Nisin Thuhiltu – 02 June 2018

Rs 1.90 Cr bei ah chawkna ding ah MSTC LTD leh Pherzawl & CCpur Organic Farmers te’n MoU suai kai

Imphal, June 01 *(Nisin Thuhiltu)* : Horticulture and Soil Conservation Minister Th. Shyamkumar office chamber ah tuni’n MSTC Ltd. (A Government of India Enterprise) leh Pherzawl & Churachandpur District ah Organic farmers te’n Minister Th. Shyamkumar uapna’n MSTC LTD in Rs 1.90 Cr bei ah Pherzawl & CCpur Organic Farmers te a pat thiing (ginger) a chawkna ding in MoU suai a kai ui. VL Keivom in Pherzawl & Churachandpur District ah Organic farmers te palai hina’n MoU suai a kai a, MSTC Ltd. palai hina tawh Soukat Das, Branch Manager, Guwahati in suai a kai hi.

Minister Th. Shyamkumar in thuthak lakhawm mite kiang ah a genna a chun, zia ah MoU suai kai ah um chu Parbung, Pherzawl district ah achiata April 20,2018 ni ah Ginger Festival cum Business Summit a um hun ah lemsakna um te a bawzuina hi’n a gen a, Manipur Organic Mission Agency (MOMA) panlakna ziak ah MoU suai kai thei ah um hi’n a gen hi. MoU suai kaitu chu, Pherzwal District Agro Producers Development Society leh Ministry of Steel, Government of India. MSTC Ltd. nuai ah MSTC Ltd. (Kolkata) a hidan taklang kawm in, MoU dungzui ah farmer te apat MSTC Ltd. (Kolkata) in Rs 19 per kg ah organic ginger, 1,000 metric tone a chawk ding, a sum ah Rs 1.90 crore man hizo ding hi’n agen hi.

JC Ramthanga, IAS, Principal Secretary (Horticulture and Soil Conservation), K. Kipgen, Director, Horticulture and Soil Conservation, department officials te banah Pherzawl leh Churachandpur ah farmer palai te’n MoU suai kaina hun chu a uap ui. K. Debadutta Sharma, Mission Director, MOMA in a genna a chun, MSTC Ltd. in June 20 a pat ni sin leh ginger (thiing) 32 kg lazing ding, thiing lak ahitak leh payment bawl hiding, zia payment chu farmer te account ah khum piak hiding leh a products te chu MSTC Ltd web portal ah e-auction ah zawk hiding in a gen hi.

Zan imu lai ah pawsal khat kaplup ah um

Lamka, June 01 *(Nisin Thuhiltu)* : Melhiatlo pawl khat in achiata May 30, 2018 ni ah a kaplup uh Ngamginkhuol Gangte luang postmortem bawlzaw a hitak tawh kitawn in tuni, June 1, 2018 in New Pangsang ah vui ding ah a luang puakdaw in a um hi. Ngamginkhuol Gangte (28) s/o Seikhothang of Seiloijang ahileh azi Veineilhing leh ach ate pawsal naupang 3 tawh Henglep Sub-Division sung ah um Nalon khua cheng ahiu a, Lamka ah hung khualzin, Moirang Police Station huapsung ah um Khousabung ah zan giaklai, a imut kal ah pawsal melhiatlo 2 in meithal ah 2 vei a kap uh, damzo lo ah thi hi’n a kigen hi. Thil tun ni nitak mama ah Moirang Police team khat in a luang vala dawk in, RIMS ah postmortem bawl ding in a pawdawk ua, postmortem bawlzaw a hitak tawh kitawn in tuni sunnung dak 1:50 vel ah New Pangsang ah vui ding ah puaktung ah um in a kigen hi. Ngamginkhuol Gangte thina tawh kisai in Khousabung Village Authority in demna thusua a bawl a, ziagual a chu kuama khawsung ah gamta kit talo ding in thusua a bawl hi. Thiltung ahileh kua te khutnung a hi em ti hiat a hia pua, a kipuang le a um nailo a hi.

