Nisin Thuhiltu – 30 May 2018

P. Kamkholal, EM/ADCC in ADCC sungthu buaina tawh kisai ah hilchianna bawl

Lamka, May 29 *(Nisin Thuhiltu)* : Autonomous District Council, Churachandpur sungthu buaina tawh kisai in tuni, May 29, 2018 sunnung dak 2:00 in P. Kamkholal Vaiphei, Executive Member, ADC Churachandpur in ama office chamber ah press conference ko in thil umdan hilchianna a bawl hi.
P. Kamkholal in ADCC sungthu buaina tawh kisai a thu diklo tamtak thezak ah um a hidan gen in, zia thudiklo kithezak chun, mipite ngaituana a sukbuai banah development work tampi sepdaw theilo ah a um ziak ah thudik taklatna ding ah Press Conference ko a hidan a gen hi.

Thil umdan a genna a chun, District Council Sitting thu tawh kisai ah Ex-Chairman Langkhanpau Guite in kum 2 a puak hun hunsung ah Sitting khat-vei bep ko in a gen a, Khaipao Haokip in kumkhat bep a puak sung a Sitting ko khalo ti tawh kisai ah ngawna um chu pawm tak hilo, House Sitting kona ding hial ah Agenda thupi le um nailo in a gen hi. Development Work kihawpdan tawh kisai ah Ex-Chairman Langkhanpau Guite hunlai ah development work himhim Constituency dungzui ah hawp a hitak leh Opposition Group-te percent 50 sang ah tamzaw piak hingailo a hidan taklang in, tu ah Chairman Khaipao Haokip hunsung ah hawpdaw ah um te equal share ah hawm in a gen hi.

No Confidence Motion leh Court Case dinmun tawh kisai a genna a chun, Chief Minister Cabinet Chamber ah April 22, 2017 ni ah Khaipao Haokip teltin ah um, zia hun a chu Chief Minister N. Biren Singh in a tawmpen ah kumkhat sung leadership kisan ti umtheilo ding hi ah a genlawk, April 24, 2017 ni ah official tak ah Chairman leh Vice Chairman ding telna um himaleh Chief Minister thupiak bangma ah ngailo ah kumkhat tin masang ah DC /Churachandpur khut ah November 2017 ah No Confidence Motion piaklut ah um, Law/Act dungzui ah lekha pawimaw a kimulo ziak ah nawlpiak ah um himaleh January 2018 ah piaklut thak ah um, zia chu District Council 4th Amendment Act passed a hi ziak ah pending ah um zing in a gen hi.

Court Case tawh kisai ah Manipur High Court in Principal Secretary, Tribal Affairs & Hills, Deputy Commissioner, Churachandpur, Chief Executive Officer, ADC Churachandpur leh Khaipao Haokip chung ah Writ Petition Case 2 bawlkhum a hidan gen in, High Court Order, Case 36/2018 leh 91/2018-te, Supreme Court in May 21, 2018 ni ah stay bawl in a gen hi. Mi tamtak in a hiatthiamlo uh, zuauthu ah 4th Amendment dungzui ah Chairman thentheilo ding kiti chu Supreme Court in final judgment a bawl masang ah Supreme Court sang a lianzaw leh sangzaw ziagual phalna chu a pethei umlo in a gen hi.

BJP Party Meeting tawh kisai ah May 25, 2018 ni ah State BJP in BJP MDC te kona a bawl dungzui ah Chairman Khaipao Haokip lamte kimdiam ah chia himaleh Langkhanpau Guite lam mi 4 bep pang un a gen a, ziana chung a chu State BJP leader te lung-awilo mama a hidan uh gen in, State BJP Secretary, Sarat Kumar in Party musit leh State BJP President zalo, musit lahiu ti ah vauna bawl un a gen hi.

