Nisin Thuhiltu – 16 May 2018

Karnataka Assembly polls: BJP in single largest party hina a chang;
Governor thupukna siam dungzui ah BJP ahiloleh Congress - JD(S) in govt thak siam ding

Bengaluru, May 15 *(Nisin Thuhiltu)*: Karnataka Legislative Assembly elections ah achiata 12 May 2018 ni ah Assembly constituency 222 ah vote khiak ah um chu, tuni 15th May 2018 zingkal dak 8:00 a pat sim in a um a, results dungzui ah kum 2013 election ah seat 40 bep a la lua zo, Bharatiya Janata Party (BJP) in single largest party hina a chang a, seat 104 a lua hi. Kum 2013 election ah seat 122 a la lua, ruling Congress in seat 78 ah gualzawna a chang a, Janata Dal (Secular)/JD(S) in seat 37 lua in, a pankhawmpi (ally) BSP in seat 1 a lua hi. Chun, Independent leh party dang (others) te’n seat 2 a lua uh hi.

BJP chu single largest party himaleh government form theina ding ah seat 112/113 tiang lua zo lo a suak a, party khat ngawn ah government form theilo ding a suak hi. A langkhat lam ah Congress in JD(S) chu government form ding ah support bawl in, Chief Minister panmun JD(S) in a lua ding in offer a bawl a, Congress leh JD(S) apatkhawm ua ahileh seat 115 lua suak ding, coalition ah government form thei ding a hiu. BJP leh Congress - JD(S) leader te chu government thak form ding kichu in alang alang in governor kiang ah majority a hidan uh a tut gel ua, Governor in banggual thukhenna a siam diam ti chu mitamtak te bildaw a hizing hi.

Karnataka Assembly elections results ziagual chu a hi dungzui in, Karnataka Governor Vajubhai Vala thupukna siam dan zil ah BJP ahiloleh Congress - JD(S) kigawm in Karnataka government thak form ding a hiu a, Governor Vajubhai Vala ahileh Centre ah BJP’n thuneina a chanzaw nung ah kum 2014 election ah governor ding ah appoint kibawl, Gujarat ah Prime Minister Narendra Modi chief minister ahi hun ah Finance Minister panmun ala tuk a hi.

Hiatthei khat chu, tuchung Karnataka Assembly elections ah total candidate 2622 a um a, ziak lak a chun, numei candidate 217 a um hi. Congress in seat 220 ah candidate kawi in, BJP in seat 222 in candidate a kawi a, JD(S) in candidate 201 in a kawi hi. Assembly constituency 224 um himaleh constituency 222 ah vote khiak in a um a, May 4, 2018 ni ah Bharatiya Janata Party (BJP) candidate, B N Vijay Kumar a thi ziak in Jayanagar Assembly seat ah polling cancel bawl in a um a, Rajarajeshwari Nagar constituency ahileh EC official te’n constituency huapsung ah um Bengaluru's Jalahalli locality ah fake voter identity cards tamtak a mudaw ziak ua, vote khiak ding cancel ah a la um a hi. Vote kikhiak nailona Assembly constituency 2 te ah 15 May 2018 leh 28 May 2018 ah vote khiak hiding a hi.

Tutiang ah BJP-led NDA vaihawmna state te ahileh - Andhra Pradesh, Arunachal Pradesh, Assam, Bihar, Chhattisgarh, Goa, Gujarat, Haryana, Himachal Pradesh, Jammu & Kashmir, Jharkhand, Madhya Pradesh, Maharashtra, Manipur, Nagaland, Rajasthan, Sikkim, Tripura, Uttar Pradesh, Uttarakhand leh Meghalaya hita a hia, Karnataka ahileh kichian nailo a hi. Congress vaihawmna ahileh state 2 - Punjab leh Mizoram banah Puducherry, Union Territory a hi.