Topper’s Award Committee in Award piakdawna nei ding
Lamka, June 01 *(Nisin Thuhiltu)* : Churachandpur District ah Joint Student Bodies of Churachandpur - Hmar Students’ Association (HSA)Joint Headquarter Churachandpur, Zomi Students’ Federation (ZSF) GHQ., Kuki Students Organisation (KSO) Churachandpur District leh Mizo Zirlai Pawl (MZP) Manipur HQ te’n Churachandpur District Topper’s Award Committee a siamdaw uh tawh kitawn in June 13, 2018 leh Churachandpur District Topper’s Award Committee saina’ Synod Hall, IB Road ah tukum 2018 ah Class X leh Class XII topper-te kipakpina leh Award piakdawna um ding a hi. Zia hun a chu Category A ah Over all District topper in CBSE Class – X, Over all District toppers in BoSEM Class – X , Over all District toppers in Arts CBSE Class – XII, Over all District toppers in Arts COHSEM Class – XII, Over all District toppers in Science CBSE Class – XII, Over all District toppers in Science COHSEM Class – XII, Over all District toppers in Commerce CBSE Class – XII, Over all District toppers in Commerce COHSEM Class – XII, Category B ah Toppers’ in MIL, Hmar, Paite, Gangte, Mizo, Kom, Vaiphei, Simte, Thadou-Kuki leh Zou ah award hawpdaw hiding, Award sangthei ding student te ahiuleh Churachandpur District sung mi a hi ding banua Churachandpur District ah school/college kai a hiu ngai ding, award sang thei ding ah titna nei te’n mark-sheet, passport size leh personal details tawh June 8, 2018 tiang ah Zomi Students’ Federation, (ZSF), Salem Veng leh Kuki Students Organisation Churachandpur, KIC Complex, Tuibong ah piaklut thei ding a hi.

Hotel Management zilnuam te registration bawl piak

Lamka, June 01 *(Nisin Thuhiltu)* : Khuga Battalion ti ah kihia, Khuga Dam ah um 6th Sikh Light Infantry in tuni, 1st June 2018 zingkal dak 7:00 in YPA Hall New Lamka ah ‘Golden Threshold Programme: PH-III’ nuai in hotel lam a lunglut student te’n Taj Group of Hotel leh Tata Institute ah Bachelor of Vocational Course (B Voc) dan ah Hotel Management ziltheina ding un registration a bawl piak hi. Hotel Management course ziltheina ding ia chu second division tiang ah Class XII pass banah kum 17 akipat kum 21 kikal numei leh pawsal hithei ding ti a hi. Hotel Management zil ut mi tamtak te chu Khuga Battalion in registation a bawl piak a, tuni ah Registration bawl te a vek ua, numei leh pawsal a kigawm ah mi 200 val hi’n a kigen hi. Zia ah registration bawl te ding a chu zing, June 2, 2018 ah screening um ding, June 3rd week vel ah interview um ding ti himaleh a lunglut hunkhawp um nalai ah hiat a hina chung ah screening leh interview hun ding awl ah suklat thak hiding in a kigen hi.

Football Trial selection um ding
Lamka, June 01 *(Nisin Thuhiltu)* : Kuki Students' Organisation, Churachandpur District in Minerva Football Club Punjab tawh (Under-13, Under-15 & Under-18) a ding in June 12, 2018 leh Peace Ground, Tuibong, ah Football Trial selection bawl ding a hi. Trial selection ah lunglutna nei, a pangnuam te’n June 8-10, 2018 sunma dak 11 apat nitaklam dak 3:00 kikal ah KSO Office, KIC Complex, Tuibong ah Rs 100 pia, application form lak thei ding a hi. Registration form lakna Aadhar Card (original leh photocopy), Birth Certificate(original leh photocopy) banah Passport 2 pawimaw ding a hi.

