Nisin Thuhiltu – 09 May 2018

User Rating: 0 / 5

Star InactiveStar InactiveStar InactiveStar InactiveStar Inactive
 

‘Go To Village’ mission in rural leh urban locality zosia cover ding: CM

Imphal, May 08 *(Nisin Thuhiltu)* : Mongjam Community Hall, Imphal East District ah tuni’n Mongjam, Maiba Khul, Koirengei Meitei leh Karong villages of Nilakuthi Gram Panchayat te ding ah “Go to Village’ camp bawl in a um a, Chief Minister N. Biren Singh in Chief Guest hina tawh a uap hi. Chief Minister in a thugenna a chun, State Government’s ‘Go to Village’ mission in state sung ah rural leh urban locality zosia cover ding a hidan gen in, government chuamchuam um te inn kawt khak tiang tunsak theina ding ah mission chiapi ah um hi’n a gen hi.

Mipi te’n scheme chuamchuam tawh kisai ah enrolment a ding ah government office zuan talo ah inmun ah enrolment leh haksatna a nei teu official te kiang ah tut theita ding a hidan taklang in official te’n mipi te haksatna a mun mun ah kanzui ding uh hi’n a gen hi.

Socio Economic Caste Census (SECC) database ah a min uh chuangkhalo, BPL/AAY cards neilo himaleh social security schemes chuamchuam muthei ding dawl te’n DC leh SDO te kiang ah kidawtna lekha pelut thei ding uh a hidan gen in, scheme phatchuampi a hitheina ding ah khangthak te’n ziagual hun lemchang chu a thasuaklo ding uh a nawp thu a gen hi.

Khangthak te chu khamthei leh thil dang society a ding ah mualphona tut thei ding ah kibuallo ding leh Agar leh lemongrass chiinna a pat kihinsua thei a hidan gen in, government a pat assistance umthei ding hi’n a gen a, Manipur ah assembly constituency 60 huapsung ah telchuam ah um khua 60 ah ‘Go to Village’ mission hawn ah a la um, ‘Go to Village’ mission hawn ah a um hun ah total applications 60,339 um leh total applications 21,353 te hunhun ah sukfel thei ah um hin a gen hi.

Zia hun Go to Village’ mission camp a chun, Chief Minister social security schemes muthei ding ah teldaw ah um te kiang in thilpiak piakdawna le a nei a, Imphal East Adhyaksha P. Bimola Devi, Additional Chief Secretary (Works and Forest & Environment) Dr. Suhel Akhtar, Additional Chief Secretary (RD&PR and Relief and Disaster Management) M.H. Khan and Imphal East DC Th. Chitra te’n le a uap ui. Chun, Government Departments 25 te’n stalls hawng in haksatna nei te a haksatnau ngaithak piak in, scheme chuamchuam tawh kisai hilchianna leh apply bawl piakna a nei ui.

Manipur ah SC/ST Hub scheme hawn ah um

Imphal, May 8 *(Nisin Thuhiltu)* : Directorate Trade & Commerce and Inidutries Manipur nuai ah District Industries Centre, Imphal West orgnaised bawlna leh Manipur Industrial Development Corporation Limited (MNIDCO) support bawlna'n tuni’n Scheduled Caste leh Scheduled Tribe entrepreneurs te‘n Central Government procurement policy Order 2012 tawh kituak ah business a chiapi theina ding uh leh Stand Up India initiative kituptak ah chiapi a hitheina ding in Manipur Scheduled Caste leh Scheduled Tribe Hub (SC/ST Hub) scheme hawnna official tak ah hawn in a um hi. SC/ST Hub scheme ahileh Ministry of Micro, Small & Medium Enterprises (M/o MSME) in finance a bawl ding a hi. SC/ST Hub scheme hawnna hun chu, C Arthur W, IAS, Director (Transport), Special Secretary (Transport, Labour & Employment) & Society for Skill Development (MSSD) and Commerce & Industry) and MD, Manipur Food Industries Corporation Limited; M. Luikham, IAS, former Director of Trade, Commerce & Industries, Manipur, Debabrata Mitra, Deputy Director I/c, MSME-DI Imphal leh official chuamchuam te’n khuallian hina tawh uap in scheme hawnna a nei ua, scheme umdan tawh kisai genlatna le a nei ui.

