Nisin Thuhiltu – 07 May 2018

User Rating: 0 / 5

Star InactiveStar InactiveStar InactiveStar InactiveStar Inactive
 

STC/BSF, CCpur ah 230 & 231 Batch te'n ‘Passing Out Parade’ bawl

Lamka, May 6 *(Nisin Thuhiltu)* : Subsidiary Training Centre (STC), BSF/Mualkoi ah training zothak te’n tuzingkal dak 9:00 in Satish Chand Parade Ground ah ‘Passing Out/AttestationParade’ a nei ui. Tuni ah ‘Passing Out Parade’ neite chu Batch Number 230 (F Coy) leh 231 (B Coy) te a hiu a, Sh. Solomon Yash Kumar Minz, IPS IG/BSF in kitiam sakna nei in, ‘attestation parade’ a bawl ua, Sh. Solomon Yash Kumar Minz, IPS IG in salute lakna a nei hi. Training zouthakte ahileh Batch No. 230 B-Coy ah Rajasthan apat mi 84, Punjab apat 53, Uttar Pradesh apat 5 leh Madhya Pradesh, Uttarakhand leh Bihar apat khat chiat a hiu a, Batch no. 231 F-Coy ah Punjab apat mi 87, Rajasthan apat mi 35 leh Haryana apat 26 a hiu. Batch no. 230 & 231 apat mi 293 in kumlui June 12, 2017 in Training a pan ua, hapta (week) 44 sung training a nei sung ua thiamna leh titna nei chungchuang diak mi 10 te kiang ah medal piak in a um hi. Medal mute chu - Batch no. 230 B-Coy ah Overall No. 1, Constable Mahipal Singh Yadav, Silver Medal leh Cash award Rs 1000 piak in a um a, ‘overall’ No. 2, Constable Sharwan Kumar kiang ah Silver Medal leh Cash award Rs 500 piak in a um hi. ‘Best firing’ ah Constable Sachindra Kumar Pandey kiang ah Medal leh Rs 500 piak in a um a, Best in drill ah Constable Ranvir Singh kiang ah Medal leh Rs 500 piak a hi. Best in Endurance ah Constable Jair Singh kiang ah Medal leh Rs 500 piak in a um hi. Batch No. 231 F-Coy ah Overall ah Constable Rabinder Kumar in khatna a lua a, Medal leh Rs 1000 piak a hi. Overall ah second Constable Surinder Kumar chu Medal leh Rs 500 piak in a um a, Best in drill ah Constable Yogesh kiang ah Medal leh Rs 500 piak a hi. Best in Endurance ah Constable Ram Rakh Gilla kiang ah Medal leh Rs 500 piak in a um a, Best in Firing ah Amarjeet kiang ah Medal leh Rs 500 piak a hi. Subsidiary Training Centre, BSF ahileh March 15, 1968 ah Sillong ah a la kiphutdawk, February 16, 1990 ah Churachandpur ah kichawn a hi. STC/BSF Mualkoi ahileh Border Security Force (BSF) in North East India a ding ah Training Centre a nei umsun, North East India ah Training Centre lianpen hi’n le a kigen hi. STC/ BSF Mualkoi ah tuni tiang ah Constable leh Tradesman banah State Armed Police Forces personnel 40,000 val, Batch 231 a kikhen in, lawtingtak in training a la zo tau a hi.

Chongkhawzo ah Go-To-The-Village Mission Camp bawl ding
Lamka, May 6 *(Nisin Thuhiltu)* : State Government in “Go to Village” mission a patdaw tawh kitawn in Henglep Block level ah 8th May, 2018 leh Chongkhawzo khua ah Go-To-The-Village Mission Camp um ding a hi. Zia hun chu Chunglenmang Kipgen, MCS, SDO/BDO Henglep in mapui ding, Chongkhawzo khua ah camp um hun sung ah Government scheme chuamchuam um te taklatna um ding, Chief Minister Hakshelgi Tengbang (CMHT) kiti Health Scheme a ding ah amun ah card siamthei ding ti a hi. Chongkhawzo khua ah “Go to Village” mission camp chun, Chongkhawzo, Munpi, Thingkeu, V. Munlai, K. Tuiliphai, Puaktam leh Lungchuang khua cover ding a hi. ‘Khungang Chatse-Go to Village’ Mission ahileh May 1, 2018 ni ah Manipur Assembly Constituency 60 ah a la kihawng a hi.