State BJP President leh MP Bhabananda in Churachndpur District Council in Party dawidan tawh kitualo ah High Court ah case bawl a, Supreme Court tiang tungta a hina chung ah zia buaina chu sukfel a hi masang ah Party kigawl talo ding hi ah hiatsakna bawlkawm ah 2019 Parliamentary Election um ding a hi tawh kitawn ah theitawp sua ah panlakhawm ding leh election zawthian ahi masang ah Chairman tawh kisai ah thubuai gen hikittalo ding ah thutawpna siam ah meeting zaw ah um in a gen hi.
Khaipao Haokip leh a seppi te chung ah diklo tak ah thilbawl leh ngawna chuamchuam um te et ah, gingtu chiat hina ah mihing kuama apha bukim umlo a hiziak in diklona bep kihawlkhum tua ding hitaleh Ex- Chairman Langkhanpau Guite in kum 7 sung Chairman mawpuakna a tuk sung ah council property leh assets hiatphaklo ah selmang, Appointment diklo tak ah kibawl leh a dangdang tampi um a hidan gen in, Council nasepna a hawizawk semna ding leh mipi’n phatchuampina a nei theina ding ah panlakkhawm ding tup ah neithei chiat len kipak um mama ding hi’n a gen hi.

Chura-Sugnu lampi siamna black-topping pan
Lamka, May 29 *(Nisin Thuhiltu)* : Chura-Sugnu lampi siamna nasep chiatha zing in, zani a kipat in Leikai lei a kipat khawpi sung lam manaw in black-topping bawlna a kipan hi. Ginsuanhau Zou, MLA & MANIREDA Chairman in tuni sunnung dak 4:00 in nasepna mun etthakna a nei a, Black-topping ahileh paver machine mang ah bawl in a um hi. Inche 2 leh akim asah in alkatara (bitumen) leh suangnen kihelkhawm sun in a um hi. Kilometre 26 ah sau Chura-Sugnu Road siamna nasep ahileh April 12, 2017 ah Ginsuanhau Zou, MLA (Singngat A/C) & Chairman, MANIREA in Police Station (Zero-Point) ah hawndawna a nei tawh kitawn ah kipan ahia, PWD, Manipur implementing agency hina nuai ah Contractor M/S HVS Construction Materials Pvt. Ltd., Special Class Contractor Patsoi Lamkhai, N.C. Road Imphal leh local contractor chuamchuam ten a siam uh a hi. Zero-point a pat Sugnu Bridge tiang kilometre 26 ah sau chu total project cost Rs.47.96 crore bei ah siam hiding a hi.

Total project cost Rs.47.96 crore lak ah1st instalment ah March 31, 2017 ni Rs. 23.98 crore sanction ah umta a hi. Lampi siamna nasep ahileh tha 24 sung Nov. 2019 tiang ah zaw thian ding ti a hi.

Routine Immunisation session site 28 hawng

Lamka, May 29 *(Nisin Thuhiltu)* : District Family Welfare Office/CCpur saina’ tuni’n Routine Immunisation bawltheina mun ding ah kibawlthak session site 28 hawndawna DTC hall Tuibong in a um hi. Zia hun a chun, Zenngaihlun, District Programme Manager, NHM in hun matna amapui a, Dr Jamthianlal DFWO.DIO, CCpur in vaidawn thugenna nei in, 28 Routine Immunisation Fixed session sites hawndawna Shyam Lal Poonia IAS DC/CCpur in nei a, Dr Girvar S Baria, Rapid Respond Team, WHO in thugenna nei in, Dr Kimngaihching Simte CMO, CCpur in vote of thanks gen in hun matna a zo ui. 28 Routine Immunisation Fixed session sites hawndawna nei hun ah Dr Jamthianlal in a gendan in, Routine Immunisation bawltheina ding ah Fixed session site 28 te chu team 7 in enzui ding, team khat ah ANM 3 zel um ding leh hapta sin ah Ningani leh khaw chuamchuam ah Routine Immunisation neizel ding uh hi’n a gen hi. Routine Immunization for Fixed session sites in a tup ahileh naupang damdawi kikapna kapkhalo a umlona ding, natna chuamchuam apat naupang tamsem daal ahitheina ding tup ah nei a hi.