Lamka Nauneite panpina sum hawm
Lamka, May 28 *(Nisin Thuhiltu)* : District Hospital, Maternity Ward kiang ah JSSK/JSY Cell ah January 2018 tiang ah nauneite panpina sum la nailote a ding in panpina sum a kihawm zing a, zing 2nd June 2018 a pat March 2018 tiang ah nauneite a ding ah panpina sum piakdaw hiding a hi. Nauneite' panpina sum ahileh National Health Mission (NHM) nuai ah hung hisek a hia, nauvawp JSSK/JSY nuai ah ki-register banah zui ding ah kipiate zuikim, nauneite kiang ah Centre govt. in panpina a piak sek hi a hi. National Health Mission (NHM) nuai ah June 1, 2011 ah zia programme chu patdaw ah um a hia, Janani Shishu Suraksha Karyakaram (JSSK)/Jansankhya Sthirata Kosh (JSK) nuai ah Govt. Hospital leh accredited hospital-te ah nauneite kiang ah panpina piak hisek a hi. JSSK/JSY Cell ahileh hun chiasa Maternity Ward mai ah um a hia, himaleh a lemchangzaw ding ah OPD First floor, CMHT Counter kiang in a kichawn hi.

KKL- Neihsial Veng unit hawng

Lamka, June 01 *(Nisin Thuhiltu)* : Kuki Khanglai Lawmpi (KKL), CCpur Block mapuina nuai ah tuni, June 1, 2018 zingkal dak 6:30 in KKL- Neihsial Veng Unit hawn in a um hi. Zia hun a chun, Neihsiel Veng mipi leh Kuki Inpi nuai ah kikhaikhawm pawl chuamchuam - Kuki Inpi Churachandpur, KKL GHQ, KSO,Churachandpur, TKSU, KWHRO, KCA leh KNO ah thuneitu te a chiakhawm ua, Kamthang Haokip, President, KKL GHQ in KKL Neihsiel Veng Unit hawndawna nei in, Doukhosat Neihsiel, Chief of Neihsiel Veng a pat thugenna a um a, T. Sonboi Haokip, President, KKL CCpur Block in KKL Neihsiel Veng Unit lawiupa ding ah guat ah um te Certificate piakna nei in kitiamsak in, Upa Lamkhomang Neihsiel in pauchappiakna a nei hi. KKL- Neihsial Veng Unit lawiupa ding ah kitiamna nei te ahiuleh; President-Paokhokam Khongsai, Vice President-Lamminthang Neihsiel, General Secretary-Boilun Neihsiel, Joint Secretary-S. Daniel Neihsiel, Treasurer- Mercy Neihsiel leh Information & Publicity ding in Khailalsawm leh Thangmawi Neihsiel te guat a hiu a, Advisor ding ah Upa Manga Neihsiel leh Haukhokhai Neihsiel te guat a hiu.

Hun mat sung in KKL Neihsiel Veng Unit kithuapina ding in, KKL D. Phailen Unit in thingpi bel khat, KKL Lhangnem Unit in sum, KKL Tuinom Unit in file, KKL Lhangjol Unit in KKL ngawng-awh, KNO Finance Secretary Lunjang Haokip leh Chairman, Thenna Touthang te’n Rs. 5,000 ban ah Kuki Inpi nuai a pawl chuamchuam in le kithuapina piakna a nei ui.

Malom ah Fake Encounter case khual ding
Imphal, June 01 *(Nisin Thuhiltu)* : Supreme Court in Manipur ah Fake Encounter thubuai tamtak um te lak ah kum 2000 ah Airport kiang ah um Malom ah Police Commando leh Assam Rifles kithua in Kshethmayum Innaocha Singh leh midang 9 athanau tawh kisai khualchianna nei ding ah order a sua dungzui in, a bawzuina’n Imphal West DC in order a sua a, zia dungzui a chu, June 2, 2018 zingkal dak 6:30 apat dak 7:30 kikal dakkal khat sung ah zia thubuai tawh kisai chu khualna nei ding a hiu. Zia thubuaina tawh kisai khualna nei ding a chun, CBI in Special Investigation Team khat siamdawk in a kigen a, zingkal dak 6:30 apat dak 7:30 kikal ah November 2, 2000 ah fake encounter case khualna nei hun sung a chu Imphal leh Lamka kikal ah kikawmtuana lampi, Tedim Road in a chawtkhak Malom ah dakkal 1 sung gari himhim lutphal hilo ding, lampi dang ah pampel mai ngai ding hi’n a kigen hi.