KIM in Kuki issue sukfel masatlo ah IM issue sukfel ding pawmlo
Imphal, May 8 *(Nisin Thuhiltu)* : Centre's interlocutor for Naga peace talks RN Ravi in tunaicha NSCN (IM) tawh kihona zawthian vang hitaleh Naga political issue sukfel hipai ta ding ah a puan tawh kitawn in tuni’n Kuki Inpi Manipur in Prime Minister Narendra Modi kiang ah memorandum pelut in Kuki te chung ah NSCN-IM gamtatna chungchang sukfel masatlo ah NSCN (IM) issue sukfel ding kiti pawmtheilo a hidan uh a taklang ui. Lunpi S. Thangjom, Haosa (President), Kuki Inpi Manipur suai kaina memorandum in a taklatna a chun, community line ah NSCN-IM issue sukfel ahileh Kuki Inpi Manipur in pawmtheilo ding a hidan gen in, numei chapang panna NSCN-IM in Kuki 905 te hepina bei ah a tha ahi banah Kuki khua 360 haltum ah um, Kuki te chenna gam tamtak a lakpiak a hidan te taklang kawm in, tumasang ah Prime Ministers pang ate kiang ah memoranda 60 piak hitamleh tunitiang ah sukfel bangma umlo ah NSCN-IM issue sukfel ding kiti chu pawmlo in a gen hi. Zia memorandum copy chu UN Secretary General Antonio Guterres, Geneva; President of India Ramnath Kovind; Alberto Padova, Officer-in Charge, NGO Branch; Governor of Manipur; Chief Minister, Government of Manipur leh Kuki gamkai Haosa te le piak ah um hi ah taklat in a um hi.

Numei active UNLF cadre 1 mandawk
Imphal, May 8 *(Nisin Thuhiltu)* : CDO/IE leh BPR combined team in tuni’n women police te panna’n B.Lunthang Vaiphei OC-CDO IE command bawlna nuai in Khoijuman Mayai Leikai ah cordoned & search operation a bawl ua, numei active UNLF cadre khat amandawk ui. Mat ah um chu Ngahneilhing @ Tingneikim @ Takhellambam (o) Sanjita Devi (31 ) w/o T . Sarat Singh @ Thajalemba ahi. Ama ahileh kum 2005 ah UNLF zawm a hia, Layang village ah MPA no.1994 of. 33 batch nuai ah training, L/Corporal rank piak ah um a hi. Ama a pat a chun, mobile phone khat mudaw in a um a, apawimaw dungzui ah legal action lak ding ah Bishnupur Police station khut ah piakdaw in a um hi.

Keithelmanbi Youth Association in Sapphire Jubilee lawm

Imphal, May 8 *(Nisin Thuhiltu)* : Keithelmanbi Youth Association in tuni’n Brigadier Sirohi Ground, Keithelmanbi Village ah Sapphire Jubilee a lawm a, zia hun chu Works Minister Thongam Biswajit Singh in khuallian hina tawh a uap hi. Minister Thongam Biswajit Singh in a thugenna a chun, khangthak te’n aphalam ah kisanna a um theina ding ah panlakna a nei ding uh a nawpthu gen in, khawtang siam hawina ding ah nasatak ah khangthak te’n panlakna a nei ding pawimaw in a gen hi. Manipur chu Centre in power house of sports ah a hiat a hina chung ah sports university kawi ding ah lemsakna um, MC Mary Kom le Member of the Pariliament (Upper House) ah guat um a hidan te genlang in khangthak te chu a phalam lunggel tawh khantona leh masawnna a um theina ding ah panla chiat ding in chialna a bawl hi. Zia hun matna chu Functional President hina tawh Social Welfare Minister Nemcha Kipgen in a uap a, khua-hausa, local leader leh student leader tamtak te’n le a uap ui.

World Red Cross Day, 2018 mang

Imphal, May 8 *(Nisin Thuhiltu)* : India Red Cross Society, Manipur State Branch saina’ M.G. Avenue, Imphal head office ah tuni’n World Red Cross Day, 2018 mat in a um hi. Zia hun chu Information and Public Relations Minister Thongam Biswajit Singh in Chief Guest hina tawh a uap a, World Red Cross Day, 2018 matna uap student te lak ah a thugenna a chun, kukalna leh nasatak ah panlakna bei ah lawtinna kiti umlo a hidan gen in, mi kukal te bep in lawtinna chang thei a hina chung ah kukal tak ah panla chiat ding in student te chialna a bawl hi. Chun, Red Cross volunteers te panlakna pakcha mama kawm in, panpi ngaite panpi thei kiti chu thil thupi mama hi’n a gen hi. Hun matna chu IRCS-MSB chairman, Management Committee, Dr. R.K. Nimai Singh IAS (retd.) and Hony. General Secretary, IRCS-MSB Dr. Y.Mohen Singh te’n le a uap ui.

