Nisin Thuhiltu – 27 May 2018

Ex-Chairman, ADC ngawna Minister Hangkhanlian in hilchian

Lamka, May 26: Ex-Chairman Langkhanpau Guite, ADC/CCpur in May 22, 2018 ah ADC/CCpur sungthu buaina tawh kisai ah press conference ah Minister V. Hangkhanlian ngawna chuamchuam a bawlna tawh kisai in tuni sunnung dak 3:00 in Minister V. Hangkhanlian (Agri, Vety &AH) in a chenna inn ah press conference ko in hilchianna a bawl hi.

Hangkhanlian in election kuan a BJP ticket amu hun ah BJP Party lut ding ah chialna bawl hi ah Ex-Chairman in a genna tawh kisai a hilchianna a chun, April 15, 2017 ah HPA Leader Langkhanpau Guite, Chairman mapuina nuai ah MLA 6-te ADC Office ah reception bawl ah um, zia nitak a chu a inn ua a worker bangzat a hem te tawh va chia ah BJP a lut ut ua leh district in-charge banah State vice-president a hilaitak a hina chung ah lemchang ding ah a gen himaleh Chairman in pawlpi lamte'n Hangkhanlian lakimupilo ding uh a tina chung ua buai kisa a hidan hil in a gen hi.

Zia nung a chu, April 17, 2017 ah Khaipao Haokip leh Khaikhanmung panna member 14 in BJP zawm ut a hidan uh tut kawm ah State BJP President kiang kidawtna lekha pelut ah ama kiang ah le thil umdan vatut maleu State BJP President kimupi ding ah sawl in a gen hi.

State BJP President a kimupiu tawh kitawn ah Langkhanpau mapui member 12 te'n le Imphal ah delsuk ah, amau le lut ut ti ah a gen ziak ua April 21 ah Genneikhup le Langkhanpau lam ah um a hina chung ah phone ah kiho ding ah chial maleu kimupi theilo uh hi’n a gen a, zia chu Imphal ah camp dang a lut uh ti thei hi’n a gen hi.

Zia nung a chu April 22, 2017 ni ah CM Office, cabinet room ah BJP President Bhabananda, Ashni Kumar, General Secretary; Kh. Chaoba, CCpur Incharge leh Chief Minister panna member te'n leader kitelthak ding a ti dungzui ua ballot ah Chairman telna a nei ua leh Chairman ding ah Khaipao Haokip leh Vice Chairman ding ah V. Khaikhanmung telting a hina chung ua, ama’n dawisak chuam ah Chairman ding ah Khaipao a guat hilo in a gen hi.

Minister in DC kiang ah court order delay bawl ding ah hiatsak ti tawh kisai a hilchianna a chun, Minister himahleh ama departmetn tuk Agriculture a hidan gen in, Act ah DC thuneina um, DC in thupukna alak ding takleh a kisaipi department (Tribal Affiars & Hills) ah thawt ding, ADC deparment chu TA & Hills nuai ah um a hina chung ah Minister le Kaysii ahina ah thubuai tawh kisai ama kiang ah file chiakhalo in a gen hi. Chuleh, Chief Minister kimuhpi a ut ziak un Dec. 22 in appointment ka lak piak a, himaleh a vaigei ziak un Business Advisory meeting ah pang ding in CM a pawtdaw san a, kimu theilo ah a um nung ua appointment lakpiak kit ah zia hun a chu politics tawh kisai bangma genkhalo, finance tawh kisai bep ah holimna nei un a gen hi.
Thudang khat ah, May 25, 2018 in State BJP lawiupa te’n ADC/CCpur member-te ko in, State BJP Conference Hall ah meeting a neipiu a, zia hun a chun leadership kichuna chu 2019 Parliamentary Election zaw masang ah genkhawm hikitlo ding in thupukna a siam ua, Manipur High Court in floor test meeting ding ah order a sua le Supreme Court in stay abawl ziak ah leadership kichuna tawh kisai ah final judgement ah party kigawllo ding, court case bawl te'n le case withdraw bawl unlah, chamna siam un ti State Party dawtna hi’n a kigen hi.