CCpur ah Army Recruitment Rally um ding
Lamka, June 01 *(Nisin Thuhiltu)* : Churachandpur ah 15- 23 October, 2018 sung ah Army Recruitment Rally um ding a hi. Zia ding a chu sepai lunglut te’n August 16 apat september 30, 2018 sung ah online registration bawl thei ding a hiu. Army Recruitment Rally um hun takleh Soldier GD, Trademan, Technical, Nursing Asst., Clerk, Store Keeper ti te lak hiding, General Duty a ding ah kum 17 leh tha 5 apat kum 21 kikal mi hingai ding, Trademan, Technical, Nursing Asst., Clerk, Store Keeper ahileh kum 23 tiang hithei ding a hi. Soldier GD a ding ah din sang dan (height) 160 cm hingai ding, Soldier Clerk/Store Keeper - 160 cm., Soldier Technical - 157 cm., Soldier Trademan - 160 cm leh Nursing Asst a ding ah 157 cm hingai ding a hi. Chun thiamna lam ah a niampen ah Class 8 leh class XII tiang zo te ahiu ngai ding a hi.

Kani (poppy) thakhel ah Stevia plant chi’nna ding ah MoU suai kai

Lamka, June 01 *(Nisin Thuhiltu)* : Manipur ah lo-bawl mite'n Kani (poppy) chi’n a chawlsan theina ding uh leh nekhawlna hawizaw a neitheina ding uh tupna’n Ministry of DoNER, AYUSH leh ICAR tawh Stevia Biotech Private Limited in Memorandum of Understanding (MoU) suai a kai hi. Kim Gangte, Ex-MP (Lok Sabha) in tuni ah thuthak lakhawm mite kiang ah a genna a chun, Manipur thingtang gam ah tunung takleh Stevia Plant chi’n a hitheina ding ah DoNER Ministry ah Director leh Secretary kimupi zota a hidan gen in, lo-bawl mite’n ngaiven ding in chialna a bawl hi. Stevia plant ahileh chini (sugar) sang ah a le 300 ah thumzaw himaleh zunthum (diabetis) veite' a ding ah a hawi banah taksa thauna umlo (zero cholery) banah heart (lungchang) a ding ah le hawi in a gen hi. Stevia plant kiti chu Paraguay ah kipan a hia, Europe gamsung mun chuamchuam ah Pepsi, CocaCola panna thei tui chi chuamchuam siamna chini thakhel ding ah 30 percent vel kimang sek ti a hi. Manipur thingtang gam chu Stevia chi’nna ding ah kituak hi ah hiat a hi dungzui ah govt. in a khap Kanni (poppy) chi'n sang ah Stevia plantation habawl zaw ding in Kim Gangte, Ex-MP (Lok Sabha) in lo-bawl mite chialna a bawl hi. Manipur ah Stevia Biotech Private Limited in Industry a kawina ding ua panlakna chiatha a hina chung ah May 3-4, 2018 ah DoNER Ministry, AYUSH leh ICAR banah Stevia Biotech Private Limited CEO te’n Guwwahati ah meeting a nei hun ua Memorandum of Understanding (MoU) suai a kai uh ti a hi. Himachal Pradesh ah Stevia Biotech Private Limited in Industry hawngta leh Manipur ah le hawng ding ah kisazo sa um uh hita hi’n Kim Gangte in a gen hi.

