Nisin Thuhiltu – 01 June 2018

User Rating: 0 / 5

Star InactiveStar InactiveStar InactiveStar InactiveStar Inactive
 

“Protection of Manipuri People Bill” tawh kisai ah State Level Drafting Committee siamdaw ah um; Government Spokesperson in thil umdan hilchian

Imphal, May 31 *(Nisin Thuhiltu)* : Manipur Government Spokesperson Thongam Biswajit Singh in “Protection of Manipuri People Bill” tawh kisai a taklatna a chun, 23rd May 2018 ni ah Bill draft bawl ding State Level Drafting Committee siamdaw ah um a hidan gen in, State Assembly Monsoon Session ah luidaw man ding ah zia committee chun panlakna nei ding hi’n a gen hi. State pawlam mi te state sung a lut ding uh phal hilo ah kigen chu thuzuau a hidan gen in, ziagual chu a um leh unconstitutional hiding leh dan lo gual tak ah nasep thilbawlna hiding ti’n a gen a, India mi leh sa hina nei te’n state sung a phak ding uh khakna leh gakna bangma umlo himaleh illegal migrants te dodalna chiapi a hizingna chung ah kua hitaleh Manipur state sung pha ding state pawlam mi te’n authentic identity cards a kipuak chiat ding un chialna a bawl hi.

States dang te gual ah Rohingya issue in international border ah Manipur le suakha hi’n a gen a, illegal migrant te etzuina ding ah state pawlam mite hina kituptak ah etzui hizaw’n a gen hi.

Police verification ahiloleh identification process ziak ah haksatna nei te’n authentic identification cards a kipuak lumlet ding uh a nawp thu le a gen a, State police in state sung ah Rohingyas te amatdawna chung ua, fake AADHAR card leh a siamtu te matdaw ah um hi’n a gen hi.

Government Spokesperson in Civil Society Organisations leh mipi te’n illegal immigrant te dodalna tawh kisai chu support chiat ding leh panlakpi chiat ding ah chialna bawl in, state sung ah nam khat leh khat kal siat theina ding thil umkha sek a hina chung ah mipi te communal harmony susia thei ding thil te ah pilvang ding leh social media ah buaina tut thei ding thil video etch upload lo ding in chialna a bawl hi.
A langkhatlam in, “Protection of Manipuri People Bill” tawh kisai ah State Level Drafting Committee Convenor ding ah Th. Biswajit Singh guat in a um a, Member ding ah Water Resources/YAS Minister Letpao Haokip; PHED/Printing & Stationery Minister Losii Dikho; Agri/Vety & Animal Husbandry Minister V. Hangkhanlian; Hill Areas Committee, chairman T.Thangzalam Haokip te banah ex-Chief Minister Radha Binod Koijam, Government Chief Whip P. Sharatchandra Singh, Advocate General, Manipur N. Kumarjit Singh, MLA L. Susindro Meitei, MLA Kashim Vashum, MLA Awangbow Newmai, MLA T.N. Haokip leh MLA Gaikhangam te guat a hiu.

Secretary (Law) Government of Manipur Nungshitombi Athokpam leh Special Secretary (Home), Government of Manipur Kh. Raghumani Singh te’n zia committee chu kithuapi ding a hiu.

CCpur ah Intensified Diarrhoea Control Fortnight hawnna nei

Lamka, May 31 *(Nisin Thuhiltu)* : District Health Society, CCpur & Pherzawl leh CCpur District Doctors Association (CDA) in District Health Centre, Tuibong ah tuni'n World No Tobacco Day 2018 & Dissemination of GATS-II 2016-17 Manipur matna leh Intensified Diarrhoea Control Fortnigh (IDCF) hawndawna a nei hi. Zia hun chu, Chief Guest hina tawh Shyam Lal Poonia, IAS, DC/CCpur leh Mannuamching, IAS, DC/Pherzawl te’n a uap ua, Guest of Honour hina tawh Rakesh Balwal, IPS, SP/CCpur leh Kammuanlal Simte, CEO/CCpur te’n uap in, Functional President in Dr. Kimngaihching Simte, CMO/CCpur leh Dr. Liankhawzam, CMO/Pherzawl te a pang ui. World No Tobacco Day 2018 & Dissemination of GATS-II 2016-17 Manipur thupi ding ah 'Tobacco and Heart Disease' ti mat in a um a, Intensified Diarrhoea Control Fortnigh (IDCF) thupi ding ah 'Zero Child Deaths due to Childhood Diarrhoea' ti mat in a um hi. Zia ah hun matna chu Non-Govt. Organisation chuamchuam banah kochuam lawiupa te, District Level Officer banah Police leh Medical department te panna pawl chuamchuam ah leader leh member te a pang ua, Shyam Lal Poonia in 'One Day Free Oral Health Check-up' hawnna nei in, Mannnuamching in ' June 9, 2018 tiang ah chiapi ding 'Intenssified Diarrhoea Control Fortnight' hawndawna a nei hi. Dr. Chingnunsiam, District Nodal Officer in keynote aaddress bawl in, Dissemination of Global Adult Tobacco Survey (GATS)-II 2016-17 survey tawh kisai taklatna a nei hi. GATS-II 2016-17 survey dungzui in Manipur ah dumzial chep mihing 100 lak ah mi 50 vel umzo in a gen a, zia lak a chu phaizang bial sang ah thingtang bial ah dumzial chep tamzaw ti’n a gen hi.

