Nisin Thuhiltu – 02 July 2018

User Rating: 0 / 5

Star InactiveStar InactiveStar InactiveStar InactiveStar Inactive
 

Indo-Myanmar border thu ah buaina bangma umlo: Kiren Rijiju

Imphal, July 01*(Nisin Thuhiltu)* : Union minister of state for home affairs Kiren Rijiju in Indo-Myanmar ah border pillar issue tawh kisai ah a mun ah thil umdan etzui hiding leh kichian tak ah thil umdan hiatchian a hitak leh foreign ministry panna sukven dingdan ngaitua hiding in a gen a himaleh India leh Myanmar in joint survey bawl ahina chung ah gamgi thu ah buaina um ding ah gingchalo a hidan a gen hi. Subsidiary pillars khenkhat le install bawl ah um a hidan gen in, India gam kekneuna bangma umlo ding ah gingcha hi’n a gen a, Manipuur Chief Minister leh senior official te tawh thil umdan genkhawm ah political delegations te’n a mun ah thil umdan a etthak ding ua lemsakna nei a hidan a gen hi. A muntak ah thil umdan hiatchian masang ah border pillar issue sosan saklo ding a nawp thu le a gen hi. Reporter te’n border ah Indian security te umlo ah a gennau tawh kisai a genna a chun, Indian security te gamgi ah um a hidan uh gen in, ngaina gual ah security te a kimu zing gual ah kilang zing ding ah security te kikawilo hizaw hi’n a gen a, Myanmar chu India ding ah gam kinaipi, kihiatthiamna tawh relationship hawitak chiapi zing gam khat hi’n le a gen hi. Chun, gamgi tuam ah um mipi te chu govt in panlakna nei ding leh a pawimaw dungzui ah border pillar issue sukven hiding in a gen a, India gam kekneuna a um leh mawk et mai hilo ding in a gen hi.

CM, MAHUD Minister in Ima Keithel entha; Border pillar issue ah gam pani boundary kichian tak map lui ah kitaklang: CM

Imphal, July 01 *(Nisin Thuhiltu)* : Manipur Chief Minister N. Biren Singh leh MAHUD Minister Th. Shyamkumar in tuni’n Ima Keithel dinmun etthakna nei in, bazaar nupi te tawh holimna a nei ui. Chief Minister in thuthak lakhawm mite kiang ah a genna a chun, Ima Keithel ah market pathum te chu Prime Minister Narendra Modi in a puakdaw, Central Government’s Swachh Iconic Places (SIP) project, third phase ah siamhawi thak ding ah teldaw ah um a hdian gen in, beautification leh cleanliness activities kituptak ah chiapi ding, zia project dungzui a chu pang in a gen hi. Ima Markets pathum ah palai te leh Imphal Municipal Corporation banah MAHUD in Ima Markets siamhawina ding tawh kisai enkhawm ding uh leh Swachh Iconic Places (SIP) project dungzui ah parking lot umsak hiding, first floor chu thawveng tak ah kawi hiding in a gen hi. Tombisana High School kiangnai ah market shed complex siamhawina nasep ahileh ground levelling works hun ah mihing lugu leh mihing gu khenkhat mudaw ah a um tawh kitawn ah project chawlsan phawt ah um a hidan a gen a, a vaima theilam ah nasepna sutzawm a hitheina ding ah panlak nei hiding, a pawimaw ding zat fund le a umsa hita hi’n a gen hi.

Indo-Myanmar ah border pillar issue tawh kisai ah thuthak lakhawm mite dawtna a dawnhuna a chun, gam pani boundary kichian tak ah map lui ah kikhen a hidan gen in, Manipur territory sukkhak piak ahileh State leh Central Governments in mawk thipsan mailo ding hi’n a gen hi.
Minister of State for Home Affairs Kiren Rijiju in le gam neucha le manthai sak hilo ding ah a gen dungzui ah Manipur gam neucha le midang khut ah lut sak hilo ding in a gen a, State Government palai te le border demarcation ah joint survey team ah pang, tuma a fellona bangma umlo himaleh Border Pillar umna mun issue siamdaw thak ah um hi’n a gen hi.