YVA Block thak honna leh election nei

Lamka, May 26: Vungminthang, President YVA-GHQ mapuina nuai ah cabinet member te'n zani a khan YVA Kawlhen Block hawndawna leh Chongkhozou Block election a bawlpi ui. Chiangpi khua ah YVA Block Office ah 2018-2021 sung YVA Chawngkhozou block lawiupa ding telna a nei ua, zia hun a chun, President ding in Siaklianpau of Chawngkhawzo leh Vice President ding in Khamminthang of Munpi telting in, Vungminthang, President, YVA-GHQ in kitiamsakna a nei hi. YVA Chongkhozou Block nuai in unit 11- S. Khawlian, Thingkeu, Chiangpi, Munpi, Chongkhozou, D. Khawzim, V. Munlai, Lungchuang, K. Lonmual, Mualhoichiang leh Sainoulian a um hi.

YVA Chawngkhawzo Block election aneizaw un, YVA Kolhen Block thak hawnna a nei ua, YVA Kolhen Block hawn a hitawh kitawn in Block President ding ah Lalremsang of Kolhen leh Vice President ding ah Muankham of Suangpha te a tel ting ui. Teltin ah um te Vungminthang in kitiamsakna nei in Rev. Kh. Paugen pauchap piakna a nei hi. YVA Kolhen Blok nuai in Unit 9- N. Saikawt, Mualdak, Damzawl,, D. Munlui, Dojang, Kolhen, Songpha, Sanglel leh Naupanglon a um hi.

Vehicle Pool Service Agency hawng

Lamka May 26: Churachandpur ah a masapen ding in Vehicle Pool Service Agency leh Point One office-cum-counter ding hawnna leh latna tuzingkal dak 7:00 in Hebron Veng, New Lamka ah a um hi. Zia hun chu T. Paukhanlian, EM, ADC Churachandpur in Chief Guest leh Lianzapau Samte, Ex-President, SSPP GHQ in Chief Host hina tawh a uap ui. Chief Guest in hawndawna nei in, Pastor Paununsang, Local Pastor, EBCC Zion in Pathian kiang ah latna a nei hi. A neitu, Suanlian in a gendan in, Lamka leh Imphal kikal a mimal Gari awngtak a taite mipi’n a phatchuampi theina ding ah, mimal in sum tamlo piak ah, mi pani kikal ah lawkna a umgel ding dawina ah zia agency chu pat ah um hi’n a gen hi. Manipur pumpi leh state dang chanpha ah gari mangnuamte a ding ah Vehicle Pool Service in Sharing, One Way Hiring, Two-Way Hiring, Town Service, Auto Service, Ambulance leh Delight Journey tawh pangkhawm a, khawvel pumpi ah khualzintheina, khawpi chuamchuam ah hotel booking bawltheina chuleh Kolte a sang ale kimanzaw ah ticket laktheina hi’n le a gen hi. Tulaitak ah zia agency nuai hin gari chi chuamchuam 38 register bawlzaw in a um a, a bawl utte’n a thawn ah bawlthei zing ding hi’n a kigen hi.

Field visit bawl
Lamka May 26: CCpur district sung a government leh private school a teacher te’n National Indira Gandhi Open School (NIOS) nuai a Diploma in Elementary Education (D.El.Ed) training a nei uh tawh kisai in, Study Centre tin ah mun chuamchuam in field visit a bawlsek ui. Zia dungzui chun, tuni’n Blue Star Academy study centre in work based activities tawh kisai in Keibul Lamjao National Park ah field visit a nei ui.

Teachers' Orientation hun mang
Lamka May 26: New Testament Baptist Churches Association, Naupang Pawl in tuzingkal dak 11:00 in NTBCA biak-In, Simveng ah June tha ah Vacation Bible School(VBS) a neina ding utawh kisai in Teachers' Orientation hun a mang ua, teacher ding mi 30 vel a pang ui. Zia hun a chun, Rev. K. Hangnung, President, Baptist Partnership Minister, NTBCA, L. Kamchinhau, Assistant Professor, leh S. Ngulzaching, Lecturer te’n VBS ah ziltîltu dingte ziltîlna a nei ui. VBS hi NTBCA Campus leh Hope Baptist Academy ah "Dino Detective :Digging for God's Truth” ti thupi mang ah nei hiding ahi.