DESAM volunteers te’n NSU Administrative block office bulu

Imphal, June 1 *(Nisin Thuhiltu)* : Democratic Students’Alliance of Manipur (DESAM) volunteers te’n tuni’n Manipur Olympic House, Khuman Lampak Imphal ah um National Sports University, Administrative block office bulu in office sung ah thil um khenkhat- television sets, computers, table , Chairs leh windows a susiau hi. DESAM president Salam Akash in a genna a chun, State leh Central government kiang ah major disciplines department hawn ding ah tamveitak phutna a neinung tiang ah panlakna bangma a umlo ziak a office ah kiphinna nei a hidan uh genkawm in Sports Journalism Dept., Sports Management Course leh Performance banah Analysis course ti te umsak ding phutna nei uh hi’n a gen hi. News report khenkhat ah Lucknow, UP leh state dang ah campus thak kihawng ah gen ah a umna chung ah DESAM thil phut te ngaisak ah umlo in a gen hi.

Soil health check bawlna ding ah fund sanction kibawl matlo ah um
Imphal, June 1 *(Nisin Thuhiltu)* : Central sponsored scheme nuai ah Manipur a ding state Agriculture department nuai ah Rs. 66 lakhs tuam sanction ah um himaleh amatna ding dawl ah matlo ah hunsawttak kikawi in thusuak in a gen hi. Zia ah sum sanctioned kibawl chu soil health dinmun check bawlna ding leh Agriculture product kibelap theina ding tawh kisai ah mat ding ah sanctioned hi’n a kigen hi. Bank account hawnna leh Public Financial Management System (PFMS) Portal ah registration bawlna a fello a um ziak ah sanction ah um sum chu lakdaw theilo ah um leh amatna ding dawl ah matlo ah um in le a kigen hi.

Imphal Times in a taklatna a chun, Director of Agriculture department , Rajendro in May 5, 2017 ah sanctioned ah um sum chu lakdawna ding ah panlakna nei maleh state finance department in PKVY/SHG/ NMSA a ding ah Agriculture department in bank account a sukfello banah Public Financial Management System (PFMS) Portal ah registration bawl ahilo ziak ah central sponsored scheme nuai ah sum ki sanctioned chu pedawk theilo ding ah hiatsakna bawl in a gen hi.

MSPDCL nuai ah JTA staffs te’n cease work strike pan ding ah puang
Imphal, June 1 *(Nisin Thuhiltu)* : Manipur State Public Distribution Corporation Limited (MSPDCL) nuai ah electric transformer leh electric meivak siatna enzui ah pang, Junior Technical staffs (Contract), 235 (two hundred thirty five) te’n 2nd June 2018 a pat cease work strike pan ding a hidan uh puang in, company QUESS in electric siam ah a taivel nau ah kisukkhak thi leh man tuakkha leu amaw pualo ding ah a genna chung ua hinna phalngam ah electricity line ahiloleh transformer repairing work chiapi talo ding uh hi’n a taklang ui.

PREPAK (PRO) in 8 th Progressive Day mang

Imphal, June 1 *(Nisin Thuhiltu)* : People's Revolutionary Party of Kangleipak, PREPAK-(PRO) in tuni’n Central Head Quarter, General Head Quarters leh base areas mun chuamchuam in 8th Progressive Day a mang hi. PREPAK-(PRO) thusuak in a taklatna a chun, a leader teu leh cadres te’n zia hun matna chu uap uh hi’n a taklang hi.

7th Pay demand ah kiphinna um zing
Imphal, June 1 *(Nisin Thuhiltu)* : Joint Administrative Council of AMTUC & AMGEO, Manipur (Apex Body of Employees, Workers and Pensioners ) in tuni’n SAT Complex, Tayenpat, Imphal West District ah Cease work strike bawl in, 7th central pay scale chiapi ding phutna a nei kit ua, 7th central pay scale chiapi ding phutna kiphinna ni 72 tingta hi ah taklat in a um hi.

ILP bill drafting committee ah Muslim palai a um ding phutna bawl

Imphal, June 1 *(Nisin Thuhiltu)* : All Manipur Muslim Organisations Coordinating Committee in Manipuri Pangan (Muslim community on Manipur) palai te May 23, 2018 ni ah Manipur government’s spokesperson Thongam Biswajit in Protection of Manipuri People Bill draft bawl ding, state level drafting committee siamdaw ah um a hidan a puandaw hun ah drafting committee ah Muslim palai pansak ah a umlo chu khawk a sakthu taklang in, drafting committee ah a pan ding uh phutna a bawl hi. Mohammad Jalal, President, Muslim organisations committee in a genna a chun, state government kiang ah 30 lakh population, Pangan community te drafting committee pansak ding dawtna siam a hidan uh gen in, drafting committee in transparent leh minute discussion a chiapi pawimaw leh different community zosia ah palai a pankim ding a nawp thu a gen hi.