CCpur Mirco Office etthakna nei
Lamka, May 29 *(Nisin Thuhiltu)* : Guwahati apat Chief Regional Manager, NERO in Tedim Road, Hiangtam Lamka ah um JB Selection kiang ah The New India Assurance Cooperation Limited CCpur Mirco Office etthakna tuni’n a nei hi. New India Assurance Cooperation Limited, Guwahati apat Barun Sinha, Chief regional manager, NERO ahileh Rong Moses, Branch manager, Imphal Branch a zui a, office etthakna a nei hun un, Naorem Ibocha Meetei, Incharge CCpur Micro Office, CCpur, CT Lian Guite, Convenor LATSEA te’n a kithuapi ui. The New India Assurance Cooperation Limited CCpur Mirco Office ah Naorem Ibocha Meetei, Incharge Ccpur Micro Office etzuina nuai in, Agent 4 in na a sem ua, insurance tawh kisai ah bawl nuam nei te’n zia mun chu zawt thei hiding a hi.

District Level ah World Tobacco Day 2018 mat hiding
Lamka, May 29 *(Nisin Thuhiltu)* : District Health Society (DHS), CCpur/Pherzawl leh CCpur Doctor Association (CDA) saina a hungtung ding May 31, 2018 leh DTC Hall, Tuibong ah sunma dak 9:30 apat in Tobacco and Health Disease ti thupi mang ah District Level in World Tobacco Day 2018, Dissemination of GATS II 2016-2017 for Manipur leh One day free oral health check up kithua um ding a hi. Zia hun chu Shyam Lal Poonia, IAS, DC CCpur/Chairman DLCC NTCP, Mannuamching, IAS, DC Pherzawl, Rakesh Balwal IPS SP CCpur, T Kammuanlal, MCS, CEO ADC CCpur, Dr Kimngaihching, CMO CCpur leh Dr Liankhozam Guite, CMO Pherzawl ten Chief Guest, Guest of Honour leh Functional President hina tawh uap ding a hiu.

NFSA anchang hawpdaw hita
Lamka, May 29 *(Nisin Thuhiltu)* : National Food Security Act (NFSA) nuai ah thasin leh anchang kihawm sek chu, Seppatni May 28 apat June 8, 2018 sung ah hawpdaw hiding a hi. Zia chu tawh kitawn in, HQ Veng ah um FCS Godown a pat in Thanlon Constituency a ding rationing agent te’n a la dawk ua, tuni’n Parbung & Sangaikot AC/Sub-Division ah Rationing Agent te’n anchang a ladawk kit ui. Singngat AC/Sub-Division ah Rationing Agent-te’n May 30 &31, 2018 ah anchang ladawk ding a hiu a, Henglep AC/Sub-Division ah Rationing Agent-te’n June 1& 2, 2018 ah anchang ladawk kit ding a hiu. CCpur AC/Sub-Division ah Rationing Agent-te’n June 4 & 5, 2018 ah anchang ladawk ding a hiu a, Saikot AC/Sub-Division ah Rationing Agent te’n June 6, 7 & 8, 2018 ah HQ Veng ah um FCS Godown a pat anchang ladawk ding a hiu. Constituency tin ah quota tutha May a ding hung tung zat ahileh Saikot a ding Quintal 3746.45, Parbung/Tipaimukh a ding, Quintal 611.80, CCpur a ding Quintal 2536.50, Thanlon a ding Quintal 911, Singngat a ding Quintal 2290. 40 leh Henglep a ding Quintal 1914.50 a hi.