TISS Criminal Justice Fellowship Program
Lamka May 26: TISS Criminal Justice Fellowship Program in Tata Institute of Social Sciences kithuapina tawh tuzingkal dak 10:30 in RWUS Conference Hall, Sielmat ah “Life in Post Conflict Churachandpur” ti thupi mang in kipawlkhawmna a nei ui. Zia hun chu Dr. Immanuel Varte, Assistant Professor, Indira Gandhi National Tribal University, Imphal; Dr. Roy Laifunbam, Public Health Physician leh Mary Beth, Co-founder, Rural Women Upliftment Society-te panelist in a pang ua, kipawlkhawmna a mapui ui. Dr. Immanuel Varte in “Youth Unrest” tawh kisai genna a nei a, Dr. Roy in “Mental Health” leh Mary Beth in “Gender & Community Rebuilding” ti thupi in mang in holimna a mapui ui. Zia hun a chun, scholar, student, law practitioner, media persons, NGO leh mipawimaw tamtak a pang ui.

Free LPG Gas Connection piakdawna nei

Lamka May 26: Salem Veng Village Authority saina’ tuzingkal dak 11 in Salem Hall ah PMUY beneficiary-te mi 60 kiang ah Free LPG Gas Connection hawpdawna a nei ui. Zia hun chu Thangboi Gangte, MCS, SDO, CCpur in Chief Guest hina tawh a uap a, C. Lalzawmliana, Chairman, Salem Veng Village Authority in vaidawnna thu leh Gas Connection hawmdawna tawh kisai genna a nei hi. Chief Guest in a gendan in, Narendra Modi solkar in India gamsung leh numeite dawpkangna ding ah program 7 a patdawte lak ah PMUY hi pakhat ahia, PMUY in India gamsung hing sak ah, thing-leh-lote kepbit ding, hui thiansak ding leh numeite dawpkangna ding ah ann huanna ding ah thing manglo ah gas matding ti ahi dungzui in, Salem Veng Village authority in ngai pawimaw in, beneficiary te’n a kisai ding uh himaleh mipite khualna ah gas connection a neitheina ding ua a panlakdan uh ettawntak hi’n a gen a, maban ah vengsung khantona ding ah pantheina a um leh kiman zing ding ahi’dan le a gen hi. Tuni ah Free LPG Gas Connection Card leh gas set hawmdawte ahileh, Bungmual Indane Gramin Vitrak nuai ah ahia, village authority ah Mate, VL Chhuanawma leh Lalmalsawmi te’n tha khat leh kim sung a buaipi uh ahi.

Career Counseling on Civil Services

Lamka May 26: Siamsinpawlpi (SSPP) General Headquarter saina in tuzingkal dak 10:00 in Lamka College ah “Career Counseling on Civil Services” ti thupi in hun a mang ui. Resource Person ah T. Roumuan Paite, IRS a pang a, Civil Service tawh kisai Career Counseling a nei hi. Aman a gendan in, mi kimuang tamtak lak ah Civil Service tingzo ding ah kimuang ngamlote’n tup ale neilo di’n a gen a, tupguna tawh zawlo ding umlo ahi ti lungput tawh civil service maitua ding in a tîlkho hi. Chun, kisaklawkna ding ah pawimaw, study material chuamchuamte le a hil hi. Zia hun a chun, zing ah ALS saina ah Scholarship mutheina ding ah examna ah mat ding Admit Card le hawmdaw in a um hi.

YPA New Lamka block in election nei

Lamka May 26: Young Paite Association (YPA) Hall, New Lamka ah tuzingkal dak 10 in YPA New Lamka block sung ah 2018-2021 vaipaw ding kitelna a nei hi. Zia hun a chun, YPA New Lamka Block nuai a unit 13 apat palai te’n unit-wise in vote khiakna a nei ua, YPA kikaihuaina Dân bupi article 13, a neu 7-na dungzui ah unit tin ah palai 10 leh block committee-te leh block advisers te’n vote a nei ua, a kigawm in vote 139 khiak in a um hi. Kitelna hun ah palai chiakhawmte’n candidate 29 lak ah, mi 15 a teldawk ua, teldaw ah umte’n amau sung ah office bearer ding telna le a nei ui. K Thangkhogin, Presiding Officer in teltin ah umte kitiamsakna a nei a, Pastor H Jamkhanpau, Local Pastor, EBCC, Hebron in pauchappiakna a nei hi.