Diploma course chuamchuam zilthei
Lamka, May 6 *(Nisin Thuhiltu)* : Dr. K. Rajo Singh, Director of Health Services, Manipur in May 4, 2018 ah thusua a bawlna a chun, state nominee ah B.Sc. Nursing, Bachelor in Radio Imaging Technology (B.Sc. RIT) & Bachelor of Sc in Optometry & Ophthalmic Techniques (B Sc. O.O.T), Bachelor of Sc.in Lab. Technology (B. Sc. MLT) (Degree Course), Bachelor of Pharmacy B. Pharm (Degree Course), Diploma in Pharmacy (Diploma Course) zilnuam te’n apply bawl thei ding un a taklang hi. Lunglutna nei te’n Medical Directorate, Lamphelpat, Opposite RIMS gate ah Rs 500 ah application form lathei ding a hiu a, May 5-15, 2018 a pat kihawm pan ding, May 19, 2018 tiang ah piaklut ngai ding, May 24-28, 2018 kikal ah Admit card issue hiding a hi. Admit card hawpdaw zaw a hitak leh June 3, 2018 ah Entrance test um ding, June 11, 2018 ah counselling um ding a hi.

JEE 2018-2019 apply theih
Lamka, May 6 *(Nisin Thuhiltu)* : Department of Chemicals & Petrochemicals, Ministry of Chemicals & Fertilizers, Govt. of India saina in Central Institute of Plastics Engineering & Technology (CIPED) kiti Diploma, Post Diploma leh Postgraduate Diploma course (2018-2019) zilna ding ah Computer Based Test (CBT) ah JEE 2018-2019 apply bawl thei a hi. JEE online applications ahileh April 28, 2018 apat June 27, 2018 sung ah apply bawl thei ding a hi. June 30, 2018 ah admit card issue hiding , CIPET-JEE ahileh July 1, 2018 ah um ding a hi. Thuchian kimzaw henuam te’n www.cipet.govt.in ah etthei ding , online application ahileh http://admission.cipet.govt. ah piaklut thei ding a hi.

Pawsal 1 a sun imutna imu lum
Lamka, May 6*(Nisin Thuhiltu)* : Lamminlal Khongsai (22) s/o Paokai of Thingkangphai-BCM, Churachandpur chu tuni sunnung dak 2:30 vel ah sun imu lai chu thi den in a kigen hi. Thiltung tawh kisai Lamminlal pa'n a gendan in, Lamminlal ahileh Andro lam ah chakthing tan ah nasem akuan tuni ah inn hungtung hi'n a gen a, inn a tunzaw ah a lawite inn khat ah chawldam kawm ah imu chu buaiden hi’n a gen hi. Chun, a lawiupa tawh imu khawm a hidan uh le gen in, a lawipa a khatlawh ah Lamminlal chu kaitho a guat leh khua helo ah umden hi’n a gen hi. Lamminlal ahileh zinei nailo a hia, aluang May 7, 2018 ah Thingkangphai thanmual ah vuiliam hiding in a kigen hi.