HM Rajnath Singh in online Analytical tool hawnna nei

New Delhi, June 1 *(Nisin Thuhiltu)* : Home Minister Rajnath Singh in tuni’n Foreign Contribution (Regulation) Act nuai ah ki registered organization chuam chuam te’n foreign contribution a dawn uh leh a matdan te uh ensui ding, online analytical tool khat hawnna a nei hi. Zia web-based tool chu mangcha government department chuam chuam ah policy maker te’n foreign contribution te lutdan leh a kimat dan te hawitak ah ensui thei ding ahiu. Tool ahin data mining leh data exploration hawitak ah nei theina ding analytical feature um ahia, a dashboard chu FCRA nuai ah ki registered organization te bank account tawh zawpmat hiding ti ahi. Tu dinmun in FCRA nuai ah ki registered organization 25,000 tuam in, zia organisation te chun 2016-17 sung a khan thil chuam chuam a ding ah Rs. 8,065 contribution a dawng u’i.

Non-subsidised LPG man Rs 48 ah kal
New Delhi, June 1 *(Nisin Thuhiltu)* : Non-subsidised cooking gas LPG man tuni apat Rs. 48 ah kal in, New Delhi ah cylinder khat Rs. 698 man ta ding ahi. Kolkata ah cylinder khat Rs. 723.50, Mumbai ah Rs. 671.50 leh Chennai ah Rs. 712.50 man ta ding ahi. Subsidised LPG man a hileh cylinder Delhi ah Rs.2.34 ah kal in 14.2kg cylinder khat Rs. 493.55 man ta ding ahia, Kolkata ah Rs. 496.65, Mumbai ah Rs. 491.31 leh Chennai ah 481.84 ding ahi.

Meghalaya: Buaina thiltung ziak ah curfew puan ah um

Shillong, June 1 *(Nisin Thuhiltu)* : Meghalaya khawpi Shillong ah zani zan ah state public transport driver te tawh mipi te kal ah buaina aum ziak in locality 11 ah curfew puan in aum hi. Thiltung tawh kisai ah mi 5 in liamna a tuak ua, police in buaina tawh kisai ah mi 3 a man tai. Hun tiam umlo ah curfew puan ahina mun te chu Jaiaw, Mawkhar, Umsohsun, Raitsamthiah, Wahingdoh, Mission, Mawprem, Lumdiengjri, Lama Villa, Qualapatty, Wahthapbru, Sunny Hills, Cantolment leh Mawlong Hat ahi. Mipi kibuai te del zâkna ding ah tear gas mat himaleh mipite’n a mun a zamsan diak puau ti’n police in a gen hi. Shillong Transport Public Service ah driver leh conductor te tawh Them Iew Mawlong area mipi te zani zingkal ah a kibuai nung ua zan lam ah zia thilsuak hi tung ahi.

Mipite gendan ah bus conductor khat in kilawmlo tak ah numei khat a sawisak nung ah mipite’n conductor pa chu a le sawisak uh ahia, a bul til ah kinial himaleu a sosang nung ah kinakna pawt hi’n a gen u’i. Bus in numeinu a takhak takvang nung ah numeinu’n conductor kinialpi in zia nung a chu mipi’n conductor chu a hawn vuak uh ahi. Police in a mun del in va phel zo maleh nitak lam ah zia buaina apat mi khat in thina tuak hi ah social media ah thû thezak ahi nung ah mipite lungnatna sosang sak kit in mipite’n police chung ah khut ala thâk uh ahi.