Khuga Bn. in Awareness & Registration Camp bawl

Lamka, May 8 *(Nisin Thuhiltu)* : Khuga Battalion in khangthak sepna neilote maban ding khualna’ Counselling Cell leh online registration a bawl piak sek chu sunzawm in, tuni'n le New Lamka YPA Hall, Hebron Veng New Lamka ah ‘Mobile Interactive Terminal for Rural Area’ (MITRA) nuai ah sepna neilo khangthak te a ding in ‘Awareness & Registration Camp’ a bawl hi. Awareness and Registration Camp in a tuppen ahileh khangthak te’ kiang ah Central leh State govt. in scheme leh policy chuamchuam a patdaw te banah job opportunity chuamchuam adiak ah Indian Army, Para-Military Forces leh Govt. institute chuamchuam a phatchuampi ding uh ti a hi. ‘Awareness leh Registration Camp’ a chun, October 2018 leh Army Recruitment Rally a umna ding tawh kisai ah Churachandpur District sung ah sepai lam ah a lunglut te a qualification dungzui un offline registration a bawl piak ua, offline registration bawl piak ah um te chu Khuga Career Counseling Cell tawh kizawp ding, August 16, 2018 apat September 30, 2018 kikal ah Army kilakna ding a application form piaklut thei hun ah Khuga batallion in a thawn ah coaching bawlpi ding leh pre-recruitment training le bawlpi ding ti a hi.

Promotion muthak te ding ah capping ceremony nei

Lamka, May 8 *(Nisin Thuhiltu)* : Manipur state, Home Department in thalui April, 2018 ah Sub Inspector apat Ispector ding ah Police officer hunkhawp promotion a piakte lak a, Churachandpur ah Women Police, officer 2 pang te ding in tuni’n Rakesh Balwal IPS SP/CCpur office chamber ah capping ceremony a um hi. Sub Inspector apat Inspector a kaisang officer pani te a hiuleh Chiinneihlam Gangte leh Sandy L Tonsing te a hiu a, Rakesh Balwal SP/CCpur in Addl SP Lunkhomang Khongsai leh Addl SP P Binod Ranjan Singh te kithuapina’n capping ceremony amapui hi.

Zia hun chu SDPO Thanlon, SDPO Ccpur, OC/CCpur te panna’ Sub Inspector leh ASI hunkhop in le a uap ui. SP/CCpur in a thugenna a chun, promotion muthak te kipakpi kawm in, Police officer te'n law & order etzuina lam ah mawpuakna liantak nei a hidan gen in, district sung ah pawngsualna leh kithahna kiti himhim sukbei ding a nawp thu gen in, thil dawi umlo tung te Police ah report sese hilo leh le FIR ziklut ah society sung a hawina ding ah panlak ding pawimaw in a gen hi.
Hun mat sung in, Inspector ah kaisang thak Chiinneihlam Gangte leh Sandy L Tonsing te’n le thugenna hun a nei ua, amau teni ahiuleh 2010 Batch gel, Sub Inspector ding ah North Eastern Police Academy, Unsaw, Shillong, Meghalaya ah training a la zo a hiu.

Mun chuamchuam ah Go to Village mission camp bawl

Lamka, May 8 *(Nisin Thuhiltu)* : State Government in May 1, 2018 ah “Go to village mission” a hawn tawh kitawn in Lamka Block, New Lamka West huapsung a ding in tuni May 8, 2018 in Gouchinkhup Veng ah um CYA Hall ah Go to Village mission camp bawl in a um hi. Shyam Lal Poonia IAS DC/CCpur in camp hawnna nei in, MCSSDO/Ccpur, CEO/ADCC panna mi pawimaw chuamchuam in zia hun matna chu a uap ua, Go to village mission camp um sung in Government scheme chuamchuam um te taklatna nei in, Gouchinkhup veng, Hmuia Veng, Bethel Veng, Chimtung Veng, Bungmual, Dorcas Veng leh a dangdang apat mipi hunkhawp in a haksatnau leh a hiatthiamlo uh um te tutna nei in, MGNREGS nuai ah Job Card neilo te a mun ah bawl piak in, Police Dept in a pawimaw te ding in Chracter Certificate issue a bawl a, Department chuamchuam in le buaina neite a ding in dawkan a hawng ui.

