Nisin Thuhiltu – 24 May 2018

CM in“Meeyamgi Numit ah mi 2500 tuam kimupi ah complaints 780 ngaithakna nei;
CM Office ah Grievance Cell in Department chuamchuam te panlakna entha zing

Imphal, May 23 *(Nisin Thuhiltu)* : Tu May tha a ding ah “Meeyamgi Numit (People's Day)” tuni 23 May 2018 ah mat ahi tawh kitawn in Chief Minister’s Secretariat, Imphal ah Chief Minister N. Biren Singh in zingkal dak 8:00 a pat nitaklam dak 2:30 tiang in mi 2500 tuam a kimupi a, mimal tak in complaints 780 ngaithakna a nei hi. Chief Minister in thuthak lakhawm mite kiang ah a genna a chun, government officials te’n government guanggalna thak umte lawtin theina ding ah panlakna nasatak a neina chung ua kipakthu gen in, mipi te chung ah kipezo tak leh kukal tak ah govt. employees te’n panlakna a nei uh chu lungdam mama hi’n a gen hi. Chief Minister thupiak dungzui ah nasepna leh panlakna umlo ah gen ah a umna tawh kisai a hilchianna a chun, Chief Minister’s Office ah monitoring system kawi ah um leh Grievance Cell in a kisaipi department te’n panlakna a nei leh neilo uh etzuina neizing uh hi’n a gen a, Chief Minister’s Office ah Grievance Cell in complaint umte a hun hun ah etzuina neizing kawm ah complaint a bawlna mobile number chiat ua SMS ah a status leh thil umdan hiatsakna bawl zui pek uh hi’n a gen hi.

Chief Minister in govt officials te chu Meeyamgi Numit ah compliant um te tawh kisai ah thupiak kibawl te chu Departments zosia’n ngaikhawk ding ah chialna bawl in, ziagual thupiak chu ngaisaklo a um ua leh a chung ua action lak hiding leh gawtna piak hiding in a gen hi.

State sung ah illegal immigrants te chungchang tawh kisai a genna a chun, state mi leh sa hina nei te’n illegal immigrants te state sung luttheina ding ah panpina a piak zing ua leh tunung ah indigenous mite ding ah haksatna tung ding a hidan gen in, innlua ding tu te inn neitu te’n a hiatchian masat sek ding uh pawimaw in le a gen hi.

Aadhar card leh thil chuamchuam siamna Common Service Centres kimang sek sukbei ah a umna tawh kisai a genna a chun, zia gual thil te chu government recognised agency te bep in a bawl tak ding a hidan gen in, Director General Police (DGP) chu Behiang, Moreh, Mao, Jiri etc ah a pawimaw dungzui ah illegal immigrants te etzui ahitheina ding ah special Check post leh Gate siam ding ah hiatsakna bawl in a gen hi. Etsakna ding ah Pallel Police Station ah illegal immigrants te matdaw ah a umleh Tengnoupal, Moreh Police Stations etc ah Police Officers zosia’n amaw a puak ding, state sung luttheina ding ah illegal immigrants te phalna/permit petu te’n action khautak amaitua ding uh hi’n a gen hi. Himaleh valid identification documents nei immigrants te ahiuleh state sung ah zalen tak ah vak lumlet thei ding uh hi’n a gen hi.

Hiatthei khat chu, Meeyamgi Numit (People's Day) thasin tarik 15 ah nei hisek maleh tuchung ah ‘Go to Village’ mission tawh a kituak khak ziak ah tu May tha a ding ah tuni, 23 May 2018 ah “Meeyamgi Numit” chiapi ah um a hi.

Manipur ah Sports University umna ding ah Union cabinet in Ordinance approve
Imphal, May 23 *(Nisin Thuhiltu)* : Chief Minister N. Biren Singh in Prime Minister Narendra Modi, BJP National President Amit Shah leh Minister of State (Independent Charge) for Youth Affairs and Sports Rajyavardhan Singh Rathore te banah Union Cabinet in Manipur ah first National Sports University umsakna ding ah Ordinance approve a bawl uh chu pakcha mama a hidan taklang kawm in, Manipur mipi te thasik in kipakthu a gen hi. National Sports University umna ding tawh kisai ah Ordinance chung ah President in lemsakpina suai a kai ding leh tunung sawtlo ah Parliament ah Bill pass a hiding kinem hi’n le a gen hi. Hiatthei khat chu, Manipur Government in National Sports University umna ding mun leh mual a sufel a, gam 300 acres huap ah National Sports University sak hiding, Prime Minister Narendra Modi in 2014-15 budget ah a puan dungzui ah Rs. 100 crores bei ah kisa ding a hi.