Programme mat sung in khuallian te a pat thugenna um in, Nursing School chuamchuam te kiang ah dustbin piakna a um a, Swachhata Pakhwada 2018 mat hun ah kithuapina pia Non-Govt. Organisation te kiang ah le memento piak a hi banah nasep hawi ziak ah chawisanna award 3 vei muta - Dr. Steve M. Tungnung, Medical Officer, Behiang PHC kiang ah Centre in surprise gift a piak le piakdaw in a um hi.

VK Tawna High apat Class X student te tour ah chia
Lamka, May 31 *(Nisin Thuhiltu)* : Vengnuam New Lamka ah um VK Tawna High apat Class X student-te'n tuni’n Guwahati ah Educational Tour nei ding in Lamka nusia in a teacher uh 3 tawh a kipan dawk ui. Tour a chia ding te a kipatdaw ding kuan un, VK Tawna High Headmistress Hoih Betty uapna tawh Upa Soiminthang in pauchapna tawh a thakdawna a nei hi. Educational Tour ah Guwahati ah chia VK Tawna High a pat Class X student te chu numei 16 leh numei 20, a kigawm ah mi 36 a hiu a, Bus khat mang ah, Imphal Tulihal airport tiang chia in, zia a pat chu Flight ah chia ding, Guwahati ah June 2 tiang um ding, June 3 ah kile kit ding a hiu. Educational Tour ah chiate’n Guwahati a um sung ua, Aqualand, Museum, Planetarium, Science Centre, Zoo, Indian Institute of Technology, Umanda Island, Baot Ferry, Central Mall leh mun mun chuamchuam pha ding uh hi’n a kigen hi.

Class X zo thak te kipakpina nei
Lamka, May 31 *(Nisin Thuhiltu)* : D. Phailien ah um St. Stephen English School in tuni'n school mini-auditorium ah HSLC 2018 ah lawtinna nei te kipakpina nei in, P. Santa memorial award hawpdawna leh Career counseling bawlna’n hun a mang ui. Robin S. Pukhram (Principal St. Stephen English School) in student-te kiang ah award piakdawna a nei a, Dr. Lalzagou Neihsiel in career counselling a neipi hi. St. Stephen English School ah tukum pass percentage 80 % a tung a, subject chuamchuam ah letter marks mu student 10 a um hi. Student award sâng te kiang in Principal in Rs. 3000 piakna a nei a, Rev. Thangjakap, (Director youth and music ECA) in pauchap piakna a nei hi. Student letter marks mu teacher-te kiang ah June a kipat December., 2018 tiang ah thasin leh incentive in Rs. 500 chiat muding uh hi’n a kigen hi.

TN Haokip Foundation Meritorious award piakdawna nei

Lamka, May 31 *(Nisin Thuhiltu)* : Bijang Community Hall ah tuni 31st May 2018 zingkallam dak 11:30 in TN Haokip Foundation Meritorious award distribution 2018 a um hi. Zia hun chu, DK Thangboi Haokip MCS, Jt Secy (Tourism/PHED), Lunkhomang Khongsai MPS Addl SP (Law & Order) Ccpur, Richard Lalkhohen Haokip, Principal Green Wood Academy leh I Shamu Singh, Principal, Chinkham Modern High School te’n Chief Guest, Guest of Honour leh Special Guest hina tawh a uap ua, Rev Th Khuala Vaiphei, DS, Manipur Hill District AG in lawtinna nei student te pauchap piakna a nei hi.