Ministry of Tribal Affairs & hills, Govt of Manipur nuai panpina um te le zia hun a chun piakdawna a um a, mi 3 kiang ah Water Storage tank Litre 500 chiat piak piak ah um in, Small Scale Industries leh Backyard Poultry a ding ahFinancial Assitance mi 2 kiang ah Rs 50,000 gel piak in a um hi. Gouchinkhup Veng tilo District sung Block chuamchuam ah le Go to Village Mission camp bawl in a um a, Tuibong ah13-Kholmun nuai a ding in Khengjang ah nei in, Samu Lamlan TD Block nuai ah Samulamlan ah nei in a um hi. Saikot TD Block nuai a ding in Tuikhamphai ah nei in a um a, Singngat Block nuai ah Zalenphai ah nei a hi. Sangaikot a ding in Songpeh ah nei in a um a, Henglep in Chongkhawzo ah nei in, Kangvai in Gothol a, Mualnuam in Tuilijang in a nei hi.

CCpur Dist. Hospital ah State Level Intl. Nurses Day mat hiding
Lamka, May 8 *(Nisin Thuhiltu)* : A hung tung ding May 12 chu, Florence Nightingale Brithday/International Nurses Day a hi tawh kitawn in Khawvel mun chuamchuam ah International Nurses Day mat hiding a hi. Manipur State Level ah Churachandpur District Hospital zia hun chu mat hiding a hi. Zia ding tawh kisai a chun, a chiata 30th April 2018 in State government official - Dr Y Sundary, chairperson Socio Economic Welfare, Trained nurses association of india TNAI, State branch, Ph Rani Devi, Secretary, TNAI, State branch, P Maipakpi, Treasurer, TNAI, State branch leh Th Binodini, Joint Secretary TNAI, State branch te’n Churachandpur District Hospital ah Florence Nightingale Brithday/International Nurses Day matna ding mun etthakna a nei ui. Zia hun a chun, State team-te GNM Nursing College ah tutor te’n kithuapi in, Florence Nightingale Brithday/International Nurses Day mat hun ah damlo te etkawl dingdan banah damtheina lam tawh kisai ah District hospital OPD ticket lakna munte etthakna a nei bawk ui. May 12, Florence Nightingale Brithday/International Nurses Day ahileh kumsin ah kimang sek a hia, state level ah Distirct khat in zintun sek a hina chung ah tukum ah CCpur district in a zintun ding a hi. Program detail bangkim ahileh tunung ah suadaw hiding in a kigen hi.

May 19 ah RGG Football Memoriam 2018 kipan ding
Lamka, May 8 *(Nisin Thuhiltu)* : Lamka Public Ground, Churachandpur ah Ropiang Foundation Trust (RFT) saina’ May 19, 2018 ah Raja Goukhothang Guite Football Memoriam 2018 (RGG Football Memoriam 2018) kipan ding a hi. Dr J suresh Babu, Chief Secretary Govt of Manipur in khuallian hina tawh opening ceremony uap ding leh tournament hawnna nei ding hi’n a kigen hi. Zia Tournament a chu Manipur ah Sports’ Association chuamchuam a pat club/team te pang ding, CISCO in title zosia sponsor bawl ding a hi. Ropiang Foundation Trust (RFT) in zia tournament chu thupi mama ding ah ginchatna nei in a taklang hi. Tournament ah Champion Team in Rs. 2 Lakh sang ding a hiu a, Runner’s Up in Rs. 1 Lakh leh Best Performer ban ah kihelna pangkha zosia citation piak hiding a hi. Chun, Tournament ah pang nuam te ding ah Registration Fee 5,000 leh Security Deposit Rs. 1,000 hiding, a pangnuam te’n lekha pawimaw zosia tawh May 10, 2018 tiang ah CDSA Office, Hiangtam Lamka entry form/fee piaklut ngai ding a hi.