ZoFIDA in maban panlak ding dan tawh kisai taklatna nei

Lamka, May 6 *(Nisin Thuhiltu)* : Zogam Film Development Association (ZoFIDA) puitu te’n tuni, 6th May 2018 sunnung in press/media-te kimupi in, ZoFIDA etzuina nuai ah film kihawng thak 'KINEPNA-II' film tawh kisai ah panlakna a neiteu taklatna a nei ui. James Thangluai, Chairman (ZoFIDA) in a genna a chun, ZoFIDA nuai ah tu leh tu firm chuamchuam lakhawm a hidan gen in, zia lak a chu Khawvaiphei Film Company panlakna kisiam dawk 'KINEPNA-II' film chu hun sawttak buaipi a hinung ah sum-le-pai lam ah buaina a um ziak ah KFC in mawpuakna la ding ah chialna a bawl ziak ah ZoFIDA in sunzawm ah hawnthei ah umta ti’n a gen hi. KINEPNA-II film siamdawna Rs. 12 lakh vel beizo a hidan gen in, film siamdawna ding ah (late) Hentinsong, K. William Vaiphei leh Khamminthang @Thangno te'n lead role ala la uh hi’n a gen a, film ah special appearance -Manipur Film actor Kaiku banah film nungak ah Tonthoi Devi in a gen hi. 'KINEPNA-II' film hawnna neizaw nung ah mun 10 ah Premiere Show bawlta, tutiang ah Rs. 3 lakh vel mupan uh a hidan gen in, maban ah le mun chuamchuam ah show neizawm zel ding a hina chung ua kithuapina pechiat ding in mipi te chialna a bawl hi. ZoFIDA in anuai ah um firm association chuamchuam tawh kithua ah maban ah (culture) pansa film leh music video atam theilam bawldaw ding tup ah nei ah le gen in, category chuamchuam - best director, actor leh actress panna award chuamchuam le piak gua a hidan uh a gen hi. Press/Media-te a kimupi hun uh chu, Lal Guite, Secretary (ZoFIDA) leh Thangkhansuan, Asst. Secretary (ZoFIDA) te’n le a uap ui.

Khuga Bn. saina’ Ex-Serviceman Rally um ding
Lamka, May 6 *(Nisin Thuhiltu)* : CCpur Assam Rifles kithuapina Khuga Battalion (6 Sikli Infantry) in May 12, 2018 zingkallam dak 9:30 a kipat Tuibong ah District Training Centre ah Ex-Serviceman Rally bawl ding a hi. Zia hun chuleh Oct. 2018 sung ah Army recruitment a umna ding tawh kisai taklatna, MITRA Vehicle registration, Pension tawh kisai buaina neite a ding ah Suvigya Cell hawng ding a hiu a, Career Counseling & youth guidance cell, bank account tawh kisai ah buaina neite a ding ah le bank stall hawng ding a hiu. Ex-Serviceman leh numei-te a ding in ha (teeth) lam tawh kisai buaina neite a ding in medical stall abawl ding banua, Know Your Army stall, Local handicraft stall leh Live music band & cultural program um ding a hi. Zia hun chu ex-serviceman atam theilam in uap ding in chialna a bawl hi.

Chief Minister leh a chapa that ding ah vautu mandawk

Imphal, May 6 *(Nisin Thuhiltu)* : Chief Minister of Manipur N. Biren Singh chapa that ding ah vauna bawl kum 22 mi, N. Chandrasekhar aka Boicha s/o N. Sanayaima Singh of Kongpal Khaidem Leikai, Imphal East district chu Imphal West Cyber crime leh Imphal Police Station a pat combined team in a mandawk hi. “Kangleipak Thoudok Wathok Pao” kiti facebook page ah CM N. Biren Singh vauna bawl kawm ah a chapa that ding ah thu a post ziak ah mat ah um hi’n police thusuak in a gen hi. Chun, ‘attempt to murder, sedition with criminal intimidation, section 307/124-A/506 IPC under FIR no.102 (5)2018, IPS nuai ah case ziklut in a um hi.