Award pandawktu TN Haokip MLA Saikot Constituency in a gendan in, Saikot Constituency huapsung ah Topper award bawl a ki umsakna ziak ahileh zillai naupangte tilkhona ding ah patdaw ah um a hidan gen in, hun I neisun te pamawi mama a hina chung ah lekha kukal tak ah student te’n hun a mat ding uh pawimaw in a gen hi.

Manipur Board nuai ah tukum Class 10 exam ah Saikot Constituency huapsung a pat Salt Brook School, Laizon Veng, Tuibong ah kai, Thanglenlal Haokip s/o Manglun Haokip of Laizon Veng Tuibong in 90.16 percent mu in, All round topper hina a chang a, kipakman Rs 20,000 leh Certificate piak in a um hi. Mathematics subject topper St Mary school a pat Neingaithem Haokip d/o Nehlal Haokip of Happy Valley Tuibong in Mathematics subject ah 94 mu in, subject topper in a pang a, Rs 15,000 leh certificate piak ah um in, Science Subject Topper, Salt Brook School a kipat Gingoulun Haokip s/o Nehkhohao Haokip of Kholmun village in Science subject ah 90 mu in Science subject topper in hina lua in, Rs 15,000 leh certificate piak in a um hi.

Saikot Assembly Constituency sung ah School tamtak um te lak ah pass percentage hawipen B Vengnom ah um Green Wood Academy ah pass percentage 100 percent a hina chung in, School of the Year 2018 ah puan in a um a, Rs 10,000 leh certificate piak in a um hi. Zomi Colony ah um Chinkham Modern High school ah le pass percentage 100 percent a hina chung ah Rs 10,000 leh certificate piak in a um hi. Kum kit a pat Topper-te kiang ah piak ah um, all rounder topper in Cash award 30,000 sangta ding, Maths leh science Topper in Rs 25,000 gel sangta ding uh hi’n a kigen hi.

79th Zillai Day mang; Zillai District te'n election nei;
Zillai Kangpokpi District hawng

Lamka, May 31 *(Nisin Thuhiltu)* : 79th Zillai Day a hi tawh kitawn in tuni, 31st May 2018 in mun chuamchuam ah Zillai Day matna a um a,Chongoubung Village, Kangpokpi District ah Zillai Day matna leh Zillai Kangpokpi District hawnna a um hi. Zia hun chu Khatkhotong Baite, President, VPC, GHQ; S. Dama Vaiphei, EM/ADC, SADC Kangpokpi leh Dr. Lamkhogen Vaiphei, Ex President Zillai GHQ te’n Chief Guest Guest of Honour leh Functional President hina tawh uap in Zillai Kangpokpi District hawndawna a nei ui. Zillai Kangpokpi District nuai in Zillai Block 3 - Zillai Kanggui Block, Zillai Eastern Block leh Zillai Leilon Block a um hi.

A langkhatlam ah mun chuamchuam in 79th Zillai Day matna leh District kisiamdawk thak te ah vaipaw ding telna (election) a um hi. Zillai CCpur District in Bethel Veng, New Lamka ah um VPC Complex ah tuni'n Zillai District Election bawlna leh 79th Zillai Day matna a nei hi. Zia hun a chu, Zillai CCpur Block, Chongkhozou Block leh Kangvai Block a pat executive member-te chiakhawm in vaipaw thak ding telna a nei ui. Election Commissionener in Dr. Soilalsiam leh Khupzakhai Suante a pang ua, kum 2018-20 sung ah Zillai CCpur District President ding in Kaithianjoy Vaiphei uncontest in a ting hi. Vice-President ding in Satzakap Vaiphei tel ti’n in a um a, Executive member ding ah Kamzamuang, Pauminlian, Malsawm, Lalpui, Zolian leh Soikhanding te a telting ui. Election zawh in 79th Zillai Day matna a um a, zia hun a chu, Kaithianjoy in vaidawn thu gen in, Lalpui, Gen. Secretary in report piakna a nei a, Upa ST Liana, Exe- President, Zillai-GHQ in Zillai Day message gen in, kum 2018-20 sung ah vaipaw thak ding ah teltin ah um te Election Commissiner Dr. Soilalsiam in kitiamsakna nei in, Rev. PK Lianmang in pauchap piakna a nei hi.

Zillai District chuamchuam ah 2018 - 2020 sung ah vaipaw ding telna (election) results a nuai ah gual a hi.