Capping, Lamp lighting & Oath taking Ceremony nei

Lamka, May 15 *(Nisin Thuhiltu)* : GNM Training School’ Hall, District Hospital, CCpur campus ah tuni sunma dak 11:00 in “Capping, Lamp lighting & Oath taking Ceremony” a um a, zia hun chu L.Jayanta Kumar Singh, Minister , Health & Family Welfare, V. Hangkhanlian, Minister (Agri.Vety. & AH); Dr. K.Rajo Singh, Director, Health & Family Welfare, Chief Host in Shyam Lal Poonia, IAS, DC/CCpur; Dr.Kimngaihching Simte, CMO/CCpur leh Dr.Vumchinpau Tonsing, Med. Supdt., District Hospital te’n Chief Guest, Guest of honour, Funcational President leh Chief Host hina tawh a uap ui.

Programme kipat masang in Chief Guest in Skill Lab hawnna nei in, hun matna a kipan a, Chief Guest mapuina khuallian ah pang te leh tutor-te’n Lamp Lighting bawl in, Second Year GNM student-te’n welcome song sakna a nei ua, Ms. V.Goihzachin, Principal in training school tawh kisai taklatna a nei hi.

Nursing Supt. Leh Dist. Hospital ahNursing Sister mapuina student 28-te’n Capping & Lamp lighting bawl in, Principal in Florence Nightingale pledge simkawm in student-te’n Oath Taking a nei ui. Goihzachin, Principal in a thugenna a chun, ANM/GNM Training School ahileh1984 kum ah ANM tiang ziltheina ding ah kipandawk a hidan gen in, tuni tiang ah kum 34 lam chiata himaleh student 436 bep in graduate zo nalai un a gen hi. Manipur Governor in order a sua dungzui ah October 26, 2016 ah ANM akipat GNM tiang ziltheina ding ah ANM/GNM Training School dawpsan ah um, GNM first year tukum ah capping leh oath taking nei mi 28 a hidan uh a gen hi.

Zia hun mat sung a chun, GNM first year examination result ah GNM Training School akipat top 3 te kiang ah textbook piak in a um a, top 1 in Valley Rose Kamei (Top 8 in all over Manipur) kiang ah Medical-Surgical Nursing textbook piak a hi. GNM Training School a Top 2 - Mayanglambam Jeenia Devi chu Padiartric Nursing textbook leh Top 3 - Chiin Lal Ngak kiang ah Mental Health & Psychiatric Nursing textbook piak in a um hi.

Guest of Honour a pang Minister V Hangkhanlian a thugenna a chun, Nursing profession chu thupi mama, Noble profession hi'n a gen a, damlo etkawlna lam ah Nurse leh Doctor-te mawpuakna lian mama hi’n a gen hi. CCpur district sung ah kumsin leh Nurse zilzo khanthak mi 100 val a um theina chung ah, Health sector ah district in niamkiaklam manawlo a hidan kilang in a gen hi.

Chif Guest, Health Minister L.Jayanta Kumar Singh in a thuegnna a chun, Society a ding ah nurse te panlakna kihia chian chiat a hidan gen in, nurse te ding ah kipiakzawna leh kukalna pawimaw in a gen a, damlo te lungsiatna leh hepina tawh nurse te’n a etkawl ding uh pawimaw in a gen hi. Khawvel ah mihing te a umlai zia, damlo kiti umzing ding a hina chung ah doctors leh nurses te’n damlo te kipezo tak ah a etkawl ding uh pawimaw in a gen hi. Damlo etkawlna lam tawh kisai ah doctors leh nurses te’n a hiding dawl tak ah nasepna a chiapi ding uh leh khenchuam, dawisak chuam a neilo ding uh pawimaw in le a gen hi. Chun, GNM Training school in thil pawimaw chuamchuam dawtna a siamteu chu PHED Minister kimupi ah thil umdan genpi ding leh Computer pawimaw a gen uh chu a vaima theilam ah sukpitin piak ding hi’n a gen hi.

SGT University in Education Fair bawl ding
Lamka, May 15 *(Nisin Thuhiltu)* : Synod Hall IB Road ah May 25-26, 2018 leh SGT University (top 4th rank by Times of India) in “Education Fair” um ding a hi. SGT University ahileh medical leh non-medical Course chuamchuam 160 val nei, Faculty thiam taktak leh kiningting tak nei hi’n a kigen a, Time of India in University hawi penpen ah a teldaw te lak ah a pali na a hi. Zia “Education Fair” a chu pawl XII zo te pang thei ding, student zilna lam ah maban sunzawm nuam te le pan thei ding a hi. University tawh kisai hechian nuam te’n sgtuniversity.ac.in ah etchian thei ding a hi.

