Nisin Thuhiltu – 15 May 2018

Aadhar Card lem siamtu mandawk; Common Service Centres ah Aadhar Card siam khak hita ding; inn lua ah umte hina etchian thak hiding:CM

Imphal, May 14 *(Nisin Thuhiltu)* : Chief Minister N. Biren Singh in tuni’n Chief Minister’s Secretariat ah thuthak lakhawm mite kimupi in State Police te’n state sung ah Aadhar Cards lem (fake Aadhar Cards) , siam pawl khat mandawk a hidan a taklang hi. SP Tengnoupal leha team te’n Moreh a pat Imphal zuan, passenger 10 chuanna gari khat check a bawlnau ah passenger mi 10 te lak ah mi 9 te phalna bei ah state sung lut (illegal immigrants) hiu ah hiatdaw ah um a hidan taklang in, khualna kituptak nei ah a um nung ah mi 9 te chu Myanmar a pat hung kipan, documents kituptak neilo ngawn hiu ah mudaw thak ah um in a gen hi.

Indian minpu Mrs. Paritha Begum w/o Mohammed Mohideen of Shree Ram Nagar, Edappallayam, Chennai, Tamil Nadu chu trafficker khat hi ah hiatdaw a hi banah Mrs. Ni Ni Sin d/o Md. Yashmin of Tar Ka Ta, Nawy Aay, 3 Street, No. 255, Yangon State, Myanmar leh Mrs. Phyu Phyu Win w/o Khaza Mohideen of Tar Ka Ta, Nawy Aay, 3 Street, No. 255, Yangon State, Myanmar te le trafficker hiu ah hiatdaw ah um in a gen a, Police team in thil umdan khualna neizing kawm ah Md. Tomba alias Inaocha (gang member khat) chenna inn a check hun ua, laptops 2, Aadhar Cards 4, Printer machine 1, Laminating film machine 1, Laminating plastic sheets, photo paper, DVD 2 leh thil dangdang mudaw nei un a gen hi.

Matdaw ah um fake Aadhar, fake Voter ID Cards leh thil chuamchuam te suklatna neikawm in, Chief Minister in March 25th, 2018 ah Jiribam Police in Nongthombam Argentina alias Pinky d/o (L) N. Brajabihari Singh of Babupara Ward No. 5, Jiribam le fake Aadhar Card siam ziak ah a la man a hidan gen in, ama a pat Aadhar enrolment forms 85, laptop 1, Eye Iris CMIT machine 1 leh camera, Biometric (Green) BIT, GPS, Mobile handset leh scanner khat mudaw ah um in a gen a, a kithuapi Md. Aziz Ahmed s/o Md. Keramat Ali of Dibong Lamlong, Jiribam chu tu ah kisel zing in a gen hi.

Chief Minister in a genzawm zelna a chun, Aadhaar siamna ding ah Common Service Centres kimang sek chu state government in subeita ding a hidan gen in, diklo tak ah ziagual thilbawlna chu tu ah state government in indigenous mi te ding ah thil lau um hi ah ngai/kawi in a gen hi.

Zia gual thil bawl um ding a chu ngaituana a la umkhalo a hidan gen in, state sung ah inn-lua ah um te hina (identity) re-verify bawl hiding, zia chu a vaima theilam ah bawl hiding in a gen hi. State mipi te chu state mi leh sa diktak hine nei te humbitna ding ah state government panlakna support leh tawsawt chiat ding ah chialna bawl in, gam neitu te, transporter te leh mipi te kiang ah gamsung mi hilo gamdang mite ding ah diklo tak ah nasep, thilbawlna a chiapilona ding ua awareness bawl pawimaw in a gen hi. Imphal Airport chu illegal immigrants te ding ah tun leh kipatdawna mun khat gual a hina chung ah special Police Check Post khat 15 May 2018 a pat hawn hita ding hi’n a puang hi.

NH 37 Imphal-Jiri road tawh kisai a genna a chun, Nung Dolan kiangnai ah um Bailey bridge siamthak (repaired) ah um in a gen a, Imphal-Jiri Railway Project nuai ah sem official te kidnapped leh sum demand kibawlna case a um mun mama ziak ah Imphal-Jiri Railway Project tawh kisai ah nasepna kituptak ah chiatha theilo in a gen hi. Khantona ding ah panlakna um te chung ah sum demand bawl chawlsan ding pawimaw in a gen bawk hi.

Chief Minister in, achiatha zing ‘Go to Village’ mission chu media fraternity leh state mipi te’n support bawl ah mipi te’n a phatchuampi theina ding ah panla chiat ding in chialna a bawl a, ‘Go to Village’ mission nuai ah mipi te haksatna sukven hiding in a gen hi.