Zillai Tengnoupal Dist.
Election commissioner:
Mr. Seijang Baite
Mr. Sholun Baite

Teldaw ah um te:
President- Khaichinlal Baite,
(II).Vice President Seigunkap Baite
(III) Secretary: .Lunkhogin Baite

Zillai Chandel District
Election Commïssioner;
Pu Thangkhomang Baite

Teldaw ah um te:
President: Louis Jamkhomang Baite
V/President: Jilkhopao Baite
Secy: Peter Thangkholun Baite

Zillai Imphal District
Election Commïssioner;
Dr. S Lamzolian Vaiphei &
Jonathan

Teldaw ah um te:
President: Lianminthang Vaiphei
V/president: P Hauzuan Vaiphei

Zillai Churachandpur District
Election Commissioner:
Dr. Soilalsiam Vaiphei &
Pu Khupzakhai Suante

Teldaw ah um te:
President: Kaithianjoy Vaiphei
Vice President: Mr. Satzakap

Executive Members:
Kamzamuang
Pauminlian
Malsawm
Lalpui
Zolian
Soikhanding

Zillai Kangpokpi District

Teldaw ah um te:
President: Tv Lunlalsiam Vaiphei
Vice-Prez: Tv Paotinthang Vaiphei
General Secretary: S. Lianboi Vaiphei

Executive Members:
Hauthianlal Vaiphei,
Thanglallem

“Hruaitute ni” kiti mang
Lamka, May 31 *(Nisin Thuhiltu)* : Mizo People Convention MPC Manipur Headquarter in tuni, May 31, 2018 sunma dak 11 a pat in YMA Hall, Hmuia Veng ah “Hruaitute ni” kiti amang hi. Zia hun a chun MPC Manipur Headquarter nuai ah lawiupa chuamchuam te banah Mizo sung a pawl chuamchuam a pat lawiupa te a pang ua, Upa K Laldawngliana, Vice president, MPC HQ in hun matna mapui in, Upa Vanlalrinliana, President, MPC HQ in lawiupa te introduce bawlna leh vaidawnna thu gen in, Lalzuitluanga, general secretary, MPC HQ in Mizo People Convention MPC Tobul, nihna leh hma lak dan ti tawh kisai in paper presentation a bawl a, a chiakhawm paikhawm member ten genkhawmna hun a nei ui. Nitak lam dak 1:30 apat in Upa Vanlalrinliana, President, MPC HQ mapuina nuai in a chiakhawm te’n agenda chuamchuam - Newspaper, MPC census, MHIP leh finance tawh kisai genkhawmna a nei ua, hun tawp ah Upa Dr LS Gangte, Consultant, NMPC HQ in pauchapna tawh hunkhakna a bawl hi. Hiatthei khat chu, Mizo People convention MPC Manipur HQ nuai in unit 47, Sub headquarter khat ban ah sub headquarter zone I ban ah MPC women Wing, MPC Defence wing, MPC MEDA a um hi.

Sepna a pat kaisang

Lamka, May 31 *(Nisin Thuhiltu)* : Mrs N. Bibing Neihsial w/o of Lalminlun Thangluai chu a sepna Executive Assistant apat in Section Officer in a kaisang hi. Ama ahileh tu leh tu Delhi AG ah sem, RK Puram, Delhi ah khawsa a hi.

D.El.Ed exam kipan

Lamka, May 31 *(Nisin Thuhiltu)* : Diploma in Elementary Education (D.El.Ed) Program. MHRD, Government of India nuai ah Untrained in service teachers te’n May 31 apat June 2 sung ah Exam centre chuamchuam ah exam a nei ding uh tuni’n a ni khatna a kipan hi. CCpur district ah in le exam centre chuamchuam in exam a kipan a, candidate 363 in exam amaitua ui. Exam hun ah Sh Shanti Kumar Singh, NIOS in exam centre chuamchuam etthakna a nei a, CCpur district ah Exam centre 6 - Gandhi Memorial High School, Kangvai Memorial High School, Rayburn High School, Sielmat Christian Higher Secondary School, Vimala Raina High School leh Rangkai Higher Secondary School-te exam centre ah mat a hi. Exam official/officer in Solomon L Fimate, SDC, Laisram Bhagat singh, SDC, Irungham Julius Singh, SDC, Th kamaljit singh, SDC, Arew Kajina leh Sangremsiama, SDC te a pang ui.