PTC GHQ, CWC in lawiupa te kimupi
Lamka, May 15 *(Nisin Thuhiltu)* : Paite Tribe Council (PTC)/GHQ a Central Working Committee Chairman V. Vungzathang in tuni sunnung dak 2:00 in Hiangtam Lamka ah um PTC GHQ Conference hall ah Paite nam sung ah lawiupa chuamchuam te kokhawm in hun a matpi hi. Zia hun a chun, Ex-Minister Phungzathang Tonsing, PTC/GHQ lawiupa te banah SSPP/GHQ, YPA/GHQ leh pawl chuamchuam a pat lawiupa te a chiakhawm ui.

Pastors Retreat nei
Lamka, May 15 *(Nisin Thuhiltu)* : Mizoram Presbyterian Church Synod: Manipur Area in 14 -16 May, 2018 sung in, Manipur Area Administrative Office ah um, Thangka & Lungpau Hall ah 'Nangun Nekding Piau In' ti thupi nei in 'Manipur Area Pastors Retreat' a nei ui. Zia hun sung a chun, thugentu’n Rev. Vanlalzuata, Sakawrtuichhun, Mizoram a pang a, Manipur Area huapsung ah Presbytery 4- Lamka South, Lamka North, Phaipi leh Tanggam a pat pastor 41 te 'Manipur Area Pastors Retreat' a chun a pang ui.

ZYA Singngat in Police te panlakna pakcha
Lamka, May 15 *(Nisin Thuhiltu)* : G.Hauzachin, President leh James Pumthianlam, Secretary, Zomi Youth Association, Singngat Block in kipakpina thusua a bawlnau a chun, Singngat police te'n Singngat area ah khamthei dodalna a nei uh chu pakcha kawm in, Singngat leh Lamka kikal ah flying squad te'n mi 2 tawh khamtheih (No.4) tamtak a mat uh chu kipakpi a hidan a taklang hi. Khamthei dodalna panla a biktak ah Rakesh Balwal, IPS, SP/CCpur, Singngat Police Station ah 2nd OC, SI Thangpu Tonsing leh SI T Lalbiakmuan te chung in kipakthu a puang ui.

Mizoram Home Minister in Hmar Martyrs’ Day uap ding
Lamka, May 15 *(Nisin Thuhiltu)* : Hmar Martyrs’ Trophy Organizing Board (HMARTOB) saina’ Saikot Playground ah May 16, 2018 leh Hmar Martyrs’ Day matna leh 15th Manipur State Level Hmar Martyrs’ Trophy, 2018 final match um ding a hi. Zia hun chu Chief Guest hina tawh R. Lalzirliana, Home Minister, Govt. of Mizoram in uap ding, Chief Host ah Dr. Chaltonlien Amo, MLA, Tipaimukh & President, Hmar National Union (HNU) pang ding, Guest of Honour ah Ginsuanhau, Chairman, MANIREDA & MLA (Singngat A/C) leh Functional President ah Vungzagin Valte, Chairman, MTDC & MLA (Thanlon A/C) te pang ding a hiu. May 16 ahileh Hmar Nation a ding ah thina a la tuak te hiatzingna ding ah Hmar Martyrs' Day ah kimang sek le a hi. Hun mat sung ah laa thiam chuamchuam te’n laa sa ding, YPA, KKL, YMA leh HYA akipat cultural dance, NCC Rayburn College-te apat salutation leh parade um ding a hi.