Diesel Autos, Tata Magic leh Wingers Driver’s Associations in cease work strike a patnau tawh kisai a genna a chun, Imphal City sung ah Diesel Autos leh Winger te tailut ding khakna ding ah government in official order bangma suadaw nei kha nailo a hidan gen in, diklo tak ah mipi te hindan chawkbuai tu te chung ah action khautak ah lak hiding in a gen hi.

ILP Bill tawh kisai ah thuthak lakhawm mite dawtna a dawnhuna a chun, State Government in state sung ah indigenous mite venbitna ding ah Assembly session a um kit hunhun ah Bill luidawna nei ding, Bill tawh kisai enzui ding ah Committee khat siamdaw ah umta hi’n a gen hi.

Chief Minister in thuthak lakhawm mite a kimupi hun chu, Minister for PWD, RD&PR Th. Biswajit Singh, Chief Secretary Dr. J. Suresh Babu, DGP L.M. Khaute, ADGP Pramod Asthana, IGP L. Kailun, IGP Clay Khongsai, SP, Imphal East, Imphal West leh Tengnoupal banah Police officer chuamchuam te’n le a uap ui.

Police te’n mega tinted glass drive bawl

Lamka, May 15 *(Nisin Thuhiltu)* : Superintendent of Police etzuina nuai ah Traffic Control Police (TCP), Civil Police (Male), Women Police leh VDF personnel te'n Sielmat leibul ah mega tinted glass drive bawlna tuni’n a nei ui. Zia hun a chun, SI Lianthansang, OC Traffic Police leh Augustine J. Khongsai, SDPO/Thanlon mapuina’ four wheeler ah tinted glass kitua tamtak man in, tinted glass a lakdaw piak ui. Hiatthei khat chu, Khawpi sung ah tinted glass drive bawlna ding tawh kisai in a chiata Feb. 23, 2018 in Traffic Officer in media-te kimupi in four wheeler (Car, SUV, Gypsy) te panna gari keng pali nei, a sung kimu let theilona ding ah tinted glass leh film kibel te check hiding, February 26, 2018 akipat tinted glass leh film matphal hitalo ding in ala taklang hi. Gari a tinted glass belte' ahileh Motor Vehicles Act nuai ah Rule No. 92/100 CMV, 1989 kal a hi ziak ua, Section 177 nuai ah dan tawh kituak ah dangka Rs 500/- tiang liausak thei a hi. Pawlam apat gari sung ah chuang te mulet theilona ding ah tinted glass kibel chu supreme court thupiak dungzui leh Motor Vehicles Act tawh kituak ah khap ah um a hia, gari sung kimu let theilo ding ah tinted glass a kibel te ziak ah numei chung ah thanghuai tak ah gamtatna, galvan puakna leh tatsiatna chuamchuam piang thei ti a hi. Kua a hi em, a lotheilo ah tinted glass mat pawimaw a um leh SP mang ah Home Department, Govt. of Manipur kiang ah dawtna piaklut thei ding hi’n a kigen hi.

UTLA cardre mat ah um te police khut ah pedawk
Lamka, May 15 *(Nisin Thuhiltu)* : CCpur Sector Assam Rifles nuai ah um 33-Assam Rifles (Aina Battalion) pawl in May 11, 2018 ah Thanlon Sub-Divisioin huapsung ah um Khongjang Village ah galvan tawh United Tribal Liberation Army (UTLA) cadre 3 amat teu chu CCpur Police khut ah piakdaw in a um ui. Aina Battalion in Galvan chuamchuam tawh UTLA cardre amatteu chu - Soilenmon @Sgt Major Marcus (29) s/o Henkam of Khongjang Village, Lalthlamong (32) s/o Thlavongthang of Khongjang Village leh Paojavum @ Papao s/o Lamkhosei of D. Phailen, CCpur te a hiu a, amau a pat galvan chi chuamchuam - 5.56mm Rilfe (MA-3ZMK-II) 2, 314/315 Rifle (Bolt Action) 1, 5.51 Rifle 1, AK-7 Rifle Magazine 2, 5.56mm (Plastic) 6, 5.51 Rifle Magazine 1, Pistol Magazine 1, 5.56 Rifle tang 832, 7.62mm CTN tang 93, 9mm chang 20, 303 Rifle chang 1, Singapore khutsuak Kenwood Radio Set 1, Japan khutsuak Kenwood Radio Set 1, Electric Detonator 3, Microsoft Mobile 1, Sim Card leh Memory Card 16GB 1 chiat tawh a matkhawm uh a hi. Zia ah UTLA cadre 3 leh galvan matdawna tawh kisai in Thanlon Police in FIR No. 2(5) Thanlon-Police Station under section 400/302/34 IPC & 25 (I-C) Arms Act. in case a ziklut hi.

