Nisin Thuhiltu – 14 May 2018

User Rating: 0 / 5

Star InactiveStar InactiveStar InactiveStar InactiveStar Inactive
 

15th May ah ‘Khungang Chatse – Go to Village’ camp um ding

Imphal, May 13 *(Nisin Thuhiltu)* : State Government lemsakna dungzui ah 15th May 2017 leh khua chuamchuam ah ‘Khungang Chatse – Go to Village’ mission chiapi ah um ding a hi. Zia hun chuleh Villager te kanthakna ding leh a haksatnau ngaithakna ding ah Government Departments chuamchuam ah official te’n Assembly Constituency 60 ah teldaw chuam ah um khua khat chiat ah ‘Khungang Chatse – Go to Village’ mission camp bawl ding a hiu. Go to Village’ mission ahileh guanggalna dungzui ah Sepkitni (Tuesday) sin leh chiapi hisek ding a hia, village leh urban ahiloleh semi-urban locality zosia cover hiding a hi.

‘Khungang Chatse -Go to Village’ mission dungzui ah government in welfare scheme chuamchuam a chiapia te chung ah haksatna nei te, a munmun ah sukfel piak hiding, government office ah haksatna vatutlo ah government official te zawk in a khua khua a kanthak ding ti a hi.
‘Khungang Chatse – Go to Village’ mission camp ah Aadhar service, animal vaccination & treatment, health check up, bank account/PMJDY, banking services, birth/death/marriage certificates, electoral rolls enrolment/correction, school supplies, thingno (samplings/tree plantation), migenthei te financial assistance , meithai te panpina, IGNDP/IGNOAP/MOAP/IGNWP nuai ah pension, old age, disabled, soil testing, soil Health Cards tawh kisai ah buaina nei te etzuipi ding leh amun ah sukfel thei tiang sukfel piak ding ti a hi. Zialo a chun, Chief Minister-gi Hakselgi Tengbang (CMHT), Chief Minister-gi Sotharabasingi Tengbang (CMST) scheme mu leh chang thei ding dawl etthakna, ‘Lairik Tamhansi - No Child Left Behind’ nuai ah drop out students te dinmun kanzuina ti te bawl hiding, Central Government sponsored schemes - Housing under Pradhan Mantri Awaas Yojana, LPG connection under Pradhan Mantri Ujjwala Yojana, Pradhan Mantri Ujjala Yojana nuai ah LED bulb free ah muthei ding dawl hawldawna leh piakdawna, gam thu ah buaina, Ration Card, weaver/artisan card , Yarn Passbook ti te le cover ding, water supply/roads/school building/health facility/micro irrigation etc tawh kisai ah haksatna nei te le etzuipi hiding a hi.

‘Khungang Chatse – Go to Village’ mission ahileh Laphupat Tera, Imphal West district ah May 1 ni Chief Minister in a la hawndaw a hia, May 8 ni a khan, Mongjam village, Imphal East district ah ‘Go to Village’ camp a la uap hi.

'Capping, Lamp lighting & Oath taking Ceremony' um ding
Lamka, May 13 *(Nisin Thuhiltu)* : CMO office nung ah um GNM Training School’ Hall ah May 15, 2018 zingkallam dak 11:00 leh 'Capping, Lamp lighting & Oath taking Ceremony' um ding a hi. Zia hun chu Chief Guest hina tawh L. Jayanta Kumar Singh, Minister (Health & Family Welfare) Govt. of Manipur in uap ding, Guest of Honour hina tawh V. Hangkhanlian, Minister (Agri.Vety. & AH) in uap ding; Functional President hina tawh Dr. K. Rajo Singh, Director (Health & Family Welfare) in uap ding leh Chief Host ah Shyam Lal Poonia, IAS, DC/CCpur; Dr.Kimngaihching Simte, CMO/CCpur leh Dr. Vumchinpau Tonsing, Med. Supdt., District Hospital te pang ding a hiu. Hun matna ahileh Dimsuanlun, Tutor in mapui ding, Esther Ninglianching in vaidawnna thu gen ding, Chief Guest mapuina khuallian-te leh tutor-te’n Lamp Lighting bawl ding, Second Year GNM student-te’n welcome song sa ding, V. Goihzachin, Principal in training school tawh kisai taklatna a nei ding a hi.