Citizenship Amendment Bill tawh kisai ah thuthak lakhawm mite dawtna a dawnhuna a chun, Chief Minister in lungkham ding bangma umlo a hidan gen in, state sung ah indigenous mite venbitna ding ah Manipur People’s Protection Bill draft kibawl in a gen a, tutha State Assembly hun ah luidaw ah umta ding hi’n a gen hi.

Zia hun a chun, Chief Minister leh MAHUD Minister in lampi pam ah van zuak te le kiholimpi in, a lemchanlona leh van zuak te haksatna tawh kisai a genpi ui.

KZP-GHQ in Meritorious Award hawmkhiakna hun zang

CCpur, July 01*(Nisin Thuhiltu)* : Khangthah Zuun Pawl (KZP) GHQ in Simveng ah um Simte Inn ah tuni sunnung dak 1:30 in tukum ah State & Centre board nuai ah Class X & XII exam ah lawtinna nei student-te kipakpina a nei hi. Zia hun chu, Chief Guest hina tawh David Kamlalmuan Zote, Jt Registrar, Manipur University in a uap a, Guest of Honour in Dr. Kim Simte, CMO/CCpur leh T. Mangkhanthang Simte @MKT Simte, Second-in-Command, STC/BSF, Mualkawi te a pang ui. Special Guest in T. Lamminlal Simte, MCS, SDO/BDO Thanlon a pang a, Chief Host in Th. Jamchinthang Simte, MDC, 5-Thanlon thasik-in H. Ginzamang, Ex- Director, Sericulture a pang a, Special Invitees in STC-GHQ, SYO-GHQ, SLS leh KZP EF Donor-te a pang ui.

KZP Education Foundation mapuina nuai ah Meritorious Award chuamchuam hawpdawna a um a, CCpur District Topper’s Award mu, KZP member-te le kipakpina a siam ui.

KZP Eduction Foundation in tuni ah Meritorious Award a hawpdaw te chu kum 2016 & 2017 kigawm a hia, Class-X level ah Pauminlian s/o Thangchinkhup (2016) leh Chingmalsawm d/o H. Nehzasoi (2017) te'n L. Thianzakham Memorial Award sâng in, Juliana Manthianmoi d/o L. Vummang (2016) leh Zoufel Ngaihlian d/o LC Simte (2017) te'n S. Tualkhokham Ngaihte Award a sâng ui. BoSEM nuai ah Mathematics Subject ah Percent musangpen Vungnunmawi L. Ngaihte d/o Pumminthang L. Ngaihte (2016) leh Nianghoihnuam (2017) d/o T. Pumzapau (2017) te'n B. Vumzagin Simte Memorial Award a sâng ua, Science Subject a percent sangpen mu Puaminlian s/o Thangchinkhup (2016) leh Chingmalsawm d/o H. Nehzasoi te'n N. Tunkhopau IPKF Memorial Award a sâng ui. CoHSEM nuai ah Class- XII (Arts) stream ah percent musangpen Mesahak Ginkhanlal s/o T. Doulian (2016) in T. Kaizalam Award a sâng a, Science Stream ah Vungngaihlian d/o L. Lamkhomang (2016) leh Kamsuanthang s/o Khaichindou (2017) te'n S. Chingkhohoih Memorial Award a sâng ui. CBSE leh State Board dang akipat in Class-XII (Arts/Humanirtaries) ah percent sangpen Zamchinmang Simte s/o Th. Chinkhothang (2016) leh Dorothy Nianglemdeih d/o Th. Thongzapau (2017) te'n Chiinzaching & Thangvanlal Memorial Award a sâng ua, Science Stream ah percent sangpen Louminthang s/o (late) Thangchinlian (2016) in T. Khupzalam Award a sâng hi. Degree level ah Central Agricultural University, Tura, Meghalaya akipat B.Sc in Home Science a topper S. Kholthianpui s/o S. Douchinthang in B. Tualzalam Memorial Award a sâng a, Master Level ah Manipur University apat Commerce 6th Position, Mary Chiindeihkim Simte d/o L. Thangzalun; Mass Communication a 5th Position , Hangluah Soimuanlal s/o H. Chinthang Ngaihte banah 2017 a TISS, Maharashtra akipat MA (Social Work) in Rural Development ah 7th Position, Th. Chinggaihsiam d/o Th. Khupminthang te'n T. Hellam Simte Memorial Award a sâng ua, Doctorate Degree level ah Ningmuanching w/o Th. Lianchindou Simte leh B. Khaimang Ngaihte s/o B. Thongchinthang te'n H. Khamzagin Simte Memorial Award a sâng ui. Award sâng te chu memento leh sum piak a hiu a, Thanlon MDC Th. Jamchinthang Simte in Manipur Board nuai a Class-X leh Class-XII topper-te kiang in a chuam gel in Rs. 5,000 leh Rs. 10,000 a piai.