Singngat Police in khamthei tawh mi 2 man
Lamka, May 15 *(Nisin Thuhiltu)* : Singngat ah um Police te’n achiata May 12, 2018 nitaklam dak 4:00 vel in Singngat kiangnai ah um Muallum thanmual kiang in khamthei (No.4) pua gari khat leh a sung ah chuang mi 2 aman ui. Singngat lam zuan a khamthei pua um ah a hiat uh tawh kitawn ah gari taitua te check a bawl hun ua, Singngat lam zuan ah tai, Alto Car (ML-05F/6579) sung ah khamthei kipua leh car sung ah chuang Ching Mary (40) d/o Thongkai of Simveng, Singngat leh Chinkholian (30) s/o (late) Tuankhankhup of Mission Veng, Singngat te amatdaw uh a hi. Gari sung ah khamthei mudaw ah um te chu No.4 khaini bawm dim 4, sum Rs. 51750 banah Mobile handset (Intex) 1 a hi. Zia khamthei matdawna tawh kisai a chun, Police in FIR no. 4 (5)2018 Singngat Police Station u/s 21(a) ND & PS Act bulkhum in khualna a nei zing hi.

TD block chuamchuam ah “Go to Village” mission camp bawl hiding
Lamka, May 15 *(Nisin Thuhiltu)* : State Government lemsakna dungzui ah 15th May 2017 ah khua chuamchuam ah ‘Khungang Chatse – Go to Village’ mission chiapi ah um ding a hi. Zia hun chuleh Villager te kanthakna ding leh a haksatnau ngaithakna ding ah Government Departments chuamchuam ah official te’n teldaw chuam ah um khua chuamchuam ah ‘Khungang Chatse – Go to Village’ mission camp bawl ding a hiu. Go to Village’ mission ahileh guanggalna dungzui ah Sepkitni (Tuesday) sin leh chiapi hisek ding a hia, village leh urban ahiloleh semi-urban locality zosia cover hiding a hi.

Churachandpur district ah le TD block chuamchuam ah Go to Village’ mission camp bawl hiding a hi dungzui in, 12-Lanva ADC constituency ah Lanva ah camp um ding, zia camp chun Tangnuam, Pangzawl, Nghathal, Lanva leh Kawnpui khua huap ding, Thangboi Gangte, MCS/ SDO Ccpur chu Nodal officer hiding a hi. 13-Kholmun nuai ah ST Chullouphai, Kaprang, S Buoljang, Saihenjang, L Molvom, S Phaipijang, Zohar, Leisang, Monglenphai, Tollen, Vajing, Silak, Kholunphai, Hiljang, Zoljam, K Salemphai leh Lhongchin khua huap ah ST Chullouphai ah camp bawl ding, Nodal officer ah James Doujapao Haokip pang ding a hi. 20-Sagang nuai ah Tuiringphaisen, D Kangjam, D Moljang, Dampi, Haolenjang, K Bungsang, Khonomphai, Lhangnomphai, Lukhumbi, M kananphai, Maojang, N Dampi, Sijang leh Thampilen khua huap ah Tuiringphaisen ah camp bawl hiding,Nodal officer ah Peter Lenzel pang ding a hi. 22-Haopi Range nuai ah Bohlui, M Lhahvom, M Simuol, Saipum, Vengnoumphai, Toljang Kuki, Sehken leh M Saljang khua huap ah Misao Lhahvom ah camp bawl hiding, Nodal officer ah Lalthazam pang ding a hi. 23-Muallum nuai ah Sumchinvum, V munpi, Haijang, T Monglham, New Laijang, S Belpuan, Muallum, M Goshen leh T Khajang khua huap ah Muallum khua ah camp bawl hiding, Nodal Officer ah James Hangshing pang ding a hi.

21-Sangaikot block nuai ah Dongjang, M Mollum, M Bongmol, M Teijang, M Tampak, M Phainom, MB Saichang, Pantha, Makhao, Lungngil, M Saheiphai, Lailoiphai, MN Tatjang, Moljol, Dongang, L Khonomphai, Hengken, M Phaimol leh Damjol khua huap ah Dongjang khua ah camp bawl hiding, Nodal officer ah Zosanglur Joute pang ding a hi. 3-Henglep nuai ah, Lhanjang, Khenglenkot, L Khongbung, T sehjang, T Gangpijang, N Phaisat, Phiran, P Molcham, Tongkhojou, Tuilaphai, P sejol, Hengkom, Phaihel, Vungbuk, Thenjol leh Tuikot khua huap ah Tuilaphai ah camp bawl hiding, Nodal officer ah Chunglenmang Kipgen pang ding a hi. 1-Khousabung block nuai ah Ngaian, Chaiba, Dimdailong, Ngarian leh Gaisemlung khua huap ah Ngaian khua camp bawl hiding, Nodal Officer ah Joel Haokip pang ding a hi. 10-Tuivai block nuai ah Sinzawl, Khuanggin leh Sinzawl khua huap ah Sinzawl khua camp bawl hiding a hi.