Nursing Supt. & Dist. Hospital a Nursing Sister mapuina’ student-te’n Capping & Lamp lighting nei ding a hiu a, Principal mapuina’ Florence Nightingale pledge simkawm in student-te’n Oath Taking Ceremony nei ding a hiu. Chun, Pathian kiang ah malzawl dawt piakna leh pauchap piakna um ding, khuallian-te leh Guardian-te a pat thugenna a umzaw takleh Thangngaihsang, Tutor in kipakthu genna nei ah hunkhakna um ding a hi.

Mizoram Home Minister in uap ding
Lamka, May 13 *(Nisin Thuhiltu)* : Hmar Martyrs’ Trophy Organizing Board (HMARTOB) saina’ Saikot Playground ah May 16, 2018 leh 15th Manipur State Level Hmar Martyrs’ Trophy, 2018 final match leh hunkhakna programme um ding a hi. Zia hun chu Chief Guest hina tawh R. Lalzirliana, Home Minister, Govt. of Mizoram in uap ding, Chief Host ah Dr. Chaltonlien Amo, MLA, Tipaimukh & President, Hmar National Union (HNU) pang ding, Guest of Honour ah Ginsuanhau, Chairman, MANIREDA & MLA (Singngat A/C) leh Functional President ah Vungzagin Valte, Chairman, MTDC & MLA (Thanlon A/C) te pang ding a hiu.

B.Ed programme zilthei
Lamka, May 13 *(Nisin Thuhiltu)* : Directorate of Education (S) nuai ah sem Graduate Teacher (Science & Arts) kum 2 sung (session 2018-20) B.Ed program zilnuam te’n application piaklut thei ding a hi. DM College of Teacher Education, Manipur ah B.Ed program zilthei ding hi’n a kigen a, application form ahileh document pawimaw chuamchuam -No objection certificate, Regular appointment order, EIN, Graduate certificate, Date of birth certificate etc te tawh kimtak ah May 28, 2018 tiang ah Directorate of Education (S) ah submit ngai ding hi’n Th. Kirankumar, Director of Education (S) in hiatsakna thusua a bawlna a chun a taklang hi.

SSPP branch 4 ah lawiupa ding telna nei
Lamka, May 13 *(Nisin Thuhiltu)* : Siamsinpawlpi (SSPP), JHQ Lamka in May 12, 2018 tiang in anuai a branch 7 um te lak ah branch 4 in election a bawl zo hi. Zia dungzui a chun, SSPP V.K. Tawna College Branch ah President ding in Kaichinpau teltin in a um a, Secretary ding in Vungthianhoih; Finance Secretary ding in Ginkhanmang Tonsing leh Treasurer ding in Marina Chingthianmawi te a telting ui. SSPP Ebenezer Academy Branch ah President ding in Sutchinmuan a telting ua, Secretary ding in Paubiaklal; Finance Secretary ding in Thuambiaklian leh Treasurer ding in Niangthianching te a teldawk ui. Donbosco College Branch ah President ding in H Chinlallawm, Secretary ding ah Joshua Pauminlian, Finance Secretary ding ah Zambiaklun leh Treasurer ding ah Niangmuanching te teltin in a um ui. Zialo a chun, Rayburn Hr. Secondary Section Branch ah President ding in Muanbiakjohn Samte; Secretary ding ah Thangzuanlal Guite; Finance Secretary ding ah T. Thangsuanmung leh Treasurer ding ah Ngaikhanvung te teltin in a um ui.

Machet Order court case withdraw bawl
Lamka, May 13 *(Nisin Thuhiltu)* : Vengnuam, New Lamka apat Vengnuam South pemdawk hi ah achiata April 12, 2018 ni, Thangboi Gangte, SDO/CCpur in S. Kamkhankhup min ah Machet order (dated 12.04.2018) ah a suadawna chung ah vengsung kivaipuakna mimal min ah a um ding dawilo ziak ah M. Gouzamang Guite in court ah hek (complaint) [Writ Petition (c) No. 304 of 2018] a piak chu, Vengnuam South lawiupa te’n withdraw bawl ding ah dawtna a siam uh tawh kitawn ah New Lamka East bialtu MDC, M. Gouzamang Guite in withdraw bawl in a kigen hi.