Ni 2 gua zu’n hindan ngaina subuai
Imphal, May 6 *(Nisin Thuhiltu)* : Manipur ah ni 2 sung gua a zuk nung in hindan ngaina nasatak in a chawk buai a, Noney district huapsung National Highway 37 ah trucks, buses leh gari chuamchuam a 100 ah sim te tuilet ziak leh lampi hawilo ziak in a tangden ui. Official thusuak in ni 2 sung gua zu zawm thei nalai ding in a gen a, Noney district ah Izit river ah tui danger level ah um in a gen hi. A langkhatlam ah Imphal khawpi sung mun chuamchuam in tui a let a, vak lumletna nuamlo mama in a kigen hi.

Maharaja Narasingh , 226th Birth Anniversary mang

Imphal, May 6 *(Nisin Thuhiltu)* : Maharaja at Sagolband Mabudhou Mantri Leikai, Imphal ah tuni’n Maharaja Narasingh Memorial Committee, Imphal leh Shri Shri Gopinath Temple Board, Purana Rajbari, Imphal guanggalna 226th Birth Anniversary of Maharaja Narasingh mat in a um hi. Zia hun chu Deputy Chief Minister Yumnam Joykumar Singh in khuallian hina tawh uap in, ama mapuina Maharaja zana piakna leh pakcha piakna a um hi. Deputy Chief Minister in a thugenna a chun, Maharaja Narasingh chu Manipur khangthu leader piting mama khat a hidan gen in, Seven Years Devastation (Chahi Taret Khuntakpa) ziak ah Manipur mipi te huaituptu mai hizawlo ah hill leh valley mite kal siamhawina ding ah panlatu khat hi’n a gen hi. Manipur khangthu Seven Years Devastation kiti chu Manipur a ding ah hun haksa tak himaleh Maharaja Narasingh panlak thiamna ziak ah 1844-1850 sung ah a phalam ah masawnna muthei ah um hi’n a gen hi. Maharaja in state sung kipumkhatna ding panlakna nasatak a nei banah ama leng vaipuak lai ah Mera Hou Chongba le hill leh valley um te kipumkhat theina ding ah ala piang hi’n a gen hi. Zia hun matna a chun, Deputy Chief Minister Joykumar Singh in Maharaja Narasingh Birth Anniversary Celebration Awards piakdawna le a nei a, award chu category chuamchuam - culture, sports leh public service ah a chuangchuang diak te kiang ah piak in a um hi. Chun, Sahitya Academy Awardee leh President of Maharaja Narasingh Memorial Committe E. Sonamani Singh in le research a bawl hun ah a thil mudaw te taklatna a nei hi.

Go to Village’ Mission Camp bawl ding
Bishnupur, May 6 *(Nisin Thuhiltu)* : District Administration, Bishnupur in 8th May 2018 ah khua pathum ah ‘Khungang Chatse-Go to Village’ Mission Camp bawl ding a hi. Zia camp umna ding khua pathum te chu- Ithing, Naranseina leh Kakyai village hiding a hi. Deputy Commissioner Pawan Yadav in thusua a bawlna a chun, ‘Khungang Chatse-Go to Village’ Mission camp chu SDO/ Moirang, SDO/ Bishnupur leh SDO/ Nambol in enzui ding a hidan uh taklang in, line department officers te chu public haksatna tut theina ding dawkan siam piak ding in a hiatsak hi. Hiatthei khat chu a chiata May 1, 2018 ni a khan Bishnupur district Administration in khua pa 6 in Khungang Chatse-Go to Village’ Mission Camp a la bawl hi.

Cyber Security Awareness programme nei

Imphal May 6 *(Nisin Thuhiltu)* : Cyber Crime tawh kisai in, Monsangei ah um 109 Bn, CRPF in awareness programme a nei a, zia hun a chun, field expert Dr. Mohit Garg, IPS in resource person hina tawh Cyber crime tawh kisai genna latna nei in, police station ah Field experts te’n le thugenna hun a nei ui. Dr. Mohit Garg, IPS in tuhun ah Cyber crime kiti mitamtak buaina a hidan gen in, State force leh central force banah law enforcing agencies personnel te’n thil umdan a hiatthiam ding uh pawimaw in a gen a, social media platforms matthiam pawimaw hi’n a gen hi. 109 Bn CRPF, Commandant Vinod Kumar in a thugenna a chun, awareness programme a nei uh chu CRPF personnel te ding ah pawimaw mama a hidan gen in, phone call ah bank details, debit card details, password tawh kisai dawtna kiti himhim limsaklo ding hi’n a gen hi.