‘Khungang Chatse -Go to Village’ mission dungzui ah government in welfare scheme chuamchuam a chiapia te chung ah haksatna nei te, a munmun ah sukfel piak hiding, government office ah haksatna vatutlo ah government official te zawk in a khua khua a kanthak ding ti a hi.
‘Khungang Chatse – Go to Village’ mission camp ah Aadhar service, animal vaccination & treatment, health check up, bank account/PMJDY, banking services, birth/death/marriage certificates, electoral rolls enrolment/correction, school supplies, thingno (samplings/tree plantation), migenthei te financial assistance , meithai te panpina, IGNDP/IGNOAP/MOAP/IGNWP nuai ah pension, old age, disabled, soil testing, soil Health Cards tawh kisai ah buaina nei te etzuipi ding leh amun ah sukfel thei tiang sukfel piak ding ti a hi. Zialo a chun, Chief Minister-gi Hakselgi Tengbang (CMHT), Chief Minister-gi Sotharabasingi Tengbang (CMST) scheme mu leh chang thei ding dawl etthakna, ‘Lairik Tamhansi - No Child Left Behind’ nuai ah drop out students te dinmun kanzuina ti te bawl hiding, Central Government sponsored schemes - Housing under Pradhan Mantri Awaas Yojana, LPG connection under Pradhan Mantri Ujjwala Yojana, Pradhan Mantri Ujjala Yojana nuai ah LED bulb free ah muthei ding dawl hawldawna leh piakdawna, gam thu ah buaina, Ration Card, weaver/artisan card , Yarn Passbook ti te le cover ding, water supply/roads/school building/health facility/micro irrigation etc tawh kisai ah haksatna nei te le etzuipi hiding a hi.

Field Visit bawl

Lamka, May 15 *(Nisin Thuhiltu)* : National Indira Gandhi Open School (NIOS) nuai ah Diploma in Elementary Education (D.El.Ed) training, Vimala Rina High School Study Centre a te’n a zaw uh tawh kitawn in tuni, May 14, 2018 in Field Visit ding in a kipan dawk ui. Field Visit ding tawh kisai Thanglianlal, Headmaster, Vimala Rina Government High School in Media Briefing bawlna a nei a, bus 2 mang in a kipandawk ui. Field Visit ah Sangai umna, Keibul Lamjao National Park panna mun chuamchuam pha ding a hiu a, D.El.Ed. ahihleh kum 2 Course a hi.

Ropiang Foundation Trust in kisaklawkna nei
Lamka, May 15 *(Nisin Thuhiltu)* : Ropiang Foundation Trust in tuni’n Raja Goukhothang Guite Football Memoriam 2018 umna ding Lamka Public Ground, Hiangtam Lamka ah kisaklawkna nei in, JCB mang in nullah a suthiang ui. Raja Goukhothang Guite Football Memoriam 2018 ahileh May 19, 2018 ah kipan ding, opening ceremony chu Justice Tinlianthang Vaiphei, Chairperson, Assam Human Right Commission in Chief Guest hina tawh uap ding hi’n a kigen hi.

Minerva Punjab FC in Football Trail bawl ding
Lamka, May 15 *(Nisin Thuhiltu)* : Minerva Punjab Football Club in June 13 apat June 15, 2018 kikal ah Manipur State sung mun chuamchuam ah trail nei ding a hi. Football Trail ahileh naupang kum 13 leh kum 15 nuai lam-te ading hiding a hi. June 13 leh CCpur district ah nei ding a hiu. Football trial ahileh June 13 sunma dak 8 apat Peace Ground, Tuibong ah um ding a hi.

Hotel Management tawh kisai ah Awareness Campaign bawl

Lamka, May 15 *(Nisin Thuhiltu)* : Manipur State Rural Livelihood Mission nuai ah Assam Rifle leh Gyan Jyoti Foundation kithua in tuni, May 14,2018 sunnung dak 3:00 in 25 Assam Rifle Camp, Headquarter Veng ah Hotel Management tawh kisai in Awareness Campaign a um hi. Gyan Jyoti Foundation in ziagual Awareness Campaign chu Mantripukhri ah bawl khata hi’n a kigen a, Campaign hun ah khangthak sepna neilo kum 18 leh 32 kikal, Pawl X zosa leh AadharBPL/AAY Card neite telthei uhi. Tuni a Awareness Campaign hun ah Don Bosco Higher Secondary School apat Student leh khangthak sepna hawllai, Lamka leh a kim a kiang apat mi tamtak a chiakhawm ua, Premjit Kana Singh, Centre Manager leh Sohail, Mobilizer chu Resource Person ah pang in, ziltilna hun a nei a, Tourism, Information Technology banah company chuamchuam ah sepna um te taklatna a nei hi. Awareness Campaign ahileh Imphal a pat “Team Lease” kiti NGO tawh le kithua ah kibawl in a kigen a, khangthak sepna neilo, inchen haksa, BPL innkuan, numeite dinmun dawpkang ding tupna kibawl a hi.