Common Service Center hawng

Lamka May 26: Rengkai Vengpui ah tuzingkal dak 6 in Digital India nuai ah Digital Seva, Common Service Center (CSC) hawndawna leh Pathian kiang ah latna a nei ui. Zia hun a chun, Micheal Haokip leh Peter G Bieklien, District Managers, District E-Governance Society, Ccpur te’n CSC hawngdawk in, Rev John Vanlalsan, DS, WMCEI in Pathian kiang ah latna a nei hi. CSC ahileh Digital India nuai a solkar tawh kisai ah palai nasem ahia, skill development tawh kisai ah scheme chuamchuam a piakthei ban ah central, state leh district ah e-governance nuai ah mipi pawimawte a pethei hi.

Regulation of Non-Manipur Peoples Bill, 2018 tawh kisai genkhawm

Lamka May 26: The Joint Action Committee on Inner Line Permit System (JCILP) mapuina’n tuzingkal dak 9:30 in Mizo People Convention (MPC) Office, Hmuia Veng ah Zomi Council, Hmar Inpui, MPC te’n joint meeting a nei ui. Zia hun a chun, JCILP apat Arjun Tenbeiba, Convenor; Brojendra Naorem, Co-convenor; KSH Somorendro, Co-convenor; YK Dhiren, Co-convenor, J Ningomba, Executive member; W Rabi, Executive member-te a pang ua, CCpur district apat Hmar Inpui, Mizo Peoples Convention, Tedim Chin Union, Paite Tribe Council, United Zou Organization, Gangte Tribe Council, Zomi Council ah president/chairman, secretary, executive committee member ban ah H. Mangchinkhup, Chief Convenor, JACAATB a pang ui. Meeting hun ah JCILP in Manipur tualsung mite humbitna ding leh Manipur pawlam state chuamchuam apat Manipur hunglut dingte apat kivenna ding leh etzuina ding ah The Regulation of Non-Manipur Peoples Bill, 2018 a draft uh tawh kisai genkhawmna a nei ui. The Regulation of Non-Manipur Peoples Bill, 2018 chu Manipur tualsung mite venbitna ding a hina chung ah Assembly session ah puaklut ahi hun ah dalna bangma umlo ah a chiathen ding dawina ziak ah Bill draft thak ah um chu a kisaikhakpi (stakeholder) chuamchuam te tawh etkhawm leh genkhawmna nei masat hiding ah Chief Minister in a gen gual ah chiapi ah um a hi. The Regulation of non Manipur peoples Bill, 2018 tawh kisai a chu, JCILPS in maban ah Manipur state sung mun chuamchuam ah stakeholders-te ngaidan lak khawmna nei zawm ding hi’n a kigen hi.

Gul chuk ziak ah thi
Lamka May 26: A chiata May 25.2018 ni ah Thanlon Sub-Division sung ah um Khajang khua ah Siampu kiti pawsal khat chu gul in a chuk chu damzo lo ah tuni May 26, 2018 ah mualliam in a kigen hi.

Sepna a pat kaisang
Lamka May 26: K. Muanzo Duhlian s/o Thangtinlun Duhlian chu a sepna State Bank of India (SBI) ah Scale III (Manager) apat Scale IV (Chief Manager) in a kaisang hi. Ama’n tuma deu a khan Branch Manager SBI, Tuibong in a la sem hi.

TLPA cadre 3 mat ah um

Imphal, May 26: Red Shield Division nuai ah 38 Assam Rifles leh Kangpokpi Police in Kangpokpi district, Haibung village ah joint operation a bawl hun un, non-SoO UG group, Thadou People’s Liberation Army (TLPA) active cadre 3 aman dawk ui. Mat ah um cadre pathum te chu - Pasokholal Vaiphei @ Chaiza (35), s/o Seikholam Vaiphei, Leninlal Lhouvum @ Rocky (45), /o Seilen Lhouvum leh Jangboi Lhouvum @ JB (20), s/o Paoboi Lhouvum te a hiu a, amau pathum chu Haibung khua-mi a hi vek ui. Chun, Kangpokpi police station khut ah piaklut ahiu a, sum demand thil chuamchuam ah panlakna nei un a gen hi.