Uicha pe ziak ah S. Thangminpau thi
CCpur, July 01*(Nisin Thuhiltu)* : S. Thangminpau (40) Thangkhotuan of Bible Hill, Rengkai chu tuzingkal dak 9:12 vel in Uicha peziak in RIMS Hospital in a mualliam a, July 2, 2018 ah Simveng Thanmual ah vui hiding a hi. S. Thangminpau ahileh May 2018 thabul vel ah Uicha’n a changlam khut a pe piak a hia, Uicha’n a pe nung ah a gu thana ding ah damdawi a kikaplo ziak ah agu puang ah thipi hi’n a kigen hi. June 27 ah changlam banbul nasa sek, thagui zutthei-te kizutsak sek maleh phachuam taktak theilo ah um, 30 June 2018 ah Dr. Kim Simte a ki-etsak akipat Uicha pe ziak ah a natna kipan a hidan hiatdaw ah um, RIMS, Imphal ah etkawl ding ah refer bawl ngal ah um himaleh tuzingkal dak 9:12 vel ah mualliam a hi. A kigendan ah S. Thangminpau in a thi kuan ah tui (water) a liakthaw banah hui le lau hi’n a kigen hi. . Thangminpau ahileh NTBC Bible hill ah caretaker hin le a kigen a, Uicha neitu ahileh Tunchinthang of Bible hill a hi. Thangminpau a pe masang ah Inn neite' chapa le Uicha’n pet in a kigen a, himaleh damdawi kikap sak a hi ziak ah tuni tiang ah bangma tilo, mithi pen chu damdawi kikap khalo in a kigen hi. Uicha pe ziak ah thina tuak a hidan hiatchian a hi tawh kitawn ah mithi te leh Uicha neite’n kihona nei in, thunung thuma umlo ding ah kingaidam in, Ui neite'n S. Thangminpau galna in reception ah puandum leh Rs. 50,000 in a galna a nei ui.

K. Gamnom, Swimming Pool ah mi tamthei mama
CCpur, July 01 *(Nisin Thuhiltu)* : Bualian khua phakma ah Lalnunthari of K. Gamnom in Dinthar Swimming Pool kiti June 5, 2018 a kipat a hawndaw chu lun mama in, nisin ah naupang leh piting kizap ding ah a chia um zing in a kigen a, Pathianni leh mi tam diak sek in a kigen hi. Swimming Pool neitu gendan in, swimming pool chu December 5, 2017 ah a siampan hita leh nasepna a zawthian uh tawh kitawn ah hawndaw ah um in a gen a, nisin ah zingkallam dak 10:00 akipat nitak dak 5:00 tiang hawn hisek, family ah booking bawl nuamte' nitak dak 8:30 tiang hawn piak sek uh hi’n a gen hi. Swimming Pool ah a kizap dingte' lutman mi khat ah Rs. 50/- zel lak hisek leh dakkal 1 sung um thei, tui a kizaplo dingte' sum lak hilo in le a gen hi. Tui ahileh Lenmual Tang akipat pipe mang ah kila, a chang leh dam tui chawkthaw sek, gari tanky khat ah Rs. 1200 ah chaw, swimming pool a dimna ding ah tanker 20 bang lut sek in a gen hi.Tui ahileh anit dungzui ah hapta sin leh san hisek, Sunday tilo nidang ah mi 100-150 kikal kizap ah chia zing sek un le swimming pool neitu’n a gen hi.