Sum-le-pai thu ah Chairman kichu hilo; Langkhanpau Guite in hilchianna bawl

Lamka, May 23 *(Nisin Thuhiltu)* : Autonomous District Council (ADC), Churachandpur a Ex-chairman, Langkhanpau Guite, MDC in tuni, May 23, 2018 sunnung dak 3:00 in a chenna inn, Dorcas Veng, New Lamka ah thuthak lakhawm mite kimupi in, ADC sungthu tawh kisai ah thuthang chuamchuam um te hilchianna a bawl hi.

Langkhanpau in ADC/CCpur member-te dawisakna ziak ah kum 2010 apat kum 2017 sung Chairman panmun a lua theina chung ah kipakthu gen in, April 2017 a pat tuni tiang ah ADCC sung ah thuneina neilo a hidan a gen a, May 20, 2018 ni ah Newspaper khenkhat ah Minister Hangkhanlian thugen akisuana tawh kisai ah hilchianna bawl ding pawimaw sa a hidan gen in, ADCC sungthubuai tawh kisai chu sum leh dinmun etlana ziak hizawlo ah Democratic norms dungzui ah Member tamzawte’ muan-ngamna amu ziak ah Majority in vai a hawm ding phutna um hizaw’n a gen hi. Hangkhanlian in teltin a hi a pat BJP ah lut ding ah chialna bawl ti ah kigen chu, teltin ahi nung ah a chial hizawlo ah MLA election ding kuan ah BJP ticket amu hun ah chialna a bawl hizaw’n a gen a, teltin ahi nung ah ADCC ministry sukbuaina ding ah April 17, 2017 ni apat Classic Hotel, Imphal ah pawl siam ah, kikul uh a hidan gen in, zia a pat chu ADCC ah ministry tukzing lai te BJP a lut ding dal ah um a hidan a gen hi.

Aban a genzelna a chun, BJP alut theina ding ua Langkhanpau in Chairman panmun a nutsia ding ti thu a um ziak ah April 24, 2017 ni ah Chairman hina a pat haina siam a, Khaipao Haokip leh a cabinet ding te pauchapna tawh malzawl dawtpiakna nei a hidan gen in, April 2017 a kipat September, 24, 2017 tiang ah Khaipao leh Khaikhanmung-te protfolio, administration leh finance banah transparancy maintain lo ziak ah amau sung ah buaina piang pan, zia chun ADC sung chawkbuai mama in a gen hi. Financial, Trade License issue leh thu dangdang ziak ah buai umto pek ah, September 25, 2017 ni ah Khaikhanmung mapuina pawl siamthak ah um, UPF policy chiapi ding a tiam dungzui ua ama’n le muangtak ah bel, Member 17 tawh leadership claim ah um a hidan a gen hi. Hun bangchan a hem a chia nung ah, November 25, 2017 ah Khaikhanmung in leadership ama, Langkhanpau khut ah pedawk in, Minister in a thuhildan dungzui ah November 26, 2017 ni ah Manipur (Hill Areas) District Council Act 1971, Section 23 (Clause 3) tawh kituak ah Law Court ah thil umdan tut ah um, zia nung a chu November 28, 2017 ni ah ADC Act siamthak ah um, zia zaw a chu siamtuak thakna um kit hi’n a gen hi. Court a thil umdan tut ahi dungzui in Court in Deputy Commission chu member tamzaw suklat theina ding ah hun a piak himaleh Minister in gakna a bawl ziak ah DC in bangma semdawk theilo, December 14, 2017 ah Chief Minister le kimupi hi’n a gen hi. December 16, 2017 a Court order um le tuni tiang ah delay hinalai a hidan gen in, mitamtak in sum-le-pai etla ziak leh dawi ziak ah ADCC sung buai dan ah a gel uh le diklo a hidan Langkhanpau in zia hun a chun a gen hi.