J & K ah kaplup ah um thingnuaimi 5 te lak ah Hizb commander leh Asst. Prof. 1 pang

Srinagar, May 6 *(Nisin Thuhiltu)* : Kashmir's Shopian district ah tuzingkal in security forces, combine team - Army’s 23 Para Commandos, 34 RR, 3 RR, CRPF leh SOG te’n thingnuaimi 5 a kaplum ua, thingnuaimi 5 te kaplup a hina chung ua mipi’n kiphinna a nei uh tawh kitawn ah kiphinna nei te leh security forces te kinawktuana ziak in civilian 5 te’n thina a tuak ui. Director-General of Police S.P. Vaid in a genna a chun, Badigam-Zainpora , Shopian ah kikaptuana zingkal dak 5:30 a pat kipan hi’n a gen a, insung ah kisel thingnuaimi te’n search party te a la kap uh tawh kitawn ah kikaptuana kipan hi’n a gen hi. Zia kikaptuana mun a chu thingnuaimi 5 luang mudaw ah um in a gen hi. Thingnuaimi 5 kaplup ah um te lak a chu Hizbul Mujahideen commander Saddam Padder leh May 4 ni Hizbul Mujahideen thingnuaimi group zawm thak Kashmir University ah Assistant Professor Dr. Muhammad Rafi le pang in a gen hi.
Chun, kaplup ah um Hizbul Mujahideen commander Saddam Padder chu kum 2016 ah kaplup ah a la um Hizbul Mujahideen commander Burhan Wani tawh nasatak ah a la kithua a hidan uh thusuak in a gen a, Kashmir University ah assistant professor Dr. Muhammad Rafi ahileh dakkal 36 sung Hizbul Mujahideen ah a pan nung ah thina tuak a hi.A langkhatlam ah zia kikaptuana a chun policeman 1 leh Army jawan khat in liamna a tuak ui.

BSF jawan khat in a seppi pathum kaplum

Kailashahar (Tripura), May 6 *(Nisin Thuhiltu)* : Maguruli, Unakoti district, Tripura ah ah um 55th Battalio Border Security Force (BSF) jawan khat in a service meithal chawi in a seppi pathum a kaplum a, zia nung a chun ama leh ama a kikaplum hi. Officer-in-charge of Irani police station, Swapan Debbarma in a genna a chun, a seppi te kaplum tu chu constable Sishu Pal hi’n a gen a, duty zo zan dak 1:00 tuam ah head constable Bijoy Kumar kiang ah meithal kawi ding ah chia ah head constable Bijoy Kumar chu a meithal chawi ah a kap hi’n a gen hi. Head constable Bijoy Kumar chu a mun ah thi ngal ziang hi’n a kigen a, Head constable Bijoy Kumar a kaplup zaw ah a mu mu a ban kapna constables - Rinku Kumar leh Rakesh Kumar Jadav te kapliam ah kintak ah hospital tut himaleu hospital ah thina tuak uh hi’n a gen hi. Zia ah BSF te umna mun chu Tripura state capital Agartala a pat 185 kms ah gamla um a hi. Sishu Pal, Bijoy Kumar leh Rinku Kumar te chu Jammu & Kashmir state a pat a hiu a, Jadav ahileh Uttar Pradesh a pat a hi. A langkhatlam ah ziagual kikaplupna a ziak hiatchian hilo maleh mimal kituaklona ziak ah hiding ah muanmaw thu gen in a gen hi.