IMI ding tawh kisai ah training bawl

Lamka, May 15 *(Nisin Thuhiltu)* : Special Intensified Mission Indradhanush (IMI) ding tawh kisai in tuni, May 14, 2018 sunma dak 11:00 apat in CMO Mini Conference Hall, CMO Office Complex ah Dr Jamthianlal, District Family Welfare Officer DFWO CCpur mapuina nuai ah ASHA te’n training a bawl ui. Training ahileh naupang damtheina tawh kisai ah Special IMI neina ding ah ASHA worker te ziltilna nei a hi. A langkhatlam ah zia training a chun, ASHA worker tamlo cha a chiakhawm ua, Manipur Government chung ah kiphinna a nei ziak ua tamtak training ah panglo uh hi’n a kigen hi.

Silver Medal sâng

Lamka, May 15 *(Nisin Thuhiltu)* : Governor’s Taekwondo Cup 2018 kiti Indoor Stadium, Khuman Lampak ah May 10 apat May 13, 2018 sung nei ah a um hun in Hathoikim Chongloi in Silver Medal a sang hi. Hathoikim ahileh Professional Taekwondo Fighter a hia, hun dang Gold Meldal 10 val asantak banah Silver leh Bronze le a la sang khata a hi. Hathoikim Chongloi ahileh Haijang Vangkho, Sadar Hills apat a hi.

Dakkal 48 Diesel auto general strike in hindan pangai subuai
Imphal, May 14 *(Nisin Thuhiltu)* : Manipur government in Imphal khawpi sung ah diesel auto lutsaklo ding ah thupukna a lak dawilo suklatna’n mini transporter te’n dakkal 48 cease work strike a puang ua, a tangpi ah minautang leh student te’n kiletua lumletna’ diesel auto leh Tata magic a mat sek uh ahina ah strike chun hindan pangai nasatak in a sukha’i. Government in a thupukna a zukkit ding phûtna diesel auto leh Tata magic hektu leh a nei te’n kiphinna a nei ziak ua bazaar nupi tamtak te van zuakna mun chia theilo ah aum na chung ua Khwairamband Keithel (women market) ah mi tawm mama hi ah mu thei ahia, a hinla Thangal leh Paona Bazar tite chu a pangai gual ah a lun tho hi. Dakkal 48 sung cease work strike ziak ah Imphal khawpi sung chu navak leh awngthawl chuam ah kilang maleh diesel auto leh Tata magic ah a van zuak ding pawsekte bazaar a chia theilo banua auto leh magic ah bazaar kaite le bazaar a pha thei diak pua’u hi. Zia chu lemchang ah la in, ni dang ah cheng 10/- rate ah taisek petrol auto te tuni’n cheng 20/- ah a service u’i.

Winger driver in Kpi ah passenger 14 kumsak
Kangpokpi, May 14 *(Nisin Thuhiltu)* : Dimapur apat Imphal zuan ah tai winger khat ah chuang mi 14 chu tuni zingkal ah Kangpokpi bazaar ah kumsak in aum u’i. Bihari community apat passenger 14 te chu tuni zingkal dak 8:30 tuam a khan TL. Plaza, Kangpokpi Ward No.1 mai ah ngakthâk ahiu. A kiang tuam ah um te’n bang ziak ahi a dawt hun ua chun, Nagaland apat kipan winger hektu Vicky in passenger te chu JCILPS te lau ziak ah Kangpokpi ah a kumsak ziang hi’n a gen u’i. Passenger te chawi ticket apat passenger winger chu Super Fast Travels â ahidan hiatdaw a hi. Agency in Head Office chu North AOC ah nei in Dimapur leh Guwahati ah le branch office a nei hi. Passenger te gendan ah amau chu Ragailong, Imphal ah khawsa uh banah Aadhaar card leh document chuam chuam le nei uh ahidan taklang in, driverpa’n a bawldan chu lungdawng uh ahidan uh le a puang u’i. Khawnung ah passenger te lak ah khenkhat in Kangpokpi-Imphal passenger bus ah Imphal zuan in a khenkhat te a hiuleh Ragailong apat a innsung mite un a pui uh ahi.