Chun, Swimming Pool area ah zu leh khamthei khap ahi tawh kitawn ah zu panna khamthei thil himhim pawlutlo ding in swimming pool neitu’n dawtna a siam a, a enzui mi um a hizingna chung ah matdaw ah um te K. Gamnom Village Authority in action la ding hi’n a gen hi.

Job Card book kimang te san vek hiding
CCpur, July 01*(Nisin Thuhiltu)* : CCpur district ah Job Card book kimang te san vek hiding, a rong le a eng (yellow) ngen hiding in a kigen hi. Job Card book thak tamtak DRDA/CCpur office ah kawi ah umta leh BDO-te’n amau area chiat a Job Card holder te verification a bawl zaw tak ua leh Job Card book thak beneficiary-te’ kiang ah piakdaw hiding in a kigen hi. Job Card book thak ah numbering bawl a ngai ziak ah hun lut mama in a kigen a, tuni tiang ah CCpur district a block 12 um te lak ah block 6 – Tipaimukh block, Thanlon block, Mualnuam block, Vangai block, Henglep block leh Sangaikot block a SDO/BDO-te’ khut ah Job Card book thak piakdaw thei hipan ah le hiat a hi.

District Level Inter-School Subroto Mukerjee Tournament 2018
CCpur, July 01 *(Nisin Thuhiltu)* : CCpur & Pherzawl District Youth Affairs and Sports Officer in tuni ah thusua abawlna a chun, Directorate of YAS Letter in June 22, 2018 ah hiatsakna a bawl dungzui ah, DYASO, CCpur & Pherzawl in July 17-21, 2018 kikal ah Kholmun Football ground, Peace Ground leh Lamka Football Ground ah District Level Inter-School Subroto Mukerjee Football Tournament 2018 sai ding a hidan a taklang hi. Zia District Level Inter-School Subroto Mukerjee Football Tournament 2018 chu pawsal Under 14 & 17 leh numei Under-17 te a ding a hi. Zia tournament a chu a pang ut CCpur leh Pherzawl district sung ah school te’n, June 25, 2018 - July 11, 2018 kikal sung office kai hunsung ah Eligibility Certificate leh Official Entry Forms lakthei ding a hi. Under 14 years (Sub-Junior Boys) a ding ah player ding te January 1, 2005 nunglam a piangte hithei ding, under 17 years (Junior Boys & Girls) a ding ah January 1, 2002 nunglam piang te hithei ding a hi. Team zosia’n player 16 zel nei thei ding, Coach 1 leh Manager 1 a um chiat ding, Under 14 & 17 ah pang ding player-te a ding ah July 12-13, 2018 ah Youth Hostel, Churachandpur ah office kai hunsung ah Medical age Verification um ding a hi. Eligibility Certificate & Official Entry Forms a xerox copy tawh piaklut thei hun July 11, 2018 nitaklam dak 3 tiang hiding, Upper Primary school apat Under 14 years ding te class X tiang hithei ding, under 17 ahihleh High School kaite bep ahi ding uh, player zosia’n Aadhaar Card Xerox copy a piak uh ngai ding a hi.

Lane 1apat lane 2 ah Guite Road keklianna ding tawh kisai genkhawm ding
CCpur, July 01 *(Nisin Thuhiltu)* : National Highways and Infrastructure Development Corporation Ltd. (NHIDCL) in Guite Road (NH-102B) Singngat-Tuivai kikal lampi a siam zing uh tawh kitawn in, lane 1 chu lane 2 ah keklian ding in Draft Feasibility report a bawl ua, zia tawh kisai a chu July 4, 2018 sun dak 12:00 leh DC’s office chamber ah meeting um ding a hi. Zia hun chuleh SP/CCpur; DFO/CCpur; SDO CCpur/Singngat/ Suangdoh/Mualnuam; EE/PWD, CCpur; DGM, MSPDCL/CCpur; DAO (Agri)/CCpur; Dist. Fishery Officer/CCpur; Dist. Officer (Hort &SC)/CCpur; General Manager (Project), MHIDCL te pang ding a hiu.