Assam-Bhutan gamgi um India mi te’n Bhutan ah thautui la sek uh

Guwahati, May 6 *(Nisin Thuhiltu)* : Assam leh Bhutan border kiangnai tuam ah um India mi te’n tulai ah border kantan ah Bangladesh ah thautui leh zu chaw sek un a kigen a, nisin ah mi a 100 sim te’n Bhutanese town Samdrup Jongkhar ah thautui leh zu chawsawn sek uh ti a hi. India (Assam) ah Petrol litre ah Rs 76 man himaleh Bhutan ah litre ah Rs 52 a man ziak ah gamgi tuam ah mipi te’n Bhutan gam ah thautui chawzaw sek uh ti a hi. Diesel ahileh Rs 20 lam ah niamzaw Bhutan ah muthei in a kigen a, Bhutan-made beer le India sang ah rs 20 ah mantawmzaw ti a hi. Indian Rupee leh Bhutan sum Ngultrum chu a value kibang himaleh GST ziak ah India ah thautui man a tamzawk ziak ah Bhutan gam ah a mantawmzaw dawina piang a hi. Hiatthei khat chu GST chiapi a hi tawh kitawn in India ah thautui man kalchuam a hia, Indian Oil Corporation Limited leh Bharat Petroleum Corporation Limited in Bhutan chu petrol leh diesel supply a bawl himaleh amau a ding ah excise duty exemption chiapi a hi zingna chung ah thautui man tawmzaw a hi.

ULFA (I) in police officer a kaplup uh kisik a hidan taklang

Guwahati, May 6 *(Nisin Thuhiltu)* : United Liberation Front of Assam-Independent in a chiata Simhaini ah Assam police officer khat kikaptuana a kaplup uh chu kisik um a sakthu taklang in, Assam mi ma kaplup ding chu amau thil dawi hilo himaleh Assam Police leh Cobra commandos , CRPF te’n a chung ua operation a ziak ua self-defence ah meithal a kapnau ah eastern Assam’s Tinsukia district, Bordumsa Police Station ah Officer in Charge (OC) Bhaskar Kalita chu kaplup khak ah um hi’n UNFA (I) commander-in-chief Paresh Baruah in a gen hi. Kum 34 mi Police officer Bhaskar Kalita ahileh eastern Assam’s Kujupathar village, Tinsukia district ah ULFA (I) te chung ah counter-insurgency operation bawlna kaplup ah um a hia, Assam Police leh Central Reserved Paramilitary Force team te mapuitu a hi. UNFA (I) commander-in-chief Paresh Baruah in a genbelapna a chun, amau chu Assam police do hilo a hidan uh gen in, a chiata kum 5 sung ah Assam police te attack a la bawl khalo a hidan uh gen in, police officer kaplup khak ah a um chu da um a sak thu gen in, amau mi (Assam mi) ma thina ding ah galvan chawi hilo un a gen hi.

Centre leh pro-talks ULFA faction in kinawptuana suai kai paita ding:ULFA

Guwahati, May 6 *(Nisin Thuhiltu)* : Centre leh pro-talks faction United Liberation Front of Asom (ULFA) in peace talks a chiapi zingna tawh kisai ULFA chairman Arabinda Rajkhowa in thuthak lakhawm mite kiang ah a genna a chun, charter of demands a piaklut uh tawh kisai ah government tawh kihona neizo ta a hidan uh gen in, kinawptuana suai kai ding kivatta hi’n a gen a, himaleh kinawptuana suai kai ding hun bithiak hinailo in a gen hi. Hiatthei khat chu, Interlocutor AB Mathur, former chief of Research & Analysis Wing (RAW) mapuina nuai ah Guwahati ah 10 March a khah ULFA leh Government in kihona a la nei a hia, zia kihona a chu charter of demands chungchang genfel uh ti a hi. ULFA demand ahileh Assam, indigenous mite thuneina leh identity humbit ding, amau a ding ah Constitution siamthak ding ti a hi.