PCS in cabinet siam tuak
Lamka, May 29 *(Nisin Thuhiltu)* : Paite Cultural Society (PCS) in a chiata May 25, 2018 ni ah General Body Conference leh Board of Director, BoD, PCS 2018 - 2021 a nei hun ua vaipaw thak ding telna a nei uh tawh kitawn in, tuni zingkal dak 7:00 in kitiamna leh Cabinet siam tuakna a um hi. Vaipaw ding ah teldaw thak ah um te a hiu leh M. Vumhau, Dorcas Veng, New Lamka, T. Singneng, Mission Road, Hiangtam Lamka, Tp. Sianzaneng, Lailam Veng, Central Lamka, S. Tualchinkham, Tedim Road, Hiangtam Lamka, Pumsong Hangshing, Sahei Road, New Lamka, P. Nengkhanlian, Lennuam Veng, Bungmual, V. Jamzagin, Dorcas Veng, New Lamka, P. Tuanzakham, Zion Veng, New Lamka, Daizasiam, New Lamka (G), V. Chinkhenpau, Zenhang Lamka, L. Nengkhopau, V. Munhoih, New Lamka, T. Khupzadou, Dinthar Veng, Nghathal, K. Paumuanthang, Vengnuam South, New Lamka, N. Khupzagou, College Veng, New Lamka leh T. Vungzathuam, Dorcas Veng, New Lamka te a hiu a, amau sung ah cabinet siamna a nei dungzui un, PCS Executive Director ding in uncontest ah Pumshong Hangsing a ting a, Deputy Director ding in uncontest ma in S Tualchinkham a ting hi. Secretary ding in vote 14 umlak ah M Vumhau in vote 10 mu in teltin in a um a, Asst Secy ding ah uncontest in V Chinkhenpau teltin in a um hi. Chun, Finance Secretary ding in K Paumuanthang in, Treasurer ding ah V Jamzagin uncontest in a ting hi. Office bearer ding ah tel tinlo sia hdinhinglou teng member hivek uh hi'n leng kigen hi.

SSPP GHQ in kipakpi thu puang
Lamka, May 29 *(Nisin Thuhiltu)* : Siamsinpawlpi GHQ ah Education Department, Secretary H. Siamkhanmuan in tuni ah kipakpina thusua a bawl in a taklatna a chun, Central Board of Secondary Education (CBSE) nuai ah Class X result suak ah Siamsinpawlpi mi-le-sa lawtinna nei zosia Siamsinpawlpi General Headquarters in KIPAHPIHNA sangpen ah kipakpi a hidan taklang kawm in, maban ah a thiamzilnau ah a hung lawtin to zel ding uh dawisakna puang in, a lawsam khate le lungkia mailo ah maban ah lawting ngeingei ding ah panlakna a nasa zawm ah nei ding in tilkhona a bawl hi.

HPC (D) chairman in Aizawl zuan
Lamka, May 29 *(Nisin Thuhiltu)* : Thalui April 2, 2018 ah Mizoram solkal leh Hmar People’s Convention (Democratic) in Aizawl ah Memorandum of Settlement (MoS) a nei uh bawzuina’n, Rehabilitation Packages leh Council piting umthei masang ah tha 6 sung Interim Council kawi ding thu leh thil chuamchuam sukfel ding um nalai te sufel ding in tuni’n HPC (D), Working Chairman LT Hmar leh Mizoram solkal tawh kihona palai ah pangkha Upa Lalṭhalien leh Dr. John Pulamte in Aizawl a zuan ua, May 30 in Mizoram Home Department tawh kimu ah kihona nei ding a hi.

NYK/CCpur ah semtu ding lakna ding ah interview um ding
Lamka, May 29 *(Nisin Thuhiltu)* : Ministry of Youth Affairs & Sports, Govt. of India in National Youth Corps nuai ah NYK/CCpur ah kum 2018-2019 sung semtu ding National Youth Volunteers (NYV) kilakna ding ah application pelut te’n Chairman, District Advisory Committee on Youth Program/ DC/CCpur dawidan tawh kituak in June 1 & 2, 2018 ah DC’s office, Tuibuong ah interview nei ding a hiu. National Youth Volunteers ding ah teldaw ah um te’n kum 2018-2019 sung contract basis ah sem ding a hiu a, tha 1 ah stipend Rs. 5,000 mu ding a hiu.