Pawsal 1 apat Tokey Gecko 2 mandawk
HQ IGAR (South) nuai ah 12 Assam Rifles of 26 Sector Assam Rifles in tuni’n Imphal-Moreh National Highway (NH 102), Permanent Vehicle Check Post (PVCP), Khudengthabi ah gari checking a bawl hun un, Red Colour Pulsar Bike, registered number KA 03 HP 0970 ah chuang pawsal khat a pat in Tokay Geckos 2 amandawk ua, zia chu 14 inch leh 14.5 inch ah lian a hi. A pawtu ahileh Mr Seitinthang Haokipage (25) of Moreh a hia, Forest Department Tengnoupal khut ah piakdaw in a um hi. Tokey Gecko ahileh Indian Wildlife Protection Act 1972 nuai ah schedule III ah ganhing venbit ding ah kizik ganhing list ah pang a hia, tha ding phal hilo a hi. Tokey Gecko kiti hiatbailam ding ah thankip chi khat HIV natna zendamna damdawi ah kimang thei ah gen a hi.

Modi vaihawmna ‘Reign of terror’ gual a hi;Gaikhangam

Imphal, May 26: Bharatiya Janata Party (BJP) in election campaign hun ah a thutiam te a sukpitinlo ziak in tuni’n All India Congress Committee (AICC) in India gamsung mun chuamchuam in lung-awilo suklatna a nei hi. Zia chu tawh kitawn in Manipur Pradesh Congress Committee (MPCC) in le chutmun kiphinna nei hi. MPCC President lui Gaikhangam in thuthak lakhawm mite kiang ah a genna a chun, BJP in election hun ah corruption sukbei ding, gamdang a pat black money nung lakdaw hiding, nisin pawimaw thil te aman sukkiam hiding leh thiangtho tak ah nasem ding hi ah thutiam a bawl chu supitinlo in a gen a, tu ah government chu ‘Terrorist government’ hi ah genkawm in Narendra Modi mapui NDA government vaihawmna chu ‘Reign of Terror’ hi’n a gen hi.

Opposition leader Okram Ibobi parliamentary election hun ah Narendra Modi leh amapui BJP in thutiam a bawl te a sukpitinlo ziak ah kiphinna nei a hidan uh gen in, BJP led NDA government chu kum 4 tingta himaleh a thutiam a sukpitin umlo in a gen hi. GST tawh kisai a genna a chun, Prime Minister Dr. Manmohan Singh in a la puakdaw himaleh BJP in tin leh ha thua ah a la dodal ziak ah pass theilo ah a la um hi’n a gen hi.

PRJA convenor Erendro Leichombam mat ah um
Imphal, May 26: Peoples’ Resurgence and Justice Alliance, Convenor leh last state Assembly election ah Thangmeiband Assembly constituency ah candidate Erendro Leichongbam chu tuni’n Imphal West police team khat in a man ui. Mat ah a umna ziak genlat hilo maleh video thezak ziak leh Chief Minister chapa tha hiding ah vauna a bawl ziak ah kiman hiding hi’n a gen hi.

CBSE nuai ah Class XII results puan hita; Overall pass percentage 83.01%

New Delhi, May 26: Central Board of Secondary Education (CBSE) in Class XII results tuni’n a puang a, regions chuamchuam um te lak ah Trivandrum regions ah pass percentage sanpen in pass percentage 97.32% a tung hi. A ban ah Chennai region 93.87% leh Delhi 89% pass percentage a tung hi. Total student exam bawl a hiuleh 11,06,772 a hiu a, zia lak a chun student 9,18,763 te exam in a lawting ui. Overall pass percentage ahileh 83.01% a tung ah kum 2017 sang ah 1% ah kalto a suak hi. Chun, Uttar Pradesh, Noida ah Step by Step School apat Meghna Shrivastava in marks 500 lak ah marks 499 mu’n topped hina a lua hi. pawsal total pass percentage ahileh 78.99% a tung a, numei 88.31% tung in numei te’n pawsal te sang ah 9.32% ah bawlhawizaw a suak hi. Chuleh, student 72,599 te’n 90% chunglam percent a muzo ua, student 12,737 te’n 95% chunglam marks a mu zo ui. CBSE nuai ah Class XII exam ahileh 5th March, 2018 - 27th April, 2018 sung ah bawl in a la um hi.