Mizoram state sung ah liquor factory a um ding MNF in dawilo

Aizawl, May 6 *(Nisin Thuhiltu)* : Mizo National Front (MNF) in Mizoram state sung ah liquor factory umsak ding dawilo a hidan taklang in, Congress-led state government in CADC chief executive member lui leh Congress leader Kali Kumar Tongchongya mapuina nuai ah liquor factory sakna kipan paita ding ah a gen chu pawmlo in a taklang hi. MNF general secretary R. Rohmingliana in a genna a chun, Mizoram government in Chawngte ‘C’, Udalthana Road, Chakma Autonomous District Council area, Lawngtlai district ah liquor factory umsak ding ah guanggalna nei hi’n a gen a, a guk ah panlakna um zing chu nasatak ah dodal ding uh hi’n a gen hi. Chuleh, Congress government nuai ah Liquor Prohibition and Control Act, 2014 in Mizo society nasatak ah susia’n a gen hi. MNF in thuneina a chan ngei ngei leh MLPC Act subei ding, Mizoram ah zu kiti himhim khak hiding in le a gen hi.

NEET exam a bawl kal ah a pa’n thi san

Kochi, May 6 *(Nisin Thuhiltu)* : Government ahiloleh private medical colleges ah medical course, dental course ahiloleh postgraduate course zilnuam student te ding ah entrance, National Eligibility cum Entrance Test/ NEET-UG exam bawl Kasthoori Mahalingham K chu a exam bawlkal in a pa’n a beisan hi. Kasthoori Mahalingham K ahileh Vilakkudi, Tamil Nadu’s Thiruvarur district a pat a hia, a pa Krishnasamy Srinivasan tawh Kochi ah NEET exam bawl ding ah May 5 ni ah Kochi tung, a pa lawipa khat sepna Hotel Airlines ah zan giak, tuni, May 6 ah NEET exam bawlna ding mun Nalanda Public School. Thammanam ah a pa’n a va thak lut zaw ah a pa chu a tunna hotel uh a tun kit hun ah buaisia, District General Hospital a tut ua leh cardiac arrest ah hospital ah thi a hi. Kasthoori Mahalingham K chu exam a zaw tiang ah a pa’n a thisan lam helo ah um hi’n a kigen a, exam a zaw ah police leh district administration officials te’n district hospital ah a pa thina mun chu a tut uh a hi.

Afghanistan ah Indian engineer 6 kidnapped ah um

Kabul, May 6 *(Nisin Thuhiltu)* : Afghanistan northern Baghlan province ah um power plant ah sem Indian engineer 6 leh Afghan mi khat kidnapped bawl in a um ui. Zia mi 7 te chu a sepna mun uh government-run power station zuan ah minibus ah a chianau ah lamkal ah galvan chawi pawl khat in a puimang uh a hi. Baghlan police spokesman Zabihullah Shuja in a genna a chun, engineer 6 leh Afghan driver chu lamkal ah kipuimang a hidan gen in, thasuak ah a um theina ding ua panlakna chiatha zing hi’n a gen hi. Indian embassy,Kabul ah official 2 in engineers te kidnapping tawh kisai chu confirm bawl in, mi 6 te chu Da Afghanistan Breshna Sherkat (DABS) nuai ah power generating stations ah sem a hidan uh a gen ui.
Senior Indian embassy official in Indian engineers leh technical experts 150 te’n infrastructure projects nuai ahAfghanistan ah nasem uh hi’n a gen a, puimang ah a umna ziak uh hiat hilo in a gen hi. Afghanistan ah sum dawi ziak ah local mite puimang kiti um mun mama a hina chung ah sum dawina ziak ah kidnapped kibawl hikha thei ding in a kigen hi. Hiatthei khat chu kum 2016 a kha’n Kabul ah Indian aid worker, numei khat kidnapped in a la um a, ni 40 nung ah thasuak in a la um hi.