Chun, member tamzaw te’n vaihawmna a tuk uh pawm maleh, Khaipao mapuina nuai ah Council kum 1 val hita himaleh council sitting 1vei le umkha nailo, policy leh buaina chuamchuam umte genkhawm hileh ti a nawp thu gen in, Oil Exploration, Sixth Schedule, Council Extension, Trade License leh a dangdang genkhawm ding pawimaw tamtak umte Chairman in genkhawmna ding ah kona bawl ding ah dawtna siam in, Autonomous District Council (ADC), Churachandpur ah Chairman in le ahiatpilo, Manipur (Hill Areas) District Council Act 1971, Amendment bawl kiti hethiamlo a hidan gen in, Khaipao in Council Sitting a ko a, Executive Member te’n thu chuamchuam a genkhawm teu member zosia’n thupukna a lak uh pawimaw, Transfer Policy ziak ah Seilenmang le a dinmun apat haina siam, Kidnap tawh kisai ah FIR bawl ah um le Police in thuchian heta a hi dungzui ah zukkit hunta a hidan a gen hi.

Singngat ah DI TATA khat tuaksia

Lamka, May 23 *(Nisin Thuhiltu)* : Singngat khua ah tuni, May 23, 2018 in DI TATA-207 khat in tuaksiat tuak in, lamthang in a taitha, himaleh liamna tuak leh thina tuak a um puai. A kigendan in Suanpau Samte in DI gari tui piakna amat, lampi sukna mun a kawi chu, a hektu umlo ah mun ken ah gari taitha suk, Singngat, Bethel Veng ah electric post khat phutan, zia nung a chu Liansang-te ekbuk phusuk in agari kitang thei ti a hi. Gari neitu leh khawsung mipi’n Assam Rifle-te a hiatsak dungzui ua, Assam Rifle leh mipi kithua in gari tuaksia chu a kaidawk ui.

DGP Manipur in Drop Gate siam ding ah order sua
Imphal, May 23 *(Nisin Thuhiltu)* : L M Khaute, IPS, Director General of Police (DGP), Manipur in order a suana a chun, thingnuaimi te leh anti -social elements banah illegal migrants te kituptak ah state sung ah etzui ahitheina ding ah Mao Police station, Jiribam Police Station, Moirang Police station leh Kundong Lairembi (Moreh Police Station) mai ah Drop Gate khat chiat siam hiding ah taklang kawm in, Senapati, Jiribam, Bishnupur leh Tengnoupal District ah Superintendent of Police (SP) te chu Drop Gate siam ding in hiatsakna a bawl a, Mao, Jiribam, Moirang, Bishnupur leh Moreh ah Officers -in-Charege (OC) te chu SDPO te supervise bawlna nuai ah Drop Gate kisiam thak te kituptak ah enzui ding leh muanmaw mi leh thil te kituptak ah check bawl ding, khautak ah panlakna nei ding in hiatsakna a bawl hi.

MLA in Relief Assistance piakdawna nei

Lamka, May 23 *(Nisin Thuhiltu)* : Ginsuanhau, MLA (Singngat A/C) & Chairman, MANIREDA in tuni, 23 May 2018 nitaklam dak 4:30 in a chenna Inn Lailam Veng ah a bialsung ah um huipi leh gial in chenna inn a suksiat piak khua 3 a kipat mi 22 te kiang in relief assistance piakna a nei hi. Khaw 3 a kipat beneficiary-te ahiuleh 2017 kum a huipi leh gial in chenna in a suksiat te lak ah Haijang khua apat innkuan 12, MT Geltam khua apat innkuan 8 leh S. Mollen khua apat innkuan 2 a hiu a, SDO-Singnat Account ah chenna inn sediak-te cheque ah Rs. 5820/- leh aha siatlo deu te 5200/- piak a hi. Zia hun chu khua-hausa te banah Jameson Sehlal Hangshing, SDO-Singngat leh a Staff-te, beneficiary hunkhop te’n a uap ui. Kum 2017 ah Singngat bial ah huipi leh gial kithua in khua bangzat a hem in chenna inn hunkhawp a susia, zia te lak a chu kum chiata a khan, Kangkap ah inn 8 leh Suangnal khua ah inn 2 panpina piak in a la um ua, Mullum khua ah inn 18 vat nalai in SDO in a gen hi.

CMHT, Health Coordinator ding lakna um ding
Lamka, May 23 *(Nisin Thuhiltu)* : Chief Minister-gi Hakshelgi Tengbang (CMHT) saitu ding Health Coordinator panmun lua ding a awng in a um a, zia ding a chu lunglutna neite ding ah zing May 24, 2018 sunma dak 11:00 ah Medical Superintendent Office, District Hospital ah Walk-in Interview um ding a hi. Zia panmun lua thei ding chu Graduate zosa leh GNM zosa a hiu ngai ding a hi.