May 19 ah RGG Football Memoriam 2018 kipan ding
Lamka, May 13 *(Nisin Thuhiltu)* : Lamka Public Ground, Churachandpur ah Ropiang Foundation Trust (RFT) saina’ May 19, 2018 ah Raja Goukhothang Guite Football Memoriam 2018 (RGG Football Memoriam 2018) kipan ding a hi. Dr J suresh Babu, Chief Secretary Govt of Manipur in khuallian hina tawh opening ceremony uap ding leh tournament hawnna nei ding hi’n a kigen hi. Zia Tournament a chu Manipur ah Sports’ Association chuamchuam a pat club/team te pang ding, CISCO in title zosia sponsor bawl ding a hi. Ropiang Foundation Trust (RFT) in zia tournament chu thupi mama ding ah ginchatna nei in a taklang hi. Tournament ah Champion Team in Rs. 2 Lakh sang ding a hiu a, Runner’s Up in Rs. 1 Lakh leh Best Performer ban ah kihelna pang kha zosia citation piak hiding a hi. Chun, Tournament ah pang nuam te ding ah Registration Fee 5,000 leh Security Deposit Rs.1,000 hiding, a pangnuam te’n lekha pawimaw zosia tawh May 10, 2018 tiang ah CDSA Office, Hiangtam Lamka entry form/fee piaklut ngai ding a hi.

Sub-Centre Head leh member ding apply thei
Lamka, May 13 *(Nisin Thuhiltu)* : Churachandpur District sung ah CHILDLINE India Foundation project nuai ah semtu ding Sub-Centre Head post 1 leh team member ding mi 4 kila ding a hi. Lunglutna neite'n May 14, 2018 tiang ah apply thei ding a hi. Sub-Centre Head post a ding ah lekha thiamna lam in Master in Social Work leh Bachelor in Social Work zaw ngai ding, Team member post a ding ah lekha thiamna lam ah Classs X standard tiang zo hi ngai ding hi’n a kigen hi. Lunglutna neite'n This email address is being protected from spambots. You need JavaScript enabled to view it. ah resume submit thei ding , Social Human Action for Rural Empowerment (SHARE) Society Office, New Mata ah le a hard copy ah submit thei ding ahi. Thuchian kimzaw +91 8732021360/7005442946 ah kanthei ding a hi.

ALS leh TSA saina Scholarship Test um ding
Lamka, May 13 *(Nisin Thuhiltu)* : ALS, IAS, Churachandpur Centre ah MAIN-cum-PRELIMS (McP) BATCHES (Morning Batch 7:30 AM-10:45 AM || Evening Batch 6:30- 8:45 PM) leh Weekend Batch (8:00 AM-8:45 PM, Saturday & Sunday) te ding ah 18th June 2018, 2nd July 2018 & 9th July 2018 ah class kipan ding a hi. ALS ahileh all India ah Civil Service Coaching Institute te lak ah kum 3 a ki zawm ah Coaching Instute hawipen hi ah rank No. 1 lua zawm zo a hi. Online ah class kila a hiziak in Delhi leh mun chuamchuam ah ALS Coaching Centre zosia tawh Class kilakhawm, Class kilakdan bangkim kibang a hi. Course ahileh 1 year course hiding, GS Prelims, CSAT, Essay, Current Affairs, Test Series, GS Main Paper I-IV, 900 Hrs of Class Room Training, Weekly Test, Online Portal for Questioners with Video etc hiding a hi. ALS in Book, Wizard Magazine, Atlas Calendar, Notebook, Answer Writing Pad, NCERT Book, Pendrive, Bag, ID-Card provide bawl ding a hi. Chun, ALS leh TSA GHQ kithua ah 27th May 2018 leh CCpur ah Scholarship Test um ding, Scholarship Test ah mi 100 teldaw hiding, top 2 tiang 100% course fee free hiding, Rank 3 to 5 (75% discount), Rank 6-15 (50%), Rank 16-30 (40%), Rank 31-50 (30%), Rank 51-70 (20%), Rank 71-100 (10% discount) hiding a hi. Scholarship Test ah pangnuam te’n ALS, IAS, Churachandpur Centre, Opp. Circuit house, Hmar Veng ah a thawn ah registration bawl thei ding, Course Fees leh thuchian kimzaw contact No. 9862752240/8413949363 ah kanthei ding a hi.

Indian Navy Chief Sunil Lanba, Imphal tung

Imphal, May 13 *(Nisin Thuhiltu)* : Admiral Sunil Lanba, PVSM, AVSM, ADC, Chairman of Chiefs of Staff Committee and Chief of Naval Staff in 13 May 2018 a pat ni 4 sung Spear Corps Zone vena a nei ding chu tuni’n a pan a, North East States- Assam, Manipur, Mizoram & Tripura chuan ding in tuni’n Imphal a tung hi. Admiral Lanba chu Manipur ah Inspector General Assam Rifles (South) in security dinmun tawh kisai in thil umdan a hil hi. Admiral Sunil Lanba ahileh North East ah security dinmun tawh kisai kantha a hia, state governor chuamchuam te le kimupi ding hi’n a kigen hi.