TBC in ‘One day Seminar’ nei
Lamka, May 29 *(Nisin Thuhiltu)* : Thangkhal Baptist Church (ABA) in tuni zingkallam dak 10:00 apat in Tuibuang ah um TBC Central Church ah ‘One day Seminar’ a bawl a, zia hun a chun, TBC (ABA) kochuam sung ah LCC, Woman, Mission, Youth leh Child Department lawiupa te tamtak chiakhawm in, Rev. Khaikhanthang, TBC (ABA), Lamka Area Pastor in “Thi ni ah tilkhona thugendan” ti thupi ah nei in ziltilna a nei a, Upa Kampau in “um dan ki lawm leh paudan ki lawm” ti thupi mang in ziltilna a nei hi. Chun, Pastor Chinminlian, Executive Director TBC (ABA) in “Phone matdan leh Kochuam maban ding” ti thupi mang in ziltilna hun a nei a, Upa Thangkhanmang, Chief of Kamhang in “Upa mawpuakna” ti thupi nei in ziltilna a nei hi. Thangkhal Baptist Church (TBC) ahileh American Baptist Association tawh kizawp matna nei, tu leh tu Manipur ah khaw chuamchuam 17 ah TBC um ah gen a hi.

‘Julie! aw Julie!’ kiti lekhabu hawng ding
Lamka, May 29 *(Nisin Thuhiltu)* : ‘Julie! aw Julie!’ kiti lekhabu June 2, 2018 sunnung dak 1:00 in Conference Hall, PCI Head Office Building, New Lamka ah H. Mangchinkhup, Ex-EM, ADCC in Chief Guest hina tawh hawng ding a hi. Zia hun a chu Paite sung ah lekhabu gel sek te tawh holimna hun le um ding, Paite Literature Society (PLS) puitu-te’n le Intek hina tawh uap ding a hiu. Program hun se 2 ah kikhen ding, hun masa leh hun nina Pausuanlian in hun matna mapui ding, Lekhabu taklatna banah holimna leh dawtna hun um ding a hi.

BJP in khamthei dodal ding
Lamka, May 29 *(Nisin Thuhiltu)* : Bharatia Janata Party (BJP), CCpur District in district sung ah khamthei dodalna pat ding in lemsakna a nei a, Lienkanglo, President, BJP-CCpur District in BJP high command thupiak dungzui ah BJP-CCpur District in RP Tablet, WY Tablet, SP Tablet leh No.4 panna khamthei (drugs) chuamchuam dodalna 'Thunder Operation' neiding a hidan taklang kawm in, khangthak te maban ding khualna ziak ah- YPA, KL, KWU, HYA, Appolo Veng Development Committee-te nasepna pakcha mama in a gen hi.

Zingkal ann nektheina ding dawr hawng
Lamka, May 29 *(Nisin Thuhiltu)* : New Lamka West MDC CT Lian Guite in kumlui ah nisin nekkawm hawl, a diak ah mezuak nupite khualna ah New Bazar ah TAP kiti ann nektheina mun a hawndaw nung in, tuni’n New Lamka Hebron Veng ah um Pumbuk kitina mun ah TAP tawh kibang ah kimantak ah ann nektheina ding a hawng hi. Dawr hawnna leh a latna Upa Rev L. Khamkholun in a nei a, ahawnna neizaw in mezuak nupi mi 150 val a thawn in zingkal ann a neksak hi. CT Lian Guite in a genna a chun, zingkal ann nekmasang ah mun gamla pipi apat hung, Hebron veng kim leh kiang ah sumkawl vei mezuak ah kichu te zingkal ann nekna ding tawh kisai ah panpitu khat hithei ding ah thingtangpa ann huanna dawr a bawl hin a gen a, mun gamla taktak apat mezuak nupite, a ann ding uh a insungmi te’n a va thak piak tak ua leh Auto Bahara ah Rs 20/30 seng sek a hina chung ua amau dawn zangkhai theina ding a hikhak leh ti ah zia ann nekna dawr chu a hawn hi’n le a gen hi. Zia zingkal ann nek theina ding dawr kihawng thak a chu zingkal dak 8:00 a pat zingkal ann Rs 25/- zel ah nekthei hita ding ti a hi.

Women Helpline alternative number kawi
Imphal, May 29 *(Nisin Thuhiltu)* : DC Complex, Lamphelpat a pat Social Welfare Department, Head Quarter, Directorate Complex ah Women Helpline Office a kichawn ziak in 24x7 Women Helpline 181 chu temporarily ah sukbei in a um a, 24x7 Women Helpline alternative number 7005776144 active zing ah kawi in a um hi.