Khungang Chatse – Go to Village camp bawl

Lamka, May 15 *(Nisin Thuhiltu)* : State Government lemsakna dungzui in tuni, 15th May 2017 in Churachandpur District huapsung ah khua 11 in, ‘Khungang Chatse -Go to Village’ mission chiapi in a um hi. 12-Lanva ADC constituency ah Tangnuam, Pangzawl, Nghathal, Lanva leh Kawnpui khua huap in Lanva ah camp bawl in a um a,Thangboi Gangte, MCS/ SDO Ccpur chu Nodal officer in a pang hi. Lanva ah ‘Khungang Chatse – Go to Village’ mission chu V Hangkhanlian, Minister (Agri, Vety & Animal Husbandry), JC Ramthanga, Principal Secy Govt of Manipur, Shyam Lal Poonia IAS DC/CCpur te’n Chief Guest, Guest of honour leh Funcational President hina tawh a uap ua, Medical Dept apat Mrs Vung Mary in vaidawnna thu gen in, khuallian te’n thugenna a nei ua, Bungmual Indane in PMUY nuai ah gas connection a bawl piak thak BPL innkuan apat mi 5 kiang ah Gas Connection book piakdawna um in, Social Welfare department in kumlui November ah ALIMCO in assessment camp a nei hun ah pianken ah gualphalo te van mat ding in Aids & Appliances chuamchuam mi 5 kiang ah piakna nei in, Care Given Allowances dan in mi 4 kiang ah Rs 6000 chiat piak a hi banua, Old Age pension sum le cheque ah piakdawna a um hi. ZEO in Class IX leh class XI student khat gel kiang in Textbook, Uniform, kengchawt leh Free Admission piakna a nei a, mi 6 kiang ah SSA nuai a scheme in huamkhak CP chair, MR kit, Rotator Large leh Rotator small piak a hi bawk ui. ADC in, Silpauline leh a dangdang hawm dawk in, department chuamchuam in a phatchuampi thei ding ah teldaw ah um te kiang in thil chuamchuam piakdawna a nei ui. Go to village mat sung in, Governmnet official lam a kipat, Aadhar service, animal vaccination and treatment, health check up, bank account hawng, birth/death/marriage certificates, electoral rolls enrolment/ correction, soil Health Cards tawh kisai ah buaina ngaithakna leh sukven thei ah um te sukven piakna a um hi.

Minister V Hangkhanlian in a gendan in, ‘Khungang Chatse -Go to Village’ mission dungzui ah government in welfare scheme chuamchuam a chiapia te chung ah haksatna nei te, a munmun ah sukfel piak hiding, government office ah haksatna vatutlo ah government official te zawk in a khua khua a kanthak ding ti a hi. ‘Khungang Chatse – Go to Village’ mission camp ah Aadhar service, animal vaccination & treatment, health check up, bank account/PMJDY, banking services, birth/death/marriage certificates, electoral rolls enrolment/correction, school supplies, thingno (samplings/tree plantation), migenthei te financial assistance , meithai te panpina, IGNDP/IGNOAP/MOAP/IGNWP nuai ah pension, old age, disabled, soil testing, soil Health Cards tawh kisai ah buaina nei te etzuipi ding leh amun ah sukfel thei tiang sukfel piak ding ti a hidan a gen hi.

58-CCpur A/C ah MLA candidate te’n kithuakhawmna hun nei ding
Lamka, May 15 *(Nisin Thuhiltu)* : Vengnuam United Sporting (VENUS) saina’ May 19, 2018 sunma dak 11:30 leh St. Peter’s School, New Lamka ah 58-CCpur A/C a MLA candidate-te tawh kithuakhawmna leh 58-CCpur A/C Elected MLA kipakpina programme um ding a hi. Zia hun chuleh Lalmuanlian Phaipi, President VENUS; 58-CCpur A/C ah MLA candidate – Upa Dr DK Mang; CT Lian Guite; Thangbiaklian Hangzo; K.Paukhansuan; Haukhanthang Zou; Phungzathang Tonsing leh V. Hangkhanlian in thugenna neiding a hiu a, Upa G.Kamkhanzam, Adviser VENUS in kipahthu gen ding a hi. Program ahilehVENUS in Feb.28, 2017 ah YPA Hall, Vengnuam South ah Live Discussion-cum-Debate with MLA Candidates 58-CCpur A/C a nei hun ah candidate-te lak ah teltin ah um penpen in kithuakhawmna program sponsored a bawl ding a ti dungzui ua Minister V.Hangkhanlian in a sponsor ding a hi.