KSO leh JCILPS student wing in kiholemna nei

Imphal, May 14 *(Nisin Thuhiltu)* : Kuki Students Organisation-General Headquarter (KSO-GHQ) leh Joint Committee on Inner Line Permits System (JCILPS) students wing in tuni’n state ah Inner Line Permit System (ILPS) kawi ding tawh kisai ah ngaidan kibatlona a nei teu ah kithugualna a siam u’i. Meeting zaw ah All Manipur Students Union (AMSU) office ah joint press meet hun a chun, KSO General Head Quarter leh JCILPS Student’s Wing in kinawptuana siam in ILP chu Manipur mipite humbitna ding ah pawimaw hi ah lemsakna nei thei ahi thil pha mama hi’n KSO president Paotinthang Lupheng in a gen hi. JCILPS Students Wing Convenor, Manjit Sarangthem in meeting hun ah ngaidan kibatlona um te genfel hita ahi dan taklang kawm in, tuni meeting chu zia chung chang ah meeting a nei uh a 2veina hi’n a puang hi. Bill chu mi zosia’n a pawm thei ua maban assembly ah pass a hi theina ding ah state sung ah a kisai khakpi zosia thuhiat masak hiding ti’n le convenor chun agen hi.

Kuki community in Nagaland leh Mizoram ah inner line system kimang - Eastern Bengal Frontier Regulation Act mat ding dawi ahi dan puang in, state mi diktak te humbit theina ding leh mi zosia’n a pawm thei ding Bill khat puakdaw theina ding ah Kuki Inpi leh JCILPS in meeting banghem zat vei a la neita uh hi’n le KSO GHQ President in a gen hi.

Manmohan in zikthaw ah PM Modi in Congress a bawldan President kiang tut

New Delhi, May 14 *(Nisin Thuhiltu)* : India prime minister lui Manmohan Singh in President Ram Nath Kovind kiang ah lekha thawt in Prime MinisterNarendra Modi' in Indian National Congress (INC) a bawldan chung ah a lung awilo thu a taklang hi. Manmohan Singh in a lekha thawt a chun, Prime Minister Modi in Karnataka elections ding tawh kisai ah May 6, 2018 ni, Hubli ah public rally a nei hun ah a thugenna’ “ Congress leader te’n hawitak in ngai un, a khel a val ah thil bawl la nei ua leh keima Modi in la chung ua thilbawl nei ding kahi” ti ah Congress leader te vaulauna a bawl chu nasatak ah demna bawl in, Prime Minister in a office thuneina chu ama mimal phatchuamna ding leh ama mimal politic masawnna ding ah mang in ngawna a siam hi.
Dr Singh in Prime Minister Modi kampau chu ki suasalna leh chamna susia thei in a le a gen a, tunung tuban ah ziagual kampau kilawm chu Prime Minister Modi in a mat kit taklo ding leh khat leh khat kal siat theina ding, chamna susia thei ding thil te a pat a kiven ding pawimaw ina gen hi. Zia Dr Singh lekha thawt chung a chun, Parliament ah leaders of Opposition pani te banah senior Congress leaders - P. Chidambaram, Ashok Gehlot, Ambika Soni, Mukul Wasnik, Motilal Vora, Kamal Nath leh Ahmed Patel te’n suai a kai ui.

Karnataka Assembly polls; Vote simna zingkal dak 8 ah kipan ding

Bengaluru, May 14 *(Nisin Thuhiltu)* : Karnataka Assembly elections ah a chiata 13 May 2018 ni, Assembly constituency 222 ah vote khiak ah um te chu, zing 15th May 2018 zingkal dak 8:00 a pat sim hiding a hi. Tuchung Karnataka Assembly elections ah total candidate 2622 a um a, numei candidate 217 a um hi. Zia lak a chun, Congress in seat 220 ah candidate kawi in, BJP in seat 222 in candidate a kawi a, JD(S) in candidate 201 a kawi hi. Chief Electoral Officer Sanjiv Kumar in vote simna ding tawh kisai a genna a chun, mun 38 ah counting centres 283 ah vote sim hiding, Bengaluru ah constituency 28 ah vote simna centre 5 ah nei hiding in a gen hi. Vote simna chu security personnel 11,000 te’n venbitna peding hi’n a gen a, tuchung Karnataka Assembly elections ah vote kikhia dawk chu vote kikhiakdaw tamna pen ah record, 72.36 percent tungzo hi’n a gen hi.