Lenlai Summer Cup 2018
CCpur, July 01*(Nisin Thuhiltu)* : Lenlai Club saina’ July 2 apat July 7, 2018 sung Vision Academy Ground, Muollum, Rengkai ah Lenlai Summer Cup 2018, District Level Under 15 Tournament kiti um ding a hi. Tournament ahileh Player 6, Entry Fee Rs. 800 leh Security Deposit Rs. 200 leh Registration Form 50 hiding a, Prize ahileh 1st, Trophy, Certificate leh Rs. 10,000, 2nd in Trophy, Certificate leh Rs. 6,000, 3rd in Trophy, Certificate leh Rs. 3,000 sang ding a hiu. Individual ah Best Player, Top Scorer, Safe Hands leh Most Promising Player title um ding a hi. Lunglutna nei Team te’n Registration Form la’n, June 20, 2018 nitaklam dak 5:00 tiang ah Vision Academy ah Entry Fee leh Security Deposit tawh piaklut thei ding, June 30, 2018 zingkal dak 8:00 leh Managers’ Meeting Vision Academy ah um ding a hi.

July 4- 16, 2018 sung ah NFSA anchang hawpdaw hiding
CCpur, July 01 *(Nisin Thuhiltu)* : National Food Security Act. (NFSA) nuai ah thasin leh anchang hawpdaw ah um sek chu bandh & strike a umlo nak leh July 4- 16, 2018 sung in CCpur & Pherzawl District (Vangai Rangte panglo) in Rationing Agent-te’n hawmdawk kit ding a hiu a, agent-te lak a Release Order (OR) la ding te’n Identity Card leh Hausa/Chairman, Village Authority-te apat anchang hawpdawna Utilization Certificate a chawichiat uh ngai ding hi’n Sh.Jogen Singh, Dist. Supply Officer (DSO), CCpur & Pherzawl Dist. in hiatsakna a bawl hi. Parbung & Sangaikot AC/Sub-Division ah Rationing Agent-te’n June 29, 2018 ah RO la ding, July 4, 2018 ah HQ Veng ah FCS Godown ah anchang ladawk ding a hiu. Singngat AC/Sub-Division ah Rationing Agent te’n June 30, 2018 ah RO ladawk ding, July 5 & 6, 2018 ah anchang ladawk ding a hiu. Henglep AC/Sub-Division ah Rationing Agent-te’n July 2, 2018 ah RO ladawk ding, July 7 & 9, 2018 ah anchang ladawk ding, CCpur AC/Sub-Division ah Rationing Agent-te’n July 3,2018 ah RO ladawk ding, July 10 & 11, 2018 ah anchang ladawk ding ahiu. Saikot AC/Sub-Division ah Rationing Agent-te’n July 4, 2018 ah RO ladawk ding, July 12, 13 & 14, 2018 ah anchang ladawk ding uh leh Thanlon AC/Sub-Division a Rationing Agent te’n July 5, 2018 ah RO ladawk ding, July 16, 2018 ah HQ Veng ah um FCS Godown ah anchang ladawk ding a hiu.