All Manipur VDF Welfare Association in CM, DGP,ADGP chung ah kipakthu puang

Lamka, May 31 *(Nisin Thuhiltu)* : All Manipur VDF Welfare Association in State Govt. kiang ah VDF haksatna tawh kisai genpi ding ah 3 vei lam Chief Minister kimupina ding ah appointment letter office ah pelut maleu dawnhuna bangma a umlo ziak ah VDF te’n lung awilo suklatna 18th - 27th May 2018 sung ah Manipur pumpi huap ah VDF te’n Cease Work strike chiapi ding ah a puan dungzui ua, Cease Work strike a chiapiu tawh kitawn ah 23th May ni ah Chief Minister in kiphinna chawlsan ding leh a vaima theipen ah a haksatnau genkhawmpi ding ah thutiam a bawl ziak ah 24th -30th May 2018 tiang ah Strike chawlsan maleu bangma thuthak a um diaklona chung ah 31st May - 4th June 2018 tiang ah kiphinna chiapi zawm kit ding ah All Manipur VDF Welfare Association in genkhawmna a nei laitak ah State Government in Nodal Officer hina tawh VDF te haksatna enzui ding ah mawpuakna a piak C. Doungel IPS, ADGP, Manipur VDF lawiupa te PHQ, Imphal ah kihona nei ding ah chialna bawl ah, LM Khaute, IPS, DGP, Manipur uapna tawh VDF te haksatna tawh kisai genkhawmna a nei banua LM Khaute, IPS, DGP, Manipur in Chief Minister kiang ah phone ah VDF te haksatna a tut piakna chung in VDF personnel zosia te thasik in S. Laltingen Vaiphei Gen, Secretary AMVDFWA in CM, DGP,ADGP te chung in kipakthu a puang hi. Himaleh 15th June 2018 tiang ah Chief Minister in VDF te kimupi ah VDF te haksatna a genpi diaklo a hileh VDF te’n kiphinna pan kit ding uh ti a hi. Zia chu tawh kitawn ah VDF personnel te’n thuthak a um kit masang sia ngaina gual ah duty a bawl kit phawt ding un Gen, Secretary AMVDFWA hiatsakna a bawl hi.

State sung ah natural resources umte matthiam pawimaw: CM

Imphal, May 31 *(Nisin Thuhiltu)* : CSIR: North East Institute of Science and Technology (NEIST), Branch Laboratory complex, Lamphelpat ah tuni’n foundation stone laying function of Essential Oil Distillation Plant cum Distribution of High Yielding Medicinal and Aromatic Plants & Health Camp a um a, Chief Minister N. Biren Singh in a thugenna a chun, state ama leh ama kitodel thei khat ah Manipur a pan theina ding ah sepna ding siamdaw leh self employment pawimaw a hidan gen in,
Manipur chu natural resources, floras & faunas tamtak nei himaleh a hiding gualtak ah natural resources umte kimang thei nailo ahina chng ah matthiam guat ding pawimaw in a gen hi.

Manipur in guazuk dan kitup mama a hina chung ah lemongrass chiin tam ding leh kani lei bawl chawlsan ding a nawp thu gen in, state government in lemongrass chintamna ding ah panlakna pan in a gen hi.

State Government in fish feed production plant siamdawna ding ah Rs. 1.5 crore sanctioned bawl a hidan taklang kawm in, chicken feed production unit le siamdaw hiding in a gen a, State in tui tamtak nei maleh kum sin ah state in mun dang ah nga (fish) chawkna Rs. 400 crore seng zing in a gen hi.

State mipi te chu social networking sites te mang thiam ding ah chialna bawl in, manlo ah kidemna um te ziak ah buaina venglo ding, policy neitak ah panlakna’n buaina um te suveng theizaw ding hi’n a gen hi.

Government thak in state sung ah indigenous mite kituptak ah vengbit ding a hidan gen in, Manipur Conservation of Paddyland & Wetland Act, 2014 a pat state government in indigenous mite venbit a nawpdan muthei ah um hi’n a gen hi.

State Government in state mipi te dawidan lo gual tak ah nasep thilbawl neilo ding a hidan gen in, State Government in Centre Govt. proposed bawl Citizenship (Amendment) Bill le mipi te dawidan tawh kituak ah dawilo hi ah taklang zota hi’n a gen hi.

Territorial integrity issue tawh kisai ah Manipur Government leh mipi’n Naga peace talks interlocutor R.N. Ravi statement chung ah panlakna neikhawm ah thil umdan kanzui ngal hi’n a gen hi.