VDF Association in kiphinna chawlsan; Nodal Officer ding guat piak ah um
Lamka, May 23 *(Nisin Thuhiltu)* : All Manipur VDF Welfare Association in 18 May 2018 apat May 27 tiang ah Manipur state sung ah VDF um zosia’n nasemlo ah kiphinna chiapi ding lemsakna a nei dungzui ua, kiphinna a chiapi zing uh tawh kitawn in, Manipur Chief Minister in VDF lawiupa te kihona nei ah ahaksatnau genkhawmpi hiding leh VDF te’n kiphinna chawlsan ding ah chialna a bawl ziak in, VDF te'n strike a bawl uh a chawlsan ui. All Manipur VDF Welfare Assn in, state govt. ah demand a bawl teu sukpitin piak ahilona chung ah Chief Minister kimupi ah thil umdan tut ding a guat uh a lawsap ziak ua ceasework strike a pat uh a hia, kiphinna a nei hun sung ua support bawl zosia te chung in All Manipur VDF Welfare Assn thasik in S Laltingen Vaiphei in kipakthu a gen a, maban ah le kithuapina pezing ding ah chialna bawl kawm in, LM Khaute,IPS, Director General Police, Govt.of Manipur in VDF te a ding ah Nodal Officer ding ah ADGP Christopher Doungel, IPS, a guat piakna chung in le Association in DGP chung in kipakthu a puang hi.

Medical officer te’n training bawl

Lamka, May 23 *(Nisin Thuhiltu)* : State Health Education Bureau, Medical Directorate, Imphal saina nuai in, CMO/CCpur Conference hall ah tuni’n “Diseases of Public Importance of Medical officers” kiti training a um a, PHC chuamchuam apat Medical Officer banah, District Hospital a department chuamchuam a Medical Officer-te leh Doctor 30 te training ah pang in, Dr Kh Sashee Kumar Mangang AD (PH); Dr Tomcha Khuman, Joint Director SPO (SBC), NHM; Dr L Gojendra Singh, State Epidemology leh Dr O ramesh Singh, SND, NIDDCP te’n topic chuamchuam mang in ziltilna a nei ui.

Measles leh Rubella Vaccination tawh kisai genkhawm
Lamka, May 23 *(Nisin Thuhiltu)* : India gamsung ah Measles (sensi) beisakna ding Rubella (sensi suaklo) khamna ding tawh kisai ah Measles-Rubilla Vaccination Campaign nei ah a um hun ah Churachandpur District achievement tawh kisai in tuni, May 23, 2018 sunnung in DFWO Office Chamber ah genkhawmna nei in a um hi. Zia hun a chun, Dr. Debasis Roy, WHO Consultant, North Eastern Region leh Dr. Girvar S. Baria, RRT, WHO banah District sung ah PHC leh CHC ah Medical Officer in-charge-te’n thil umdan leh maban panlak dingdan a genkhawm ui. Measles-Rubilla Vaccination Campaign phase masa nei ahi hun ah District in naupang piangtil a pat kum 15 kikalte school zosia a kap banaua, school kailo te Angawadi Centre leh mun lemchanna mun ah a kap uh himaleh naupang 88,454 kap ding lak ah campaign hun, March 26, 2018 - May 14, 2018 sung ah naupang 76,042 kap ah um, district in percent 85.97 kapzo ti ah tepte a hi. Ziana chung a chun, Dr. Roy in percent tamzaw kap ahitheina ding ah panlakna a thak ah nei ding pawimaw ah a gen dungzui ah district Special Mobile Team khat siamdaw in a um a, amau chun kapkhaklo ah um te kap ahivek theina ding ua panlakna a nei ding uh ti a hi. MR Vaccination Campaign ahileh district sung ah ngaidan diklo khenkhat a um ziak ah lemchanlona liantak um hi’n a kigen hi.

District Hospital ah Medical Canteen enkawltu ding bidder ah lak hiding
Lamka, May 23 *(Nisin Thuhiltu)* : District Hospital, Ccpur huangsung ah Medical canteen keklet leh siamthakna nasep zawthian ah umta himaleh May 03, 2018 ni, DC office, Conference Hall ah Shyam Lal Poonia IAS DC/Ccpur mapuina, Governing Body, Rogi Kalyan Samiti (RKS) meeting thupukna siam tawh kituak ah Medical canteen enkawltu ding bidder ah lak ding ti a hi dungzui in tuni, 23 may 2018 in PWD department apat Mr Pau SO, PWD/CCpur Division mapuina’ team khat in renovation kibawlna ashen leh so um te tawh kisai estimate bawlna a nei ui. PWD in assessment a bawl hun ua a thil mudaw uh chu DC/CCpur khut ah pelut ding uh hi’n a kigen hi. May 3, 2018 a RKS Governing body meeting thupukna siam dungzui ah PWD in assessment tawh kisai May 30, 2018 tiang ah DC/Ccpur kiang a tun ding, Medical Canteen etkawlna tawh kisai ah, Medical Supdt in tender notice a sua ding, zia a chu bidder bawl tampen kiang ah Medical Canteen etkawlna piak hiding, Hospital huangsung thianthona ding ah ADC in Hospital huangsung ah Dustbin 5 a kawi ding, OT complex a ding ah Casualty leh OT ah meivak kining ting a um theina ding ah Generator thak dawt ding, Security tawh kisai ah private gari himhim Casualty lutna mai ah tailut theilo ding, damlo pawlut leh pawdawk te Casualty mai tiang lut thei ding ti a hi.