Justice T Vaiphei in RGG Football Memoriam hawng ding
Lamka, May 15 *(Nisin Thuhiltu)* : Ropiang Foundation Trust (RFT) leh CDSA saina, May 19, 2018 leh Lamka Football Ground ah Raja Goukhothang Guite Football Memorial 2018 (RGG Football Memoriam 2018) kipan ding a hi. Opening ceremony chu Chief Guest hina tawh Justice Tinlianthang Vaiphei, Chairperson Assam Human Rights Commission in uap ding leh tournament hawng ding a hi. RGG Football Memoriam 2018 umna ding tawh kisai in tuni zingkal dak 8 in CDSA Office, Hiangtam Lamka ah RGG Football Memoriam 2018 ah pang ding, club 24 apat Manager te tawh meeting a nei ui. Managers Meeting ah Ropiang Foundation Trust apat lawiupa te le a pang ua, Manager-te apat ngaidan chuamchuam umte genkhawm in, CDSA in Fixture leh pool draft a bawl uh a hi gual ah chiatheng ding in lemsakna a nei ui. RGG Football Memoriam 2018 ah pang ding club te ahiuleh Pool A ah Korte Brothers, Sialchal (NVYC) leh Happy Feet Academy; Pool B ah Lenlai Club, Symropia FC leh SAI recreation club; Pool C ah New Lamka Youth Club (NLYC, Tuiring Youth Organization (TYO) leh Angel's Place FC (APFC); Group D ah Ahsijolneng FC (AFC), FC Zomi Colony (FCZC) leh Unau FC (UFC) ; Group E ah Lamka SC (LSC), FC Zotal (FCZ) leh Senvual FC (SFC); Group F ah Muvanlai Athletics, Zenhang Lamka Youth Club (ZLYC) leh AVOI Football Club; Group G ah Bungmual Youth Club (BYC), Konsham FC leh Anpak FC ; Group H ah Headquarters SC (HSC), United Chikim Federation (UCF) leh ABC - Saidan te a hiu. May 19, 2018 ah opening match um ding a hia, Korte Brothers leh Sialchal FC te kihel ding ahiu. Tournament ah Champion Team in Rs. 2 Lakh sang ding, Runner’s Up in Rs. 1 Lakh leh best performer ban ah kihelna pangkha zosia citation piak hiding a hiu.

Bazaar nupi te’n “Nute Bazaar” building lua ta

Lamka, May 15 *(Nisin Thuhiltu)* : India Prime Minister Narendra Modi in a chiata March 16, 2018 ni ah Manipur state capital Imphal a phak hun ah major Development project chuamchuam hawnna a nei hun ah a hawndaw thak te lak ah khat, Churachandur khawpi sung ah um New Bazar ah “Nute’ Bazaar” chu tuni’n lua pat in a um hi. Nute Bazaar ahileh hawn ah a um nung ah building kisa thak zawthian ahilo banah Bazaar nupi te’n kituptak ah fencing bawl ding ah dawtna a siam ziak ua, fencing siamthak a hi tawh kitawn ah lualo ah tha 2 sung lam um a hi.

Tuni ah Nute bazar lua pat ah a um tak tawh kitawn in Minister V Hangkhanlian in, Shyam Lal Poonia IAS DC/CCpur tawh etthakna a nei ua, zia hun a chu nupi te’n kalto, kumsukna step lemchanglo ah a gen uh tawh kitawn in, Minister V Hangkhanlian in step siampiak ding in thutiam a bawl a, Bazar nupite'n ADC in sum deposit ding ah a bithiak uh le ADC leh DC tawh a rate etthak ding a nawp thu’u gen in, Minister in thil umdan a gen pi hi.

Minister V Hangkhanlian in Nute' Bazar etthakna a neizaw in, Temporary shed ding kisiamna mun le etthakna a nei a, Malcha zuak nupi te haksatna le kanzui in, New Bazar kiim leh kiang ah guta-lacha banah sual thil himhim enzui ding ah Police outpost khat kawina ding mun, CCpur District Students Union (CDSU), Administrative Office le etthakna a nei hi. Nute’ Bazar ahileh Manipur Police Housing Corporation Ltd nuai ah Rs.5.6 crore bei ah kisa a hi.