Manipur ah solar toilet masapen install hita

Imphal, May 26: Northeast ah solar toilets masapen hiding in Manipur ah tunaicha a khan Ibudhou Marjing hill Heingang ah Tourism Director, Waikhom Ibohal in a hawnna a nei hi. Waikhom Ibohal in a genna a chun, Guwahati ah global summit khat ah a panna entrepreneur khat tawh a kiholimnau ah solar toilets matthei a hidan a hiatdaw tawh kitawn ah Manipur ah zia gual toilet chu a um theina ding ah panlakna a nei nung ah hawng dawk thei ah um hi’n a gen hi. Tu ah install kibawl chu a etthakna dan ah kibawl himaleh lawting mama in a gen a, tunung ah state sung tourist mun te ah install bawlbe hiding in a gen hi. Solar toilets founder ahileh (Ravikas Maitri) Ravi Senji a hia, ama leh a dealer te’n trial basis ah Manipur ah install a bawl uh a hi. A kigendan in toilet ah solar panel kitua chun power supply a piak thei banah ah ni’n sukthianna le kimang thei in a kigen hi. Ravi Senji ahileh Chennai pansa a hia, tuma sang ah Tamil Nadu leh Andhra Pradesh ah solar toilet install bawlta a hi. October 2, 2018 masang ah Manipur ah solar toilet unit 100 install bawl hiding in a kigen hi.

24th State Level Khurpui – Lam Festival 2018 mat ah um

Imphal, May 26: Chief Minister N. Biren Singh in Chandrakirti Auditorium, Palace Compound, Imphal East District ah Kom te ding ah festival thupi pen ah kihia, Khurpui-Lam Festival, 2018 kimatna a thugenna a chun, state sung ah community lian in neu taleh a um zosia te state neitu a hidan taklang kawm in kipumkhatna tawh khantona ding ah panlakna a um thei zawkna ding ah govt in nasep thilbawl nei zing in a gen hi. State sung ah community 36 tuam te pu leh pa te khang a pat kituak tak ah a la khawsa khawm a hitakdan uh gen in, community zosia khat leh khat kizabawl tua chiat ah khawsak ding pawimaw in a gen a, North East region ah community 240 val um leh pau 180 um in a gen hi. Kom community chu community neucha himaleh culture leh identity a venbit zingna chung ua pakchat ding a hidan gen in, tu ah state Government in ‘Go to Hill’ mission a pat mipi taksanna leh lungsiatna chang in a gen a, valley leh hill ah um te kal le hawi chuam mama in a gen hi. ‘Go to Village’ mission ahileh government scheme chuamchuam te kituptak ah mipi’n a mutheina ding ua chiapi ah um a hidan gen in, Makhel-Sajouba, Koubru leh Anal Khullen etc te panna pu leh pa khang ah mun pawimaw ah a la kimatna mun te government in venbitna ding ah a thak tak ah panlakna nei in a gen hi. Chun, Kompi mipi’n State festival ah Khurpui-Lam puan ding ah dawtna a siam chu enzui ding leh cultural hall sak ding ah phutna a nei uh le sukpitin piak ding in thutiam a bawl hi. Zia hun matna chu Social Welfare Minister Nemcha Kipgen, Government Chief Whip leh Moirang AC MLA P. Saratchandra te’n le a uap ui. Khurpui-Lam Festival kiti ahileh Kom mipi te suangkua hawm (cave) ah a khawsak lai ua, humpi’n attack a la bawl, zia humpi chu that ah a lawpna ala mat uh hi’n a kigen hi. Kom pau ah Khurpui chu suangkaw-hawm tina a hia, Lam ahileh lam/dance tina a hi. A langkhatlam ah 24th State Level Khurpui – Lam Festival mat season dang chu Deputy Chief Minister Yumnam Joykumar Singh, Works Minister Th. Biswajit Singh leh Water Resources Minister Letpao Haokip banah Ginsuanhau Zou, MLA te’n khuallian hina tawh a uap ui.