Nipah virus: Delhi govt in pilvang ding ah mipite hiatsak
New Delhi, June 1 *(Nisin Thuhiltu)* : Kerala ah Nipah virus natgual a leng tawh kitawn ah Delhi government in mipite kiang ah pilvang ding in a hiatsak hi. Government in mipite kiang ah thei chuam chuam te pilvang tak ah ne ding ah hiatsak in, thei kikhepul te mawk nek zianglo ding ti’n a gen a, khawsik nei kawm ah ngawng nat hia aum leh kintak ah health care facility khat pen pen zuan ngal ding in le a taklang hi. Cun, mani hiatdan ah damdawi mawk nek zianglo ding ah thupiak le a nei hi. Tu tiang ahin Delhi apat Nipah virus case hiatdaw ahi nai puai.

ANSF in NSCN-IM leh NSCN-U te kikaptua dem
Itanagar, June 1 *(Nisin Thuhiltu)* : Arunachal Naga Students’ Federation (ANSF) in Arunachal Pradesh ah Deomali jurisdiction nuai aum Namsang leh Sipini khua ah NSCN (IM) leh NSCN (U) te tuni a kikaptuana uh chu nasatak ah dem in, kikaptua hun ah Ali kiti dawr ngak khat in thina tuak in, Naga minautang khat nasatak ah liam ahidan a gen hi.New Delhi ah Indo-Naga peace talks hawitak ah a chiathâk zing lai ah Naga faction 2 te khat leh khat bang ziak ah kithat tua ahiu em ti ah dawtna siam in, chamna lampi ah kalsuan ding in faction 2 te a chial hi. Mipi chenna lak ah zia gual gamtatna chu ANSF in pakcha ngai ngai lo ding hi ah taklang in, thina ahiloleh liamna tuak te faction 2 te’n zangna dawpna a piak uh ngai ding hi’n a gen hi.

Assam: Galvan pum ah KLF cadre 6 kipedawk

Guwahati, June 1 *(Nisin Thuhiltu)* : Assam ah Kuki Liberation Front (KLF) cadre 6 in galvan tawh security force te khut ah kipiakdawna nei uh hi’n police in tuni’n a gen hi. Galvan a piakdaw teu ahileh AK series rifles 4, 12-bore rifles 3, 7.65 pistols 2 banah M-16, 7.62 SLR, point 22 rifle khat chiat leh grenade 2 ahi. Zia lo chun 5.56 mm chang 104, 7.65 chang 256, 7.62mm chang 107, point 22 chang 44, 12 bore chang 11, 7.65 pistol chang 12 leh High Explosives Dual Purpose (HEDP) 40 mm cartridge 3 le a piakdaw uh ahi. Security force te khut ah kipedawk thingnuaimi cadre te hi Union Home Ministry in a puandaw dungzui ah Revised Scheme for Surrender-cum-Rehabilitation of Militants in the North East nuai ah rehabilitation piak hiding ahiu.

Ampati ah Cong gualzawna’n bangma subuai phalo di: Meghalaya CM

Shillong, June 1 *(Nisin Thuhiltu)* : Chief Minister Conrad Sangma in, Ampati Assembly bypoll ah ama party National People’s party (NPP) in opposition Congress khut ah guallelna tuak maleh zia chun coalition government chung ah buaina bangma tutlo ding hi’n a gen hi. Tura constituency apat Lok Sabha member hi nalai, Conrad in ama mapui- state ah Meghalaya Democratic Alliance (MDA) government in term tung ah paw ding hi’n a gen hi.

A langkhat lam ah Opposition Leader leh former Chief Minister Mukul Sangma in MDA government chu Assembly member ding ah a Chief Minister uh teltin hinailo “ad-hoc government” ti’n a minvua hi.

Congress in Ampati ah gualzawna a chang tawh kitawn ah MLA 21 nei in single-largest party a hitau a, by-election a chun CM lui Dr. Sangma chanu, Miani Dalbot Shira in a kinaipi pen, NPP candidate Clevent Momin sang ah 3,191 votes mu tamzaw in gualzawna a chang hi. Assembly ah member 20 nei, NPP in a hileh United Democratic Party (UDP) 7, People’s Democratic Front (PDF) 4, Bharatiya Janata Party (BJP) leh Hill State People’s Democratic Party 2 gel, Nationalist Congress Party (NCP) 1 leh Independent 2 tawsawtna a dawng hi.