Khantona ding ah grassroots level ah panlakna pawimaw:CM

Imphal, May 15 *(Nisin Thuhiltu)* : Chief Minister N. Biren Singh in tuni’n District Administration, Imphal West saina Govindagram Laiharaopung, Wangoi A/C ah ‘Go to Village’ camp a uap a, ama’n a thugenna a chun, state sung ah aphalam ah kisanna leh khantona a um theian ding ah grassroots level ah panlakna a thak ah pat ding pawimaw in a gen hi. Politic ah kibual kiti, mipi te ding ah thilpha bawl ding leh khantona ding ah nasep ding ti a hi tawh kitawn ah state government in inn kawt tiang ah mipi te haksatna kanzui ding leh government services tunsak ding a nawp ziak ah ‘Go to Village’ mission chiapi ah um hin a gen hi. ‘Go to Village’ mission hawnna nei hun ah applicants 80,000 val lut, zia lak a chu 40,000 te sukfel ngal ah um in a gen hi. State sung ah drop-out students 40,000 tuam um te chu ‘Lairik Tamhanlasi’ scheme nuai ah lekha sim thak sak thei a hidan gen in admission/examination/tution fees, uniform leh text books te state government in puakdaw piak ding hin agen a, khua kiang nai ah um pukhri tawh kinai ah bathrooms leh toilets sak hiding, zia ding a chu Rs. 3.5 lakhs budget bithiak ah um in a gen hi. Zia ‘Go to Village’ camp a chun, Government Departments 25 te’n stall hawng in mipi te haksatna a ngaithak piak ua, Minister for CAF&PD Karam Shyam, Vice-Chairman of MIDA and MLA Wangoi A/C, O. Lukhoi, Imphal West Adhyaksha R.K Taruni, Additional Chief Secretary (Works and Forest & Environment) Dr. Suhel Akhtar, Additional Chief Secretary (Agriculture and CADA) Letkhogin Haokip leh Imphal West DC Ningthoujam Geoffrey te’n le a uap ui.

Kua’n Karnataka Govt thak form ding?
Karnataka Legislative Assembly elections results puan ah a um tawh kitawn in kum 2013 election ah seat 40 bep a la lua zo, Bharatiya Janata Party (BJP) in single largest party hina a chang a, seat 104 a lua hi. Kum 2013 election ah seat 122 a la lua, ruling Congress in seat 78 ah gualzawna a chang a, Janata Dal (Secular)/JD(S) in seat 37 lua in, a pankhawmpi (ally) BSP in seat 1 a lua hi. Chun, Independent leh party dang (others) te’n seat 2 a lua uh hi.

BJP chu single largest party himaleh government form theina ding ah seat 112/113 tiang lua zo lo a suak a, party khat ngawn ah government form theilo ding a suak hi. A langkhat lam ah Congress in JD(S) chu government form ding ah support bawl in, Chief Minister panmun JD(S) in a lua ding in offer a bawl a, Congress leh JD(S) apatkhawm ua ahileh seat 115 lua suak ding, coalition ah government form thei ding a hiu. BJP leh Congress -JD(S) leader te chu government thak form ding kichu in alang alang in governor kiang ah majority a hidan uh a tut gel ua, Governor in banggual thukhenna a siam diam ti chu mitamtak te bildaw a hizing hi. Karnataka Governor Vajubhai Vala dawisakna chang zaw zaw’n Karnataka government thak form ding tina a suak hi.

BJP leh Congress kal ah kinialna ahileh mipi dawisakna chang tamzaw zaw’n govt a siam ding ti a hi. Himaleh Goa, Manipur, Meghalaya Legislative Assembly elections results dungzui ah Congress chu single largest party himaleu BJP’n party dang tawh kithua in government a siam ua, BJP ding ah kam kek theilona khawp in a um hi. A umdan chu, BJP’n single largest party dang te government form saklo ah party chuamchuam tawh government a siam sek, entawn ah Congress leh JD(S) in le Karnataka govt thak siam ding ah kigullukna a nei a hi.

Zia ah muthei ah um chu, mi chung ah a tun hun ah khawksakna umlo, ei chung ah a tun hun ah thil hitheilo ti ah pawngpan chu thil diklo hi’n a kilang a, mi’n la chung ah a bawl ding la dawi gual ah nang le mi chung in bawl in ti chu Karnata election results a pat a thak ah mudaw thei in a um hi.