Hiatthei khat chu, Karnataka Belagavi district ah voter 37,23,585 um in voter tamnapen District in a pang a, Kodagu district ah voter tawmpen in voter 4,33,846 a um hi. Assembly constituency 224 um himaleh constituency 222 ah vote khiak in a um a, May 4, 2018 ni ah Bharatiya Janata Party (BJP) candidate, B N Vijay Kumar a thi ziak in Jayanagar Assembly seat ah polling cancel bawl in a um a, Rajarajeshwari Nagar constituency ahileh EC official te’n constituency huapsung ah um Bengaluru's Jalahalli locality ah fake voter identity cards tamtak mudaw ziak ua, vote khiak ding cancel ah a la um a hi. Constituency 222 ah vote a kikhiakna a chun, Scheduled Castes (SC) te ding ah seat15 leh Scheduled Tribes (ST) te ding ah seats 26 reserved a um a, Rajarajeswari Nagar constituency, polling station No. 2 ah vote khiak ahileh EVMs leh VVAPTs kituplo ziak ah cancel bawl in a la um a, 28 May 2018 ah vote khiak thak hiding, zia vote kikhia thak chu 31 May 2018 ah sim hiding a hi.

Huipi leh guapi kithua’n chenna inn leh lo tamtak susia, mi 69 thi

New Delhi, May 14 *(Nisin Thuhiltu)* : National Capital Delhi leh a kiang tuam ah um Noida, Ghaziabad leh Gurugram te banah Uttar Pradesh, West Bengal, Andhra Pradesh, Bihar leh mun chuamchuam ah hupi leh gua kithua nasatak um in inn leh lo hun tiang a suksiat banin mi 69 te’n thina a tuak ui. Mi 69 thina tuak te lak a chun, Uttar Pradesh ah mi 8, West Bengal ah 12, Andhra Pradesh ah 13, Bihar ah 4 leh National Capital Delhi ah mi 2 a pang ui. Uttar Pradesh ah Bareilly, Saharanpur, Etawah, Aligarh, Mirzapur te panna district chuamchuam leh states' NCR region ah huipi leh guapi kithua chu hat diak in a kigen a, mi 55 val in liamna tuak ua taklat a hi. A langkhatlam ah MeT department thusuak in a taklatna a chun, North West India ah western disturbance, circulation ziak ah hupi leh guapi kithua hattak piang in a gen a, senior MeT Department official, Dr Mrutyunjay Mohapatra in ni 2/3 sung ah North-Western, Eastern leh Southern area ah hupi leh guapi umzawm thei ding in a gen hi.

West Bengal panchayat poll buaina ziak ah mi 7 in thina tuak

Kolkata, May 14 *(Nisin Thuhiltu)* : West Bengal ah tuni’n panchayat election a um a, mun khenkhat ah buaina sosang in mi 7 te’n thina a tuak ua, mi tamtak te’n liamna tuak in, gari banghem zat haltum in a um hi. South 24 Paraganas, North 24 Paraganas, Nadia leh Murshidabad ah buaina sosang diak leh zia mun a chu party khat leh khat kal ah kinakna piang ah mi 7 te’n thina tuak uh ti a hi. West Bengal panchayat election a chu majority voter 6 cores te’n vote khiakna a nei ding uh ti himaleh one-third seat ah Opposition pre-poll buaina ziak ah nomination file theilo a hiu. Thudawnna’n a taklat dan in, South 24 Parganas ah CPI(M) supporter Debu Das chenna inn chu mei ah haltum piak ah um hi’n a kigen a, zia mun a chu Das zi Usha panna mi 3 in thina tuak uh ti a hi.

Kultali area ah Trinamool Congress supporter Arif Hussain Gazi chu kaplup ah um in a kigen a,
Nadia district ah Nakashipara leh Shantipur area ah mi 2 in le thina tuak, Amdanga, North 24 Parganas leh Beldanga, Murshidabad ah mi 2 in le thina tuak uh ti a hi. Zia ah party kal buaina chung a chun mun khenkhat ah gari le hal in a um a, gari banghem zat te le haltum in a um hi.
A langkhatlam ah Trinamool Congress leader leh Minister for North Bengal development Rabindranath Ghosh in Cooch Behar district ah Bharatiya Janata Party (BJP) supporter khenkhat a betna camera ah kapdaw in a um a, mun khenkhat ah ballot papers kihal, tuilak ah ballot box kiseplut ti le a um hi.

A zi thina chung ah accused ah Shashi Tharoor puang

New Delhi, May 14 *(Nisin Thuhiltu)* : Delhi Police in Congress leader Shashi Tharoor chu January 17, 2014 ah a zi Sunanda Pushkar thina case tawh kisai in Metropolitan Magistrate Dharmendra Singh ah chargesheeted a file khum hi. Sections 306 (abetting the commission of suicide) & 498A (punishment for subjecting a married woman to cruelty) nuai ah charge sheet filed khum ah um a hia, Magistrate in May 23 chu chargesheet kibawl hiatpina date in fixed a bawl hi. Court in Congress leader Shashi Tharoor chu accused ah a puan banin summon bawl ding in lemsakna a nei a, Mr. Tharoor bep chu accused ah puan hinalai a hi. Police charge sheet, pek 3,000 tuam a chun, Mr. Tharoor chu a zi chung ah huham tak ah gamta gen in a um hi. A kangkhatlam ah Congress leader Shashi Tharoor in Delhi Police charge sheet filed khum chu mak a sakthu gen in, thgum ah thiamlo chansak kigua hi’n a gen hi.