Chamna leh muanna umtheina ding panlak chiat ding: Education Minister

Imphal, May 13 *(Nisin Thuhiltu)* : All Manipur Art & Culture and Sports Development Society (AMACSDS) saina’ Asha hall Complex, North AOC, Imphal ah tuni’n 18th Peace and Communal Harmony & AMACSDS Awards ceremony a um hi. Zia hun chu Education Minister Thokchom Radheshyam in Chief Guest hina tawh a uap hi. Education Minister in a thugenna a chun, state sung ah community chuamchuam te’n chamna leh communal harmony a um zing theina ding ah panlakna nei zing ding a nawp thu gen in, society khantona ding ah theitawpsua ah panlak chiat ding, aphalo lam lunggel mun neisaklo ding hi’n a gen hi. Mihing te aphalam ngaituana tawh khawsak ding pawimaw a hidan gen in, Mother Teresa leh Nelson Mandela te panlakna entawn ah kipumpiakna tawh society a ding ah panlak ding hi’n a gen hi. Hun matna uap, Chairman, Pollution Control Board & Khadi & Village, MLA Oinam A/C L. Radhakishore Singh in a thugenna a chun, khawvel ah mihing te leh thing leh gua, thil zosia a pawimawna umvek a hidan gen in, thil zosia chung ah chamna leh muanna a um ding pawimaw in a gen hi. Zia hun matna a chun, panlakna chungchuang diak ah kihia mi banghem zat te kiang ah award piak in a um a, Chief Guest Education Minister Thokchom Radheshyam in award piakdawna a nei hi.

All Political Parties meeting numei pawngsualna dodal khawm ding ah lemsa
Imphal, May 13 *(Nisin Thuhiltu)* : Numei pawngsual leh numei chung ah huham tak ah gamtatna um te tawh kisai in tuni’n Socialist Students’ Union Manipur (SSUM), Manipur Proletariat Peoples’ Democratic Union (MPPDU) leh Proletariat Feminist Movement (POFM) te organised bawlna Manipur Press Club ah All political parties meeting a um hi. Zia meeting chu Bahujan Samaj Party, Manipur Pradesh Congress Committee, Manipur Peoples’ Party (MPP) palai te’n a uap ua, state sung ah numei chung ah gamtatna kilawmlo tak a um hun ah kipumkhat ah panlak khawm ding in thupukna a siam ui. Meeting hun in, State Unit President, Bahujan Samaj Party , Kavita in a thugenna a chun, pawngsualtu khenkhat mipi palai ding ah teltin ah um a hidan taklang in amau chu Manipur ah venbit ah um un a gen hi. Ministers ahiloleh MLA khenkhat in le numei pawngsualna tawh kisai ah case a nei hun ua, mipi te thipbek ah a um sek uh lamdangsa a hidan gen in, numei chung ah gitlo bawlna kituaktak ah dodal khawm ding pawimaw in a gen hi.

Congress representative Nameirakpam Jayentakumar in a genna a chun, hun sawtpek ah Manipur Pradesh Congress Committee in numei chung ah gitlo bawlna um te tangko zing a hidan gen in, Youth Congress in April 2 2018 ah pawngsualtu te chung ah action lak ding phutna chutmun kiphinna a la nei uh hi’n a gen hi. Pawngsualtu chu elected MLA himaleh Congress Party in action khuatak lak ding tangko zing in a gen hi. Lairenlakpam Bimola, General Secretary (Adm), Manipur Peoples’ Party (MPP) in a genna a chun, ama panna political Party’n numei chung ah gitlo bawlna dodalna kiti support bawl zing a hidan gen in, state Assembly ah MLA neilo himaleu state mipi te ding ah MPP in panla zing ding hi’n a gen hi.

Advisor of SSUM, N. Luwang Meitei in a genna a chun, February 13 ah Thanga Gang Rape case tawh kisai ah ruling party member leh MLA, Sekmai Assembly constituency a kigawl ziak ah a victim te’n High Court ah complaint bawl maleu, tuni tiang ah police te’n charge sheet file bawl thei nailo uh hi’n a gen a, ziagual case dawi umlotak chu sukven a hitheina ding ah civil society organisation dang dang panna all political party meeting nei kit hiding in a gen hi. Thanga Gang Rape case ahileh February 13, 2018 ni ah pawsal 4 in numei kum 14 mi khat a pawngsual uh, a pawngsualzaw ua a nutsiau a hi.