PNP Zenhang Lamka Unit hawng

CCpur, July 01 *(Nisin Thuhiltu)* : Young Paite Association (YPA) Lamka Block mapuina’ tuni, July 1, 2018 sunnung dak 2:00 in Paite Numei Pawl (PNP) Zenhang Lamka Unit hawndawna a um hi. Nengkhansuan Guite, Treasurer, YPA Lamka Block in hun matna amapui a, Sumpi Hanghal, President, YPA Lamka Block in Paite Numei Pawl vaipaw ding telna hun mapui in, Vungzahoih, President, Paite Numei Pawl, General Headquarter mapuina ah Unit hawnna leh vaipaw ding ah teldaw thak ah um te kitiamsakna a um hi. Pastor K. Dongkhankhup, PCIR (R) in teltin thak ah um te pauchap piakna nei in, Advisor, PNP GHQ, Chairman, Village Authority, Zenhang Lamka, PTC Zenhang Lamka Unit, Zenhang Lamka Youth Club, YPA Zenhang Lamka Unit leh PNP Zenhang Lamka Unit ah President thak Donthiannem apat thugenna a um a, Ngaikhannem, Secretary, PNP GHQ apat kipakthu genna um in, T. Pumzamang, Secretary, YPA Lamka Block in pauchapna tawh hun matna a khak hi. Paite Numei Pawl, Zenhang Lamka Unit vaipaw ding ah teldaw thak ah um te ahiuleh; President - Donthiannem, Vice President - Damhoihching, Secretary - Luanzakim, Assistant Secretary - Vungngaihlian, Finance Secretary - Chiinneihkim, Treasureer - Lianngaihlun banah member - Deihsuanching, Khawlsonkim, Niangngaihkim, Hauthianngai, Mannunmawi, Dimsonching, Nialthianching, Zenngaihkim leh Haulunching te a hiu.

Manipur Govt in Iced packed Sanga banned hi ah puang

Imphal, July 01 *(Nisin Thuhiltu)* : Manipur Government in Manipur state sung ah state dang a pat kila, iced packed Sanga zawk ding a khap (banned) hi. Iced packed Sanga ah formalin damdawi mudaw ah a um ziak ah mihing a ding ah thiangtho lo hi ah hiat a hi tawh kitawn ah iced packed Sanga zawk ding khap ah um a hidan Nodal officer (Food Safety) Manipur, Ch. Sanajaoba Meitei in thusua a bawlna a chun a taklang a, thuthak a um kit masang sia iced packed Sanga zawk phallo hiphawt ding ti’n a gen hi. Nagaland, Kerala leh states dang dang a pat kipawlut iced packed Sanga ah formalin damdawi kimang a hidan, sample test bawl hun ah confirm a hidan le Nodal officer (Food Safety) Manipur in a taklang a, zia ziak a chu government in state sung ah iced packed Sanga zawk phallo phawt ding ah lemsakna a nei hi’n a gen hi. Hiatthei khat chu, state fishery department, Manipur in a taklat dungzui ah Manipur ah kum khat sung ah Sanga 52000 metric tons tiang kine zo sek ti a hi.

Indo-Myanmar border ah Manipur territory kikekneu: MPCC

Imphal, July 01*(Nisin Thuhiltu)* : Manipur Pradesh Congress Committee in state leh Centre ah BJP led governments in India gam vengbit zo lo a hidan gen in, Indo-Myanmar border pillar issue tawh kisai in, bangti dan ah Myanmar in a territory keklian leh Manipur gam sukha a hi em ti’n dawtna a siam a, MPCC spokesperson, MLA Khumukcham Joykishan in BJP led government in bangti dan ah Myanmar khut ah Manipur gam piak a hi em ti’n dawtna a siam hi.

Manipur vena leh security dinmun review bawl, Union minister of state Kiren Rjiju in Indo-Myanmar kal ah gamgi thu buaina bangma umlo hi ah a gen chu Myanmar khut ah India gam piak ah um a hidan a kipuanna hi’n a gen a, Rijiju thugendan zil ah BJP led government of India, hiatpina tawh Myanmar khut ah Manipur gam piakdaw ah um in a gen hi. Tengnoupal DC Tombikanta in border pillar number 81 dinmun tawh kisai etthakna a nei hun ah diklo tak ah Manipur gam kekneu ah um hii ah taklat a um nung ah bang evidence pawimaw nalai a hi em ti’n le dawtna a siam a, border pillar number 81 chu June 22 ah state police leh Survey of India official te tawh kiphutdawk thak hi’n a gen hi. Manipur PCC team in a mun tak ah thil umdan etthakna a nei hun ah Indian Territory ah border pillar kichawnlut a hidan mudawk uh hi’n a gen a, MLA 6 panna MPCC team in Kwatha Khunou village ah border pillar umna etha hi’n a gen hi. Chuleh, border pillar kiphut thak dungzui ah Kwatha Khunou village kimkhat, Mynmar ah um leh a khaw kimkhat uh India ah umta hi’n a gen a, Myanmar thuneitu te lunghawlna Manipur gam tuakdaw ah um in a gen hi.