‘Missionary Day’ matna thisan donate bawl

Lamka, May 8 *(Nisin Thuhiltu)* : Southern Manipur a Chanchinpha (Gospel) a hung lut hiat zingna ding ah kumsin leh ‘Missionary Day’ mat a hisek tawh kitawn in May 7, 2018 ah le Missionary Day mat in a um hi. Evangelical Congregational Church of India (ECCI) nuai ah Youth Department in District Hospital ah Missionary Day mang in, Blood Donation Camp tawh a thua a, Blood Donation Camp thupi ding in ‘Give the Gift of Life’ ti thupi’n a mang ui. Zia hun a chun, ECCI sung ah kochuam 6- ECA, ESC, EOC, EAC, BBEC leh EUC-te’n thisan piakna nei in, Rev Roparlien, Vice Chairman, ECCI Youth Dept in Pathian thugenna a nei a, ECCI Youth Dept nuai a mi 47 te’n thisan a pia’u hi. Thisan pete chu pawsal 40 leh numei 7 a hiu a, thisan unit khat chiat a piak uh a hi. Thisan pete lak ah a upa pen chu kum 42 a upa Benjamin Hrangchal leh Peter Thanglung Sanate te a hiu a, a naupang pen te ahiuleh kum 18 a upa Richard Lunzathang, Joshua Neihsial leh Paununmawi Vaiphei te a hiu.

Chongkhawzo ah 'Go to Village' mission camp bawl

Chongkhawzo, May 8 *(Nisin Thuhiltu)* : Henglep Sub-Division huapsung ah um Chongkhawzo khua ah tuni, 8th May 2018 in 'Go to Village' mission camp a um hi. Zia hun chu Chief Guest hina tawh Genneikhup Vaiphei, EM ADC/CCpur in a uap a, Guest of Honour in Lalramsang Infimate, MCS, AC to DC/CCpur a pang hi. Hun matna Paominthang, Lambu, SDO/BDO, Henglep in amapui a, Chunglenmang Kipgen, MCS, SDO/BDO Henglep in keynote address bawl in, Block Level Committee nuai ah department chuamchuam a kipat SDO/BDO, DI Henglep (Education -S), Medical Officer Incharge (CMO representative), Extension Officer (Agriculture), Veterinary Officer, CSI (Supply Inspector), Officer Incharge (Henglep Police), CDPO/Henglep, PHED/Henglep, DI/Henglep (ADCC), Range Officer (Henglep Forest), Horticulture department apat palaite'n amau department chiat in mipi phatchuampi thei ding scheme chuamchuam umte taklatna a nei ua, CMHT representative Tuanmuanson Vualnam leh PMUY tawh kisai ah hiat ding ah pawimaw um te Paukhanmang, Proprietor (Bungmual Indane Gramin Vitrak) in genlatna a nei ui. Chun, Puaktam khua akipat Gas connection neithak mi 3 kiang ah Cylinder leh Gas stove piak dawna a um a, ADC/CCpur in khaw hausa hunkhop te kiang in sprayer piakna nei in, Education department in Chongkhawzo khua apat school drop-out mi 2 te uniform leh book panna study kits chuamchuam piakna a nei hi.
Chief Guest in Genneikhup Vaiphei, EM ADC/CCpur in a thugenna a chun, Southern Manipur ah Chanchinpha (Gospel) a lut nung kum 108 lam a hitak tawh kitawn ah I lungthim ngaituanau ah a hawilo um te paithak hunta leh a phalam ngaituana tawh hinkhua mat ding pawimaw a hitak dan gen in, lam zosia Christian hina suklat zing pawimaw in a gen hi. Chun, gov't. in phatchuampi thei ding thil chuamchuam a piak te chu a hiding gualtak ah mat ding leh phatchuampi guat ding pawimaw a hidan gen hi. Thingkeu, Munpi, Chongkhawzo, Puaktam, V. Munlai, D. Munlui, K. Tuiliphai, K. Lonmual, Saikot leh Mualdak khua hausate kiang ah volleyball leh Net khat chiat piakna le a nei hi. 'Go to Village' Mission camp a chun, Chongkhawzo, Munpi, Thingkeu, V. Munlai, K. Tuiliphai, Puaktam, Lungchuang, Mualdak, N. Saikot, Dawjang leh D. Munlui apat mipi tamtak a chiakhawm ua, stall/discussion centre hawng in mipi chiakhawm te hiatnawp chuamchuam genlatna nei in, CMHT leh Aadhhar enrollment a ding form piakdawna a um hi.