NRCM in Crusade bawl
Lamka, May 23 *(Nisin Thuhiltu)* : Ninevi Revival Crusade Ministry pawl in tuni, 23 May 2018 zingkal dak 7:00 akipat sunnung dak 1:00 kikal in PCI (R), Zenhang Lamka ah 37-veina crusade a nei ua, Upa S. Sawnzapum, Deborah, Hauchiin, Ngaihnem leh Upa Khupzatun te’n pauchapna hun mapui in, Revival message genna Rev Lalropui in a nei hi. May 30, 2018 leh EBCC Khominthang ah 38-veina nei ding, zia hun a chu Rev Thangzalun, Gouzavung, May Rose, Nuamboi leh Evan P Thawnkhansuan te’n pauchapna hun mapui ding, Rev Thiansong in Gospel Revival message gending a hi. Revival Crusade a nei hun sung ua Evan. T. Damkhothang, Rev. Dr. Chinzathang, Evan Lianding Guite, Pauzarual, Rev. Kamchinkhup, Rev. Dr. Khamkhanchin leh Rev. Pumsuanmung te speaker ah pang ding a hiu a, Counsellor in Evan P. Thawnkhansuan, Upa T. Khupzatun, Niankhoching, Gouzavung, Deborah, Upa L. Velson, Rev. Lalpienglawm, Rev. P. Khamzachin leh Rev. ST Jamkhanthang te pang ding a hiu. Nineveh revival Crusade in a tup ahileh Churachandpur khawpi sung ah kochuam leh nam kuama khenchuam umlo ah Revival tunsak ding, chamna leh muanna a um zing ding a hi.

Career Counseling on Civil Services bawl ding
Lamka, May 23 *(Nisin Thuhiltu)* : Lamka College, New Lamka ah May 26, 2018 (Kiginni) sunma dak 10:00AM apat suun dak 12:00 kikal ah “Siamsinpawlpi General Headquarters saina nuai ah Career Counselling On Civil Services” kiti um ding a hi. Career Counseling on Civil Services ah Roumuan Paite, IRS in resource person hina tawh Civil Services lunglutna nei te ziltilna nei ding a hi. Zia hun a chu Civil Services lunglut te a tamtheipen pang ding in SSPP General Headquarter in hiatsakna leh chialna a bawl hi.

Teacher 7 um lak ah 2 in class la; attendance register ah kaikim

Imphal, May 23 *(Nisin Thuhiltu)* : Socialist Students’ Union Manipur (SSUM) team khat in Kangpokpi district, Saikul Assembly constituency huapsung ah um, student 132 umna Kamu Ching Govt. Junior High School etthakna a nei hun un, teacher 7 um te lak ah teacher 2 bep school amu’u a, teacher 1 in class IV leh V te class room khat ah class lakpi a hidan le a mudawk ui. SSUM team leh media team in school etthakna a nei hun un, student khenkhat class room sung ah kihel muding a um a, school Head Master L. Rajen chu teacher a kai umlo maleu a office room ah mu in a um hi. Chun, teacher 7 te lak ah teacher 5 te school kailo ah um himaleu attendance register ah present in suai a kikai vek hi. Kamu Ching Govt. Junior High School ah class 1 - class VIII te chu Mapithel dam in a sukkhak khua 4 a pat a hideu ua, teacher te class lak dukdaklo ziak ah student te career hawilo thei ding ah um in SSUM in a taklang hi. SSUM Co-convenor, S. Yaima in thuthak lakhawm mite kiang ah a genna a chun, students teachers ratio in academic curriculum siathei ding ah kilang a hidan gen in, Education Minister in govt school te a ngaikhawk thak ding a nawp thu a gen hi.