7th Pay Commission chiapi ding phutna Planning Department staffs te’n kiphinna pan
Imphal, May 29 *(Nisin Thuhiltu)* : Planning department ah staff te’n 7th Pay Commission chiapi ding phutna nei ah kiphinna nei te support bawl in tuni’n huntiam umlo cease work strike a pan ui. Planning department mai ah chutmun kiphinna nei in, JAC of AMGEO leh AMTUC banah Government Employees federation te’n 7th Pay Commission chiapi ding ah phutna a nei uh support bawlna kiphinna pan a hidan uh kiphinna nei staff te’n thuthak lakhawm mite kiang in a gen ui. JAC of AMGEO leh AMTUC te mapuina nuai ah 7th Pay Commission chiapi ding dawina ziak ah kiphinna ahileh ni 69 tingta hi’n a kigen hi. Govt semtu te te khat in thuthak lakhawm mite kiang ah a genna a chun, BJP government chu mipi te a ding khualna neitak ah nasem leh panl ti ah kihia himaleh Manipur Assembly election kuan ah election manifesto ah kichian tak ah a suklat uh 7th Pay Commission chiapi ding chu tuni tiang ah sukpitin hilo in a gen hi. 7th Pay Commission chiapina ding ah kiphinna um zing himaleh tuni tiang ah state govt a pat dawnhuna kichiantak bangma um nailo in a gen hi.

State police in search operation chiapi zing

Imphal, May 29 *(Nisin Thuhiltu)* : Greater Imphal area ah State police te’n cordon leh search operation bawl in identification a ding ah valid documents pawdawk theilo te police station tut in verification bawlna a nei ui. Robinsun khamnam DSP-CDO & Inspectort.B. Lunthang Vaiphei OC-CDO IE te’n police team verification bawl te chu amapui ua, mi 290 tuam check a bawl hun un, mi 9 te’n valid documents a puakdaw theilo ziak un, Porompat police station ah verification bawl thak ding in a pelut ui. City police team in le OC Sudhir bawlna’n Thangal Keithel leh Poana Keithel areas verification bawlna a nei bawk ui.

Mizoram Governor ding ah Rajasekharan in kitiamna nei

Aizawl, May 29 *(Nisin Thuhiltu)* : Mizoram Governor thak ding ah guat ah um Kummanam Rajasekharan in tuni’n Mizoram Governor 18th tinna ding in kitiamna a nei hi. Rajasekharan ahileh tumasang ah BJP’s Kerala unit chief leh Rashtriya Swayamsevak Sangh (RSS) pracharak hi a hia, ama’n Lt Gen (retired) Nirbhay Sharma thasan ding a hi. Hiatthei khat chu, Mizoram Governor thak ding ah BJP-RSS leader Kummanam Rajasekharan guat ah a umna chung in Global Council of Indian Christians (GCIC) leh People’s Representation for Identity and Status of Mizoram (PRISM) in majority Christian state ah vai a hawm ding a nawpthu’u taklang in Mizoram capital Aizawl ah PRISM in flags vawm a takdawk a, Assembly election ding kuan ah RSS activist leh Hindu kulmut khat Christian state ah vaihawmtu lianpen hiding ah kiguat chu BJP election tactic hi’n a gen ui. GCIC in “hardcore Hindutva fundamentalist” khat Mizoram ah vaihawm ding ah kiguat chu Christians te’n ngaithiamlo uh hi’n a gen a, state sung chawbuaina ding ah panlakna hi’n a gen hi.

FC Goa in Fateh Hyderabad FC apat Imran Khan chaw
Panjim (Goa), May 29: FC Goa in Fateh Hyderabad FC apat kum 23 ah upa Manipuri winger, Imran Khan lalut ahidan puandawna a nei hi. 2015-2016 ah Manipuri Player of the Year award la Imran Khan ahileh 2018 I-league runners-up Neroca FC ah le a la pang kha ahia, Manipur ai-aw in Santosh Trophy ah 5 vei ala kuan kha ahi. Chun, CCPur Super Div. League Champions, UKB min ah Seikam Memorial Tournament a la pek kha le ahi