Congress, JD(S) in 2019 Lok Sabha elections ah pre-poll alliance contest ding; Karnataka ah Congress - JD(S) in portfolio sharing sufel

Bengaluru, June 1 *(Nisin Thuhiltu)* : Karnataka ah Congress leh Janata Dal (Secular) in government a form na ding ua, party 2 kal ah panmun kihawpna hunbang chan a hem sung a buaipi nung un, panmun tawh kisai sufel in, 2019 Lok Sabha elections ah pre-poll alliance chiapi ding in lemsakna a siam ui. Portfolios dungzui ah Congress in Home mawpuakna tuk ding, Minister 22 nei ding leh JD(S) in Chief Minister panna Finance panmun tuk ding, Minister 12 nei ding a hi.

Karnataka ah Congress in-charge K.C. Venugopal in press conference ah a taklatna a chun, Deputy Chief Minister G. Parameshwara, former Chief Minister Siddaramaiah, Chief Minister H.D. Kumarswamy leh JD(S) Secretary Danish Ali te panna coordination committee khat siamdaw hiding leh zia committee chu Mr. Siddaramaiah chairman hina tawh mapui ding leh convenor ah Mr. Ali pang ding hi’n a gen hi.
Party 2 a pat spokespersons 1 gel um ding hi’n le Mr. Venugopal in a gen a, pre-poll alliance tawh kisai ahileh tunung ah details tak ah genkhawm nalai ding uh hi’n a gen hi. Chun, Minister thak te’n hapta kit sung ah kitiamna nei ding uh hi’n a gen a, minister te kitiamna ding tawh kisai a chu Congress leh Janata Dal (Secular) in Governor Vajubhai Vala kimupi ah a hun leh mun ding genpi ta hi’n a gen hi.

Congress leh Janata Dal (Secular) portfolios kihawpdan ahileh - Congress in- Home, Irrigation, Bengaluru City Development, Industry and Sugar Industry, Health, Revenue/Muzrai, Rural Development, Urban Development, Agriculture, Housing, Medical Education, Social Welfare, Forest and Environment, Labour, Mines and Geology, Women and Child Welfare, Food and Civil Supply, Haj and Wakf and Minority Affairs, Law and Parliamentary Affairs, S&T and ITBT, Youth & Sports and Kannada Culture, Ports leh Inland Transport development panmun lua ding; Janata Dal (Secular)in, Information, GAD, Intelligence, Planning and Statistics; Finance and Excise; PWD; Power; Cooperation; Tourism; Education (minus Medical Education); Animal Husbandry & Fisheries; Horticulture and Sericulture; small scale industries; Transport; Minor Irrigation

Bodh Gaya serial blasts case ah mi 5 damsung jail tang ding

Patna, June 02 *(Nisin Thuhiltu)* : Patna ah National Investigation Agency (NIA) court in July 7, 2013 ah Bodh Gaya serial bomb blasts case ah thiamlo chang mi 5 te chu damsung jail tang ding in thutanna a siam khum hi. Thiamlo chang mi te ahiuleh - Umer Siddiqui, 39, Azaharuddin Qureshi, 25, Imtiyaz Ansari alias Alam, 35, Haider Ali alias Black Beauty, 30, leh Mujibullah Ansari, 28 te a hiu a, amau sia chu tuma sang ah prime ministerial candidate Narendra Modi in Patna ah Hunkar Rally a nei hun ah Gandhi Maidan serial blasts ah le kigawlkha a hiu. Thiamlo chang te chu Students Islamic Movement of India (SIMI) member a hiu a, Indian Mujahideen tawh le kizawp matna nei ua taklat a hi. Bodh Gaya case ah thiamlo chang mi dang khat, Tariq Ansari, 24 ahileh bomb sukpuakna thina a la tuak a hi. Thiamlo chang te chu a vek ua Rs 10,000 le liausak in a um ui.