Athawn ah online form fill up piak ding
Lamka, May 8 *(Nisin Thuhiltu)* : Khangthah Zuun Pawl (KZP) GHQ in Staff Selection Commission (SSC) nuai ah Combine Graduate level Exam pia ut khangthak-te khualna, athawn ah online form fill-up piak ding a hi. Online form fill-up bawlna haksatna tuak te’n Application Form format May 15, 2018 tiang ah L. Paulianmang Variety Store, Simveng Church Road, Chinminlun Variety Store, Bible Hill - Khumujamba junction, Joint Secretary KZP GHQ contact number 961-289-0385 ahiloleh Secretary Education KZP GHQ contact number 873-099-2987 kiang ah piaklut thei ding a hidan Khangthah Zuun Pawl KZP GHQ in thusua a bawlna a chun a taklang hi.

Zillai Shillong in Admission Committee siamdawk
Shillong, May 8 *(Nisin Thuhiltu)* : Zillai Shillong Block (Vaiphei Students’ Association) in Shillong ah zilna sunzawm nuam, admission tawh kisai ah buaina neite ding in Admission Committee 2018 a siam dawk hi. Admission bawlna lam thil ah haksatna nei te’n Admission Committee thuhiat thei ding a hi. Admission Committee member te a hiuleh ZSB President: P.T. Loveson Vaiphei (87318-44991); ZSB Secretary:Charles Kapboi (7005652539); Education & Statistics Department: Secretary: Nunchoi Hatlei (8014222486); Asst. Sea/.: Nk. Hatneilam Baite (9039223125); Tv. Anthony Vaiphei (7085596657); Tv. Boipu Thanglalbiak (8014133051); Tv. Genminlun (7629978069); Nk. Dimsawnjem (7085469324) te a hiu a, College chuamchuam ah mawpuakna nei chuam bik ding te a hiuleh -St. Edmunds College ah Kapminlun (8415047050) & Henneilal (7085156261); St. Anthony College - Richard Lamlunthang (6131850125) & Nk. Dimsawnjem (7085469324); Shillong College - Gavin Henneilun (03615562872) & Genminlun (7629978069); St. Mary's College - Irene Thuamneinem (7005668623) & Nk. Tinglemvak (8787889906) leh Womens College - Mercy Kimnunmawi (8415915988l te a hiu.

Imphal bomb puak; AR jawan 1 liam
Imphal, May 8 *(Nisin Thuhiltu)* : Imphal Hotel, North AOC kiangnai ah um IGAR (South) PRO office (Sanjeevani) gate ah tuni nitak dak 6:40 in bomb 2 a puak a, Assam Rifles Jawan khat in liamna a tuak hi. Liamna tuak chu N. Prem Singh of 22 AR, Tamenglong, tu leh tu IGAR (S) liaison cell, PRO tawh attached ah um a hi. Ama ahileh Kakching mi a hi. Liamna a tuak tawh kitawn ah AR Nodal hospital, Mantripukhri tut in a um a, a liamna serious talua hilo ah hiat a hi. Zia ah bomb puak chu hand granade hiding in a kigen a, a kizawm ah puak zawm a hi. High ranking AR officers te'n bomb puakna mun chu del in, police te tawh thil umdan etthakna a nei ua, police in case a ziklut hi.

ZUF group 2 in “ceasefire agreement” suai kai
Imphal, May 7 *(Nisin Thuhiltu)* : Zeliangrong United Front (ZUF) faction - S Kamson leh Jeanchui mapui te’n zani a khan kihiatthiamna siam in “ceasefire agreement” suai a kai ui. Zeliangrong public in kipumkhat ding ah chialna a bawl zing uh tawh kitawn ah Zeliangrong mipi te dawidan zil ah group 2 in kinawptuana suai a kai uh hi’n thudawna’n a taklang hi. Group 2 in joint press release ah a taklatnau a chun, “ceasefire agreement” suai kai ah um chu “reconciliation leh group khat ah kigawpkhawm kit theina ding ah panlakna lawting to zel a hidan taklang in, Zeliangrong mipi te lemtina leh Zeliangrong mipi maban ding khualna group 2 ah kikhen te’n kipumkhatna ding ah lunggel a nei uh hi’n a gen hi. Zia kinawptuana suai chu S Kamson group thasik in D Longmei leh A Dangmei te’n a kai ua, Jeanchui group group te thasik in A Riamroi leh Felix Kamei te’n suai a kai ui.