng ding
CCpur, July 02 *(Nisin Thuhiltu)* : Senior Citizens Welfare Association (SCWA) in July 3, 2018 zingkallam dak 10:00 ah Upa L Khamzachin inn, Hebron Veng New Lamka ah SCWA office thak hawnna leh a latna a nei ding a hi. Rev T Thangsing, General Secy SCWA in hun matna mapui ding, Rev Dr Khen P Tombing, Adviser SCWA in office hawnna nei ding a hi. SCWA President in introductory speech nei ding, Office latna leh SCWA member-te pauchappiakna Rev Dr Khen P Tombing in nei ding a hi.

WC ‘18: Brazil leh Belgium QF lut
Samara, July 2 *(Nisin Thuhiltu)* : A chiatha zing FIFA World Cup ah Brazil in quarter-finals a lutna ding in 2-0 ah Mexico a zo a, zia hi Brazil in a kizawm ah 7vei Mexico a zawna a hitai. First half ah goal a kikhumtualo nung ua second half ah PSG star Neymar in goal khat a khum a, zia nung a chun substitute Firminho in khat khum in zia chu Mexico in a ditzaw zolo ziak ua Brazil in ma a sawn hi. 5vei World Cup dawm ta, Brazil a ding in tuchung hi a kizawm ah 7 vei World Cup tournament ah quarter-finals a lutna uh ahitai.
Tuni match 2na ah Belgium leh Japan a kihel ua zia na a chun second half sung ah goal 5 khumdaw in aum hi. First half ah 0-0 a ki draw nung ua Genki Haraguchi leh Takashi Inui te zal ah Japan in 2-0 ah ma a pui ua, lamdang tak ah Belgium guallel ding ah umlai, defender Jan Vertonghen leh substitute Marouane Fellaini te zal ah Belgium in dit dawk in 2-2 ah a ki draw u’i. Hun bei kuan cha Japan in corner a mu chu gualzawna ding goal khumna’ mat gaw maleh Belgium in lemchang ah la in counter attack a bawl uh chu Japan in a la nang zo talo in substitute ma Chadli in Belgium te 3-2 ah gualzawna a chang sak hi. Belgium te mâ a sawn uh tawh kitawn in quarter-finals ah Brazil maitua ding ahiu.

Salah in Liverpool tawh contract thak ah suai kai
London, July 2 *(Nisin Thuhiltu)* : English Premier League top scorer Mohamed Salah in Liverpool tawh kum 5 dai ding contract thak ah suai a kai u’i. Egyptian forward pa’n a hileh Roma a pat Liverpool a zawt nung kum khat ting pan ah contract thak chu a kai ahia, contract thak a chun release clause umlo ahi. Contract thak ah suai kai maleh a law ding chung chang suklatna bangma umlo aum puai.
Season liamta a khan Salah in Liverpool min ah match 52 a kihelna lak in goal 44 a khum a, zia lak a chun Premier League goal 32 a pang hi. A hinla, Champions League final ah Liverpool in defending champions Real Madrid a maitua hun a khan dakkal khat tuam bek a la kihel man in liamna ziak ah kihel a sunzawm thei tapua, Real in 3-1 ah gualzawna a la chang hi. Zia liamna chun World Cup a ding ah Salah kisak lawkna subuai pha mama in, tuchung World Cup ah Egypt in group match 3 te a leng ah a lel vek hi.

Wimbledon: Federer, Cilic, Querrey gualzo
Wimbledon, July 2 *(Nisin Thuhiltu)* : Wimbledon title 8 vei lakha leh defending champion, Roger Federer in nuamtak ah gualzawna chang in ma a sawn hi. Federer in tuchung tournament ah Serbia’s Dusan Lajovic kihelpi masapen in 6-1, 6-3, 6-4 ah gualzawna a chang a, a title hi humbit zo ding ah tamtak te kineppi gual in a kihel a hawi mama hi.

Ningkum runner-up Croatian Marin Cilic in Japanese mi Yoshihito Nishioka chung in 6-1, 6-4, 6-4 ah gualzawna a chang hi. Ningkum tournament ah Cilic in semi-finals ah a la zaw, American Sam Querrey in le round masapen ah Australian Jordan Thompson chu nuamtak in 6-2, 6-4, 6-3 ah a zo hi. Halle champion, 16th seeded Croatian Borna Coric in lamdang tak in 7-6(6) 6-2 6-2 ah Russian Daniil Medvedev zolo in round masapen le a paltheng zo tapuai. Coric in a hileh Roger Federer zo ah Halle title a la lâk ahi. 3-times Grand Slam champion Stan Wawrinka in 6th seed Grigor Dimitrov chung ah 1-6 7-6(3) 7-6(5) 6-4 in gualzawna a chang hi. A khupbûk nat ziak ah hun sawttak ah kihel a la kichawl ziak ah ATP rankings ah 225na tungsuk Swiss Wawrinka in kum 27 ah upa Bulgarian Dimitrov nung del zaw maleh gualzo zaw in a pang hi.

Numei singles ah U.S. Open champion Sloane Stephens in 6-1, 6-3 ah Croatian Donna Vekic a zawlo tawh kitawn in a la ding ah ginchat dawl te lak ah a pawt masapen in a pang hi. 4th seeded Stephens a ding ah tuchung hi a kizawm ah season 2 Wimbledon round masapen a paltheng zawlona a hitai. Ama bep hilo in ningkum ah semifinalist Magdalena Rybarikova in le 7-5, 6-3 ah Romanian Sorana Cirstea zolo in ma a sawn zo tapuai.

Arsenal in Sokratis Papastathopoulos lalut
London, July 2 *(Nisin Thuhiltu)* : Arsenal in Borussia Dortmund a pat defender Sokratis Papastathopoulos lalut ahidan tuni’n puandawna a nei hi. Greece min ah 79 vei kihel ta, Papastathopoulos ahileh Unai Emery in Arsenal manager ahi nung ah player 3 a chawk na a hita, ama masang ahin Bayer Leverkusen apat goalkeeper Bernd Leno leh Juventus apat defender Stephan Lichtsteiner ala chawk ahi. Papastathopoulos in Arsenal chu Premier League club thupipen te lak ah khat a hi banah fans leh history thupi tak nei ahina ah team ah a pang thei ding chu kipak mama hi’n a gen hi.