National Sports University (NSU) tawh kisai a genna a chun, Union Youth Affairs and Sports Minister Rajyavardhan Singh Rathore a pat WhatsApp message ah departments, facilities leh faculties bukim tak tawh Manipur ah National Sports University headquarters um ding ah thupukna siamzaw hita a hidan hiatsakna mu hi’n a gen a, mipi te a ding ah kipezo tak ah panla Prime Minister Narendra Modi state mipi te zuau theplo ding, Manipur ah National Sports University (NSU) kituptak ah siamdaw hiding in a gen hi.

Zia hun matna chu, CAF & PD Minister Karam Shyam, Director of CSIR-NEIST, Jorhat, Dr. Pinaki Sengupta, Director of AYUSH, Dr. A Guneshwor & Principal Scientist &Head of CSIR-NEIST Branch Laboratory, Lamphelpat, Dr. H. Birkumar Singh te’n le a uap ui.

Master John Lalditsak in Jeevan Raksha Padak Award-2017’ sâng

Imphal, May 31 *(Nisin Thuhiltu)* : Chief Minister N. Biren Singh in ama office chamber ah tuni’n Master John Lalditsak ahileh s/o Mr & Mrs. Edwin Lalrosiem Hmar of Saikot, Tuithaphai, Churachandpur District kiang in ‘Jeevan Raksha Padak Award-2017’ piakdawna a nei hi. Civilian Award ‘Jeevan Raksha Padak Award 2017’ ahileh President of India and Ministry of Home Affairs, Government of India in 12th October, 2015 ah tuitha lui ah khelut mi pathum hukdawktu Master John Lalditsak kiang ah a piak hi a hi.

Jeevan Raksha Padak Award-2017 chu Jeevan Raksha Padak Medal, Miniature Medal, Certificate leh cheque Rs. 1,00,000 in a zui hi.

Chief Minister in a thugenna a chun, state in mi hangsan leh hinna hukdaw na ding ah Master John Lalditsak panlakna chu pakcha mama a hdan gen in, Master John Lalditsak gual ah haksan tak leh kipezo tak ah khat leh khat hinna humbitna ding ah panlakna a tamzaw sem tuning ah state mipi’n nei ding a nawp thu a gen hi.

President of India in mi 44 te Jeevan Raksha Padak Series of Awards-2017 piak ding ah lemsakna nei a hidan gen in, zia lak a chu mi 7 te Sarvottam Rasha Padak piak hiding, mi 13 te Uttam Jeevan Raksha Padak piak hiding, mi 24 te Jeevan Raksha Padak piak hiding, zia lak a chu mi 7 te thi nung ah chawihawina (posthumously) piak hiding a hiu. Jeevan Raksha Padak Award ahileh mihing hinna hukdawna lam thil ah kipia sek hi a hia, India government in kum 1961 a pat a chiapi hita a hi.

Award piakdawna hun chu, MLA, Khurai AC L. Susindro Meitei, OSD to Chief Minister Sumant Singh, Secretary (Tribal Affairs &Hills) and Special Secretary (Home) Kh. Raghumani Singh, Secretary to Chief Minister Ningthoujam Geoffrey, Deputy Commissioner of Churachandpur District Shyamlal Poonia leh Master John Lalditsak banah ah a nu leh pa te’n a uap ui.

Solar Energy pawimawna hiathiam ding: Deputy Chief Minister

Imphal May 31 *(Nisin Thuhiltu)* : Deputy Chief Minister Yumnam Joykumar Singh in Lainingthou Eshing Chaiba Complex, Nagamapal, Imphal ah tuni’n grid connected roof top solar power plant (5 KW) hawnna a nei hi. Ama’n a thugenna a chun, solar energy pawimawna tawh kisai ah public awareness campaigns pawimaw a hidan gen in, tuhun ah coal, hydro, thermal & nuclear, solar leh wind energy te umdan hiathiam pawimaw leh solar leh wind energy chu aman tawmpen a hidan hiathiam chiat ding pawimaw in a gen hi. Zia hun matna chu Director, MANIREDA L. Manglem Singh in le uap in thugenna a nei a, kum 2022 tiang ah India’s Vision nuai ah solar energy 1,00000 megawatt piansak ding ti a hi dungzui ah grid connected roof top solar power plant siam ah um hi’n a gen hi. Zia ah hun matna neizaw a chun, Deputy Chief Minister in Imphal Public Library of Uripok Sorbon Thingel, Imphal in le grid connected roof top solar power plant (5 KW) hawnna a nei hi.