Nagaland Surge Ahead to Shun VIP Culture

Kohima, May 14 *(Nisin Thuhiltu)* : Prime Minister Narendra Modi sulnung zui in, Nagaland ah teltin thak ah um Chief Minister Neiphiu Rio in state sung ah VIP culture sukbei ding a hidan taklang kawm in, ama party National Democratic People’s Party (NDPP), election manifesto dungzui in gari ah nameplates leh designations taklatlo ding in notification a sua hi. Nagaland Home Commissioner Abhishek Singh in thusua a bawlna a chun, government thak in government official leh functionaries kua hitaleh gari ah registration number tilo thildang sulang a um leh serious tak ah la ding leh kituptak ah enzui ding a hidan a gen a, Motor Vehicle Act 1988 leh Central Motor Vehicle Act 1989 dungzui ah gari ah registration number/number plates bep suklat ding, zia gual zuilo te chu Section 177 of the Motor Vehicle Act 1988 tawh kituak ah action lak hiding in a taklang hi. Himaleh ministers leh MLA te chu a chia lumletnau thawveng theina ding ah colour coded car sticker piak hiding, Governor, Chief Minister, Deputy Chief Minister, Speaker leh Deputy Speaker te le Kohima leh Dimapur ah pilots leh security escorts mang theilo ding ua order sua in a um hi. CM Neiphiu Rio in thuthak lakhawm mite kiang ah a genna a chun, manifesto dungzui ah state sung ahVIP culture paithak hiding in a gen hi.

Mizoram ah nimchipna thiluang 4 mudaw hita

Aizawl, May 14 *(Nisin Thuhiltu)* : Mizoram khawpi Aizawl pawlam deu (eastern outskirts) ah um Zemabawk kiangnai ah suang lakna nimchim in a taw mang mi 4 te luang mudaw ah umta a hidan Aizawl district Additional Superintendent of Police, Duhthlanga in a gen hi. Zia ah nimchim in a tawkhak leh thina tuak mi 4 te chu Linda Hmingthianghlimi (14) of Zemabawk Bethel Veng, Lynda Zodinpuii (32) leh a chanu kum 10 mi Eudy Lalremzovi of Zemabawk Bethel Veng te banah Lalremzovi hukdaw gua Munga te a hiu a, nasem ah a umlai tak ua a chiata Kigini zingkal dak 7:30 ah nimchim in a chipkhum a hi. Police thusuak in nimchim in a chipkhum truck 2 te le mudaw ah umta hi’n a gen a, khenkhat a chipkhum umthei ding ah muanmaw a hizing naklai tawh kitawn ah State Disaster Response Force, National Disaster Response Force, Indian Reserve Police, Mizoram Armed Police, Mizoram police, PWD officials, medical team banah local (YMA) volunteers te’n rescue operation chiapi zing nalai un a gen hi. Zia nasepna mun a chu nimchim a um hun ah mi 10 nasem ah um a hiu a, Linda Zodinpuii leh a chanu Lalremzovi banah Hmingthianghlimi te chu suang luak ah um, midang te chu ahiuleh truck ah suang hap (load) bawl a hiu. Mizoram Home minister R. Lalzirliana in Pathiani a khan zia thiltunna mun chu etthakna nei in, thina tuak te a suun thu a puang hi.

N Korea nuclear test nunung pen, Hiroshima bomb sang ah a le 10 ah hatzaw
Singapore, May 14 *(Nisin Thuhiltu)* : Nanyang Technological University, Singapore leh University of California, Berkeley, US in September 3, 2017 ah North Korea in underground nuclear test a bawl nunung pen chu hat mama a hidan taklang in, World War II hunlai ah US in Hiroshima ah bomb a khiak te sang ah a le 10 ah hatzaw hi’n a taklang ui. Germany's TerraSAR-X leh Japan's ALOS-2 radar imaging satellites in a record dungzui ah 5.2-magnitude earthquake gual ah North Korea nuclear test bawl chu umzo in Teng Wang, Earth Observatory of Singapore, Nanyang Technological University in a gen a, researcher te’n estimate a bawl dungzui uaNorth Korea in Mt. Mantap nuai ah test a bawl nuclear chu World War II hunlai ah US in Hiroshima ah bomb a khiak te sang ah a le 10 ah hatzaw hi ah kawi uh hi’n a gen hi. Chuleh, North Korean nuclear puakzak chun, Mt Mantap nuai ah metres 450 hawtling zo leh suang tak 50 metres tuam ah umte a suksiat banah football stadium ding tia ah um susia zo in a gen hi.