CM Relief Fund ding ah Rs Rs. 15,400 donate
Imphal, July 01*(Nisin Thuhiltu)* : Shree Shree Radha Govindajee Gwal Beisanov Samaj, Manipur in Chief Minister’s Relief Fund (CMRF) ding in tuni’n Rs. 15,400 donate a bawl a, Samaj palai te’n Chief Minister N. Biren Singh khut ah Chief Minister’s Secretariat in a pedawk ui. Tuilet ziak ah haksatna tuak te kithuapina ding ah mi tawm ngai leh pawl chuamchuam in sum donate a bawl thei zingna chung un, Chief Minister in kipak thu a gen hi.

Minister Nemcha Kipgen in Rotarian 46th Installation Ceremony uap

Imphal, July 01*(Nisin Thuhiltu)* : Rotary Multi Service Centre, Mantripukhri ah tuni’n 46th Installation Ceremony of Rotary Club of Imphal a um a, zia hun chu Social Welfare and Cooperation Minister, Nemcha Kipgen in khuallian hina tawh a uap hi. Nemcha Kipgen in a thugenna a chun, Rotary Club in genthei haksate panpina ding leh kithuapina ding ah tawmngai tak ah panlakna a nei zing uh pakcha mama kawm in, poverty, unemployment, disability, destitution, ill health, illiteracy leh social issues chuamchuam um te sukvenna ding ah society um a hidan a gen hi. Rotary Club in humanitarian services a chiapi’u hiatpi a hidan le gen in, genthei haksa te dinmun dawpsanna ding ah panlakna anasazaw sem ah a nei ding uh, caste, creed leh religion ah kuama khenchuamlo ding a nawp thu a gen hi. Zia hun matna a chun, Social Welfare Minister leh dignitary chuamchuam te’n club MANIPADMA annual souvenir hawnna le a nei ua, Awards, scholarships, in-house awards, wheelchair leh hearing aids piakdawna le a nei ui.

Delhi ah inkuan khat apat mi 11 a kikhailumsa kimudawk

New Delhi, Jul 1 *(Nisin Thuhiltu)* : North Delhi's Burari ah tuni’n tizat umtak mai in, inkuan khat a pat mi 11 te a thisa mudaw in a um ui. Zia mi 11 lak a chun, numei 7 a pang ua, mi 11 lak ah mi 10 te chu iron-mesh ceiling ah kikhailumsa kimudawk, kum 77 ah upa numei khat ahileh room dang khat tuanglai ah a khut leh keng, a mit/mai kikan kawm ah a thisa kimudawk in police report in a taklang hi. Thina tuak te lak ah pani chu naupang kum 15 mi gel a hiu a, a kikhailumsa mudaw ah um te a vek ua a mit uh puan ah kikan piak leh a kam uh taped ah kihuk piak a hiu. Naupang te chu a khut leh keng uh kan piak a hiu a, Police te’n insung ah khut ah ki zikthaw notes khat mudaw nei in, khenkhat in sakhua thil ah a innkuan ua kikhailum hiding ua gen maleu note kizik in a gen umzia hiatchian hilo in a kigen hi. Zia thil tunna mun chu, Chief Minister Arvind Kejriwal leh Delhi BJP chief Manoj Tiwari te’n le etthakna a nei ui.

Police thusuak in a gendan in, a innkiang tuam ah um te’n mi 6-7 tuam in suicide bawl ua hiatsakna amu’u tawh kitawn ah a delzui ngal ua leh a mun a tun ua mi 11 te a thisa mudawk un a taklang a, a thisa mudaw ah um te chu Narayan Devi (tuanglai ah kimudawk), a chanu Pratibha (57), a chapa pani (2) Bhavnesh (50) leh Lalit Bhatia (45); Bhavnesh's zi Savita (48) leh a chateu pathum - Meenu (23), Nidhi (25) leh Dhruv (15); Lalit Bhatia's zi, Tina (42) leh a chapau kum 15 mi Shivam; Pratibha chanu kum 33 mi Priyanka (tukum tawp leh pawsal nei ding ah tha masa engagement kibawl zo pan) le a pang hi.