Minister Th. Shyamkumar in Ningthi village vena nei

Kamjong, May 26: Forest & Environment and Horticulture & Soil Conservation Minister Thounaojam Shyamkumar in Kamjong district, Phungyar Assembly Constituency huapsung ah um Ningthi village vena a nei a, khawsung mipi te’n thupitak in vaidawnna a nei ui. Ningthi village ahileh Imphal a pat 135 km ah gamla um a hi. Ningthi village headman NS Shimray in a genna a chun, Ningthi village chu Tangkhul tribe, inn 187 chenna, population 1,200 tuam um in a gen hi. Chun, a nekhawlnau ahileh lothaw (Agriculture) hi’n a gen a, Minister in a khua’u a phak chu Ningthi village um a pat Minister a khua’u pha masapen hinalai in a gen hi. Minister Thounaojam Shyamkumar ahileh ‘Go To Village’ mission nuai ah Chief Minister thupiak dungzui ah Ningthi village pha hi’n a kigen hi.

Ningthi village headman NS Shimray in a genzawm zelna a chun, a khua’u ah Primary Health Sub Centre um maleh medical emergency hun ah Kamjong HQ ahiloleh Ukhrul HQ a zawt uh ngai sek in a gen a, zia ding a chu a khua’u ah (DI truck) khat um, emergency hun zosia khua mi te’n a mat sek uh, Kamjong HQ tiang thak lumletna mi 1 chung ah Rs 100 zel a piak sek uh hi’n a gen hi.

Inter village road hawilo ziak ah haksatna a tuak zing banua Government schemes leh programme te le kituptak ah mulo, PDS item le kituptak ah kihawmlo, Ningthi Government Junior High School ah teacher umlo, student 60 te teacher ding ah mid-day meal scheme fund a pat mi 2 guai, remuneration Rs 5,000 gel a piak sek uh hi’n a gen hi. A khawsung ah ziagual haksatna um te chu etzuipi ding in vena nei Minister Th. Shyamkumar kiang in Ningthi village headman NS Shimray in dawtna a siam hi.

Quality education pawimaw: Education Minister

Imphal, May 26: Directorate of University & Higher Education sponsored bawlna nuai ah Maharaja Bodhchandra College, Palace Compound saina’ tuni’n ‘Two Day National Seminar on Assessment of Higher Educational Institute by NAAC: Problems & Prospect’ kiti hawnna a um a, zia hun chu Education Minister Thokchom Radheshyam in khuallian hina tawh uap in, state sung ah quality education pawimaw a hidan taklatna a nei hi. Institution zosia hardware leh software i.e - infrastructure leh teachers & students um a hidan gen in, student te lawtinna ding ah teachers, students leh non-teaching staff te panlak khawmna kituptak a um ding pawimaw in a gen hi. Zia hun matna chu Vice Chancellor, Manipur University, Prof. Adya Prasad Pandey; Joint Director, Higher & Technical Education Lourembam Iboyaima Singh te’n le a uap ui.

Imphal Book Fair hawng

Imphal, May 26th, 2018 (DIPR): The 9 Day Imphal Book Fair organised by National BookTrust in collaboration with Directorate of Education (U), Government of Manipur and SaheedMadhumangal Foundation was inaugurated by Shri Y. Khemchand, Speaker, ManipurLegislative Assembly as Chief Guest at DM College of Science Campus today.Speaking on the occasion, the Chief Guest said that Book is a part of humancivilization and also encouraged the people present at the inauguration function to cultivatethe habit of book reading.

Education Minister Shri Th. Radheshyam Singh who graced the inaugural function asSpecial invitee said that Books are source of knowledge, knowledge empowered humans withauthority and the authority gained from knowledge is the highest form of authority. Bookscan be our friend whenever we need time away from our hard day lives. He further said thatlife is like a book, it contains good chapters so, like a book one will come across a goodchapter in his/her life.

The Book Fair is participated by 35 publishing houses from different states includingsix from the state. There are 72 stalls showcasing different books. In connection with the fair,Workshop on Creative Writing for Children, Presentation of short stories for general readers,Orientation on Reader’s Club and Workshop for Teachers, Storytelling for Children,Workshop on Enacting a Story, Career in Book Publishing and Cultural Programme will beorganised from 27th to 31st May, 2018.

The inaugural function was also attended by Prof.(Dr.) Kuldip Chand Agnihotri,Hon’ble Vice Chancellor,Central University of Himachal Pradesh; Prof. Ramjeevan SinghThakur, Director IGNTU, Regional Campus , Manipur; Shri K. Radhakumar, Member ,Sahitya Academy & Registrar, NSU as Guests of Honour and Smt. S. Satyabhama Devi,Chairperson, Saheed Madhumangal Foundation & MSWDC