Bhavnesh ahileh grocery store hawng a hia, zingkal dak 6:00 ah a dawr hawng sek ahidan a inn kiang ua cheng Amrik Singh in a gen a, tuni ah zingkal dak 7:00 tiang ah a dawr kihawnglo, bawng nawi pua gari a tun tawh kitawn ah gate hawn ahilo ziak ah gari horn mek git ziak ah a inn kiang tuam ua um te’n entha, main gate hawng ah insawng chung lam a et ua leh a hawnpi a kikhailumsa mudawk uh a hidan innkiang tuam mi dang khat Gurcharan Singh in a gen hi. Zia nung a chu police ah report bawl un a gen hi. Zia ah a thisa kimudawk te innkuan chu plywood business leh grocery store hawng ah sumkawl veimi a hiu a, kum 20 sung lam zia mun a chu khawsa hita a hiu.

Narayan Devi ahileh chapa pathum leh chanu 2 nei, a chapa lianpen Dinesh Bhatia chu Kota, Rajasthan ah um, Dinesh Bhatia sang ah chapang zaw leh a suapi pawsal Bhavnesh sang ah upa zaw, a chanu Pratibha chu meithai, a U’ Dinesh Bhatia kiang ah khawsa, Narayan Devi chanu Sujata ahileh Panipat ah khawsa a hi. Narayan Devi chanu Sujata in a ka kawm in kipak tak ah hun mangkhawm sek ua, a vek ua suicide a bawl mai ding uh gingcha theilo a hidan gen in, kua a hem khat in a insungmite zosia a tha piak hiding, police te’n a thattu te a hawldaw ding uh a nawp thu a gen hi.

GST revenue collection June tha ah Rs 95.6 cr tung

New Delhi [India], Jul 1 *(Nisin Thuhiltu)* : June tha ah Goods and Services Tax (GST) collections May tha sang ah tamzaw hi ah taklat in a um hi. May tha ah Rs 94, 016 crore a la hi chu June tha in Rs 95,610 crore a tungzo a, total GST collections, Central GST (CGST) Rs 15,968 crore, State GST (SGST) Rs. 22,021 crore, Integrated GST (IGST) Rs 49,498 crore (including Rs. 24,493 crore collected on imports) leh cess Rs. 8,122 crore (including Rs. 773 crore collected on imports) a hi. GSTR 3B Returns filed total May apat June 2018 tiang in mi 64.69 lakh a um a, total revenue central government leh state governments in June 2018 a kihawp nung ua, central GST Rs. 31,645 crore leh State GST Rs. 36,683 crore muzo ah taklat a hi.

Uttrakhand ah bus accident ziak ah mi 48 thi; 10 liam

Pauri , July 01 *(Nisin Thuhiltu)* : Uttarakhand, Pauri district, Dhumakot sub division huapsung Gueengoun village kiangnai ah a Private bus khat in accident a tuak a, ziana a chun, Bus ah chuang mi 48 te’n thina tuak in mi 10 in liamna a tuak ui. Zingkallam dak 8:30 ah thil tung hi’n thudawnna’n a taklang a, thina tuak te lak ah pawsal 22 leh numei 16, naupang 10 pang in a kigen hi. District administration in Police, SDRF leh local mi te tawh kithua in rescue operation a bawl ua, liamna tuak te lak ah khenkhat serious mama in le a kigen hi. Chief Minister Trivendra Singh Rawat in thina tuak insungmite ex gratia Rs. 2 lakh chiat piak hiding leh liamna tuak te Rs. 50,000 chiat piak hiding in a puang a, magisterial probe bawl ding in le order a sua hi. Zia ah thina tuak te chu India President, Prime Minister Narendra Modi, Union Home Minister Rajnath Singh, Union Health Minister J.P. Nadda leh Governor K.K Paul te’n suunthu a puang ui.